Read 𐴇𐴞𐴁𐴌𐴝𐴕𐴞𐴀𐴡𐴥𐴓𐴢 5

𐴇𐴞𐴁𐴌𐴝𐴕𐴞𐴀𐴡𐴥𐴓𐴢5

¹𐴔𐴝𐴕𐴟𐴥𐴙𐴐𐴡𐴃𐴧𐴟 𐴁𐴝𐴏𐴞𐴥𐴓𐴡𐴖𐴝 𐴎𐴝 𐴊𐴠 𐴉𐴡𐴃𐴧𐴞𐴥 𐴁𐴡𐴌𐴡 𐴀𐴞𐴔𐴝𐴔𐴡𐴌𐴠 𐴃𐴡 𐴔𐴝𐴕𐴟𐴥𐴙𐴐𐴡𐴓𐴧𐴝 𐴀𐴝𐴓𐴧𐴝𐴌 𐴇𐴠𐴥𐴊𐴔𐴡𐴃𐴢 𐴒𐴡𐴙𐴃𐴧𐴡𐴥 𐴀𐴠𐴥𐴕𐴝 𐴃𐴞𐴥𐴘𐴝𐴒𐴝𐴌𐴝 𐴎𐴝, 𐴒𐴟𐴕𐴝𐴤 𐴓𐴧𐴝 𐴕𐴡𐴎𐴡𐴌𐴝𐴕𐴝 𐴀𐴠𐴊𐴧𐴠 𐴑𐴟𐴌𐴁𐴝𐴕𐴞 𐴀𐴡𐴥𐴑𐴧𐴡𐴓𐴢 𐴂𐴠𐴦𐴐𐴢 𐴒𐴡𐴌𐴞𐴥 𐴁𐴡𐴓𐴧𐴝.²𐴀𐴞𐴥𐴁𐴝𐴘𐴠 𐴕𐴡 𐴎𐴝𐴕𐴡𐴘𐴝 𐴀𐴠𐴊𐴧𐴠 𐴒𐴡𐴓𐴧𐴡𐴃𐴡𐴃𐴢 𐴎𐴝 𐴊𐴠 𐴀𐴞𐴥𐴃𐴝𐴌𐴝 𐴓𐴧𐴡𐴥𐴘 𐴕𐴡𐴌𐴡𐴔𐴡𐴌 𐴏𐴝𐴥𐴀𐴣𐴃𐴠 𐴏𐴝𐴥𐴑𐴁𐴝𐴑 𐴒𐴡𐴌𐴞𐴥 𐴉𐴝𐴌𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝 𐴕𐴞𐴎𐴠 𐴘𐴡𐴥 𐴑𐴡𐴔𐴎𐴟𐴌𐴞𐴌 𐴒𐴠𐴌𐴠𐴉𐴃𐴝𐴌𐴞𐴃𐴢 𐴀𐴝𐴏𐴠𐴤.³𐴇𐴠𐴥𐴃𐴡𐴓𐴧𐴝 𐴃𐴡 𐴀𐴞𐴥𐴁𐴝𐴃𐴧𐴟 𐴔𐴝𐴙𐴕𐴐𐴡𐴥𐴌 𐴒𐴟𐴕𐴝𐴤 𐴓𐴧𐴝 𐴊𐴞𐴘𐴝 𐴉𐴡𐴌𐴠 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴕𐴞𐴎𐴡𐴌 𐴒𐴟𐴕𐴝𐴤 𐴓𐴧𐴝 𐴘𐴡𐴥 𐴑𐴟𐴌𐴁𐴝𐴕𐴞 𐴊𐴞𐴘𐴝 𐴉𐴡𐴌𐴠.⁴𐴇𐴡𐴕𐴡𐴤𐴑𐴞𐴘𐴠 𐴇𐴠𐴥𐴕𐴊𐴞𐴓𐴧𐴝 𐴀𐴞𐴔𐴝𐴔 𐴀𐴡𐴥𐴘𐴁𐴝𐴌 𐴀𐴞𐴎𐴧𐴡𐴃𐴢 𐴕𐴞𐴎𐴡𐴌𐴒𐴝𐴤 𐴕𐴞𐴎𐴠 𐴓𐴡𐴦𐴘𐴢 𐴕𐴡 𐴉𐴝𐴌𐴠, 𐴁𐴡𐴥𐴓𐴑𐴠 𐴀𐴝𐴓𐴧𐴝𐴘𐴠 𐴋𐴝𐴑𐴠 𐴊𐴠 𐴀𐴞𐴥𐴁𐴝𐴘𐴠 𐴁𐴠 𐴇𐴞𐴥𐴘𐴝𐴕 𐴉𐴝𐴦, 𐴎𐴠𐴕𐴊𐴞𐴓𐴧𐴝 𐴀𐴝𐴌𐴡𐴕𐴠 𐴉𐴝𐴀𐴙𐴓𐴢.

⁵𐴇𐴠𐴥𐴕𐴊𐴞𐴓𐴧𐴝, 𐴔𐴡𐴀𐴏𐴞𐴤𐴘𐴠 𐴘𐴡𐴥 𐴁𐴡𐴌𐴡 𐴀𐴞𐴔𐴝𐴔 𐴀𐴡𐴥𐴘 𐴁𐴡𐴓𐴧𐴝 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴋𐴡𐴣𐴀𐴌 𐴒𐴡𐴙𐴅𐴧𐴠𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴟𐴁𐴝𐴤𐴘𐴠 𐴁𐴠 𐴒𐴡𐴙𐴅𐴧𐴠𐴥 𐴎𐴞𐴁𐴝𐴤𐴘𐴠 𐴀𐴞𐴥𐴁𐴝𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥, ”𐴃𐴟𐴀𐴛 𐴀𐴡𐴥𐴘𐴓𐴝𐴊𐴠 𐴀𐴝𐴣𐴀𐴌 𐴉𐴟𐴖𐴝,𐴀𐴝𐴙𐴅𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌 𐴁𐴝𐴉𐴢 𐴀𐴡𐴥𐴘𐴧𐴞.“

⁶𐴀𐴞𐴥𐴁𐴝𐴘𐴠 𐴀𐴝𐴌𐴀𐴠𐴑 𐴎𐴝𐴒𐴝𐴃𐴢 𐴀𐴡𐴥 𐴈𐴡𐴘𐴧𐴠𐴥 𐴊𐴠, ”𐴔𐴝𐴓𐴑𐴞𐴥𐴎𐴝𐴊𐴠𐴑𐴡𐴌 𐴕𐴡𐴔𐴟𐴕𐴝𐴘𐴠𐴃𐴟𐴀𐴛 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴉𐴡𐴙𐴅𐴧𐴡𐴕𐴃𐴡 𐴀𐴞𐴔𐴝𐴔.“

⁷𐴀𐴞𐴥𐴁𐴝 𐴊𐴟𐴕𐴞𐴘𐴝𐴙𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴇𐴠𐴥𐴣𐴃𐴧𐴠, 𐴋𐴡𐴣𐴀𐴌-𐴋𐴡𐴣𐴀𐴌 𐴒𐴡𐴥𐴌𐴞 𐴒𐴟𐴎𐴡𐴌𐴞 𐴈𐴝𐴣𐴊𐴞 𐴀𐴠𐴊𐴧𐴠 𐴏𐴟𐴑𐴡𐴌 𐴉𐴝𐴕𐴞𐴥 𐴁𐴝𐴥𐴐𐴝𐴘, 𐴀𐴟𐴁𐴝𐴤𐴌 𐴇𐴝𐴣𐴏𐴠 𐴊𐴟𐴖𐴝 𐴀𐴠𐴊𐴧𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴙𐴅𐴧𐴞𐴥𐴓𐴢 𐴎𐴞𐴁𐴝𐴤𐴘𐴠 𐴀𐴞𐴥𐴁𐴝𐴌𐴠 𐴔𐴡𐴦𐴃𐴡𐴃𐴧𐴟 𐴁𐴝𐴏𐴝𐴘 𐴉𐴝𐴙𐴃𐴧𐴡, 𐴀𐴝𐴦𐴌 𐴀𐴞𐴥𐴁𐴝𐴃𐴧𐴟 𐴊𐴞𐴕𐴊𐴝𐴥𐴌𐴞 𐴏𐴡𐴓𐴝𐴏𐴡𐴓𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝𐴘𐴠 𐴎𐴟𐴖𐴝𐴁𐴢 𐴉𐴝𐴀𐴙𐴓𐴢.⁸𐴀𐴞𐴥𐴁𐴝 𐴇𐴠𐴥 𐴀𐴝𐴓𐴧𐴝𐴌 𐴉𐴟𐴖𐴝 𐴊𐴠 𐴀𐴡𐴥𐴘𐴓𐴠 𐴘𐴡, 𐴀𐴞𐴥𐴁𐴝𐴘𐴠 𐴎𐴞𐴀𐴕 𐴊𐴟𐴑 𐴉𐴝𐴀𐴙𐴓𐴢 𐴇𐴞𐴥𐴀𐴕𐴡𐴃𐴧𐴟 𐴉𐴡𐴥𐴌𐴔𐴝𐴊𐴝𐴌𐴞 𐴐𐴞𐴥𐴑𐴧𐴠,⁹𐴀𐴝𐴦𐴌 𐴉𐴟𐴌𐴝𐴉𐴟𐴌𐴞 𐴑𐴝𐴦𐴁𐴠𐴓𐴢 𐴀𐴡𐴥𐴘 𐴀𐴞𐴥𐴁𐴝 𐴀𐴟𐴘𐴃𐴝𐴌𐴝𐴤 𐴁𐴠𐴒𐴧𐴟𐴥𐴕𐴡𐴓𐴧𐴝 𐴀𐴡𐴉𐴟𐴥𐴌𐴝𐴕𐴞 𐴕𐴠𐴅𐴝𐴃𐴡𐴌 𐴒𐴟𐴙𐴅𐴧𐴝 𐴁𐴡𐴙𐴕𐴧𐴠𐴥 𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴌 𐴈𐴡𐴃𐴝𐴤 𐴀𐴝𐴔𐴡𐴥𐴓𐴢 𐴒𐴡𐴌𐴠𐴥,¹⁰𐴀𐴝𐴦𐴌 𐴀𐴞𐴥𐴁𐴝𐴌𐴠 𐴀𐴝𐴓𐴧𐴝𐴘𐴠 𐴔𐴝𐴓𐴑𐴞𐴥𐴎𐴝𐴊𐴠𐴑𐴡𐴌 𐴕𐴡𐴔𐴟𐴕𐴝𐴘𐴠 𐴁𐴡𐴌𐴡 𐴀𐴞𐴔𐴝𐴔 𐴀𐴡𐴥𐴘𐴁𐴝𐴌 𐴃𐴡𐴑𐴧𐴝 𐴊𐴞𐴦𐴘𐴠𐴥.

𐴀𐴞𐴔𐴝𐴕𐴡𐴃𐴧𐴟 𐴉𐴡𐴌𐴞 𐴎𐴝𐴌 𐴀𐴟𐴥𐴣𐴐𐴞𐴘𐴝𐴌𐴞

¹¹𐴇𐴞𐴥𐴘𐴝𐴕𐴡𐴌 𐴁𐴝𐴦𐴁𐴟𐴃𐴠 𐴀𐴝𐴣𐴀𐴌𐴝𐴃𐴧𐴟 𐴁𐴡𐴀𐴗𐴃𐴢 𐴑𐴠𐴏𐴧𐴟𐴥 𐴈𐴡𐴘𐴁𐴝𐴥𐴌 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴇𐴞𐴥𐴀𐴕 𐴁𐴟𐴎𐴝𐴥𐴘𐴃𐴠 𐴔𐴡𐴐𐴑𐴞𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴀𐴝𐴌 𐴁𐴟𐴎𐴞𐴥𐴃𐴡 𐴕𐴡 𐴏𐴡𐴀𐴌.¹²𐴀𐴝𐴏𐴡𐴥𐴓𐴠 𐴀𐴠 𐴀𐴡𐴑𐴃𐴡𐴥𐴃𐴢 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴟𐴏𐴃𐴝𐴃𐴢 𐴀𐴡𐴥𐴘𐴎𐴡𐴕𐴒𐴡𐴘 𐴀𐴝𐴐𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴘𐴝𐴓𐴝 𐴃𐴡 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴓𐴧𐴝𐴌 𐴏𐴡𐴥𐴘𐴧𐴞𐴌𐴠 𐴀𐴠𐴁𐴧𐴠 𐴐𐴟𐴥𐴌𐴟𐴃𐴧𐴟 𐴓𐴡𐴥𐴃𐴞 𐴀𐴝𐴁𐴝𐴌 𐴐𐴞𐴥𐴑𐴝𐴘𐴃𐴡 𐴀𐴝𐴌 𐴀𐴠𐴎𐴧𐴡𐴕 𐴓𐴝𐴒𐴠𐴌, 𐴀𐴝𐴦𐴌 𐴊𐴡𐴌𐴡𐴤 𐴈𐴝𐴥𐴕𐴝𐴌 𐴁𐴡𐴊𐴡𐴓𐴢 𐴃𐴟𐴣𐴀𐴝𐴥𐴌𐴝𐴃𐴧𐴟 𐴊𐴟𐴊𐴢 𐴈𐴝𐴥𐴘𐴁𐴝𐴌 𐴎𐴡𐴌𐴟𐴌𐴡𐴃𐴢 𐴀𐴡𐴥𐴘𐴧𐴠.¹³𐴎𐴠𐴦𐴕𐴞𐴑𐴞 𐴏𐴞𐴌𐴞𐴥𐴉𐴢 𐴊𐴟𐴊𐴢 𐴈𐴝𐴥𐴀, 𐴀𐴞𐴥𐴃𐴝𐴃𐴧𐴟 𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴁𐴝𐴦𐴁𐴟𐴃𐴠 𐴇𐴡𐴕𐴡𐴤 𐴎𐴝𐴕𐴑𐴝𐴌𐴞 𐴕𐴡 𐴃𐴝𐴥𐴑𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴠 𐴃𐴡 𐴊𐴟𐴊𐴡𐴌 𐴉𐴟𐴖𐴝.¹⁴𐴔𐴡𐴕𐴃𐴡𐴌 𐴊𐴡𐴌𐴡𐴤 𐴈𐴝𐴥𐴕𐴝 𐴀𐴡𐴥𐴙𐴓𐴊𐴠 𐴁𐴡𐴐𐴢 𐴀𐴡𐴥𐴘𐴧𐴠 𐴊𐴠 𐴔𐴝𐴕𐴟𐴥𐴙𐴐𐴢 𐴀𐴡𐴓𐴧𐴝, 𐴎𐴠𐴃𐴝𐴌𐴝𐴤𐴃𐴧𐴟 𐴀𐴝𐴑𐴧𐴡𐴥𐴓𐴢 𐴒𐴡𐴥𐴌𐴞 𐴏𐴡𐴓𐴞𐴃𐴠𐴥-𐴏𐴡𐴓𐴞𐴃𐴠𐴥 𐴒𐴡𐴔 𐴈𐴡𐴥𐴌𐴝𐴉𐴢 𐴉𐴡𐴌𐴡𐴥𐴑 𐴒𐴡𐴌𐴞𐴥𐴁𐴝𐴌 𐴃𐴡𐴅𐴟𐴌𐴁𐴝 𐴀𐴡𐴥𐴘𐴒𐴞𐴘𐴡𐴘.

The Word for the World International

https://app.library.bible/content/87faca8b51c22590