Read 𐴎𐴝𐴇𐴠𐴥𐴌𐴞 16

𐴎𐴝𐴇𐴠𐴥𐴌𐴞16

𐴀𐴝𐴓𐴧𐴝𐴌 𐴒𐴡𐴎𐴧𐴡𐴁𐴡𐴌 𐴉𐴞𐴘𐴝𐴓𐴝

¹𐴁𐴝𐴦𐴊𐴠 𐴇𐴠𐴥 𐴀𐴠𐴁𐴝𐴦𐴊𐴡𐴃𐴢-𐴈𐴝𐴥𐴕𐴝𐴃𐴧𐴟 𐴀𐴝𐴀𐴛 𐴀𐴠𐴥𐴒𐴧𐴗𐴝 𐴋𐴡𐴣𐴀𐴌 𐴀𐴝𐴁𐴝𐴏𐴢 𐴉𐴟𐴥𐴙𐴕𐴧𐴞, 𐴇𐴝𐴥𐴣𐴃𐴡 𐴖𐴝 𐴉𐴞𐴥𐴌𐴞𐴏𐴃𐴝𐴌𐴠 𐴀𐴠𐴀𐴕 𐴈𐴡𐴀𐴌 𐴊𐴠, ”𐴎𐴡𐴦, 𐴀𐴝𐴓𐴧𐴝𐴌 𐴒𐴡𐴎𐴧𐴡𐴁𐴡𐴌 𐴉𐴞𐴘𐴝𐴓𐴝 𐴇𐴝𐴥𐴣𐴃𐴡 𐴖𐴝 𐴊𐴟𐴕𐴞𐴘𐴝𐴙𐴃𐴢 𐴋𐴝𐴥𐴓𐴞𐴊𐴡𐴒𐴡𐴘.“

²𐴃𐴡𐴥𐴘 𐴉𐴡𐴀𐴘𐴓𐴝 𐴉𐴞𐴥𐴌𐴞𐴏𐴃𐴝 𐴖𐴝 𐴎𐴝𐴘 𐴀𐴞𐴥𐴁𐴝𐴌 𐴉𐴞𐴘𐴝𐴓𐴝 𐴖𐴝 𐴊𐴟𐴕𐴞𐴘𐴝𐴙𐴃𐴢 𐴋𐴝𐴥𐴓𐴞𐴊𐴞𐴘𐴠; 𐴁𐴝𐴦𐴊𐴠 𐴔𐴝𐴕𐴟𐴥𐴙𐴐𐴢 𐴀𐴟𐴘𐴃𐴝𐴌𐴝𐴤𐴌 𐴒𐴝𐴦𐴃𐴢 𐴁𐴞𐴐𐴞𐴤 𐴇𐴡𐴥𐴃𐴝𐴌𐴝 𐴀𐴠𐴊𐴧𐴠 𐴁𐴞𐴐𐴢 𐴀𐴡𐴓𐴝 𐴀𐴠𐴑 𐴎𐴝𐴃𐴡𐴌 𐴒𐴝𐴥𐴀 𐴉𐴡𐴘𐴊𐴝 𐴀𐴡𐴥𐴘𐴧𐴠 𐴎𐴠𐴃𐴝𐴌𐴝𐴤𐴌 𐴖𐴡𐴌𐴠 𐴇𐴝𐴥𐴘𐴡𐴖𐴝𐴕𐴡𐴌 𐴕𐴞𐴐𐴝𐴥𐴕 𐴀𐴝𐴏𐴠𐴤 𐴀𐴠𐴊𐴧𐴠 𐴎𐴠𐴃𐴝𐴌𐴝𐴤 𐴘𐴞𐴥𐴁𐴝𐴌 𐴔𐴟𐴃𐴧𐴞𐴌𐴠 𐴏𐴡𐴥𐴘𐴊𐴝 𐴒𐴡𐴙𐴅𐴧𐴠𐴥.

³𐴊𐴟𐴏𐴝𐴥𐴌𐴝 𐴉𐴞𐴥𐴌𐴞𐴏𐴃𐴝 𐴖𐴝𐴘𐴠 𐴀𐴞𐴥𐴁𐴝𐴌 𐴉𐴞𐴘𐴝𐴓𐴝 𐴖𐴝 𐴊𐴡𐴙𐴅𐴧𐴝𐴃𐴢 𐴋𐴝𐴥𐴓𐴞𐴊𐴞𐴘𐴠; 𐴁𐴝𐴦𐴊𐴠 𐴇𐴞𐴥𐴘𐴝𐴕 𐴔𐴡𐴌𐴝 𐴔𐴝𐴕𐴟𐴥𐴙𐴐𐴡𐴌 𐴓𐴡𐴖𐴢 𐴎𐴠𐴕𐴊𐴞𐴓𐴧𐴝 𐴇𐴠𐴥𐴕𐴊𐴞𐴓𐴧𐴝 𐴓𐴡𐴖𐴢 𐴁𐴡𐴕𐴞𐴒𐴞𐴘𐴡𐴥𐴘, 𐴀𐴝𐴦𐴌 𐴊𐴡𐴙𐴅𐴧𐴝𐴌 𐴉𐴡𐴃𐴧𐴞𐴥 𐴎𐴝𐴕𐴊𐴝𐴥𐴌 𐴔𐴡𐴌𐴞𐴒𐴞𐴘𐴡𐴥𐴘.

⁴𐴃𐴞𐴏𐴝𐴥𐴌𐴝 𐴉𐴞𐴥𐴌𐴞𐴏𐴃𐴝 𐴖𐴝𐴘𐴠 𐴀𐴞𐴥𐴁𐴝𐴌 𐴉𐴞𐴘𐴝𐴓𐴝 𐴖𐴝 𐴇𐴝𐴥𐴓𐴢 𐴀𐴡𐴥𐴑𐴧𐴡𐴓𐴡𐴃𐴢 𐴀𐴠𐴊𐴧𐴠 𐴉𐴝𐴕𐴞𐴥𐴌 𐴎𐴡𐴥𐴕𐴧𐴝 𐴀𐴡𐴥𐴑𐴧𐴡𐴓𐴡𐴃𐴢 𐴋𐴝𐴥𐴓𐴞𐴊𐴞𐴘𐴠; 𐴁𐴝𐴦𐴊𐴠 𐴇𐴞𐴥𐴀𐴕 𐴓𐴡𐴖𐴢 𐴁𐴡𐴕𐴞𐴒𐴞𐴘𐴡𐴥𐴘.⁵𐴃𐴝𐴌𐴉𐴡𐴌𐴠 𐴀𐴝𐴀𐴛 𐴉𐴟𐴥𐴙𐴕𐴧𐴞 𐴊𐴠, 𐴉𐴝𐴕𐴞𐴥𐴌 𐴎𐴞𐴔𐴧𐴝𐴊𐴝𐴌 𐴉𐴞𐴥𐴌𐴞𐴏𐴃𐴝𐴘𐴠 𐴀𐴠𐴀𐴕 𐴈𐴡𐴀𐴌,”𐴀𐴡𐴥 𐴂𐴝𐴑𐴎𐴡𐴕, 𐴎𐴞𐴁𐴝𐴤 𐴀𐴝𐴏𐴡𐴤 𐴀𐴠𐴊𐴧𐴠 𐴎𐴞𐴁𐴝𐴤 𐴀𐴝𐴐𐴧𐴞𐴥𐴓𐴝,𐴃𐴟𐴀𐴛 𐴀𐴞𐴕𐴏𐴝𐴥𐴉𐴖𐴝𐴓𐴝, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴀𐴛 𐴃𐴡 𐴀𐴞𐴀𐴕𐴡𐴌 𐴀𐴞𐴕𐴏𐴝𐴥𐴉𐴢 𐴒𐴡𐴙𐴅𐴧𐴡𐴥;⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌𐴝 𐴃𐴡 𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴢 𐴀𐴡𐴌𐴀𐴠𐴊𐴧𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴓𐴡𐴖𐴢 𐴁𐴝𐴥𐴐𐴝𐴘𐴧𐴠,𐴇𐴠𐴥𐴃𐴡𐴓𐴧𐴝 𐴃𐴟𐴀𐴛 𐴀𐴞𐴥𐴃𐴝𐴌𐴝𐴌𐴠 𐴓𐴡𐴖𐴢 𐴈𐴝𐴥𐴀 𐴁𐴝𐴘𐴧𐴡𐴥;𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴇𐴞𐴥𐴘𐴝𐴕𐴡𐴌 𐴓𐴝𐴦𐴘𐴠𐴑.“

⁷𐴁𐴝𐴦𐴊𐴠 𐴀𐴝𐴀𐴛 𐴉𐴟𐴥𐴙𐴕𐴧𐴞 𐴊𐴠, 𐴑𐴟𐴌𐴁𐴝𐴕𐴞-𐴒𐴝𐴥𐴣𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴌,”𐴀𐴡𐴥𐴘, 𐴀𐴡𐴥 𐴔𐴝𐴁𐴟𐴊𐴢, 𐴇𐴝𐴥𐴀𐴌 𐴑𐴟𐴊𐴟𐴌𐴟𐴃𐴖𐴝𐴓𐴝 𐴑𐴟𐴥𐴊𐴝,𐴃𐴟𐴣𐴀𐴝𐴥𐴣𐴌 𐴁𐴞𐴏𐴝𐴌 𐴏𐴡𐴥𐴘𐴧𐴞 𐴀𐴝𐴦𐴌 𐴀𐴞𐴕𐴏𐴝𐴥𐴉𐴞.“

⁸𐴏𐴝𐴙𐴌 𐴕𐴡𐴔𐴁𐴡𐴥𐴌𐴡𐴌 𐴉𐴞𐴥𐴌𐴞𐴏𐴃𐴝 𐴖𐴝𐴘𐴠 𐴀𐴞𐴥𐴁𐴝𐴌 𐴉𐴞𐴘𐴝𐴓𐴝 𐴖𐴝 𐴁𐴠𐴙𐴓𐴡𐴃𐴢 𐴋𐴝𐴥𐴓𐴞𐴊𐴞𐴘𐴠, 𐴀𐴝𐴦𐴌 𐴇𐴞𐴥𐴘𐴝𐴕𐴡𐴌𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴡𐴦𐴙𐴕 𐴓𐴡𐴘 𐴉𐴟𐴌𐴝𐴊𐴞 𐴁𐴡𐴓𐴧𐴝 𐴑𐴠𐴥𐴔𐴡𐴃𐴝 𐴊𐴞𐴦𐴘𐴝 𐴒𐴞𐴘𐴠𐴥.⁹𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴒𐴡𐴌𐴡𐴔𐴡𐴌 𐴃𐴠𐴎𐴠 𐴎𐴡𐴓𐴞𐴒𐴞𐴘𐴡𐴥𐴘; 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴝𐴓𐴧𐴝𐴌 𐴕𐴝𐴔𐴡𐴌 𐴑𐴟𐴉𐴠𐴥𐴌𐴞 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠, 𐴎𐴞𐴁𐴝𐴤𐴃𐴧𐴟 𐴇𐴠𐴥 𐴀𐴝𐴉𐴡𐴃𐴧𐴟𐴕𐴡𐴌 𐴖𐴡𐴌𐴠 𐴑𐴠𐴥𐴔𐴡𐴃𐴝 𐴀𐴝𐴏𐴠𐴤. 𐴀𐴞𐴥𐴃𐴝𐴌𐴝 𐴃𐴡𐴖𐴝𐴥 𐴘𐴡𐴥 𐴕𐴡𐴥 𐴒𐴡𐴌𐴠𐴥, 𐴀𐴝𐴦𐴌 𐴀𐴝𐴓𐴧𐴝𐴌 𐴔𐴡𐴈𐴞𐴥𐴔𐴝 𐴘𐴡𐴥 𐴕𐴡𐴥 𐴒𐴡𐴌𐴠𐴥.

¹⁰𐴃𐴝𐴌𐴉𐴡𐴌𐴠 𐴉𐴝𐴣𐴏𐴢 𐴕𐴡𐴔𐴁𐴡𐴥𐴌𐴡𐴌 𐴉𐴞𐴥𐴌𐴞𐴏𐴃𐴝 𐴖𐴝𐴘𐴠 𐴀𐴞𐴥𐴁𐴝𐴌 𐴉𐴞𐴘𐴝𐴓𐴝 𐴖𐴝 𐴇𐴝𐴥𐴘𐴡𐴖𐴝𐴕𐴡𐴌 𐴃𐴡𐴑𐴃𐴡𐴥 𐴒𐴝𐴥𐴕𐴡𐴌 𐴖𐴡𐴌𐴠 𐴋𐴝𐴥𐴓𐴞𐴊𐴞𐴘𐴠, 𐴁𐴝𐴦𐴊𐴠 𐴘𐴞𐴥𐴁𐴝𐴌 𐴌𐴝𐴙𐴅𐴧𐴡 𐴀𐴝𐴕𐴊𐴝𐴤𐴌 𐴀𐴡𐴥𐴘𐴒𐴞𐴘𐴡𐴘; 𐴀𐴝𐴦𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴃𐴡𐴑𐴡𐴓𐴞𐴉𐴠 𐴎𐴞𐴌 𐴇𐴡𐴦𐴣𐴌𐴞 𐴊𐴡𐴙𐴅𐴧𐴠.¹¹𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴃𐴡𐴑𐴡𐴓𐴞𐴉𐴠 𐴀𐴠𐴊𐴧𐴠 𐴒𐴝𐴥𐴀 𐴀𐴡𐴥𐴑𐴧𐴡𐴓𐴡𐴌 𐴎𐴡𐴌𐴞𐴘𐴝 𐴀𐴝𐴏𐴔𐴝𐴕𐴡𐴌 𐴀𐴝𐴓𐴧𐴝𐴌 𐴑𐴟𐴉𐴠𐴥𐴌𐴞 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴞𐴥𐴃𐴝𐴌𐴝𐴌 𐴈𐴝𐴔𐴡𐴃𐴧𐴟 𐴃𐴡𐴖𐴝𐴥 𐴒𐴡𐴌𐴞𐴥 𐴕𐴡𐴥 𐴉𐴠𐴓𐴠.

¹²𐴏𐴡𐴥 𐴕𐴡𐴔𐴁𐴡𐴥𐴌𐴡𐴌 𐴉𐴞𐴥𐴌𐴞𐴏𐴃𐴝 𐴖𐴝𐴘𐴠 𐴀𐴞𐴥𐴁𐴝𐴌 𐴉𐴞𐴘𐴝𐴓𐴝 𐴖𐴝 𐴁𐴡𐴌 𐴇𐴝𐴥𐴓𐴢 𐴀𐴠𐴉𐴟𐴌𐴝𐴃𐴡𐴃𐴢 𐴋𐴝𐴥𐴓𐴞𐴊𐴞𐴘𐴠; 𐴁𐴝𐴦𐴊𐴠 𐴇𐴞𐴥𐴘𐴝𐴕𐴡𐴌 𐴉𐴝𐴕𐴞𐴥 𐴒𐴟𐴥𐴕 𐴉𐴟𐴥𐴖𐴝𐴘𐴒𐴞𐴘𐴡𐴘, 𐴎𐴠𐴀𐴕𐴠 𐴉𐴟𐴑 𐴑𐴟𐴓𐴡𐴌 𐴁𐴝𐴀𐴣𐴐𐴧𐴝 𐴀𐴡𐴥𐴑𐴧𐴡𐴓𐴡𐴓𐴧𐴝 𐴌𐴝𐴏𐴃𐴝 𐴃𐴡𐴘𐴧𐴝𐴌 𐴀𐴡𐴥.¹³𐴃𐴝𐴌𐴉𐴡𐴌𐴠 𐴀𐴝𐴀𐴛 𐴊𐴠𐴙𐴑𐴧𐴞𐴥 𐴊𐴠, 𐴁𐴠𐴚𐴡𐴌 𐴋𐴡𐴥𐴙𐴓𐴧𐴝 𐴃𐴞𐴕 𐴕𐴗𐴝𐴥 𐴕𐴝𐴉𐴝𐴑 𐴌𐴟𐴀 𐴕𐴠𐴦𐴓𐴞𐴀𐴝𐴘𐴧𐴠𐴥𐴌, 𐴀𐴠𐴑𐴒𐴗𐴝𐴥 𐴕𐴝𐴒𐴝𐴤𐴌 𐴒𐴝𐴓𐴢 𐴀𐴡𐴃𐴧𐴟, 𐴀𐴝𐴌 𐴀𐴠𐴑𐴒𐴗𐴝𐴥 𐴇𐴝𐴥𐴘𐴡𐴖𐴝𐴕𐴡𐴌 𐴒𐴝𐴓𐴢 𐴀𐴡𐴃𐴧𐴟, 𐴀𐴝𐴌 𐴀𐴠𐴑𐴒𐴗𐴝𐴥 𐴔𐴞𐴏𐴝𐴥 𐴕𐴡𐴁𐴞𐴌 𐴒𐴝𐴓𐴢 𐴀𐴡𐴃𐴧𐴟.¹⁴𐴇𐴞𐴥𐴀𐴕 𐴀𐴡𐴥𐴙𐴓𐴊𐴠 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴡𐴌 𐴌𐴟𐴀 𐴎𐴞𐴀𐴕𐴠 𐴑𐴠𐴌𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢 𐴊𐴝𐴈𐴝𐴤. 𐴇𐴞𐴥𐴀𐴕 𐴕𐴠𐴦𐴓𐴞 𐴉𐴟𐴌𐴝 𐴊𐴟𐴕𐴞𐴘𐴝𐴙𐴌 𐴁𐴝𐴀𐴣𐴐𐴧𐴝 𐴀𐴡𐴥𐴑𐴧𐴡𐴓𐴡𐴌 𐴇𐴠𐴥𐴍𐴠 𐴒𐴞𐴦𐴘𐴠𐴥, 𐴀𐴞𐴥𐴃𐴝𐴌𐴝𐴌𐴠 𐴇𐴝𐴥𐴀𐴌 𐴑𐴟𐴊𐴟𐴌𐴟𐴃𐴖𐴝𐴓𐴝 𐴑𐴟𐴥𐴊𐴝𐴌 𐴋𐴡𐴣𐴀𐴌 𐴊𐴞𐴕𐴡𐴌 𐴓𐴝𐴌𐴝𐴥𐴘 𐴓𐴧𐴝 𐴎𐴡𐴔𐴝 𐴒𐴡𐴌𐴞𐴥 𐴁𐴡𐴓𐴧𐴝.

¹⁵”𐴏𐴡𐴀, 𐴀𐴝𐴀𐴛 𐴏𐴟𐴌 𐴀𐴝𐴘𐴧𐴠𐴤 𐴉𐴝𐴥𐴚𐴒𐴡𐴌𐴞 𐴀𐴝𐴘𐴧𐴞𐴤𐴌. 𐴔𐴟𐴁𐴝𐴌𐴠𐴑 𐴀𐴟𐴁𐴝𐴤 𐴎𐴞𐴁𐴝𐴤 𐴏𐴠𐴃𐴡𐴕 𐴃𐴝𐴥𐴑𐴠 𐴀𐴠𐴊𐴧𐴠 𐴕𐴞𐴎𐴡𐴌 𐴇𐴡𐴦𐴌 𐴉𐴞𐴕𐴊𐴞𐴥 𐴃𐴝𐴥𐴑𐴠, 𐴎𐴠𐴀𐴕𐴠 𐴀𐴞𐴥𐴁𐴝𐴃𐴧𐴟 𐴁𐴞𐴘𐴡𐴏𐴧𐴡𐴌 𐴇𐴝𐴥𐴓𐴡𐴃𐴠 𐴁𐴠𐴌𐴝 𐴕𐴡 𐴉𐴡𐴌𐴠 𐴀𐴝𐴦𐴌 𐴔𐴝𐴙𐴕𐴐𐴠𐴥 𐴀𐴞𐴥𐴁𐴝𐴌 𐴐𐴡𐴥𐴌𐴡𐴔 𐴕𐴡 𐴊𐴠𐴑𐴠𐴥.“

¹⁶𐴁𐴝𐴦𐴊𐴠 𐴇𐴞𐴥𐴀𐴕𐴠 𐴁𐴝𐴀𐴣𐴐𐴧𐴝 𐴀𐴡𐴥𐴑𐴧𐴡𐴓𐴡𐴌𐴠 𐴎𐴝𐴒𐴝 𐴖𐴝𐴀𐴕𐴡𐴃𐴢 𐴎𐴡𐴔𐴝 𐴒𐴡𐴙𐴅𐴧𐴠𐴥 𐴎𐴞𐴘𐴝𐴥𐴕𐴡𐴌𐴠 𐴇𐴞𐴁𐴌𐴟𐴤 𐴎𐴟𐴁𐴝𐴕𐴡𐴃𐴧𐴟 𐴇𐴝𐴌𐴔𐴝𐴒𐴞𐴊𐴡𐴕 𐴁𐴡𐴓𐴞 𐴈𐴡𐴀.

¹⁷𐴃𐴝𐴌𐴉𐴡𐴌𐴠 𐴇𐴝𐴥𐴣𐴃𐴢 𐴕𐴡𐴔𐴁𐴡𐴥𐴌𐴡𐴌 𐴉𐴞𐴥𐴌𐴞𐴏𐴃𐴝 𐴖𐴝𐴘𐴠 𐴀𐴞𐴥𐴁𐴝𐴌 𐴉𐴞𐴘𐴝𐴓𐴝 𐴖𐴝 𐴁𐴡𐴘𐴧𐴝𐴌𐴡𐴃𐴢 𐴋𐴝𐴥𐴓𐴞𐴊𐴞𐴘𐴠, 𐴀𐴝𐴦𐴌 𐴀𐴠𐴁𐴝𐴦𐴊𐴡𐴃𐴢-𐴈𐴝𐴥𐴕𐴝 𐴒𐴝𐴥𐴕𐴡𐴌 𐴃𐴡𐴑𐴃𐴡𐴥𐴃𐴧𐴟 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴀𐴝𐴁𐴝𐴏𐴢 𐴕𐴠𐴦𐴓𐴞𐴀𐴝𐴙𐴐𐴧𐴠𐴥, 𐴀𐴠𐴀𐴕 𐴈𐴡𐴀𐴌 𐴊𐴠, ”𐴀𐴡𐴥𐴘𐴒𐴞𐴘𐴡𐴘.“¹⁸𐴇𐴠𐴥𐴃𐴟𐴕𐴡𐴃𐴢 𐴁𐴞𐴅𐴞𐴓𐴞𐴌 𐴐𐴡𐴥𐴍𐴡𐴑 𐴀𐴡𐴥𐴘𐴧𐴠, 𐴋𐴡𐴦𐴌 𐴓𐴝𐴒𐴠 𐴊𐴠 𐴀𐴝𐴁𐴝𐴏𐴢 𐴀𐴡𐴥𐴘𐴧𐴠, 𐴀𐴠𐴊𐴧𐴠 𐴄𐴝𐴥𐴍𐴝𐴓𐴢 𐴉𐴡𐴌𐴝𐴃𐴢 𐴊𐴡𐴙𐴅𐴧𐴠; 𐴇𐴠𐴥𐴍𐴠 𐴀𐴠𐴕𐴊𐴞𐴓𐴧𐴝 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴁𐴟𐴥𐴏𐴝𐴓𐴢 𐴀𐴡𐴥𐴘𐴧𐴠, 𐴎𐴠𐴕𐴊𐴞𐴓𐴧𐴝 𐴊𐴟𐴕𐴞𐴘𐴝𐴙𐴃𐴢 𐴀𐴞𐴕𐴏𐴝𐴥𐴕-𐴎𐴝𐴃𐴞 𐴉𐴡𐴘𐴊𐴝 𐴀𐴡𐴥𐴘𐴧𐴠 𐴓𐴡𐴥𐴃𐴞 𐴇𐴡𐴕𐴡𐴤 𐴀𐴡𐴑𐴃𐴡𐴥𐴃𐴢 𐴕𐴡𐴥 𐴀𐴡𐴥𐴘𐴧𐴡, 𐴘𐴞𐴥𐴁𐴝 𐴇𐴠𐴥𐴃𐴧𐴡𐴌 𐴋𐴡𐴣𐴀𐴌 𐴁𐴟𐴥𐴏𐴝𐴓𐴢 𐴀𐴠𐴊𐴧𐴠 𐴁𐴞𐴐𐴞𐴤 𐴃𐴝𐴦𐴑𐴡𐴃𐴖𐴝𐴓𐴝.¹⁹𐴋𐴡𐴣𐴀𐴌 𐴐𐴡𐴥𐴀𐴌 𐴒𐴝𐴥𐴕 𐴃𐴞𐴕 𐴁𐴝𐴥𐴑 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴑𐴡𐴗𐴔 𐴀𐴡𐴥𐴑𐴧𐴡𐴓𐴡𐴌 𐴐𐴡𐴥𐴀𐴌 𐴀𐴡𐴥𐴑𐴧𐴡𐴓𐴢 𐴉𐴡𐴌𐴞𐴒𐴞𐴘𐴡𐴥𐴘. 𐴀𐴝𐴓𐴧𐴝𐴘𐴠 𐴋𐴡𐴣𐴀𐴌 𐴐𐴡𐴥𐴀𐴌 𐴁𐴝𐴁𐴞𐴓𐴡𐴕𐴡𐴌𐴠 𐴘𐴝𐴦𐴊𐴢 𐴒𐴡𐴌𐴞𐴥 𐴇𐴞𐴥𐴘𐴝𐴕𐴡𐴌𐴠 𐴀𐴞𐴥𐴁𐴝𐴌 𐴒𐴟𐴐𐴧𐴝𐴤𐴌 𐴒𐴡𐴎𐴧𐴡𐴁𐴡𐴌 𐴐𐴡𐴥𐴌𐴝𐴁𐴢 𐴓𐴡𐴥𐴘 𐴉𐴟𐴌𐴝𐴘𐴧𐴝 𐴉𐴞𐴘𐴝𐴓𐴝 𐴈𐴝𐴥𐴀 𐴁𐴝𐴘𐴧𐴠𐴥.²⁰𐴇𐴝𐴥𐴀𐴌 𐴋𐴞𐴘𐴝 𐴒𐴝𐴙𐴁𐴢 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴉𐴝𐴀𐴌 𐴀𐴡𐴥𐴑𐴧𐴡𐴓𐴢 𐴇𐴡𐴍𐴠𐴥 𐴒𐴞𐴦𐴘𐴡𐴥𐴘.²¹𐴀𐴝𐴏𐴔𐴝𐴕𐴡𐴃𐴧𐴟 𐴔𐴡𐴕-𐴔𐴡𐴕 𐴀𐴟𐴎𐴡𐴥𐴕 𐴀𐴡𐴓𐴝 𐴋𐴡𐴣𐴀𐴌-𐴋𐴡𐴣𐴀𐴌 𐴐𐴞𐴥𐴓𐴢-𐴁𐴡𐴌𐴡𐴥𐴉𐴢 𐴀𐴡𐴥𐴑𐴧𐴡𐴓𐴢 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴖𐴡𐴌𐴠 𐴉𐴡𐴌𐴝𐴃𐴢 𐴊𐴡𐴙𐴅𐴧𐴠, 𐴀𐴝𐴦𐴌 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌𐴝 𐴇𐴠𐴥 𐴐𐴞𐴥𐴓𐴢-𐴁𐴡𐴌𐴡𐴥𐴉𐴡𐴌 𐴀𐴝𐴉𐴡𐴃𐴡𐴓𐴧𐴝 𐴁𐴡𐴥𐴓𐴞 𐴀𐴝𐴓𐴧𐴝𐴌 𐴑𐴟𐴉𐴠𐴥𐴌𐴞 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥 𐴀𐴝𐴉𐴡𐴃𐴢 𐴃𐴝𐴥𐴕 𐴁𐴞𐴐𐴞𐴤 𐴇𐴡𐴥𐴃𐴝𐴌𐴕𐴝𐴑.

The Word for the World International

https://app.library.bible/content/87faca8b51c22590