حِيزْقِييَالْ21rif_ati
ڒْحُوكْمْ خْ ثمُّورْثْ ن لْجَانُوبْ
1يُوسَا-د غَارِي وَاوَاڒْ ن سِيذِي، إِنَّا:2”أَ مِّيسْ ن بْنَاذمْ، أڭّْ ؤُذمْ نّشْ غَارْ لْجَانُوبْ، أجّْ أَوَاڒنْ نّشْ أَذْ ؤُذُومنْ جِّيهثْ ن لْجَانُوبْ ؤُشَا نَابّْ ضِيدّْ إِ وزْغَارْ ن ييَّارْ ذِي ثمُّورْثْ ن لْجَانُوبْ.3إِنِي إِ وزْغَارْ ن ثمُّورْثْ ن لْجَانُوبْ: ’سڒْ إِ وَاوَاڒْ ن سِيذِي: أَمُّو إِ إِقَّارْ سِيذِي إِنُو، سِيذِي: خْزَارْ، نشّْ أَذْ سَّارْغغْ ذَايمْ إِشْثْ ن ثْمسِّي، ثنِّي إِ غَا إِشّنْ كُوڒْ ثَاشجَّارْثْ ثَازِيزَاوْثْ ؤُ كُوڒْ ثَاشجَّارْثْ يُوژْغنْ. أَشعَّاڒْ ن ڒْعابُوقْ وَارْ إِتّْوَاخسِّي ؤُ س ؤُيَا أَذْ تّْوَاشمْضنْ مَارَّا إِغمْبَابْ زِي لْجَانُوبْ أَڒْ شَّامَالْ4ؤُشَا مَارَّا إِوْذَانْ ذ ڒْمَاڒْ أَذْ ژَترنْ أَقَا نشّْ، سِيذِي، ذ ونِّي إِسَّارْغنْ ثِيمسِّي. وَارْ ثتّْوَاخسِّي شَا.‘5نِّيغْ نشّْ: ’أَ، سِيذِي إِنُو، سِيذِي، عَاذْ نِيثْنِي قَّارنْ خَافِي: ’مَا وَارْ إِسِّيوڒْ نتَّا س ثْحُوجَا ن ثْوَافِيثْ وَاهَا؟‘!“ڒْحُوكْمْ ن سِيذِي خْ ؤُرْشَالِيمْ6يُوسَا-د غَارِي وَاوَاڒْ ن سِيذِي، إِنَّا:7”أَ مِّيسْ ن بْنَاذمْ، أڭّْ ؤُذمْ نّشْ غَارْ ؤُرْشَالِيمْ، أجّْ أَوَاڒنْ نّشْ أَذْ ؤُذُومنْ ضِيدّْ إِ ثْزَاوِييِّينْ إِقدّْسنْ ؤُشَا نَابّْ ضِيدّْ إِ ثمُّورْثْ ن إِسْرَائِيل.8إِنِي إِ ثمُّورْثْ ن إِسْرَائِيل: ’أَمُّو إِ إِقَّارْ سِيذِي إِنُو، سِيذِي: خْزَارْ، أَقَا غَارمْ، نشّْ أَذْ د-جبْذغْ سِّيفْ إِنُو زڭْ ؤُفُورُّو ن وغْڒَافْ نّسْ ؤُشَا أَذْ قضْعغْ أَمْ ؤُمْسڭّذْ أَمْ ؤُعفَّانْ.9مِينْزِي أَذْ قضْعغْ أَمْ ؤُمْسڭّذْ أَمْ ؤُعفَّانْ زِي ڒْوسْطْ نّمْ، س ؤُيَا أَذْ د-إِفّغْ سِّيفْ إِنُو زڭْ ؤُفُورُّو ن وغْڒَافْ نّسْ، ضِيدّْ إِ مَارَّا إِنِّي غَارْسنْ أَرِّيمثْ ن ويْسُومْ، زِي لْجَانُوبْ أَڒْ شَّامَالْ،10ؤُشَا مَارَّا إِنِّي غَارْسنْ أَرِّيمثْ ن ويْسُومْ أَذْ سّْننْ، بلِّي نشّْ، سِيذِي، جبْذغْ سِّيفْ إِنُو زڭْ ؤُفُورُّو ن وغْڒَافْ.عمَّارْصْ وَارْ غَارسْ د-إِذِّيكّْوِيڒْ.‘ “11”مَاشَا شكْ، أَ مِّيسْ ن بْنَاذمْ، سْغُونْفَا، سْغُونْفَا زَّاثْ إِ ثِيطَّاوِينْ نْسنْ س ثجْعِينَّاثِينْ تّْوَارْژنْثْ ذ ثَارْزُوڭِي.12أَذْ إِمْسَارْ خْمِي ذ أَشْ إِ غَا إِنِينْ: ’مَاغَارْ ثسّْغُونْفِيذْ أَمُّو؟‘، أَقَا شكْ أَذْ ثِينِيذْ: ’زِي سِّيبّثْ ن مِينْ سْڒِيغْ، مَاغَارْ أَذْ د-يَاسْ ؤُشَا كُوڒْ ؤُڒْ أَذْ إِفْسِي ؤُ مَارَّا إِفَاسّنْ أَذْ هيّْفنْ ؤُ مَارَّا بُوحْبڒْ أَذْ يَارْخُو ؤُ مَارَّا إِفَادّنْ أَذْ أَرْذْبنْ أَمْ وَامَانْ. خْزَارْ، أَذْ د-يَاسْ ؤُشَا أَذْ يِيڒِي، أَمُّو إِ إِقَّارْ سِيذِي إِنُو، سِيذِي.‘ “13يُوسَا-د غَارِي وَاوَاڒْ ن سِيذِي، إِنَّا:14”أَ مِّيسْ ن بْنَاذمْ، نَابّْ ؤُشَا إِنِي: ’أَمُّو إِ إِقَّارْ سِيذِي إِنُو، سِيذِي!‘ ؤُشَا إِنِي:
’سِّيفْ، سِّيفْ، أَقَا إِتّْوَاسّقْضعْ ؤُ إِتّْوَاسُّويْذَا.15إِتّْوَاسّقْضعْ مَاحنْذْ أَذْ إِغَارْصْ ثِيغَارْصَا، إِتّْوَاسُّويْذَا مَاحنْذْ أَذْ إِللّشْ.‘
نِيغْ إِتّْخصَّا إِ نشِّينْ أَذْ نْفَارّحْ، أَذْ نِينِي: ’أَزدْجَاضْ ن ڒحْكَامثْ ن مِّي إِسّحْقَارْ كُوڒْ أَكشُّوضْ نّغْنِي؟‘16’إِمّوْشْ مَاحنْذْ أَذْ إِتّْوَاسُّويْذَا، مَاحنْذْ أَذْ ث طّْفنْ ذڭْ ؤُفُوسْ. سِّيفْ إِتّْوَاقْضعْ ؤُ إِتّْوَاسُّويْذَا، مَاحنْذْ أَذْ إِتّْوَاڭّْ ذڭْ ؤُفُوسْ ن ؤُقتَّاڒْ.17سْغُويّْ ؤُشَا ثْرُوذْ، أَ مِّيسْ ن بْنَاذمْ، مَاغَارْ أَذْ يِيڒِي خْ ڒْڭنْسْ إِنُو، أَذْ يِيڒِي خْ مَارَّا ڒْحُوكَّامْ ن إِسْرَائِيل. أَقَا مّوْشنْ إِ سِّيفْ مُوننْ أَكْ-ذ ڒْڭنْسْ إِنُو. س ؤُيَا، وّثْ خْ ثْمصَّاضْثْ نّشْ.‘18’وَاهْ، سِّيفْ إِتّْوَاقدْجبْ. مَاشَا مَانَا، مَاڒَا أَزدْجَاضْ نِّي إِسّحْقَارنْ مَارَّا أَكشُّوضْ وَارْ د-إِتِّيڒِي عَاذْ؟‘، أَمُّو إِ إِقَّارْ سِيذِي إِنُو، سِيذِي.19’شكْ، أَ مِّيسْ ن بْنَاذمْ، نَابّْ، ؤُشَا وّثْ إِفَاسّنْ إِجّْ ذڭْ ونّغْنِي، مَاغَارْ سِّيفْ أَذْ إِوّثْ ثْنَاينْ، وَاهْ، ثْڒَاثَا ن إِمُورنْ. أَقَا-ث ذ سِّيفْ ن يِينِّي إِتّْوَانْغنْ، سِّيفْ ن ؤُمقّْرَانْ نِّي إِتّْوَانغْ، سِّيفْ نِّي غَارْسنْ إِتَّاذْفنْ،20حِيمَا خنِّي ؤُڒْ أَذْ إِفْسِي ؤُشَا أَذْ مَّارنْينْثْ ثْعنْكْرِيفِينْ. ڒقْضعْ ن سِّيفْ ڭِّيغْ ث خْ مَارَّا ثِيوُّورَا نْسنْ. أَيْ، أَقَا سِّيفْ إِوْجذْ مَاحنْذْ أَذْ إِللّشْ، أَقَا إِتّْوَاجبّْ-د زڭْ ؤُفُورُّو ن وغْڒَافْ مَاحنْذْ أَذْ إِغَارْصْ.21سْمُونْ جّهْذْ نّشْ، قسّْ غَارْ ؤُفُوسِي، بدّْ، قسّْ غَارْ ؤُزڒْمَاضْ، أَرّْ ڒقْضعْ نّشْ مَانِي مَا ثخْسذْ.‘22’ؤُڒَا ذ نشّْ أَذْ وْثغْ إِفَاسّنْ إِنُو إِجّْ ذڭْ ونّغْنِي ؤُشَا أَذْ سَّاريّْحغْ أَسْعَارْ إِنُو. نشّْ، سِيذِي، أَقَا سِّيوْڒغْ.‘ “23يُوسَا-د غَارِي وَاوَاڒْ ن سِيذِي، إِنَّا:24”شكْ، أَ مِّيسْ ن بْنَاذمْ، أڭّْ ثْنَاينْ ن إِبْرِيذنْ زِي مَانِي د غَا يَاسْ سِّيفْ ن ؤُجدْجِيذْ ن بَابِيلْ. زڭْ إِشْثْ ن ثمُّورْثْ أَذْ فّْغنْ نِيثْنِي س ثْنَاينْ إِذْسنْ. نْقشْ إِجّْ ن ؤُشِييَّارْ غَارْ ؤُبطُّو ن وبْرِيذْ، نْقشْ إِ-ث غَارْ ؤُبطُّو ن وبْرِيذْ غَارْ ثنْذِينْثْ.25أَذْ ثْنيّْشذْ أَبْرِيذْ س مَانِيسْ د غَا يَاسْ سِّيفْ غَارْ رَابَّا ن أَيْثْ ن عَامُّونْ ؤُ غَارْ يَاهُوذَا أَڒْ ذَاخڒْ ذِي ثنْذِينْثْ إِتّْوَاسّْجهْذنْ: ؤُرْشَالِيمْ.26مِينْزِي أَجدْجِيذْ ن بَابِيلْ أَذْ إِبدّْ غَارْ مَانِي فَارْقنْ إِبْرِيذنْ، غَارْ ؤُبدُّو ن ثْنَاينْ ن إِبْرِيذنْ نِّي مَاحنْذْ أَذْ إِعزّمْ. أَذْ إِزّرْزْ فْڒِيثْشَاثْ ن ڒْقوْصْ، أَذْ إِسّقْسَا ڒخْيَاڒَاثْ ن لْ-أَصْنَامْ، أَذْ إِخْزَارْ ثْسَا.27ذڭْ ؤُفُوسْ نّسْ ؤُفُوسِي يُوسَا-د وشْثَابْ ن ’ؤُرْشَالِيمْ!‘، مَاحنْذْ أَذْ ذِينْ يڭّْ ڒقْشُوعْ ن وذْهَامْ، مَاحنْذْ أَذْ يَارْزمْ أَقمُّومْ نّسْ س إِغُويَّانْ ن ونْغِي، مَاحنْذْ أَذْ إِسّْڭعّذْ ثْمِيجَّا نّسْ س إِغُويَّانْ ن ؤُمنْغِي، مَاحنْذْ أَذْ إِڭّْ ڒقْشُوعْ ن وذْهَامْ ضِيدّْ إِ ثوُّورَا، مَاحنْذْ أَذْ يڭّْ أَشْبَارْ، مَاحنْذْ أَذْ إِڭّْ لْبَارَاجَاثْ.28مَاشَا مَانْ أَيَا أَذْ غَارْسنْ يِيڒِي أَمْ ؤُڭزّنْ إِغشّنْ ذِي ثِيطَّاوِينْ نْسنْ، مَاغَارْ نِيثْنِي أَقَا غَارْسنْ ثِيجَادْجَاثِينْ إِمثْننْ، مَاشَا نتَّا أَذْ إِسّعْقڒْ خْ ڒْمُوعْصِييّثْ نْسنْ، مَاحنْذْ أَذْ تّْوَاطّْفنْ نِيثْنِي.“29”س ؤُيَا، أَمُّو إِ إِقَّارْ سِيذِي إِنُو سِيذِي: ’مِينْزِي ثسّعْقِيڒمْ خْ ڒْمُوعْصِييّثْ نْومْ ؤُمِي إِعذِّيينْ نْومْ تّْبَاننْ نِيشَانْ، خْمِي تّْوَاژَارّنْ دّْنُوبْ نْومْ س مَارَّا مِينْ ثتّڭّمْ، وَاهْ، مِينْزِي ثْسّعْقِيڒمْ خْ ڒْمُوعْصِييّثْ نْومْ، س ؤُيَا أَذْ كنِّيوْ طّْفنْ س ؤُفُوسْ.‘30ؤُ شكْ، أَعفَّانْ إِيزّْمنْ إِ ڒْموْثْ، شكْ، أَ ڒْحَاكمْ ن إِسْرَائِيل، ونِّي أَسّْ نّسْ أَذْ د-يَاسْ ذِي ڒْوقْثْ ن ڒحْسَابْ أَنڭَّارُو ن ڒْمُوعْصِييّثْ،31أَمُّو إِ ذ أَشْ إِقَّارْ سِيذِي إِنُو، سِيذِي: ’كّسْ أَرژّثْ نِّي، كّسْ تَّاجْ نِّي. أَمُّو وَارْ إِتِّيڒِي عَاذْ. مِينْ إِسّهْوَانْ، أَذْ إِتّْوَاسُّوعْڒَا، ؤُ مِينْ إِسُّوعْڒَانْ، أَذْ د-إِتّْوَاسّهْوَا.32أَذْ أَرّغْ أَيَا ذ ڒْخَارْبثْ، ذ ڒْخَارْبثْ، وَاهْ، أَذْ ث أَرّغْ ذ ڒْخَارْبثْ. مَاشَا مَارَّا أَيَا وَارْ إِتّْغِيمِي عَاذْ، مْغِيرْ أَڒْ د غَا يَاسْ ونِّي غَارْ إِدْجَانْ ڒْحقّْ ؤُشَا نشّْ أَذْ أَسْ ث وْشغْ.‘ “
ڒْحُوكْمْ ن سِيذِي خْ إِعَامُّونِييّنْ33”ؤُ شكْ، أَ مِّيسْ ن بْنَاذمْ، نَابّْ ؤُشَا إِنِي: ’أَمُّو إِ إِقَّارْ سِيذِي إِنُو، سِيذِي، خْ أَيْثْ نْ عَامُّونْ ؤُ خْ ؤُسحْقَارْ نْسنْ!‘ إِنِي:
’سِّيفْ، سِّيفْ إِتّْوَاجبْذْ-د، إِتّْوَاسُّويْذَا مَاحنْذْ أَذْ يشّْ، مَاحنْذْ أَذْ إِللّشْ، ...34- وَاخَّا نِيثْنِي تّْوَاڒَانْ إِ شكْ إِجّْ ن ڒوْحِييْ وَارْ إِدْجِينْ، وَاخَّا نِيثْنِي تّْڭزّْننْ إِ شكْ إِجّْ ن ؤُڭزّنْ إِسّْخَارِّيقنْ -
... أَقَا سِّيفْ إِتّْوَاجبْذْ-د مَاحنْذْ أَذْ شكْ يَارّْ غَارْ إِرَاونْ ن إِعفَّاننْ إِتّْوَاسّْنُوقّْبنْ نِّي زِي د-يُوسَا وَاسّْ نْسنْ ذِي ڒْوقْثْ ن ڒحْسَابْ أَنڭَّارُو ن ڒْمُوعْصِييّثْ.35أَرّْ سِّيفْ غَارْ ؤُفُورُّو ن وغْڒَافْ نّسْ. ذڭْ ومْشَانْ مَانِي د-ثتّْوَاخڒْقذْ، ذِي ثمُّورْثْ ن لْ-أَصلْ نّشْ أَذْ شكْ حكْمغْ.36أَذْ خَاكْ زدْجْعغْ وسْخضْ إِنُو. س ثْمسِّي ن ؤُذُوقّزْ إِنُو ن ؤُفُوڭمْ أَذْ خَاكْ سُوضغْ ؤُشَا أَذْ شكْ ڭّغْ ذڭْ ؤُفُوسْ ن أَيْثْ ن بُو -غزُّو نِّي إِسّْننْ أَذْ ذدْجنْ.37أَذْ ثِيڒِيذْ ذ مَاشَّا إِ ثْمسِّي، إِذَامّنْ نّشْ أَذْ ثنْ سِّيزّْڒنْ ذِي ڒْوسْطْ ن ثمُّورْثْ. وَارْ ثتِّيڒِي قَاعْ ڒِيذَارثْ ذَايكْ، مَاغَارْ نشّْ، سِيذِي، أَقَا سِّيوْڒغْ.‘ “