Read 𐴔𐴡𐴃𐴞 18

𐴔𐴡𐴃𐴞18

𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡𐴃𐴢 𐴀𐴠𐴁𐴧𐴠 𐴋𐴡𐴣𐴀𐴌 𐴇𐴡𐴕𐴧𐴗𐴝𐴤؟

¹𐴇𐴠𐴥 𐴀𐴡𐴑𐴃𐴡𐴥𐴃𐴢 𐴐𐴝𐴥𐴌𐴞𐴃𐴧𐴟𐴕𐴠 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴈𐴡𐴀𐴌 𐴊𐴠, ”𐴃𐴡𐴥𐴀𐴘𐴓𐴠 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡𐴃𐴢 𐴀𐴠𐴁𐴧𐴠 𐴋𐴡𐴣𐴀𐴌 𐴇𐴡𐴕𐴧𐴗𐴝𐴤؟“

²𐴃𐴡𐴥𐴘 𐴀𐴞𐴥𐴁𐴝𐴘𐴠 𐴀𐴠𐴒𐴧𐴗𐴝𐴤 𐴒𐴟𐴌𐴝 𐴉𐴟𐴖𐴝𐴌𐴠 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴔𐴝𐴃𐴝𐴘 𐴀𐴞𐴥𐴃𐴝𐴌𐴝𐴌 𐴔𐴝𐴎𐴠𐴥 𐴃𐴞𐴥𐴘𐴝𐴒𐴝𐴌𐴝𐴘𐴧𐴠,³𐴀𐴝𐴦𐴌 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴁𐴡𐴊𐴡𐴓𐴞 𐴒𐴟𐴌𐴝 𐴉𐴟𐴀𐴝𐴙𐴕 𐴊𐴡𐴌 𐴋𐴡𐴥𐴙𐴓𐴧𐴝 𐴕𐴡 𐴁𐴡𐴕𐴡, 𐴃𐴡𐴥𐴀𐴘𐴓𐴠 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡𐴃𐴢 𐴁𐴞𐴓𐴑𐴟𐴥𐴓𐴢 𐴒𐴡𐴥𐴓𐴞 𐴕𐴡 𐴉𐴝𐴌𐴞𐴁𐴝𐴥.⁴𐴇𐴠𐴥𐴃𐴡𐴓𐴧𐴝 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌𐴠𐴥 𐴀𐴠 𐴒𐴟𐴌𐴝 𐴉𐴟𐴖𐴝 𐴖𐴝𐴌 𐴋𐴡𐴥𐴙𐴓𐴧𐴝 𐴐𐴡𐴥𐴣𐴍𐴡 𐴁𐴝𐴕𐴝, 𐴘𐴡𐴥𐴒𐴧𐴗𐴝 𐴀𐴡𐴥𐴙𐴓𐴊𐴠 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡𐴃𐴢 𐴀𐴠𐴁𐴧𐴠 𐴋𐴡𐴣𐴀𐴌.⁵𐴀𐴝𐴦𐴌 𐴎𐴠𐴦𐴕𐴞𐴑𐴞 𐴀𐴠𐴕𐴊𐴞𐴓𐴧𐴝 𐴇𐴡𐴕𐴡𐴤 𐴒𐴟𐴌𐴝 𐴉𐴟𐴖𐴝𐴌𐴠 𐴀𐴝𐴣𐴀𐴌 𐴕𐴝𐴔𐴠 𐴑𐴡𐴁𐴟𐴓𐴢 𐴒𐴡𐴌𐴠𐴥, 𐴀𐴞𐴥𐴃𐴠 𐴀𐴝𐴣𐴀𐴌𐴠𐴥 𐴑𐴡𐴁𐴟𐴓𐴢 𐴒𐴡𐴌𐴠𐴥 𐴊𐴠.“

𐴒𐴟𐴕𐴝𐴤𐴃𐴢 𐴉𐴡𐴌𐴝𐴁𐴝𐴌 𐴀𐴠𐴕𐴃𐴝𐴥𐴕

⁶”𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤 𐴊𐴠 𐴀𐴠 𐴐𐴡𐴥𐴣𐴍𐴡 𐴀𐴡𐴥𐴑𐴧𐴡𐴓𐴡𐴃𐴧𐴟 𐴇𐴡𐴕𐴡𐴤𐴑𐴞𐴘𐴡𐴌𐴠 𐴒𐴟𐴕𐴝𐴤 𐴒𐴡𐴌𐴝𐴥𐴁𐴝, 𐴀𐴞𐴥𐴃𐴝𐴌 𐴓𐴧𐴝 𐴁𐴠𐴀𐴃𐴡𐴌 𐴀𐴡𐴥𐴙𐴓𐴊𐴠, 𐴀𐴞𐴥𐴃𐴝𐴌 𐴒𐴡𐴓𐴝𐴃𐴢 𐴀𐴠𐴒𐴧𐴗𐴝𐴤 𐴁𐴡𐴥𐴌 𐴐𐴞𐴥𐴓𐴡𐴌 𐴏𐴝𐴑𐴧𐴞 𐴁𐴝𐴣𐴊𐴞𐴥 𐴔𐴟𐴌 𐴊𐴡𐴙𐴅𐴧𐴝𐴃𐴢 𐴋𐴟𐴉𐴝𐴥𐴘𐴊𐴞𐴘𐴝 𐴎𐴝.⁷𐴊𐴟𐴕𐴞𐴘𐴝𐴙𐴌 𐴖𐴡𐴌𐴠 𐴏𐴞𐴎𐴢 𐴀𐴟𐴀𐴙𐴕𐴡𐴌 𐴎𐴡𐴌𐴞𐴘𐴝 𐴀𐴝𐴉𐴏𐴟𐴥𐴏𐴢, 𐴎𐴞𐴀𐴕𐴠 𐴒𐴟𐴕𐴝𐴤𐴃𐴢 𐴉𐴡𐴌𐴝𐴁𐴝. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴀𐴕 𐴃𐴡 𐴀𐴝𐴘𐴁𐴝𐴤𐴌 𐴎𐴡𐴌𐴟𐴌, 𐴔𐴡𐴕𐴃𐴡𐴌 𐴀𐴟𐴘𐴃𐴝𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢, 𐴎𐴝𐴌 𐴊𐴟𐴖𐴝𐴌𐴝 𐴕𐴞𐴑𐴞 𐴇𐴞𐴥𐴀𐴕 𐴀𐴝𐴘𐴧𐴠𐴤.“⁸𐴎𐴡𐴊𐴞 𐴃𐴟𐴣𐴀𐴝𐴥𐴣𐴌 𐴀𐴝𐴥𐴃𐴠 𐴘𐴝𐴥 𐴄𐴠𐴥𐴚𐴠 𐴃𐴟𐴣𐴀𐴝𐴥𐴣𐴌𐴠 𐴒𐴟𐴕𐴝𐴤𐴌 𐴀𐴟𐴎𐴟 𐴄𐴝𐴕𐴠, 𐴃𐴡𐴥𐴀𐴘𐴓𐴠 𐴇𐴞𐴥𐴘𐴝𐴕 𐴈𐴝𐴍𐴞 𐴃𐴟𐴣𐴀𐴝𐴥𐴣𐴌 𐴈𐴠𐴥𐴕𐴃𐴟 𐴉𐴠𐴥𐴓𐴝𐴘𐴊𐴡. 𐴊𐴟𐴘 𐴀𐴝𐴥𐴃𐴢 𐴘𐴝𐴥 𐴊𐴟𐴘 𐴄𐴠𐴥𐴚 𐴃𐴝𐴥𐴑𐴞 𐴀𐴡𐴉𐴟𐴥𐴌𐴝𐴕𐴞 𐴀𐴡𐴦𐴙𐴕𐴡𐴃𐴢 𐴉𐴠𐴥𐴓𐴝𐴘𐴊𐴞𐴘𐴝 𐴎𐴝𐴌 𐴃𐴟𐴥𐴖𐴝𐴌𐴡, 𐴄𐴟𐴥𐴣𐴍𐴝 𐴘𐴝𐴥 𐴓𐴠𐴚 𐴀𐴡𐴥𐴘 𐴎𐴞𐴕𐴊𐴞𐴒𐴞𐴃𐴢 𐴒𐴡𐴥𐴓𐴝 𐴃𐴟𐴣𐴀𐴝𐴥𐴣𐴌 𐴓𐴧𐴝 𐴁𐴠𐴀𐴃𐴡𐴌.⁹𐴀𐴝𐴦𐴌 𐴎𐴡𐴊𐴞 𐴃𐴟𐴣𐴀𐴝𐴥𐴣𐴌 𐴏𐴟𐴑𐴠𐴤 𐴃𐴟𐴣𐴀𐴝𐴥𐴣𐴌𐴠 𐴒𐴟𐴕𐴝𐴤𐴌 𐴀𐴟𐴎𐴟 𐴄𐴝𐴕𐴠, 𐴃𐴡𐴥𐴀𐴘𐴓𐴠 𐴘𐴞𐴥𐴁𐴝 𐴃𐴟𐴣𐴀𐴝𐴥𐴣𐴌 𐴈𐴠𐴥𐴕𐴃𐴟 𐴕𐴠𐴦𐴓𐴝𐴘 𐴉𐴠𐴥𐴓𐴝𐴘𐴊𐴡. 𐴊𐴟𐴘 𐴏𐴟𐴑 𐴃𐴝𐴥𐴑𐴞 𐴎𐴟𐴎𐴟𐴑𐴡𐴌 𐴀𐴡𐴦𐴙𐴕𐴡𐴃𐴢 𐴉𐴠𐴥𐴓𐴝𐴘𐴊𐴞𐴘𐴝 𐴎𐴝𐴌 𐴃𐴟𐴥𐴖𐴝𐴌𐴡, 𐴀𐴠𐴒𐴧𐴗𐴝𐴤 𐴏𐴟𐴑 𐴓𐴡𐴘 𐴎𐴞𐴕𐴊𐴞𐴒𐴞𐴃𐴢 𐴒𐴡𐴥𐴓𐴝 𐴃𐴟𐴣𐴀𐴝𐴥𐴣𐴌 𐴓𐴧𐴝 𐴁𐴠𐴀𐴃𐴡𐴌.

𐴀𐴝𐴥𐴣𐴎𐴞𐴒𐴞𐴘𐴡𐴘 𐴊𐴠 𐴁𐴠𐴥𐴌𐴝𐴏𐴡𐴥𐴀𐴓𐴡𐴌 𐴔𐴠𐴀𐴏𐴝𐴓𐴢

¹⁰𐴏𐴝𐴘𐴧𐴡𐴥, 𐴀𐴠 𐴐𐴡𐴥𐴣𐴍𐴡 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴠𐴎𐴧𐴡𐴕𐴡𐴌𐴠 𐴘𐴡𐴥 𐴇𐴠𐴥𐴑𐴝𐴌𐴡𐴃𐴢 𐴕𐴡 𐴒𐴡𐴙𐴅𐴧𐴡𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴃𐴝𐴌𐴝𐴥𐴌 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴠 𐴀𐴝𐴏𐴔𐴝𐴕𐴡𐴃𐴢 𐴔𐴝𐴎𐴠𐴥 𐴇𐴝𐴥𐴔𐴞𐴐𐴝 𐴀𐴝𐴣𐴀𐴌 𐴀𐴝𐴏𐴔𐴝𐴕𐴞 𐴁𐴝𐴉𐴡𐴌 𐴏𐴞𐴘𐴝𐴥𐴌𐴝 𐴊𐴠𐴑𐴠𐴥.¹¹𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴀𐴝𐴙𐴐𐴧𐴠𐴥 𐴊𐴠 𐴀𐴝𐴥𐴣𐴎𐴞𐴒𐴞𐴘𐴡𐴘 𐴊𐴠 𐴀𐴞𐴥𐴃𐴝𐴌𐴝𐴌𐴠 𐴕𐴠𐴅𐴝𐴃𐴢 𐴊𐴞 𐴁𐴡𐴓𐴧𐴝.

¹²𐴃𐴟𐴣𐴀𐴝𐴥𐴌𐴝 𐴑𐴞𐴦 𐴁𐴝𐴥𐴉𐴡؟ 𐴎𐴡𐴊𐴞 𐴇𐴡𐴕𐴡𐴤 𐴔𐴝𐴕𐴟𐴥𐴙𐴐𐴡𐴃𐴧𐴟 𐴀𐴠𐴑 𐴐𐴡𐴥𐴃𐴢 𐴁𐴠𐴥𐴌𐴝𐴏𐴡𐴥𐴀𐴓𐴢 𐴃𐴝𐴥𐴑𐴠 𐴀𐴝𐴦𐴌 𐴈𐴠𐴥𐴕𐴃𐴟 𐴀𐴠𐴒𐴧𐴗𐴝𐴤 𐴀𐴡𐴥𐴌 𐴀𐴡𐴥𐴘𐴎𐴝𐴒𐴡𐴘, 𐴀𐴞𐴥𐴃𐴠 𐴕𐴡𐴁𐴧𐴡𐴘-𐴕𐴡𐴖 𐴖𐴝𐴌𐴠 𐴉𐴝𐴀𐴌𐴡𐴌 𐴖𐴡𐴌𐴠 𐴀𐴠𐴌𐴞, 𐴀𐴡𐴥𐴌 𐴀𐴡𐴥𐴘𐴒𐴞𐴘𐴡𐴘 𐴊𐴠 𐴘𐴞𐴥𐴁𐴝𐴌𐴠 𐴃𐴟𐴖𐴝𐴘𐴃𐴡𐴥 𐴕𐴡 𐴎𐴝𐴘𐴁𐴡 𐴕𐴠𐴥؟¹³𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴀𐴞𐴥𐴃𐴠 𐴘𐴞𐴥𐴁𐴝𐴌𐴠 𐴃𐴟𐴖𐴝𐴘 𐴉𐴝𐴘𐴓𐴠, 𐴀𐴡𐴥𐴌 𐴕𐴡𐴥 𐴊𐴠 𐴕𐴡𐴁𐴧𐴡𐴘-𐴕𐴡𐴖 𐴖𐴝 𐴁𐴠𐴥𐴌𐴝𐴏𐴡𐴥𐴀𐴓𐴢 𐴓𐴟𐴕𐴡𐴌𐴠 𐴓𐴡𐴥𐴘 𐴃𐴟𐴥𐴖𐴝𐴌𐴡 𐴀𐴞𐴥𐴃𐴠 𐴘𐴞𐴥𐴁𐴝𐴌𐴠 𐴓𐴡𐴥𐴘 𐴁𐴞𐴐𐴞𐴤 𐴑𐴟𐴥𐴐𐴞 𐴒𐴡𐴌𐴞𐴥𐴁𐴡.¹⁴𐴇𐴠𐴥𐴕𐴊𐴞𐴓𐴧𐴝, 𐴃𐴟𐴣𐴀𐴝𐴥𐴌𐴝𐴌 𐴀𐴝𐴏𐴔𐴝𐴕𐴞 𐴁𐴝𐴉𐴡𐴌 𐴔𐴡𐴕𐴐𐴝𐴥 𐴘𐴝𐴀𐴕 𐴕𐴡 𐴊𐴠 𐴑𐴞, 𐴀𐴠 𐴒𐴟𐴌𐴝 𐴀𐴞𐴃𐴝𐴌𐴝𐴤𐴃𐴧𐴟 𐴀𐴠𐴎𐴧𐴡𐴕 𐴀𐴟𐴥𐴊𐴧𐴗𐴝 𐴊𐴡𐴥𐴚𐴐𐴡 𐴀𐴡𐴥𐴘𐴎𐴡𐴕.

𐴀𐴠𐴑𐴒𐴗𐴝𐴥 𐴈𐴡𐴏𐴟𐴥𐴌𐴞 𐴒𐴡𐴙𐴅𐴧𐴠𐴥 𐴊𐴠 𐴁𐴝𐴥𐴘

¹⁵”𐴎𐴡𐴊𐴞 𐴃𐴟𐴣𐴀𐴝𐴥𐴣𐴌 𐴁𐴝𐴥𐴘𐴧𐴠 𐴃𐴟𐴣𐴀𐴝𐴥𐴣𐴌 𐴀𐴟𐴓𐴋𐴝 𐴈𐴡𐴏𐴟𐴥𐴌𐴞 𐴒𐴡𐴌𐴠𐴥, 𐴃𐴡𐴥𐴀𐴘𐴓𐴠 𐴎𐴝𐴘 𐴀𐴝𐴙𐴊𐴧𐴡𐴕𐴠 𐴀𐴞𐴥𐴃𐴝𐴌 𐴈𐴡𐴏𐴟𐴥𐴌 𐴊𐴝𐴈𐴝𐴤𐴘𐴊𐴞𐴘𐴡. 𐴎𐴡𐴊𐴞 𐴀𐴞𐴥𐴃𐴠 𐴃𐴟𐴣𐴀𐴝𐴥𐴣𐴌 𐴈𐴡𐴃𐴝𐴤 𐴊𐴡𐴥𐴌𐴠, 𐴃𐴡𐴥𐴀𐴘𐴓𐴠 𐴃𐴟𐴀𐴛 𐴃𐴟𐴣𐴀𐴝𐴥𐴣𐴌 𐴁𐴝𐴥𐴘𐴡𐴌𐴠 𐴉𐴞𐴥𐴌𐴝𐴘 𐴉𐴝𐴘𐴧𐴡𐴥.¹⁶𐴔𐴡𐴕𐴃𐴡𐴌 𐴎𐴡𐴊𐴞 𐴀𐴞𐴥𐴃𐴠 𐴃𐴟𐴣𐴀𐴝𐴥𐴣𐴌 𐴈𐴡𐴃𐴝𐴤 𐴕𐴡 𐴊𐴡𐴥𐴌𐴠, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴣𐴌 𐴉𐴟𐴥𐴖𐴝𐴣𐴃𐴞 𐴀𐴝𐴌𐴡𐴤 𐴀𐴠𐴎𐴧𐴡𐴕 𐴘𐴝𐴥 𐴊𐴟𐴘 𐴎𐴡𐴕 𐴔𐴝𐴕𐴟𐴥𐴙𐴐𐴢 𐴓𐴡𐴘𐴎𐴝𐴘𐴧𐴡𐴥, 𐴎𐴠𐴀𐴕𐴠 ’𐴎𐴠 𐴇𐴡𐴕𐴡𐴤 𐴔𐴝𐴦𐴔𐴠𐴓𐴝 𐴊𐴟𐴘 𐴎𐴡𐴕 𐴘𐴝𐴥 𐴃𐴞𐴕 𐴎𐴡𐴕 𐴒𐴡𐴁𐴝𐴤𐴌 𐴎𐴡𐴁𐴝𐴕𐴠 𐴏𐴡𐴥𐴘𐴧𐴞 𐴁𐴡𐴓𐴞 𐴏𐴝𐴥𐴁𐴟𐴃𐴢 𐴀𐴡𐴥𐴘𐴎𐴝𐴒𐴡𐴘.‘ ¹⁷𐴀𐴝𐴦𐴌 𐴎𐴡𐴊𐴞 𐴀𐴞𐴥𐴃𐴠 𐴀𐴞𐴥𐴃𐴝𐴌𐴝𐴌 𐴈𐴡𐴃𐴝𐴤 𐴘𐴡𐴥 𐴕𐴡 𐴊𐴡𐴥𐴌𐴠, 𐴃𐴡𐴥𐴀𐴘𐴓𐴠 𐴇𐴞𐴥𐴘𐴝𐴕 𐴎𐴡𐴔𐴝𐴥𐴃𐴡𐴌𐴠 𐴈𐴡𐴘𐴧𐴡𐴥. 𐴀𐴝𐴦𐴌 𐴎𐴡𐴊𐴞 𐴎𐴡𐴔𐴝𐴥𐴃𐴡𐴌 𐴈𐴡𐴃𐴝𐴤 𐴘𐴡𐴥 𐴕𐴡 𐴊𐴡𐴥𐴌𐴠, 𐴃𐴡𐴥𐴀𐴘𐴓𐴠 𐴀𐴞𐴥𐴃𐴠 𐴃𐴟𐴣𐴀𐴝𐴥𐴌𐴝𐴓𐴧𐴝 𐴀𐴠𐴥𐴎𐴧𐴡𐴕 𐴒𐴝𐴙𐴌𐴀𐴞𐴔𐴝𐴕𐴊𐴝𐴥𐴌 𐴘𐴝𐴥 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝𐴌 𐴋𐴡𐴥𐴙𐴓𐴧𐴝 𐴀𐴡𐴥𐴗𐴑.

¹⁸”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴊𐴟𐴕𐴞𐴘𐴝𐴙𐴃𐴢 𐴎𐴞𐴀𐴕 𐴁𐴝𐴣𐴊𐴞𐴥𐴁𐴝, 𐴇𐴞𐴥𐴀𐴕 𐴀𐴝𐴏𐴔𐴝𐴕𐴡𐴃𐴢 𐴀𐴡𐴥 𐴁𐴝𐴣𐴊𐴝𐴤 𐴎𐴝𐴘𐴁𐴡; 𐴀𐴝𐴦𐴌 𐴊𐴟𐴕𐴞𐴘𐴝𐴙𐴃𐴢 𐴎𐴞𐴀𐴕 𐴀𐴠𐴎𐴝𐴎𐴡𐴃𐴢 𐴊𐴞𐴁𐴝, 𐴇𐴞𐴥𐴀𐴕 𐴀𐴝𐴏𐴔𐴝𐴕𐴡𐴃𐴢 𐴀𐴡𐴥 𐴀𐴠𐴎𐴝𐴎𐴡𐴃𐴢 𐴊𐴞𐴘𐴝 𐴎𐴝𐴘𐴁𐴡.

¹⁹”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴘𐴝𐴀𐴕 𐴀𐴡𐴥 𐴈𐴡𐴀𐴙𐴌, 𐴎𐴡𐴊𐴞 𐴊𐴟𐴕𐴞𐴘𐴝𐴙𐴃𐴢 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴃𐴧𐴟 𐴊𐴟𐴘 𐴎𐴡𐴕𐴠 𐴀𐴠𐴑𐴃𐴡𐴉𐴝𐴥𐴑 𐴀𐴡𐴥𐴘 𐴊𐴟𐴖𐴝 𐴒𐴡𐴌𐴞𐴥𐴓𐴠, 𐴀𐴝𐴣𐴀𐴌 𐴀𐴝𐴏𐴔𐴝𐴕𐴞 𐴁𐴝𐴉𐴡𐴌 𐴃𐴡𐴌𐴉𐴡𐴥𐴃𐴧𐴟 𐴀𐴞𐴥𐴃𐴝𐴌𐴝𐴓𐴧𐴝 𐴇𐴞𐴥𐴘𐴝𐴕 𐴒𐴡𐴌𐴝𐴥 𐴎𐴝𐴘𐴁𐴡.²⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴍𐴠𐴥 𐴊𐴟𐴘 𐴎𐴡𐴕 𐴘𐴝𐴥 𐴃𐴞𐴕 𐴎𐴡𐴕 𐴀𐴝𐴣𐴀𐴌 𐴕𐴝𐴔𐴠 𐴎𐴡𐴔𐴝 𐴀𐴡𐴥, 𐴇𐴠𐴥𐴍𐴠 𐴀𐴝𐴀𐴛 𐴀𐴞𐴥𐴃𐴝𐴌𐴝𐴌 𐴔𐴝𐴎𐴠𐴥 𐴀𐴝𐴏𐴞𐴤.“

𐴔𐴝𐴉𐴢 𐴕𐴡 𐴊𐴠𐴊𐴠 𐴒𐴡𐴗𐴀𐴌𐴡𐴌 𐴔𐴠𐴀𐴏𐴝𐴓𐴢

²¹𐴇𐴠𐴥𐴃𐴟𐴕𐴡𐴃𐴢 𐴉𐴞𐴃𐴡𐴌𐴠 𐴀𐴝𐴀𐴘𐴢 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴎𐴡𐴊𐴞 𐴀𐴝𐴣𐴀𐴌 𐴁𐴝𐴥𐴘𐴧𐴠 𐴀𐴝𐴣𐴀𐴌 𐴀𐴟𐴓𐴋𐴝 𐴈𐴡𐴏𐴟𐴥𐴌𐴞 𐴒𐴡𐴌𐴝𐴥𐴃𐴢 𐴃𐴝𐴥𐴑𐴠, 𐴀𐴝𐴀𐴛 𐴀𐴞𐴥𐴃𐴝𐴌𐴠 𐴈𐴡 𐴁𐴝𐴌 𐴔𐴝𐴉𐴢 𐴒𐴡𐴙𐴃𐴧𐴝𐴥𐴔؟ 𐴇𐴝𐴥𐴣𐴃𐴢 𐴁𐴝𐴌 𐴕𐴠𐴥؟“

²²𐴀𐴞𐴏𐴝𐴤𐴘𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴡𐴌𐴠𐴥 𐴇𐴝𐴥𐴣𐴃𐴢 𐴁𐴝𐴌 𐴁𐴡𐴥𐴓𐴞 𐴕𐴡 𐴈𐴡𐴀𐴙𐴌, 𐴁𐴡𐴥𐴓𐴑𐴠 𐴇𐴡𐴥𐴙𐴃𐴧𐴡𐴌 𐴒𐴟𐴕 𐴇𐴝𐴥𐴣𐴃𐴢 𐴁𐴝𐴌.

²³”𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡 𐴀𐴡𐴥𐴙𐴓𐴊𐴠 𐴀𐴠𐴕𐴊𐴞𐴓𐴧𐴝 𐴁𐴝𐴀𐴣𐴐𐴧𐴝𐴌 𐴋𐴡𐴥𐴙𐴓𐴧𐴝, 𐴎𐴞𐴁𐴝𐴤𐴘𐴠 𐴕𐴞𐴎𐴡𐴌 𐴒𐴡𐴗𐴀𐴌 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴞𐴥𐴏𐴝𐴉𐴢 𐴓𐴡𐴘𐴃𐴡 𐴏𐴝𐴘𐴧𐴠𐴥.²⁴𐴎𐴠𐴣𐴃𐴧𐴠𐴥 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴏𐴝𐴉𐴢 𐴓𐴡𐴖𐴝 𐴐𐴟𐴥𐴌𐴟 𐴒𐴡𐴙𐴅𐴧𐴠𐴥, 𐴇𐴠𐴥𐴃𐴟𐴕𐴡𐴃𐴢 𐴘𐴡𐴥𐴒𐴧𐴗𐴝𐴌 𐴇𐴝𐴣𐴏𐴠 𐴀𐴠𐴕𐴊𐴞𐴓𐴧𐴝 𐴀𐴠𐴎𐴧𐴡𐴕𐴡𐴌𐴠 𐴀𐴝𐴕𐴝𐴤 𐴒𐴞𐴥𐴘𐴠, 𐴎𐴝𐴃𐴧𐴟 𐴘𐴡𐴥𐴒𐴧𐴗𐴝𐴘𐴠 𐴓𐴝𐴑-𐴓𐴝𐴑 𐴄𐴞𐴛𐴝 𐴉𐴡𐴦𐴃𐴞 𐴉𐴝𐴦𐴌.²⁵𐴀𐴞𐴥𐴃𐴠 𐴎𐴠𐴃𐴧𐴡𐴥𐴃𐴢 𐴇𐴞𐴥𐴀𐴕 𐴉𐴟𐴥𐴣𐴎𐴞 𐴕𐴡 𐴉𐴝𐴌𐴠𐴌, 𐴀𐴞𐴥𐴃𐴝𐴌 𐴒𐴞𐴌𐴡𐴥𐴏𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠, 𐴇𐴞𐴥𐴀𐴕 𐴉𐴟𐴥𐴣𐴎𐴞 𐴁𐴡𐴓𐴧𐴝 𐴀𐴞𐴥𐴃𐴝𐴌𐴠, 𐴀𐴞𐴥𐴃𐴝𐴌 𐴁𐴡𐴖𐴢 𐴉𐴟𐴀𐴝𐴙𐴕 𐴊𐴡𐴌𐴠 𐴀𐴠𐴊𐴧𐴠 𐴀𐴞𐴥𐴃𐴝𐴃𐴧𐴟 𐴎𐴞𐴀𐴕 𐴀𐴝𐴏𐴠𐴤 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴁𐴠𐴏𐴞𐴉𐴠𐴥𐴓𐴝 𐴎𐴝𐴘 𐴁𐴡𐴓𐴧𐴝.

²⁶”𐴇𐴠𐴥𐴃𐴡𐴓𐴧𐴝 𐴒𐴡𐴗𐴀𐴌𐴒𐴗𐴝𐴥𐴘𐴠 𐴘𐴡𐴥𐴒𐴧𐴗𐴝𐴌 𐴔𐴟𐴀𐴕𐴃𐴟 𐴀𐴟𐴣𐴀𐴘𐴃𐴡𐴘 𐴉𐴡𐴌𐴞 𐴈𐴡𐴀𐴌 𐴊𐴠, ’𐴀𐴡𐴥 𐴔𐴝𐴓𐴞𐴑, 𐴇𐴡𐴦𐴊𐴧𐴞𐴕 𐴀𐴝𐴥𐴕𐴞𐴑 𐴏𐴡𐴁𐴡𐴥𐴌 𐴒𐴡𐴌𐴡𐴤, 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴁𐴠𐴒𐴧𐴟𐴥𐴕 𐴉𐴟𐴥𐴣𐴎𐴞𐴉𐴠𐴓𐴝𐴘𐴧𐴟𐴔.‘²⁷𐴇𐴠𐴥𐴃𐴟𐴕𐴡𐴃𐴢 𐴒𐴡𐴗𐴀𐴌 𐴒𐴗𐴝𐴌 𐴒𐴞𐴌𐴡𐴥𐴏𐴡𐴃𐴧𐴟 𐴀𐴞𐴥𐴃𐴝𐴌 𐴓𐴧𐴝 𐴉𐴠𐴄𐴉𐴟𐴙𐴅𐴧𐴠𐴥, 𐴀𐴝𐴦𐴌 𐴉𐴡𐴦𐴃𐴞 𐴒𐴟𐴥𐴕 𐴔𐴝𐴉𐴢 𐴊𐴞 𐴀𐴞𐴥𐴃𐴝𐴌𐴠 𐴀𐴠𐴌𐴞𐴊𐴞𐴘𐴠𐴥.

²⁸”𐴔𐴡𐴕𐴃𐴡𐴌 𐴇𐴠𐴥 𐴒𐴡𐴗𐴀𐴌𐴒𐴗𐴝𐴥 𐴁𐴝𐴀𐴌𐴑𐴟𐴓𐴠 𐴎𐴝𐴘, 𐴕𐴞𐴎𐴡𐴌 𐴏𐴝𐴥𐴀𐴣𐴃𐴞 𐴒𐴡𐴗𐴀𐴌𐴡𐴃𐴧𐴟 𐴀𐴠𐴎𐴧𐴡𐴕𐴡𐴌𐴠 𐴓𐴡𐴦𐴃𐴢 𐴉𐴝𐴘𐴧𐴠𐴥, 𐴎𐴞𐴁𐴝𐴤𐴘𐴠 𐴀𐴞𐴥𐴃𐴝𐴃𐴧𐴟 𐴀𐴠𐴑 𐴐𐴡𐴥𐴃𐴢 𐴊𐴞𐴕𐴝𐴥𐴌 𐴄𐴞𐴛𐴝 𐴀𐴟𐴊𐴝𐴥𐴌 𐴓𐴡𐴀𐴙𐴓𐴢. 𐴀𐴞𐴥𐴃𐴠 𐴀𐴞𐴥𐴁𐴝𐴌𐴠 𐴊𐴡𐴥𐴌𐴞 𐴒𐴡𐴓𐴝 𐴏𐴞𐴁𐴞 𐴈𐴡𐴀𐴌 𐴊𐴠, ’𐴀𐴝𐴣𐴀𐴌 𐴉𐴡𐴦𐴃𐴞 𐴊𐴞𐴦𐴉𐴠𐴥𐴓𐴝.‘

²⁹”𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌 𐴏𐴝𐴥𐴀𐴣𐴃𐴞 𐴒𐴡𐴗𐴀𐴌𐴒𐴗𐴝𐴥𐴘𐴠 𐴀𐴞𐴥𐴃𐴝𐴌 𐴄𐴠𐴥𐴚𐴡𐴃𐴢 𐴀𐴟𐴣𐴀𐴘𐴃𐴡𐴘 𐴉𐴡𐴌𐴞 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴠𐴥𐴌 𐴊𐴠, ’𐴇𐴡𐴦𐴊𐴧𐴞𐴕 𐴀𐴝𐴥𐴕𐴞𐴑 𐴏𐴡𐴁𐴡𐴥𐴌 𐴒𐴡𐴌𐴡𐴤, 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴁𐴠𐴒𐴧𐴟𐴥𐴕 𐴉𐴟𐴥𐴣𐴎𐴞𐴉𐴠𐴓𐴝𐴘𐴧𐴟𐴔.‘

³⁰”𐴔𐴡𐴕𐴃𐴡𐴌 𐴀𐴞𐴥𐴃𐴠 𐴕𐴡𐴥 𐴔𐴝𐴕𐴠, 𐴁𐴡𐴥𐴓𐴑𐴠 𐴎𐴝𐴘 𐴀𐴞𐴥𐴃𐴝𐴌𐴠 𐴀𐴡𐴃𐴡𐴥𐴑𐴧𐴝𐴓𐴡𐴓𐴧𐴝 𐴎𐴞𐴘𐴡𐴥𐴓𐴡𐴃𐴢 𐴊𐴞𐴘𐴠𐴥𐴒𐴡𐴘, 𐴎𐴠𐴃𐴡𐴥𐴑𐴧𐴝𐴓𐴢 𐴉𐴡𐴙𐴅𐴧𐴡𐴕𐴃𐴡 𐴉𐴡𐴦𐴃𐴞 𐴇𐴞𐴥𐴀𐴕 𐴕𐴡𐴥 𐴉𐴟𐴥𐴣𐴎𐴠.³¹𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌 𐴀𐴡𐴙𐴕𐴧𐴡 𐴏𐴝𐴥𐴀𐴣𐴃𐴞 𐴒𐴡𐴗𐴀𐴌 𐴀𐴡𐴥𐴑𐴧𐴡𐴓𐴠 𐴇𐴞𐴥𐴘𐴝𐴕 𐴊𐴠𐴙𐴑𐴧𐴠𐴥, 𐴀𐴞𐴥𐴃𐴝𐴌𐴝𐴃𐴧𐴟 𐴁𐴞𐴐𐴞𐴤 𐴉𐴠𐴌𐴠𐴐𐴝𐴕 𐴓𐴝𐴙𐴒𐴧𐴠𐴥, 𐴀𐴝𐴦𐴌 𐴀𐴝𐴀𐴘𐴢 𐴀𐴞𐴥𐴃𐴝𐴌𐴝𐴌 𐴒𐴞𐴌𐴡𐴥𐴏𐴡𐴌𐴠 𐴎𐴞𐴀𐴕 𐴀𐴡𐴥𐴘𐴧𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴎𐴝𐴕𐴝𐴘𐴧𐴠𐴥.

³²”𐴃𐴡𐴥𐴘 𐴒𐴞𐴌𐴡𐴥𐴏𐴠 𐴀𐴞𐴥𐴃𐴝𐴌𐴠 𐴔𐴝𐴃𐴝𐴘 𐴈𐴡𐴀𐴌 𐴊𐴠, ’𐴃𐴟𐴘 𐴃𐴡 𐴈𐴡𐴥𐴌𐴝𐴉𐴢 𐴒𐴡𐴗𐴀𐴌! 𐴃𐴟𐴘 𐴀𐴝𐴣𐴀𐴌𐴠𐴥 𐴉𐴡𐴥𐴌𐴞𐴘𐴝𐴃𐴢 𐴒𐴡𐴙𐴅𐴧𐴡𐴥𐴏𐴢 𐴊𐴠 𐴇𐴠𐴥𐴃𐴡𐴓𐴧𐴝, 𐴀𐴝𐴀𐴛 𐴃𐴡 𐴃𐴡𐴌 𐴉𐴡𐴦𐴃𐴞 𐴁𐴠𐴒𐴧𐴟𐴥𐴕 𐴔𐴝𐴉𐴢 𐴊𐴞𐴘𐴞𐴥.³³𐴃𐴡𐴌𐴃𐴧𐴟 𐴘𐴡𐴥 𐴃𐴡𐴌 𐴏𐴝𐴥𐴀𐴣𐴃𐴞 𐴒𐴡𐴗𐴀𐴌𐴡𐴌 𐴖𐴡𐴌𐴠 𐴌𐴝𐴇𐴝𐴥𐴔 𐴒𐴡𐴌𐴡𐴤𐴕 𐴕𐴟 𐴀𐴝𐴐𐴧𐴞𐴥𐴓𐴢 𐴕𐴠𐴥, 𐴎𐴠𐴕𐴊𐴞𐴓𐴧𐴝 𐴀𐴝𐴀𐴛 𐴃𐴡𐴌 𐴖𐴡𐴌𐴠 𐴌𐴝𐴇𐴝𐴥𐴔 𐴒𐴡𐴙𐴅𐴧𐴞𐴥؟‘³⁴𐴒𐴞𐴌𐴡𐴥𐴏𐴡𐴃𐴧𐴟 𐴒𐴟𐴐𐴧𐴝𐴤 𐴀𐴟𐴍𐴞𐴤, 𐴀𐴞𐴥𐴃𐴝𐴌𐴠 𐴀𐴡𐴃𐴡𐴥𐴑𐴧𐴝𐴓𐴢 𐴉𐴡𐴙𐴅𐴧𐴡𐴕𐴃𐴡 𐴏𐴝𐴥𐴣𐴎𐴝 𐴊𐴞𐴥 𐴁𐴡𐴓𐴧𐴝 𐴎𐴞𐴘𐴡𐴥𐴓𐴡𐴌 𐴎𐴞𐴔𐴧𐴝𐴊𐴝𐴌𐴡𐴌𐴠 𐴒𐴡𐴏𐴝𐴥𐴘𐴊𐴞𐴘𐴠, 𐴎𐴠𐴃𐴡𐴥𐴑𐴧𐴝𐴓𐴢 𐴀𐴞𐴥𐴃𐴝𐴌 𐴉𐴡𐴦𐴃𐴞 𐴁𐴠𐴒𐴧𐴟𐴥𐴕 𐴉𐴟𐴥𐴣𐴎𐴞 𐴕𐴡𐴥 𐴉𐴠𐴓𐴠.

³⁵”𐴀𐴝𐴣𐴀𐴌 𐴀𐴝𐴏𐴔𐴝𐴕𐴞 𐴁𐴝𐴉𐴠 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌𐴠 𐴇𐴠𐴥𐴕𐴊𐴞𐴓𐴧𐴝 𐴁𐴠 𐴒𐴡𐴌𐴞𐴥𐴁𐴡, 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴉𐴡𐴃𐴧𐴞𐴥𐴑𐴞𐴘𐴠 𐴕𐴞𐴎𐴡𐴌 𐴁𐴝𐴥𐴘𐴡𐴌𐴠 𐴊𐴞𐴓𐴡𐴃𐴧𐴟 𐴔𐴝𐴉𐴢 𐴕𐴡 𐴊𐴡.“

The Word for the World International

https://app.library.bible/content/87faca8b51c22590