Read 𐴎𐴝𐴇𐴠𐴥𐴌𐴞 9

𐴎𐴝𐴇𐴠𐴥𐴌𐴞9

¹𐴉𐴝𐴣𐴏𐴢 𐴕𐴡𐴔𐴁𐴡𐴥𐴌𐴡𐴌 𐴉𐴞𐴥𐴌𐴞𐴏𐴃𐴝 𐴖𐴝𐴘𐴠 𐴐𐴞𐴥𐴛𐴝 𐴔𐴝𐴃𐴝𐴘𐴧𐴠𐴥 𐴌𐴝𐴥𐴌, 𐴀𐴝𐴀𐴛 𐴀𐴝𐴏𐴔𐴝𐴕𐴡𐴃𐴧𐴟 𐴊𐴟𐴕𐴞𐴘𐴝𐴙𐴃𐴢 𐴉𐴡𐴌𐴞𐴒𐴞𐴘𐴡𐴥𐴘 𐴊𐴠 𐴀𐴠𐴒𐴧𐴗𐴝𐴤 𐴃𐴝𐴌𐴝 𐴊𐴠𐴙𐴑𐴧𐴞𐴥; 𐴀𐴡𐴄𐴝𐴥𐴘 𐴒𐴝𐴣𐴃𐴡𐴌 𐴏𐴝𐴁𐴞𐴤 𐴖𐴝 𐴇𐴠𐴥 𐴃𐴝𐴌𐴝 𐴖𐴝𐴌𐴠 𐴊𐴞𐴦𐴘𐴝 𐴒𐴞𐴘𐴠𐴥.²𐴀𐴞𐴥𐴁𐴝𐴘𐴠 𐴎𐴠𐴣𐴃𐴧𐴠𐴥 𐴀𐴡𐴄𐴝𐴥𐴘 𐴒𐴝𐴣𐴃𐴧𐴗𐴝 𐴑𐴟𐴥𐴙𐴓𐴧𐴠, 𐴃𐴡𐴥𐴘 𐴇𐴠𐴥 𐴒𐴝𐴣𐴃𐴡𐴃𐴧𐴟 𐴖𐴡𐴌𐴠 𐴊𐴟𐴥𐴖𐴝𐴣 𐴀𐴡𐴥𐴑𐴧𐴡𐴓𐴢 𐴀𐴠𐴀𐴕 𐴀𐴝𐴙𐴐𐴧𐴠𐴥, 𐴎𐴠𐴀𐴕 𐴁𐴡𐴌 𐴉𐴡𐴦𐴙𐴕𐴡𐴃𐴧𐴟 𐴊𐴟𐴥𐴖𐴝𐴣 𐴀𐴡𐴥𐴑𐴧𐴡𐴓𐴢 𐴀𐴝𐴘𐴧𐴠𐴤; 𐴀𐴝𐴦𐴌 𐴇𐴠𐴥 𐴒𐴝𐴣𐴃𐴡𐴌 𐴊𐴟𐴥𐴖𐴝𐴣𐴘𐴠 𐴁𐴠𐴙𐴓𐴢 𐴀𐴠𐴊𐴧𐴠 𐴀𐴝𐴏𐴔𐴝𐴕 𐴀𐴝𐴕𐴊𐴝𐴤𐴌 𐴀𐴡𐴥𐴘𐴒𐴞𐴘𐴡𐴘.³𐴇𐴠𐴥 𐴊𐴟𐴥𐴖𐴝𐴣𐴃𐴧𐴟 𐴉𐴞𐴥𐴌𐴞𐴚 𐴀𐴡𐴥𐴑𐴧𐴡𐴓𐴢 𐴕𐴠𐴦𐴓𐴞 𐴊𐴟𐴕𐴞𐴘𐴝𐴙𐴃𐴢 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴇𐴞𐴥𐴀𐴕𐴡𐴌𐴠 𐴀𐴠𐴀𐴕 𐴃𐴝𐴦𐴑𐴡𐴃𐴢 𐴊𐴞𐴦𐴘𐴝 𐴒𐴞𐴘𐴠𐴥 𐴎𐴠 𐴃𐴝𐴦𐴑𐴡𐴃𐴢 𐴊𐴟𐴕𐴞𐴘𐴝𐴙𐴌 𐴁𐴞𐴏𐴧𐴟𐴥 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴝𐴏𐴠𐴤.⁴𐴇𐴞𐴥𐴀𐴕𐴡𐴌𐴠 𐴈𐴡𐴖𐴝𐴤 𐴒𐴞𐴥𐴘𐴠 𐴊𐴠, 𐴎𐴡𐴁𐴞𐴕𐴡𐴌 𐴑𐴠𐴥𐴌𐴑𐴟𐴣𐴍𐴝, 𐴇𐴡𐴕𐴡𐴤 𐴏𐴝𐴌𐴝 𐴘𐴝𐴥 𐴇𐴡𐴕𐴡𐴤 𐴒𐴝𐴏𐴡𐴌𐴠 𐴓𐴟𐴏𐴧𐴝𐴥𐴕 𐴕𐴡 𐴒𐴡𐴌𐴞𐴥 𐴁𐴡𐴓𐴧𐴝, 𐴁𐴡𐴥𐴓𐴑𐴠 𐴏𐴞𐴌𐴞𐴥𐴉𐴢 𐴔𐴝𐴕𐴟𐴥𐴙𐴐𐴢 𐴀𐴟𐴘𐴃𐴝𐴌𐴝𐴤𐴌𐴠 𐴒𐴡𐴌𐴞𐴥 𐴁𐴡𐴓𐴧𐴝 𐴎𐴠𐴃𐴝𐴌𐴝𐴤𐴌 𐴑𐴟𐴖𐴝𐴓𐴡𐴃𐴢 𐴀𐴝𐴓𐴧𐴝𐴌 𐴔𐴡𐴀𐴌 𐴕𐴝𐴥𐴘.⁵𐴇𐴡𐴕𐴡𐴤𐴑𐴞𐴘𐴡𐴌𐴠 𐴔𐴝𐴌𐴞𐴉𐴠𐴥𐴓𐴝𐴘 𐴁𐴡𐴓𐴧𐴝 𐴇𐴞𐴥𐴀𐴕𐴡𐴌𐴠 𐴀𐴠𐴎𐴞𐴕 𐴊𐴞𐴘𐴝 𐴕𐴡𐴥 𐴎𐴝, 𐴏𐴞𐴌𐴞𐴥𐴉𐴢 𐴉𐴝𐴣𐴏𐴢 𐴔𐴝𐴐𐴢 𐴉𐴝𐴥𐴕 𐴃𐴡𐴎𐴞𐴘𐴝 𐴊𐴞 𐴁𐴡𐴓𐴧𐴝 𐴁𐴠 𐴊𐴞𐴘𐴝 𐴒𐴞𐴘𐴠𐴥; 𐴇𐴞𐴥𐴀𐴕𐴡𐴌 𐴃𐴡𐴎𐴞𐴘𐴝 𐴀𐴠𐴕𐴊𐴞𐴓𐴧𐴝 𐴎𐴠𐴕𐴊𐴞𐴓𐴧𐴝 𐴁𐴞𐴏𐴧𐴟𐴥𐴘𐴠 𐴐𐴟𐴥𐴔 𐴒𐴡𐴥𐴓𐴝𐴘 𐴊𐴞𐴓𐴠𐴥 𐴔𐴝𐴙𐴕𐴐𐴠𐴥 𐴊𐴟𐴑 𐴉𐴝𐴦.⁶𐴇𐴠𐴥 𐴊𐴞𐴕 𐴀𐴡𐴥𐴑𐴧𐴡𐴓𐴡𐴃𐴢 𐴔𐴝𐴙𐴕𐴐𐴠𐴥 𐴔𐴡𐴦𐴃𐴡𐴌 𐴃𐴝𐴓𐴝𐴐𐴢 𐴒𐴡𐴌𐴞𐴥𐴁𐴡 𐴔𐴡𐴕𐴃𐴡𐴌 𐴕𐴡 𐴉𐴝𐴘𐴁𐴡; 𐴀𐴞𐴥𐴃𐴝𐴌𐴝𐴃𐴧𐴟 𐴔𐴡𐴙𐴃𐴧𐴡 𐴁𐴞𐴐𐴞𐴤 𐴔𐴡𐴕𐴠𐴈𐴡𐴘𐴁𐴡𐴥 𐴔𐴡𐴕𐴃𐴡𐴌 𐴔𐴡𐴦𐴃𐴢 𐴀𐴞𐴥𐴃𐴝𐴌𐴝𐴃𐴧𐴟 𐴊𐴝𐴥𐴘𐴎𐴝𐴘𐴁𐴡𐴘.

⁷𐴉𐴞𐴥𐴌𐴞𐴚 𐴇𐴞𐴥𐴀𐴕𐴡𐴌 𐴏𐴟𐴥𐴌𐴡𐴃𐴢 𐴀𐴠𐴕𐴊𐴞𐴓𐴧𐴝 𐴒𐴟𐴥𐴌𐴝𐴌 𐴋𐴡𐴥𐴙𐴓𐴧𐴝 𐴎𐴞𐴀𐴕𐴡𐴌𐴠 𐴓𐴝𐴌𐴝𐴥𐴘 𐴓𐴧𐴝 𐴃𐴡𐴘𐴧𐴝𐴌 𐴒𐴡𐴙𐴅𐴧𐴝𐴥; 𐴇𐴞𐴥𐴀𐴕𐴡𐴌 𐴔𐴝𐴃𐴝𐴥𐴃𐴢 𐴐𐴟𐴥𐴕𐴝𐴌 𐴃𐴝𐴏𐴡𐴌 𐴋𐴡𐴥𐴙𐴓𐴧𐴝 𐴑𐴠𐴏𐴧𐴟𐴥 𐴉𐴞𐴕𐴊𐴝𐴤 𐴀𐴝𐴏𐴠𐴤, 𐴀𐴝𐴦𐴌 𐴇𐴞𐴥𐴀𐴕𐴡𐴌 𐴏𐴞𐴘𐴝𐴥𐴌𐴝 𐴀𐴞𐴕𐴏𐴝𐴥𐴕𐴡𐴌 𐴏𐴞𐴘𐴝𐴥𐴌𐴝𐴌 𐴋𐴡𐴥𐴙𐴓𐴧𐴝.⁸𐴇𐴞𐴥𐴀𐴕𐴡𐴃𐴧𐴟 𐴔𐴝𐴘𐴝𐴉𐴟𐴀𐴝𐴙𐴕 𐴊𐴡𐴌 𐴋𐴡𐴥𐴙𐴓𐴧𐴝 𐴏𐴟𐴓𐴢 𐴀𐴝𐴏𐴠𐴤, 𐴀𐴝𐴦𐴌 𐴇𐴞𐴥𐴀𐴕𐴡𐴌 𐴊𐴝𐴃𐴧𐴟𐴕 𐴐𐴞𐴥𐴚𐴒𐴡𐴌 𐴊𐴝𐴃𐴡𐴌 𐴋𐴡𐴥𐴙𐴓𐴧𐴝.⁹𐴇𐴞𐴥𐴀𐴕𐴡𐴃𐴧𐴟 𐴓𐴟𐴖𐴝𐴥𐴌 𐴎𐴝𐴔𐴝𐴌 𐴋𐴡𐴥𐴙𐴓𐴧𐴝 𐴎𐴝𐴔𐴝 𐴀𐴡𐴥𐴑𐴧𐴡𐴓𐴢 𐴀𐴝𐴏𐴠𐴤, 𐴀𐴝𐴦𐴌 𐴇𐴞𐴥𐴀𐴕𐴡𐴌 𐴉𐴝𐴑𐴡𐴌 𐴀𐴝𐴁𐴝𐴏𐴢 𐴀𐴡𐴥𐴑𐴧𐴡𐴓𐴢 𐴓𐴝𐴌𐴝𐴥𐴙𐴃𐴢 𐴊𐴟𐴣𐴌𐴞 𐴎𐴝𐴦 𐴊𐴠 𐴁𐴞𐴐𐴞𐴤 𐴒𐴟𐴥𐴌𐴝 𐴀𐴡𐴥𐴑𐴧𐴡𐴓𐴡𐴌 𐴒𐴟𐴥𐴌𐴝-𐴒𐴝𐴌𐴞𐴥𐴌 𐴀𐴝𐴁𐴝𐴏𐴡𐴌 𐴋𐴡𐴥𐴙𐴓𐴧𐴝.¹⁰𐴇𐴞𐴥𐴀𐴕𐴡𐴃𐴧𐴟 𐴁𐴞𐴏𐴧𐴟𐴥𐴌 𐴋𐴡𐴥𐴙𐴓𐴧𐴝 𐴓𐴠𐴏𐴢 𐴀𐴠𐴊𐴧𐴠 𐴐𐴟𐴥𐴔 𐴀𐴝𐴏𐴠𐴤, 𐴀𐴝𐴦𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴉𐴝𐴣𐴏𐴢 𐴔𐴝𐴐𐴢 𐴉𐴝𐴥𐴕 𐴊𐴟𐴑 𐴊𐴞𐴁𐴝𐴌 𐴃𐴝𐴦𐴑𐴡𐴃𐴢 𐴇𐴞𐴥𐴀𐴕𐴡𐴌 𐴓𐴠𐴏𐴡𐴃𐴢 𐴀𐴝𐴏𐴠𐴤.¹¹𐴇𐴞𐴥𐴀𐴕𐴡𐴌 𐴁𐴝𐴀𐴣𐴐𐴧𐴝 𐴀𐴡𐴥𐴙𐴓𐴊𐴠 𐴀𐴡𐴄𐴝𐴥𐴘 𐴒𐴝𐴣𐴃𐴡𐴌 𐴉𐴞𐴥𐴌𐴞𐴏𐴃𐴝 𐴖𐴝, 𐴎𐴞𐴁𐴝𐴤𐴌 𐴕𐴝𐴔 𐴇𐴞𐴁𐴌𐴟𐴤 𐴎𐴟𐴁𐴝𐴕𐴡𐴃𐴢 𐴀𐴝𐴁𐴝𐴊𐴧𐴡𐴕 , 𐴀𐴝𐴦𐴌 𐴒𐴞𐴌𐴞𐴥𐴑 𐴎𐴟𐴁𐴝𐴕𐴡𐴃𐴢 𐴀𐴝𐴂𐴡𐴓𐴞𐴘𐴡𐴕.

¹²𐴉𐴡𐴀𐴘𐴓𐴝 𐴀𐴝𐴉𐴏𐴟𐴥𐴏𐴡𐴌 𐴇𐴝𐴥𐴓𐴡𐴃𐴢 𐴃𐴡 𐴀𐴡𐴥𐴘𐴒𐴞𐴘𐴡𐴘; 𐴔𐴡𐴕𐴃𐴡𐴌 𐴏𐴡𐴀, 𐴇𐴞𐴥𐴀𐴕 𐴁𐴝𐴦𐴊𐴠 𐴀𐴝𐴌𐴡𐴤 𐴊𐴟𐴘𐴧𐴝𐴥𐴕 𐴀𐴝𐴉𐴏𐴟𐴥𐴏𐴡𐴌 𐴇𐴝𐴥𐴓𐴡𐴃𐴢 𐴀𐴝𐴘𐴁𐴝𐴤𐴌 𐴀𐴝𐴏𐴠𐴤.

¹³𐴃𐴝𐴌𐴉𐴡𐴌𐴠 𐴏𐴡𐴥 𐴕𐴡𐴔𐴁𐴡𐴥𐴌𐴡𐴌 𐴉𐴞𐴥𐴌𐴞𐴏𐴃𐴝 𐴖𐴝𐴘𐴠 𐴐𐴞𐴥𐴛𐴝 𐴔𐴝𐴃𐴝𐴘𐴧𐴠𐴥 𐴌𐴝𐴥𐴌, 𐴀𐴝𐴀𐴛 𐴀𐴝𐴓𐴧𐴝𐴌 𐴔𐴟𐴀𐴕𐴃𐴟 𐴀𐴝𐴏𐴠𐴤 𐴊𐴠 𐴐𐴟𐴥𐴕𐴝𐴌 𐴑𐴟𐴌𐴁𐴝𐴕𐴞-𐴒𐴝𐴥𐴣𐴌 𐴏𐴝𐴘𐴌𐴡𐴥 𐴐𐴞𐴥𐴚𐴡𐴃𐴧𐴟 𐴀𐴠𐴑𐴒𐴗𐴝𐴥 𐴀𐴝𐴁𐴝𐴏𐴢 𐴉𐴟𐴥𐴙𐴕𐴧𐴞.¹⁴𐴀𐴝𐴁𐴝𐴏𐴢 𐴏𐴗𐴝𐴥𐴘𐴠 𐴐𐴞𐴥𐴛𐴝 𐴀𐴡𐴓𐴝 𐴏𐴡𐴥 𐴕𐴡𐴔𐴁𐴡𐴥𐴌𐴡𐴌 𐴉𐴞𐴥𐴌𐴞𐴏𐴃𐴝 𐴖𐴝𐴌𐴠 𐴈𐴡𐴀𐴌 𐴊𐴠, ”𐴏𐴝𐴘𐴌𐴡𐴥 𐴉𐴞𐴥𐴌𐴞𐴏𐴃𐴝 𐴀𐴟𐴀𐴙𐴕𐴡𐴌𐴠 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴊𐴠, 𐴎𐴞𐴀𐴕 𐴁𐴡𐴌 𐴇𐴝𐴥𐴓𐴢 𐴀𐴠𐴉𐴟𐴌𐴝𐴃𐴡𐴃𐴢 𐴁𐴡𐴕 𐴀𐴝𐴏𐴠𐴤.“¹⁵𐴃𐴡𐴥𐴘 𐴇𐴠𐴥 𐴏𐴝𐴘𐴌𐴡𐴥 𐴉𐴞𐴥𐴌𐴞𐴏𐴃𐴝 𐴎𐴞𐴀𐴕𐴡𐴌𐴠 𐴀𐴠 𐴀𐴡𐴑𐴃𐴡𐴥, 𐴀𐴠 𐴊𐴞𐴕، 𐴀𐴠 𐴔𐴝𐴐𐴢 𐴀𐴠𐴊𐴧𐴠 𐴀𐴠 𐴁𐴡𐴏𐴡𐴥𐴌𐴡𐴓𐴧𐴝 𐴃𐴡𐴘𐴧𐴝𐴌 𐴒𐴡𐴌𐴞𐴥 𐴌𐴝𐴑𐴝𐴤 𐴒𐴞𐴥𐴀𐴓𐴢, 𐴇𐴞𐴥𐴀𐴕𐴡𐴌𐴠 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴊𐴞𐴘𐴝 𐴒𐴞𐴥𐴘𐴠, 𐴎𐴠𐴀𐴕𐴠 𐴇𐴞𐴥𐴀𐴕𐴠 𐴃𐴞𐴕 𐴁𐴝𐴥𐴑𐴡𐴌 𐴀𐴠𐴑 𐴁𐴝𐴥𐴑 𐴀𐴞𐴕𐴏𐴝𐴥𐴕 𐴔𐴝𐴌𐴞𐴉𐴠𐴥𐴓𐴠.¹⁶𐴒𐴟𐴥𐴌𐴝-𐴏𐴡𐴓𐴡𐴙𐴕𐴧𐴝 𐴉𐴡𐴥𐴗𐴏𐴢 𐴀𐴡𐴥𐴑𐴧𐴡𐴓𐴡𐴌 𐴒𐴡𐴕𐴝 𐴀𐴡𐴥𐴙𐴓𐴊𐴠 𐴑𐴟𐴌𐴞 𐴑𐴟𐴄𐴞𐴥; 𐴀𐴝𐴀𐴛 𐴇𐴞𐴥𐴀𐴕𐴡𐴌 𐴒𐴡𐴕𐴝 𐴇𐴡𐴊𐴟𐴥𐴕 𐴊𐴠 𐴉𐴟𐴥𐴙𐴕𐴧𐴞.

¹⁷𐴀𐴝𐴣𐴀𐴌 𐴊𐴡𐴌𐴐𐴡𐴥𐴕𐴡𐴃𐴢 𐴔𐴝𐴥𐴎𐴠 𐴀𐴝𐴀𐴛 𐴒𐴟𐴥𐴌𐴝 𐴒𐴟𐴥𐴕𐴡𐴌𐴠 𐴀𐴠𐴊𐴧𐴠 𐴇𐴞𐴥𐴀𐴕𐴡𐴌 𐴖𐴡𐴌𐴠 𐴏𐴡𐴌𐴡𐴥𐴙𐴕𐴧𐴝 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴕𐴊𐴞𐴓𐴧𐴝 𐴊𐴠𐴙𐴑𐴧𐴞𐴥: 𐴏𐴡𐴌𐴡𐴥𐴙𐴕𐴧𐴝 𐴒𐴟𐴥𐴕𐴡𐴌 𐴎𐴝𐴔𐴝 𐴀𐴡𐴦𐴙𐴕𐴡𐴌 𐴋𐴡𐴥𐴙𐴓𐴧𐴝 𐴓𐴝𐴓𐴢, 𐴕𐴞𐴥𐴓𐴝 𐴀𐴠𐴊𐴧𐴠 𐴁𐴝𐴌𐴟𐴏𐴢 𐴁𐴝𐴕𐴝 𐴊𐴠 𐴒𐴡𐴥𐴕𐴋𐴡𐴑𐴡𐴌 𐴋𐴡𐴥𐴙𐴓𐴧𐴝 𐴀𐴡𐴥𐴓𐴡𐴙𐴊𐴧𐴝. 𐴒𐴟𐴥𐴌𐴝 𐴒𐴟𐴥𐴕𐴡𐴌 𐴔𐴝𐴃𐴝𐴥 𐴒𐴟𐴥𐴕 𐴐𐴞𐴥𐴚𐴒𐴡𐴌 𐴔𐴝𐴃𐴝𐴥𐴌 𐴋𐴡𐴥𐴙𐴓𐴧𐴝, 𐴀𐴝𐴦𐴌 𐴇𐴞𐴥𐴀𐴕𐴡𐴌 𐴒𐴝𐴓𐴡𐴃𐴧𐴟 𐴀𐴡𐴦𐴙𐴕، 𐴊𐴟𐴥𐴖𐴝𐴣 𐴀𐴠𐴊𐴧𐴠 𐴒𐴡𐴥𐴕𐴋𐴡𐴑 𐴕𐴠𐴦𐴓𐴞𐴀𐴝𐴙𐴐𐴧𐴠𐴥.¹⁸𐴇𐴞𐴥𐴀𐴕𐴡𐴌 𐴒𐴝𐴓𐴡𐴃𐴧𐴟 𐴎𐴠 𐴀𐴡𐴦𐴙𐴕، 𐴊𐴟𐴥𐴖𐴝𐴣, 𐴀𐴠𐴊𐴧𐴠 𐴒𐴡𐴥𐴕𐴋𐴡𐴑 𐴕𐴠𐴦𐴓𐴞𐴀𐴝𐴙𐴐𐴧𐴠𐴥, 𐴇𐴠𐴥 𐴃𐴞𐴕𐴞𐴥 𐴀𐴝𐴉𐴡𐴃𐴠 𐴃𐴞𐴕 𐴁𐴝𐴥𐴑𐴡𐴌 𐴀𐴠𐴑 𐴁𐴝𐴥𐴑 𐴀𐴞𐴕𐴏𐴝𐴥𐴕 𐴔𐴡𐴌𐴞𐴒𐴞𐴘𐴡𐴥𐴘.¹⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴒𐴟𐴥𐴌𐴝 𐴒𐴟𐴥𐴕𐴡𐴌 𐴃𐴝𐴦𐴑𐴡𐴃𐴢 𐴀𐴡𐴥𐴙𐴓𐴊𐴠 𐴇𐴞𐴥𐴀𐴕𐴡𐴌 𐴒𐴝𐴓𐴡𐴃𐴢 𐴀𐴠𐴊𐴧𐴠 𐴓𐴠𐴏𐴢 𐴀𐴡𐴃𐴢; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴀𐴕𐴡𐴌 𐴓𐴠𐴏𐴢 𐴏𐴟𐴥𐴕 𐴔𐴝𐴃𐴝𐴥 𐴀𐴡𐴓𐴝 𐴇𐴝𐴥𐴉𐴡𐴌 𐴋𐴡𐴥𐴙𐴓𐴧𐴝, 𐴎𐴞𐴀𐴕 𐴓𐴡𐴥𐴘 𐴇𐴞𐴥𐴀𐴕𐴠 𐴇𐴡𐴥𐴃𐴞 𐴀𐴡𐴥𐴑𐴧𐴡𐴓𐴢 𐴒𐴡𐴌𐴠𐴥.

²⁰𐴁𐴝𐴊𐴁𐴝𐴑𐴞 𐴔𐴝𐴕𐴟𐴥𐴙𐴐𐴢 𐴎𐴠𐴃𐴝𐴌𐴝𐴤𐴌𐴠 𐴇𐴠𐴥 𐴀𐴝𐴉𐴡𐴃𐴠 𐴔𐴝𐴌𐴞𐴉𐴠𐴥𐴓𐴝 𐴕𐴡𐴥 𐴎𐴝, 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴀𐴝𐴥𐴃𐴡𐴌 𐴁𐴝𐴕𐴝𐴘𐴧𐴝 𐴅𐴞𐴕𐴞𐴥𐴐𐴡𐴃𐴧𐴟 𐴃𐴡𐴖𐴝𐴥 𐴒𐴡𐴌𐴞𐴥 𐴕𐴡𐴥 𐴉𐴠𐴓𐴠; 𐴀𐴞𐴥𐴃𐴝𐴌𐴝 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴢 𐴀𐴡𐴌𐴠, 𐴀𐴠𐴊𐴧𐴠 𐴐𐴟𐴥𐴕𐴝𐴌, 𐴌𐴟𐴉𐴝𐴌, 𐴉𐴞𐴃𐴡𐴓𐴢 𐴀𐴡𐴌, 𐴉𐴝𐴃𐴧𐴡𐴥𐴌 𐴀𐴡𐴌, 𐴀𐴠𐴊𐴧𐴠 𐴒𐴝𐴏𐴡𐴌 𐴁𐴝𐴕𐴝𐴘𐴧𐴝 𐴔𐴟𐴃𐴧𐴞 𐴀𐴡𐴥𐴑𐴧𐴡𐴓𐴡𐴌𐴠 𐴉𐴟𐴣𐴎𐴝 𐴁𐴡𐴕 𐴕𐴡𐴥 𐴒𐴡𐴌𐴠𐴥—𐴔𐴟𐴃𐴧𐴞 𐴎𐴞𐴀𐴕𐴠 𐴕𐴡 𐴊𐴠𐴑𐴞𐴥 𐴉𐴝𐴌𐴠, 𐴕𐴡 𐴉𐴟𐴥𐴕𐴞 𐴉𐴝𐴌𐴠, 𐴀𐴝𐴦𐴌 𐴕𐴡 𐴀𐴝𐴥𐴣𐴍𐴞 𐴉𐴝𐴌𐴠.²¹𐴇𐴠𐴥𐴕𐴊𐴞𐴓𐴧𐴝, 𐴀𐴞𐴥𐴃𐴝𐴌𐴝 𐴑𐴡𐴃𐴡𐴥𐴓𐴝𐴑𐴡𐴃𐴡𐴥𐴓𐴞 𐴃𐴧𐴟, 𐴅𐴝𐴊𐴟𐴒𐴝𐴌𐴞 𐴃𐴧𐴟, 𐴎𐴠𐴕𐴝𐴤𐴑𐴝𐴌𐴞 𐴃𐴧𐴟, 𐴀𐴠𐴊𐴧𐴠 𐴏𐴟𐴌𐴞 𐴒𐴡𐴌𐴝𐴥𐴃𐴧𐴟 𐴘𐴡𐴥 𐴃𐴡𐴖𐴝𐴥 𐴒𐴡𐴌𐴞𐴥 𐴕𐴡𐴥 𐴉𐴠𐴓𐴠.

The Word for the World International

https://app.library.bible/content/87faca8b51c22590