Read 𐴇𐴞𐴁𐴌𐴝𐴕𐴞𐴀𐴡𐴥𐴓𐴢 10

𐴇𐴞𐴁𐴌𐴝𐴕𐴞𐴀𐴡𐴥𐴓𐴢10

¹𐴐𐴡𐴥𐴌𐴞𐴘𐴡𐴃𐴢 𐴎𐴠𐴃𐴧𐴡𐴥𐴃𐴢 𐴀𐴝𐴘𐴁𐴡𐴤 𐴊𐴠 𐴒𐴡𐴔 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴡𐴌 𐴏𐴞𐴌𐴞𐴥𐴉𐴢 𐴏𐴝𐴥𐴁𐴝, 𐴀𐴝𐴦𐴌 𐴇𐴞𐴥𐴀𐴕𐴡𐴌 𐴀𐴝𐴏𐴡𐴥𐴓𐴞 𐴏𐴟𐴥𐴌𐴡𐴃𐴢 𐴕𐴡, 𐴇𐴠𐴥𐴃𐴡𐴓𐴧𐴝 𐴐𐴡𐴥𐴌𐴞𐴘𐴡𐴃𐴠 𐴎𐴠 𐴀𐴠𐴑𐴞𐴤 𐴋𐴡𐴥𐴙𐴓𐴧𐴝 𐴑𐴟𐴌𐴁𐴝𐴕𐴞 𐴁𐴡𐴏𐴡𐴥𐴌𐴠-𐴁𐴡𐴏𐴡𐴥𐴌𐴠 𐴁𐴝𐴊𐴢 𐴏𐴝𐴥𐴌𐴝 𐴂𐴠𐴦𐴐𐴢 𐴒𐴡𐴌𐴝𐴥 𐴎𐴝 𐴇𐴞𐴥𐴀𐴕 𐴓𐴡𐴥𐴘, 𐴋𐴝𐴥𐴑𐴠 𐴀𐴝𐴘𐴧𐴠𐴤 𐴊𐴠 𐴀𐴞𐴥𐴃𐴝𐴌𐴝𐴌𐴠 𐴁𐴞𐴓𐴑𐴟𐴥𐴓𐴢 𐴉𐴟𐴌𐴝𐴉𐴟𐴌𐴞 𐴏𐴡𐴥𐴘𐴧𐴞 𐴒𐴡𐴌𐴞𐴥 𐴕𐴡 𐴉𐴝𐴌𐴠.²𐴀𐴝𐴌𐴕𐴡𐴥𐴘𐴓𐴠 𐴇𐴞𐴥𐴀𐴕 𐴂𐴠𐴦𐴐𐴢 𐴒𐴡𐴌𐴝𐴥 𐴁𐴡𐴕 𐴀𐴡𐴥𐴘 𐴕𐴡 𐴎𐴝𐴘𐴃𐴡𐴘 𐴕𐴠𐴥؟ 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴠𐴁𐴝𐴦𐴊𐴡𐴃𐴒𐴝𐴥𐴌 𐴃𐴡 𐴀𐴠𐴑𐴁𐴝𐴌𐴡𐴃𐴢 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘𐴎𐴝𐴘𐴃𐴡𐴘, 𐴀𐴝𐴦𐴌 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴒𐴟𐴕𐴝𐴤𐴒𐴝𐴌 𐴁𐴡𐴥𐴓𐴞 𐴀𐴝𐴌 𐴕𐴡 𐴄𐴝𐴥𐴀𐴌𐴞𐴃𐴡.³𐴁𐴡𐴥𐴓𐴑𐴠 𐴇𐴠𐴥 𐴑𐴟𐴌𐴁𐴝𐴕𐴞𐴘𐴠 𐴉𐴡𐴃𐴧𐴞𐴥 𐴁𐴡𐴏𐴡𐴥𐴌 𐴒𐴟𐴕𐴝𐴤 𐴁𐴠 𐴔𐴡𐴕𐴡𐴃𐴢 𐴒𐴡𐴌𐴞𐴥𐴊𐴠.⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴞𐴌𐴞𐴥𐴐𐴢 𐴒𐴡𐴌𐴟𐴌 𐴀𐴠𐴊𐴧𐴠 𐴏𐴡𐴥𐴀𐴓𐴡𐴌 𐴓𐴡𐴖𐴢 𐴖𐴠𐴥 𐴃𐴡 𐴒𐴟𐴕𐴝𐴤 𐴁𐴞𐴓𐴑𐴟𐴥𐴓𐴢 𐴊𐴟𐴌 𐴒𐴡𐴌𐴞𐴥𐴉𐴠𐴓𐴝𐴘 𐴕𐴡 𐴉𐴝𐴌𐴠.⁵𐴇𐴠𐴥𐴃𐴡𐴓𐴧𐴝 𐴔𐴡𐴀𐴏𐴞𐴤 𐴊𐴟𐴕𐴞𐴘𐴝𐴙𐴃𐴢 𐴀𐴝𐴘𐴁𐴝𐴤𐴙𐴐𐴧𐴡𐴃𐴢 𐴀𐴝𐴓𐴧𐴝𐴌𐴠 𐴈𐴡𐴘𐴧𐴠𐴥 𐴊𐴠, ”𐴑𐴟𐴌𐴁𐴝𐴕𐴞 𐴀𐴠𐴊𐴧𐴠 𐴕𐴡𐴎𐴡𐴌𐴝𐴕𐴝 𐴃𐴡 𐴃𐴟𐴀𐴛 𐴉𐴡𐴏𐴡𐴥𐴕 𐴕𐴡𐴥 𐴒𐴡𐴌𐴡𐴤, 𐴔𐴡𐴕𐴃𐴡𐴌 𐴃𐴟𐴀𐴛 𐴀𐴝𐴣𐴀𐴌 𐴓𐴧𐴝 𐴀𐴠𐴑𐴧𐴝𐴥𐴕 𐴅𐴞𐴏𐴞𐴥𐴔 𐴃𐴡𐴘𐴧𐴝𐴌 𐴒𐴡𐴙𐴅𐴧𐴡𐴥.⁶𐴉𐴟𐴌𐴝𐴃𐴢 𐴊𐴠𐴊𐴠 𐴑𐴟𐴌𐴁𐴝𐴕𐴞𐴘𐴠 𐴀𐴠𐴊𐴧𐴠 𐴒𐴟𐴕𐴝𐴤𐴌 𐴑𐴟𐴌𐴁𐴝𐴕𐴞𐴘𐴠 𐴃𐴟𐴀𐴛 𐴑𐴟𐴥𐴐𐴞 𐴕𐴡 𐴀𐴡𐴥𐴘𐴃𐴝.⁷𐴇𐴠𐴥𐴃𐴟𐴕𐴡𐴃𐴢 𐴀𐴝𐴀𐴛 𐴈𐴡𐴘𐴧𐴞𐴥 𐴊𐴠, ’𐴏𐴡𐴀, 𐴀𐴡𐴥 𐴀𐴝𐴓𐴧𐴝, 𐴀𐴝𐴀𐴛 𐴀𐴝𐴙𐴐𐴧𐴞𐴤 𐴃𐴟𐴣𐴀𐴝𐴥𐴣𐴌 𐴔𐴡𐴕𐴐𐴝𐴥 𐴉𐴟𐴌𐴝 𐴒𐴡𐴙𐴃𐴧𐴡𐴥, 𐴎𐴠𐴕𐴊𐴞𐴓𐴧𐴝 𐴀𐴝𐴣𐴀𐴌 𐴁𐴝𐴦𐴁𐴟𐴃𐴠 𐴂𐴝𐴑-𐴑𐴞𐴃𐴝𐴁𐴡𐴌 𐴏𐴝𐴥𐴁𐴧𐴝𐴃𐴢 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤.‘ “

⁸𐴉𐴡𐴀𐴘𐴓𐴝 𐴀𐴞𐴥𐴁𐴝𐴘𐴠 𐴈𐴡𐴘𐴧𐴠𐴥 𐴊𐴠, ”𐴑𐴟𐴌𐴁𐴝𐴕𐴞 𐴀𐴠𐴊𐴧𐴠 𐴕𐴡𐴎𐴡𐴌𐴝𐴕𐴝, 𐴉𐴟𐴌𐴝𐴃𐴢 𐴊𐴠𐴊𐴠 𐴑𐴟𐴌𐴁𐴝𐴕𐴞 𐴀𐴠𐴊𐴧𐴠 𐴒𐴟𐴕𐴝𐴤𐴌 𐴑𐴟𐴌𐴁𐴝𐴕𐴞 𐴃𐴟𐴀𐴛 𐴉𐴡𐴏𐴡𐴥𐴕 𐴕𐴡𐴥 𐴒𐴡𐴌𐴡𐴤, 𐴀𐴝𐴦𐴌 𐴇𐴞𐴥𐴀𐴕 𐴓𐴡𐴥𐴘 𐴃𐴟𐴀𐴛 𐴑𐴟𐴥𐴐𐴞 𐴘𐴡𐴥 𐴕𐴡𐴥 𐴀𐴡𐴥𐴘𐴧𐴡.“ 𐴇𐴝𐴥𐴓𐴠𐴑𐴠 𐴇𐴞𐴥𐴀𐴕 𐴐𐴡𐴥𐴌𐴞𐴘𐴡𐴃𐴢 𐴔𐴡𐴎𐴞𐴕 𐴀𐴠𐴥𐴕𐴝 𐴂𐴠𐴦𐴐𐴢 𐴒𐴡𐴌𐴝𐴥 𐴎𐴝𐴘𐴃𐴡.⁹𐴀𐴞𐴥𐴁𐴝𐴘𐴠 𐴃𐴝𐴌𐴉𐴡𐴌𐴠 𐴈𐴡𐴘𐴧𐴠𐴥 𐴊𐴠, ”𐴏𐴡𐴀, 𐴀𐴝𐴀𐴛 𐴀𐴝𐴙𐴐𐴧𐴞𐴤 𐴃𐴟𐴣𐴀𐴝𐴥𐴣𐴌 𐴔𐴡𐴕𐴐𐴝𐴥 𐴉𐴟𐴌𐴝 𐴒𐴡𐴙𐴃𐴧𐴡𐴥.“ 𐴇𐴠𐴥 𐴀𐴞𐴥𐴏𐴝𐴉𐴠, 𐴊𐴟𐴏𐴝𐴥𐴌𐴝 𐴒𐴝𐴥𐴕𐴡𐴌𐴠 𐴑𐴝𐴦𐴘𐴠𐴔 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴞𐴥𐴁𐴝𐴘𐴠 𐴉𐴡𐴀𐴘𐴓𐴝𐴌 𐴒𐴝𐴥𐴕𐴡𐴌𐴠 𐴁𐴝𐴦𐴃𐴠𐴓𐴢 𐴒𐴡𐴌𐴞𐴥𐴉𐴠𐴓𐴝𐴘𐴧𐴠.¹⁰𐴇𐴠𐴥 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴁𐴠 𐴀𐴝𐴣𐴀𐴌𐴝𐴌𐴠 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴅𐴞𐴏𐴞𐴥𐴔𐴡𐴌 𐴑𐴟𐴌𐴁𐴝𐴕𐴞𐴌 𐴀𐴟𐴏𐴞𐴥𐴓𐴝𐴘𐴠 𐴀𐴠𐴑𐴁𐴝𐴌𐴡𐴃𐴢 𐴇𐴝𐴥𐴔𐴞𐴐𐴝𐴓𐴧𐴝 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴞𐴥𐴉𐴠𐴓𐴝 𐴒𐴞𐴥𐴘𐴠.

¹¹𐴇𐴝𐴥𐴀𐴌 𐴀𐴞𐴔𐴝𐴔𐴠 𐴃𐴡 𐴉𐴡𐴃𐴧𐴞𐴥 𐴊𐴞𐴕 𐴃𐴞𐴥𐴘𐴝𐴘𐴧𐴡𐴌𐴠 𐴇𐴠𐴥𐴊𐴔𐴡𐴃𐴢 𐴒𐴡𐴌𐴠𐴥 𐴀𐴠𐴊𐴧𐴠 𐴁𐴝𐴌𐴁𐴝𐴥𐴌 𐴀𐴠𐴑𐴞𐴤 𐴋𐴡𐴥𐴙𐴓𐴧𐴝 𐴑𐴟𐴌𐴁𐴝𐴕𐴞 𐴂𐴠𐴦𐴐𐴢 𐴒𐴡𐴌𐴠𐴥, 𐴎𐴞𐴀𐴕𐴠 𐴒𐴟𐴕𐴝𐴤 𐴁𐴞𐴓𐴑𐴟𐴥𐴓𐴢 𐴊𐴟𐴌 𐴒𐴡𐴌𐴞𐴥𐴉𐴠𐴓𐴝𐴘 𐴕𐴡 𐴉𐴝𐴌𐴠.¹²𐴔𐴡𐴕𐴃𐴡𐴌 𐴔𐴡𐴀𐴏𐴞𐴤𐴘𐴠 𐴃𐴡 𐴒𐴟𐴕𐴝𐴤 𐴓𐴧𐴝 𐴀𐴠𐴑 𐴑𐴟𐴌𐴁𐴝𐴕𐴞 𐴇𐴝𐴥𐴔𐴞𐴐𐴝𐴓𐴧𐴝 𐴂𐴠𐴦𐴐𐴢 𐴒𐴡𐴌𐴞𐴥, 𐴀𐴝𐴓𐴧𐴝𐴌 𐴊𐴠𐴕 𐴋𐴝𐴥𐴑𐴡𐴃𐴧𐴟 𐴁𐴡𐴀𐴘𐴢 𐴃𐴝𐴥𐴙𐴑𐴧𐴠,¹³𐴀𐴝𐴦𐴌 𐴇𐴠𐴥 𐴀𐴡𐴑𐴃𐴡𐴥𐴃𐴢 𐴓𐴡𐴥𐴃𐴞 𐴀𐴞𐴥𐴁𐴝𐴘𐴠 𐴀𐴠𐴕𐴃𐴠𐴎𐴝𐴌 𐴒𐴡𐴌𐴠𐴥𐴌 𐴊𐴠, 𐴀𐴞𐴥𐴁𐴝𐴌 𐴊𐴟𐴐𐴧𐴡𐴕 𐴀𐴡𐴥𐴑𐴧𐴡𐴓𐴡𐴌𐴠 𐴀𐴞𐴥𐴁𐴝𐴌 𐴉𐴡𐴦𐴌 𐴃𐴡𐴓𐴠 𐴒𐴡𐴌𐴞𐴥𐴊𐴞𐴘𐴝𐴌.¹⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴃𐴡 𐴇𐴠𐴥 𐴀𐴠𐴑 𐴑𐴟𐴌𐴁𐴝𐴕𐴞𐴘𐴠 𐴀𐴟𐴘𐴃𐴝𐴌𐴝𐴤𐴌𐴠 𐴇𐴝𐴥𐴔𐴞𐴐𐴝𐴓𐴧𐴝 𐴉𐴟𐴌𐴝𐴉𐴟𐴌𐴞 𐴏𐴡𐴥𐴘𐴧𐴞 𐴒𐴡𐴌𐴞𐴥𐴉𐴠𐴓𐴝𐴘𐴧𐴠, 𐴎𐴠𐴃𐴝𐴌𐴝𐴤𐴌𐴠 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴝𐴥 𐴎𐴝𐴌.¹⁵𐴇𐴞𐴥𐴘𐴝𐴕𐴡𐴌 𐴁𐴝𐴦𐴁𐴟𐴃𐴠 𐴂𐴝𐴑-𐴌𐴟𐴀𐴘𐴠 𐴘𐴡𐴥 𐴀𐴝𐴣𐴀𐴌𐴝𐴌 𐴇𐴝𐴣𐴏𐴠 𐴒𐴡𐴁𐴝𐴤 𐴊𐴠𐴌. 𐴉𐴡𐴀𐴘𐴓𐴝 𐴀𐴞𐴥𐴁𐴝𐴘𐴠 𐴈𐴡𐴘𐴧𐴠𐴥 𐴊𐴠,¹⁶”𐴔𐴝𐴁𐴟𐴊𐴠 𐴈𐴡𐴀𐴙𐴌, 𐴘𐴝𐴀𐴕 𐴀𐴡𐴥𐴙𐴓𐴊𐴠 𐴌𐴝𐴎𐴞𐴕𐴝𐴔𐴝 𐴖𐴝𐴀𐴕 𐴎𐴞𐴘𐴝𐴥𐴕 𐴀𐴝𐴀𐴛 𐴇𐴠𐴥 𐴊𐴞𐴕 𐴇𐴞𐴥𐴀𐴕 𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴓𐴧𐴡𐴥𐴘 𐴒𐴡𐴌𐴞𐴥𐴘𐴟𐴔: 𐴀𐴝𐴀𐴛 𐴀𐴝𐴣𐴀𐴌 𐴐𐴡𐴥𐴌𐴞𐴘𐴡𐴃𐴢 𐴀𐴡𐴥𐴑𐴧𐴡𐴓𐴢 𐴀𐴞𐴥𐴃𐴝𐴌𐴝𐴌 𐴊𐴞𐴓𐴡𐴃𐴢 𐴋𐴝𐴥𐴓𐴞𐴊𐴞𐴘𐴟𐴔, 𐴀𐴝𐴦𐴌 𐴇𐴞𐴥𐴀𐴕 𐴀𐴞𐴥𐴃𐴝𐴌𐴝𐴌 𐴎𐴠𐴈𐴠𐴥𐴕𐴡𐴃𐴢 𐴓𐴠𐴑𐴞𐴥𐴊𐴞𐴘𐴟𐴔.“ ¹⁷𐴀𐴞𐴥𐴁𐴝𐴘𐴠 𐴃𐴝𐴌𐴉𐴡𐴌𐴠 𐴈𐴡𐴘𐴧𐴠𐴥 𐴊𐴠, ”𐴀𐴞𐴥𐴃𐴝𐴌𐴝𐴌 𐴒𐴟𐴕𐴝𐴤 𐴀𐴠𐴊𐴧𐴠 𐴁𐴠𐴊𐴞𐴕𐴞 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴀𐴝𐴀𐴛 𐴀𐴝𐴌 𐴇𐴡𐴕𐴡𐴤𐴊𐴞𐴕 𐴘𐴝𐴦𐴊𐴢 𐴕𐴡 𐴌𐴝𐴙𐴑𐴧𐴟𐴥𐴔.“ ¹⁸𐴇𐴞𐴥𐴀𐴕 𐴔𐴝𐴉𐴢 𐴀𐴡𐴥𐴘𐴒𐴞𐴘𐴡𐴘 𐴊𐴠 𐴀𐴡𐴥𐴘𐴓𐴠 𐴃𐴡, 𐴒𐴟𐴕𐴝𐴤 𐴓𐴧𐴝 𐴑𐴟𐴌𐴁𐴝𐴕𐴞 𐴀𐴝𐴌 𐴎𐴡𐴌𐴟𐴌𐴡𐴃𐴢 𐴕𐴝𐴥𐴘.

𐴀𐴞𐴔𐴝𐴕𐴠 𐴔𐴡𐴎𐴁𐴟𐴃𐴢 𐴃𐴝𐴥𐴑𐴞𐴁𐴝𐴌 𐴃𐴟𐴀𐴝𐴙𐴅𐴧𐴡

¹⁹𐴇𐴠𐴥𐴃𐴡𐴓𐴧𐴝, 𐴀𐴡𐴥 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴝𐴣𐴀𐴌𐴝𐴃𐴧𐴟 𐴎𐴠𐴃𐴧𐴡𐴥𐴃𐴢 𐴀𐴞𐴏𐴝𐴤𐴌 𐴓𐴡𐴖𐴢 𐴖𐴡𐴥𐴌 𐴀𐴟𐴏𐴞𐴥𐴓𐴝𐴘𐴠 𐴀𐴠𐴁𐴧𐴠 𐴂𐴝𐴑 𐴎𐴝𐴒𐴝𐴃𐴢 𐴒𐴡𐴥𐴓𐴞 𐴁𐴡𐴓𐴧𐴝 𐴇𐴞𐴥𐴔𐴧𐴡𐴃𐴢 𐴀𐴝𐴏𐴠𐴤,²⁰𐴕𐴡𐴘𐴝 𐴀𐴠𐴊𐴧𐴠 𐴎𐴞𐴕𐴊𐴝 𐴌𐴝𐴏𐴃𐴝 𐴖𐴝𐴀𐴕𐴡𐴌 𐴁𐴡𐴥𐴓𐴞 𐴎𐴞𐴘𐴝𐴥𐴕 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴝𐴓𐴧𐴝 𐴉𐴡𐴌𐴡𐴊𐴝, 𐴘𐴝𐴥𐴕𐴞 𐴀𐴞𐴥𐴁𐴝𐴌 𐴅𐴞𐴏𐴞𐴥𐴔 𐴁𐴝𐴥𐴘 𐴑𐴟𐴥𐴙𐴓𐴧𐴠,²¹𐴀𐴝𐴦𐴌 𐴀𐴝𐴣𐴀𐴌𐴝𐴃𐴧𐴟 𐴎𐴠𐴃𐴧𐴡𐴥𐴃𐴢 𐴀𐴠𐴀𐴕 𐴀𐴠𐴒𐴧𐴗𐴝𐴤 𐴁𐴡𐴌𐴡 𐴀𐴞𐴔𐴝𐴔 𐴀𐴝𐴏𐴠𐴤, 𐴎𐴞𐴁𐴝𐴤 𐴀𐴝𐴓𐴧𐴝𐴌 𐴉𐴡𐴌𐴞𐴁𐴝𐴌𐴡𐴌 𐴎𐴞𐴔𐴧𐴝𐴊𐴝𐴌,²²𐴇𐴠𐴥𐴃𐴡𐴓𐴧𐴝, 𐴀𐴝𐴘𐴧𐴡𐴤, 𐴀𐴝𐴣𐴀𐴌𐴝 𐴀𐴠𐴈𐴠𐴥𐴓𐴝𐴏𐴞𐴌 𐴊𐴞𐴓𐴠 𐴀𐴠𐴊𐴧𐴠 𐴀𐴞𐴔𐴝𐴕𐴡𐴌 𐴉𐴟𐴌𐴝 𐴀𐴠𐴑𐴞𐴕𐴡𐴌 𐴏𐴝𐴥𐴀𐴣𐴃𐴠 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴎𐴝𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝𐴌 𐴊𐴞𐴓𐴡𐴌𐴠 𐴃𐴡 𐴐𐴞𐴥𐴄𐴑𐴝 𐴊𐴞𐴥 𐴁𐴟𐴌𐴝 𐴇𐴠𐴥𐴓𐴡𐴔𐴡𐴃𐴧𐴟 𐴏𐴝𐴥𐴉𐴢 𐴒𐴡𐴌𐴞𐴥𐴉𐴠𐴓𐴝 𐴒𐴞𐴥𐴘𐴠, 𐴀𐴝𐴦𐴌 𐴀𐴝𐴣𐴀𐴌𐴝𐴌 𐴒𐴝𐴦𐴌𐴠 𐴏𐴝𐴥𐴉𐴢 𐴉𐴝𐴕𐴞𐴥 𐴓𐴡𐴥𐴘 𐴊𐴟𐴥𐴘𐴉𐴠𐴓𐴝 𐴒𐴞𐴥𐴘𐴠.²³𐴀𐴝𐴘𐴧𐴡𐴤, 𐴀𐴝𐴣𐴀𐴌𐴝 𐴐𐴞𐴥𐴑𐴝𐴌 𐴒𐴡𐴌𐴞𐴥 𐴊𐴠 𐴇𐴠𐴥 𐴀𐴝𐴐𐴝𐴤𐴌𐴠 𐴔𐴡𐴎𐴁𐴟𐴃𐴢 𐴒𐴡𐴌𐴞 𐴊𐴡𐴥𐴌𐴞 𐴌𐴝𐴑𐴞𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴞𐴁𐴝𐴤𐴘𐴠 𐴖𐴝𐴦𐴊𐴝 𐴒𐴡𐴙𐴅𐴧𐴠𐴥 𐴀𐴞𐴥𐴁𐴝 𐴃𐴡 𐴁𐴞𐴐𐴧𐴝𐴥𐴐𐴊𐴝𐴌,²⁴𐴀𐴝𐴦𐴌 𐴀𐴝𐴣𐴀𐴌𐴝 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴔𐴟𐴇𐴝𐴥𐴁𐴧𐴡𐴃𐴡𐴌 𐴀𐴠𐴊𐴧𐴠 𐴒𐴡𐴔 𐴈𐴝𐴔𐴡𐴌 𐴃𐴟𐴀𐴝𐴙𐴅𐴧𐴡 𐴊𐴞𐴁𐴝𐴌 𐴑𐴞𐴥𐴘𐴝𐴓𐴢 𐴌𐴝𐴑𐴞𐴥,²⁵𐴀𐴝𐴦𐴌 𐴉𐴟𐴥𐴖𐴝𐴣𐴃𐴞 𐴎𐴡𐴔𐴝 𐴀𐴡𐴥𐴖𐴝𐴌𐴠 𐴁𐴝𐴊𐴢 𐴊𐴞 𐴕𐴡 𐴉𐴠𐴓𐴝𐴘 𐴎𐴠𐴕𐴊𐴞𐴓𐴧𐴝 𐴇𐴡𐴊𐴟𐴥𐴕𐴡𐴃𐴧𐴟 𐴁𐴝𐴊𐴢 𐴊𐴞 𐴀𐴝𐴊𐴡𐴃𐴢 𐴀𐴝𐴏𐴠𐴤, 𐴁𐴡𐴥𐴓𐴑𐴠 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴃𐴟𐴀𐴝𐴙𐴅𐴧𐴡 𐴊𐴞, 𐴀𐴠𐴃𐴡𐴥 𐴁𐴞𐴐𐴞𐴤𐴒𐴡𐴌𐴞 𐴊𐴞𐴘𐴝𐴃𐴢 𐴃𐴝𐴥𐴑𐴞 𐴎𐴠𐴃𐴡𐴥 𐴇𐴝𐴥𐴌𐴝 𐴊𐴞𐴕 𐴀𐴟𐴁𐴝𐴤 𐴋𐴝𐴥𐴑𐴠 𐴀𐴝𐴀𐴘𐴎𐴝𐴥𐴌𐴒𐴡𐴘 𐴊𐴠 𐴊𐴠𐴑𐴡𐴥𐴌.

²⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴏𐴡𐴥𐴘𐴧𐴞𐴌 𐴎𐴝𐴕𐴑𐴝𐴌𐴞 𐴉𐴝𐴘 𐴁𐴝𐴦𐴊𐴠 𐴎𐴡𐴊𐴞 𐴀𐴝𐴣𐴀𐴌𐴝 𐴁𐴟𐴎𐴞𐴥𐴏𐴞𐴕𐴃𐴞 𐴒𐴟𐴕𐴝𐴤 𐴒𐴡𐴌𐴝𐴥𐴃𐴢 𐴃𐴝𐴥𐴑𐴞, 𐴒𐴟𐴕𐴝𐴤 𐴓𐴧𐴝 𐴀𐴝𐴌 𐴇𐴡𐴕𐴡𐴤 𐴑𐴟𐴌𐴁𐴝𐴕𐴞 𐴁𐴝𐴑𐴞 𐴕𐴝𐴥𐴘,²⁷𐴁𐴡𐴥𐴓𐴑𐴠 𐴋𐴡𐴦𐴌𐴉𐴟𐴥𐴑 𐴁𐴞𐴏𐴝𐴌𐴡𐴌 𐴀𐴠𐴕𐴃𐴠𐴎𐴝𐴌 𐴀𐴠𐴊𐴧𐴠 𐴀𐴝𐴓𐴧𐴝𐴌 𐴔𐴟𐴈𐴝𐴥𐴓𐴠𐴉𐴢 𐴀𐴡𐴥𐴑𐴧𐴡𐴓𐴡𐴌𐴠 𐴉𐴟𐴌𐴞𐴉𐴠𐴥𐴓𐴝𐴘𐴁𐴡 𐴊𐴠 𐴒𐴡𐴎𐴧𐴡𐴁𐴢 𐴁𐴠 𐴁𐴝𐴑𐴞 𐴀𐴝𐴏𐴠𐴤.²⁸𐴔𐴟𐴀𐴏𐴝𐴌 𐴐𐴡𐴥𐴌𐴞𐴘𐴡𐴃𐴢 𐴕𐴡 𐴔𐴝𐴕𐴡𐴘𐴝𐴌𐴠 𐴃𐴡 𐴊𐴟𐴘 𐴎𐴡𐴕 𐴘𐴝𐴥 𐴃𐴞𐴕 𐴎𐴡𐴕𐴡𐴌 𐴒𐴡𐴁𐴝𐴤𐴘𐴠 𐴇𐴡𐴕𐴡𐴤 𐴌𐴝𐴇𐴝𐴥𐴔 𐴏𐴝𐴥𐴌𐴝 𐴔𐴝𐴌𐴞𐴉𐴠𐴥𐴓𐴝 𐴎𐴝.²⁹𐴘𐴝𐴓𐴝 𐴁𐴝𐴥𐴉𐴞𐴏𐴡 𐴏𐴝𐴘, 𐴀𐴟𐴘𐴃𐴠 𐴇𐴡𐴃𐴡𐴥 𐴇𐴡𐴥𐴃𐴝𐴌𐴝 𐴏𐴝𐴥𐴣𐴎𐴝𐴌 𐴓𐴝𐴦𐴘𐴠𐴑 𐴀𐴡𐴥𐴘𐴁𐴡 𐴎𐴠𐴦𐴕𐴞𐴑𐴞 𐴀𐴝𐴓𐴧𐴝𐴌 𐴉𐴟𐴖𐴝𐴌𐴠 𐴀𐴟𐴥𐴣𐴌𐴝𐴕 𐴔𐴝𐴙𐴅𐴧𐴠𐴥 𐴀𐴠𐴊𐴧𐴠 𐴌𐴝𐴎𐴞𐴕𐴝𐴔𐴝𐴌 𐴓𐴡𐴖𐴢 𐴎𐴞𐴀𐴕 𐴓𐴡𐴥𐴘 𐴀𐴞𐴥𐴃𐴝𐴌𐴠 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴝𐴥 𐴒𐴞𐴥𐴀𐴓𐴢 𐴇𐴞𐴥𐴀𐴕𐴡𐴌𐴠 𐴕𐴝𐴉𐴝𐴑 𐴁𐴡𐴓𐴞 𐴁𐴝𐴥𐴙𐴂𐴧𐴠, 𐴀𐴝𐴦𐴌 𐴌𐴝𐴇𐴝𐴥𐴔𐴡𐴃𐴡𐴌 𐴌𐴟𐴀𐴌𐴠 𐴁𐴠𐴀𐴞𐴎𐴧𐴡𐴃𐴞 𐴒𐴡𐴙𐴅𐴧𐴠𐴥؟³⁰𐴀𐴝𐴣𐴀𐴌𐴝 𐴃𐴡 𐴀𐴟𐴁𐴝𐴤𐴌𐴠 𐴏𐴞𐴕𐴞𐴥 𐴎𐴞𐴁𐴝𐴤𐴘𐴠 𐴈𐴡𐴘𐴧𐴠𐴥 𐴊𐴠, ”𐴁𐴡𐴊𐴡𐴓𐴝 𐴓𐴡𐴕 𐴀𐴝𐴣𐴀𐴌 𐴈𐴝𐴔, 𐴀𐴝𐴀𐴛 𐴁𐴠 𐴉𐴟𐴥𐴣𐴎𐴝𐴘𐴧𐴟𐴔.“ 𐴀𐴝𐴌𐴡𐴤 𐴈𐴡𐴘𐴧𐴠𐴥 𐴊𐴠, ”𐴔𐴝𐴁𐴟𐴊𐴠 𐴒𐴡𐴌𐴞𐴥𐴘𐴟𐴔 𐴕𐴞𐴎𐴡𐴌 𐴁𐴡𐴕𐴊𐴝𐴌 𐴁𐴞𐴏𐴝𐴌.“ ³¹𐴎𐴞𐴕𐴊𐴝 𐴀𐴝𐴓𐴧𐴝𐴌 𐴀𐴝𐴥𐴃𐴡𐴃𐴢 𐴉𐴡𐴌𐴡𐴕 𐴁𐴞𐴐𐴞𐴤 𐴋𐴡𐴦𐴌𐴡𐴌 𐴈𐴡𐴃𐴝𐴤.

³²𐴀𐴝𐴒𐴡𐴌 𐴊𐴞𐴕 𐴀𐴟𐴀𐴙𐴕𐴡𐴌𐴠 𐴔𐴡𐴕𐴡𐴃𐴢 𐴒𐴡𐴌𐴡𐴤, 𐴃𐴟𐴣𐴀𐴝𐴥𐴌𐴝𐴌𐴠 𐴉𐴡𐴀𐴌 𐴒𐴡𐴌𐴞𐴥𐴊𐴞 𐴁𐴝𐴦𐴊𐴠 𐴎𐴞𐴀𐴕𐴡𐴃𐴢 𐴊𐴟𐴑-𐴔𐴡𐴏𐴞𐴁𐴡𐴃𐴠 𐴁𐴞𐴐𐴞𐴤 𐴊𐴟𐴑 𐴉𐴝𐴀𐴘𐴓𐴝.³³𐴃𐴝𐴥𐴘𐴃𐴝𐴘 𐴃𐴟𐴣𐴀𐴝𐴥𐴌𐴝𐴌𐴠 𐴔𐴝𐴙𐴕𐴐𐴡𐴥𐴌 𐴔𐴟𐴀𐴕𐴃𐴟 𐴁𐴠𐴀𐴞𐴎𐴧𐴡𐴃𐴞 𐴀𐴠𐴊𐴧𐴠 𐴎𐴟𐴓𐴟𐴥𐴔 𐴒𐴡𐴌𐴞𐴥 𐴃𐴡𐴦𐴣𐴐𐴝𐴤 𐴒𐴡𐴌𐴝𐴥 𐴎𐴝𐴘𐴃𐴡; 𐴀𐴝𐴦𐴌 𐴃𐴝𐴥𐴘𐴃𐴝𐴘 𐴃𐴟𐴣𐴀𐴝𐴥𐴌𐴝 𐴇𐴠𐴥𐴕𐴊𐴞𐴓𐴧𐴝 𐴁𐴡𐴊𐴏𐴡𐴥𐴓𐴧𐴟𐴑 𐴀𐴡𐴥𐴌 𐴊𐴠 𐴀𐴞𐴥𐴃𐴝𐴌𐴝𐴌 𐴇𐴠𐴥𐴍𐴠 𐴐𐴡𐴥𐴌𐴞𐴑 𐴀𐴡𐴥𐴘𐴃𐴝.³⁴𐴃𐴟𐴣𐴀𐴝𐴥𐴌𐴝 𐴇𐴡𐴊𐴞 𐴀𐴡𐴥𐴑𐴧𐴡𐴓𐴡𐴓𐴧𐴝 𐴉𐴠𐴄𐴉𐴟𐴌𐴝𐴕𐴞 𐴊𐴝𐴈𐴝𐴤𐴘𐴓𐴝, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝𐴌 𐴔𐴝𐴓𐴏𐴝𐴥𐴔𐴝𐴕𐴝 𐴀𐴡𐴥𐴑𐴧𐴡𐴓𐴢 𐴓𐴟𐴄𐴢 𐴒𐴡𐴌𐴞𐴥𐴉𐴠𐴓𐴝𐴌𐴠 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴔𐴝𐴕𐴞 𐴓𐴡𐴘𐴓𐴝𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴎𐴝𐴕𐴡 𐴊𐴠, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴕𐴞𐴎𐴡𐴌 𐴓𐴧𐴝 𐴁𐴠𐴀𐴃𐴡𐴌 𐴀𐴠𐴊𐴧𐴠 𐴇𐴝𐴥𐴔𐴞𐴐𐴝 𐴄𐴞𐴑𐴠 𐴊𐴠 𐴊𐴡𐴥𐴕 𐴀𐴝𐴏𐴠𐴤.³⁵𐴇𐴠𐴥𐴃𐴡𐴓𐴧𐴝, 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥 𐴇𐴞𐴥𐴔𐴧𐴡𐴃𐴢 𐴕𐴡 𐴇𐴝𐴥𐴌𐴝𐴘𐴧𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴘𐴝𐴕𐴡𐴌 𐴁𐴡𐴐𐴧𐴞𐴥𐴐𐴢 𐴁𐴞𐴐𐴞𐴤 𐴋𐴡𐴣𐴀𐴌.³⁶𐴃𐴟𐴣𐴀𐴝𐴥𐴌𐴝𐴃𐴧𐴟 𐴏𐴡𐴁𐴡𐴥𐴌 𐴃𐴝𐴥𐴑𐴝𐴌 𐴎𐴡𐴌𐴟𐴌, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴝𐴓𐴧𐴝𐴌 𐴔𐴡𐴕𐴐𐴝𐴥 𐴉𐴟𐴌𐴝 𐴒𐴡𐴙𐴅𐴧𐴝𐴥 𐴀𐴡𐴥𐴘𐴓𐴠, 𐴖𐴝𐴦𐴊𐴝 𐴒𐴡𐴙𐴅𐴧𐴞𐴥𐴓𐴢 𐴊𐴠 𐴇𐴞𐴥𐴘𐴝𐴕 𐴇𐴝𐴥𐴏𐴞𐴓𐴢 𐴒𐴡𐴌𐴡𐴤.³⁷𐴀𐴝𐴓𐴧𐴝𐴘𐴠 𐴃𐴡 𐴈𐴡𐴘𐴧𐴠𐴥,
”𐴄𐴝𐴙𐴔 𐴁𐴞𐴐𐴞𐴤 𐴈𐴡𐴔 𐴀𐴝𐴏𐴠𐴤, 𐴃𐴡𐴥𐴘 𐴀𐴝𐴘𐴁𐴝𐴤𐴌 𐴀𐴝𐴏𐴠𐴤 𐴊𐴠 𐴀𐴞𐴥𐴁𐴝 𐴀𐴝𐴀𐴘𐴎𐴝𐴥𐴘𐴁𐴡𐴘,𐴊𐴠𐴌𐴞 𐴕𐴡 𐴒𐴡𐴌𐴞𐴥𐴁𐴡.³⁸𐴔𐴡𐴕𐴃𐴡𐴌 𐴀𐴝𐴣𐴀𐴌 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴕𐴊𐴝 𐴀𐴞𐴔𐴝𐴕𐴠 𐴁𐴠 𐴁𐴝𐴏𐴞 𐴃𐴝𐴥𐴑𐴞𐴁𐴡, 𐴔𐴡𐴕𐴃𐴡𐴌 𐴎𐴡𐴊𐴞 𐴀𐴞𐴥𐴃𐴠 𐴉𐴞𐴏𐴧𐴝𐴥𐴎𐴝𐴒𐴡𐴘, 𐴀𐴝𐴣𐴀𐴌 𐴊𐴞𐴓𐴢 𐴀𐴞𐴥𐴃𐴝𐴌𐴠 𐴓𐴡𐴥𐴘 𐴑𐴟𐴥𐴐𐴞 𐴕𐴡 𐴃𐴝𐴥𐴑𐴞𐴁𐴡.“

³⁹𐴔𐴡𐴕𐴃𐴡𐴌 𐴀𐴝𐴣𐴀𐴌𐴝 𐴃𐴡 𐴀𐴟𐴘𐴃𐴝𐴌𐴝𐴤𐴌 𐴁𐴟𐴥𐴃𐴡𐴃𐴧𐴟 𐴕𐴡, 𐴎𐴠𐴃𐴝𐴌𐴝𐴤 𐴉𐴞𐴏𐴧𐴝𐴥𐴒𐴞𐴘𐴡𐴘 𐴀𐴝𐴦𐴌 𐴊𐴡𐴥𐴚𐴐𐴡 𐴀𐴡𐴥𐴘𐴒𐴞𐴘𐴡𐴘; 𐴁𐴡𐴥𐴓𐴑𐴠 𐴀𐴟𐴘𐴃𐴝𐴌𐴝𐴤𐴌 𐴁𐴟𐴥𐴃𐴡𐴃𐴧𐴟 𐴀𐴠𐴥𐴕𐴝 𐴎𐴠𐴃𐴝𐴌𐴝𐴤 𐴌𐴟𐴀𐴌𐴠 𐴁𐴝𐴏𐴝𐴘 𐴌𐴝𐴑𐴞𐴥 𐴁𐴡𐴓𐴧𐴝 𐴀𐴞𐴔𐴝𐴕 𐴌𐴝𐴑𐴠𐴥.

The Word for the World International

https://app.library.bible/content/87faca8b51c22590