𐴒𐴝𐴓𐴝𐴃𐴞𐴀𐴡𐴥𐴓𐴢 3を読んでください。

𐴒𐴝𐴓𐴝𐴃𐴞𐴀𐴡𐴥𐴓𐴢3

𐴐𐴡𐴥𐴌𐴞𐴘𐴡𐴃𐴢 𐴘𐴝𐴥𐴃𐴡 𐴀𐴞𐴔𐴝𐴕

¹𐴀𐴡𐴥 𐴀𐴡𐴁𐴟𐴎𐴢 𐴒𐴝𐴓𐴝𐴃𐴞𐴀𐴡𐴥𐴓𐴢! 𐴃𐴟𐴣𐴀𐴝𐴥𐴌𐴝𐴌𐴠 𐴇𐴡𐴕𐴠 𐴅𐴝𐴊𐴟 𐴒𐴡𐴙𐴅𐴧𐴠𐴥؟ 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌𐴠 𐴑𐴟𐴥𐴌𐴟𐴐𐴡𐴃𐴢 𐴊𐴞𐴥 𐴔𐴝𐴌𐴞𐴉𐴠𐴥𐴓𐴝 𐴒𐴞𐴥𐴘𐴠 𐴊𐴠 𐴇𐴞𐴥𐴘𐴝𐴕 𐴃𐴡 𐴕𐴞𐴎𐴡𐴌 𐴏𐴟𐴑𐴠𐴤 𐴊𐴠𐴙𐴑𐴧𐴡𐴥 𐴉𐴝𐴥𐴚𐴒𐴡𐴌𐴞 𐴃𐴟𐴣𐴀𐴝𐴥𐴌𐴝𐴌𐴠 𐴏𐴝𐴥𐴉𐴢-𐴏𐴝𐴥𐴉𐴢 𐴒𐴡𐴥𐴌𐴞 𐴁𐴟𐴎𐴝𐴥 𐴒𐴞𐴥𐴘𐴠.²𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴃𐴧𐴟 𐴏𐴞𐴌𐴞𐴥𐴉𐴢 𐴘𐴝𐴀𐴕 𐴎𐴝𐴙𐴕𐴃𐴡 𐴏𐴝𐴀𐴙𐴌: 𐴃𐴟𐴣𐴀𐴝𐴥𐴌𐴝 𐴂𐴝𐴑-𐴌𐴟𐴀 𐴉𐴝𐴘𐴧𐴡𐴥 𐴊𐴠 𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢 𐴒𐴡𐴌𐴞𐴥 𐴕𐴠𐴥, 𐴕𐴝𐴥𐴑𐴞 𐴉𐴟𐴥𐴙𐴕𐴧𐴡 𐴊𐴠 𐴇𐴠𐴥 𐴑𐴟𐴥𐴐𐴈𐴡𐴥𐴁𐴡𐴌𐴡𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴞𐴤؟³𐴃𐴟𐴣𐴀𐴝𐴥𐴌𐴝 𐴀𐴠𐴕𐴊𐴞𐴓𐴧𐴝 𐴀𐴡𐴁𐴟𐴎𐴢 𐴑𐴞𐴘𐴝𐴥؟ 𐴃𐴟𐴣𐴀𐴝𐴥𐴌𐴝 𐴎𐴞𐴘𐴝𐴥𐴕 𐴌𐴟𐴀𐴌 𐴀𐴟𐴏𐴞𐴥𐴓𐴝𐴘𐴠 𐴐𐴟𐴥𐴌𐴟 𐴒𐴡𐴙𐴅𐴧𐴡𐴥, 𐴇𐴞𐴥𐴘𐴝𐴕 𐴀𐴠𐴇𐴡𐴥𐴕 𐴅𐴞𐴏𐴞𐴥𐴔𐴠 𐴉𐴟𐴌𐴟𐴏𐴧𐴝𐴃𐴢 𐴒𐴡𐴙𐴃𐴧𐴡𐴥 𐴏𐴡𐴀𐴌 𐴊𐴠 𐴕𐴞𐴥𐴑𐴞؟⁴𐴃𐴟𐴣𐴀𐴝𐴥𐴌𐴝 𐴑𐴞𐴥 𐴀𐴠𐴊𐴟𐴥𐴕 𐴊𐴟𐴑 𐴇𐴝𐴥𐴕𐴧𐴝𐴑 𐴉𐴝𐴘𐴧𐴡𐴥 𐴊𐴠؟ 𐴇𐴝𐴥𐴕𐴧𐴝𐴑 𐴕𐴡 𐴊𐴠 𐴕𐴡 𐴕𐴠𐴥؟⁵𐴃𐴡𐴥𐴘 𐴀𐴝𐴣𐴀𐴌 𐴏𐴟𐴥𐴖𐴝𐴓𐴢 𐴀𐴡𐴥𐴙𐴓𐴊𐴠, 𐴀𐴝𐴓𐴧𐴝 𐴎𐴞𐴁𐴝𐴤𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴂𐴝𐴑-𐴌𐴟𐴀 𐴊𐴞𐴦𐴘𐴠𐴥 𐴀𐴠𐴊𐴧𐴠 𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴑𐴠𐴌𐴝𐴔𐴡𐴃𐴞 𐴀𐴡𐴥𐴑𐴧𐴡𐴓𐴢 𐴒𐴡𐴌𐴠𐴥, 𐴀𐴞𐴥𐴁𐴝𐴘𐴠 𐴇𐴞𐴥𐴀𐴕 𐴃𐴟𐴣𐴀𐴝𐴥𐴌𐴝 𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢 𐴒𐴡𐴌𐴡𐴤𐴕𐴠 𐴒𐴡𐴌𐴠𐴥 𐴊𐴠 𐴕𐴠𐴥, 𐴕𐴝𐴥𐴑𐴞 𐴑𐴟𐴥𐴐𐴈𐴡𐴥𐴁𐴡𐴌 𐴉𐴟𐴥𐴕𐴞 𐴀𐴞𐴔𐴝𐴕 𐴀𐴝𐴙𐴕𐴧𐴡𐴤 𐴊𐴠 𐴇𐴠𐴥𐴃𐴡𐴓𐴧𐴝 𐴒𐴡𐴌𐴠𐴥 𐴊𐴠؟⁶𐴀𐴞𐴁𐴌𐴝𐴇𐴞𐴥𐴔𐴡𐴌 𐴁𐴝𐴦𐴁𐴟𐴃𐴠 𐴁𐴝𐴥𐴉𐴞𐴏𐴡, ”𐴘𐴡𐴥𐴒𐴧𐴗𐴝𐴘𐴠 𐴀𐴝𐴓𐴧𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴌𐴝𐴙𐴑𐴧𐴞𐴥𐴓𐴢, 𐴇𐴠𐴥𐴃𐴡𐴓𐴧𐴝 𐴘𐴡𐴥𐴒𐴧𐴗𐴝𐴌𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴒𐴡𐴕𐴝 𐴒𐴞𐴀𐴓𐴢.“

⁷𐴇𐴠𐴥𐴃𐴡𐴓𐴧𐴝 𐴘𐴝𐴀𐴕 𐴎𐴝𐴕𐴞 𐴌𐴝𐴑𐴡𐴥 𐴊𐴠 𐴑𐴞, 𐴎𐴠𐴃𐴝𐴌𐴝𐴤𐴃𐴧𐴟 𐴀𐴞𐴔𐴝𐴕 𐴀𐴝𐴏𐴠𐴤, 𐴏𐴞𐴌𐴞𐴥𐴉𐴢 𐴀𐴞𐴥𐴃𐴝𐴌𐴝 𐴀𐴡𐴥𐴙𐴓𐴊𐴠 𐴀𐴞𐴁𐴌𐴝𐴇𐴞𐴥𐴔𐴡𐴌 𐴀𐴝𐴏𐴡𐴥𐴓𐴢 𐴕𐴡𐴏𐴡𐴥𐴓𐴢.⁸𐴂𐴝𐴑-𐴑𐴝𐴓𐴝𐴔𐴡𐴃𐴢 𐴃𐴡 𐴀𐴝𐴒𐴠 𐴓𐴡𐴥𐴃𐴞 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, 𐴀𐴞𐴔𐴝𐴕𐴡𐴌 𐴎𐴡𐴌𐴞𐴘𐴝 𐴀𐴝𐴓𐴧𐴝𐴘𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴉𐴡𐴌𐴇𐴠𐴥𐴏𐴒𐴝𐴌 𐴁𐴡𐴥𐴓𐴞 𐴑𐴡𐴁𐴟𐴓𐴢 𐴒𐴡𐴌𐴞𐴥𐴁𐴡. 𐴇𐴠𐴥𐴃𐴡𐴓𐴧𐴝 𐴀𐴝𐴓𐴧𐴝𐴘𐴠 𐴀𐴞𐴁𐴌𐴝𐴇𐴞𐴥𐴔𐴡𐴌𐴠 𐴀𐴠 𐴑𐴟𐴥𐴐𐴈𐴡𐴥𐴁𐴡𐴌 𐴘𐴝𐴀𐴕 𐴀𐴝𐴒𐴠 𐴓𐴡𐴥𐴃𐴞 𐴎𐴝𐴕𐴝𐴘𐴊𐴞𐴥𐴓𐴢, 𐴑𐴞 𐴈𐴡𐴘𐴓𐴠𐴥, ”𐴃𐴟𐴣𐴀𐴝𐴥𐴣𐴌 𐴊𐴟𐴖𐴝𐴌𐴝 𐴃𐴝𐴔𐴝𐴥𐴔 𐴑𐴡𐴗𐴔 𐴀𐴡𐴥𐴑𐴧𐴡𐴓𐴠 𐴌𐴝𐴇𐴝𐴥𐴔𐴡𐴃𐴢 𐴉𐴝𐴘𐴁𐴡.“ ⁹𐴇𐴠𐴥 𐴀𐴞𐴥𐴏𐴝𐴉𐴠, 𐴎𐴠𐴃𐴝𐴌𐴝𐴤𐴃𐴧𐴟 𐴀𐴞𐴔𐴝𐴕 𐴀𐴝𐴏𐴠𐴤 𐴀𐴞𐴥𐴃𐴝𐴌𐴝 𐴘𐴡𐴥 𐴀𐴞𐴔𐴝𐴕 𐴀𐴡𐴓𐴝 𐴀𐴞𐴁𐴌𐴝𐴇𐴞𐴥𐴔𐴠 𐴉𐴝𐴘𐴧𐴠𐴥 𐴊𐴠 𐴇𐴠𐴥 𐴌𐴝𐴇𐴝𐴥𐴔𐴡𐴃𐴢 𐴉𐴝𐴘𐴁𐴡.

¹⁰𐴎𐴠𐴃𐴝𐴌𐴝𐴤 𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢 𐴒𐴡𐴌𐴝𐴥𐴌 𐴖𐴡𐴌𐴠 𐴁𐴡𐴥𐴌𐴝𐴐𐴝 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴒𐴡𐴎𐴧𐴡𐴁𐴡𐴌 𐴃𐴡𐴓𐴠 𐴀𐴝𐴏𐴠𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ”𐴀𐴟𐴘𐴃𐴝𐴌𐴝𐴤 𐴇𐴝𐴥𐴀𐴌 𐴀𐴠𐴑𐴎𐴡𐴕 𐴒𐴡𐴎𐴧𐴡𐴁𐴡𐴌 𐴃𐴡𐴓𐴠 𐴀𐴝𐴏𐴠𐴤 𐴎𐴠𐴃𐴝𐴌𐴝𐴤 𐴐𐴡𐴥𐴌𐴞𐴘𐴡𐴃𐴡𐴌 𐴑𐴞𐴃𐴝𐴁𐴡𐴃𐴢 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤 𐴊𐴠 𐴐𐴡𐴌𐴡𐴥𐴃𐴢 𐴁𐴠𐴒𐴧𐴟𐴥𐴕 𐴀𐴝𐴔𐴡𐴥𐴓𐴢 𐴒𐴡𐴌𐴝𐴥𐴃𐴢 𐴕𐴡 𐴃𐴝𐴥𐴑𐴠.“ ¹¹𐴀𐴠 𐴈𐴡𐴃𐴝𐴤 𐴏𐴝𐴥𐴉𐴢 𐴎𐴝𐴇𐴠𐴥𐴌 𐴊𐴠 𐴑𐴞, 𐴐𐴡𐴥𐴌𐴞𐴘𐴡𐴃𐴢 𐴓𐴡𐴥𐴘 𐴇𐴡𐴕𐴡𐴤 𐴔𐴝𐴕𐴟𐴥𐴙𐴐𐴢 𐴀𐴝𐴓𐴧𐴝𐴌 𐴕𐴡𐴎𐴡𐴌𐴡𐴃𐴢 𐴉𐴡𐴌𐴇𐴠𐴥𐴏𐴒𐴝𐴌 𐴕𐴡 𐴄𐴡𐴥𐴀𐴌𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ”𐴉𐴡𐴌𐴇𐴠𐴥𐴏𐴒𐴝𐴌 𐴔𐴝𐴕𐴟𐴥𐴙𐴐𐴢 𐴀𐴞𐴔𐴝𐴕𐴠 𐴁𐴠 𐴁𐴝𐴏𐴞 𐴃𐴝𐴥𐴑𐴞𐴁𐴡.“ ¹²𐴎𐴠𐴀𐴕 𐴀𐴡𐴥𐴘𐴁𐴡 𐴀𐴡𐴥𐴑, 𐴀𐴞𐴔𐴝𐴕 𐴓𐴡𐴘 𐴐𐴡𐴥𐴌𐴞𐴘𐴡𐴃𐴡𐴌 𐴇𐴡𐴕𐴡𐴤 𐴁𐴝𐴎𐴝𐴥 𐴕𐴝𐴥𐴘 𐴁𐴡𐴥𐴓𐴑𐴠 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤 𐴊𐴠, ”𐴎𐴠𐴦𐴕𐴞𐴑𐴞 𐴐𐴡𐴥𐴌𐴞𐴘𐴡𐴃𐴡𐴌 𐴇𐴡𐴥𐴑𐴟𐴔 𐴀𐴡𐴥𐴑𐴧𐴡𐴓𐴢 𐴔𐴝𐴕𐴠, 𐴀𐴞𐴥𐴃𐴠 𐴇𐴞𐴥𐴀𐴕𐴠 𐴁𐴝𐴏𐴞 𐴃𐴝𐴥𐴑𐴞𐴁𐴡.“ ¹³𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢 𐴕𐴡 𐴒𐴡𐴌𐴝𐴥𐴌 𐴎𐴡𐴌𐴞𐴘𐴝 𐴀𐴝𐴣𐴀𐴌𐴝𐴌 𐴖𐴡𐴌𐴠 𐴎𐴠 𐴒𐴡𐴎𐴧𐴡𐴁𐴢 𐴀𐴝𐴐𐴧𐴞𐴥𐴓𐴢, 𐴇𐴠𐴥 𐴒𐴡𐴎𐴧𐴡𐴁𐴡𐴌𐴠 𐴔𐴡𐴀𐴏𐴞𐴤𐴘𐴠 𐴕𐴞𐴎𐴡𐴌 𐴖𐴡𐴌𐴠 𐴓𐴡𐴦𐴘𐴢 𐴀𐴝𐴣𐴀𐴌𐴝𐴌𐴠 𐴀𐴝𐴎𐴝𐴊𐴢 𐴒𐴡𐴙𐴅𐴧𐴠𐴥. 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤, ”𐴎𐴝𐴌𐴠𐴥-𐴎𐴝𐴌𐴠𐴥 𐴒𐴝𐴏𐴡𐴌 𐴖𐴡𐴌𐴠 𐴄𐴝𐴑𐴝 𐴎𐴝, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴒𐴡𐴎𐴧𐴡𐴁𐴡𐴌 𐴃𐴡𐴓𐴠.“ ¹⁴𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴝𐴌𐴠 𐴀𐴠𐴃𐴡𐴓𐴧𐴝𐴤 𐴀𐴝𐴎𐴝𐴊𐴢 𐴒𐴡𐴙𐴅𐴧𐴠𐴥, 𐴎𐴠𐴀𐴕𐴠 𐴎𐴠 𐴌𐴝𐴇𐴝𐴥𐴔𐴡𐴃𐴢 𐴀𐴞𐴁𐴌𐴝𐴇𐴞𐴥𐴔𐴡𐴌𐴠 𐴊𐴞𐴦𐴘𐴝 𐴒𐴞𐴘𐴠𐴥 𐴇𐴞𐴥𐴘𐴝𐴕 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴊𐴟𐴖𐴝𐴌𐴝 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴘𐴡𐴥 𐴉𐴝𐴦, 𐴃𐴡𐴥𐴘 𐴁𐴝𐴦𐴊𐴠 𐴀𐴝𐴣𐴀𐴌𐴝 𐴎𐴠𐴕 𐴖𐴝𐴦𐴊𐴝 𐴒𐴡𐴙𐴅𐴧𐴝𐴥 𐴂𐴝𐴑-𐴌𐴟𐴀𐴌𐴠 𐴀𐴞𐴔𐴝𐴕𐴠 𐴇𐴝𐴥𐴏𐴞𐴓𐴢 𐴒𐴡𐴌𐴞𐴥.

𐴐𐴡𐴥𐴌𐴞𐴘𐴡𐴃𐴢 𐴀𐴠𐴊𐴧𐴠 𐴖𐴝𐴦𐴊𐴝

¹⁵𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴞𐴕𐴏𐴝𐴥𐴕𐴞 𐴎𐴞𐴕𐴊𐴞𐴒𐴞𐴃𐴧𐴟 𐴀𐴠𐴑𐴧𐴝𐴥𐴕 𐴔𐴠𐴀𐴏𐴝𐴓𐴢 𐴊𐴞𐴥 𐴁𐴟𐴎𐴝𐴥𐴘: 𐴎𐴠𐴣𐴃𐴧𐴠𐴥 𐴊𐴟𐴘 𐴎𐴡𐴕 𐴔𐴝𐴕𐴟𐴥𐴙𐴐𐴠 𐴇𐴡𐴕𐴡𐴤 𐴑𐴠𐴏𐴧𐴟𐴥𐴃𐴢 𐴌𐴝𐴎𐴞 𐴀𐴡𐴥𐴘 𐴌𐴝𐴎𐴞𐴕𐴝𐴔𐴝 𐴒𐴡𐴌𐴞𐴥𐴉𐴠𐴓𐴝, 𐴇𐴞𐴥𐴘𐴝𐴕𐴡𐴌𐴠 𐴇𐴡𐴕𐴡𐴤𐴑𐴞𐴘𐴠 𐴁𐴝𐴦𐴃𐴠𐴓𐴢 𐴒𐴡𐴌𐴞𐴥 𐴕𐴡 𐴉𐴝𐴌𐴠, 𐴀𐴝𐴦𐴌 𐴇𐴞𐴥𐴘𐴝𐴕𐴡𐴃𐴢 𐴑𐴠𐴏𐴧𐴟𐴥 𐴁𐴝𐴌𐴝𐴤𐴘 𐴘𐴡𐴥 𐴕𐴡 𐴉𐴝𐴌𐴠.¹⁶𐴁𐴡𐴌𐴝𐴁𐴡𐴌 𐴇𐴠𐴥𐴕𐴊𐴞𐴓𐴧𐴝, 𐴀𐴝𐴓𐴧𐴝𐴘𐴠 𐴀𐴞𐴁𐴌𐴝𐴇𐴞𐴥𐴔𐴡𐴌𐴠 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴕𐴡𐴏𐴡𐴥𐴓𐴡𐴌𐴠 𐴇𐴠𐴥 𐴖𐴝𐴦𐴊𐴝 𐴊𐴞𐴀𐴓𐴢. 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴕𐴝𐴥𐴘 𐴊𐴠 𐴑𐴞, ”𐴕𐴡𐴏𐴡𐴥𐴓𐴢 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘,“ 𐴎𐴞𐴘𐴝𐴥𐴕𐴡𐴌 𐴔𐴝𐴀𐴕𐴞 𐴁𐴞𐴐𐴞𐴤 𐴔𐴝𐴕𐴟𐴥𐴙𐴐𐴢, 𐴁𐴡𐴥𐴓𐴑𐴠 ”𐴃𐴟𐴣𐴀𐴝𐴥𐴣𐴌 𐴕𐴡𐴏𐴡𐴥𐴓𐴢 𐴓𐴡𐴥𐴘,“ 𐴔𐴝𐴀𐴕𐴞 𐴀𐴠𐴑𐴎𐴡𐴕 𐴓𐴡𐴘, 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴔𐴡𐴀𐴏𐴞𐴤.¹⁷𐴀𐴝𐴀𐴛 𐴈𐴡𐴘𐴃𐴝𐴥𐴔 𐴏𐴝𐴀𐴙𐴌 𐴊𐴠, 𐴀𐴝𐴓𐴧𐴝𐴘𐴠 𐴀𐴞𐴁𐴌𐴝𐴇𐴞𐴥𐴔 𐴓𐴡𐴥𐴘 𐴀𐴠𐴑𐴧𐴝𐴥𐴕 𐴌𐴝𐴎𐴞𐴕𐴝𐴔𐴝 𐴒𐴡𐴌𐴞𐴥 𐴖𐴝𐴦𐴊𐴝 𐴒𐴡𐴙𐴅𐴧𐴞𐴥𐴓𐴢 𐴊𐴠 𐴑𐴞, 𐴇𐴞𐴥𐴘𐴝𐴕𐴡𐴌𐴠 𐴄𐴞𐴑𐴝𐴘 𐴌𐴝𐴑𐴞𐴥𐴁𐴡. 𐴎𐴠 𐴐𐴡𐴥𐴌𐴞𐴘𐴡𐴃𐴢 𐴏𐴝𐴙𐴌 𐴐𐴡𐴥 𐴃𐴞𐴌𐴞𐴥𐴐𐴢 𐴁𐴡𐴏𐴡𐴥𐴌 𐴁𐴝𐴦𐴊𐴠 𐴊𐴞𐴦𐴘𐴝 𐴒𐴞𐴘𐴠𐴥 𐴇𐴞𐴥𐴘𐴝𐴕𐴠 𐴇𐴠𐴥 𐴌𐴝𐴎𐴞𐴕𐴝𐴔𐴝𐴌𐴠 𐴁𐴝𐴥𐴚𐴒𐴞 𐴀𐴝𐴓𐴧𐴝𐴌 𐴖𐴝𐴦𐴊𐴝𐴌𐴠 𐴁𐴝𐴦𐴃𐴠𐴓𐴢 𐴒𐴡𐴌𐴞𐴥𐴉𐴠𐴓𐴝𐴘 𐴕𐴡 𐴉𐴝𐴌𐴞𐴁𐴡𐴥.¹⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴐𐴡𐴥𐴌𐴞𐴘𐴡𐴃𐴠 𐴎𐴡𐴊𐴞 𐴔𐴞𐴌𐴝𐴏𐴢 𐴉𐴝𐴦 𐴎𐴝, 𐴃𐴡𐴥𐴀𐴘𐴓𐴠 𐴃𐴡 𐴇𐴞𐴥𐴘𐴝𐴕 𐴖𐴝𐴦𐴊𐴝𐴘𐴠 𐴉𐴝𐴦 𐴎𐴝 𐴊𐴠 𐴕𐴡, 𐴔𐴡𐴕𐴃𐴡𐴌 𐴀𐴝𐴓𐴧𐴝𐴘𐴠 𐴃𐴡 𐴀𐴞𐴁𐴌𐴝𐴇𐴞𐴥𐴔𐴡𐴌𐴠 𐴇𐴞𐴥𐴘𐴝𐴕 𐴖𐴝𐴦𐴊𐴝𐴌 𐴎𐴡𐴌𐴞𐴘𐴝 𐴀𐴠𐴥𐴕𐴝 𐴊𐴞𐴀𐴓𐴢.

¹⁹𐴃𐴡𐴥𐴀𐴘𐴓𐴠 𐴐𐴡𐴥𐴌𐴞𐴘𐴡𐴃𐴢 𐴑𐴞𐴘𐴡𐴥𐴓𐴧𐴝 𐴊𐴞𐴦𐴓𐴡𐴥؟ 𐴐𐴡𐴥𐴌𐴞𐴘𐴡𐴃𐴢 𐴊𐴞𐴀𐴓𐴢 𐴊𐴠 𐴕𐴝𐴉𐴡𐴥𐴌𐴔𐴝𐴕𐴞𐴌 𐴎𐴡𐴌𐴞𐴘𐴝, 𐴎𐴠𐴀𐴕𐴠 𐴇𐴞𐴥𐴘𐴝𐴕 𐴕𐴡𐴏𐴡𐴥𐴓𐴢 𐴀𐴟𐴁𐴝𐴤 𐴕𐴟𐴥 𐴀𐴝𐴘𐴧𐴠𐴤 𐴉𐴡𐴙𐴅𐴧𐴡𐴕𐴃𐴡 𐴄𐴞𐴑𐴞 𐴃𐴝𐴥𐴑𐴠 𐴎𐴞𐴁𐴝𐴤𐴌 𐴖𐴝𐴦𐴊𐴝 𐴒𐴡𐴌𐴝𐴥 𐴒𐴞𐴥𐴀𐴓𐴢. 𐴀𐴝𐴓𐴧𐴝𐴘𐴠 𐴇𐴠𐴥 𐴐𐴡𐴥𐴌𐴞𐴘𐴡𐴃𐴢 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴡𐴌 𐴊𐴟𐴖𐴝𐴌𐴝 𐴀𐴠𐴑𐴎𐴡𐴕 𐴀𐴟𐴏𐴞𐴥𐴓𐴝𐴌 𐴇𐴝𐴣𐴏𐴠 𐴊𐴞𐴀𐴓𐴢.²⁰𐴓𐴠𐴑𐴞𐴕 𐴀𐴠𐴑𐴎𐴡𐴕𐴡𐴓𐴧𐴝 𐴀𐴡𐴥𐴘𐴓𐴠 𐴃𐴡 𐴀𐴟𐴏𐴞𐴥𐴓𐴝 𐴕𐴡 𐴓𐴝𐴒𐴠; 𐴀𐴝𐴦𐴌 𐴀𐴝𐴓𐴧𐴝 𐴀𐴝𐴏𐴠𐴤 𐴊𐴠 𐴀𐴠𐴑.

𐴐𐴡𐴥𐴌𐴞𐴘𐴡𐴃𐴡𐴌 𐴔𐴡𐴑𐴏𐴡𐴥𐴃𐴢

²¹𐴇𐴠𐴥𐴀𐴕 𐴀𐴡𐴥𐴘𐴓𐴠 𐴐𐴡𐴥𐴌𐴞𐴘𐴡𐴃𐴢 𐴑𐴞𐴥 𐴀𐴝𐴓𐴧𐴝𐴌 𐴖𐴝𐴦𐴊𐴝 𐴀𐴡𐴥𐴑𐴧𐴡𐴓𐴡𐴌 𐴀𐴟𐴓𐴋𐴝؟ 𐴁𐴞𐴓𐴑𐴟𐴥𐴓𐴢 𐴕𐴡! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴡𐴊𐴞 𐴀𐴠𐴕𐴊𐴞𐴓𐴧𐴝 𐴀𐴠𐴑𐴧𐴝𐴥𐴕 𐴐𐴡𐴥𐴌𐴞𐴘𐴡𐴃𐴢 𐴊𐴞𐴦𐴘𐴝 𐴎𐴝𐴘𐴃𐴡 𐴎𐴞𐴘𐴝𐴥𐴕𐴠 𐴎𐴞𐴁𐴡𐴕 𐴊𐴞𐴦 𐴉𐴝𐴌𐴠, 𐴃𐴡𐴥𐴀𐴘𐴓𐴠 𐴇𐴞𐴥𐴘𐴝𐴕𐴡𐴌 𐴊𐴟𐴖𐴝𐴌𐴝 𐴉𐴡𐴌𐴇𐴠𐴥𐴏𐴒𐴝𐴌 𐴄𐴡𐴥𐴀𐴌𐴞 𐴉𐴝𐴙𐴃𐴧𐴡.²²𐴔𐴡𐴕𐴃𐴡𐴌 𐴂𐴝𐴑-𐴑𐴝𐴓𐴝𐴔𐴠 𐴉𐴟𐴌𐴝 𐴊𐴟𐴕𐴞𐴘𐴝𐴘𐴌𐴠 𐴒𐴟𐴕𐴝𐴤𐴌 𐴑𐴡𐴁𐴎𐴝𐴃𐴢 𐴒𐴡𐴥𐴓𐴝𐴘 𐴌𐴝𐴙𐴑𐴧𐴠𐴥, 𐴎𐴠𐴀𐴕𐴠 𐴎𐴞𐴘𐴝𐴥𐴕𐴡𐴌 𐴖𐴝𐴦𐴊𐴝 𐴒𐴡𐴌𐴝𐴥 𐴒𐴞𐴥𐴀𐴓𐴢 𐴇𐴞𐴥𐴘𐴝𐴕 𐴎𐴠𐴃𐴝𐴌𐴝𐴤 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤 𐴀𐴞𐴥𐴃𐴝𐴌𐴝 𐴇𐴠𐴥 𐴀𐴞𐴔𐴝𐴕𐴠 𐴇𐴝𐴥𐴏𐴞𐴓𐴢 𐴒𐴡𐴌𐴠𐴥.²³𐴔𐴡𐴕𐴃𐴡𐴌 𐴀𐴞𐴔𐴝𐴕 𐴀𐴝𐴘𐴁𐴝𐴤𐴌 𐴀𐴝𐴒𐴠, 𐴀𐴝𐴣𐴀𐴌𐴝𐴌𐴠 𐴐𐴡𐴥𐴌𐴞𐴘𐴡𐴃𐴡𐴌 𐴃𐴡𐴓𐴠 𐴁𐴡𐴕 𐴌𐴝𐴑𐴝𐴤 𐴒𐴞𐴥𐴀𐴓𐴢. 𐴇𐴠𐴥𐴍𐴠 𐴀𐴝𐴣𐴀𐴌𐴝𐴌𐴠 𐴀𐴡𐴃𐴡𐴥𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴁𐴡𐴕 𐴒𐴡𐴌𐴞𐴥 𐴌𐴝𐴑𐴝𐴤 𐴒𐴞𐴥𐴀𐴓𐴢 𐴎𐴠𐴃𐴡𐴥𐴊𐴞𐴕 𐴀𐴞𐴔𐴝𐴕 𐴖𐴝𐴀𐴕 𐴎𐴝𐴇𐴠𐴥𐴌 𐴕𐴡𐴥 𐴎𐴞𐴘𐴝𐴥𐴕 𐴎𐴝𐴇𐴠𐴥𐴌 𐴀𐴡𐴥𐴘𐴁𐴝𐴌 𐴀𐴝𐴐𐴧𐴞𐴥𐴓𐴢.²⁴𐴇𐴠𐴥𐴃𐴡𐴓𐴧𐴝 𐴔𐴡𐴀𐴏𐴞𐴤 𐴕𐴟𐴥 𐴀𐴝𐴘𐴧𐴠𐴤 𐴉𐴡𐴙𐴅𐴧𐴡𐴕𐴃𐴡 𐴐𐴡𐴥𐴌𐴞𐴘𐴡𐴃𐴢 𐴀𐴝𐴣𐴀𐴌𐴝𐴌 𐴎𐴞𐴔𐴧𐴝𐴊𐴝𐴌 𐴀𐴝𐴐𐴧𐴞𐴥𐴓𐴢, 𐴎𐴠𐴀𐴕𐴠 𐴀𐴝𐴣𐴀𐴌𐴝 𐴀𐴞𐴔𐴝𐴕𐴠 𐴉𐴡𐴌𐴇𐴠𐴥𐴏𐴒𐴝𐴌 𐴄𐴡𐴥𐴀𐴌𐴞.²⁵𐴔𐴡𐴕𐴃𐴡𐴌 𐴘𐴝𐴓𐴝 𐴊𐴠 𐴇𐴠𐴥 𐴀𐴞𐴔𐴝𐴕 𐴀𐴝𐴙𐴐𐴧𐴠𐴥, 𐴀𐴝𐴣𐴀𐴌𐴝 𐴀𐴝𐴌 𐴎𐴞𐴔𐴧𐴝𐴊𐴝𐴌𐴡𐴌 𐴃𐴡𐴓𐴠 𐴕𐴡.

²⁶𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴡𐴤𐴕𐴠 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕 𐴃𐴡 𐴀𐴝𐴓𐴧𐴝𐴌 𐴉𐴟𐴀𐴝𐴙𐴕 𐴀𐴡𐴥𐴘𐴒𐴞𐴘𐴡𐴒𐴡𐴘.²⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕 𐴎𐴠𐴃𐴝𐴌𐴝𐴤 𐴁𐴝𐴥𐴂𐴄𐴞𐴏𐴔𐴝𐴌 𐴊𐴟𐴖𐴝𐴌𐴝 𐴔𐴡𐴀𐴏𐴞𐴤 𐴓𐴧𐴡𐴥𐴘 𐴀𐴠𐴑 𐴀𐴡𐴥𐴘𐴧𐴡, 𐴃𐴟𐴣𐴀𐴝𐴥𐴌𐴝 𐴔𐴡𐴀𐴏𐴞𐴤𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘𐴒𐴞𐴘𐴡𐴒𐴡𐴘.²⁸𐴇𐴠𐴥𐴃𐴡𐴓𐴧𐴝 𐴁𐴡𐴥𐴓𐴞 𐴘𐴡𐴇𐴟𐴥𐴊𐴞 𐴀𐴠𐴊𐴧𐴠 𐴁𐴠𐴘𐴡𐴇𐴟𐴥𐴊𐴞𐴌 𐴔𐴝𐴎𐴠, 𐴒𐴟𐴓𐴝𐴔 𐴀𐴠𐴊𐴧𐴠 𐴁𐴠𐴒𐴟𐴓𐴝𐴔𐴡𐴌 𐴔𐴝𐴎𐴠, 𐴔𐴡𐴌𐴡𐴃𐴉𐴟𐴀𐴝𐴙𐴕 𐴀𐴠𐴊𐴧𐴠 𐴔𐴝𐴘𐴝𐴉𐴟𐴀𐴝𐴙𐴕 𐴊𐴡𐴌 𐴔𐴝𐴎𐴠 𐴇𐴡𐴕𐴡𐴤 𐴉𐴡𐴌𐴡𐴥𐴑 𐴕𐴝𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴡𐴤𐴕𐴠 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕 𐴃𐴡 𐴀𐴠𐴑 𐴀𐴡𐴥𐴘𐴒𐴞𐴘𐴡𐴒𐴡𐴘.²⁹𐴃𐴟𐴣𐴀𐴝𐴥𐴌𐴝 𐴔𐴡𐴀𐴏𐴞𐴤𐴌 𐴀𐴡𐴥𐴘𐴒𐴞𐴘𐴡𐴒𐴡𐴘 𐴊𐴠 𐴀𐴡𐴥𐴘𐴓𐴠, 𐴃𐴟𐴣𐴀𐴝𐴥𐴌𐴝 𐴃𐴡 𐴀𐴞𐴁𐴌𐴝𐴇𐴞𐴥𐴔𐴡𐴌 𐴀𐴝𐴏𐴡𐴥𐴓𐴢 𐴕𐴡𐴏𐴡𐴥𐴓𐴢, 𐴀𐴝𐴦𐴌 𐴀𐴝𐴓𐴧𐴝𐴘𐴠 𐴀𐴞𐴥𐴁𐴝𐴌𐴠 𐴎𐴞𐴀𐴕𐴡𐴌 𐴖𐴝𐴦𐴊𐴝 𐴒𐴡𐴙𐴅𐴧𐴠𐴥 𐴇𐴞𐴥𐴀𐴕𐴡𐴌 𐴔𐴞𐴌𐴝𐴏𐴊𐴝𐴥𐴌.

The Word for the World International

https://app.library.bible/content/87faca8b51c22590