Read 𐴔𐴝𐴌𐴑𐴟𐴏𐴢 4

𐴔𐴝𐴌𐴑𐴟𐴏𐴢4

𐴁𐴞𐴏𐴢 𐴐𐴞𐴥𐴣𐴍𐴡𐴘𐴝𐴌 𐴔𐴠𐴀𐴏𐴝𐴓𐴢

¹𐴀𐴞𐴏𐴝𐴤 𐴀𐴝𐴁𐴝𐴌 𐴋𐴞𐴀𐴌 𐴇𐴝𐴣𐴏𐴝𐴃𐴢 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢 𐴊𐴡𐴙𐴅𐴧𐴠. 𐴀𐴞𐴥𐴁𐴝𐴌 𐴇𐴠𐴥𐴍𐴠 𐴔𐴝𐴕𐴟𐴥𐴙𐴐𐴡𐴌 𐴀𐴠𐴃𐴧𐴡𐴥𐴌 𐴊𐴡𐴓𐴢 𐴎𐴡𐴔𐴝 𐴀𐴡𐴥𐴘𐴧𐴠, 𐴎𐴠𐴀𐴕 𐴕𐴞𐴥𐴑𐴞 𐴀𐴞𐴥𐴁𐴝 𐴋𐴞𐴀𐴃𐴢 𐴀𐴝𐴏𐴠𐴤 𐴊𐴠 𐴀𐴠𐴑𐴧𐴝𐴥𐴕 𐴕𐴡𐴦𐴃𐴢 𐴀𐴟𐴍𐴞𐴤 𐴁𐴡𐴙𐴐𐴧𐴠𐴥; 𐴀𐴝𐴦𐴌 𐴔𐴝𐴕𐴟𐴥𐴙𐴐𐴧𐴟𐴥𐴕 𐴁𐴠𐴒𐴧𐴟𐴥𐴕 𐴋𐴞𐴀𐴌 𐴑𐴟𐴓𐴡𐴌 𐴖𐴡𐴌𐴠.²𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴔𐴠𐴀𐴏𐴝𐴓𐴢 𐴀𐴡𐴥𐴑𐴧𐴡𐴓𐴢 𐴊𐴞𐴥 𐴁𐴡𐴀𐴗𐴃𐴢 𐴑𐴠𐴏𐴧𐴟𐴥 𐴐𐴞𐴥𐴑𐴝𐴃𐴢 𐴊𐴡𐴙𐴅𐴧𐴠. 𐴀𐴞𐴥𐴁𐴝𐴘𐴠 𐴃𐴝𐴦𐴓𐴞𐴔𐴡𐴃𐴢 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠,³”𐴉𐴟𐴥𐴕𐴡, 𐴀𐴠𐴎𐴧𐴡𐴕 𐴁𐴞𐴏𐴢 𐴐𐴞𐴥𐴣𐴍𐴡𐴘𐴝 𐴁𐴞𐴏𐴢 𐴐𐴞𐴥𐴣𐴄𐴧𐴡 𐴕𐴠𐴦𐴙𐴓𐴧𐴠𐴥.⁴𐴘𐴡𐴥𐴒𐴧𐴗𐴝𐴘𐴠 𐴐𐴞𐴥𐴣𐴍𐴠𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴇𐴡𐴊𐴟𐴥𐴕 𐴁𐴞𐴏𐴢 𐴌𐴝𐴏𐴃𐴝𐴌 𐴇𐴝𐴣𐴏𐴝𐴃𐴢 𐴉𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴉𐴝𐴙𐴑 𐴀𐴡𐴥𐴑𐴧𐴡𐴓𐴠 𐴀𐴝𐴀𐴘𐴢 𐴇𐴞𐴥𐴀𐴕 𐴈𐴝𐴥𐴘𐴉𐴠𐴓𐴝𐴘𐴧𐴠.⁵𐴇𐴡𐴊𐴟𐴥𐴕 𐴁𐴞𐴏𐴢 𐴐𐴞𐴥𐴓𐴢 𐴎𐴡𐴁𐴞𐴕𐴡𐴃𐴢 𐴉𐴡𐴙𐴅𐴧𐴞𐴥𐴓𐴢, 𐴎𐴠𐴍𐴠𐴥 𐴁𐴞𐴐𐴞𐴤 𐴔𐴠𐴍𐴞 𐴕𐴝𐴥𐴘. 𐴔𐴟𐴌 𐴔𐴠𐴍𐴞 𐴕𐴟 𐴀𐴝𐴐𐴧𐴞𐴥𐴓𐴢 𐴀𐴞𐴥𐴏𐴝𐴉𐴠 𐴇𐴞𐴥𐴀𐴕𐴡𐴃𐴢 𐴇𐴝𐴥𐴌𐴝 𐴒𐴠𐴏𐴢 𐴀𐴝𐴙𐴐𐴧𐴠𐴥.⁶𐴔𐴡𐴕𐴃𐴡𐴌 𐴁𐴠𐴙𐴓𐴢 𐴀𐴟𐴙𐴄𐴧𐴠𐴥 𐴌𐴝𐴥𐴌 𐴇𐴞𐴥𐴀𐴕 𐴉𐴟𐴌𐴞𐴒𐴞𐴘𐴡𐴥𐴘, 𐴀𐴝𐴦𐴌 𐴐𐴞𐴥𐴛𐴡𐴌 𐴕𐴡𐴥 𐴒𐴝𐴏𐴝𐴤 𐴀𐴞𐴥𐴏𐴝𐴉𐴠 𐴇𐴞𐴥𐴀𐴕 𐴉𐴟𐴥𐴖𐴝𐴘𐴒𐴞𐴘𐴡𐴘.⁷𐴇𐴡𐴊𐴟𐴥𐴕 𐴁𐴞𐴏𐴢 𐴑𐴠𐴣𐴍𐴝𐴁𐴡𐴕𐴡𐴃𐴢 𐴉𐴡𐴙𐴅𐴧𐴞𐴥𐴓𐴢, 𐴑𐴠𐴣𐴍𐴝𐴁𐴡𐴕 𐴁𐴝𐴌𐴞𐴥 𐴀𐴟𐴍𐴞𐴤 𐴇𐴞𐴥𐴀𐴕𐴡𐴌𐴠 𐴏𐴞𐴁𐴞 𐴌𐴝𐴙𐴑𐴧𐴠𐴥 𐴀𐴞𐴥𐴏𐴝𐴉𐴠 𐴇𐴞𐴥𐴀𐴕𐴡𐴃𐴢 𐴉𐴡𐴥𐴏𐴡𐴓𐴢 𐴕𐴡𐴥 𐴊𐴡𐴥𐴌𐴠.⁸𐴓𐴠𐴑𐴞𐴕 𐴀𐴝𐴌 𐴇𐴡𐴊𐴟𐴥𐴕 𐴁𐴞𐴏𐴢 𐴒𐴡𐴔 𐴎𐴡𐴁𐴞𐴕𐴡𐴃𐴢 𐴉𐴡𐴙𐴅𐴧𐴞𐴥𐴓𐴢, 𐴇𐴞𐴥𐴀𐴕 𐴁𐴝𐴌𐴞𐴥 𐴀𐴟𐴍𐴞𐴤 𐴋𐴡𐴣𐴀𐴌 𐴀𐴡𐴥𐴘 𐴉𐴡𐴥𐴏𐴡𐴓𐴢 𐴊𐴡𐴥𐴙𐴅𐴧𐴞𐴓𐴢: 𐴑𐴠𐴏𐴧𐴟𐴥𐴃𐴢 𐴃𐴞𐴌𐴞𐴥𐴐𐴢 𐴒𐴟𐴕, 𐴑𐴠𐴏𐴧𐴟𐴥𐴃𐴢 𐴇𐴝𐴥𐴙𐴄𐴢 𐴒𐴟𐴕, 𐴀𐴝𐴌 𐴑𐴠𐴏𐴧𐴟𐴥𐴃𐴢 𐴀𐴠𐴑 𐴐𐴡𐴥𐴃𐴢 𐴒𐴟𐴕.“

⁹𐴃𐴝𐴌𐴉𐴡𐴌𐴠 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴎𐴝𐴃𐴧𐴟 𐴉𐴟𐴥𐴕𐴞𐴁𐴝𐴌 𐴈𐴝𐴕 𐴀𐴝𐴏𐴠𐴤, 𐴘𐴡𐴥𐴒𐴧𐴗𐴝𐴘𐴠 𐴉𐴟𐴥𐴕𐴡.“

𐴔𐴠𐴀𐴏𐴝𐴓𐴡𐴌 𐴔𐴡𐴑𐴏𐴡𐴥𐴃𐴢

¹⁰𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴒𐴝𐴦𐴒𐴝 𐴀𐴡𐴥𐴘𐴒𐴞𐴘𐴡𐴘, 𐴀𐴞𐴥𐴁𐴝𐴌 𐴏𐴝𐴘𐴌𐴡𐴥𐴑𐴟𐴓𐴡𐴌 𐴔𐴝𐴕𐴟𐴥𐴙𐴐𐴧𐴟𐴥𐴕𐴠 𐴀𐴠𐴊𐴧𐴠 𐴁𐴝𐴌𐴡𐴥 𐴎𐴡𐴕 𐴐𐴝𐴥𐴌𐴞𐴃𐴧𐴟𐴕𐴠 𐴀𐴞𐴥𐴁𐴝𐴃𐴧𐴟 𐴔𐴠𐴀𐴏𐴝𐴓𐴢 𐴓𐴟𐴕𐴡𐴌 𐴁𐴝𐴦𐴁𐴟𐴃𐴠 𐴉𐴟𐴏𐴝𐴥𐴌 𐴒𐴡𐴙𐴅𐴧𐴠𐴥.¹¹𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴒𐴟𐴉𐴡𐴕𐴞𐴌𐴠 𐴎𐴝𐴙𐴕𐴃𐴡 𐴃𐴟𐴣𐴀𐴝𐴥𐴌𐴝𐴌𐴠 𐴁𐴠 𐴊𐴞𐴘𐴝 𐴒𐴞𐴘𐴠𐴥; 𐴔𐴡𐴕𐴃𐴡𐴌 𐴁𐴝𐴀𐴌𐴒𐴗𐴝 𐴔𐴝𐴙𐴕𐴐𐴡𐴥𐴌𐴠 𐴔𐴠𐴀𐴏𐴝𐴓𐴢 𐴊𐴞𐴥 𐴀𐴠𐴃𐴡𐴓𐴧𐴝𐴤 𐴈𐴡𐴖𐴝𐴤 𐴎𐴝,¹²𐴎𐴠𐴀𐴕𐴠,’𐴀𐴞𐴥𐴃𐴝𐴌𐴝 𐴏𐴝𐴘𐴃𐴠𐴥 𐴏𐴝𐴘𐴁𐴡𐴥 𐴔𐴡𐴕𐴃𐴡𐴌 𐴕𐴡 𐴊𐴠𐴑𐴞𐴥𐴁𐴡,𐴉𐴟𐴥𐴙𐴕𐴃𐴠 𐴉𐴟𐴥𐴕𐴞𐴁𐴡 𐴔𐴡𐴕𐴃𐴡𐴌 𐴕𐴡 𐴁𐴟𐴎𐴞𐴥𐴁𐴡,𐴀𐴝𐴌𐴕𐴡𐴥𐴘𐴓𐴠 𐴃𐴡 𐴀𐴞𐴥𐴃𐴝𐴌𐴝 𐴉𐴞𐴥𐴌𐴞 𐴀𐴝𐴘𐴃𐴡𐴤 𐴀𐴝𐴦𐴌 𐴔𐴝𐴉𐴢 𐴉𐴝𐴘𐴃𐴡.‘ “

𐴁𐴞𐴏𐴢 𐴐𐴞𐴥𐴣𐴍𐴡𐴘𐴝𐴌 𐴔𐴠𐴀𐴏𐴝𐴓𐴡𐴌 𐴔𐴝𐴀𐴕𐴞 𐴁𐴟𐴎𐴝𐴥𐴘𐴊𐴞𐴘𐴠

¹³𐴃𐴝𐴌𐴉𐴡𐴌𐴠 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴀𐴠 𐴔𐴠𐴀𐴏𐴝𐴓𐴢 𐴓𐴝𐴕𐴡𐴌 𐴔𐴝𐴀𐴕𐴞 𐴕𐴡𐴥 𐴁𐴟𐴎𐴡𐴥 𐴕𐴞𐴥𐴑𐴞؟ 𐴃𐴡𐴥𐴀𐴘𐴓𐴠 𐴀𐴡𐴙𐴕𐴧𐴡 𐴔𐴠𐴀𐴏𐴝𐴓𐴢 𐴓𐴟𐴕𐴡𐴌 𐴔𐴝𐴀𐴕𐴞 𐴑𐴠𐴀𐴕𐴒𐴡𐴌𐴞 𐴁𐴟𐴎𐴞𐴥𐴁𐴝؟¹⁴𐴐𐴞𐴥𐴣𐴍𐴡𐴘𐴝𐴘𐴠 𐴐𐴞𐴥𐴣𐴄𐴧𐴠 𐴊𐴠 𐴇𐴞𐴥𐴀𐴕 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴑𐴝𐴓𐴝𐴔.¹⁵𐴇𐴡𐴊𐴟𐴥𐴕 𐴔𐴝𐴕𐴟𐴥𐴙𐴐𐴢 𐴌𐴝𐴏𐴃𐴝𐴌 𐴇𐴝𐴣𐴏𐴝𐴃𐴢 𐴉𐴡𐴙𐴅𐴧𐴠𐴥 𐴊𐴠 𐴁𐴞𐴏𐴢 𐴇𐴞𐴥𐴀𐴕𐴡𐴌 𐴋𐴡𐴥𐴙𐴓𐴧𐴝; 𐴀𐴞𐴥𐴃𐴝𐴌𐴝 𐴑𐴝𐴓𐴝𐴔 𐴉𐴟𐴥𐴕𐴞𐴓𐴠 𐴐𐴡𐴥𐴘𐴃𐴝𐴕 𐴃𐴡𐴌𐴝𐴃𐴡𐴌𐴞 𐴀𐴝𐴀𐴘𐴢 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴐𐴞𐴥𐴣𐴍𐴝 𐴒𐴞𐴥𐴘𐴠 𐴊𐴠 𐴑𐴝𐴓𐴝𐴔 𐴓𐴡𐴘𐴎𐴝𐴒𐴡𐴥𐴘.¹⁶𐴇𐴡𐴊𐴟𐴥𐴕 𐴔𐴝𐴕𐴟𐴥𐴙𐴐𐴢 𐴐𐴞𐴥𐴓𐴢 𐴎𐴡𐴁𐴞𐴕𐴡𐴃𐴢 𐴉𐴡𐴙𐴅𐴧𐴠𐴥 𐴊𐴠 𐴁𐴞𐴏𐴢 𐴇𐴞𐴥𐴀𐴕𐴡𐴌 𐴋𐴡𐴥𐴙𐴓𐴧𐴝, 𐴎𐴠𐴃𐴝𐴌𐴝𐴤 𐴑𐴝𐴓𐴝𐴔 𐴉𐴟𐴥𐴕𐴞𐴓𐴠 𐴔𐴡𐴃𐴧𐴡𐴌 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴑𐴡𐴁𐴟𐴓𐴢 𐴒𐴡𐴌𐴠𐴥,¹⁷𐴔𐴡𐴕𐴃𐴡𐴌 𐴇𐴞𐴥𐴀𐴕𐴡𐴃𐴢 𐴔𐴡𐴎𐴁𐴟𐴃𐴢 𐴐𐴞𐴥𐴛𐴡𐴌 𐴕𐴡𐴥 𐴒𐴝𐴏𐴝𐴤 𐴊𐴠 𐴇𐴠𐴥𐴃𐴡𐴓𐴧𐴝 𐴇𐴡𐴦𐴊𐴧𐴞𐴕 𐴁𐴠 𐴄𐴞𐴑𐴞 𐴃𐴝𐴥𐴑𐴠. 𐴎𐴠𐴣𐴃𐴧𐴠𐴥 𐴇𐴠𐴥 𐴑𐴝𐴓𐴝𐴔𐴡𐴌 𐴎𐴡𐴌𐴞𐴘𐴝 𐴔𐴡𐴏𐴞𐴁𐴡𐴃𐴢 𐴘𐴝𐴥 𐴎𐴟𐴓𐴟𐴥𐴔 𐴀𐴝𐴘𐴧𐴠𐴤, 𐴀𐴞𐴥𐴃𐴝𐴌𐴝 𐴀𐴠𐴥𐴇𐴡𐴕 𐴉𐴞𐴏𐴧𐴝𐴥 𐴔𐴝𐴌𐴠.¹⁸𐴀𐴝𐴌 𐴇𐴡𐴊𐴟𐴥𐴕 𐴔𐴝𐴕𐴟𐴥𐴙𐴐𐴢 𐴑𐴠𐴣𐴍𐴝𐴁𐴡𐴕𐴡𐴃𐴢 𐴉𐴡𐴙𐴅𐴧𐴠𐴥 𐴊𐴠 𐴁𐴞𐴏𐴢 𐴇𐴞𐴥𐴀𐴕𐴡𐴌 𐴋𐴡𐴥𐴙𐴓𐴧𐴝; 𐴀𐴞𐴥𐴃𐴝𐴌𐴝 𐴑𐴝𐴓𐴝𐴔 𐴉𐴟𐴥𐴕𐴠,¹⁹𐴔𐴡𐴕𐴃𐴡𐴌 𐴊𐴟𐴕𐴞𐴘𐴝𐴙𐴌 𐴏𐴞𐴕𐴃𐴝𐴁𐴝𐴥𐴉𐴝𐴕𐴞𐴘𐴠, 𐴊𐴡𐴥𐴕-𐴊𐴡𐴓𐴡𐴃𐴡𐴌 𐴀𐴝𐴊𐴡𐴌𐴠, 𐴀𐴠𐴊𐴧𐴠 𐴀𐴡𐴙𐴕𐴧𐴡 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴡𐴌 𐴓𐴝𐴓𐴡𐴥𐴏𐴠 𐴇𐴠𐴥 𐴑𐴝𐴓𐴝𐴔𐴡𐴌𐴠 𐴏𐴞𐴁𐴞 𐴌𐴝𐴑𐴠𐴥, 𐴇𐴠𐴥𐴃𐴡𐴓𐴧𐴝 𐴇𐴞𐴥𐴀𐴕𐴡𐴃𐴢 𐴒𐴟𐴓𐴝 𐴕𐴡 𐴊𐴡𐴥𐴌𐴠.²⁰𐴀𐴝𐴌 𐴇𐴡𐴊𐴟𐴥𐴕 𐴔𐴝𐴕𐴟𐴥𐴙𐴐𐴢 𐴒𐴡𐴔 𐴎𐴡𐴁𐴞𐴕𐴡𐴃𐴢 𐴉𐴡𐴙𐴅𐴧𐴠𐴥 𐴊𐴠 𐴁𐴞𐴏𐴢 𐴇𐴞𐴥𐴀𐴕𐴡𐴌 𐴋𐴡𐴥𐴙𐴓𐴧𐴝; 𐴀𐴞𐴥𐴃𐴝𐴌𐴝 𐴑𐴝𐴓𐴝𐴔 𐴉𐴟𐴥𐴕𐴠 𐴀𐴠𐴊𐴧𐴠 𐴑𐴡𐴁𐴟𐴓𐴢 𐴒𐴡𐴌𐴠𐴥, 𐴀𐴝𐴦𐴌 𐴒𐴟𐴓𐴝 𐴊𐴡𐴥𐴌𐴝: 𐴑𐴠𐴏𐴧𐴟𐴥𐴘𐴠 𐴃𐴞𐴌𐴞𐴥𐴐𐴢 𐴒𐴟𐴕, 𐴑𐴠𐴏𐴧𐴟𐴥𐴘𐴠 𐴇𐴝𐴥𐴙𐴄𐴢 𐴒𐴟𐴕, 𐴀𐴝𐴌 𐴑𐴠𐴏𐴧𐴟𐴥𐴘𐴠 𐴀𐴠𐴑 𐴐𐴡𐴥𐴃𐴢 𐴒𐴟𐴕.“

𐴏𐴠𐴌𐴝𐴑𐴡𐴌 𐴔𐴠𐴀𐴏𐴝𐴓𐴢

²¹𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴏𐴠𐴌𐴝𐴑 𐴑𐴞 𐴁𐴝𐴥𐴙𐴌 𐴘𐴝𐴥 𐴉𐴝𐴓𐴡𐴚𐴡𐴌 𐴃𐴡𐴓𐴠 𐴌𐴝𐴑𐴞𐴥 𐴁𐴡𐴓𐴧𐴝 𐴀𐴝𐴕𐴠𐴤 𐴊𐴠 𐴕𐴠𐴥؟ 𐴏𐴠𐴌𐴝𐴑 𐴁𐴡𐴘𐴍𐴡𐴥𐴕𐴞𐴌 𐴖𐴡𐴌𐴠 𐴌𐴝𐴑𐴞𐴥 𐴁𐴡𐴓𐴧𐴝 𐴕𐴡 𐴕𐴠𐴥؟²²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴠𐴕𐴊𐴞𐴓𐴧𐴝 𐴓𐴟𐴑𐴞 𐴀𐴝𐴏𐴠𐴤 𐴊𐴠 𐴑𐴠𐴏𐴧𐴟𐴥 𐴕𐴝𐴥𐴘 𐴎𐴞𐴀𐴕 𐴎𐴝𐴇𐴠𐴥𐴌 𐴕𐴡 𐴀𐴡𐴥𐴘𐴁𐴡, 𐴀𐴝𐴦𐴌 𐴀𐴠𐴕𐴊𐴞𐴓𐴧𐴝 𐴓𐴟𐴑𐴝𐴘 𐴀𐴠𐴙𐴅𐴧𐴝 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴕𐴝𐴥𐴘 𐴎𐴞𐴀𐴕 𐴑𐴟𐴥𐴓𐴝𐴇𐴝𐴓𐴝 𐴕𐴡 𐴀𐴡𐴥𐴘𐴁𐴡.²³𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴡𐴃𐴧𐴟 𐴉𐴟𐴥𐴕𐴞𐴁𐴝𐴌 𐴈𐴝𐴕 𐴃𐴝𐴥𐴑𐴠, 𐴘𐴡𐴥𐴒𐴧𐴗𐴝𐴘𐴠 𐴉𐴟𐴥𐴕𐴡.“

²⁴𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴘𐴝𐴀𐴕 𐴀𐴡𐴥 𐴈𐴡𐴘𐴧𐴠𐴥, ”𐴃𐴟𐴣𐴀𐴝𐴥𐴌𐴝 𐴎𐴞𐴀𐴕 𐴉𐴟𐴥𐴕𐴡𐴌 𐴇𐴞𐴥𐴀𐴕𐴡𐴌 𐴀𐴟𐴎𐴟 𐴊𐴞𐴥𐴘𐴝𐴕 𐴊𐴡𐴥. 𐴃𐴟𐴣𐴀𐴝𐴥𐴌𐴝 𐴎𐴠 𐴔𐴝𐴉𐴠 𐴊𐴞𐴦𐴁𐴝, 𐴃𐴟𐴣𐴀𐴝𐴥𐴌𐴝𐴌𐴠 𐴘𐴡𐴥 𐴇𐴠𐴥 𐴔𐴝𐴉𐴠 𐴊𐴞𐴦𐴘𐴝 𐴎𐴝𐴘𐴁𐴡, 𐴃𐴟𐴣𐴀𐴝𐴥𐴌𐴝𐴌𐴠 𐴀𐴡𐴥𐴘𐴓𐴠 𐴀𐴝𐴌𐴡𐴤 𐴊𐴞𐴦𐴘𐴝 𐴎𐴝𐴘𐴁𐴡.²⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴝𐴃𐴧𐴟 𐴀𐴝𐴏𐴠𐴤 𐴘𐴡𐴥𐴒𐴧𐴗𐴝𐴌𐴠 𐴀𐴝𐴌𐴡𐴤 𐴊𐴞𐴦𐴘𐴝 𐴎𐴝𐴘𐴁𐴡, 𐴔𐴡𐴕𐴃𐴡𐴌 𐴎𐴝𐴃𐴧𐴟 𐴕𐴝𐴥𐴘 𐴘𐴡𐴥𐴒𐴧𐴗𐴝𐴃𐴧𐴟 𐴀𐴝𐴏𐴠𐴤 𐴊𐴠 𐴇𐴞𐴥𐴀𐴕 𐴀𐴟𐴥𐴊𐴧𐴗𐴝 𐴓𐴡𐴘𐴉𐴠𐴥𐴓𐴝 𐴎𐴝𐴘𐴁𐴡.“

𐴁𐴞𐴏𐴢 𐴁𐴝𐴌𐴞𐴥 𐴀𐴟𐴍𐴝𐴥𐴌 𐴔𐴠𐴀𐴏𐴝𐴓𐴢

²⁶𐴀𐴞𐴏𐴝𐴤𐴘𐴠 𐴀𐴝𐴌𐴡𐴤 𐴈𐴡𐴀𐴌 𐴊𐴠, ”𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴀𐴡𐴥𐴙𐴓𐴊𐴠 𐴀𐴠𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴡𐴌 𐴋𐴡𐴥𐴙𐴓𐴧𐴝 𐴎𐴠𐴦𐴕𐴞𐴑𐴞 𐴎𐴡𐴁𐴞𐴕𐴡𐴃𐴢 𐴁𐴞𐴏𐴢 𐴐𐴞𐴥𐴣𐴄𐴧𐴠,²⁷𐴘𐴡𐴥𐴒𐴧𐴗𐴝 𐴌𐴝𐴙𐴃𐴧𐴝 𐴒𐴟𐴥𐴔 𐴎𐴝 𐴀𐴝𐴦𐴌 𐴊𐴞𐴕𐴡𐴃𐴢 𐴏𐴠𐴃𐴡𐴕 𐴃𐴝𐴥𐴑𐴠, 𐴇𐴠𐴥 𐴁𐴞𐴏𐴡𐴃𐴧𐴟 𐴒𐴠𐴏𐴢 𐴀𐴝𐴀𐴘𐴢 𐴑𐴠𐴀𐴕𐴒𐴡𐴌𐴞 𐴋𐴡𐴣𐴀𐴌 𐴀𐴡𐴥𐴘𐴒𐴞𐴘𐴡𐴘 𐴊𐴠 𐴘𐴡𐴥𐴒𐴧𐴗𐴝 𐴕𐴞𐴎𐴠 𐴇𐴡𐴘 𐴕𐴡 𐴉𐴝𐴌𐴠.²⁸𐴎𐴡𐴁𐴞𐴕𐴠 𐴃𐴡 𐴕𐴞𐴎𐴡𐴌𐴒𐴝𐴤 𐴕𐴞𐴎𐴠 𐴉𐴡𐴥𐴏𐴡𐴓𐴢 𐴊𐴡𐴥𐴌𐴝: 𐴀𐴝𐴒𐴠 𐴏𐴝𐴌𐴝, 𐴁𐴝𐴦𐴊𐴠 𐴀𐴝𐴒𐴝, 𐴀𐴝𐴦𐴌 𐴀𐴝𐴒𐴝𐴃𐴢 𐴉𐴡𐴦𐴕𐴝 𐴉𐴡𐴥𐴏𐴡𐴓𐴢.²⁹𐴎𐴠𐴣𐴃𐴧𐴠𐴥 𐴉𐴡𐴥𐴏𐴡𐴓𐴢 𐴉𐴝𐴒𐴞𐴒𐴞𐴘𐴡𐴥𐴘, 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴀𐴕 𐴃𐴡𐴌𐴝𐴃𐴡𐴌𐴞 𐴇𐴝𐴣𐴏𐴞 𐴓𐴡𐴘 𐴈𐴝𐴍𐴝𐴃𐴢 𐴊𐴡𐴙𐴅𐴧𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴉𐴡𐴥𐴏𐴡𐴓𐴢 𐴈𐴝𐴍𐴞𐴁𐴝𐴥𐴌 𐴀𐴝𐴙𐴕𐴊𐴝 𐴀𐴝𐴀𐴘𐴒𐴞𐴘𐴡𐴘.“

𐴇𐴡𐴥𐴌𐴡𐴙𐴌 𐴊𐴝𐴕𐴝𐴌 𐴔𐴠𐴀𐴏𐴝𐴓𐴢

³⁰𐴀𐴞𐴏𐴝𐴤𐴘𐴠 𐴀𐴝𐴌𐴡𐴤 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴑𐴞𐴘𐴡𐴥𐴌 𐴋𐴡𐴥𐴙𐴓𐴧𐴝 𐴁𐴡𐴥𐴓𐴞 𐴈𐴡𐴘𐴃𐴝𐴥𐴔؟ 𐴘𐴝𐴥 𐴑𐴞𐴘𐴡𐴥𐴌 𐴔𐴠𐴀𐴏𐴝𐴓𐴢 𐴊𐴞𐴥 𐴁𐴟𐴎𐴝𐴥𐴘𐴃𐴝𐴔؟³¹𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴀𐴠𐴒𐴧𐴗𐴝𐴤 𐴇𐴡𐴥𐴌𐴡𐴙𐴌 𐴊𐴝𐴕𐴝𐴌 𐴋𐴡𐴥𐴙𐴓𐴧𐴝; 𐴎𐴞𐴁𐴝𐴤𐴌𐴠 𐴎𐴡𐴁𐴞𐴕𐴡𐴃𐴢 𐴓𐴝𐴒𐴝𐴘𐴁𐴝𐴥𐴐𐴧𐴡𐴃𐴢 𐴏𐴝𐴘𐴃𐴠𐴥 𐴎𐴡𐴁𐴞𐴕𐴡𐴌 𐴃𐴝𐴔𐴝𐴥𐴔 𐴁𐴞𐴏𐴡𐴌 𐴁𐴟𐴥𐴃𐴡𐴌𐴠 𐴀𐴠𐴁𐴧𐴠 𐴐𐴡𐴥𐴣𐴍𐴡,³²𐴃𐴡𐴀 𐴘𐴞𐴥𐴁𐴝𐴌𐴠 𐴓𐴝𐴒𐴝𐴘𐴓𐴠𐴥, 𐴘𐴞𐴥𐴁𐴝 𐴁𐴝𐴌𐴞𐴥 𐴑𐴠𐴥𐴃𐴞𐴌 𐴒𐴝𐴏𐴢 𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴀𐴡𐴥𐴘 𐴀𐴠𐴕𐴊𐴞𐴓𐴧𐴝 𐴋𐴡𐴣𐴀𐴌-𐴋𐴡𐴣𐴀𐴌 𐴋𐴠𐴥𐴀𐴘𐴓𐴝 𐴀𐴡𐴥𐴑𐴧𐴡𐴓𐴢 𐴉𐴝𐴥𐴍𐴝, 𐴎𐴠𐴀𐴕 𐴕𐴞𐴥𐴑𐴞 𐴉𐴝𐴙𐴑 𐴀𐴡𐴥𐴑𐴧𐴡𐴓𐴠 𐴘𐴞𐴥𐴁𐴝𐴌 𐴏𐴝𐴥𐴁𐴝𐴌 𐴕𐴞𐴏𐴠 𐴁𐴝𐴇𐴝𐴤 𐴁𐴝𐴣𐴊𐴞𐴥 𐴉𐴝𐴌𐴠.“

𐴔𐴠𐴀𐴏𐴝𐴓𐴢 𐴀𐴠𐴏𐴃𐴠𐴔𐴝𐴓𐴢 𐴒𐴡𐴌𐴝𐴥

³³𐴇𐴠𐴥𐴕𐴊𐴞𐴓𐴧𐴝 𐴁𐴡𐴀𐴗𐴃𐴢 𐴔𐴠𐴀𐴏𐴝𐴓𐴢 𐴀𐴡𐴥𐴑𐴧𐴡𐴓𐴢 𐴊𐴞𐴥 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝 𐴁𐴟𐴎𐴞𐴥 𐴉𐴝𐴌𐴠 𐴊𐴠 𐴇𐴠𐴥𐴊𐴧𐴟𐴌 𐴔𐴡𐴎𐴞𐴕 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴈𐴡𐴘𐴃𐴡𐴤.³⁴𐴀𐴞𐴥𐴁𐴝𐴘𐴠 𐴔𐴠𐴀𐴏𐴝𐴓𐴢 𐴏𐴝𐴥𐴌𐴝 𐴀𐴞𐴥𐴃𐴝𐴌𐴝𐴌𐴠 𐴈𐴡𐴃𐴝𐴤 𐴕𐴡 𐴈𐴡𐴘𐴃𐴡𐴤; 𐴔𐴡𐴕𐴃𐴡𐴌 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴀𐴝𐴙𐴊𐴧𐴡𐴕𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴁𐴟𐴎𐴝𐴥𐴘𐴊𐴞𐴃𐴡.

𐴀𐴞𐴏𐴝𐴤𐴘𐴠 𐴃𐴟𐴖𐴝𐴥𐴕 𐴃𐴝𐴥𐴔𐴝𐴘𐴧𐴠

³⁵𐴇𐴠𐴥 𐴊𐴞𐴕 𐴇𐴝𐴥𐴣𐴎𐴢 𐴀𐴡𐴥𐴘𐴧𐴠 𐴌𐴝𐴥𐴌, 𐴀𐴞𐴏𐴝𐴤𐴘𐴠 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴈𐴡𐴀𐴌 𐴊𐴠, ”𐴀𐴝𐴘𐴧𐴡𐴤, 𐴀𐴝𐴣𐴀𐴌𐴝 𐴀𐴡 𐴇𐴝𐴣𐴏𐴝𐴃𐴢 𐴎𐴝𐴘.“³⁶𐴔𐴝𐴕𐴟𐴥𐴙𐴐𐴡𐴌 𐴊𐴡𐴓𐴢 𐴓𐴗𐴝𐴥𐴌𐴠 𐴀𐴠𐴌𐴞, 𐴀𐴞𐴥𐴃𐴝𐴌𐴝 𐴀𐴞𐴏𐴝𐴤 𐴎𐴠 𐴕𐴡𐴦𐴃𐴢 𐴀𐴝𐴐𐴧𐴞𐴥𐴓𐴢 𐴇𐴞𐴥𐴘𐴝𐴕𐴡𐴃𐴢 𐴒𐴡𐴥𐴌𐴞 𐴀𐴞𐴥𐴁𐴝𐴌𐴠 𐴉𐴟𐴥𐴖𐴝𐴣𐴃𐴞 𐴓𐴡𐴘𐴒𐴞𐴘𐴠𐴥. 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴌𐴡𐴤 𐴕𐴡𐴦 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴒𐴞𐴀𐴓𐴢.³⁷𐴀𐴝𐴏𐴞𐴔𐴁𐴞𐴃𐴢 𐴇𐴠𐴥𐴍𐴠 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴃𐴟𐴖𐴝𐴥𐴕 𐴐𐴟𐴥𐴌𐴟 𐴀𐴡𐴥𐴘𐴧𐴠, 𐴀𐴝𐴦𐴌 𐴀𐴠𐴀𐴕 𐴋𐴡𐴣𐴀𐴌-𐴋𐴡𐴣𐴀𐴌 𐴒𐴡𐴙𐴌 𐴀𐴡𐴥𐴑𐴧𐴡𐴓𐴢 𐴔𐴝𐴌𐴝𐴃𐴢 𐴊𐴡𐴙𐴅𐴧𐴠, 𐴎𐴠𐴀𐴕 𐴕𐴞𐴥𐴑𐴞 𐴕𐴡𐴦 𐴒𐴝𐴥𐴕 𐴉𐴝𐴕𐴞𐴥 𐴓𐴡𐴥𐴘 𐴁𐴡𐴥𐴌𐴞𐴎𐴝𐴌𐴒𐴡𐴘.³⁸𐴔𐴡𐴕𐴃𐴡𐴌 𐴀𐴞𐴏𐴝𐴤 𐴕𐴡𐴦𐴡𐴌 𐴉𐴝𐴏𐴞𐴥𐴓𐴡𐴃𐴢 𐴀𐴠𐴒𐴧𐴗𐴝𐴤 𐴁𐴝𐴓𐴟𐴥𐴐𐴢 𐴐𐴞𐴥𐴃𐴝𐴕𐴡𐴃𐴢 𐴊𐴞𐴥 𐴒𐴟𐴥𐴔𐴡𐴃𐴢 𐴀𐴝𐴐𐴧𐴞𐴥𐴓𐴢. 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴃𐴟𐴓𐴞𐴤𐴊𐴞 𐴈𐴡𐴀𐴌 𐴊𐴠, ”𐴀𐴡𐴥 𐴀𐴟𐴏𐴃𐴝𐴃𐴢, 𐴀𐴝𐴣𐴀𐴌𐴝 𐴔𐴡𐴌𐴞𐴎𐴝𐴙𐴌𐴒𐴡𐴥𐴘 𐴊𐴠 𐴇𐴞𐴥𐴘𐴝𐴕𐴡𐴃𐴢 𐴑𐴞𐴥 𐴃𐴟𐴣𐴀𐴝𐴥𐴣𐴌 𐴇𐴡𐴕𐴡𐴤 𐴊𐴞𐴥𐴘𐴝𐴕 𐴕𐴝𐴥𐴘؟“

³⁹𐴃𐴡𐴥𐴘 𐴀𐴞𐴥𐴁𐴝 𐴀𐴟𐴍𐴞𐴤 𐴁𐴡𐴘𐴧𐴝𐴌𐴡𐴌𐴠 𐴊𐴡𐴥𐴀𐴣𐴑 𐴊𐴞𐴥𐴘𐴠, 𐴀𐴝𐴦𐴌 𐴉𐴝𐴕𐴞𐴥𐴌𐴠 𐴈𐴡𐴀𐴌 𐴊𐴠, ”𐴕𐴞𐴎𐴝𐴥𐴔 𐴀𐴡𐴥, 𐴃𐴝𐴥𐴔𐴝.“𐴇𐴠𐴥𐴃𐴟𐴕𐴡𐴃𐴢 𐴁𐴡𐴘𐴧𐴝𐴌 𐴁𐴡𐴕 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴉𐴟𐴌𐴝𐴉𐴟𐴌𐴞 𐴃𐴝𐴥𐴔𐴝𐴘𐴒𐴞𐴘𐴡𐴘.

⁴⁰𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠 ”𐴃𐴟𐴣𐴀𐴝𐴥𐴌𐴝 𐴋𐴡𐴦𐴌𐴡𐴥𐴌 𐴑𐴞𐴘𐴝𐴥؟ 𐴃𐴟𐴣𐴀𐴝𐴥𐴌𐴝𐴃𐴧𐴟 𐴑𐴞𐴥 𐴀𐴝𐴙𐴅𐴧𐴡𐴤 𐴀𐴞𐴔𐴝𐴕 𐴕𐴝𐴥𐴘؟“

⁴¹𐴀𐴞𐴥𐴃𐴝𐴌𐴝 𐴁𐴞𐴐𐴞𐴤 𐴋𐴡𐴦𐴌𐴝𐴘𐴒𐴞𐴘𐴡𐴥𐴘 𐴀𐴝𐴦𐴌 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴈𐴡𐴀𐴌 𐴊𐴠, ”𐴀𐴞𐴁𐴝𐴤 𐴇𐴡𐴕؟ 𐴁𐴡𐴘𐴧𐴝𐴌𐴠 𐴀𐴠𐴊𐴧𐴠 𐴉𐴝𐴕𐴞𐴥𐴘𐴠 𐴀𐴟𐴥𐴊𐴧𐴗𐴝 𐴊𐴠 𐴀𐴞𐴁𐴝𐴤𐴌 𐴈𐴡𐴃𐴝𐴤 𐴔𐴝𐴕𐴠!“

The Word for the World International

https://app.library.bible/content/87faca8b51c22590