Read 𐴇𐴞𐴁𐴌𐴝𐴕𐴞𐴀𐴡𐴥𐴓𐴢 2

𐴇𐴞𐴁𐴌𐴝𐴕𐴞𐴀𐴡𐴥𐴓𐴢2

𐴋𐴡𐴣𐴀𐴌 𐴕𐴠𐴅𐴝𐴃𐴢

¹𐴇𐴠𐴥𐴃𐴡𐴓𐴧𐴝 𐴀𐴝𐴣𐴀𐴌𐴝 𐴎𐴞𐴀𐴕 𐴉𐴟𐴥𐴙𐴕𐴧𐴞, 𐴇𐴞𐴥𐴀𐴕𐴡𐴌 𐴀𐴟𐴎𐴟 𐴀𐴝𐴌𐴡𐴤 𐴁𐴞𐴐𐴞𐴤𐴒𐴡𐴌𐴞 𐴊𐴞𐴥𐴘𐴝𐴕 𐴊𐴞𐴘𐴝𐴌 𐴎𐴡𐴌𐴟𐴌, 𐴎𐴠𐴀𐴕𐴠 𐴀𐴝𐴣𐴀𐴌𐴝 𐴇𐴞𐴥𐴀𐴕𐴡𐴃𐴧𐴟 𐴊𐴟𐴌 𐴀𐴡𐴥𐴘 𐴕𐴡 𐴎𐴝𐴘𐴒𐴡𐴥𐴘.²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴡𐴊𐴞 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴡𐴌 𐴊𐴟𐴖𐴝𐴌𐴝 𐴈𐴡𐴀𐴙𐴓𐴢 𐴊𐴠 𐴈𐴡𐴃𐴝𐴤 𐴇𐴞𐴥𐴀𐴕 𐴑𐴝𐴦𐴘𐴠𐴔 𐴀𐴝𐴏𐴠𐴤 𐴊𐴠 𐴀𐴡𐴥𐴘𐴓𐴠, 𐴀𐴝𐴦𐴌 𐴇𐴝𐴥𐴀𐴌 𐴈𐴡𐴏𐴟𐴥𐴌𐴞𐴌 𐴀𐴠𐴊𐴧𐴠 𐴕𐴝𐴉𐴡𐴥𐴌𐴔𐴝𐴕𐴞𐴌 𐴓𐴝𐴦𐴘𐴠𐴑 𐴏𐴝𐴥𐴣𐴎𐴝 𐴉𐴝𐴀𐴙𐴓𐴢 𐴊𐴠 𐴀𐴡𐴥𐴘𐴓𐴠,³𐴃𐴡𐴥𐴀𐴘𐴓𐴠 𐴀𐴝𐴣𐴀𐴌𐴝 𐴈𐴠𐴥𐴕𐴃𐴟 𐴑𐴠𐴀𐴕𐴒𐴡𐴌𐴞 𐴇𐴝𐴥𐴌𐴞 𐴉𐴝𐴌𐴞𐴘𐴟𐴥𐴔 𐴎𐴡𐴊𐴞 𐴀𐴝𐴣𐴀𐴌𐴝 𐴀𐴠𐴀𐴕 𐴋𐴡𐴣𐴀𐴌 𐴕𐴠𐴅𐴝𐴃𐴡𐴌𐴠 𐴀𐴠𐴥𐴐𐴑𐴝𐴌𐴝 𐴒𐴡𐴌𐴞𐴥؟ 𐴇𐴠𐴥 𐴕𐴠𐴅𐴝𐴃𐴡𐴌 𐴁𐴝𐴦𐴁𐴟𐴃𐴠 𐴃𐴡 𐴀𐴝𐴒𐴠 𐴔𐴝𐴓𐴞𐴑𐴠 𐴀𐴠𐴓𐴝𐴕 𐴒𐴡𐴙𐴅𐴧𐴠𐴥, 𐴁𐴝𐴦𐴊𐴠 𐴎𐴠𐴃𐴝𐴌𐴝𐴤 𐴉𐴟𐴥𐴙𐴕𐴧𐴠 𐴀𐴞𐴥𐴃𐴝𐴌𐴝 𐴇𐴞𐴥𐴘𐴝𐴕 𐴏𐴡𐴥𐴘𐴧𐴞 𐴊𐴠 𐴏𐴝𐴥𐴁𐴟𐴃𐴢 𐴊𐴞𐴥𐴘𐴠.⁴𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴀𐴝𐴓𐴧𐴝𐴘𐴠 𐴘𐴡𐴥 𐴕𐴞𐴎𐴡𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕, 𐴃𐴝𐴦𐴅𐴟𐴙𐴂𐴧𐴝 𐴇𐴝𐴌𐴇𐴝𐴥𐴕𐴝, 𐴋𐴡𐴙𐴓𐴧𐴝-𐴁𐴡𐴋𐴡𐴙𐴓𐴧𐴝 𐴑𐴠𐴌𐴝𐴔𐴡𐴃𐴢, 𐴀𐴠𐴊𐴧𐴠 𐴂𐴝𐴑-𐴌𐴟𐴀𐴌 𐴕𐴞𐴘𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴇𐴞𐴥𐴘𐴝𐴕𐴡𐴌 𐴒𐴡𐴁𐴝𐴤 𐴊𐴞𐴥𐴘𐴝𐴃𐴢 𐴀𐴝𐴐𐴧𐴞𐴥𐴓𐴢.

𐴕𐴠𐴅𐴝𐴃𐴡𐴌 𐴁𐴝𐴕𐴞

⁵𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴝 𐴎𐴠 𐴀𐴝𐴘𐴁𐴝𐴤𐴌 𐴊𐴟𐴕𐴞𐴘𐴝𐴙𐴌 𐴁𐴝𐴦𐴁𐴟𐴃𐴠 𐴈𐴡𐴀𐴙𐴌, 𐴇𐴞𐴥𐴘𐴝𐴕𐴡𐴌𐴠 𐴃𐴡 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴡𐴌 𐴑𐴡𐴁𐴎𐴝𐴃𐴢 𐴕𐴡𐴥 𐴊𐴠.⁶𐴁𐴡𐴥𐴓𐴑𐴠 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴑 𐴎𐴝𐴒𐴝𐴃𐴢 𐴇𐴡𐴕𐴡𐴤𐴑𐴞𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥 𐴊𐴠 𐴀𐴝𐴏𐴠𐴤, ”𐴀𐴞𐴕𐴏𐴝𐴥𐴕 𐴑𐴞𐴦 𐴊𐴠, 𐴃𐴟𐴀𐴛 𐴇𐴞𐴥𐴀𐴕𐴡𐴓𐴧𐴝 𐴑𐴞𐴥𐴘𐴝𐴓𐴢 𐴌𐴝𐴑𐴡𐴥 𐴊𐴠؟𐴘𐴝𐴥 𐴀𐴝𐴊𐴡𐴔𐴎𐴝𐴃𐴢 𐴑𐴞𐴦 𐴊𐴠, 𐴃𐴟𐴀𐴛 𐴇𐴞𐴥𐴀𐴕𐴡𐴌𐴠 𐴏𐴝𐴀𐴏𐴞𐴃𐴝 𐴒𐴡𐴌𐴡𐴤 𐴊𐴠؟⁷𐴃𐴟𐴀𐴛 𐴇𐴞𐴥𐴀𐴕𐴡𐴌𐴠 𐴑𐴠𐴏𐴧𐴟𐴥 𐴄𐴝𐴙𐴔𐴡𐴓𐴧𐴝 𐴀𐴠𐴥𐴕𐴝 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴡𐴌 𐴃𐴟𐴥𐴖𐴝𐴌𐴡 𐴕𐴞𐴏𐴡 𐴁𐴝𐴕𐴝𐴘𐴧𐴡𐴥;𐴃𐴟𐴀𐴛 𐴇𐴞𐴥𐴀𐴕𐴡𐴌𐴠 𐴃𐴝𐴏𐴢 𐴀𐴞𐴥𐴏𐴝𐴉𐴠 𐴊𐴞𐴦𐴘𐴡𐴥 𐴊𐴠 𐴀𐴡𐴥𐴙𐴓𐴊𐴠 𐴔𐴡𐴈𐴞𐴥𐴔𐴝 𐴀𐴠𐴊𐴧𐴠 𐴀𐴞𐴎𐴧𐴡𐴃𐴢;⁸𐴃𐴟𐴀𐴛 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴇𐴞𐴥𐴀𐴕𐴡𐴌 𐴉𐴡𐴦𐴌 𐴃𐴡𐴓𐴠 𐴒𐴡𐴌𐴞𐴥𐴊𐴞𐴘𐴡.“ 𐴇𐴠𐴥 𐴀𐴞𐴥𐴏𐴝𐴉𐴠, 𐴀𐴝𐴓𐴧𐴝𐴘𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴇𐴞𐴥𐴀𐴕𐴡𐴌 𐴑𐴡𐴁𐴎𐴝𐴃𐴢 𐴒𐴡𐴌𐴞𐴥𐴊𐴞𐴓𐴠 𐴃𐴡 𐴀𐴞𐴥𐴁𐴝𐴘𐴠 𐴇𐴞𐴥𐴀𐴕𐴡𐴌 𐴑𐴡𐴁𐴎𐴝𐴃𐴢 𐴕𐴡 𐴊𐴞 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴁𐴝𐴊𐴢 𐴌𐴝𐴙𐴑𐴧𐴠𐴥 𐴊𐴠 𐴕𐴝𐴥𐴘. 𐴔𐴡𐴕𐴃𐴡𐴌 𐴀𐴝𐴙𐴅𐴧𐴡𐴤 𐴀𐴝𐴣𐴀𐴌𐴝 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴇𐴞𐴥𐴀𐴕𐴡𐴌 𐴑𐴡𐴁𐴎𐴝𐴃𐴢 𐴕𐴡 𐴊𐴠𐴑𐴞𐴥𐴌.

⁹𐴓𐴠𐴑𐴞𐴕 𐴀𐴝𐴣𐴀𐴌𐴝 𐴃𐴡 𐴀𐴞𐴏𐴝𐴤𐴌𐴠 𐴊𐴠𐴑𐴞𐴥𐴌, 𐴎𐴞𐴁𐴝𐴤𐴌𐴠 𐴑𐴠𐴏𐴧𐴟𐴥 𐴄𐴝𐴙𐴔𐴡𐴓𐴧𐴝 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴡𐴌 𐴃𐴟𐴥𐴖𐴝𐴌𐴡 𐴕𐴞𐴏𐴡 𐴒𐴡𐴌𐴝𐴥 𐴒𐴞𐴥𐴘𐴠, 𐴎𐴠𐴀𐴕𐴠 𐴀𐴝𐴓𐴧𐴝𐴌 𐴌𐴝𐴇𐴝𐴥𐴔𐴡𐴃𐴠 𐴀𐴞𐴥𐴁𐴝𐴘𐴠 𐴉𐴡𐴃𐴧𐴞𐴥 𐴔𐴝𐴕𐴟𐴥𐴙𐴐𐴡𐴓𐴧𐴝 𐴔𐴡𐴦𐴃𐴢 𐴔𐴟𐴑𐴝𐴁𐴠𐴓𐴝 𐴒𐴡𐴌𐴞𐴥 𐴉𐴝𐴌𐴠. 𐴀𐴞𐴥𐴁𐴝𐴌 𐴊𐴟𐴑𐴧𐴡𐴥𐴌 𐴔𐴡𐴦𐴃𐴡𐴌 𐴎𐴡𐴌𐴞𐴘𐴝 𐴀𐴞𐴥𐴁𐴝𐴌𐴠 𐴃𐴝𐴏𐴢 𐴀𐴞𐴥𐴏𐴝𐴉𐴠 𐴔𐴡𐴈𐴞𐴥𐴔𐴝 𐴀𐴠𐴊𐴧𐴠 𐴀𐴞𐴎𐴧𐴡𐴃𐴢 𐴊𐴞𐴘𐴝 𐴒𐴞𐴘𐴠𐴥.

¹⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝, 𐴎𐴞𐴁𐴝𐴤 𐴓𐴧𐴝 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴀𐴝𐴏𐴠𐴤, 𐴀𐴠𐴊𐴧𐴠 𐴎𐴞𐴁𐴝𐴤𐴌 𐴀𐴟𐴏𐴞𐴥𐴓𐴝𐴘𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴀𐴝𐴏𐴠𐴤, 𐴁𐴡𐴀𐴗𐴃𐴢 𐴉𐴟𐴀𐴝𐴙𐴕 𐴊𐴡𐴌𐴠 𐴔𐴡𐴈𐴞𐴥𐴔𐴝𐴃𐴢 𐴀𐴝𐴕𐴞𐴤 𐴁𐴡𐴓𐴧𐴝 𐴀𐴞𐴥𐴁𐴝𐴃𐴧𐴟 𐴄𐴞𐴥𐴑 𐴓𐴝𐴙𐴒𐴧𐴠𐴥 𐴊𐴠, 𐴀𐴞𐴥𐴃𐴝𐴌𐴝𐴌 𐴕𐴠𐴅𐴝𐴃𐴡𐴌 𐴁𐴝𐴕𐴞𐴌𐴠 𐴊𐴟𐴑 𐴉𐴝𐴦 𐴁𐴝𐴘 𐴉𐴟𐴌𐴝𐴉𐴟𐴌𐴞 𐴕𐴝𐴓𐴢 𐴒𐴡𐴌𐴞𐴥 𐴁𐴡𐴓𐴧𐴝.¹¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴞𐴁𐴝𐴤𐴘𐴠 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴠𐴥 𐴀𐴞𐴥𐴁𐴝𐴌 𐴀𐴠𐴊𐴧𐴠 𐴎𐴠𐴃𐴝𐴌𐴝𐴤𐴌𐴠 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴝𐴥 𐴒𐴞𐴥𐴘𐴠, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌 𐴁𐴝𐴉𐴢 𐴃𐴡 𐴀𐴠𐴑. 𐴇𐴠𐴥𐴃𐴡𐴓𐴧𐴝 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴈𐴡𐴘𐴃𐴠𐴤 𐴕𐴡 𐴐𐴡𐴥𐴌𐴔𐴝;¹²𐴀𐴞𐴥𐴁𐴝𐴘𐴠 𐴈𐴡𐴘𐴧𐴠𐴥 𐴊𐴠,”𐴀𐴝𐴀𐴛 𐴃𐴟𐴣𐴀𐴝𐴥𐴣𐴌 𐴕𐴝𐴔 𐴀𐴝𐴣𐴀𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴊𐴡𐴌 𐴇𐴝𐴣𐴏𐴠 𐴁𐴡𐴘𐴧𐴝𐴕 𐴒𐴡𐴙𐴅𐴧𐴟𐴥𐴔,𐴔𐴝𐴀𐴉𐴞𐴓𐴡𐴃𐴢 𐴔𐴝𐴥𐴎𐴠 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌 𐴃𐴝𐴦𐴌𐴞𐴉𐴡𐴌 𐴏𐴠𐴀𐴌 𐴒𐴝𐴘𐴧𐴟𐴥𐴔.“

¹³𐴀𐴝𐴌𐴡𐴤 𐴈𐴡𐴘𐴧𐴠𐴥 𐴊𐴠,”𐴀𐴝𐴀𐴛 𐴀𐴞𐴥𐴁𐴝𐴌 𐴖𐴡𐴌𐴠 𐴁𐴡𐴥𐴌𐴝𐴐𐴝 𐴌𐴝𐴑𐴞𐴥𐴘𐴟𐴔.“ 𐴘𐴝𐴀𐴕 𐴀𐴡𐴥 𐴈𐴡𐴘𐴧𐴠𐴥,”𐴀𐴡𐴥𐴃𐴞𐴘𐴝, 𐴀𐴝𐴀𐴛 𐴀𐴠𐴊𐴧𐴠 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴠𐴥 𐴊𐴞𐴦𐴘𐴠𐴥 𐴊𐴠 𐴉𐴟𐴀𐴝𐴙𐴕 𐴇𐴞𐴥𐴀𐴕.“

¹⁴𐴉𐴟𐴀𐴝𐴙𐴕 𐴇𐴞𐴥𐴀𐴕 𐴎𐴠𐴃𐴧𐴡𐴥𐴃𐴢 𐴒𐴟𐴏𐴧𐴡 𐴀𐴠𐴊𐴧𐴠 𐴓𐴡𐴖𐴢 𐴀𐴡𐴓𐴝, 𐴇𐴠𐴥𐴃𐴡𐴓𐴧𐴝 𐴀𐴞𐴏𐴝𐴤 𐴕𐴞𐴎𐴠 𐴘𐴡𐴥 𐴀𐴠𐴑𐴞𐴤 𐴋𐴡𐴥𐴙𐴓𐴧𐴝 𐴁𐴡𐴙𐴕𐴧𐴠𐴥, 𐴎𐴠𐴀𐴕𐴠 𐴔𐴡𐴦𐴃𐴡𐴌 𐴊𐴟𐴖𐴝𐴌𐴝 𐴀𐴞𐴥𐴁𐴝𐴘𐴠 𐴀𐴟𐴘𐴃𐴝𐴌𐴠𐴥 𐴊𐴡𐴥𐴚𐴐𐴡 𐴒𐴡𐴌𐴞𐴥𐴉𐴠𐴓𐴝𐴘 𐴉𐴝𐴌𐴠 𐴎𐴝𐴃𐴧𐴟 𐴔𐴡𐴦𐴃𐴡𐴌 𐴖𐴡𐴌𐴠 𐴃𐴝𐴦𐴑𐴡𐴃𐴢 𐴀𐴝𐴏𐴠𐴤, 𐴘𐴝𐴥𐴕𐴞 𐴀𐴞𐴁𐴞𐴓𐴞𐴥𐴐𐴢 𐴀𐴡𐴌𐴠,¹⁵𐴀𐴠𐴊𐴧𐴠 𐴀𐴟𐴘𐴃𐴝𐴌𐴝𐴤𐴌𐴠 𐴀𐴝𐴎𐴝𐴊𐴢 𐴒𐴡𐴌𐴞𐴥 𐴉𐴝𐴌𐴠 𐴎𐴠𐴃𐴝𐴌𐴝𐴤 𐴔𐴡𐴦𐴃𐴡𐴌 𐴋𐴡𐴦𐴌𐴠 𐴎𐴞𐴕𐴊𐴞𐴒𐴞𐴁𐴡𐴥𐴌 𐴒𐴟𐴓𐴝𐴔𐴞𐴃𐴢 𐴀𐴝𐴏𐴠𐴤.¹⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴏𐴡𐴥𐴓𐴠 𐴀𐴞𐴥𐴁𐴝𐴘𐴠 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴡𐴌𐴠 𐴔𐴡𐴊𐴡𐴃𐴢 𐴒𐴡𐴌𐴠𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴞𐴁𐴌𐴝𐴇𐴞𐴥𐴔𐴡𐴌 𐴕𐴡𐴏𐴡𐴥𐴓𐴡𐴌𐴠 𐴁𐴠 𐴔𐴡𐴊𐴡𐴃𐴢 𐴒𐴡𐴌𐴠𐴥.¹⁷𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝𐴃𐴧𐴟 𐴇𐴝𐴥𐴀𐴌 𐴌𐴟𐴖𐴝𐴃𐴠 𐴕𐴞𐴎𐴡𐴌 𐴁𐴝𐴥𐴘𐴧𐴝𐴙𐴕 𐴓𐴡𐴥𐴘 𐴀𐴠𐴑 𐴋𐴡𐴙𐴓𐴧𐴝 𐴀𐴡𐴥𐴖𐴝 𐴉𐴡𐴙𐴅𐴧𐴠𐴥, 𐴎𐴠𐴀𐴕𐴠 𐴀𐴝𐴓𐴧𐴝𐴌 𐴇𐴠𐴥𐴊𐴔𐴡𐴃𐴡𐴃𐴢 𐴀𐴞𐴥𐴁𐴝 𐴀𐴠𐴎𐴧𐴡𐴕 𐴌𐴝𐴇𐴝𐴥𐴔𐴝𐴕 𐴀𐴠𐴊𐴧𐴠 𐴁𐴞𐴐𐴧𐴝𐴥𐴐𐴊𐴝𐴌 𐴁𐴡𐴌𐴡 𐴀𐴞𐴔𐴝𐴔 𐴁𐴡𐴕𐴞 𐴀𐴞𐴕𐴏𐴝𐴥𐴕𐴡𐴌 𐴒𐴟𐴕𐴝𐴤𐴌 𐴑𐴡𐴉𐴧𐴝𐴌𐴝 𐴊𐴞 𐴉𐴝𐴌𐴠.¹⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝 𐴕𐴞𐴎𐴠 𐴎𐴠𐴃𐴧𐴡𐴥𐴃𐴢 𐴀𐴠𐴕𐴃𐴝𐴥𐴕𐴡𐴌 𐴇𐴝𐴥𐴓𐴡𐴃𐴡𐴃𐴢 𐴊𐴟𐴑 𐴁𐴡𐴌𐴊𐴝𐴐𐴢 𐴒𐴡𐴙𐴅𐴧𐴠𐴥 𐴊𐴠 𐴀𐴝𐴏𐴠𐴤, 𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝𐴘𐴠 𐴎𐴠𐴃𐴝𐴌𐴝𐴤 𐴀𐴠𐴕𐴃𐴝𐴥𐴕𐴡𐴃𐴢 𐴉𐴡𐴌𐴠 𐴀𐴞𐴥𐴃𐴝𐴌𐴝𐴌𐴠 𐴔𐴡𐴊𐴡𐴃𐴢 𐴒𐴡𐴌𐴞𐴥 𐴉𐴝𐴌𐴠.

The Word for the World International

https://app.library.bible/content/87faca8b51c22590