𐴌𐴡𐴔𐴞𐴀𐴡𐴥𐴓𐴢 7を読んでください。

𐴌𐴡𐴔𐴞𐴀𐴡𐴥𐴓𐴢7

𐴁𐴞𐴘𐴝𐴥-𐴐𐴝𐴥𐴊𐴞𐴃𐴧𐴟 𐴀𐴠𐴑𐴧𐴝𐴥𐴕 𐴔𐴠𐴀𐴏𐴝𐴓𐴢

¹𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴎𐴠𐴃𐴝𐴌𐴝𐴤 𐴐𐴡𐴥𐴌𐴞𐴘𐴡𐴃𐴢 𐴎𐴝𐴕𐴡, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴑𐴞𐴥 𐴕𐴡 𐴎𐴝𐴕𐴡 𐴕𐴠𐴥, 𐴎𐴠 𐴇𐴡𐴕𐴡𐴤 𐴔𐴝𐴕𐴟𐴥𐴙𐴐𐴡𐴌 𐴖𐴡𐴌𐴠 𐴐𐴡𐴥𐴌𐴞𐴘𐴡𐴃𐴡𐴌 𐴇𐴡𐴥𐴑𐴟𐴔𐴡𐴃𐴢 𐴀𐴡𐴃𐴡𐴥𐴊𐴞𐴕 𐴁𐴠 𐴃𐴝𐴥𐴑𐴠 𐴎𐴠𐴃𐴡𐴥𐴊𐴞𐴕 𐴇𐴠𐴥 𐴔𐴝𐴕𐴟𐴥𐴙𐴐𐴧𐴗𐴝 𐴎𐴞𐴕𐴊𐴝 𐴃𐴝𐴥𐴑𐴠؟²𐴔𐴠𐴀𐴏𐴝𐴓𐴢, 𐴐𐴡𐴥𐴌𐴞𐴘𐴡𐴃𐴠 𐴁𐴡𐴖𐴢 𐴖𐴡𐴥𐴌𐴠 𐴕𐴞𐴎𐴡𐴌 𐴇𐴡𐴥𐴐𐴡𐴔 𐴓𐴡𐴥𐴘 𐴀𐴡𐴃𐴡𐴥𐴊𐴞𐴕 𐴁𐴝𐴙𐴕𐴊𐴝𐴤 𐴌𐴝𐴑𐴠𐴥 𐴎𐴠𐴃𐴡𐴥𐴊𐴞𐴕 𐴇𐴡𐴥𐴐𐴡𐴔 𐴎𐴞𐴕𐴊𐴝 𐴃𐴝𐴥𐴑𐴠; 𐴔𐴡𐴕𐴃𐴡𐴌 𐴎𐴡𐴊𐴞 𐴇𐴡𐴥𐴐𐴡𐴔 𐴔𐴡𐴌𐴞𐴎𐴝𐴒𐴡𐴥𐴘, 𐴇𐴞𐴥𐴁𐴝 𐴇𐴠𐴥 𐴐𐴡𐴥𐴌𐴞𐴘𐴡𐴃𐴡𐴃𐴧𐴟 𐴀𐴝𐴎𐴝𐴊𐴢 𐴀𐴡𐴥𐴘𐴎𐴝𐴒𐴡𐴘 𐴎𐴞𐴘𐴝𐴥𐴕𐴠 𐴇𐴞𐴥𐴁𐴝𐴌𐴠 𐴇𐴡𐴥𐴐𐴡𐴔 𐴓𐴡𐴥𐴘 𐴁𐴝𐴣𐴊𐴞𐴥 𐴌𐴝𐴙𐴑𐴧𐴠𐴥.³𐴇𐴠𐴥𐴃𐴡𐴓𐴧𐴝, 𐴇𐴡𐴥𐴐𐴡𐴔 𐴎𐴞𐴕𐴊𐴝 𐴃𐴝𐴥𐴑𐴞𐴃𐴠 𐴎𐴡𐴊𐴞 𐴇𐴞𐴥𐴁𐴝 𐴀𐴝𐴌 𐴀𐴠𐴎𐴧𐴡𐴕𐴡𐴌 𐴀𐴡𐴥𐴘𐴎𐴝𐴒𐴡𐴘, 𐴃𐴡𐴥𐴀𐴘𐴓𐴠 𐴇𐴞𐴥𐴁𐴝𐴌𐴠 𐴎𐴠𐴕𐴝𐴤𐴑𐴟𐴌 𐴈𐴡𐴖𐴝𐴤 𐴎𐴝𐴘𐴁𐴡; 𐴔𐴡𐴕𐴃𐴡𐴌 𐴎𐴡𐴊𐴞 𐴇𐴞𐴥𐴁𐴝𐴌 𐴇𐴡𐴥𐴐𐴡𐴔 𐴔𐴡𐴌𐴞𐴒𐴞𐴘𐴡𐴥𐴘 𐴊𐴠 𐴀𐴡𐴥𐴘𐴓𐴠, 𐴃𐴡𐴥𐴀𐴘𐴓𐴠 𐴇𐴞𐴥𐴁𐴝 𐴇𐴠𐴥 𐴐𐴡𐴥𐴌𐴞𐴘𐴡𐴃𐴡𐴃𐴧𐴟 𐴀𐴝𐴎𐴝𐴊𐴢 𐴉𐴝𐴘𐴧𐴠𐴥, 𐴘𐴝𐴓𐴝 𐴇𐴞𐴥𐴁𐴝 𐴀𐴝𐴌 𐴀𐴠𐴎𐴧𐴡𐴕𐴡𐴌 𐴀𐴡𐴥𐴘𐴎𐴝𐴘𐴓𐴠 𐴘𐴡 𐴇𐴞𐴥𐴁𐴝𐴌𐴠 𐴎𐴠𐴕𐴝𐴤𐴑𐴟𐴌 𐴈𐴡𐴖𐴝𐴤 𐴕𐴡 𐴎𐴝𐴘𐴁𐴡.

⁴𐴇𐴠𐴥𐴕𐴊𐴞𐴓𐴧𐴝, 𐴀𐴡𐴥 𐴀𐴝𐴣𐴀𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴔𐴡𐴀𐴏𐴞𐴤𐴌 𐴅𐴞𐴏𐴞𐴥𐴔𐴡𐴌 𐴇𐴞𐴥𐴏𐴧𐴝 𐴁𐴡𐴕𐴞𐴒𐴞𐴘𐴡𐴥𐴒𐴡𐴘 𐴊𐴠 𐴇𐴠𐴥𐴃𐴡𐴓𐴧𐴝, 𐴐𐴡𐴥𐴌𐴞𐴘𐴡𐴃𐴡𐴃𐴧𐴟 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴔𐴡𐴌𐴞𐴒𐴞𐴘𐴡𐴥𐴒𐴡𐴘. 𐴘𐴝𐴓𐴝 𐴃𐴡 𐴃𐴟𐴣𐴀𐴝𐴥𐴌𐴝 𐴀𐴝𐴌 𐴀𐴠𐴎𐴧𐴡𐴕𐴡𐴌 𐴀𐴡𐴥𐴘𐴒𐴞𐴘𐴡𐴒𐴡𐴘, 𐴘𐴝𐴥𐴕𐴞 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠 𐴊𐴠 𐴇𐴠𐴥 𐴔𐴡𐴀𐴏𐴞𐴤𐴌 𐴀𐴡𐴥𐴘𐴒𐴞𐴘𐴡𐴒𐴡𐴘, 𐴎𐴠𐴀𐴕𐴠 𐴀𐴝𐴣𐴀𐴌𐴝 𐴀𐴝𐴓𐴧𐴝𐴓𐴧𐴝 𐴒𐴟𐴓𐴝𐴒𐴝𐴓𐴝 𐴊𐴡𐴥𐴌𐴝𐴘.⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴣𐴃𐴧𐴠𐴥 𐴀𐴝𐴣𐴀𐴌𐴝 𐴀𐴞𐴕𐴏𐴝𐴥𐴕𐴞 𐴉𐴞𐴥𐴃𐴡𐴌𐴡𐴃𐴢 𐴔𐴡𐴎𐴞𐴕 𐴎𐴞𐴕𐴊𐴞𐴒𐴞 𐴈𐴝𐴍𐴝𐴘𐴃𐴝𐴥𐴔, 𐴇𐴠𐴥𐴣𐴃𐴧𐴠 𐴐𐴡𐴥𐴌𐴞𐴘𐴡𐴃𐴡𐴌 𐴉𐴡𐴘𐴊𐴝 𐴒𐴡𐴙𐴅𐴧𐴝𐴥 𐴒𐴟𐴕𐴝𐴤𐴌 𐴀𐴝𐴎𐴧𐴟 𐴀𐴡𐴥𐴑𐴧𐴡𐴓𐴠 𐴀𐴝𐴣𐴀𐴌𐴝𐴌 𐴅𐴞𐴏𐴞𐴥𐴔𐴡𐴌 𐴇𐴞𐴥𐴏𐴧𐴝 𐴀𐴡𐴥𐴑𐴧𐴡𐴓𐴡𐴃𐴢 𐴈𐴝𐴔 𐴒𐴡𐴙𐴃𐴧𐴡𐴥, 𐴎𐴠𐴀𐴕𐴠 𐴀𐴝𐴣𐴀𐴌𐴝 𐴀𐴠𐴕𐴊𐴞𐴓𐴧𐴝 𐴒𐴟𐴓𐴝𐴒𐴝𐴓𐴝 𐴊𐴡𐴥𐴌𐴝𐴘 𐴎𐴞𐴀𐴕𐴠 𐴔𐴡𐴦𐴃𐴢 𐴀𐴝𐴕𐴠𐴤.⁶𐴓𐴠𐴑𐴞𐴕 𐴀𐴝𐴣𐴀𐴌𐴝 𐴎𐴞𐴘𐴝𐴥𐴕𐴡𐴃𐴢 𐴁𐴡𐴕𐴊𐴞 𐴀𐴝𐴐𐴧𐴞𐴥𐴓𐴝𐴔, 𐴇𐴞𐴥𐴘𐴝𐴕𐴡𐴃𐴧𐴟 𐴔𐴡𐴌𐴞𐴘𐴡𐴌𐴠 𐴘𐴝𐴓𐴝 𐴐𐴡𐴥𐴌𐴞𐴘𐴡𐴃𐴡𐴃𐴧𐴟 𐴀𐴝𐴎𐴝𐴊𐴢 𐴉𐴝𐴘𐴧𐴞𐴥. 𐴇𐴠𐴥𐴃𐴡𐴓𐴧𐴝 𐴀𐴝𐴣𐴀𐴌𐴝 𐴀𐴝𐴌 𐴇𐴠𐴥 𐴓𐴠𐴙𐴑𐴧𐴝𐴥 𐴐𐴡𐴥𐴌𐴞𐴘𐴡𐴃𐴡𐴌 𐴊𐴞𐴦𐴘𐴝 𐴉𐴟𐴌𐴝𐴕 𐴎𐴞𐴕𐴊𐴞𐴒𐴞𐴌 𐴒𐴟𐴓𐴝𐴔 𐴕𐴡, 𐴁𐴡𐴥𐴓𐴑𐴠 𐴂𐴝𐴑-𐴌𐴟𐴀𐴌 𐴊𐴞𐴦𐴘𐴝 𐴕𐴡𐴘𐴝 𐴎𐴞𐴕𐴊𐴞𐴒𐴞𐴌 𐴒𐴟𐴓𐴝𐴔.

𐴐𐴡𐴥𐴌𐴞𐴘𐴡𐴃𐴢 𐴀𐴠𐴊𐴧𐴠 𐴒𐴟𐴕𐴝𐴤

⁷𐴃𐴡𐴥𐴀𐴘𐴓𐴠 𐴀𐴝𐴣𐴀𐴌𐴝 𐴑𐴞𐴦 𐴈𐴡𐴘𐴃𐴝𐴥𐴔؟ 𐴐𐴡𐴥𐴌𐴞𐴘𐴡𐴃𐴢 𐴒𐴟𐴕𐴝𐴤 𐴊𐴠 𐴕𐴠𐴥؟ 𐴁𐴞𐴓𐴑𐴟𐴥𐴓𐴢 𐴕𐴡! 𐴁𐴡𐴥𐴓𐴑𐴠 𐴐𐴡𐴥𐴌𐴞𐴘𐴡𐴃𐴢 𐴏𐴝𐴥𐴌𐴝 𐴀𐴝𐴀𐴛 𐴒𐴟𐴕𐴝𐴤 𐴏𐴞𐴕𐴞𐴥 𐴕𐴡 𐴉𐴝𐴙𐴃𐴧𐴝𐴔, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴐𐴡𐴥𐴌𐴞𐴘𐴡𐴃𐴠 𐴎𐴡𐴊𐴞 𐴀𐴠𐴕𐴊𐴞𐴓𐴧𐴝 𐴕𐴡 𐴈𐴡𐴘𐴃𐴡𐴤, ”𐴓𐴝𐴓𐴡𐴥𐴏𐴢 𐴕𐴡 𐴒𐴡𐴌𐴞𐴥𐴁𐴝,“ 𐴃𐴡𐴥𐴀𐴘𐴓𐴠 𐴓𐴝𐴓𐴡𐴥𐴏𐴢 𐴑𐴞𐴦 𐴊𐴠 𐴀𐴝𐴀𐴛 𐴕𐴡 𐴎𐴝𐴙𐴕𐴃𐴝𐴔.⁸𐴔𐴡𐴕𐴃𐴡𐴌 𐴒𐴟𐴕𐴝𐴤𐴘𐴠 𐴇𐴠𐴥 𐴇𐴡𐴥𐴑𐴟𐴔𐴡𐴃𐴧𐴟 𐴉𐴝𐴥𐴘𐴊𐴝 𐴃𐴟𐴓𐴞𐴤 𐴀𐴝𐴣𐴀𐴌 𐴁𐴟𐴥𐴃𐴡𐴌𐴠 𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴓𐴝𐴓𐴡𐴥𐴏𐴢 𐴉𐴡𐴘𐴊𐴝 𐴒𐴡𐴙𐴅𐴧𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴐𐴡𐴥𐴌𐴞𐴘𐴡𐴃𐴢 𐴕𐴡 𐴃𐴝𐴥𐴑𐴞𐴓𐴠, 𐴒𐴟𐴕𐴝𐴤 𐴃𐴡 𐴔𐴡𐴌𐴝𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘 𐴃𐴝𐴥𐴑𐴠.⁹𐴀𐴠𐴑 𐴇𐴝𐴓𐴠 𐴀𐴝𐴀𐴛 𐴐𐴡𐴥𐴌𐴞𐴘𐴡𐴃𐴢 𐴏𐴝𐴥𐴌𐴝 𐴎𐴞𐴕𐴊𐴝 𐴀𐴝𐴐𐴧𐴞𐴥𐴓𐴝𐴔, 𐴔𐴡𐴕𐴃𐴡𐴌 𐴇𐴠𐴥 𐴇𐴡𐴥𐴑𐴟𐴔 𐴀𐴝𐴙𐴐𐴧𐴠𐴥 𐴌𐴝𐴥𐴌 𐴒𐴟𐴕𐴝𐴤 𐴎𐴞𐴕𐴊𐴝 𐴀𐴡𐴥𐴘𐴧𐴠, 𐴀𐴝𐴦𐴌 𐴀𐴝𐴀𐴛 𐴔𐴡𐴌𐴞𐴒𐴞𐴘𐴞𐴥𐴒𐴡𐴘.¹⁰𐴇𐴠𐴥 𐴇𐴡𐴥𐴑𐴟𐴔 𐴎𐴞𐴘𐴝𐴥𐴕𐴠 𐴎𐴞𐴕𐴊𐴞𐴒𐴞 𐴀𐴝𐴕𐴞𐴤𐴁𐴝𐴌 𐴀𐴝𐴐𐴧𐴞𐴥𐴓𐴢, 𐴇𐴞𐴥𐴘𐴝𐴕𐴠 𐴀𐴝𐴣𐴀𐴌 𐴓𐴧𐴝 𐴔𐴡𐴦𐴃𐴢 𐴀𐴝𐴙𐴕𐴧𐴠𐴤.¹¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴒𐴟𐴕𐴝𐴤𐴘𐴠 𐴇𐴠𐴥 𐴇𐴡𐴥𐴑𐴟𐴔𐴡𐴃𐴧𐴟 𐴉𐴝𐴥𐴘𐴊𐴝 𐴃𐴟𐴓𐴞𐴤 𐴀𐴝𐴣𐴀𐴌𐴠𐴥 𐴊𐴝𐴒𐴝 𐴊𐴞𐴘𐴠𐴥, 𐴀𐴝𐴦𐴌 𐴇𐴠𐴥 𐴇𐴡𐴥𐴑𐴟𐴔𐴡𐴌 𐴊𐴟𐴖𐴝𐴌𐴝 𐴀𐴝𐴣𐴀𐴌𐴠𐴥 𐴔𐴝𐴌𐴞𐴉𐴠𐴥𐴓𐴝𐴘𐴧𐴠.¹²𐴇𐴠𐴥 𐴀𐴞𐴥𐴏𐴝𐴉𐴠, 𐴐𐴡𐴥𐴌𐴞𐴘𐴡𐴃𐴢 𐴂𐴝𐴑, 𐴀𐴝𐴦𐴌 𐴇𐴠𐴥𐴍𐴠 𐴀𐴝𐴏𐴠𐴤 𐴊𐴠 𐴇𐴡𐴥𐴑𐴟𐴔 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴂𐴝𐴑, 𐴀𐴞𐴕𐴏𐴝𐴥𐴉𐴞 𐴀𐴠𐴊𐴧𐴠 𐴒𐴡𐴔.

¹³𐴇𐴞𐴥𐴘𐴝𐴕𐴡𐴌 𐴔𐴝𐴀𐴕𐴞 𐴑𐴞𐴥 𐴎𐴞𐴘𐴝𐴥𐴕 𐴒𐴡𐴔 𐴇𐴞𐴥𐴘𐴝𐴕 𐴀𐴝𐴣𐴀𐴌 𐴓𐴧𐴝 𐴔𐴡𐴦𐴃𐴢 𐴁𐴡𐴙𐴕𐴧𐴠𐴥 𐴊𐴠𐴥؟ 𐴁𐴞𐴓𐴑𐴟𐴥𐴓𐴢 𐴕𐴡! 𐴁𐴡𐴥𐴓𐴑𐴠 𐴒𐴟𐴕𐴝𐴤𐴌𐴠 𐴒𐴟𐴕𐴝𐴤 𐴀𐴞𐴥𐴏𐴝𐴉𐴠 𐴀𐴡𐴥𐴃𐴢 𐴉𐴝𐴘 𐴁𐴡𐴓𐴧𐴝 𐴁𐴡𐴥𐴓𐴞 𐴒𐴟𐴕𐴝𐴤𐴘𐴠 𐴎𐴞𐴘𐴝𐴥𐴕 𐴒𐴡𐴔 𐴇𐴞𐴥𐴘𐴝𐴕 𐴀𐴠𐴏𐴃𐴠𐴔𐴝𐴓𐴢 𐴒𐴡𐴌𐴞𐴥 𐴀𐴝𐴣𐴀𐴌 𐴓𐴧𐴝 𐴔𐴡𐴦𐴃𐴢 𐴀𐴝𐴙𐴕𐴧𐴠𐴤 𐴊𐴠, 𐴎𐴠𐴀𐴕𐴠 𐴇𐴠𐴥 𐴇𐴡𐴥𐴑𐴟𐴔𐴡𐴌 𐴊𐴟𐴖𐴝𐴌𐴝 𐴊𐴝𐴈𐴝𐴤 𐴎𐴝 𐴊𐴠 𐴑𐴞, 𐴒𐴟𐴕𐴝𐴤 𐴀𐴠𐴁𐴧𐴠 𐴈𐴡𐴥𐴌𐴝𐴉𐴢.

𐴒𐴟𐴕𐴝𐴤 𐴓𐴡𐴥𐴘 𐴓𐴡𐴌𐴇𐴡𐴥𐴌𐴝

¹⁴𐴀𐴝𐴣𐴀𐴌𐴝 𐴃𐴡 𐴎𐴝𐴕𐴞, 𐴐𐴡𐴥𐴌𐴞𐴘𐴡𐴃𐴢 𐴒𐴝𐴁𐴞; 𐴔𐴡𐴕𐴃𐴡𐴌 𐴀𐴝𐴀𐴛 𐴊𐴠 𐴅𐴞𐴏𐴞𐴥𐴔𐴞; 𐴀𐴝𐴣𐴀𐴌𐴠𐴥 𐴒𐴟𐴕𐴝𐴤𐴌 𐴒𐴟𐴓𐴝𐴔𐴞𐴃𐴢 𐴁𐴠𐴏𐴞𐴉𐴠𐴥𐴓𐴝 𐴒𐴞𐴥𐴘𐴠.¹⁵𐴀𐴝𐴀𐴛 𐴑𐴞𐴦 𐴒𐴡𐴌𐴞𐴥 𐴀𐴝𐴀𐴛 𐴕𐴞𐴎𐴠 𐴀𐴟𐴥𐴊𐴧𐴗𐴝 𐴕𐴡 𐴁𐴟𐴎𐴞𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴀𐴝𐴣𐴀𐴃𐴧𐴟 𐴎𐴞𐴘𐴝𐴥𐴕 𐴒𐴡𐴙𐴃𐴧𐴡𐴥 𐴔𐴡𐴕𐴠𐴈𐴡𐴀 𐴇𐴞𐴥𐴘𐴝𐴕 𐴒𐴡𐴌𐴞𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴝𐴣𐴀𐴃𐴧𐴟 𐴕𐴝𐴉𐴡𐴥𐴌𐴡𐴃𐴢 𐴓𐴝𐴒𐴠 𐴊𐴠 𐴇𐴞𐴥𐴘𐴝𐴕 𐴁𐴠 𐴒𐴡𐴌𐴞𐴥.¹⁶𐴀𐴝𐴀𐴛 𐴎𐴠𐴃𐴧𐴡𐴥𐴃𐴢 𐴀𐴝𐴣𐴀𐴃𐴧𐴟 𐴎𐴞𐴘𐴝𐴥𐴕 𐴒𐴡𐴙𐴃𐴧𐴡𐴥 𐴔𐴡𐴕𐴠 𐴕𐴡 𐴈𐴡𐴀 𐴇𐴞𐴥𐴘𐴝𐴕 𐴒𐴡𐴌𐴞𐴥, 𐴃𐴡𐴥𐴀𐴘𐴓𐴠 𐴃𐴡 𐴐𐴡𐴥𐴌𐴞𐴘𐴡𐴃𐴢 𐴒𐴡𐴔 𐴁𐴡𐴓𐴞 𐴀𐴝𐴀𐴛 𐴑𐴡𐴁𐴟𐴓𐴢 𐴒𐴡𐴌𐴞𐴥.¹⁷𐴇𐴠𐴥 𐴏𐴟𐴥𐴌𐴡𐴃𐴠, 𐴇𐴞𐴥𐴘𐴝𐴕 𐴒𐴡𐴌𐴡𐴤𐴘𐴝 𐴀𐴝𐴀𐴛 𐴕𐴡, 𐴁𐴡𐴥𐴓𐴑𐴠 𐴀𐴝𐴣𐴀𐴌 𐴁𐴟𐴥𐴃𐴡𐴌𐴠 𐴃𐴝𐴥𐴑𐴠 𐴊𐴠 𐴇𐴠𐴥 𐴒𐴟𐴕𐴝𐴤.¹⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴎𐴝𐴕𐴞 𐴊𐴠, 𐴀𐴝𐴣𐴀𐴌 𐴁𐴟𐴥𐴃𐴡𐴌𐴠, 𐴘𐴝𐴥𐴕𐴞 𐴀𐴝𐴣𐴀𐴌 𐴅𐴞𐴏𐴞𐴥𐴔𐴡𐴌 𐴁𐴟𐴥𐴃𐴡𐴌𐴠 𐴒𐴡𐴔 𐴑𐴠𐴏𐴧𐴟𐴥 𐴕𐴝𐴥𐴘. 𐴁𐴠𐴐𐴡𐴥𐴑, 𐴒𐴡𐴔 𐴔𐴝𐴥𐴕 𐴒𐴡𐴌𐴞𐴥𐴁𐴝𐴌 𐴀𐴝𐴎𐴧𐴟 𐴀𐴝𐴣𐴀𐴃𐴧𐴟 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴀𐴝𐴀𐴛 𐴇𐴞𐴥𐴘𐴝𐴕 𐴒𐴡𐴌𐴞𐴥 𐴕𐴡 𐴉𐴝𐴌𐴞.¹⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠 𐴒𐴡𐴔 𐴈𐴝𐴔 𐴔𐴝𐴥𐴕 𐴀𐴝𐴣𐴀𐴃𐴧𐴟 𐴒𐴡𐴙𐴃𐴧𐴡𐴥 𐴔𐴡𐴕𐴠𐴈𐴡𐴀, 𐴀𐴝𐴀𐴛 𐴃𐴡 𐴇𐴞𐴥𐴘𐴝𐴕 𐴕𐴡 𐴒𐴡𐴌𐴞𐴥; 𐴁𐴡𐴥𐴓𐴑𐴠 𐴎𐴠 𐴁𐴟𐴌𐴝 𐴈𐴝𐴔 𐴔𐴝𐴥𐴕 𐴀𐴝𐴣𐴀𐴃𐴧𐴟 𐴒𐴡𐴙𐴃𐴧𐴡𐴥 𐴔𐴡𐴕𐴠 𐴕𐴡 𐴈𐴡𐴀, 𐴇𐴞𐴥𐴘𐴝𐴕 𐴁𐴠 𐴒𐴡𐴌𐴝𐴥𐴃𐴢 𐴃𐴝𐴥𐴑𐴞.²⁰𐴀𐴝𐴣𐴀𐴃𐴧𐴟 𐴎𐴞𐴘𐴝𐴥𐴕 𐴒𐴡𐴙𐴃𐴧𐴡𐴥 𐴔𐴡𐴕𐴠 𐴕𐴡 𐴈𐴡𐴀 𐴇𐴞𐴥𐴘𐴝𐴕 𐴎𐴠𐴃𐴧𐴡𐴥𐴃𐴢 𐴀𐴝𐴀𐴛 𐴒𐴡𐴌𐴞𐴥, 𐴃𐴡𐴥𐴀𐴘𐴓𐴠 𐴃𐴡 𐴇𐴞𐴥𐴘𐴝𐴕 𐴒𐴡𐴌𐴡𐴤𐴘𐴝 𐴀𐴝𐴀𐴛 𐴕𐴡, 𐴁𐴡𐴥𐴓𐴑𐴠 𐴀𐴝𐴣𐴀𐴌 𐴁𐴟𐴥𐴃𐴡𐴌𐴠 𐴃𐴝𐴥𐴑𐴠 𐴊𐴠 𐴇𐴠𐴥 𐴒𐴟𐴕𐴝𐴤.

²¹𐴘𐴝𐴓𐴝 𐴃𐴡𐴥𐴀𐴘𐴓𐴠 𐴀𐴝𐴣𐴀𐴌 𐴁𐴟𐴥𐴃𐴡𐴌𐴠 𐴀𐴠𐴑𐴧𐴝𐴥𐴕 𐴕𐴞𐴘𐴡𐴔 𐴓𐴡𐴦𐴃𐴢 𐴉𐴝𐴙𐴌 𐴊𐴠 𐴑𐴞, 𐴒𐴡𐴔 𐴔𐴝𐴥𐴕 𐴒𐴡𐴙𐴃𐴧𐴡𐴥 𐴔𐴡𐴕𐴠𐴈𐴡𐴘𐴓𐴠𐴥, 𐴀𐴝𐴣𐴀𐴌 𐴇𐴝𐴣𐴏𐴠 𐴁𐴟𐴌𐴝 𐴒𐴝𐴥𐴕 𐴀𐴝𐴀𐴘𐴢 𐴁𐴡𐴀𐴘𐴢 𐴃𐴝𐴥𐴑𐴠.²²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴡 𐴕𐴞𐴎𐴡𐴌 𐴁𐴟𐴥𐴃𐴡𐴃𐴧𐴟 𐴀𐴝𐴓𐴧𐴝𐴌 𐴕𐴞𐴘𐴡𐴔𐴡𐴌𐴠 𐴁𐴞𐴐𐴞𐴤 𐴉𐴡𐴏𐴡𐴥𐴕 𐴒𐴡𐴌𐴞𐴥,²³𐴔𐴡𐴕𐴃𐴡𐴌 𐴀𐴝𐴀𐴛 𐴊𐴠𐴑𐴞𐴥𐴌 𐴊𐴠, 𐴀𐴝𐴣𐴀𐴌 𐴅𐴞𐴏𐴞𐴥𐴔𐴡𐴌 𐴇𐴞𐴥𐴏𐴧𐴝 𐴀𐴡𐴥𐴑𐴧𐴡𐴓𐴡𐴃𐴢 𐴀𐴝𐴌𐴡𐴤 𐴀𐴠𐴑𐴧𐴝𐴥𐴕 𐴕𐴞𐴘𐴡𐴔 𐴀𐴝𐴏𐴠𐴤, 𐴎𐴞𐴘𐴝𐴥𐴕𐴠 𐴀𐴝𐴣𐴀𐴌 𐴊𐴞𐴓𐴡𐴌 𐴇𐴠𐴥 𐴕𐴞𐴘𐴡𐴔 𐴓𐴡𐴘 𐴓𐴝𐴌𐴝𐴥𐴘 𐴒𐴡𐴌𐴞𐴥 𐴀𐴝𐴣𐴀𐴌𐴠𐴥 𐴒𐴟𐴕𐴝𐴤𐴌 𐴕𐴞𐴘𐴡𐴔 𐴖𐴝𐴀𐴕𐴡𐴌 𐴁𐴡𐴕𐴊𐴞 𐴁𐴝𐴕𐴝𐴘 𐴌𐴝𐴑𐴠𐴥 𐴎𐴞𐴘𐴝𐴥𐴕 𐴀𐴝𐴣𐴀𐴌 𐴅𐴞𐴏𐴞𐴥𐴔𐴡𐴌 𐴇𐴞𐴥𐴏𐴧𐴝 𐴀𐴡𐴥𐴑𐴧𐴡𐴓𐴡𐴃𐴢 𐴃𐴝𐴥𐴑𐴠.²⁴𐴀𐴝𐴀𐴛 𐴁𐴞𐴐𐴞𐴤 𐴉𐴟𐴐𐴑𐴝𐴌𐴝𐴤! 𐴔𐴡𐴦𐴃𐴢 𐴀𐴝𐴕𐴠𐴤 𐴊𐴠 𐴅𐴞𐴏𐴞𐴥𐴔 𐴘𐴝𐴀𐴕𐴡𐴃𐴧𐴟 𐴀𐴝𐴣𐴀𐴌𐴠𐴥 𐴇𐴡𐴕𐴠 𐴁𐴝𐴏𐴝𐴘𐴁𐴡𐴥؟²⁵𐴀𐴝𐴓𐴧𐴝𐴌𐴠 𐴐𐴟𐴥𐴑𐴟𐴌𐴞𐴘𐴝, 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴠𐴥 𐴀𐴞𐴏𐴝𐴤 𐴔𐴡𐴀𐴏𐴞𐴤 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑𐴡𐴌 𐴊𐴟𐴖𐴝𐴌𐴝 𐴁𐴝𐴏𐴝𐴘𐴧𐴠𐴥!
𐴇𐴠𐴥 𐴀𐴞𐴥𐴏𐴝𐴉𐴠, 𐴀𐴠𐴑 𐴌𐴟𐴖𐴝𐴃𐴠 𐴃𐴡 𐴀𐴝𐴣𐴀𐴌 𐴊𐴞𐴓𐴡𐴃𐴢 𐴀𐴝𐴏𐴠𐴤 𐴊𐴠, 𐴀𐴝𐴓𐴧𐴝𐴌 𐴕𐴞𐴘𐴡𐴔𐴡𐴌 𐴒𐴟𐴓𐴝𐴔𐴞 𐴒𐴡𐴌𐴞𐴥 𐴁𐴡𐴓𐴧𐴝; 𐴔𐴡𐴕𐴃𐴡𐴌 𐴀𐴝𐴌𐴀𐴠𐴑 𐴌𐴟𐴖𐴝𐴃𐴠 𐴀𐴝𐴣𐴀𐴌 𐴀𐴞𐴕𐴏𐴝𐴥𐴕𐴞 𐴉𐴞𐴥𐴃𐴡𐴌𐴡𐴃𐴠 𐴀𐴝𐴣𐴀𐴌𐴠𐴥 𐴒𐴟𐴕𐴝𐴤𐴌 𐴕𐴞𐴘𐴡𐴔𐴡𐴌 𐴒𐴟𐴓𐴝𐴔 𐴁𐴝𐴕𐴝𐴘 𐴌𐴝𐴑𐴠𐴥.

The Word for the World International

https://app.library.bible/content/87faca8b51c22590