Read 𐴓𐴟𐴑𐴝𐴥𐴏𐴢 19

𐴓𐴟𐴑𐴝𐴥𐴏𐴢19

𐴀𐴞𐴏𐴝𐴤 𐴀𐴠𐴊𐴧𐴠 𐴎𐴝𐴑𐴠𐴥𐴘𐴡𐴏𐴢

¹𐴀𐴞𐴏𐴝𐴤 𐴅𐴠𐴌𐴞𐴑𐴡𐴥 𐴐𐴡𐴥𐴀𐴌𐴡𐴃𐴢 𐴒𐴡𐴥𐴓𐴞 𐴁𐴟𐴥𐴃𐴡𐴃𐴧𐴟 𐴎𐴝𐴦𐴃𐴢 𐴀𐴝𐴐𐴧𐴞𐴥𐴓𐴢.²𐴇𐴠𐴥𐴍𐴠 𐴎𐴝𐴑𐴠𐴥𐴘𐴡𐴏𐴢 𐴕𐴝𐴔𐴡𐴌 𐴀𐴠𐴥𐴎𐴧𐴡𐴕 𐴔𐴝𐴕𐴟𐴥𐴙𐴐𐴢 𐴀𐴝𐴐𐴧𐴞𐴥𐴓𐴢; 𐴘𐴡𐴥𐴒𐴧𐴗𐴝 𐴀𐴝𐴐𐴧𐴞𐴥𐴓𐴢 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝 𐴀𐴡𐴥𐴑𐴧𐴡𐴓𐴡𐴌 𐴏𐴡𐴥𐴊𐴧𐴝𐴌 𐴀𐴠𐴊𐴧𐴠 𐴃𐴟𐴖𐴝𐴚𐴒𐴡𐴌 𐴔𐴝𐴕𐴟𐴥𐴙𐴐𐴢.³𐴘𐴡𐴥𐴒𐴧𐴗𐴝𐴘𐴠 𐴀𐴞𐴏𐴝𐴤 𐴇𐴡𐴕 𐴊𐴠 𐴇𐴞𐴥𐴘𐴝𐴕 𐴏𐴝𐴘𐴃𐴡𐴥 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴔𐴝𐴕𐴟𐴥𐴙𐴐𐴡𐴌 𐴊𐴡𐴓𐴡𐴌 𐴎𐴡𐴌𐴞𐴘𐴝 𐴏𐴝𐴀𐴘𐴢 𐴕𐴡𐴥 𐴉𐴝𐴌𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝 𐴒𐴝𐴦𐴉𐴞𐴍𐴠𐴥 𐴁𐴝𐴍𐴞𐴥 𐴀𐴝𐴐𐴧𐴞𐴥𐴓𐴢.⁴𐴇𐴠𐴥𐴃𐴡𐴓𐴧𐴝 𐴘𐴡𐴥𐴒𐴧𐴗𐴝𐴘𐴠 𐴀𐴞𐴏𐴝𐴤𐴌𐴠 𐴏𐴝𐴘 𐴁𐴡𐴓𐴧𐴝 𐴔𐴟𐴀𐴔𐴧𐴞𐴑𐴧𐴝 𐴊𐴟𐴣𐴌𐴞 𐴎𐴝𐴘 𐴀𐴠𐴒𐴧𐴗𐴝𐴤 𐴋𐴟𐴣𐴙𐴌-𐴒𐴝𐴏𐴡𐴃𐴢 𐴀𐴟𐴙𐴄𐴧𐴠𐴥𐴒𐴡𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝 𐴇𐴠𐴥 𐴉𐴡𐴣𐴃𐴢 𐴁𐴝𐴥𐴘 𐴎𐴝𐴘𐴁𐴡.

⁵𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴇𐴠𐴥 𐴎𐴝𐴒𐴝𐴃𐴢 𐴉𐴡𐴀𐴣𐴙𐴐𐴧𐴠, 𐴀𐴞𐴥𐴁𐴝𐴘𐴠 𐴖𐴡𐴌𐴔𐴞𐴑𐴧𐴝𐴥 𐴏𐴝𐴀𐴘𐴢 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴎𐴝𐴑𐴠𐴥𐴘𐴡𐴏𐴢, 𐴃𐴡𐴌𐴝𐴃𐴡𐴌𐴞 𐴓𐴝𐴔𐴡𐴒𐴝𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴙𐴅𐴧𐴝 𐴀𐴝𐴣𐴀𐴃𐴧𐴟 𐴃𐴟𐴣𐴀𐴝𐴥𐴣𐴌 𐴒𐴡𐴥𐴌𐴡𐴃𐴢 𐴃𐴝𐴥𐴑𐴝𐴌 𐴎𐴡𐴌𐴟𐴌.“⁶𐴇𐴠𐴥𐴃𐴟𐴕𐴡𐴃𐴢 𐴘𐴡𐴥𐴒𐴧𐴗𐴝 𐴃𐴡𐴌𐴝𐴃𐴡𐴌𐴞 𐴓𐴝𐴙𐴔𐴧𐴠𐴥𐴒𐴝𐴘, 𐴀𐴝𐴦𐴌 𐴀𐴞𐴥𐴁𐴝𐴌𐴠 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴀𐴠𐴏𐴃𐴠𐴑𐴁𐴝𐴓𐴢 𐴒𐴡𐴙𐴅𐴧𐴠𐴥.

⁷𐴇𐴞𐴥𐴘𐴝𐴕 𐴊𐴠𐴑𐴞𐴥 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴠 𐴀𐴠𐴕𐴊𐴞𐴓𐴧𐴝 𐴐𐴠𐴥𐴑𐴝𐴘𐴡𐴃𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠, ”𐴀𐴞𐴥𐴁𐴝 𐴀𐴠𐴎𐴧𐴡𐴕 𐴒𐴟𐴕𐴝𐴤𐴒𐴝𐴌𐴡𐴌 𐴒𐴡𐴌𐴁𐴝 𐴀𐴡𐴥𐴘𐴃𐴡 𐴒𐴞𐴦𐴘𐴠𐴥.“

⁸𐴎𐴝𐴑𐴠𐴥𐴘𐴡𐴏𐴠 𐴃𐴞𐴥𐴘𐴝𐴘 𐴔𐴝𐴓𐴞𐴑𐴡𐴌𐴠 𐴈𐴡𐴀𐴌 𐴊𐴠, ”𐴏𐴡𐴀 𐴔𐴝𐴓𐴞𐴑, 𐴀𐴝𐴣𐴀𐴌 𐴐𐴡𐴥𐴔𐴁𐴡𐴃𐴧𐴞𐴃𐴧𐴟 𐴀𐴠𐴑𐴊𐴡𐴥𐴑 𐴀𐴝𐴀𐴛 𐴒𐴡𐴌𐴞𐴉𐴢 𐴀𐴡𐴥𐴑𐴧𐴡𐴓𐴡𐴌𐴠 𐴊𐴞𐴦𐴉𐴠𐴥𐴓𐴝𐴙𐴌, 𐴀𐴝𐴦𐴌 𐴎𐴡𐴊𐴞 𐴀𐴝𐴀𐴛 𐴇𐴡𐴕𐴡𐴤𐴑𐴞𐴘𐴡𐴃𐴧𐴟 𐴕𐴝 𐴇𐴡𐴥𐴑𐴧𐴡𐴃𐴢 𐴑𐴠𐴏𐴧𐴟𐴥 𐴓𐴡𐴘𐴧𐴞𐴥 𐴊𐴠 𐴀𐴡𐴥𐴘𐴓𐴠, 𐴀𐴞𐴥𐴃𐴝𐴌𐴠 𐴀𐴝𐴀𐴛 𐴏𐴝𐴙𐴌 𐴒𐴟𐴕 𐴖𐴝𐴦𐴉𐴠𐴏𐴢 𐴉𐴞𐴥𐴌𐴝𐴘𐴊𐴞𐴘𐴟𐴔.“

⁹𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴙𐴅𐴧𐴝 𐴀𐴠 𐴒𐴡𐴥𐴌𐴡𐴃𐴢 𐴕𐴠𐴅𐴝𐴃𐴢 𐴀𐴝𐴙𐴐𐴧𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴒𐴧𐴗𐴝𐴥 𐴘𐴡𐴥 𐴃𐴡 𐴀𐴞𐴁𐴌𐴝𐴇𐴞𐴥𐴔𐴡𐴌 𐴉𐴟𐴖𐴝.¹⁰𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴀𐴝𐴙𐴐𐴧𐴠𐴥 𐴊𐴠 𐴃𐴡 𐴀𐴝𐴥𐴣𐴎𐴞𐴒𐴞𐴘𐴡𐴘 𐴊𐴠 𐴀𐴞𐴥𐴃𐴝𐴌𐴝𐴌𐴠 𐴃𐴟𐴖𐴝𐴘 𐴁𐴡𐴓𐴧𐴝 𐴀𐴠𐴊𐴧𐴠 𐴕𐴠𐴅𐴝𐴃𐴢 𐴊𐴞 𐴁𐴡𐴓𐴧𐴝.“

𐴊𐴡𐴐𐴢 𐴐𐴝𐴥𐴕 𐴐𐴟𐴥𐴕𐴝𐴌 𐴉𐴡𐴘𐴐𐴝𐴤𐴌 𐴔𐴠𐴀𐴏𐴝𐴓𐴢

¹¹𐴀𐴞𐴥𐴃𐴝𐴌𐴝 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴉𐴟𐴥𐴕𐴠𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠𐴑𐴧𐴝𐴥𐴕 𐴔𐴠𐴀𐴏𐴝𐴓𐴢 𐴈𐴡𐴘𐴧𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴋𐴝𐴥𐴑𐴠 𐴀𐴝𐴐𐴧𐴞𐴥𐴓𐴢 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴄𐴝𐴥𐴀𐴙𐴅𐴧𐴞𐴓𐴢 𐴊𐴠 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴁𐴞𐴐𐴞𐴤 𐴇𐴝𐴥𐴌𐴝 𐴎𐴝𐴇𐴠𐴥𐴌 𐴀𐴡𐴥𐴘𐴁𐴡.¹²𐴀𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠, ”𐴀𐴠𐴎𐴧𐴡𐴕 𐴁𐴡𐴥𐴊𐴧𐴡𐴌𐴡 𐴔𐴝𐴕𐴟𐴥𐴙𐴐𐴢 𐴀𐴠𐴑𐴧𐴝𐴥𐴕 𐴊𐴟𐴌𐴡𐴥𐴌 𐴔𐴟𐴓𐴧𐴟𐴑𐴡𐴃𐴢 𐴒𐴞𐴦𐴘𐴠𐴥, 𐴁𐴝𐴀𐴣𐴐𐴧𐴝 𐴁𐴡𐴕𐴞 𐴖𐴝𐴦𐴉𐴠𐴏𐴢 𐴀𐴝𐴘 𐴁𐴡𐴓𐴧𐴝.¹³𐴎𐴝𐴘𐴁𐴝𐴌 𐴀𐴝𐴒𐴠 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌 𐴒𐴡𐴗𐴀𐴌 𐴀𐴡𐴥𐴑𐴧𐴡𐴓𐴡𐴃𐴧𐴟 𐴊𐴡𐴐𐴢 𐴎𐴡𐴕𐴡𐴌𐴠 𐴔𐴝𐴃𐴝𐴘 𐴀𐴞𐴥𐴃𐴝𐴌𐴝𐴌𐴠 𐴊𐴡𐴐𐴢 𐴐𐴝𐴥𐴕 𐴐𐴟𐴥𐴕𐴝𐴌 𐴉𐴡𐴘𐴐𐴝𐴤 𐴊𐴞𐴦𐴘𐴠𐴥, 𐴊𐴞𐴦 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ’𐴀𐴝𐴀𐴛 𐴕𐴟𐴥 𐴀𐴝𐴘𐴧𐴞𐴤 𐴉𐴡𐴙𐴅𐴧𐴡𐴕𐴃𐴡 𐴀𐴞𐴀𐴕 𐴓𐴡𐴥𐴘 𐴐𐴡𐴥𐴊𐴡𐴌𐴞 𐴒𐴡𐴌𐴡𐴤𐴒𐴡𐴘.‘

¹⁴”𐴓𐴠𐴑𐴞𐴕 𐴘𐴡𐴥𐴒𐴧𐴗𐴝𐴌𐴠 𐴕𐴞𐴎𐴡𐴌 𐴊𐴠𐴐𐴡𐴥𐴙𐴃𐴧𐴝 𐴀𐴡𐴥𐴑𐴧𐴡𐴓𐴠 𐴕𐴝𐴉𐴡𐴥𐴌𐴡𐴃𐴢 𐴒𐴡𐴙𐴃𐴧𐴡𐴥, 𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴌 𐴉𐴞𐴏𐴠𐴤 𐴕𐴡𐴔𐴝𐴙𐴕𐴊𐴝 𐴊𐴞𐴉𐴠𐴍𐴝𐴥𐴘 𐴈𐴡𐴘𐴧𐴠𐴥 𐴊𐴠, ’𐴀𐴝𐴣𐴀𐴌𐴝 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴀𐴝𐴣𐴀𐴌𐴝𐴌 𐴖𐴡𐴌𐴠 𐴇𐴡𐴥𐴑𐴟𐴔𐴡𐴃𐴢 𐴒𐴡𐴌𐴠𐴥 𐴊𐴠 𐴇𐴞𐴥𐴘𐴝𐴕 𐴕𐴡 𐴏𐴝𐴀𐴘𐴢.‘

¹⁵”𐴎𐴠𐴣𐴃𐴧𐴠𐴥 𐴘𐴡𐴥𐴒𐴧𐴗𐴝 𐴁𐴝𐴀𐴣𐴐𐴧𐴝 𐴁𐴡𐴕𐴞 𐴖𐴝𐴦𐴉𐴠𐴏𐴢 𐴀𐴝𐴙𐴐𐴧𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌 𐴄𐴞𐴛𐴝 𐴊𐴞𐴀𐴓𐴢 𐴊𐴠 𐴒𐴡𐴗𐴀𐴌 𐴒𐴟𐴥𐴕𐴡𐴌𐴠 𐴔𐴝𐴃𐴝 𐴁𐴝𐴘𐴧𐴠𐴥, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴐𐴡𐴥𐴊𐴡𐴌𐴞 𐴒𐴡𐴌𐴞𐴥 𐴇𐴡𐴊𐴟𐴥𐴕 𐴈𐴝𐴔𐴝𐴘𐴧𐴠𐴥 𐴊𐴠 𐴎𐴝𐴕𐴞 𐴉𐴝𐴌𐴠.

¹⁶”𐴐𐴟𐴥𐴌𐴟𐴌 𐴀𐴞𐴥𐴃𐴠 𐴀𐴝𐴀𐴘𐴢 𐴈𐴡𐴀𐴌 𐴊𐴠, ’𐴔𐴝𐴓𐴞𐴑, 𐴃𐴟𐴣𐴀𐴝𐴥𐴣𐴌 𐴉𐴡𐴘𐴐𐴝𐴤 𐴓𐴡𐴥𐴘 𐴀𐴝𐴀𐴛 𐴀𐴝𐴌𐴡𐴤 𐴊𐴡𐴐𐴢 𐴐𐴝𐴥𐴕 𐴉𐴡𐴘𐴐𐴝𐴤 𐴁𐴝𐴌𐴝𐴤𐴘𐴧𐴞.‘

¹⁷”𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴠 𐴈𐴡𐴀𐴌 𐴊𐴠, ’𐴐𐴝𐴁𐴝𐴥𐴐𐴢, 𐴒𐴡𐴔 𐴒𐴡𐴗𐴀𐴌! 𐴃𐴟𐴘 𐴎𐴠𐴃𐴧𐴡𐴥𐴃𐴢 𐴁𐴞𐴐𐴞𐴤 𐴈𐴡𐴔𐴡𐴃𐴢 𐴀𐴞𐴔𐴝𐴕𐴊𐴝𐴌𐴞 𐴃𐴝𐴥𐴙𐴑𐴧𐴡𐴏𐴢, 𐴘𐴝𐴓𐴝 𐴃𐴟𐴘 𐴊𐴡𐴐𐴢 𐴐𐴝𐴥𐴕 𐴐𐴡𐴥𐴀𐴌𐴡𐴌 𐴖𐴡𐴌𐴠 𐴇𐴡𐴥𐴑𐴟𐴔𐴡𐴃𐴢 𐴒𐴡𐴥𐴌.‘

¹⁸”𐴊𐴟𐴏𐴝𐴥𐴌𐴝 𐴖𐴝𐴘𐴠 𐴀𐴝𐴀𐴘𐴢 𐴈𐴡𐴀𐴌 𐴊𐴠, ’𐴔𐴝𐴓𐴞𐴑, 𐴃𐴟𐴣𐴀𐴝𐴥𐴣𐴌 𐴉𐴡𐴘𐴐𐴝𐴤 𐴓𐴡𐴥𐴘 𐴀𐴝𐴀𐴛 𐴀𐴝𐴌𐴡𐴤 𐴉𐴝𐴣𐴏𐴢 𐴏𐴝𐴥𐴕 𐴉𐴡𐴘𐴐𐴝𐴤 𐴁𐴝𐴌𐴝𐴤𐴘𐴧𐴞.‘

¹⁹”𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴠 𐴘𐴡𐴥 𐴈𐴡𐴀𐴌 𐴊𐴠, ’𐴃𐴟𐴘 𐴘𐴡𐴥 𐴉𐴝𐴣𐴏𐴢 𐴏𐴝𐴥𐴕 𐴐𐴡𐴥𐴀𐴌𐴡𐴌 𐴖𐴡𐴌𐴠 𐴇𐴡𐴥𐴑𐴟𐴔𐴡𐴃𐴢 𐴒𐴡𐴥𐴌.‘

²⁰”𐴁𐴝𐴦𐴊𐴠 𐴀𐴝𐴌 𐴀𐴠𐴎𐴧𐴡𐴕𐴠 𐴀𐴝𐴀𐴘𐴢 𐴈𐴡𐴀𐴌 𐴊𐴠, ’𐴔𐴝𐴓𐴞𐴑, 𐴀𐴡𐴥𐴃𐴞𐴘𐴝 𐴃𐴟𐴣𐴀𐴝𐴥𐴣𐴌 𐴉𐴡𐴘𐴐𐴝𐴤, 𐴀𐴝𐴀𐴛 𐴘𐴝𐴀𐴕𐴡𐴌𐴠 𐴀𐴠𐴑𐴧𐴝𐴥𐴕 𐴉𐴝𐴑𐴞𐴥𐴃𐴢 𐴁𐴠𐴌𐴝𐴤𐴘 𐴓𐴟𐴑𐴝𐴘 𐴌𐴝𐴙𐴑𐴧𐴞𐴥𐴓𐴝𐴔;²¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴋𐴡𐴦𐴌𐴝𐴘𐴧𐴞𐴥, 𐴃𐴟𐴀𐴛 𐴀𐴠𐴥𐴎𐴧𐴡𐴕 𐴈𐴡𐴌𐴝 𐴔𐴝𐴕𐴟𐴥𐴙𐴐𐴢; 𐴃𐴟𐴀𐴛 𐴃𐴡 𐴕𐴞𐴎𐴠 𐴎𐴞𐴀𐴕 𐴕𐴡𐴥 𐴌𐴝𐴑𐴡𐴥 𐴇𐴞𐴥𐴀𐴕 𐴓𐴡𐴘𐴉𐴠𐴥𐴓𐴡, 𐴀𐴝𐴦𐴌 𐴎𐴞𐴀𐴕 𐴕𐴡𐴥 𐴓𐴝𐴒𐴡 𐴇𐴞𐴥𐴀𐴕 𐴈𐴝𐴍𐴡.‘

²²”𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴠 𐴈𐴡𐴀𐴌 𐴊𐴠, ’𐴀𐴡𐴥 𐴁𐴠𐴇𐴝𐴌 𐴒𐴡𐴗𐴀𐴌! 𐴃𐴡𐴌 𐴔𐴟𐴑𐴡𐴌 𐴈𐴡𐴃𐴝𐴤 𐴓𐴡𐴘 𐴀𐴝𐴀𐴛 𐴃𐴡𐴌 𐴁𐴞𐴏𐴝𐴌 𐴒𐴡𐴙𐴅𐴧𐴟𐴥𐴔. 𐴃𐴟𐴘 𐴊𐴠 𐴎𐴝𐴙𐴕𐴃𐴞 𐴀𐴝𐴀𐴛 𐴀𐴠𐴥𐴎𐴧𐴡𐴕 𐴈𐴡𐴌𐴝 𐴔𐴝𐴕𐴟𐴥𐴙𐴐𐴢 𐴊𐴠, 𐴀𐴝𐴀𐴛 𐴎𐴞𐴀𐴕 𐴕𐴡𐴥 𐴌𐴝𐴑𐴞𐴥 𐴇𐴞𐴥𐴀𐴕 𐴓𐴡𐴘𐴉𐴠𐴥𐴓𐴝𐴘, 𐴀𐴝𐴦𐴌 𐴎𐴞𐴀𐴕 𐴕𐴡𐴥 𐴓𐴝𐴒𐴝𐴘 𐴇𐴞𐴥𐴀𐴕 𐴈𐴝𐴍𐴞.²³𐴃𐴡𐴥𐴘 𐴃𐴟𐴘 𐴀𐴝𐴣𐴀𐴌 𐴄𐴞𐴛𐴝 𐴒𐴝𐴥𐴕 𐴁𐴠𐴚𐴒𐴡𐴥𐴃𐴢 𐴀𐴡𐴥𐴘𐴓𐴠 𐴑𐴞𐴘𐴝𐴥 𐴕𐴡𐴥 𐴌𐴝𐴑𐴡𐴥𐴏؟ 𐴇𐴠𐴥𐴕𐴊𐴞𐴓𐴧𐴝 𐴒𐴡𐴙𐴃𐴧𐴞𐴥 𐴁𐴡𐴥𐴓𐴞 𐴀𐴝𐴀𐴛 𐴀𐴝𐴘𐴓𐴠𐴤 𐴇𐴞𐴥𐴘𐴝𐴕𐴡𐴌 𐴉𐴟𐴥𐴖𐴝𐴣𐴃𐴞 𐴑𐴠𐴏𐴧𐴟𐴥 𐴐𐴟𐴥𐴄𐴢 𐴉𐴝𐴘𐴃𐴝𐴔.‘

²⁴”𐴃𐴝𐴌𐴉𐴡𐴌𐴠 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴣𐴘𐴡𐴃𐴢 𐴇𐴝𐴥𐴎𐴞𐴌 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ’𐴀𐴞𐴃𐴝𐴃𐴧𐴟 𐴉𐴡𐴘𐴐𐴝𐴤 𐴒𐴝𐴥𐴕 𐴓𐴡𐴘𐴉𐴠𐴥𐴓𐴝𐴘, 𐴎𐴝𐴃𐴧𐴟 𐴊𐴡𐴐𐴢 𐴐𐴝𐴥𐴕 𐴉𐴡𐴘𐴐𐴝𐴤 𐴀𐴝𐴏𐴠𐴤 𐴀𐴞𐴥𐴃𐴝𐴌𐴠 𐴊𐴞𐴦𐴉𐴠𐴥𐴓𐴡.‘

²⁵”𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ’𐴔𐴝𐴓𐴞𐴑, 𐴀𐴞𐴥𐴃𐴝𐴃𐴧𐴟 𐴊𐴠 𐴀𐴝𐴒𐴠 𐴓𐴡𐴥𐴃𐴞 𐴊𐴡𐴐𐴢 𐴐𐴝𐴥𐴕 𐴉𐴡𐴘𐴐𐴝𐴤 𐴀𐴝𐴏𐴠𐴤.‘

²⁶”’𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴎𐴝𐴃𐴧𐴟 𐴀𐴝𐴏𐴠𐴤, 𐴘𐴡𐴥𐴒𐴧𐴗𐴝𐴌𐴠 𐴀𐴝𐴌𐴡𐴤 𐴊𐴞𐴦𐴘𐴝 𐴎𐴝𐴘𐴁𐴡; 𐴔𐴡𐴕𐴃𐴡𐴌 𐴎𐴝𐴃𐴧𐴟 𐴕𐴝𐴥𐴘, 𐴘𐴡𐴥𐴒𐴧𐴗𐴝𐴃𐴧𐴟 𐴀𐴝𐴏𐴠𐴤 𐴊𐴠 𐴇𐴞𐴥𐴀𐴕 𐴀𐴟𐴥𐴊𐴧𐴗𐴝 𐴓𐴡𐴘𐴉𐴠𐴥𐴓𐴝 𐴎𐴝𐴘𐴁𐴡.²⁷𐴔𐴡𐴕𐴃𐴡𐴌 𐴀𐴝𐴣𐴀𐴌 𐴊𐴟𐴐𐴧𐴡𐴕 𐴎𐴠𐴃𐴝𐴌𐴝𐴤 𐴕𐴞𐴑𐴞 𐴀𐴝𐴀𐴛 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴇𐴡𐴥𐴑𐴟𐴔𐴡𐴃𐴢 𐴒𐴡𐴌𐴞𐴥 𐴊𐴠 𐴕𐴡 𐴏𐴝𐴘𐴃𐴡𐴥, 𐴀𐴞𐴥𐴃𐴝𐴌𐴝𐴌𐴠 𐴀𐴞𐴣𐴘𐴡𐴥𐴃𐴢 𐴀𐴝𐴕𐴞𐴤 𐴀𐴝𐴣𐴀𐴌 𐴐𐴝𐴥𐴙𐴑𐴧𐴝𐴃𐴢 𐴎𐴝𐴕𐴠 𐴔𐴝𐴌𐴞𐴉𐴠𐴥𐴓𐴡.‘ “

𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴞𐴏𐴝𐴤 𐴁𐴝𐴀𐴣𐴐𐴧𐴝𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴒𐴡𐴥𐴙𐴓𐴧𐴠

²⁸𐴀𐴞𐴏𐴝𐴤𐴘𐴠 𐴇𐴞𐴥𐴀𐴕 𐴈𐴡𐴀𐴘𐴢 𐴁𐴝𐴦𐴊𐴠, 𐴀𐴞𐴥𐴃𐴝𐴌𐴝𐴌 𐴀𐴝𐴒𐴠-𐴀𐴝𐴒𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴀𐴟𐴎𐴟 𐴎𐴝𐴦𐴃𐴢 𐴊𐴡𐴙𐴅𐴧𐴠.²⁹𐴎𐴠𐴣𐴃𐴧𐴠𐴥 𐴀𐴞𐴥𐴁𐴝 𐴎𐴝𐴘𐴃𐴟𐴕 𐴉𐴝𐴀𐴌𐴡𐴃𐴢 𐴀𐴝𐴏𐴠𐴤 𐴊𐴠 𐴁𐴠𐴃𐴉𐴠𐴥𐴒𐴞 𐴀𐴠𐴊𐴧𐴠 𐴁𐴠𐴃𐴝𐴥𐴕𐴞𐴘𐴝 𐴉𐴝𐴌𐴝𐴌 𐴇𐴝𐴣𐴏𐴝𐴥𐴇𐴝𐴣𐴏𐴞 𐴉𐴡𐴀𐴣𐴙𐴐𐴧𐴠, 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴊𐴟𐴘 𐴎𐴡𐴕 𐴐𐴝𐴥𐴌𐴞𐴃𐴡𐴌𐴠 𐴊𐴞𐴉𐴠𐴍𐴝𐴥𐴘𐴧𐴠,³⁰𐴀𐴠𐴕𐴊𐴞𐴓𐴧𐴝 𐴈𐴡𐴀𐴘𐴢, ”𐴃𐴟𐴣𐴀𐴝𐴥𐴌𐴝 𐴔𐴟𐴀𐴔𐴡𐴌 𐴉𐴝𐴌𐴝 𐴒𐴝𐴥𐴕𐴡𐴃𐴢 𐴎𐴡𐴦, 𐴇𐴠𐴥𐴍𐴠 𐴒𐴡𐴥𐴓𐴞 𐴔𐴡𐴃𐴧𐴡𐴌 𐴀𐴠𐴒𐴧𐴗𐴝𐴤 𐴒𐴝𐴊𐴝𐴤𐴌 𐴏𐴡𐴥𐴀 𐴁𐴝𐴙𐴕𐴊𐴝𐴤 𐴓𐴡𐴦𐴃𐴢 𐴉𐴝𐴘𐴁𐴝, 𐴎𐴞𐴁𐴝𐴤𐴌 𐴖𐴡𐴌𐴠 𐴀𐴝𐴙𐴅𐴧𐴡𐴤 𐴇𐴡𐴕𐴡𐴤𐴑𐴞𐴘𐴠 𐴕𐴡𐴥 𐴏𐴡𐴌𐴠𐴤. 𐴘𐴞𐴥𐴁𐴝𐴌𐴠 𐴑𐴟𐴥𐴓𐴞 𐴀𐴠𐴍𐴠𐴥 𐴀𐴝𐴕𐴡𐴤𐴒𐴡𐴘.³¹𐴎𐴡𐴊𐴞 𐴇𐴡𐴕𐴡𐴤𐴑𐴞𐴘𐴠 𐴃𐴟𐴣𐴀𐴝𐴥𐴌𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥, ’𐴃𐴟𐴣𐴀𐴝𐴥𐴌𐴝 𐴘𐴞𐴥𐴁𐴝𐴌𐴠 𐴑𐴞𐴘𐴡𐴥𐴓𐴧𐴝 𐴑𐴟𐴥𐴓𐴡𐴌؟‘ 𐴘𐴡𐴥𐴒𐴧𐴗𐴝𐴌𐴠 𐴈𐴡𐴘𐴁𐴝𐴤 𐴊𐴠, ’𐴔𐴝𐴓𐴞𐴑𐴡𐴃𐴧𐴟 𐴘𐴞𐴁𐴝𐴤𐴌𐴠 𐴓𐴝𐴒𐴠𐴌.‘ “

³²𐴃𐴡𐴥𐴘 𐴎𐴠𐴃𐴝𐴌𐴝𐴤𐴌𐴠 𐴊𐴞𐴉𐴠𐴍𐴝𐴥𐴘𐴧𐴠 𐴀𐴞𐴥𐴃𐴝𐴌𐴝 𐴌𐴡𐴖𐴝𐴕𐴝 𐴓𐴡𐴘𐴧𐴠𐴥, 𐴀𐴝𐴦𐴌 𐴀𐴞𐴥𐴁𐴝𐴘𐴠 𐴎𐴠𐴀𐴕 𐴈𐴡𐴘𐴧𐴠𐴥 𐴇𐴠𐴥𐴀𐴕 𐴓𐴡𐴦𐴃𐴢 𐴉𐴝𐴘𐴧𐴠𐴥.³³𐴀𐴞𐴥𐴃𐴝𐴌𐴝 𐴒𐴝𐴊𐴝𐴤𐴌 𐴏𐴡𐴥𐴀 𐴖𐴝𐴌𐴠 𐴑𐴟𐴥𐴓𐴠𐴌 𐴌𐴝𐴥𐴌, 𐴘𐴞𐴥𐴁𐴝𐴌 𐴒𐴞𐴌𐴡𐴥𐴏𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴒𐴝𐴊𐴝𐴤𐴌 𐴏𐴡𐴥𐴀 𐴖𐴝𐴌𐴠 𐴑𐴞𐴘𐴡𐴥𐴓𐴧𐴝 𐴑𐴟𐴥𐴓𐴡𐴌؟“

³⁴𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴔𐴝𐴓𐴞𐴑𐴡𐴃𐴧𐴟 𐴘𐴞𐴁𐴝𐴤𐴌𐴠 𐴓𐴝𐴒𐴠𐴌.“

³⁵𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴘𐴞𐴥𐴁𐴝𐴌𐴠 𐴀𐴞𐴏𐴝𐴤𐴌 𐴇𐴠𐴥𐴍𐴠 𐴀𐴝𐴙𐴕𐴧𐴠𐴤, 𐴀𐴝𐴦𐴌 𐴘𐴞𐴥𐴁𐴝𐴌 𐴖𐴡𐴌𐴠 𐴀𐴞𐴥𐴃𐴝𐴌𐴝𐴌 𐴇𐴡𐴦𐴌 𐴀𐴡𐴥𐴑𐴧𐴡𐴓𐴢 𐴁𐴞𐴐𐴝𐴥𐴘𐴊𐴞 𐴀𐴞𐴏𐴝𐴤𐴌𐴠 𐴖𐴡𐴌𐴠 𐴁𐴟𐴀𐴝𐴥𐴒𐴝𐴌𐴝𐴘𐴧𐴠.³⁶𐴀𐴞𐴥𐴁𐴝 𐴎𐴝𐴦𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴕𐴞𐴎𐴡𐴌 𐴇𐴡𐴦𐴌 𐴀𐴡𐴥𐴑𐴧𐴡𐴓𐴢 𐴌𐴝𐴏𐴃𐴝𐴃𐴢 𐴁𐴞𐴐𐴝𐴥𐴘𐴊𐴞𐴘𐴝𐴃𐴢 𐴀𐴝𐴐𐴧𐴞𐴥𐴓𐴢.

³⁷𐴎𐴝𐴘𐴃𐴠-𐴎𐴝𐴘𐴃𐴠 𐴀𐴞𐴥𐴁𐴝 𐴎𐴝𐴘𐴃𐴟𐴕 𐴉𐴝𐴀𐴌𐴡𐴌 𐴓𐴝𐴔𐴡𐴕𐴞𐴌 𐴇𐴝𐴣𐴏𐴝𐴥𐴇𐴝𐴣𐴏𐴞 𐴉𐴡𐴀𐴣𐴙𐴐𐴧𐴠 𐴌𐴝𐴥𐴌, 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌 𐴊𐴡𐴓𐴢 𐴄𐴞𐴥𐴘𐴝𐴘𐴠 𐴀𐴞𐴥𐴃𐴝𐴌𐴝 𐴎𐴠 𐴑𐴠𐴌𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢 𐴊𐴠𐴙𐴑𐴧𐴞𐴥𐴓𐴢 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴓𐴧𐴝 𐴒𐴟𐴎𐴡𐴌𐴞-𐴒𐴟𐴎𐴡𐴌𐴞 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠,³⁸𐴈𐴡𐴀𐴌 𐴊𐴠, ”𐴔𐴟𐴁𐴝𐴌𐴠𐴑 𐴁𐴝𐴀𐴣𐴐𐴧𐴝 𐴀𐴟𐴁𐴝𐴤 𐴎𐴞𐴁𐴝𐴤 𐴔𐴝𐴁𐴟𐴊𐴡𐴌 𐴕𐴝𐴔𐴠 𐴀𐴝𐴘𐴧𐴠𐴤𐴌.𐴀𐴠𐴁𐴧𐴠 𐴖𐴡𐴌𐴠 𐴀𐴝𐴏𐴔𐴝𐴕𐴡𐴃𐴢 𐴐𐴝𐴥𐴕𐴃𐴞 𐴀𐴡𐴥𐴗𐴑, 𐴀𐴝𐴦𐴌 𐴇𐴠𐴥𐴍𐴠 𐴔𐴡𐴈𐴞𐴥𐴔𐴝 𐴀𐴡𐴥𐴑!“

³⁹𐴊𐴡𐴓𐴡𐴃𐴧𐴟 𐴇𐴡𐴦𐴎𐴧𐴡𐴕 𐴉𐴠𐴥𐴌𐴡𐴐𐴞𐴘𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴟𐴏𐴃𐴝𐴃𐴢, 𐴃𐴟𐴣𐴀𐴝𐴥𐴣𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴥𐴒𐴧𐴗𐴝 𐴁𐴡𐴥𐴄𐴁𐴡𐴍𐴡.“

⁴⁰𐴀𐴞𐴥𐴁𐴝𐴘𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴎𐴡𐴊𐴞 𐴀𐴞𐴃𐴝𐴌𐴝𐴤 𐴕𐴞𐴎𐴝𐴥𐴔 𐴀𐴡𐴥𐴘 𐴃𐴝𐴥𐴑𐴠, 𐴉𐴝𐴃𐴧𐴡𐴥𐴌 𐴀𐴡𐴥𐴑𐴧𐴡𐴓𐴢 𐴒𐴟𐴎𐴡𐴌𐴞 𐴀𐴟𐴍𐴞𐴤𐴁𐴡!“

⁴¹𐴎𐴠𐴣𐴃𐴧𐴠𐴥 𐴀𐴞𐴥𐴁𐴝 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴇𐴝𐴣𐴏𐴝𐴥𐴇𐴝𐴣𐴏𐴞 𐴉𐴡𐴀𐴣𐴙𐴐𐴧𐴠, 𐴐𐴡𐴥𐴀𐴌 𐴒𐴝𐴥𐴕 𐴊𐴠𐴑𐴞𐴥 𐴇𐴞𐴥𐴘𐴝𐴕𐴡𐴓𐴧𐴝 𐴇𐴝𐴙𐴕𐴊𐴠𐴤,⁴²𐴈𐴡𐴀𐴌 𐴊𐴠, ”𐴀𐴝𐴤, 𐴃𐴟𐴘 𐴘𐴡𐴥 𐴀𐴝𐴙𐴅𐴧𐴝 𐴎𐴡𐴊𐴞 𐴐𐴝𐴥𐴕𐴃𐴞 𐴑𐴞𐴘𐴠𐴥 𐴀𐴝𐴕𐴠𐴤 𐴊𐴠 𐴎𐴝𐴙𐴕𐴃𐴞𐴘𐴝! 𐴔𐴡𐴕𐴃𐴡𐴌 𐴘𐴝𐴓𐴝 𐴊𐴠 𐴇𐴞𐴥𐴘𐴝𐴕 𐴃𐴡𐴌 𐴏𐴟𐴑𐴡𐴌 𐴀𐴝𐴌𐴒𐴗𐴝𐴓𐴢 𐴀𐴡𐴥𐴘𐴒𐴞𐴘𐴡𐴘.⁴³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴡𐴌 𐴖𐴡𐴌𐴠 𐴀𐴠𐴀𐴕 𐴊𐴞𐴕 𐴀𐴝𐴘𐴁𐴡𐴤, 𐴃𐴡𐴌 𐴊𐴟𐴐𐴧𐴡𐴕 𐴀𐴡𐴥𐴑𐴧𐴡𐴓𐴠 𐴃𐴡𐴌 𐴀𐴟𐴓𐴋𐴝 𐴋𐴠𐴁𐴝𐴓𐴢 𐴃𐴟𐴓𐴞𐴤 𐴃𐴡𐴌𐴠𐴥 𐴒𐴞𐴥𐴌𐴞𐴊𐴡𐴌𐴞𐴁𐴡, 𐴀𐴝𐴦𐴌 𐴃𐴡𐴌𐴠𐴥 𐴇𐴝𐴥𐴀𐴌 𐴔𐴞𐴑𐴧𐴝𐴥𐴃𐴧𐴟 𐴒𐴠𐴥𐴌𐴒𐴗𐴝𐴓𐴢 𐴒𐴡𐴌𐴞𐴥𐴁𐴡,⁴⁴𐴃𐴡𐴌𐴠𐴥 𐴀𐴠𐴊𐴧𐴠 𐴃𐴡𐴌 𐴁𐴟𐴥𐴃𐴡𐴌𐴡𐴌 𐴉𐴟𐴀𐴝𐴙𐴕 𐴊𐴡𐴌𐴠 𐴔𐴠𐴍𐴞𐴃𐴢 𐴀𐴝𐴣𐴏𐴝𐴥𐴌𐴞𐴁𐴡, 𐴀𐴝𐴦𐴌 𐴃𐴡𐴌 𐴁𐴟𐴥𐴃𐴡𐴌𐴠 𐴀𐴠𐴒𐴧𐴗𐴝𐴤 𐴉𐴝𐴃𐴧𐴡𐴥𐴌𐴡𐴌 𐴖𐴡𐴌𐴠 𐴀𐴝𐴌 𐴀𐴠𐴒𐴧𐴗𐴝𐴤 𐴉𐴝𐴃𐴧𐴡𐴥𐴌 𐴕𐴡 𐴌𐴝𐴑𐴞𐴥𐴁𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴘 𐴃𐴡 𐴀𐴝𐴓𐴧𐴝𐴘𐴠 𐴃𐴡𐴌𐴠𐴥 𐴁𐴝𐴏𐴝𐴘𐴃𐴡𐴥 𐴀𐴝𐴙𐴐𐴧𐴠𐴥 𐴊𐴠 𐴀𐴡𐴑𐴃𐴡𐴥 𐴕𐴡𐴥 𐴏𐴞𐴕𐴡𐴥𐴏𐴢.“

𐴀𐴞𐴏𐴝𐴤𐴘𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴢 𐴂𐴝𐴑-𐴏𐴝𐴥𐴉𐴢 𐴒𐴡𐴙𐴅𐴧𐴠𐴥

⁴⁵𐴉𐴡𐴌𐴠 𐴀𐴞𐴏𐴝𐴤 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴀𐴟𐴍𐴝𐴥𐴕𐴡𐴃𐴢 𐴒𐴡𐴥𐴓𐴞, 𐴎𐴠𐴃𐴝𐴌𐴝𐴤 𐴇𐴠𐴥𐴍𐴠 𐴁𐴠𐴏𐴝 𐴑𐴞𐴕𐴝 𐴒𐴡𐴌𐴠𐴥𐴌 𐴀𐴞𐴥𐴃𐴝𐴌𐴝𐴌𐴠 𐴓𐴡𐴌𐴝𐴘𐴊𐴞𐴘𐴝𐴃𐴢 𐴊𐴡𐴙𐴅𐴧𐴠;⁴⁶𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ’𐴀𐴝𐴣𐴀𐴌 𐴒𐴡𐴥𐴌 𐴔𐴟𐴕𐴝𐴎𐴝𐴃𐴡𐴌 𐴒𐴡𐴥𐴌 𐴀𐴡𐴥𐴘𐴁𐴡,‘ 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴃𐴡 𐴇𐴞𐴥𐴘𐴝𐴕𐴡𐴌𐴠 𐴋𐴝𐴈𐴝𐴣𐴙𐴄𐴡𐴌 𐴀𐴝𐴋𐴧𐴝-𐴈𐴝𐴥𐴕𐴝 𐴁𐴝𐴕𐴝𐴘𐴉𐴠𐴥𐴓𐴝𐴘𐴧𐴡.“

⁴⁷𐴀𐴞𐴥𐴁𐴝𐴘𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴉𐴡𐴃𐴧𐴞𐴥 𐴊𐴞𐴕 𐴃𐴝𐴦𐴓𐴞𐴔 𐴊𐴞𐴃𐴡. 𐴔𐴡𐴕𐴃𐴡𐴌 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠, 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴠, 𐴀𐴠𐴊𐴧𐴠 𐴔𐴝𐴕𐴟𐴥𐴙𐴐𐴡𐴌 𐴋𐴝𐴘𐴋𐴡𐴣𐴀𐴌 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴁𐴝𐴌 𐴑𐴟𐴐𐴞𐴥𐴐𐴡𐴃𐴢 𐴀𐴝𐴐𐴧𐴞𐴥𐴓𐴢.⁴⁸𐴓𐴠𐴑𐴞𐴕 𐴇𐴞𐴥𐴘𐴝𐴕 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴞𐴥𐴃𐴝𐴌𐴝 𐴇𐴡𐴕𐴡𐴤 𐴔𐴡𐴑𐴝 𐴕𐴡𐴥 𐴉𐴝𐴦, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴝𐴔𐴝𐴥𐴔 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌 𐴈𐴡𐴃𐴝𐴤 𐴀𐴡𐴀𐴣𐴓𐴒𐴡𐴌𐴞 𐴉𐴟𐴥𐴕𐴞𐴃𐴡.

The Word for the World International

https://app.library.bible/content/87faca8b51c22590