Read 𐴀𐴞𐴥𐴉𐴞𐴐𐴞𐴀𐴡𐴥𐴓𐴢 1

𐴀𐴞𐴥𐴉𐴞𐴐𐴞𐴀𐴡𐴥𐴓𐴢1

𐴏𐴡𐴥𐴓𐴝𐴔

¹𐴀𐴝𐴀𐴛 𐴂𐴝𐴥𐴀𐴟𐴓𐴢, 𐴀𐴝𐴓𐴧𐴝𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴀𐴠𐴥𐴒𐴧𐴗𐴝 𐴏𐴝𐴥𐴇𐴝𐴁𐴞.
𐴀𐴞𐴥𐴉𐴞𐴏𐴝𐴏𐴢 𐴐𐴡𐴥𐴀𐴌𐴡𐴃𐴢 𐴀𐴝𐴓𐴧𐴝𐴌 𐴎𐴠 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴢 𐴀𐴝𐴏𐴠𐴤 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴓𐴠𐴑𐴞𐴥𐴌, 𐴎𐴠𐴃𐴝𐴌𐴝𐴤 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴁𐴟𐴥𐴃𐴡𐴌𐴠 𐴀𐴞𐴔𐴝𐴕𐴊𐴝𐴥𐴌.

²𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴓𐴧𐴝 𐴀𐴝𐴣𐴀𐴌𐴝𐴌 𐴁𐴝𐴉𐴡𐴌 𐴀𐴠𐴊𐴧𐴠 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴃𐴡𐴌𐴉𐴡𐴥𐴃𐴧𐴟 𐴌𐴝𐴇𐴝𐴥𐴔𐴡𐴃𐴢 𐴀𐴠𐴊𐴧𐴠 𐴐𐴝𐴥𐴕𐴃𐴞 𐴕𐴝𐴎𐴞𐴓𐴢 𐴀𐴡𐴥𐴑.

𐴔𐴡𐴀𐴏𐴞𐴤𐴌 𐴊𐴟𐴖𐴝𐴌𐴝 𐴌𐴟𐴀𐴈𐴝𐴥𐴕𐴞 𐴁𐴡𐴌𐴈𐴡𐴃𐴢 𐴀𐴡𐴥𐴑𐴧𐴡𐴓𐴢

³𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴀𐴝𐴓𐴧𐴝 𐴀𐴠𐴊𐴧𐴠 𐴁𐴝𐴉𐴡𐴌 𐴃𐴝𐴦𐴌𐴞𐴉𐴢 𐴀𐴡𐴥𐴑, 𐴎𐴞𐴁𐴝𐴤𐴘𐴠 𐴕𐴞𐴥𐴑𐴞 𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴌𐴟𐴀𐴈𐴝𐴥𐴕𐴞 𐴁𐴡𐴌𐴈𐴡𐴃𐴢 𐴀𐴡𐴥𐴑𐴧𐴡𐴓𐴢 𐴀𐴝𐴏𐴔𐴝𐴕𐴞 𐴎𐴝𐴒𐴝𐴃𐴢 𐴀𐴝𐴣𐴀𐴌𐴝𐴌𐴠 𐴔𐴡𐴀𐴏𐴞𐴤𐴌 𐴀𐴟𐴏𐴞𐴥𐴓𐴝𐴘𐴠 𐴊𐴞𐴦𐴘𐴠𐴥,⁴𐴎𐴠𐴕𐴊𐴞𐴓𐴧𐴝 𐴀𐴞𐴥𐴁𐴝𐴘𐴠 𐴀𐴞𐴥𐴁𐴝𐴌 𐴀𐴟𐴏𐴞𐴥𐴓𐴝𐴘𐴠 𐴀𐴝𐴣𐴀𐴌𐴝𐴌𐴠 𐴊𐴟𐴕𐴞𐴘𐴝𐴙𐴌 𐴉𐴡𐴘𐴊𐴝𐴘𐴠𐴐𐴞𐴌 𐴀𐴝𐴒𐴠 𐴓𐴡𐴥𐴃𐴞 𐴁𐴝𐴏𐴞𐴥 𐴌𐴝𐴙𐴑𐴧𐴠𐴥, 𐴎𐴠𐴀𐴕𐴠 𐴀𐴝𐴣𐴀𐴌𐴝 𐴀𐴞𐴥𐴁𐴝𐴌 𐴕𐴡𐴎𐴡𐴌𐴡𐴃𐴢 𐴂𐴝𐴑 𐴀𐴠𐴊𐴧𐴠 𐴁𐴠𐴈𐴡𐴏𐴟𐴥𐴌 𐴀𐴡𐴥𐴘𐴎𐴝𐴘𐴒𐴡𐴘. 𐴔𐴟𐴇𐴝𐴥𐴁𐴧𐴡𐴃𐴠⁵𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴑𐴟𐴥𐴐𐴞 𐴀𐴠𐴊𐴧𐴠 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴀𐴝𐴒𐴠 𐴓𐴡𐴥𐴃𐴞 𐴀𐴝𐴣𐴀𐴌𐴝𐴌 𐴉𐴝𐴥𐴘𐴏𐴠𐴓𐴝 𐴒𐴡𐴌𐴞𐴥 𐴌𐴝𐴙𐴑𐴧𐴠𐴥 𐴊𐴠, 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴊𐴟𐴖𐴝𐴌𐴝 𐴀𐴝𐴣𐴀𐴌𐴝𐴌𐴠 𐴀𐴞𐴥𐴁𐴝𐴌 𐴉𐴟𐴀𐴝𐴙𐴕 𐴁𐴝𐴕𐴝𐴘𐴃𐴡𐴥;⁶𐴇𐴠𐴥𐴃𐴡𐴓𐴧𐴝 𐴘𐴝𐴓𐴝 𐴀𐴞𐴥𐴁𐴝𐴌 𐴌𐴝𐴇𐴝𐴥𐴔𐴡𐴃𐴡𐴌 𐴔𐴡𐴈𐴞𐴥𐴔𐴝𐴌 𐴃𐴝𐴦𐴌𐴞𐴉𐴢 𐴀𐴡𐴥𐴘𐴁𐴡, 𐴎𐴞𐴘𐴝𐴥𐴕 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴝𐴌𐴠 𐴀𐴞𐴥𐴁𐴝𐴌 𐴀𐴝𐴊𐴡𐴙𐴅𐴧𐴝 𐴖𐴝𐴌 𐴀𐴟𐴏𐴞𐴥𐴓𐴝𐴘𐴠 𐴒𐴡𐴙𐴅𐴧𐴠𐴥.⁷𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠, 𐴀𐴝𐴣𐴀𐴌𐴝 𐴇𐴠𐴥 𐴔𐴡𐴀𐴏𐴞𐴤𐴌 𐴓𐴡𐴖𐴢 𐴖𐴡𐴥𐴌 𐴀𐴟𐴏𐴞𐴥𐴓𐴝𐴘𐴠 𐴀𐴝𐴎𐴝𐴊𐴢 𐴀𐴡𐴥𐴘𐴧𐴞, 𐴘𐴝𐴥𐴕𐴞 𐴀𐴝𐴣𐴀𐴌𐴝𐴌 𐴒𐴟𐴕𐴝𐴤-𐴇𐴝𐴥𐴃𐴝 𐴀𐴡𐴥𐴑𐴧𐴡𐴓𐴢 𐴔𐴝𐴉𐴢 𐴉𐴝𐴘𐴧𐴞𐴥. 𐴀𐴝𐴓𐴧𐴝𐴌 𐴇𐴠𐴥 𐴌𐴝𐴇𐴝𐴥𐴔𐴡𐴃𐴢 𐴇𐴡𐴃𐴡𐴥 𐴋𐴡𐴣𐴀𐴌,⁸𐴎𐴞𐴘𐴝𐴥𐴕 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴝𐴌 𐴖𐴡𐴌𐴠 𐴀𐴡𐴥𐴊𐴡𐴌𐴁𐴝𐴀𐴌𐴝 𐴕𐴝𐴎𐴞𐴓𐴢 𐴒𐴡𐴙𐴅𐴧𐴠𐴥. 𐴕𐴞𐴎𐴡𐴌 𐴉𐴟𐴌𐴝𐴉𐴟𐴌𐴞 𐴒𐴞𐴘𐴝𐴕𐴠 𐴀𐴠𐴊𐴧𐴠 𐴁𐴟𐴎𐴝𐴥 𐴓𐴡𐴥𐴘⁹𐴀𐴞𐴥𐴁𐴝𐴘𐴠 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴕𐴞𐴎𐴡𐴌 𐴒𐴟𐴉𐴡𐴕 𐴔𐴡𐴕𐴐𐴝𐴥𐴌𐴠 𐴀𐴝𐴣𐴀𐴌𐴝𐴌 𐴇𐴝𐴣𐴏𐴠 𐴎𐴝𐴇𐴠𐴥𐴌 𐴒𐴡𐴙𐴅𐴧𐴠𐴥, 𐴎𐴞𐴘𐴝𐴥𐴕 𐴀𐴞𐴥𐴁𐴝𐴘𐴠 𐴔𐴡𐴀𐴏𐴞𐴤𐴌 𐴊𐴟𐴖𐴝𐴌𐴝 𐴉𐴟𐴌𐴝 𐴒𐴡𐴌𐴞𐴥𐴁𐴝𐴌 𐴉𐴝𐴥𐴘𐴏𐴠𐴓𐴝 𐴒𐴡𐴙𐴅𐴧𐴞𐴥𐴓𐴢.¹⁰𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠, 𐴏𐴡𐴥𐴘𐴧𐴞 𐴀𐴡𐴑𐴃𐴡𐴥 𐴉𐴟𐴌𐴝𐴉𐴟𐴌𐴞 𐴀𐴝𐴘𐴓𐴠𐴤, 𐴀𐴝𐴏𐴔𐴝𐴕 𐴎𐴡𐴁𐴞𐴕𐴡𐴃𐴢 𐴎𐴞𐴀𐴕 𐴀𐴝𐴏𐴠𐴤 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴌𐴠 𐴔𐴡𐴀𐴏𐴞𐴤𐴌 𐴁𐴟𐴥𐴃𐴡𐴌𐴠 𐴀𐴠𐴑𐴃𐴡𐴉𐴝𐴥𐴑𐴡𐴃𐴢 𐴀𐴝𐴕𐴡𐴤𐴕.

¹¹𐴎𐴞𐴁𐴝𐴤𐴘𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴕𐴞𐴎𐴡𐴌 𐴔𐴡𐴕𐴐𐴝𐴥𐴌 𐴀𐴠𐴌𐴝𐴊𐴝 𐴔𐴡𐴎𐴞𐴕 𐴒𐴡𐴌𐴠𐴥, 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴔𐴡𐴑𐴏𐴡𐴥𐴃𐴢 𐴔𐴡𐴎𐴞𐴕 𐴀𐴝𐴒𐴠 𐴓𐴡𐴥𐴃𐴞 𐴀𐴝𐴣𐴀𐴌𐴝𐴌 𐴎𐴠 𐴉𐴝𐴥𐴘𐴏𐴠𐴓𐴝 𐴒𐴡𐴌𐴞𐴥 𐴌𐴝𐴙𐴑𐴧𐴠𐴥, 𐴇𐴞𐴥𐴘𐴝𐴕𐴡𐴓𐴧𐴝 𐴁𐴡𐴥𐴓𐴞 𐴀𐴝𐴣𐴀𐴌𐴝 𐴔𐴡𐴀𐴏𐴞𐴤𐴌 𐴎𐴡𐴌𐴞𐴘𐴝 𐴀𐴠𐴑𐴧𐴝𐴥𐴕 𐴔𐴞𐴌𐴝𐴏𐴡𐴌 𐴁𐴝𐴥𐴒𐴞 𐴘𐴡𐴥 𐴀𐴡𐴥𐴘𐴧𐴞,¹²𐴎𐴠𐴀𐴕𐴠 𐴀𐴝𐴣𐴀𐴌𐴝 𐴎𐴠𐴃𐴝𐴌𐴝𐴤 𐴔𐴡𐴀𐴏𐴞𐴤𐴌 𐴖𐴡𐴌𐴠 𐴀𐴝𐴒𐴡𐴃𐴧𐴟 𐴀𐴝𐴐𐴝𐴤 𐴌𐴝𐴙𐴑𐴧𐴞𐴥, 𐴀𐴝𐴣𐴀𐴌𐴝𐴌 𐴊𐴟𐴖𐴝𐴌𐴝 𐴀𐴞𐴥𐴁𐴝𐴌 𐴔𐴡𐴈𐴞𐴥𐴔𐴝𐴌 𐴃𐴝𐴦𐴌𐴞𐴉𐴢 𐴀𐴡𐴥.¹³𐴃𐴟𐴣𐴀𐴝𐴥𐴌𐴝 𐴘𐴡𐴥 𐴃𐴡 𐴏𐴡𐴥𐴘𐴧𐴞 𐴑𐴝𐴓𐴝𐴔, 𐴘𐴝𐴥𐴕𐴞 𐴃𐴟𐴣𐴀𐴝𐴥𐴌𐴝𐴌 𐴕𐴠𐴅𐴝𐴃𐴡𐴌 𐴑𐴟𐴥𐴐𐴈𐴡𐴥𐴁𐴡𐴌 𐴉𐴟𐴥𐴕𐴞 𐴇𐴠𐴥 𐴔𐴡𐴀𐴏𐴞𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴡𐴤. 𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝 𐴀𐴞𐴔𐴝𐴕 𐴀𐴝𐴙𐴕𐴧𐴡𐴤, 𐴀𐴞𐴥𐴁𐴝𐴌 𐴎𐴡𐴌𐴞𐴘𐴝 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴘𐴡𐴥 𐴖𐴝𐴦𐴊𐴝 𐴒𐴡𐴙𐴅𐴧𐴝𐴥 𐴂𐴝𐴑-𐴌𐴟𐴀 𐴔𐴡𐴀𐴌 𐴓𐴝𐴒𐴝𐴘𐴊𐴞𐴘𐴝 𐴒𐴞𐴘𐴠𐴥,¹⁴𐴎𐴞𐴁𐴝𐴤 𐴀𐴡𐴥𐴙𐴓𐴊𐴠 𐴀𐴝𐴣𐴀𐴌𐴝𐴌 𐴔𐴞𐴌𐴝𐴏𐴡𐴌 𐴁𐴡𐴦𐴕𐴝, 𐴀𐴡𐴃𐴡𐴥𐴊𐴞𐴕 𐴉𐴡𐴙𐴅𐴧𐴡𐴕𐴃𐴡𐴓𐴧𐴝 𐴎𐴠𐴃𐴡𐴥𐴊𐴞𐴕 𐴀𐴝𐴓𐴧𐴝𐴌 𐴑𐴞𐴕𐴧𐴝 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴌𐴠 𐴉𐴟𐴌𐴝𐴉𐴟𐴌𐴞 𐴇𐴝𐴥𐴓𐴝𐴏𐴢 𐴒𐴡𐴌𐴞𐴥𐴉𐴠𐴓𐴝 𐴕𐴡𐴥 𐴎𐴝, 𐴎𐴠𐴀𐴕𐴠 𐴀𐴞𐴥𐴁𐴝𐴌 𐴔𐴡𐴈𐴞𐴥𐴔𐴝𐴌 𐴃𐴝𐴦𐴌𐴞𐴉𐴢 𐴀𐴡𐴥.

𐴂𐴝𐴥𐴀𐴟𐴓𐴡𐴌 𐴊𐴟𐴖𐴝

¹⁵𐴇𐴠𐴥𐴃𐴡𐴓𐴧𐴝 𐴃𐴡 𐴃𐴟𐴣𐴀𐴝𐴥𐴌𐴝𐴃𐴧𐴟 𐴔𐴝𐴓𐴞𐴑 𐴀𐴞𐴏𐴝𐴤𐴌 𐴖𐴡𐴌𐴠 𐴎𐴠 𐴀𐴞𐴔𐴝𐴕 𐴀𐴝𐴏𐴠𐴤 𐴀𐴠𐴊𐴧𐴠 𐴀𐴝𐴓𐴧𐴝𐴌 𐴃𐴝𐴔𐴝𐴥𐴔 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴓𐴧𐴝 𐴎𐴠 𐴔𐴟𐴇𐴝𐴥𐴁𐴧𐴡𐴃𐴢 𐴀𐴝𐴏𐴠𐴤, 𐴇𐴞𐴥𐴀𐴕 𐴀𐴝𐴀𐴛 𐴉𐴟𐴥𐴙𐴕𐴧𐴞 𐴓𐴡𐴥𐴃𐴞,¹⁶𐴃𐴟𐴣𐴀𐴝𐴥𐴌𐴝𐴓𐴧𐴝 𐴐𐴟𐴥𐴑𐴟𐴌𐴞𐴘𐴝 𐴒𐴡𐴌𐴝𐴥 𐴁𐴡𐴕 𐴒𐴡𐴌𐴞𐴥 𐴕𐴡𐴥 𐴉𐴠𐴓𐴝𐴘, 𐴁𐴡𐴥𐴓𐴑𐴠 𐴀𐴝𐴣𐴀𐴌 𐴊𐴟𐴖𐴝𐴃𐴢 𐴃𐴟𐴣𐴀𐴝𐴥𐴌𐴝𐴌𐴠 𐴘𐴝𐴦𐴊𐴢 𐴌𐴝𐴑𐴞𐴥.¹⁷𐴀𐴝𐴀𐴛 𐴔𐴝𐴒𐴞 𐴊𐴠, 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴀𐴝𐴓𐴧𐴝, 𐴎𐴞𐴁𐴝𐴤 𐴔𐴡𐴈𐴞𐴥𐴔𐴝𐴌 𐴁𐴝𐴉𐴢, 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴒𐴞𐴘𐴝𐴕𐴡𐴌 𐴀𐴠𐴊𐴧𐴠 𐴀𐴝𐴓𐴧𐴝𐴌𐴠 𐴎𐴝𐴇𐴠𐴥𐴌 𐴒𐴡𐴌𐴠𐴥 𐴊𐴠 𐴌𐴟𐴀 𐴊𐴠𐴦 𐴉𐴝𐴥𐴕, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴀𐴞𐴥𐴁𐴝𐴌𐴠 𐴁𐴠𐴀𐴃𐴡𐴌 𐴏𐴞𐴕𐴡𐴥.¹⁸𐴀𐴝𐴀𐴛 𐴀𐴝𐴌𐴡𐴤 𐴊𐴟𐴖𐴝 𐴒𐴡𐴌𐴞𐴥 𐴊𐴠, 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴡𐴌 𐴏𐴟𐴑 𐴑𐴟𐴥𐴕 𐴑𐴟𐴥𐴓𐴡𐴗𐴑, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴎𐴝𐴕𐴡 𐴊𐴠, 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴎𐴠 𐴀𐴝𐴐𐴝𐴤 𐴊𐴞𐴦 𐴋𐴝𐴙𐴑𐴧𐴠𐴥 𐴇𐴞𐴥𐴘𐴝𐴕 𐴑𐴞𐴦, 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴓𐴧𐴝 𐴎𐴠 𐴃𐴝𐴦𐴅𐴟𐴙𐴂𐴧𐴝 𐴔𐴞𐴌𐴝𐴏𐴢 𐴌𐴝𐴙𐴑𐴧𐴠𐴥 𐴇𐴞𐴥𐴘𐴝𐴕 𐴇𐴡𐴃𐴡𐴥 𐴋𐴡𐴣𐴀𐴌,¹⁹𐴀𐴝𐴦𐴌 𐴀𐴞𐴥𐴁𐴝𐴌 𐴎𐴠 𐴑𐴟𐴊𐴟𐴌𐴟𐴃𐴢 𐴀𐴝𐴣𐴀𐴌𐴝 𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴈𐴝𐴔 𐴒𐴡𐴌𐴠𐴥𐴌 𐴇𐴞𐴥𐴘𐴝𐴕 𐴑𐴠𐴀𐴕 𐴐𐴞𐴥𐴔𐴝 𐴏𐴝𐴥𐴌𐴝 𐴋𐴡𐴣𐴀𐴌. 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴋𐴡𐴣𐴀𐴌 𐴑𐴟𐴊𐴟𐴌𐴟𐴃𐴢 𐴖𐴝𐴀𐴕,²⁰𐴎𐴞𐴘𐴝𐴥𐴕 𐴀𐴠𐴏𐴃𐴠𐴔𐴝𐴓𐴢 𐴒𐴡𐴌𐴞𐴥 𐴀𐴞𐴥𐴁𐴝𐴘𐴠 𐴔𐴡𐴀𐴏𐴞𐴤𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴙𐴅𐴧𐴠𐴥 𐴀𐴝𐴦𐴌 𐴀𐴝𐴏𐴔𐴝𐴕𐴞 𐴎𐴝𐴒𐴝𐴃𐴢 𐴀𐴞𐴥𐴁𐴝𐴌𐴠 𐴕𐴞𐴎𐴡𐴌 𐴊𐴠𐴕 𐴋𐴝𐴥𐴑𐴡𐴃𐴧𐴟 𐴁𐴟𐴀𐴝𐴥𐴒𐴝𐴌𐴝𐴘𐴧𐴠,²¹𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴇𐴡𐴥𐴑𐴟𐴔𐴡𐴃𐴡𐴌 𐴖𐴡𐴌𐴠, 𐴀𐴝𐴊𐴞𐴥𐴑𐴝𐴌𐴡𐴌 𐴖𐴡𐴌𐴠, 𐴃𐴝𐴦𐴑𐴡𐴃𐴡𐴌 𐴖𐴡𐴌𐴠, 𐴏𐴡𐴥𐴊𐴧𐴝𐴌𐴞𐴌 𐴖𐴡𐴌𐴠 𐴀𐴠𐴊𐴧𐴠 𐴎𐴠𐴃𐴡𐴥 𐴋𐴡𐴥𐴙𐴓𐴧𐴝 𐴕𐴝𐴔 𐴃𐴟𐴥𐴖𐴝 𐴒𐴞𐴥𐴘𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴌 𐴖𐴡𐴌𐴠, 𐴏𐴞𐴌𐴞𐴥𐴉𐴢 𐴀𐴠 𐴅𐴝𐴥𐴈𐴝𐴕𐴡𐴃𐴢 𐴕𐴡 𐴁𐴡𐴥𐴓𐴑𐴠 𐴀𐴝𐴘𐴁𐴡𐴤 𐴊𐴠 𐴅𐴝𐴥𐴈𐴝𐴕𐴡𐴃𐴢 𐴀𐴡𐴥.²²𐴀𐴝𐴓𐴧𐴝𐴘𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴀𐴞𐴥𐴁𐴝𐴌 𐴉𐴡𐴦𐴌 𐴃𐴡𐴓𐴠 𐴒𐴡𐴌𐴞𐴥𐴊𐴞𐴘𐴠, 𐴀𐴝𐴦𐴌 𐴀𐴞𐴥𐴁𐴝𐴌𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥𐴌 𐴔𐴝𐴃𐴝𐴥 𐴁𐴝𐴕𐴝𐴘 𐴎𐴡𐴔𐴝𐴥𐴃𐴡𐴌𐴠 𐴊𐴞𐴦𐴉𐴠𐴥𐴓𐴝𐴘𐴧𐴠;²³𐴎𐴞𐴁𐴝𐴤 𐴀𐴡𐴥𐴙𐴓𐴊𐴠 𐴀𐴞𐴥𐴁𐴝𐴌 𐴒𐴝𐴦; 𐴀𐴞𐴥𐴁𐴝 𐴎𐴞𐴁𐴝𐴤𐴘𐴠 𐴕𐴞𐴥𐴑𐴞 𐴁𐴠𐴒𐴧𐴟𐴥𐴓𐴧𐴝 𐴁𐴠𐴒𐴧𐴟𐴥𐴕 𐴉𐴟𐴌𐴝𐴘𐴉𐴠𐴥𐴓𐴠, 𐴀𐴞𐴥𐴁𐴝 𐴇𐴠𐴥 𐴎𐴡𐴔𐴝𐴥𐴃𐴢 𐴓𐴡𐴥𐴘 𐴁𐴠 𐴉𐴟𐴌𐴝𐴉𐴟𐴌𐴞 𐴀𐴡𐴥.

The Word for the World International

https://app.library.bible/content/87faca8b51c22590