Read 𐴔𐴝𐴌𐴑𐴟𐴏𐴢 16

𐴔𐴝𐴌𐴑𐴟𐴏𐴢16

𐴀𐴞𐴏𐴝𐴤𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴙𐴅𐴧𐴠𐴥

¹𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴉𐴟𐴥𐴌𐴝𐴘𐴒𐴞𐴘𐴡𐴘 𐴌𐴝𐴥𐴌, 𐴔𐴡𐴌𐴞𐴘𐴝𐴔 𐴔𐴝𐴑𐴊𐴝𐴥𐴓𐴞𐴕𐴞 𐴘𐴠, 𐴘𐴝𐴑𐴟𐴁𐴡𐴌 𐴔𐴝𐴦 𐴔𐴡𐴌𐴞𐴘𐴝𐴔𐴠, 𐴀𐴠𐴊𐴧𐴠 𐴏𐴝𐴓𐴡𐴥𐴔𐴞𐴘𐴠 𐴑𐴟𐴥𐴐𐴁𐴡 𐴔𐴡𐴏𐴡𐴥𐴓𐴧𐴝 𐴀𐴡𐴥𐴑𐴧𐴡𐴓𐴢 𐴑𐴞𐴕𐴧𐴠𐴥, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴀𐴝𐴀𐴘𐴢 𐴀𐴞𐴏𐴝𐴤𐴌 𐴓𐴝𐴐𐴡𐴃𐴢 𐴊𐴞𐴦 𐴉𐴝𐴌𐴠.²𐴀𐴞𐴥𐴃𐴝𐴌𐴝 𐴇𐴝𐴥𐴉𐴃𐴝𐴌 𐴉𐴡𐴀𐴘𐴓𐴝 𐴊𐴞𐴕 𐴁𐴞𐴀𐴕𐴧𐴝 𐴑𐴟𐴥𐴁𐴢 𐴏𐴡𐴥𐴀𐴌𐴠 𐴁𐴠𐴙𐴓𐴢 𐴀𐴟𐴍𐴠𐴤𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴈𐴡𐴁𐴡𐴌𐴡𐴃𐴢 𐴀𐴝𐴙𐴐𐴧𐴠𐴥.³𐴀𐴞𐴥𐴃𐴝𐴌𐴝 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝𐴓𐴧𐴝 𐴈𐴡𐴁𐴡𐴌𐴡𐴌 𐴔𐴟𐴑𐴡𐴃𐴧𐴟 𐴐𐴞𐴥𐴓𐴢 𐴓𐴝𐴕 𐴇𐴡𐴕𐴠 𐴓𐴝𐴌𐴞𐴁𐴡𐴥؟“

⁴𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴖𐴡𐴌𐴔𐴞𐴑𐴧𐴝𐴥 𐴏𐴝𐴘𐴧𐴠𐴥 𐴌𐴝𐴥𐴌 𐴊𐴠𐴑𐴠𐴥𐴌 𐴊𐴠, 𐴐𐴞𐴥𐴓𐴢 𐴓𐴝𐴕 𐴓𐴝𐴌𐴞𐴉𐴠𐴓𐴝𐴘𐴧𐴝. 𐴇𐴞𐴥𐴘𐴝𐴕 𐴁𐴞𐴐𐴞𐴤 𐴋𐴡𐴣𐴀𐴌 𐴀𐴝𐴐𐴧𐴞𐴥𐴓𐴢.⁵𐴀𐴞𐴥𐴃𐴝𐴌𐴝 𐴈𐴡𐴁𐴡𐴌𐴡𐴌 𐴁𐴟𐴥𐴃𐴡𐴌𐴠 𐴒𐴡𐴥𐴙𐴓𐴧𐴠 𐴌𐴝𐴥𐴌, 𐴊𐴡𐴥𐴓𐴝 𐴇𐴡𐴦𐴌 𐴉𐴞𐴕𐴊𐴝𐴤 𐴀𐴠𐴑 𐴅𐴟𐴖𐴝𐴕 𐴔𐴝𐴕𐴟𐴥𐴙𐴐𐴢 𐴊𐴠𐴕 𐴋𐴝𐴥𐴑𐴡𐴃𐴧𐴟 𐴁𐴡𐴘𐴍𐴝𐴤 𐴊𐴠𐴙𐴑𐴧𐴠𐴥, 𐴇𐴞𐴥𐴘𐴝𐴕𐴠 𐴀𐴞𐴥𐴃𐴝𐴌𐴝 𐴁𐴞𐴐𐴞𐴤 𐴋𐴡𐴦𐴌𐴝𐴘𐴒𐴞𐴘𐴡𐴥𐴘.

⁶𐴔𐴡𐴕𐴃𐴡𐴌 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴕𐴡 𐴋𐴡𐴦𐴌𐴝𐴘𐴧𐴡𐴥; 𐴃𐴟𐴣𐴀𐴝𐴥𐴌𐴝 𐴀𐴞𐴏𐴝𐴤 𐴕𐴝𐴏𐴝𐴥𐴌𐴞𐴌𐴠 𐴃𐴟𐴖𐴡𐴀𐴌 𐴊𐴠, 𐴎𐴞𐴁𐴝𐴤𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥 𐴔𐴝𐴌𐴞𐴉𐴠𐴥𐴓𐴝 𐴒𐴞𐴥𐴀𐴓𐴢. 𐴀𐴞𐴥𐴁𐴝 𐴎𐴞𐴕𐴊𐴝 𐴀𐴡𐴥𐴘𐴒𐴞𐴘𐴡𐴘; 𐴀𐴞𐴥𐴁𐴝 𐴀𐴠𐴍𐴠𐴥 𐴕𐴝𐴥𐴘. 𐴀𐴞𐴥𐴁𐴝𐴌𐴠 𐴌𐴝𐴙𐴑𐴧𐴞𐴥𐴓𐴢 𐴊𐴠 𐴎𐴝𐴒𐴝 𐴒𐴝𐴥𐴕 𐴏𐴡𐴀.⁷𐴘𐴝𐴓𐴝 𐴎𐴡𐴦, 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴀𐴠𐴊𐴧𐴠 𐴉𐴞𐴃𐴡𐴌𐴡𐴌𐴠 𐴈𐴡𐴀𐴒𐴡𐴘 𐴊𐴠, ’𐴀𐴞𐴥𐴁𐴝 𐴃𐴟𐴣𐴀𐴝𐴥𐴌𐴝𐴌 𐴀𐴝𐴒𐴠 𐴒𐴝𐴓𐴞𐴓𐴡𐴃𐴢 𐴎𐴝𐴦𐴌. 𐴃𐴟𐴣𐴀𐴝𐴥𐴌𐴝 𐴀𐴞𐴥𐴁𐴝𐴌𐴠 𐴇𐴠𐴥𐴍𐴠 𐴊𐴠𐴑𐴞𐴥𐴁𐴝, 𐴎𐴠𐴕𐴊𐴞𐴓𐴧𐴝 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴓𐴢.‘ “

⁸𐴀𐴞𐴥𐴃𐴝𐴌𐴝 𐴇𐴝𐴉𐴞-𐴇𐴝𐴉𐴞 𐴀𐴠𐴊𐴧𐴠 𐴀𐴝𐴔𐴧𐴟𐴥𐴑𐴠 𐴈𐴡𐴁𐴡𐴌𐴡𐴃𐴧𐴟 𐴕𐴠𐴦𐴓𐴞 𐴊𐴟𐴣𐴌𐴊𐴞𐴘𐴠𐴥. 𐴀𐴞𐴥𐴃𐴝𐴌𐴝 𐴇𐴡𐴕𐴡𐴤𐴑𐴞𐴘𐴡𐴌𐴠 𐴑𐴠𐴏𐴧𐴟𐴥 𐴕𐴡𐴥 𐴈𐴡𐴀, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝𐴃𐴧𐴟 𐴑𐴟𐴥𐴁𐴢 𐴋𐴡𐴦𐴌 𐴓𐴝𐴥𐴙𐴒𐴧𐴠.

𐴔𐴡𐴌𐴞𐴘𐴝𐴔 𐴔𐴝𐴑𐴊𐴝𐴥𐴓𐴞𐴕𐴞𐴌𐴠 𐴊𐴝𐴈𐴝𐴤𐴊𐴞𐴘𐴠

⁹𐴇𐴝𐴥𐴉𐴃𐴝𐴌 𐴉𐴡𐴀𐴘𐴓𐴝 𐴊𐴞𐴕 𐴁𐴞𐴀𐴕𐴧𐴝 𐴏𐴡𐴥𐴀𐴌𐴠 𐴀𐴞𐴏𐴝𐴤 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴘𐴎𐴝𐴘𐴒𐴡𐴘 𐴁𐴝𐴦𐴊𐴠, 𐴀𐴝𐴒𐴠 𐴔𐴡𐴌𐴞𐴘𐴝𐴔 𐴔𐴝𐴑𐴊𐴝𐴥𐴓𐴞𐴕𐴞𐴌𐴠 𐴊𐴝𐴈𐴝𐴤𐴊𐴞𐴘𐴠, 𐴎𐴞𐴁𐴝𐴤𐴌 𐴁𐴟𐴥𐴃𐴡𐴃𐴧𐴟 𐴀𐴞𐴥𐴁𐴝𐴘𐴠 𐴇𐴝𐴥𐴣𐴃𐴧𐴗𐴝 𐴁𐴟𐴥𐴃𐴢 𐴕𐴠𐴓𐴝𐴀𐴓𐴢.¹⁰𐴇𐴞𐴥𐴁𐴝𐴘𐴠 𐴎𐴝𐴘, 𐴀𐴞𐴏𐴝𐴤𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴥𐴁𐴡𐴌 𐴊𐴞𐴥𐴘𐴠, 𐴇𐴠𐴥𐴣𐴃𐴧𐴠 𐴀𐴞𐴥𐴃𐴝𐴌𐴝 𐴉𐴠𐴌𐴠𐴐𐴝𐴕𐴞 𐴎𐴝𐴇𐴠𐴥𐴌 𐴒𐴡𐴌𐴝𐴥𐴃𐴢 𐴀𐴠𐴊𐴧𐴠 𐴈𐴝𐴣𐴊𐴝𐴈𐴝𐴍𐴞 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.¹¹𐴀𐴞𐴏𐴝𐴤 𐴎𐴞𐴕𐴊𐴝 𐴊𐴠 𐴀𐴠𐴊𐴧𐴠 𐴔𐴡𐴌𐴞𐴘𐴝𐴔𐴠 𐴀𐴞𐴥𐴁𐴝𐴌𐴠 𐴊𐴠𐴙𐴑𐴧𐴠𐴥 𐴊𐴠 𐴉𐴟𐴥𐴕𐴞 𐴀𐴞𐴥𐴃𐴝𐴌𐴝 𐴁𐴞𐴐𐴧𐴝𐴥𐴐𐴢 𐴕𐴡𐴥 𐴒𐴡𐴌𐴠𐴥.

𐴀𐴞𐴏𐴝𐴤𐴘𐴠 𐴊𐴟𐴘 𐴎𐴡𐴕 𐴀𐴟𐴔𐴧𐴡𐴃𐴡𐴌𐴠 𐴊𐴝𐴈𐴝𐴤𐴊𐴞𐴘𐴠

¹²𐴘𐴝𐴥𐴌𐴁𐴝𐴦𐴊𐴠 𐴀𐴞𐴏𐴝𐴤𐴘𐴠 𐴀𐴝𐴌𐴀𐴠𐴑 𐴋𐴡𐴙𐴓𐴧𐴝 𐴏𐴟𐴥𐴌𐴡𐴃𐴠 𐴀𐴞𐴥𐴃𐴝𐴌𐴝𐴃𐴧𐴟 𐴊𐴟𐴘 𐴎𐴡𐴕𐴡𐴌𐴠 𐴊𐴝𐴈𐴝𐴤𐴊𐴞𐴘𐴠, 𐴎𐴠𐴣𐴃𐴧𐴠𐴥 𐴃𐴝𐴌𐴝𐴥 𐴀𐴝𐴥𐴣𐴍𐴞-𐴀𐴝𐴥𐴣𐴍𐴞 𐴉𐴝𐴌𐴝𐴌 𐴇𐴞𐴥𐴑𐴧𐴝 𐴎𐴝𐴦𐴃𐴢 𐴀𐴝𐴐𐴧𐴞𐴥𐴓𐴢.¹³𐴃𐴝𐴌𐴝𐴥 𐴎𐴝𐴘 𐴁𐴝𐴊𐴁𐴝𐴑𐴞 𐴒𐴟𐴥𐴕𐴡𐴌𐴠 𐴈𐴡𐴥𐴁𐴡𐴌 𐴊𐴞𐴥𐴘𐴠, 𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴃𐴝𐴌𐴝𐴥𐴌𐴠 𐴘𐴡𐴥 𐴁𐴞𐴐𐴧𐴝𐴥𐴐𐴢 𐴕𐴡𐴥 𐴒𐴡𐴌𐴠𐴥.

𐴀𐴞𐴏𐴝𐴤𐴘𐴠 𐴀𐴠𐴒𐴝𐴌𐴡 𐴎𐴡𐴕 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴊𐴝𐴈𐴝𐴤𐴊𐴞𐴘𐴠

¹⁴𐴉𐴡𐴌𐴠 𐴀𐴞𐴏𐴝𐴤𐴘𐴠 𐴀𐴠𐴒𐴝𐴌𐴡 𐴎𐴡𐴕 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴊𐴝𐴈𐴝𐴤𐴊𐴞𐴘𐴠, 𐴇𐴠𐴥𐴣𐴃𐴧𐴠 𐴀𐴞𐴥𐴃𐴝𐴌𐴝 𐴈𐴝𐴥𐴕𐴝 𐴈𐴝𐴥𐴀𐴃𐴢 𐴀𐴝𐴐𐴧𐴞𐴥𐴓𐴢. 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴞𐴥𐴃𐴝𐴌𐴝𐴌 𐴕𐴝𐴁𐴞𐴐𐴧𐴝𐴥𐴐𐴢 𐴀𐴠𐴊𐴧𐴠 𐴊𐴞𐴓𐴢 𐴊𐴡𐴌𐴡𐴤𐴌 𐴎𐴡𐴌𐴞𐴘𐴝 𐴅𐴠𐴥𐴅𐴧𐴠𐴍𐴝𐴘𐴧𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝 𐴎𐴞𐴕𐴊𐴝 𐴀𐴡𐴥𐴘𐴎𐴝𐴘𐴒𐴡𐴘 𐴁𐴝𐴦𐴊𐴠 𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴌𐴠 𐴊𐴠𐴙𐴑𐴧𐴞𐴥𐴓𐴢 𐴃𐴝𐴌𐴝𐴥𐴌𐴠 𐴀𐴞𐴥𐴃𐴝𐴌𐴝 𐴁𐴞𐴐𐴧𐴝𐴥𐴐𐴢 𐴕𐴡𐴥 𐴒𐴡𐴌𐴠𐴥.

¹⁵𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴉𐴟𐴌𐴝 𐴊𐴟𐴕𐴞𐴘𐴝𐴙𐴃𐴢 𐴎𐴡𐴦, 𐴎𐴝𐴘 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌 𐴇𐴝𐴣𐴏𐴠 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴡𐴤𐴒𐴡𐴘.¹⁶𐴎𐴠𐴦𐴕𐴞𐴑𐴞 𐴀𐴞𐴔𐴝𐴕 𐴀𐴝𐴕𐴞𐴤 𐴁𐴝𐴥𐴂𐴄𐴞𐴏𐴔𐴝 𐴓𐴡𐴖𐴢, 𐴘𐴡𐴥𐴒𐴧𐴗𐴝𐴘𐴠 𐴕𐴠𐴅𐴝𐴃𐴢 𐴉𐴝𐴘𐴁𐴡; 𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴀𐴞𐴔𐴝𐴕 𐴕𐴟 𐴀𐴝𐴕𐴠𐴤, 𐴘𐴡𐴥𐴒𐴧𐴗𐴝 𐴈𐴡𐴏𐴟𐴥𐴌𐴁𐴡𐴕 𐴄𐴡𐴥𐴀𐴌𐴞𐴁𐴡.¹⁷𐴎𐴠𐴃𐴝𐴌𐴝𐴤 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤, 𐴀𐴞𐴥𐴃𐴝𐴌𐴝𐴌𐴠 𐴀𐴠 𐴑𐴠𐴌𐴝𐴔𐴡𐴃𐴢 𐴀𐴞𐴀𐴕 𐴒𐴡𐴌𐴞𐴥𐴁𐴝𐴌 𐴃𐴡𐴖𐴉𐴞𐴥𐴑 𐴊𐴞𐴦𐴘𐴝 𐴎𐴝𐴘𐴁𐴡: 𐴀𐴝𐴣𐴀𐴌 𐴕𐴝𐴔𐴠 𐴀𐴞𐴥𐴃𐴝𐴌𐴝 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴢 𐴊𐴝𐴥𐴉𐴝𐴘𐴁𐴡; 𐴒𐴝𐴁𐴞 𐴎𐴟𐴁𐴝𐴕𐴠 𐴈𐴡𐴃𐴝𐴤 𐴈𐴡𐴘𐴁𐴡𐴤;¹⁸𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴀𐴝𐴥𐴃𐴠 𐴇𐴝𐴥𐴉𐴢 𐴀𐴡𐴥𐴑𐴧𐴡𐴓𐴢 𐴃𐴟𐴓𐴞𐴤 𐴊𐴡𐴥𐴌𐴞𐴁𐴡; 𐴎𐴡𐴊𐴞 𐴀𐴞𐴥𐴃𐴝𐴌𐴝 𐴔𐴡𐴦𐴃𐴢 𐴒𐴡𐴌𐴠𐴥 𐴊𐴠 𐴑𐴠𐴏𐴧𐴟𐴥 𐴈𐴝𐴥𐴘𐴉𐴠𐴓𐴠, 𐴀𐴞𐴥𐴃𐴝𐴌𐴝𐴌 𐴇𐴡𐴕𐴡𐴤 𐴇𐴝𐴥𐴕𐴞 𐴕𐴡 𐴀𐴡𐴥𐴘𐴁𐴡; 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴁𐴞𐴘𐴝𐴌𐴝𐴙𐴔𐴧𐴝𐴌 𐴒𐴝𐴦𐴃𐴢 𐴀𐴝𐴥𐴃𐴢 𐴊𐴞𐴓𐴠𐴥, 𐴃𐴝𐴌𐴝𐴥 𐴒𐴡𐴔 𐴀𐴡𐴥𐴘𐴎𐴝𐴘𐴁𐴡𐴘.“

𐴀𐴞𐴏𐴝𐴤𐴌𐴠 𐴀𐴝𐴏𐴔𐴝𐴕𐴡𐴃𐴢 𐴃𐴟𐴓𐴞𐴤𐴉𐴠𐴓𐴝 𐴒𐴞𐴥𐴘𐴠

¹⁹𐴔𐴝𐴓𐴞𐴑 𐴀𐴞𐴏𐴝𐴤𐴃𐴧𐴟 𐴀𐴞𐴥𐴃𐴝𐴌𐴝𐴌𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴈𐴡𐴘𐴧𐴝𐴤 𐴀𐴡𐴥𐴘 𐴁𐴝𐴦𐴊𐴠, 𐴀𐴞𐴥𐴁𐴝𐴌𐴠 𐴀𐴝𐴏𐴔𐴝𐴕𐴡𐴃𐴢 𐴃𐴟𐴓𐴞𐴤𐴉𐴠𐴓𐴝 𐴒𐴞𐴥𐴘𐴠, 𐴀𐴝𐴦𐴌 𐴀𐴝𐴓𐴧𐴝𐴌 𐴊𐴠𐴕 𐴋𐴝𐴥𐴑𐴡𐴃𐴧𐴟 𐴁𐴡𐴀𐴘𐴢 𐴃𐴝𐴥𐴙𐴑𐴧𐴠.²⁰𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴕𐴠𐴦𐴓𐴞 𐴎𐴝𐴘 𐴇𐴝𐴥𐴀𐴌 𐴎𐴝𐴒𐴝𐴃𐴢 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴠𐴥. 𐴔𐴝𐴓𐴞𐴑𐴠 𐴀𐴞𐴥𐴃𐴝𐴌𐴝𐴌𐴠 𐴓𐴡𐴥𐴘 𐴈𐴝𐴔 𐴒𐴡𐴌𐴞𐴥 𐴀𐴞𐴥𐴁𐴝𐴌 𐴑𐴝𐴓𐴝𐴔 𐴏𐴡𐴥𐴘𐴧𐴞 𐴊𐴠 𐴇𐴞𐴥𐴘𐴝𐴕 𐴀𐴞𐴥𐴃𐴝𐴌𐴝𐴌𐴠 𐴊𐴞𐴦𐴘𐴝 𐴒𐴞𐴘𐴠𐴥 𐴊𐴠 𐴑𐴠𐴌𐴝𐴔𐴡𐴃𐴡𐴌 𐴊𐴟𐴖𐴝𐴌𐴝 𐴏𐴝𐴥𐴁𐴟𐴃𐴢 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.

The Word for the World International

https://app.library.bible/content/87faca8b51c22590