Read 𐴎𐴝𐴇𐴠𐴥𐴌𐴞 12

𐴎𐴝𐴇𐴠𐴥𐴌𐴞12

𐴔𐴝𐴘𐴧𐴝𐴉𐴟𐴖𐴝 𐴀𐴠𐴊𐴧𐴠 𐴕𐴝𐴒𐴝𐴤

¹𐴁𐴝𐴦𐴊𐴠 𐴀𐴝𐴏𐴔𐴝𐴕𐴡𐴃𐴢 𐴀𐴠𐴑𐴧𐴝𐴥𐴕 𐴋𐴡𐴣𐴀𐴌 𐴕𐴞𐴐𐴝𐴥𐴕 𐴊𐴝𐴈𐴝𐴤 𐴒𐴞𐴥𐴘𐴠: 𐴀𐴠𐴒𐴧𐴗𐴝𐴤 𐴔𐴝𐴘𐴝𐴉𐴟𐴖𐴝 𐴁𐴠𐴙𐴓𐴢 𐴉𐴞𐴕𐴊𐴝𐴤, 𐴇𐴞𐴥𐴁𐴝𐴌 𐴄𐴠𐴥𐴚𐴡𐴌 𐴃𐴡𐴓𐴠 𐴏𐴝𐴕 𐴀𐴝𐴏𐴠𐴤, 𐴀𐴝𐴦𐴌 𐴔𐴝𐴃𐴝𐴥𐴌 𐴖𐴡𐴌𐴠 𐴁𐴝𐴌𐴡𐴥 𐴖𐴝 𐴃𐴝𐴌𐴝 𐴀𐴡𐴓𐴝 𐴀𐴠𐴒𐴧𐴗𐴝𐴤 𐴃𐴝𐴏𐴢 𐴀𐴝𐴏𐴠𐴤.²𐴇𐴞𐴥𐴁𐴝 𐴇𐴝𐴥𐴔𐴞𐴓𐴢, 𐴀𐴝𐴦𐴌 𐴉𐴟𐴖𐴝 𐴎𐴡𐴌𐴔𐴡 𐴊𐴞𐴁𐴝𐴌 𐴀𐴡𐴑𐴃𐴡𐴥𐴌 𐴊𐴟𐴑𐴧𐴠𐴥 𐴒𐴟𐴎𐴡𐴌𐴝𐴃𐴢 𐴀𐴝𐴐𐴧𐴞𐴥𐴓𐴢.³𐴃𐴝𐴌𐴉𐴡𐴌𐴠 𐴀𐴝𐴏𐴔𐴝𐴕𐴡𐴃𐴢 𐴀𐴝𐴌𐴀𐴠𐴑𐴧𐴝𐴥𐴕 𐴕𐴞𐴐𐴝𐴥𐴕 𐴊𐴝𐴈𐴝𐴤 𐴒𐴞𐴥𐴘𐴠: 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴓𐴝𐴓𐴢 𐴕𐴝𐴒𐴝𐴤, 𐴘𐴞𐴥𐴁𐴝𐴃𐴧𐴟 𐴇𐴝𐴥𐴣𐴃𐴧𐴗𐴝 𐴔𐴝𐴃𐴝𐴥 𐴀𐴠𐴊𐴧𐴠 𐴊𐴡𐴐𐴢 𐴐𐴝𐴥𐴕 𐴐𐴞𐴥𐴚 𐴀𐴝𐴏𐴠𐴤, 𐴀𐴝𐴦𐴌 𐴘𐴞𐴥𐴁𐴝𐴌 𐴔𐴝𐴃𐴝𐴥 𐴒𐴟𐴥𐴕𐴡𐴃𐴢 𐴇𐴝𐴥𐴣𐴃𐴧𐴗𐴝 𐴃𐴝𐴏𐴢 𐴀𐴝𐴏𐴠𐴤.⁴𐴘𐴞𐴥𐴁𐴝𐴌 𐴓𐴠𐴏𐴠 𐴀𐴝𐴏𐴔𐴝𐴕𐴡𐴌 𐴃𐴞𐴕 𐴁𐴝𐴥𐴑𐴡𐴌 𐴀𐴠𐴑 𐴁𐴝𐴥𐴑 𐴃𐴝𐴌𐴝 𐴄𐴝𐴕𐴞 𐴀𐴝𐴕𐴞𐴤𐴘𐴡𐴌𐴠 𐴊𐴟𐴕𐴞𐴘𐴝𐴙𐴃𐴢 𐴉𐴠𐴥𐴓𐴝𐴘𐴊𐴞𐴘𐴠. 𐴇𐴠𐴥 𐴕𐴝𐴒𐴝𐴤 𐴖𐴝 𐴎𐴠 𐴔𐴝𐴘𐴝𐴉𐴟𐴖𐴝 𐴖𐴝 𐴉𐴟𐴖𐴝 𐴎𐴡𐴌𐴔𐴡 𐴊𐴡𐴦𐴔-𐴊𐴡𐴦𐴔 𐴀𐴡𐴥𐴘𐴧𐴠 𐴇𐴞𐴥𐴁𐴝𐴌 𐴔𐴟𐴀𐴕𐴃𐴟 𐴃𐴞𐴥𐴘𐴝𐴘 𐴃𐴝𐴥𐴙𐴑𐴧𐴠, 𐴎𐴠𐴀𐴕𐴠 𐴇𐴞𐴥𐴁𐴝𐴘𐴠 𐴎𐴡𐴌𐴔𐴡 𐴊𐴞𐴓𐴠𐴥 𐴔𐴡𐴃𐴧𐴡𐴌 𐴇𐴞𐴥𐴁𐴝𐴌 𐴉𐴟𐴖𐴝 𐴖𐴝𐴌𐴠 𐴈𐴝𐴥𐴘𐴉𐴠𐴓𐴝𐴘 𐴉𐴝𐴌𐴠.⁵𐴔𐴝𐴘𐴝𐴉𐴟𐴖𐴝 𐴖𐴝𐴘𐴠 𐴀𐴠𐴒𐴧𐴗𐴝𐴤 𐴔𐴡𐴌𐴡𐴃𐴢 𐴉𐴟𐴖𐴝 𐴎𐴡𐴌𐴔𐴡 𐴊𐴞𐴘𐴠𐴥, 𐴎𐴞𐴁𐴝𐴤𐴘𐴠 𐴓𐴟𐴖𐴝𐴥𐴌 𐴓𐴡𐴍𐴞𐴥 𐴓𐴡𐴥𐴘 𐴃𐴝𐴔𐴝𐴥𐴔 𐴑𐴡𐴗𐴔 𐴀𐴡𐴥𐴑𐴧𐴡𐴓𐴡𐴌 𐴖𐴡𐴌𐴠 𐴇𐴡𐴥𐴑𐴟𐴔𐴡𐴃𐴢 𐴒𐴡𐴌𐴞𐴥𐴁𐴡. 𐴇𐴞𐴥𐴁𐴝𐴌 𐴇𐴠𐴥 𐴉𐴟𐴖𐴝 𐴖𐴝𐴌𐴠 𐴏𐴟𐴥𐴓𐴝𐴕 𐴔𐴝𐴌𐴞 𐴀𐴝𐴓𐴧𐴝𐴌 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴃𐴡𐴑𐴃𐴡𐴥𐴌 𐴇𐴝𐴣𐴏𐴠 𐴀𐴝𐴕𐴝𐴤 𐴒𐴞𐴥𐴘𐴠.⁶𐴃𐴝𐴌𐴉𐴡𐴌𐴠 𐴔𐴝𐴘𐴝𐴉𐴟𐴖𐴝 𐴖𐴝 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴊𐴝𐴥𐴘𐴒𐴞𐴘𐴠𐴒𐴡𐴘, 𐴎𐴠𐴍𐴠𐴥 𐴀𐴝𐴓𐴧𐴝𐴘𐴠 𐴇𐴞𐴥𐴁𐴝𐴓𐴧𐴝 𐴀𐴠𐴑𐴧𐴝𐴥𐴕 𐴎𐴝𐴒𐴝 𐴃𐴡𐴘𐴧𐴝𐴌 𐴒𐴡𐴌𐴞𐴥 𐴌𐴝𐴙𐴑𐴧𐴠𐴥, 𐴎𐴠𐴀𐴕𐴠 𐴇𐴠𐴥𐴍𐴠 𐴇𐴞𐴥𐴁𐴝𐴌𐴠 𐴁𐴝𐴌𐴡𐴥 𐴐𐴡𐴥 𐴇𐴝𐴥𐴙𐴄𐴢 𐴊𐴞𐴕 𐴉𐴝𐴥𐴕 𐴉𐴝𐴓𐴝 𐴎𐴝.

⁷𐴁𐴝𐴦𐴊𐴠 𐴀𐴝𐴏𐴔𐴝𐴕𐴡𐴃𐴢 𐴓𐴝𐴌𐴝𐴥𐴘 𐴀𐴡𐴥𐴘𐴧𐴠: 𐴔𐴝𐴘𐴑𐴠𐴓𐴠 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴠 𐴕𐴝𐴒𐴝𐴤 𐴓𐴧𐴡𐴥𐴘 𐴓𐴝𐴌𐴝𐴥𐴘 𐴒𐴡𐴙𐴅𐴧𐴠𐴥; 𐴀𐴝𐴦𐴌 𐴕𐴝𐴒𐴝𐴤 𐴀𐴠𐴊𐴧𐴠 𐴘𐴞𐴥𐴁𐴝𐴌 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴠 𐴘𐴡𐴥 𐴇𐴞𐴥𐴀𐴕 𐴓𐴡𐴥𐴘 𐴓𐴝𐴌𐴝𐴥𐴘 𐴒𐴡𐴙𐴅𐴧𐴠𐴥,⁸𐴔𐴡𐴕𐴃𐴡𐴌 𐴇𐴞𐴥𐴀𐴕𐴠 𐴕𐴡𐴥 𐴎𐴞𐴃𐴠, 𐴀𐴝𐴦𐴌 𐴇𐴞𐴥𐴀𐴕𐴡𐴌𐴠 𐴀𐴝𐴏𐴔𐴝𐴕𐴡𐴃𐴢 𐴀𐴝𐴌 𐴎𐴝𐴒𐴝 𐴊𐴞𐴦𐴘𐴝 𐴕𐴡𐴥 𐴎𐴝.⁹𐴇𐴠𐴥 𐴋𐴡𐴣𐴀𐴌 𐴕𐴝𐴒𐴝𐴤𐴌𐴠 𐴉𐴠𐴥𐴓𐴝𐴘𐴊𐴞𐴘𐴝 𐴒𐴞𐴥𐴘𐴠, 𐴘𐴝𐴥𐴕𐴞 𐴉𐴟𐴌𐴝𐴕𐴝 𐴇𐴝𐴥𐴉𐴢 𐴎𐴞𐴁𐴝𐴤𐴌𐴠 𐴀𐴞𐴁𐴞𐴓𐴞𐴥𐴐𐴢 𐴀𐴠𐴊𐴧𐴠 𐴐𐴡𐴥𐴘𐴃𐴝𐴕 𐴈𐴡𐴖𐴝𐴤 𐴎𐴝, 𐴎𐴞𐴁𐴝𐴤𐴘𐴠 𐴉𐴟𐴌𐴝 𐴊𐴟𐴕𐴞𐴘𐴝𐴙𐴌 𐴔𐴝𐴙𐴕𐴐𐴡𐴥𐴌𐴠 𐴒𐴡𐴓𐴧𐴡𐴃𐴡𐴃𐴢 𐴓𐴡𐴘𐴎𐴝 𐴘𐴞𐴥𐴁𐴝 𐴌𐴠. 𐴘𐴞𐴥𐴁𐴝𐴌𐴠 𐴊𐴟𐴕𐴞𐴘𐴝𐴙𐴃𐴢 𐴉𐴠𐴥𐴓𐴝𐴘𐴊𐴞𐴘𐴝 𐴒𐴞𐴥𐴘𐴠, 𐴀𐴝𐴦𐴌 𐴘𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴘𐴞𐴥𐴁𐴝𐴌 𐴉𐴞𐴥𐴌𐴞𐴏𐴃𐴝 𐴒𐴟𐴥𐴕𐴡𐴌𐴠 𐴘𐴡𐴥 𐴉𐴠𐴥𐴓𐴝𐴘𐴊𐴞𐴘𐴝 𐴒𐴞𐴥𐴘𐴠.

¹⁰𐴃𐴝𐴌𐴉𐴡𐴌𐴠 𐴀𐴝𐴀𐴛 𐴀𐴝𐴏𐴔𐴝𐴕𐴡𐴃𐴢 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴀𐴝𐴁𐴝𐴏𐴢 𐴉𐴟𐴥𐴙𐴕𐴧𐴞, 𐴀𐴠𐴀𐴕 𐴈𐴡𐴀𐴌 𐴊𐴠,”𐴘𐴝𐴓𐴝 𐴀𐴝𐴣𐴀𐴌𐴝𐴌 𐴀𐴝𐴓𐴧𐴝𐴌 𐴕𐴠𐴅𐴝𐴃𐴢, 𐴃𐴝𐴦𐴑𐴡𐴃𐴢, 𐴌𐴝𐴙𐴅𐴧𐴡𐴀𐴠𐴊𐴧𐴠 𐴀𐴞𐴥𐴁𐴝𐴌 𐴔𐴡𐴀𐴏𐴞𐴤𐴌 𐴀𐴝𐴊𐴞𐴥𐴑𐴝𐴌 𐴇𐴝𐴥𐴎𐴞𐴌 𐴀𐴡𐴥𐴘𐴧𐴠,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝𐴌 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴊𐴡𐴌 𐴖𐴡𐴌𐴠 𐴀𐴠𐴓𐴎𐴝𐴔-𐴓𐴝𐴒𐴡𐴘𐴝𐴎𐴠𐴦𐴕𐴞𐴑𐴞 𐴀𐴝𐴣𐴀𐴌𐴝𐴌 𐴀𐴝𐴓𐴧𐴝𐴌 𐴔𐴟𐴀𐴕𐴃𐴟 𐴊𐴞𐴕𐴠 𐴌𐴝𐴘𐴃𐴠 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴀𐴠𐴓𐴎𐴝𐴔 𐴓𐴝𐴒𐴝𐴘𐴃𐴡𐴥,𐴀𐴞𐴥𐴃𐴝𐴌𐴠 𐴃𐴡 𐴕𐴞𐴏𐴠 𐴉𐴠𐴥𐴓𐴝𐴘𐴊𐴞𐴘𐴝 𐴒𐴞𐴥𐴘𐴠.¹¹𐴀𐴞𐴥𐴃𐴝𐴌𐴝 𐴁𐴠𐴥𐴌𐴝𐴏𐴡𐴥𐴀𐴓𐴢-𐴀𐴡𐴌-𐴏𐴡𐴥𐴀𐴌 𐴓𐴡𐴖𐴢 𐴖𐴡𐴥𐴌𐴀𐴠𐴊𐴧𐴠 𐴕𐴞𐴎𐴠 𐴊𐴞𐴀𐴓𐴢 𐴊𐴠 𐴒𐴡𐴁𐴝𐴤𐴌 𐴈𐴡𐴃𐴝𐴤𐴌 𐴎𐴡𐴌𐴞𐴘𐴝𐴀𐴞𐴥𐴃𐴝𐴌𐴠 𐴎𐴞𐴃𐴞 𐴀𐴝𐴙𐴐𐴧𐴠𐴥;𐴀𐴞𐴥𐴃𐴝𐴌𐴝 𐴔𐴡𐴦𐴃𐴡𐴌 𐴔𐴟𐴑𐴡𐴃𐴢 𐴀𐴟𐴥𐴊𐴧𐴗𐴝𐴕𐴞𐴎𐴡𐴌 𐴎𐴝𐴕𐴡𐴌𐴠 𐴀𐴝𐴊𐴡𐴌 𐴕𐴡𐴥 𐴒𐴡𐴌𐴠𐴥.¹²𐴇𐴠𐴥𐴃𐴡𐴓𐴧𐴝, 𐴀𐴡𐴥 𐴀𐴝𐴏𐴔𐴝𐴕 𐴀𐴡𐴥𐴑𐴧𐴡𐴓𐴢𐴀𐴠𐴊𐴧𐴠 𐴎𐴠𐴃𐴝𐴌𐴝𐴤 𐴇𐴠𐴥𐴍𐴠 𐴃𐴝𐴥𐴑𐴡, 𐴑𐴟𐴥𐴐𐴞 𐴒𐴡𐴌𐴡𐴤.𐴔𐴡𐴕𐴃𐴡𐴌, 𐴀𐴡𐴥 𐴎𐴡𐴁𐴞𐴕 𐴀𐴠𐴊𐴧𐴠 𐴊𐴡𐴙𐴅𐴧𐴝,𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴁𐴞𐴓𐴞𐴥𐴐𐴢 𐴃𐴡 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴓𐴝𐴔𐴞 𐴀𐴝𐴙𐴐𐴧𐴠𐴥.𐴀𐴞𐴥𐴃𐴠 𐴌𐴝𐴑𐴠 𐴉𐴟𐴌𐴝𐴘𐴧𐴝 𐴀𐴡𐴥𐴘𐴧𐴠,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴠 𐴀𐴞𐴥𐴃𐴝𐴌 𐴄𐴝𐴙𐴔 𐴁𐴝𐴍𐴞𐴥 𐴊𐴠 𐴎𐴝𐴕𐴠.“

¹³𐴎𐴠𐴣𐴃𐴧𐴠𐴥 𐴕𐴝𐴒𐴝𐴤 𐴖𐴝𐴘𐴠 𐴕𐴞𐴎𐴡𐴌𐴠𐴥 𐴊𐴟𐴕𐴞𐴘𐴝𐴙𐴃𐴢 𐴉𐴠𐴥𐴓𐴝𐴘𐴊𐴞𐴘𐴝 𐴒𐴞𐴥𐴘𐴠 𐴊𐴠 𐴊𐴠𐴙𐴑𐴧𐴠𐴥, 𐴇𐴠𐴥𐴃𐴟𐴕𐴡𐴃𐴢 𐴘𐴞𐴥𐴁𐴝 𐴎𐴠 𐴔𐴝𐴘𐴝𐴉𐴟𐴖𐴝 𐴖𐴝𐴘𐴠 𐴔𐴡𐴌𐴡𐴃𐴢 𐴉𐴟𐴖𐴝 𐴎𐴡𐴌𐴔𐴡 𐴊𐴞𐴘𐴠𐴥 𐴇𐴞𐴥𐴁𐴝𐴌 𐴉𐴞𐴏𐴝𐴥 𐴊𐴡𐴙𐴅𐴧𐴠.¹⁴𐴔𐴡𐴕𐴃𐴡𐴌 𐴇𐴠𐴥 𐴔𐴝𐴘𐴝𐴉𐴟𐴖𐴝 𐴖𐴝𐴌𐴠 𐴋𐴡𐴣𐴀𐴌 𐴏𐴞𐴓𐴡𐴌 𐴊𐴟𐴘𐴧𐴝𐴥𐴕 𐴉𐴝𐴑 𐴊𐴞𐴦𐴘𐴝 𐴒𐴞𐴘𐴠𐴥, 𐴎𐴠𐴀𐴕𐴠 𐴇𐴞𐴥𐴁𐴝𐴘𐴠 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴕𐴞𐴎𐴡𐴌 𐴎𐴝𐴒𐴝 𐴖𐴝𐴀𐴕𐴡𐴃𐴢 𐴀𐴟𐴌𐴞 𐴎𐴝𐴘 𐴉𐴝𐴌𐴠, 𐴎𐴞𐴘𐴝𐴥𐴕𐴡𐴃𐴢 𐴇𐴞𐴥𐴁𐴝𐴌𐴠 𐴐𐴝𐴥𐴌𐴡 𐴃𐴞𐴕 𐴁𐴡𐴏𐴡𐴥𐴌 𐴉𐴡𐴙𐴅𐴧𐴡𐴕𐴃𐴡 𐴇𐴠𐴥 𐴇𐴝𐴥𐴉𐴡𐴌 𐴔𐴟𐴀𐴕𐴃𐴟 𐴕𐴡 𐴉𐴡𐴌𐴠 𐴉𐴝𐴥𐴚𐴒𐴡𐴌𐴞 𐴉𐴝𐴓𐴝 𐴎𐴝𐴘𐴁𐴡.¹⁵𐴁𐴝𐴦𐴊𐴠 𐴇𐴠𐴥 𐴇𐴝𐴥𐴉𐴧𐴗𐴝𐴘𐴠 𐴕𐴞𐴎𐴡𐴌 𐴒𐴝𐴓𐴡𐴃𐴧𐴟 𐴉𐴝𐴕𐴞𐴥 𐴕𐴠𐴦𐴓𐴝𐴘 𐴔𐴝𐴘𐴝𐴉𐴟𐴖𐴝 𐴖𐴝𐴌 𐴉𐴞𐴏𐴠𐴤 𐴇𐴝𐴥𐴓𐴡𐴌 𐴋𐴡𐴥𐴙𐴓𐴧𐴝 𐴒𐴡𐴌𐴞𐴥𐴊𐴞𐴘𐴠, 𐴎𐴠𐴀𐴕𐴠 𐴇𐴠𐴥 𐴉𐴝𐴕𐴞𐴥𐴁𐴝𐴕𐴠 𐴇𐴞𐴥𐴁𐴝𐴌𐴠 𐴁𐴝𐴥𐴐𐴝𐴘 𐴓𐴡𐴘𐴎𐴝𐴒𐴡𐴥𐴘.¹⁶𐴔𐴡𐴕𐴃𐴡𐴌 𐴎𐴡𐴁𐴞𐴕𐴠 𐴔𐴝𐴘𐴝𐴉𐴟𐴖𐴝 𐴖𐴝𐴌𐴠 𐴔𐴡𐴊𐴡𐴃𐴢 𐴒𐴡𐴙𐴅𐴧𐴠𐴥; 𐴎𐴡𐴁𐴞𐴕𐴠 𐴕𐴞𐴎𐴡𐴌 𐴒𐴝𐴓𐴢 𐴑𐴟𐴥𐴓𐴞 𐴇𐴝𐴥𐴓𐴢 𐴓𐴝𐴕𐴡𐴌 𐴉𐴝𐴕𐴞𐴥 𐴒𐴟𐴥𐴕 𐴈𐴝𐴥𐴘𐴉𐴠𐴓𐴝𐴘𐴧𐴠, 𐴎𐴞𐴀𐴕 𐴕𐴝𐴒𐴝𐴤𐴘𐴠 𐴕𐴞𐴎𐴡𐴌 𐴒𐴝𐴓𐴡𐴃𐴧𐴟 𐴕𐴠𐴓𐴝𐴀𐴓𐴢.¹⁷𐴇𐴠𐴥𐴃𐴡𐴓𐴧𐴝 𐴇𐴠𐴥 𐴕𐴝𐴒𐴝𐴤 𐴖𐴝 𐴔𐴝𐴘𐴝𐴉𐴟𐴖𐴝 𐴖𐴝 𐴓𐴧𐴡𐴘 𐴁𐴞𐴐𐴞𐴤 𐴌𐴝𐴑 𐴀𐴡𐴥𐴘𐴧𐴠, 𐴀𐴝𐴦𐴌 𐴇𐴞𐴥𐴁𐴝𐴌 𐴁𐴝𐴊𐴁𐴝𐴑𐴞 𐴕𐴡𐴏𐴡𐴥𐴓𐴢 𐴀𐴟𐴘𐴃𐴝𐴌𐴝𐴤 𐴓𐴧𐴡𐴘 𐴓𐴝𐴌𐴝𐴥𐴘 𐴒𐴡𐴙𐴃𐴧𐴡𐴥 𐴒𐴞𐴦𐴘𐴡𐴥𐴘 𐴎𐴠𐴃𐴝𐴌𐴝𐴤 𐴀𐴝𐴓𐴧𐴝𐴌 𐴇𐴡𐴥𐴑𐴟𐴔 𐴀𐴡𐴥𐴑𐴧𐴡𐴓𐴢 𐴀𐴝𐴔𐴡𐴥𐴓𐴢 𐴒𐴡𐴌𐴠𐴥 𐴀𐴠𐴊𐴧𐴠 𐴀𐴞𐴏𐴝𐴤𐴌 𐴊𐴞𐴘𐴝 𐴒𐴡𐴁𐴝𐴤𐴌𐴠 𐴊𐴡𐴥𐴌𐴞 𐴃𐴝𐴥𐴙𐴑𐴧𐴠.

The Word for the World International

https://app.library.bible/content/87faca8b51c22590