Read 𐴎𐴝𐴇𐴠𐴥𐴌𐴞 18

𐴎𐴝𐴇𐴠𐴥𐴌𐴞18

𐴁𐴝𐴁𐴞𐴓𐴡𐴕 𐴐𐴡𐴥𐴀𐴌 𐴉𐴡𐴌𐴞𐴒𐴞𐴘𐴡𐴥𐴘

¹𐴇𐴞𐴥𐴀𐴕 𐴁𐴝𐴦𐴊𐴠 𐴀𐴝𐴀𐴛 𐴀𐴝𐴌 𐴀𐴠𐴒𐴧𐴗𐴝𐴤 𐴉𐴞𐴥𐴌𐴞𐴏𐴃𐴝 𐴊𐴠𐴙𐴑𐴧𐴞𐴥 𐴎𐴞𐴁𐴝𐴤 𐴀𐴝𐴏𐴔𐴝𐴕𐴡𐴃𐴧𐴟 𐴓𐴝𐴔𐴞 𐴀𐴝𐴘𐴧𐴠𐴤𐴌; 𐴀𐴞𐴥𐴁𐴝𐴃𐴧𐴟 𐴋𐴡𐴣𐴀𐴌 𐴑𐴠𐴥𐴔𐴡𐴃𐴝 𐴀𐴝𐴏𐴠𐴤, 𐴀𐴝𐴦𐴌 𐴊𐴟𐴕𐴞𐴘𐴝𐴘 𐴀𐴞𐴥𐴁𐴝𐴌 𐴃𐴡𐴎𐴡𐴓𐴧𐴞𐴘𐴠 𐴉𐴡𐴀𐴌 𐴀𐴡𐴥𐴘𐴒𐴞𐴘𐴡𐴘.²𐴀𐴞𐴥𐴁𐴝𐴘𐴠 𐴎𐴟𐴌𐴠 𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠,”𐴉𐴡𐴌𐴞𐴒𐴞𐴘𐴡𐴥𐴘, 𐴋𐴡𐴣𐴀𐴌 𐴁𐴝𐴁𐴞𐴓𐴡𐴕 𐴉𐴡𐴌𐴞𐴒𐴞𐴘𐴡𐴥𐴘!𐴇𐴞𐴥𐴁𐴝 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴢 𐴃𐴝𐴥𐴑𐴞𐴁𐴝𐴌 𐴎𐴝𐴒𐴝,𐴉𐴡𐴃𐴧𐴞𐴥 𐴈𐴡𐴥𐴌𐴝𐴉𐴢 𐴅𐴞𐴕𐴡𐴌 𐴀𐴝𐴋𐴧𐴝-𐴈𐴝𐴥𐴕𐴝,𐴀𐴠𐴊𐴧𐴠 𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴕𐴝𐴉𐴝𐴑𐴀𐴠𐴊𐴧𐴠 𐴒𐴞𐴥𐴕𐴝𐴘𐴞 𐴉𐴝𐴙𐴑𐴡𐴌 𐴀𐴝𐴋𐴧𐴝-𐴈𐴝𐴥𐴕𐴝 𐴁𐴡𐴕𐴞𐴒𐴞𐴘𐴡𐴥𐴘.³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴝𐴔𐴝𐴥𐴔 𐴑𐴡𐴗𐴔 𐴀𐴡𐴥𐴑𐴧𐴡𐴓𐴢 𐴃𐴡𐴇𐴞𐴥𐴁𐴝𐴌 𐴎𐴠𐴕𐴝𐴤𐴑𐴝𐴌𐴞𐴌 𐴀𐴝𐴎𐴧𐴟𐴌 𐴐𐴡𐴥𐴌𐴝𐴁𐴢 𐴇𐴝𐴥𐴘 𐴄𐴟𐴀𐴓𐴢 𐴀𐴡𐴥𐴘𐴒𐴞𐴘𐴡𐴘;𐴊𐴟𐴕𐴞𐴘𐴝𐴙𐴌 𐴁𐴝𐴀𐴣𐴐𐴧𐴝 𐴀𐴡𐴥𐴑𐴧𐴡𐴓𐴠 𐴇𐴞𐴥𐴁𐴝 𐴓𐴧𐴡𐴥𐴘 𐴎𐴠𐴕𐴝𐴤 𐴒𐴡𐴙𐴅𐴧𐴠𐴥,𐴀𐴝𐴦𐴌 𐴊𐴟𐴕𐴞𐴘𐴝𐴙𐴌 𐴐𐴡𐴥𐴊𐴡𐴌 𐴀𐴡𐴥𐴑𐴧𐴡𐴓𐴢 𐴇𐴞𐴥𐴁𐴝𐴌 𐴀𐴝𐴘𐴝𐴐𐴞𐴌 𐴀𐴝𐴄𐴝𐴓𐴞𐴑𐴧𐴝 𐴊𐴡𐴥𐴕-𐴊𐴡𐴓𐴡𐴃𐴠 𐴃𐴟𐴖𐴝𐴚𐴒𐴡𐴌 𐴀𐴡𐴥𐴘𐴒𐴞𐴘𐴡𐴘.“

⁴𐴃𐴝𐴌𐴉𐴡𐴌𐴠 𐴀𐴝𐴀𐴛 𐴀𐴝𐴏𐴔𐴝𐴕𐴡𐴃𐴧𐴟 𐴀𐴝𐴌 𐴀𐴠𐴑𐴒𐴗𐴝𐴥 𐴀𐴝𐴁𐴝𐴏𐴢 𐴉𐴟𐴥𐴙𐴕𐴧𐴞, 𐴀𐴠𐴀𐴕 𐴈𐴡𐴀𐴌 𐴊𐴠,”𐴀𐴡𐴥 𐴀𐴝𐴣𐴀𐴌 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴇𐴞𐴥𐴁𐴝𐴃𐴧𐴟 𐴕𐴠𐴦𐴓𐴞 𐴀𐴝𐴀𐴘𐴎𐴡𐴥𐴒𐴡𐴘,𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴇𐴞𐴥𐴁𐴝𐴌 𐴒𐴟𐴕𐴝𐴤𐴃𐴢 𐴐𐴡𐴥𐴌𐴞𐴑 𐴕𐴡,𐴀𐴝𐴦𐴌 𐴇𐴞𐴥𐴁𐴝𐴌 𐴇𐴡𐴕𐴡𐴤 𐴀𐴝𐴉𐴡𐴃𐴢 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴕𐴟 𐴀𐴝𐴘𐴧𐴠𐴤;⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴁𐴝𐴌 𐴒𐴟𐴕𐴝𐴤 𐴃𐴡 𐴀𐴝𐴏𐴔𐴝𐴕𐴡𐴌 𐴇𐴠𐴥𐴊𐴧𐴟𐴌 𐴉𐴡𐴙𐴅𐴧𐴡𐴕𐴃𐴡 𐴀𐴟𐴣𐴏𐴡𐴓𐴡𐴃𐴢 𐴉𐴡𐴀𐴣𐴙𐴐𐴧𐴠,𐴀𐴝𐴦𐴌 𐴀𐴝𐴓𐴧𐴝𐴘𐴠 𐴇𐴞𐴥𐴁𐴝𐴌 𐴕𐴝𐴉𐴡𐴥𐴌𐴔𐴝𐴕𐴞 𐴀𐴡𐴥𐴑𐴧𐴡𐴓𐴢 𐴔𐴡𐴕𐴡𐴃𐴢 𐴒𐴡𐴙𐴅𐴧𐴠𐴥.⁶𐴇𐴞𐴥𐴁𐴝𐴘𐴠 𐴎𐴠𐴕𐴊𐴞𐴓𐴧𐴝 𐴒𐴡𐴙𐴅𐴧𐴠𐴥 𐴇𐴠𐴥𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴇𐴞𐴥𐴁𐴝𐴌𐴠 𐴒𐴡𐴌𐴡𐴤;𐴇𐴞𐴥𐴁𐴝𐴌𐴠 𐴇𐴞𐴥𐴁𐴝𐴌 𐴈𐴝𐴔 𐴔𐴡𐴎𐴞𐴕 𐴊𐴟𐴘 𐴒𐴟𐴕 𐴁𐴞𐴐𐴞𐴤 𐴁𐴡𐴊𐴡𐴓𐴝 𐴊𐴡.𐴎𐴠 𐴉𐴞𐴘𐴝𐴓𐴝𐴃𐴢 𐴇𐴞𐴥𐴁𐴝𐴘𐴠 𐴀𐴡𐴙𐴕𐴧𐴡 𐴎𐴡𐴕𐴡𐴓𐴧𐴝 𐴕𐴞𐴐𐴝𐴥 𐴔𐴞𐴘𐴝𐴥𐴓𐴊𐴞𐴘𐴠,𐴇𐴠𐴥 𐴉𐴞𐴘𐴝𐴓𐴝𐴃𐴢 𐴔𐴝𐴎𐴠𐴥 𐴇𐴞𐴥𐴁𐴝𐴓𐴧𐴝 𐴀𐴝𐴌𐴡𐴤 𐴊𐴟𐴘 𐴒𐴟𐴕 𐴁𐴞𐴐𐴞𐴤 𐴕𐴞𐴐𐴝𐴥 𐴔𐴞𐴘𐴝𐴥𐴓𐴢 𐴊𐴡𐴥.⁷𐴇𐴞𐴥𐴁𐴝𐴌𐴠 𐴀𐴠𐴊𐴧𐴟𐴥𐴌 𐴀𐴝𐴎𐴝𐴁𐴢 𐴀𐴠𐴊𐴧𐴠 𐴊𐴟𐴑 𐴊𐴡,𐴎𐴠𐴊𐴧𐴟𐴥𐴌 𐴇𐴞𐴥𐴁𐴝𐴘𐴠 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴋𐴡𐴣𐴀𐴌 𐴑𐴟𐴥𐴖𐴝𐴓𐴝𐴘𐴧𐴠 𐴀𐴠𐴊𐴧𐴠 𐴀𐴝𐴘𐴝𐴐𐴞𐴘𐴠 𐴎𐴞𐴕𐴊𐴞𐴒𐴞 𐴈𐴝𐴍𐴝𐴘𐴧𐴠𐴥,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴁𐴝𐴘𐴠 𐴕𐴞𐴎𐴡𐴌 𐴊𐴞𐴓𐴠-𐴊𐴞𐴓𐴠 𐴈𐴡𐴀 𐴊𐴠,’𐴀𐴝𐴀𐴛 𐴌𐴝𐴕𐴞 𐴀𐴞𐴥𐴏𐴝𐴉𐴠 𐴁𐴡𐴘𐴍𐴝𐴤 𐴀𐴝𐴏𐴞𐴤;𐴀𐴝𐴀𐴛 𐴇𐴡𐴥𐴕𐴡 𐴌𐴝𐴌𐴞 𐴕𐴡,𐴀𐴝𐴣𐴀𐴃𐴧𐴟 𐴇𐴡𐴕𐴡𐴤𐴊𐴞𐴕 𐴉𐴠𐴌𐴠𐴐𐴝𐴕 𐴀𐴡𐴥𐴘𐴁𐴝𐴌 𐴕𐴝𐴥𐴘.‘⁸𐴇𐴠𐴥𐴃𐴡𐴓𐴧𐴝 𐴃𐴡 𐴀𐴠𐴑 𐴊𐴞𐴕𐴡𐴌 𐴁𐴟𐴥𐴃𐴡𐴌𐴠 𐴇𐴞𐴥𐴁𐴝𐴌 𐴀𐴝𐴉𐴡𐴃𐴢 𐴇𐴞𐴥𐴁𐴝𐴌 𐴖𐴡𐴌𐴠 𐴀𐴝𐴀𐴘𐴎𐴝𐴥𐴘𐴁𐴡𐴘,𐴘𐴝𐴥𐴕𐴞 𐴔𐴡𐴦𐴃𐴢, 𐴉𐴠𐴌𐴠𐴐𐴝𐴕𐴞, 𐴀𐴠𐴊𐴧𐴠 𐴌𐴝𐴄𐴢.𐴀𐴝𐴦𐴌 𐴇𐴞𐴥𐴁𐴝𐴌𐴠 𐴀𐴡𐴦𐴙𐴕 𐴊𐴞 𐴉𐴟𐴌𐴞𐴉𐴠𐴥𐴓𐴝 𐴎𐴝𐴘𐴁𐴡,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴁𐴝𐴌𐴠 𐴁𐴞𐴏𐴝𐴌-𐴒𐴡𐴌𐴡𐴤𐴘𐴝 𐴔𐴝𐴓𐴞𐴑 𐴀𐴝𐴓𐴧𐴝 𐴃𐴡 𐴃𐴝𐴦𐴑𐴡𐴃𐴖𐴝𐴓𐴝.“

⁹𐴊𐴟𐴕𐴞𐴘𐴝𐴙𐴌 𐴁𐴝𐴀𐴣𐴐𐴧𐴝 𐴀𐴡𐴥𐴑𐴧𐴡𐴓𐴢 𐴎𐴠𐴃𐴝𐴌𐴝𐴤 𐴇𐴞𐴥𐴁𐴝 𐴓𐴧𐴡𐴥𐴘 𐴎𐴠𐴕𐴝𐴤 𐴒𐴡𐴙𐴅𐴧𐴠𐴥 𐴀𐴝𐴦𐴌 𐴀𐴝𐴘𐴝𐴐𐴞 𐴒𐴡𐴙𐴅𐴧𐴠𐴥, 𐴀𐴞𐴥𐴃𐴝𐴌𐴝 𐴇𐴞𐴥𐴁𐴝 𐴎𐴡𐴓𐴠𐴌 𐴊𐴠 𐴊𐴟𐴥𐴖𐴝𐴣 𐴊𐴠𐴑𐴞𐴥 𐴇𐴞𐴥𐴁𐴝𐴓𐴧𐴝 𐴈𐴝𐴣𐴊𐴝𐴈𐴝𐴍𐴞 𐴒𐴡𐴌𐴞𐴥𐴁𐴡 𐴀𐴠𐴊𐴧𐴠 𐴁𐴞𐴐𐴞𐴤 𐴉𐴠𐴌𐴠𐴐𐴝𐴕𐴞 𐴎𐴝𐴇𐴠𐴥𐴌 𐴒𐴡𐴌𐴞𐴥𐴁𐴡.¹⁰𐴀𐴞𐴥𐴃𐴝𐴌𐴝 𐴇𐴞𐴥𐴁𐴝𐴌 𐴀𐴝𐴎𐴝𐴁𐴢 𐴊𐴠𐴑𐴞𐴥 𐴋𐴡𐴦𐴌𐴠 𐴊𐴟𐴌 𐴀𐴡𐴥𐴃𐴧𐴟 𐴃𐴞𐴥𐴘𐴝𐴘 𐴈𐴡𐴘𐴁𐴡𐴤 𐴊𐴠,”𐴀𐴡𐴥 𐴋𐴡𐴣𐴀𐴌 𐴐𐴡𐴥𐴀𐴌 𐴁𐴝𐴁𐴞𐴓𐴡𐴕, 𐴀𐴡𐴥 𐴔𐴡𐴎𐴁𐴟𐴃𐴢 𐴐𐴡𐴥𐴀𐴌,𐴀𐴝𐴉𐴏𐴟𐴥𐴏𐴢, 𐴃𐴡𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢!𐴈𐴡𐴔 𐴄𐴝𐴙𐴔𐴡𐴌 𐴁𐴟𐴥𐴃𐴡𐴌𐴠 𐴃𐴡 𐴃𐴡𐴌 𐴏𐴝𐴥𐴣𐴎𐴝 𐴀𐴝𐴀𐴘𐴒𐴞𐴘𐴡𐴘.“

¹¹𐴊𐴟𐴕𐴞𐴘𐴝𐴙𐴌 𐴐𐴡𐴥𐴊𐴡𐴌 𐴀𐴡𐴥𐴑𐴧𐴡𐴓𐴠 𐴇𐴞𐴥𐴁𐴝𐴓𐴧𐴝 𐴈𐴝𐴣𐴊𐴝𐴈𐴝𐴍𐴞 𐴒𐴡𐴌𐴞𐴥𐴁𐴡 𐴀𐴠𐴊𐴧𐴠 𐴉𐴠𐴌𐴠𐴐𐴝𐴕𐴞 𐴎𐴝𐴇𐴠𐴥𐴌 𐴒𐴡𐴌𐴞𐴥𐴁𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝𐴌 𐴔𐴝𐴓𐴏𐴝𐴥𐴔𐴝𐴕𐴝 𐴀𐴡𐴥𐴑𐴧𐴡𐴓𐴢 𐴀𐴝𐴌 𐴇𐴡𐴕𐴡𐴤𐴑𐴞𐴘𐴠 𐴕𐴡 𐴑𐴞𐴕𐴠𐴌.¹²𐴇𐴠𐴥 𐴔𐴝𐴓𐴏𐴝𐴥𐴔𐴝𐴕𐴝 𐴀𐴡𐴥𐴙𐴓𐴊𐴠: 𐴐𐴟𐴥𐴕𐴝, 𐴌𐴟𐴉𐴝, 𐴑𐴞𐴔𐴡𐴃𐴞 𐴉𐴝𐴃𐴧𐴡𐴥𐴌 𐴀𐴠𐴊𐴧𐴠 𐴔𐴟𐴑𐴃𐴝; 𐴁𐴝𐴌𐴞𐴥𐴑 𐴉𐴝𐴍𐴡𐴌-𐴇𐴡𐴦𐴌, 𐴁𐴝𐴘𐴡𐴙𐴕𐴧𐴝 𐴌𐴡𐴚𐴡𐴌 𐴇𐴡𐴦𐴌, 𐴌𐴠𐴐𐴡𐴥𐴔 𐴇𐴡𐴦𐴌 𐴀𐴠𐴊𐴧𐴠 𐴑𐴞𐴌𐴔𐴞𐴏𐴢 𐴌𐴡𐴚𐴡𐴌 𐴇𐴡𐴦𐴌; 𐴇𐴝𐴥𐴀𐴌 𐴑𐴞𐴏𐴞𐴥𐴔𐴡𐴌 𐴑𐴟𐴥𐴐𐴁𐴡 𐴒𐴝𐴏𐴢, 𐴀𐴝𐴥𐴣𐴃𐴞𐴌 𐴊𐴝𐴃𐴡𐴃𐴧𐴟 𐴁𐴝𐴕𐴝𐴘𐴧𐴝 𐴋𐴡𐴙𐴓𐴧𐴝-𐴁𐴡𐴋𐴡𐴙𐴓𐴧𐴝 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴢, 𐴀𐴠𐴊𐴧𐴠 𐴊𐴝𐴔𐴞 𐴒𐴝𐴏𐴢 𐴀𐴡𐴃𐴧𐴟, 𐴉𐴞𐴃𐴡𐴓𐴢 𐴀𐴡𐴃𐴧𐴟, 𐴓𐴟𐴖𐴝𐴥𐴃𐴧𐴟 𐴀𐴠𐴊𐴧𐴠 𐴔𐴝𐴌𐴁𐴡𐴥𐴓𐴡𐴃𐴧𐴟 𐴁𐴝𐴕𐴝𐴘𐴧𐴝 𐴋𐴡𐴙𐴓𐴧𐴝-𐴁𐴡𐴋𐴡𐴙𐴓𐴧𐴝 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴢;¹³𐴒𐴝𐴏𐴡𐴌 𐴏𐴝𐴥𐴓𐴢, 𐴔𐴡𐴏𐴡𐴥𐴓𐴧𐴝, 𐴀𐴝𐴒𐴡𐴥𐴌𐴁𐴝𐴃𐴧𐴞, 𐴀𐴝𐴣𐴃𐴡𐴌, 𐴓𐴟𐴁𐴝𐴕, 𐴀𐴝𐴚𐴒𐴟𐴌𐴡𐴌 𐴐𐴡𐴥𐴌𐴝𐴁𐴢, 𐴃𐴠𐴓𐴢, 𐴔𐴡𐴘𐴊𐴝, 𐴒𐴞𐴣𐴘𐴟, 𐴒𐴡𐴌𐴟, 𐴁𐴠𐴥𐴌𐴝𐴏𐴡𐴥𐴀𐴓𐴢, 𐴒𐴟𐴥𐴌𐴝, 𐴒𐴟𐴥𐴌𐴝-𐴒𐴝𐴌𐴞𐴥, 𐴀𐴠𐴊𐴧𐴠 𐴒𐴟𐴓𐴝𐴔 𐴀𐴡𐴥𐴑𐴧𐴡𐴓𐴢.

¹⁴𐴇𐴠𐴥 𐴐𐴡𐴥𐴊𐴡𐴌 𐴀𐴡𐴥𐴑𐴧𐴡𐴓𐴠 𐴈𐴡𐴘𐴁𐴡𐴤 𐴊𐴠, ”𐴃𐴟𐴘 𐴎𐴠 𐴉𐴡𐴥𐴓𐴉𐴡𐴓𐴝 𐴉𐴝𐴘𐴃𐴡 𐴀𐴝𐴎𐴧𐴟 𐴒𐴡𐴙𐴅𐴧𐴞𐴥𐴓𐴞 𐴇𐴞𐴥𐴀𐴕 𐴃𐴡𐴌 𐴇𐴝𐴣𐴏𐴡𐴥𐴃𐴧𐴟 𐴊𐴟𐴌 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴃𐴡𐴌 𐴃𐴟𐴖𐴝𐴚𐴒𐴡𐴌𐴞𐴌 𐴀𐴠𐴊𐴧𐴠 𐴐𐴟𐴥𐴕𐴊𐴡𐴌𐴡𐴌 𐴅𐴞𐴕𐴞𐴥𐴐𐴢 𐴁𐴠𐴒𐴧𐴟𐴥𐴕 𐴃𐴡𐴌 𐴈𐴠𐴥𐴕𐴃𐴟 𐴒𐴝𐴙𐴁𐴢 𐴀𐴡𐴥𐴘𐴒𐴞𐴘𐴡𐴘, 𐴔𐴝𐴙𐴕𐴐𐴠𐴥 𐴇𐴞𐴥𐴀𐴕𐴡𐴌𐴠 𐴀𐴝𐴌 𐴓𐴡𐴦𐴃𐴢 𐴕𐴡 𐴉𐴝𐴘𐴁𐴡.“¹⁵𐴇𐴠𐴥 𐴅𐴞𐴕𐴞𐴥𐴐𐴡𐴌 𐴐𐴡𐴥𐴊𐴡𐴌 𐴀𐴡𐴥𐴑𐴧𐴡𐴓𐴢 𐴎𐴠𐴃𐴝𐴌𐴝𐴤 𐴇𐴞𐴥𐴁𐴝𐴌 𐴎𐴡𐴌𐴞𐴘𐴝 𐴃𐴟𐴖𐴝𐴚𐴒𐴡𐴌 𐴀𐴡𐴥𐴘𐴒𐴞𐴘𐴡𐴘, 𐴀𐴞𐴥𐴃𐴝𐴌𐴝 𐴇𐴞𐴥𐴁𐴝𐴌 𐴀𐴝𐴎𐴝𐴁𐴢 𐴊𐴠𐴑𐴞𐴥 𐴋𐴡𐴦𐴌𐴠 𐴊𐴟𐴌𐴠𐴥 𐴃𐴞𐴥𐴘𐴝𐴘 𐴃𐴝𐴥𐴑𐴞𐴁𐴡. 𐴀𐴞𐴥𐴃𐴝𐴌𐴝 𐴈𐴝𐴣𐴊𐴝𐴈𐴝𐴍𐴞 𐴀𐴠𐴊𐴧𐴠 𐴁𐴞𐴓𐴝𐴑 𐴒𐴡𐴌𐴞𐴥𐴁𐴡,¹⁶𐴀𐴠𐴀𐴕 𐴈𐴡𐴀𐴘𐴢-𐴈𐴡𐴀𐴘𐴢,”𐴀𐴡𐴥 𐴋𐴡𐴣𐴀𐴌 𐴐𐴡𐴥𐴀𐴌, 𐴀𐴝𐴉𐴏𐴟𐴥𐴏𐴢, 𐴃𐴡𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢,𐴎𐴞𐴁𐴝𐴤 𐴁𐴝𐴌𐴞𐴥𐴑 𐴉𐴝𐴍𐴡𐴌-𐴇𐴡𐴦𐴌, 𐴁𐴝𐴘𐴡𐴙𐴕𐴧𐴝 𐴌𐴡𐴚𐴡𐴌 𐴇𐴡𐴦𐴌 𐴀𐴠𐴊𐴧𐴠 𐴑𐴞𐴌𐴔𐴞𐴏𐴢 𐴌𐴡𐴚𐴡𐴌 𐴇𐴡𐴦𐴌 𐴉𐴞𐴕𐴊𐴝𐴤,𐴀𐴝𐴦𐴌 𐴐𐴟𐴥𐴕𐴝, 𐴑𐴞𐴔𐴡𐴃𐴞 𐴉𐴝𐴃𐴧𐴡𐴥𐴌, 𐴀𐴠𐴊𐴧𐴠 𐴔𐴟𐴑𐴃𐴝 𐴓𐴡𐴘 𐴇𐴝𐴥𐴣𐴎𐴝𐴘𐴧𐴝;¹⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴈𐴡𐴔 𐴄𐴝𐴙𐴔𐴡𐴌 𐴁𐴟𐴥𐴃𐴡𐴌𐴠 𐴀𐴠𐴊𐴟𐴥𐴕 𐴊𐴡𐴥𐴕-𐴊𐴡𐴓𐴡𐴃𐴢 𐴃𐴡 𐴊𐴡𐴥𐴚𐴐𐴡 𐴀𐴡𐴥𐴘𐴒𐴞𐴘𐴡𐴘!“𐴎𐴝𐴀𐴣𐴏𐴡𐴌 𐴇𐴝𐴥𐴀𐴌 𐴔𐴝𐴎𐴞𐴥, 𐴇𐴝𐴥𐴀𐴌 𐴉𐴝𐴐𐴞𐴥𐴕𐴊𐴝𐴌 𐴀𐴠𐴊𐴧𐴠 𐴏𐴠𐴥𐴌𐴝𐴙𐴚𐴒𐴝, 𐴀𐴝𐴦𐴌 𐴎𐴠𐴊𐴟𐴥𐴕𐴠 𐴊𐴡𐴙𐴅𐴧𐴝𐴃𐴢 𐴈𐴝𐴔 𐴒𐴡𐴌𐴞𐴥 𐴏𐴡𐴓𐴠, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴊𐴟𐴌𐴠𐴥 𐴃𐴞𐴥𐴘𐴝𐴘 𐴃𐴝𐴥𐴑𐴞𐴁𐴡.¹⁸𐴇𐴞𐴥𐴁𐴝 𐴎𐴡𐴓𐴠𐴌 𐴊𐴠 𐴊𐴟𐴥𐴖𐴝𐴣 𐴊𐴠𐴑𐴞𐴥 𐴀𐴞𐴥𐴃𐴝𐴌𐴝 𐴒𐴟𐴎𐴡𐴌𐴞 𐴈𐴡𐴘𐴁𐴡𐴤 𐴊𐴠, ”𐴀𐴠 𐴋𐴡𐴣𐴀𐴌 𐴐𐴡𐴥𐴀𐴌 𐴘𐴝𐴀𐴕𐴡𐴌 𐴋𐴡𐴥𐴙𐴓𐴧𐴝 𐴀𐴝𐴌 𐴇𐴡𐴕𐴡𐴤 𐴐𐴡𐴥𐴀𐴌 𐴀𐴝𐴐𐴧𐴞𐴥𐴓𐴢 𐴕𐴞𐴥𐴑𐴞؟“¹⁹𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴔𐴝𐴃𐴝𐴥𐴃𐴢 𐴊𐴟𐴥𐴙𐴓𐴢 𐴔𐴝𐴌𐴞𐴁𐴡𐴥, 𐴀𐴝𐴦𐴌 𐴈𐴝𐴣𐴊𐴞-𐴈𐴝𐴣𐴊𐴞 𐴀𐴠𐴊𐴧𐴠 𐴁𐴞𐴓𐴝𐴑 𐴒𐴡𐴌𐴞𐴥-𐴒𐴡𐴌𐴞𐴥 𐴒𐴟𐴎𐴡𐴌𐴞 𐴈𐴡𐴘𐴁𐴡𐴤 𐴊𐴠,”𐴀𐴝𐴉𐴏𐴟𐴥𐴏𐴢, 𐴇𐴠𐴥 𐴋𐴡𐴣𐴀𐴌 𐴐𐴡𐴥𐴀𐴌𐴡𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢,𐴎𐴞𐴁𐴝𐴤𐴌 𐴊𐴡𐴥𐴕-𐴊𐴡𐴓𐴡𐴃𐴠𐴊𐴡𐴙𐴅𐴧𐴝𐴌 𐴃𐴝𐴔𐴝𐴥𐴔 𐴎𐴝𐴀𐴣𐴏𐴢 𐴀𐴡𐴓𐴝 𐴀𐴡𐴥𐴑𐴧𐴡𐴓𐴢 𐴃𐴟𐴖𐴝𐴚𐴒𐴡𐴌 𐴀𐴡𐴥𐴘𐴧𐴠,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴁𐴝𐴌𐴠 𐴃𐴡 𐴈𐴡𐴔 𐴄𐴝𐴙𐴔𐴡𐴌 𐴁𐴟𐴥𐴃𐴡𐴌𐴠 𐴊𐴡𐴥𐴚𐴐𐴡 𐴒𐴡𐴌𐴞𐴥𐴉𐴠𐴓𐴝 𐴒𐴞𐴥𐴘𐴠!“

²⁰𐴀𐴡𐴥 𐴀𐴝𐴏𐴔𐴝𐴕, 𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴢, 𐴌𐴡𐴏𐴟𐴥𐴓𐴢 𐴀𐴡𐴥𐴑𐴧𐴡𐴓𐴢, 𐴀𐴠𐴊𐴧𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴢,𐴇𐴞𐴥𐴁𐴝𐴌 𐴖𐴡𐴌𐴠 𐴎𐴞𐴘𐴝𐴥𐴕 𐴀𐴡𐴥𐴘𐴧𐴠 𐴇𐴞𐴥𐴘𐴝𐴕𐴡𐴓𐴧𐴝 𐴑𐴟𐴥𐴐𐴞 𐴒𐴡𐴌𐴡𐴤;𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴀𐴞𐴕𐴏𐴝𐴥𐴉𐴢 𐴒𐴡𐴌𐴞𐴥𐴇𐴞𐴥𐴁𐴝𐴃𐴧𐴟 𐴃𐴟𐴣𐴀𐴝𐴥𐴌𐴝𐴌 𐴁𐴡𐴊𐴡𐴓𐴝 𐴓𐴡𐴘𐴉𐴠𐴥𐴓𐴝𐴘𐴧𐴠.

²¹𐴃𐴝𐴌𐴉𐴡𐴌𐴠 𐴀𐴠𐴒𐴧𐴗𐴝𐴤 𐴃𐴝𐴦𐴑𐴡𐴃𐴖𐴝𐴓𐴝 𐴉𐴞𐴥𐴌𐴞𐴏𐴃𐴝𐴘𐴠 𐴋𐴡𐴣𐴀𐴌 𐴏𐴝𐴑𐴧𐴞𐴌 𐴋𐴡𐴥𐴙𐴓𐴧𐴝 𐴀𐴠𐴥𐴒𐴧𐴗𐴝 𐴉𐴝𐴃𐴧𐴡𐴥𐴌 𐴃𐴟𐴓𐴞𐴤 𐴓𐴡𐴦𐴘𐴢 𐴊𐴡𐴙𐴅𐴧𐴝𐴃𐴢 𐴔𐴠𐴓𐴝𐴤𐴔𐴝𐴌𐴞 𐴈𐴡𐴀𐴌 𐴊𐴠,”𐴀𐴠𐴕𐴊𐴞𐴓𐴧𐴝 𐴎𐴟𐴌𐴠 𐴋𐴡𐴣𐴀𐴌 𐴐𐴡𐴥𐴀𐴌 𐴁𐴝𐴁𐴞𐴓𐴡𐴕𐴡𐴌𐴠 𐴉𐴠𐴥𐴓𐴝𐴘𐴊𐴞𐴘𐴝 𐴎𐴝𐴘𐴁𐴡.𐴇𐴞𐴥𐴁𐴝𐴌𐴠 𐴀𐴝𐴌 𐴇𐴡𐴕𐴡𐴤𐴊𐴞𐴕 𐴉𐴝𐴦 𐴕𐴡 𐴎𐴝𐴘𐴁𐴡.²²𐴁𐴞𐴕𐴝-𐴁𐴝𐴎𐴡𐴘𐴝𐴌, 𐴃𐴝𐴓𐴢-𐴁𐴝𐴎𐴡𐴘𐴝𐴌, 𐴁𐴝𐴐𐴞𐴤-𐴁𐴝𐴎𐴡𐴘𐴝𐴌 𐴀𐴠𐴊𐴧𐴠 𐴐𐴞𐴥𐴛𐴝-𐴔𐴝𐴃𐴡𐴘𐴝𐴌 𐴀𐴝𐴁𐴝𐴏𐴢𐴀𐴝𐴌 𐴇𐴡𐴕𐴡𐴤𐴊𐴞𐴕 𐴃𐴡𐴌 𐴁𐴟𐴥𐴃𐴡𐴌𐴠 𐴉𐴟𐴥𐴕𐴝 𐴕𐴡 𐴎𐴝𐴘𐴁𐴡;𐴃𐴡𐴌 𐴁𐴟𐴥𐴃𐴡𐴌𐴠 𐴀𐴝𐴌 𐴇𐴡𐴕𐴡𐴤𐴊𐴞𐴕𐴇𐴡𐴕𐴡𐴤 𐴋𐴡𐴥𐴙𐴓𐴧𐴝 𐴔𐴞𐴏𐴃𐴞𐴥𐴌𐴞𐴌 𐴐𐴡𐴥𐴊𐴡𐴌𐴞 𐴉𐴝𐴦 𐴕𐴡 𐴎𐴝𐴘𐴁𐴡;𐴃𐴡𐴌 𐴁𐴟𐴥𐴃𐴡𐴌𐴠 𐴇𐴡𐴕𐴡𐴤 𐴏𐴝𐴑𐴧𐴞𐴌 𐴀𐴝𐴁𐴝𐴏𐴢𐴀𐴝𐴌 𐴇𐴡𐴕𐴡𐴤𐴊𐴞𐴕 𐴉𐴟𐴥𐴕𐴝 𐴕𐴡 𐴎𐴝𐴘𐴁𐴡.²³𐴃𐴡𐴌 𐴁𐴟𐴥𐴃𐴡𐴌𐴠 𐴏𐴠𐴌𐴝𐴑𐴡𐴌 𐴉𐴡𐴀𐴌𐴠𐴀𐴝𐴌 𐴇𐴡𐴕𐴡𐴤𐴊𐴞𐴕 𐴉𐴡𐴀𐴌 𐴕𐴡 𐴊𐴞𐴁𐴡;𐴊𐴟𐴓𐴝𐴤 𐴀𐴠𐴊𐴧𐴠 𐴊𐴟𐴓𐴞𐴥𐴌 𐴀𐴝𐴁𐴝𐴏𐴢 𐴃𐴡𐴌 𐴁𐴟𐴥𐴃𐴡𐴌𐴠𐴀𐴝𐴌 𐴇𐴡𐴕𐴡𐴤𐴊𐴞𐴕 𐴉𐴟𐴥𐴕𐴝 𐴕𐴡 𐴎𐴝𐴘𐴁𐴡;𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴡𐴌 𐴐𐴡𐴥𐴊𐴡𐴌 𐴀𐴡𐴥𐴑𐴧𐴡𐴓𐴢 𐴃𐴡 𐴊𐴟𐴕𐴞𐴘𐴝𐴙𐴌 𐴋𐴡𐴣𐴀𐴌 𐴔𐴝𐴕𐴟𐴥𐴙𐴐𐴢 𐴀𐴝𐴐𐴧𐴞𐴥𐴓𐴢,𐴀𐴝𐴦𐴌 𐴃𐴡𐴌 𐴅𐴝𐴊𐴟𐴒𐴝𐴌𐴞 𐴓𐴡𐴘 𐴃𐴝𐴔𐴝𐴥𐴔 𐴑𐴡𐴗𐴔 𐴀𐴡𐴥𐴑𐴧𐴡𐴓𐴢 𐴒𐴡𐴓𐴧𐴡𐴃𐴡𐴃𐴢 𐴒𐴞𐴦𐴘𐴡𐴥𐴘.²⁴𐴇𐴞𐴥𐴁𐴝𐴌 𐴁𐴟𐴥𐴃𐴡𐴌𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴢 𐴀𐴡𐴌, 𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴢 𐴀𐴡𐴌,𐴀𐴠𐴊𐴧𐴠 𐴀𐴟𐴘𐴃𐴝𐴌𐴝𐴤 𐴁𐴠𐴒𐴧𐴟𐴥𐴕𐴡𐴌 𐴓𐴡𐴖𐴢 𐴉𐴝𐴦 𐴒𐴞𐴘𐴠𐴥 𐴎𐴠𐴃𐴝𐴌𐴝𐴤𐴌𐴠 𐴊𐴟𐴕𐴞𐴘𐴝𐴙𐴃𐴢 𐴑𐴟𐴥𐴕 𐴒𐴡𐴌𐴝𐴥 𐴒𐴞𐴥𐴘𐴠.“

The Word for the World International

https://app.library.bible/content/87faca8b51c22590