𐴌𐴡𐴔𐴞𐴀𐴡𐴥𐴓𐴢 15を読んでください。

𐴌𐴡𐴔𐴞𐴀𐴡𐴥𐴓𐴢15

𐴀𐴝𐴌𐴀𐴠𐴑 𐴎𐴡𐴕𐴡𐴌 𐴑𐴟𐴥𐴐𐴞 𐴏𐴡𐴀, 𐴕𐴞𐴎𐴡𐴌 𐴕𐴡

¹𐴇𐴠𐴥𐴃𐴡𐴓𐴧𐴝, 𐴀𐴝𐴣𐴀𐴌𐴝 𐴎𐴠𐴃𐴝𐴌𐴝𐴤𐴌 𐴀𐴞𐴔𐴝𐴕 𐴔𐴡𐴎𐴁𐴟𐴃𐴢, 𐴀𐴝𐴣𐴀𐴌𐴝𐴃𐴧𐴟 𐴕𐴞𐴎𐴡𐴌 𐴑𐴟𐴥𐴐𐴞 𐴕𐴡 𐴏𐴝𐴀𐴘𐴢 𐴑𐴡𐴔𐴎𐴟𐴌 𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴡𐴌𐴠 𐴀𐴞𐴥𐴃𐴝𐴌𐴝𐴌 𐴉𐴟𐴣𐴎𐴝𐴤 𐴁𐴡𐴖𐴝𐴥𐴃𐴢 𐴔𐴡𐴊𐴡𐴃𐴢 𐴒𐴡𐴌𐴝𐴥𐴌 𐴉𐴡𐴥𐴌𐴡𐴏𐴢.²𐴀𐴝𐴣𐴀𐴌𐴝 𐴉𐴡𐴃𐴧𐴞𐴥𐴑𐴞𐴘𐴡𐴃𐴧𐴟 𐴕𐴞𐴎𐴡𐴌 𐴀𐴝𐴃𐴠𐴇𐴝𐴣𐴏𐴡𐴥𐴌 𐴔𐴝𐴙𐴕𐴐𐴡𐴥𐴌𐴠 𐴀𐴞𐴥𐴃𐴝𐴌𐴝𐴌 𐴁𐴝𐴥𐴓𐴝𐴘 𐴓𐴧𐴝 𐴑𐴟𐴥𐴐𐴞 𐴌𐴝𐴑𐴝𐴤𐴌 𐴎𐴡𐴌𐴟𐴌, 𐴀𐴞𐴥𐴃𐴝𐴌𐴝𐴌𐴠 𐴁𐴝𐴕𐴝𐴘𐴃𐴟𐴓𐴞𐴤 𐴁𐴡𐴓𐴧𐴝.³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴡𐴀𐴏𐴞𐴤 𐴕𐴞𐴎𐴠 𐴀𐴟𐴥𐴊𐴧𐴗𐴝 𐴕𐴞𐴎𐴡𐴌 𐴑𐴟𐴥𐴐𐴞 𐴕𐴡𐴥 𐴏𐴝𐴀. 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ”𐴎𐴠𐴃𐴝𐴌𐴝𐴤 𐴃𐴟𐴣𐴀𐴝𐴥𐴣𐴌𐴠 𐴁𐴠𐴀𐴞𐴎𐴧𐴡𐴃𐴞 𐴒𐴡𐴙𐴅𐴧𐴞𐴥𐴓𐴢 𐴀𐴞𐴥𐴃𐴝𐴌𐴝𐴌 𐴇𐴠𐴥 𐴁𐴠𐴀𐴞𐴎𐴧𐴡𐴃𐴞 𐴀𐴝𐴣𐴀𐴌 𐴖𐴡𐴌𐴠 𐴀𐴝𐴙𐴐𐴧𐴠𐴥.“ ⁴𐴘𐴝𐴦𐴌 𐴀𐴝𐴒𐴠 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴎𐴞𐴀𐴕-𐴎𐴞𐴀𐴕 𐴓𐴠𐴑𐴝𐴥 𐴒𐴞𐴥𐴀𐴓𐴢, 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴝𐴣𐴀𐴌𐴝𐴌𐴠 𐴐𐴞𐴥𐴑𐴧𐴝 𐴊𐴞𐴥 𐴁𐴡𐴓𐴧𐴝 𐴁𐴠 𐴓𐴠𐴑𐴝𐴥 𐴒𐴞𐴥𐴀𐴓𐴢, 𐴎𐴠𐴀𐴕𐴠 𐴇𐴠𐴥𐴍𐴠 𐴎𐴠 𐴏𐴡𐴁𐴡𐴥𐴌 𐴀𐴠𐴊𐴧𐴠 𐴅𐴡𐴏𐴁𐴝𐴌 𐴁𐴝𐴦𐴁𐴟𐴃𐴠 𐴀𐴝𐴏𐴠𐴤 𐴇𐴞𐴥𐴀𐴕𐴡𐴃𐴧𐴟 𐴀𐴝𐴣𐴀𐴌𐴝 𐴀𐴝𐴐𐴝𐴤 𐴇𐴝𐴥𐴏𐴞𐴓𐴢 𐴒𐴡𐴌𐴞𐴥.

⁵𐴏𐴡𐴁𐴡𐴥𐴌 𐴀𐴠𐴊𐴧𐴠 𐴅𐴡𐴏𐴁𐴝 𐴊𐴡𐴦𐴘𐴝 𐴀𐴝𐴓𐴧𐴝𐴘𐴠 𐴔𐴡𐴀𐴏𐴞𐴤 𐴀𐴞𐴏𐴝𐴤𐴃𐴧𐴟 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴠𐴑𐴞𐴤 𐴔𐴡𐴕 𐴃𐴟𐴣𐴀𐴝𐴥𐴌𐴝𐴌 𐴀𐴝𐴉𐴡𐴤𐴏𐴡𐴃𐴢 𐴔𐴝𐴥𐴎𐴠 𐴃𐴝𐴥𐴑𐴞 𐴁𐴡𐴓𐴧𐴝 𐴃𐴡𐴖𐴉𐴞𐴥𐴑 𐴊𐴡𐴑,⁶𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴀𐴠𐴑 𐴔𐴡𐴕𐴠 𐴀𐴠𐴊𐴧𐴠 𐴀𐴠𐴑 𐴀𐴝𐴁𐴝𐴏𐴠 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴀𐴝𐴓𐴧𐴝 𐴁𐴝𐴉𐴡𐴌 𐴔𐴡𐴈𐴞𐴥𐴔𐴝 𐴒𐴡𐴌𐴡𐴤.

𐴑𐴟𐴥𐴐𐴈𐴡𐴥𐴁𐴡𐴌 𐴁𐴠𐴒𐴧𐴟𐴥𐴕𐴡𐴓𐴧𐴝 𐴀𐴠𐴑 𐴋𐴡𐴙𐴓𐴧𐴝

⁷𐴇𐴠𐴥𐴃𐴡𐴓𐴧𐴝 𐴈𐴡𐴀𐴙𐴌 𐴊𐴠, 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴑𐴡𐴁𐴟𐴓𐴢 𐴒𐴡𐴌𐴡𐴤, 𐴎𐴠𐴕𐴊𐴞𐴓𐴧𐴝 𐴔𐴡𐴀𐴏𐴞𐴤𐴘𐴠 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌𐴠 𐴑𐴡𐴁𐴟𐴓𐴢 𐴒𐴡𐴙𐴅𐴧𐴠𐴥, 𐴎𐴠𐴀𐴕𐴠 𐴀𐴝𐴓𐴧𐴝𐴌 𐴔𐴡𐴈𐴞𐴥𐴔𐴝 𐴀𐴡𐴥.⁸𐴀𐴝𐴀𐴛 𐴈𐴡𐴀𐴙𐴌 𐴊𐴠 𐴑𐴞 𐴈𐴡𐴘𐴓𐴠𐴥, 𐴀𐴝𐴓𐴧𐴝𐴌 𐴈𐴡𐴃𐴝𐴤 𐴏𐴡𐴥𐴘𐴧𐴞 𐴊𐴠 𐴏𐴝𐴥𐴁𐴟𐴃𐴢 𐴒𐴡𐴌𐴞𐴥 𐴁𐴡𐴓𐴧𐴝 𐴔𐴡𐴀𐴏𐴞𐴤 𐴀𐴝𐴀𐴘𐴢 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴈𐴝𐴥𐴀𐴊𐴠𐴔 𐴁𐴡𐴙𐴕𐴧𐴠𐴥, 𐴎𐴠𐴀𐴕𐴠 𐴁𐴝𐴉𐴊𐴝𐴊𐴝 𐴒𐴟𐴥𐴕 𐴓𐴡𐴥𐴘 𐴒𐴡𐴌𐴝𐴥 𐴒𐴞𐴥𐴀𐴓𐴢 𐴊𐴠 𐴖𐴝𐴦𐴊𐴝 𐴉𐴟𐴌𐴝 𐴒𐴡𐴌𐴞𐴥 𐴉𐴝𐴌𐴠,⁹𐴀𐴝𐴦𐴌 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴎𐴠𐴕 𐴀𐴝𐴓𐴧𐴝𐴌 𐴌𐴝𐴇𐴝𐴥𐴔 𐴉𐴝𐴘𐴧𐴠𐴥 𐴊𐴠 𐴇𐴞𐴥𐴘𐴝𐴕𐴡𐴓𐴧𐴝 𐴀𐴞𐴥𐴁𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴠𐴥; 𐴎𐴠𐴕𐴊𐴞𐴓𐴧𐴝 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤,”𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴇𐴠𐴥𐴍𐴠 𐴃𐴟𐴣𐴀𐴝𐴥𐴣𐴌 𐴃𐴝𐴦𐴌𐴞𐴉𐴢 𐴒𐴡𐴙𐴅𐴧𐴟𐴥𐴔,𐴀𐴠𐴊𐴧𐴠 𐴃𐴟𐴣𐴀𐴝𐴥𐴣𐴌 𐴕𐴝𐴔𐴠 𐴏𐴠𐴀𐴌 𐴒𐴝𐴘𐴧𐴟𐴥𐴔.“

¹⁰𐴇𐴠𐴥𐴍𐴠 𐴘𐴝𐴀𐴕 𐴀𐴡𐴥 𐴀𐴝𐴏𐴠𐴤,”𐴀𐴡𐴥 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴀𐴝𐴓𐴧𐴝𐴌 𐴁𐴝𐴏𐴞𐴥𐴓𐴡𐴘𐴧𐴝 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴌 𐴉𐴟𐴥𐴖𐴝𐴣𐴃𐴞 𐴑𐴟𐴥𐴐𐴞 𐴒𐴡𐴌𐴡𐴤.“

¹¹𐴀𐴝𐴌𐴡𐴤 𐴀𐴝𐴏𐴠𐴤 𐴊𐴠 𐴑𐴞,”𐴀𐴡𐴥 𐴃𐴝𐴔𐴝𐴥𐴔 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴔𐴝𐴁𐴟𐴊𐴡𐴌 𐴃𐴝𐴦𐴌𐴞𐴉𐴢 𐴒𐴡𐴌𐴡𐴤;𐴀𐴡𐴥 𐴊𐴟𐴕𐴞𐴘𐴝𐴙𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕𐴠 𐴀𐴞𐴥𐴁𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴡𐴤.“

¹²𐴕𐴡𐴁𐴞 𐴘𐴠𐴏𐴝𐴥𐴘𐴝𐴘𐴠 𐴘𐴡𐴥 𐴀𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥,”𐴅𐴠𐴏𐴞𐴌 𐴐𐴞𐴥𐴛𐴡𐴌 𐴎𐴝𐴇𐴠𐴥𐴌 𐴀𐴡𐴥𐴘𐴁𐴡,𐴀𐴝𐴦𐴌 𐴀𐴞𐴥𐴁𐴝 𐴀𐴝𐴀𐴘𐴢 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴖𐴡𐴌𐴠 𐴇𐴡𐴥𐴑𐴟𐴔𐴡𐴃𐴢 𐴒𐴡𐴌𐴞𐴥𐴁𐴡.𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴝𐴐𐴝𐴤 𐴌𐴝𐴑𐴞𐴥𐴁𐴡.“

¹³𐴀𐴝𐴐𐴝𐴤 𐴊𐴡𐴦𐴘𐴝 𐴀𐴝𐴓𐴧𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴌𐴝𐴑𐴝𐴤𐴌 𐴎𐴡𐴌𐴞𐴘𐴝 𐴇𐴝𐴥𐴀𐴌 𐴑𐴟𐴥𐴐𐴞 𐴀𐴠𐴊𐴧𐴠 𐴐𐴝𐴥𐴕𐴃𐴞 𐴓𐴡𐴥𐴘 𐴁𐴡𐴥𐴌𐴞 𐴊𐴡𐴑, 𐴎𐴠𐴀𐴕𐴠 𐴂𐴝𐴑-𐴌𐴟𐴀𐴌 𐴑𐴟𐴊𐴟𐴌𐴟𐴃𐴠 𐴃𐴟𐴣𐴀𐴝𐴥𐴌𐴝𐴌 𐴀𐴝𐴐𐴝𐴤 𐴁𐴝𐴀𐴘𐴢 𐴉𐴡𐴌𐴠.

𐴁𐴞𐴐𐴞𐴤 𐴇𐴞𐴥𐴔𐴧𐴡𐴃𐴡𐴌 𐴏𐴝𐴥𐴀𐴣𐴃𐴠 𐴓𐴠𐴑𐴝𐴥𐴌 𐴖𐴝𐴅𐴝𐴤

¹⁴𐴀𐴡𐴥 𐴀𐴝𐴣𐴀𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴝𐴀𐴛 𐴕𐴞𐴎𐴡𐴃𐴧𐴟 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌 𐴁𐴝𐴦𐴁𐴟𐴃𐴠 𐴉𐴟𐴌𐴝𐴉𐴟𐴌𐴞 𐴀𐴠𐴑𐴞𐴕 𐴀𐴝𐴏𐴠𐴤 𐴊𐴠 𐴑𐴞, 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴢 𐴁𐴝𐴥𐴓𐴝𐴘𐴞 𐴓𐴡𐴥𐴘 𐴉𐴟𐴌𐴝𐴘𐴧𐴝, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴉𐴟𐴌𐴝𐴉𐴟𐴌𐴞 𐴎𐴝𐴕𐴑𐴝𐴌𐴞 𐴀𐴝𐴏𐴠𐴤, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴕𐴡𐴏𐴞𐴥𐴘𐴡𐴃𐴢 𐴒𐴡𐴌𐴞𐴥𐴁𐴝𐴌 𐴑𐴝𐴦𐴁𐴠𐴓𐴢 𐴀𐴡𐴥.¹⁵𐴃𐴡𐴀 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴁𐴝𐴌 𐴘𐴝𐴦𐴊𐴢 𐴒𐴡𐴌𐴝𐴥𐴘𐴊𐴞 𐴁𐴡𐴓𐴧𐴝 𐴀𐴝𐴀𐴛 𐴑𐴠𐴏𐴧𐴟𐴥 𐴔𐴡𐴗𐴎𐴟𐴥𐴌 𐴖𐴡𐴌𐴠 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴁𐴞𐴐𐴞𐴤 𐴇𐴞𐴥𐴔𐴧𐴡𐴃𐴡𐴌 𐴏𐴝𐴥𐴀𐴣𐴃𐴠 𐴓𐴠𐴙𐴑𐴧𐴞𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴠𐴥 𐴊𐴞𐴦𐴘𐴠𐴥 𐴊𐴠 𐴃𐴡𐴖𐴉𐴞𐴥𐴑 𐴓𐴡𐴥𐴘,¹⁶𐴀𐴝𐴀𐴛 𐴃𐴡 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴈𐴝𐴥𐴀𐴊𐴠𐴔 𐴀𐴡𐴥𐴘𐴧𐴞. 𐴀𐴝𐴀𐴛 𐴀𐴞𐴔𐴝𐴔𐴡𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴀𐴝𐴓𐴧𐴝𐴌 𐴑𐴟𐴥𐴐𐴈𐴡𐴥𐴁𐴡𐴌𐴡𐴌 𐴇𐴠𐴥𐴊𐴔𐴡𐴃𐴢 𐴒𐴡𐴌𐴞𐴥, 𐴎𐴠𐴀𐴕𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴂𐴝𐴑-𐴌𐴟𐴀𐴌 𐴊𐴟𐴖𐴝𐴌𐴝 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘 𐴀𐴝𐴓𐴧𐴝𐴌 𐴑𐴡𐴁𐴟𐴓𐴊𐴝𐴥𐴌 𐴑𐴟𐴌𐴁𐴝𐴕𐴞 𐴀𐴡𐴥𐴘 𐴉𐴝𐴌𐴠.

¹⁷𐴇𐴠𐴥𐴃𐴡𐴓𐴧𐴝 𐴃𐴡 𐴀𐴝𐴀𐴛 𐴀𐴝𐴓𐴧𐴝𐴓𐴧𐴝 𐴒𐴡𐴌𐴞𐴥 𐴊𐴠 𐴈𐴝𐴔𐴡𐴃𐴢 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴊𐴟𐴖𐴝𐴌𐴝 𐴉𐴡𐴇𐴡𐴥𐴌𐴝𐴘 𐴒𐴡𐴌𐴞𐴥𐴁𐴝𐴌 𐴖𐴝𐴅𐴝𐴤 𐴉𐴝𐴘𐴧𐴞𐴥.¹⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴏𐴞𐴌𐴞𐴥𐴉𐴢 𐴀𐴟𐴀𐴙𐴕 𐴇𐴡𐴘 𐴁𐴡𐴓𐴧𐴝 𐴁𐴠 𐴇𐴞𐴥𐴔𐴧𐴡𐴃𐴢 𐴒𐴡𐴌𐴞𐴥𐴘𐴟𐴔, 𐴎𐴞𐴀𐴕 𐴔𐴡𐴀𐴏𐴞𐴤𐴘𐴠 𐴀𐴝𐴣𐴀𐴌 𐴊𐴟𐴖𐴝𐴌𐴝 𐴒𐴡𐴌𐴞𐴥 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴀𐴝𐴓𐴧𐴝𐴌 𐴉𐴡𐴥𐴌𐴔𐴝𐴊𐴝𐴌 𐴁𐴝𐴕𐴝𐴘𐴧𐴠𐴥. 𐴔𐴡𐴀𐴏𐴞𐴤𐴘𐴠 𐴈𐴝𐴔 𐴇𐴞𐴥𐴘𐴝𐴕 𐴀𐴝𐴣𐴀𐴌 𐴈𐴡𐴃𐴝𐴤𐴁𐴝𐴃𐴧𐴝𐴌𐴝 𐴀𐴠𐴊𐴧𐴠 𐴈𐴝𐴔 𐴓𐴡𐴘,¹⁹𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕𐴡𐴌 𐴀𐴠𐴊𐴧𐴠 𐴑𐴠𐴌𐴝𐴔𐴡𐴃𐴡𐴌 𐴁𐴡𐴓𐴠, 𐴀𐴝𐴦𐴌 𐴀𐴝𐴓𐴧𐴝𐴌 𐴌𐴟𐴀𐴌 𐴑𐴟𐴊𐴟𐴌𐴟𐴃𐴠 𐴒𐴡𐴙𐴅𐴧𐴠𐴥. 𐴇𐴠𐴥𐴃𐴡𐴓𐴧𐴝 𐴃𐴡 𐴀𐴝𐴀𐴛 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴧𐴟 𐴓𐴡𐴥𐴃𐴞 𐴐𐴟𐴥𐴌𐴟 𐴒𐴡𐴌𐴞𐴥 𐴀𐴞𐴓𐴟𐴌𐴞𐴑𐴟𐴥𐴔 𐴉𐴡𐴙𐴅𐴧𐴡𐴕𐴃𐴡 𐴀𐴝𐴒𐴝𐴒𐴟𐴌𐴝𐴃𐴢 𐴔𐴡𐴀𐴏𐴞𐴤𐴌 𐴑𐴟𐴥𐴐𐴈𐴡𐴥𐴁𐴡𐴌 𐴉𐴟𐴌𐴝𐴉𐴟𐴌𐴞 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴞𐴥.²⁰𐴀𐴝𐴣𐴀𐴌 𐴎𐴞𐴕𐴊𐴞𐴒𐴞𐴌 𐴕𐴞𐴘𐴡𐴃𐴢 𐴀𐴡𐴥𐴙𐴓𐴊𐴠, 𐴀𐴟𐴍𐴠𐴤 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴡𐴤𐴕 𐴎𐴠𐴍𐴠𐴥 𐴔𐴡𐴀𐴏𐴞𐴤𐴌 𐴁𐴝𐴦𐴁𐴟𐴃𐴠 𐴇𐴡𐴕𐴡𐴤𐴊𐴞𐴕 𐴕𐴡𐴥 𐴉𐴟𐴥𐴕𐴠, 𐴀𐴝𐴌𐴕𐴡𐴥𐴘𐴓𐴠 𐴃𐴡 𐴀𐴝𐴀𐴛 𐴀𐴝𐴌 𐴀𐴠𐴎𐴧𐴡𐴕𐴡𐴌 𐴁𐴟𐴕𐴞𐴘𐴝𐴊𐴞𐴌 𐴖𐴡𐴌𐴠 𐴒𐴡𐴥𐴌 𐴁𐴝𐴕𐴝𐴘𐴃𐴟𐴓𐴞𐴤𐴌 𐴉𐴝𐴥𐴕 𐴀𐴡𐴥𐴘𐴁𐴡.²¹𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤,”𐴎𐴠𐴃𐴝𐴌𐴝𐴤𐴌𐴠 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴈𐴡𐴖𐴝𐴤 𐴕𐴡𐴥 𐴎𐴝,𐴀𐴞𐴥𐴃𐴝𐴌𐴝 𐴘𐴝𐴓𐴝 𐴊𐴠𐴑𐴞𐴥 𐴉𐴝𐴌𐴞𐴁𐴡𐴥;𐴀𐴝𐴦𐴌 𐴀𐴞𐴥𐴃𐴝𐴌𐴝 𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴕𐴡𐴥 𐴉𐴟𐴥𐴕𐴠,𐴀𐴞𐴥𐴃𐴝𐴌𐴝 𐴘𐴝𐴓𐴝 𐴁𐴟𐴎𐴞𐴥 𐴉𐴝𐴌𐴞𐴁𐴡𐴥.“

²²𐴀𐴝𐴀𐴛 𐴁𐴡𐴀𐴗𐴃𐴢 𐴁𐴝𐴥𐴌 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴝𐴘𐴃𐴡𐴤 𐴏𐴝𐴀𐴘𐴢 𐴇𐴠𐴥 𐴖𐴝𐴅𐴝𐴤𐴘𐴠 𐴀𐴝𐴀𐴘𐴢 𐴕𐴡𐴥 𐴉𐴝𐴌𐴞 𐴊𐴠.

𐴌𐴡𐴔𐴡𐴃𐴢 𐴎𐴝𐴘𐴁𐴝𐴌 𐴂𐴝𐴥𐴀𐴟𐴓𐴡𐴌 𐴕𐴞𐴘𐴡𐴃𐴢

²³𐴔𐴡𐴕𐴃𐴡𐴌 𐴘𐴝𐴓𐴝 𐴎𐴠𐴃𐴧𐴡𐴥𐴃𐴢 𐴀𐴝𐴣𐴀𐴃𐴧𐴟 𐴀𐴠𐴍𐴞𐴥𐴘𐴝𐴌 𐴀𐴠𐴓𐴝𐴑𐴝 𐴀𐴡𐴥𐴑𐴧𐴡𐴓𐴡𐴃𐴢 𐴈𐴝𐴔 𐴒𐴡𐴌𐴞𐴥𐴁𐴝𐴌 𐴎𐴝𐴒𐴝 𐴁𐴝𐴑𐴞 𐴕𐴝𐴥𐴘 𐴀𐴝𐴦𐴌 𐴀𐴝𐴣𐴀𐴃𐴧𐴟 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴀𐴝𐴘𐴃𐴡𐴤 𐴑𐴟𐴥𐴁𐴢 𐴔𐴡𐴕𐴠𐴈𐴡𐴀𐴌 𐴊𐴠 𐴁𐴡𐴀𐴗𐴃𐴢 𐴁𐴡𐴏𐴡𐴥𐴌 𐴀𐴡𐴥𐴘𐴧𐴠,²⁴𐴀𐴝𐴀𐴛 𐴀𐴝𐴐𐴝𐴤 𐴒𐴡𐴌𐴞𐴥𐴌 𐴊𐴠, 𐴀𐴠𐴏𐴂𐴠𐴥𐴙𐴕 𐴊𐴠𐴐𐴡𐴃𐴢 𐴎𐴝𐴘𐴁𐴝𐴐𐴧𐴡𐴥𐴃𐴢 𐴃𐴟𐴣𐴀𐴝𐴥𐴌𐴝 𐴓𐴧𐴡𐴥𐴘 𐴔𐴞𐴓𐴞𐴘𐴟𐴥𐴔, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴑𐴠𐴏𐴧𐴟𐴥 𐴄𐴝𐴙𐴔 𐴑𐴟𐴥𐴐𐴞-𐴀𐴝𐴥𐴐𐴞 𐴒𐴡𐴌𐴞𐴥 𐴈𐴝𐴍𐴝𐴘 𐴁𐴝𐴦𐴊𐴠, 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴀𐴝𐴣𐴀𐴌 𐴏𐴡𐴉𐴡𐴥𐴌𐴡𐴃𐴢 𐴎𐴝𐴘 𐴁𐴡𐴓𐴧𐴝 𐴔𐴡𐴊𐴡𐴃𐴢 𐴒𐴡𐴌𐴞𐴥𐴁𐴝.²⁵𐴓𐴠𐴑𐴞𐴕 𐴀𐴠𐴇𐴡𐴥𐴕 𐴀𐴝𐴀𐴛 𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴔𐴡𐴊𐴡𐴃𐴢 𐴉𐴡𐴀𐴣𐴏𐴝𐴘 𐴁𐴡𐴓𐴧𐴝 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴎𐴝𐴙𐴌.²⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴑𐴠𐴊𐴡𐴥𐴕𐴞𐴘𐴝𐴌 𐴀𐴠𐴊𐴧𐴠 𐴀𐴝𐴑𐴝𐴘𐴝𐴌 𐴎𐴡𐴔𐴝𐴥𐴃𐴢 𐴀𐴡𐴥𐴑𐴧𐴡𐴓𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴌 𐴁𐴟𐴥𐴃𐴡𐴌𐴠 𐴎𐴠𐴃𐴝𐴌𐴝𐴤 𐴒𐴡𐴌𐴞𐴉𐴢 𐴀𐴝𐴏𐴠𐴤 𐴀𐴞𐴥𐴃𐴝𐴌𐴝𐴓𐴧𐴝 𐴑𐴠𐴏𐴧𐴟𐴥 𐴏𐴝𐴣𐴊𐴝 𐴃𐴟𐴙𐴓𐴧𐴠𐴥.²⁷𐴀𐴞𐴥𐴃𐴝𐴌𐴝 𐴇𐴞𐴥𐴀𐴕 𐴁𐴞𐴐𐴞𐴤 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴊𐴞𐴦𐴘𐴠𐴥, 𐴀𐴠𐴀𐴕𐴠 𐴇𐴞𐴥𐴘𐴝𐴕 𐴀𐴞𐴥𐴃𐴝𐴌𐴝𐴌 𐴉𐴡𐴥𐴌𐴡𐴏𐴢 𐴀𐴡𐴥. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴎𐴠𐴃𐴧𐴡𐴥𐴃𐴢 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴌𐴟𐴀𐴈𐴝𐴥𐴕𐴞𐴌 𐴌𐴝𐴇𐴝𐴥𐴔𐴡𐴃𐴡𐴌 𐴁𐴝𐴥𐴒𐴢 𐴉𐴝𐴘𐴧𐴠𐴥, 𐴃𐴡𐴥𐴘 𐴀𐴞𐴥𐴃𐴝𐴌𐴝𐴃𐴧𐴟 𐴘𐴡𐴥 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴊𐴟𐴕𐴞𐴘𐴝𐴘𐴁𐴞 𐴔𐴝𐴓𐴏𐴝𐴥𐴔𐴝𐴕 𐴓𐴡𐴥𐴘 𐴔𐴡𐴊𐴡𐴃𐴢 𐴒𐴡𐴌𐴝𐴥𐴌 𐴉𐴡𐴥𐴌𐴡𐴏𐴢.²⁸𐴀𐴝𐴀𐴛 𐴇𐴠𐴥 𐴏𐴝𐴣𐴊𐴝 𐴒𐴟𐴥𐴕 𐴉𐴡𐴀𐴣𐴏𐴝𐴘 𐴁𐴝𐴦𐴊𐴠 𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝 𐴀𐴝𐴥𐴃𐴠-𐴀𐴝𐴥𐴃𐴠 𐴉𐴝𐴘𐴧𐴠𐴥 𐴊𐴠 𐴇𐴞𐴥𐴘𐴝𐴕 𐴉𐴝𐴑𐴧𐴝𐴉𐴝𐴑𐴧𐴞 𐴒𐴡𐴌𐴞 𐴎𐴝𐴙𐴕𐴧𐴟𐴔, 𐴀𐴝𐴀𐴛 𐴀𐴠𐴏𐴂𐴠𐴥𐴙𐴕 𐴊𐴠𐴐𐴡𐴃𐴢 𐴎𐴝𐴘𐴁𐴝𐴐𐴧𐴡𐴥𐴃𐴢 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴒𐴡𐴥𐴓𐴞𐴘𐴟𐴔.²⁹𐴀𐴝𐴀𐴛 𐴎𐴝𐴕𐴞, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴀𐴝𐴙𐴐𐴧𐴟𐴤𐴔 𐴊𐴠 𐴇𐴞𐴥𐴘𐴝𐴓𐴝, 𐴔𐴡𐴀𐴏𐴞𐴤𐴌 𐴉𐴟𐴌𐴝𐴘𐴧𐴝 𐴌𐴝𐴇𐴝𐴥𐴔𐴡𐴃𐴢 𐴉𐴟𐴥𐴖𐴝𐴣𐴃𐴞 𐴓𐴡𐴦𐴘𐴧𐴡𐴌𐴠 𐴀𐴝𐴙𐴐𐴧𐴟𐴤𐴔.

³⁰𐴀𐴡𐴥 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴕𐴝𐴔𐴠 𐴀𐴠𐴊𐴧𐴠 𐴂𐴝𐴑-𐴌𐴟𐴀𐴌 𐴔𐴟𐴇𐴝𐴥𐴁𐴧𐴡𐴃𐴠 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴌𐴡𐴏𐴢 𐴒𐴡𐴌𐴞𐴥𐴌, 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴓𐴧𐴡𐴥𐴘 𐴁𐴡𐴥𐴚 𐴀𐴡𐴥𐴘 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴀𐴝𐴣𐴀𐴌 𐴓𐴧𐴝 𐴊𐴞𐴓𐴔𐴡𐴕 𐴊𐴞 𐴊𐴟𐴖𐴝 𐴒𐴡𐴌𐴡𐴤.³¹𐴊𐴟𐴖𐴝 𐴒𐴡𐴌𐴞𐴥𐴁𐴝 𐴊𐴠, 𐴀𐴝𐴀𐴛 𐴘𐴡𐴇𐴟𐴥𐴊𐴞𐴘𐴝𐴃𐴢 𐴀𐴝𐴓𐴧𐴝𐴌 𐴎𐴠 𐴕𐴝𐴉𐴡𐴥𐴌𐴔𐴝𐴕 𐴀𐴡𐴥𐴑𐴧𐴡𐴓𐴢 𐴀𐴝𐴏𐴠𐴤 𐴀𐴞𐴥𐴃𐴝𐴌𐴝𐴃𐴧𐴟 𐴈𐴠𐴥𐴉𐴝𐴎𐴡𐴃𐴢 𐴃𐴝𐴥𐴑𐴞 𐴉𐴝𐴥𐴕, 𐴀𐴝𐴦𐴌 𐴀𐴝𐴀𐴛 𐴅𐴠𐴌𐴟𐴥𐴏𐴝𐴓𐴠𐴔𐴡𐴓𐴧𐴝 𐴎𐴠 𐴇𐴠𐴥𐴊𐴔𐴡𐴃𐴢 𐴃𐴝𐴥𐴕 𐴒𐴡𐴌𐴞𐴥𐴌 𐴇𐴞𐴥𐴘𐴝𐴕 𐴀𐴝𐴓𐴧𐴝𐴌 𐴎𐴠 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴢 𐴇𐴠𐴥𐴍𐴠 𐴀𐴝𐴏𐴠𐴤 𐴀𐴞𐴥𐴃𐴝𐴌𐴝𐴃𐴧𐴟 𐴉𐴡𐴏𐴡𐴥𐴕 𐴓𐴝𐴒𐴠 𐴉𐴝𐴥𐴕,³²𐴎𐴠𐴀𐴕𐴠 𐴀𐴝𐴓𐴧𐴝𐴘𐴠 𐴏𐴝𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴀𐴝𐴀𐴘𐴢 𐴉𐴝𐴌𐴞, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴞 𐴉𐴡𐴌𐴝𐴕 𐴎𐴟𐴌𐴝𐴘 𐴉𐴝𐴌𐴞.³³𐴐𐴝𐴥𐴕𐴃𐴞 𐴊𐴡𐴦𐴘𐴝 𐴀𐴝𐴓𐴧𐴝 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕𐴡𐴌 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴃𐴝𐴥𐴑𐴡𐴗𐴑. 𐴀𐴝𐴦𐴔𐴞𐴕.

The Word for the World International

https://app.library.bible/content/87faca8b51c22590