Read 𐴑𐴡𐴓𐴡𐴥𐴐𐴞𐴀𐴡𐴥𐴓𐴢 3

𐴑𐴡𐴓𐴡𐴥𐴐𐴞𐴀𐴡𐴥𐴓𐴢3

¹𐴇𐴠𐴥𐴃𐴡𐴓𐴧𐴝, 𐴃𐴟𐴣𐴀𐴝𐴥𐴌𐴝𐴌𐴠 𐴎𐴠𐴃𐴧𐴡𐴥𐴃𐴢 𐴔𐴡𐴀𐴏𐴞𐴤𐴌 𐴉𐴟𐴥𐴖𐴝𐴣𐴃𐴞 𐴎𐴞𐴕𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠, 𐴃𐴟𐴣𐴀𐴝𐴥𐴌𐴝 𐴀𐴟𐴀𐴙𐴕𐴡𐴌 𐴃𐴝𐴓𐴝𐴐𐴡𐴃𐴢 𐴃𐴝𐴥𐴑𐴡 𐴎𐴞𐴀𐴕 𐴀𐴝𐴏𐴔𐴝𐴕𐴡𐴃𐴢 𐴀𐴝𐴏𐴠𐴤, 𐴎𐴠𐴍𐴠𐴥 𐴔𐴡𐴀𐴏𐴞𐴤 𐴀𐴝𐴓𐴧𐴝𐴌 𐴊𐴠𐴕 𐴋𐴝𐴥𐴑𐴡𐴃𐴧𐴟 𐴁𐴡𐴘𐴍𐴝𐴤 𐴀𐴝𐴏𐴠𐴤.²𐴃𐴟𐴣𐴀𐴝𐴥𐴌𐴝𐴌 𐴑𐴞𐴥𐴘𐴝𐴓𐴢 𐴀𐴝𐴏𐴔𐴝𐴕𐴞 𐴒𐴟𐴥𐴕𐴡𐴌 𐴀𐴟𐴎𐴟 𐴌𐴝𐴑𐴡𐴥, 𐴊𐴟𐴕𐴞𐴘𐴝𐴘𐴁𐴞 𐴒𐴟𐴥𐴕𐴡𐴌 𐴀𐴟𐴎𐴟 𐴕𐴡.³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴔𐴡𐴌𐴞𐴒𐴞𐴘𐴡𐴥𐴒𐴡𐴘, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝𐴌 𐴎𐴞𐴕𐴊𐴞𐴒𐴞 𐴔𐴡𐴀𐴏𐴞𐴤𐴌 𐴉𐴟𐴥𐴖𐴝𐴣𐴃𐴞 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴓𐴟𐴑𐴝𐴘𐴧𐴝 𐴀𐴝𐴏𐴠𐴤.⁴𐴎𐴠𐴣𐴃𐴧𐴠𐴥 𐴔𐴡𐴀𐴏𐴞𐴤, 𐴎𐴞𐴁𐴝𐴤 𐴀𐴡𐴥𐴙𐴓𐴊𐴠 𐴀𐴝𐴣𐴀𐴌𐴝𐴌 𐴎𐴞𐴕𐴊𐴞𐴒𐴞, 𐴎𐴝𐴇𐴠𐴥𐴌 𐴀𐴡𐴥𐴘𐴁𐴡, 𐴇𐴠𐴥𐴣𐴃𐴧𐴠 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴔𐴡𐴈𐴞𐴥𐴔𐴝𐴌 𐴏𐴝𐴥𐴀𐴣𐴃𐴠 𐴎𐴝𐴇𐴠𐴥𐴌 𐴀𐴡𐴥𐴘𐴁𐴝.

𐴉𐴟𐴌𐴝𐴕𐴝 𐴀𐴠𐴊𐴧𐴠 𐴕𐴡𐴘𐴝 𐴎𐴞𐴕𐴊𐴞𐴒𐴞

⁵𐴇𐴠𐴥𐴃𐴡𐴓𐴧𐴝, 𐴃𐴟𐴣𐴀𐴝𐴥𐴌𐴝 𐴕𐴞𐴎𐴡𐴌 𐴊𐴟𐴕𐴞𐴘𐴝𐴘𐴁𐴞 𐴉𐴞𐴥𐴃𐴡𐴌𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴔𐴝𐴌𐴞𐴉𐴠𐴥𐴓𐴡, 𐴎𐴠𐴕𐴊𐴞𐴓𐴧𐴝 𐴕𐴞𐴑𐴞, 𐴎𐴠𐴕𐴝𐴤𐴑𐴝𐴌𐴞, 𐴕𐴝𐴉𐴝𐴑𐴞, 𐴑𐴟𐴑𐴞𐴥𐴘𐴝𐴓𐴢, 𐴁𐴟𐴌𐴝 𐴔𐴡𐴕𐴐𐴝𐴥, 𐴀𐴠𐴊𐴧𐴠 𐴓𐴝𐴓𐴏𐴞𐴥 𐴎𐴞𐴘𐴝𐴥𐴕 𐴀𐴡𐴥𐴙𐴓𐴊𐴠 𐴔𐴟𐴃𐴧𐴞 𐴉𐴟𐴣𐴎𐴝 𐴓𐴡𐴘 𐴁𐴡𐴌𐴝𐴁𐴡𐴌.⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴕𐴝𐴉𐴡𐴥𐴌𐴔𐴝𐴕 𐴀𐴡𐴥𐴑𐴧𐴡𐴓𐴡𐴌 𐴖𐴡𐴌𐴠 𐴀𐴝𐴓𐴧𐴝𐴌 𐴒𐴡𐴎𐴧𐴡𐴁𐴢 𐴃𐴡 𐴇𐴞𐴥𐴀𐴕𐴡𐴌 𐴎𐴡𐴌𐴞𐴘𐴝 𐴀𐴠𐴥𐴕𐴝 𐴀𐴝𐴘𐴧𐴠𐴤𐴌,⁷𐴎𐴞𐴀𐴕𐴡𐴃𐴢 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴀𐴠𐴑 𐴇𐴝𐴓𐴠 𐴏𐴡𐴙𐴓𐴧𐴞𐴥𐴓𐴝, 𐴎𐴠𐴣𐴃𐴧𐴠𐴥 𐴕𐴞𐴥𐴑𐴞 𐴃𐴟𐴣𐴀𐴝𐴥𐴌𐴝 𐴇𐴞𐴥𐴀𐴕 𐴔𐴡𐴎𐴞𐴕 𐴎𐴞𐴕𐴊𐴞𐴒𐴞 𐴈𐴝𐴍𐴝𐴀𐴘𐴓𐴝.⁸𐴓𐴠𐴑𐴞𐴕 𐴘𐴝𐴓𐴝 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴞𐴀𐴕 𐴁𐴠𐴒𐴧𐴟𐴥𐴕 𐴀𐴡𐴥 𐴊𐴟𐴌 𐴒𐴡𐴌𐴞𐴥𐴉𐴠𐴓𐴡: 𐴒𐴟𐴐𐴧𐴝𐴤, 𐴌𐴝𐴑, 𐴊𐴟𐴐𐴧𐴡𐴕𐴞, 𐴁𐴡𐴊𐴕𐴝𐴔𐴞, 𐴀𐴠𐴊𐴧𐴠 𐴔𐴟𐴑𐴡𐴃𐴧𐴟 𐴁𐴠𐴌𐴠𐴙𐴅𐴧𐴝 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢.⁹𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴔𐴞𐴏𐴝𐴥 𐴈𐴡𐴃𐴝𐴤 𐴕𐴡 𐴈𐴡𐴘𐴧𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴕𐴞𐴎𐴡𐴌 𐴉𐴟𐴌𐴝𐴕𐴝 𐴉𐴞𐴥𐴃𐴡𐴌𐴡𐴃𐴡𐴌𐴠 𐴇𐴞𐴥𐴘𐴝𐴕𐴡𐴌 𐴇𐴡𐴥𐴌𐴑𐴡𐴃𐴢 𐴐𐴡𐴥𐴀 𐴑𐴟𐴥𐴓𐴞 𐴉𐴠𐴥𐴓𐴝𐴘𐴊𐴞𐴘𐴡,¹⁰𐴀𐴝𐴦𐴌 𐴕𐴡𐴘𐴝 𐴉𐴞𐴥𐴃𐴡𐴌𐴡𐴃𐴡𐴌𐴠 𐴉𐴞𐴣𐴊𐴞𐴥𐴉𐴠𐴓𐴝𐴘𐴧𐴡, 𐴎𐴞𐴘𐴝𐴥𐴕𐴡𐴌𐴠 𐴇𐴞𐴥𐴘𐴝𐴕𐴡𐴌 𐴁𐴝𐴕𐴞𐴌 𐴏𐴟𐴥𐴌𐴡𐴃𐴢 𐴔𐴡𐴎𐴞𐴕 𐴕𐴡𐴘𐴝 𐴒𐴡𐴌𐴝𐴥 𐴎𐴝𐴥𐴃𐴢 𐴀𐴝𐴏𐴠𐴤, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴀𐴞𐴥𐴁𐴝𐴌𐴠 𐴉𐴟𐴌𐴝𐴉𐴟𐴌𐴞𐴌 𐴏𐴝𐴥𐴀𐴣𐴃𐴠 𐴎𐴝𐴕𐴡.¹¹𐴇𐴞𐴥𐴘𐴝𐴕𐴡𐴃𐴢 𐴁𐴠𐴘𐴡𐴇𐴟𐴥𐴊𐴞 𐴀𐴠𐴊𐴧𐴠 𐴘𐴡𐴇𐴟𐴥𐴊𐴞𐴌 𐴁𐴟𐴥𐴃𐴡𐴌𐴠, 𐴀𐴝𐴥𐴎𐴡𐴔𐴞 𐴒𐴡𐴙𐴅𐴧𐴝𐴥 𐴀𐴠𐴊𐴧𐴠 𐴁𐴠-𐴀𐴝𐴥𐴎𐴡𐴔𐴞 𐴒𐴡𐴙𐴅𐴧𐴝𐴥𐴌 𐴁𐴟𐴥𐴃𐴡𐴌𐴠, 𐴁𐴞𐴊𐴠𐴐𐴡𐴥𐴙𐴃𐴧𐴝, 𐴒𐴝𐴛𐴘𐴝, 𐴒𐴟𐴓𐴝𐴔, 𐴀𐴠𐴊𐴧𐴠 𐴁𐴠𐴒𐴟𐴓𐴝𐴔𐴡𐴌 𐴁𐴟𐴥𐴃𐴡𐴌𐴠 𐴇𐴡𐴕𐴡𐴤 𐴉𐴡𐴌𐴡𐴥𐴑 𐴕𐴝𐴥𐴘, 𐴔𐴡𐴕𐴃𐴡𐴌 𐴔𐴡𐴀𐴏𐴞𐴤 𐴁𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥, 𐴀𐴝𐴦𐴌 𐴀𐴞𐴥𐴁𐴝 𐴁𐴠𐴒𐴧𐴟𐴥𐴕𐴡𐴌 𐴁𐴟𐴥𐴃𐴡𐴌𐴠 𐴀𐴝𐴏𐴠𐴤.

¹²𐴇𐴠𐴥𐴃𐴡𐴓𐴧𐴝, 𐴃𐴟𐴣𐴀𐴝𐴥𐴌𐴝 𐴎𐴠𐴃𐴧𐴡𐴥𐴃𐴢 𐴀𐴝𐴓𐴧𐴝𐴌 𐴁𐴝𐴙𐴐𐴧𐴝𐴥, 𐴂𐴝𐴑 𐴀𐴠𐴊𐴧𐴠 𐴀𐴝𐴊𐴡𐴌𐴁𐴡𐴕 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴉𐴠𐴄𐴉𐴟𐴌𐴝𐴕𐴞, 𐴔𐴠𐴀𐴌𐴁𐴝𐴕𐴞, 𐴕𐴞𐴌𐴡𐴥𐴐𐴞, 𐴐𐴞𐴥𐴊𐴝𐴘𐴞, 𐴀𐴠𐴊𐴧𐴠 𐴏𐴡𐴁𐴡𐴥𐴌 𐴓𐴡𐴥𐴘 𐴕𐴞𐴎𐴡𐴌 𐴊𐴞𐴓𐴡𐴌𐴠 𐴇𐴝𐴥𐴣𐴎𐴡.¹³𐴀𐴠𐴎𐴧𐴡𐴕𐴡𐴌 𐴁𐴡𐴥𐴌 𐴀𐴠𐴎𐴧𐴡𐴕𐴠 𐴐𐴡𐴥𐴀, 𐴀𐴝𐴦𐴌 𐴇𐴡𐴕𐴡𐴤𐴑𐴞𐴘𐴡𐴃𐴧𐴟 𐴇𐴡𐴕𐴡𐴤𐴑𐴞𐴘𐴡𐴌 𐴀𐴟𐴓𐴋𐴝 𐴐𐴠𐴥𐴑𐴝𐴘𐴡𐴃𐴢 𐴃𐴝𐴥𐴑𐴞𐴓𐴠 𐴔𐴝𐴉𐴢 𐴒𐴡𐴌𐴞𐴥𐴊𐴡; 𐴔𐴝𐴓𐴞𐴑𐴠 𐴎𐴠𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝𐴌𐴠 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴠 𐴇𐴠𐴥𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝𐴃𐴧𐴟 𐴘𐴡𐴥 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝𐴌 𐴎𐴡𐴌𐴟𐴌.¹⁴𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴌 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴔𐴟𐴇𐴝𐴥𐴁𐴧𐴡𐴃𐴢 𐴓𐴡𐴥𐴘 𐴘𐴡𐴥 𐴇𐴝𐴥𐴣𐴎𐴡, 𐴎𐴞𐴘𐴝𐴥𐴕 𐴀𐴡𐴥𐴙𐴓𐴊𐴠 𐴉𐴟𐴌𐴝𐴉𐴟𐴌𐴞 𐴀𐴠𐴑𐴃𐴡𐴉𐴝𐴥𐴑𐴞𐴌 𐴁𐴝𐴕.

¹⁵𐴔𐴡𐴀𐴏𐴞𐴤𐴌 𐴐𐴝𐴥𐴕𐴃𐴞𐴌𐴠 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴡𐴃𐴢 𐴇𐴡𐴥𐴑𐴟𐴔𐴡𐴃𐴢 𐴒𐴡𐴙𐴃𐴧𐴡𐴥 𐴊𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌𐴠 𐴇𐴠𐴥 𐴐𐴝𐴥𐴕𐴃𐴞𐴃𐴢 𐴀𐴠𐴑 𐴒𐴝𐴦 𐴀𐴡𐴥𐴘 𐴁𐴡𐴓𐴧𐴝 𐴀𐴠𐴥𐴕𐴝 𐴋𐴝𐴈𐴝 𐴒𐴞𐴘𐴠𐴥; 𐴀𐴝𐴦𐴌 𐴐𐴟𐴥𐴑𐴟𐴌𐴞𐴘𐴝 𐴒𐴡𐴌𐴝𐴥𐴃𐴢 𐴃𐴝𐴥𐴑𐴡.¹⁶𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴡𐴃𐴢 𐴔𐴡𐴀𐴏𐴞𐴤𐴌 𐴑𐴝𐴓𐴝𐴔𐴡𐴌𐴠 𐴉𐴟𐴌𐴝𐴉𐴟𐴌𐴞𐴌 𐴏𐴝𐴥𐴀𐴣𐴃𐴠 𐴃𐴝𐴥𐴑𐴞𐴃𐴡 𐴊𐴡𐴥, 𐴃𐴝𐴔𐴝𐴥𐴔 𐴒𐴞𐴘𐴝𐴕𐴠 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴃𐴝𐴦𐴓𐴞𐴔 𐴊𐴞𐴘𐴡𐴌𐴠 𐴀𐴠𐴊𐴧𐴠 𐴕𐴡𐴏𐴞𐴥𐴘𐴡𐴃𐴢 𐴒𐴡𐴌𐴞𐴥𐴘𐴡𐴌𐴠, 𐴀𐴝𐴦𐴌 𐴕𐴞𐴎𐴡𐴌 𐴊𐴞𐴓𐴡𐴃𐴢 𐴐𐴟𐴥𐴑𐴟𐴌𐴞𐴘𐴝𐴌 𐴕𐴞𐴘𐴡𐴃𐴢 𐴌𐴝𐴑𐴞𐴥 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴎𐴡𐴁𐴟𐴌 𐴐𐴡𐴥𐴌𐴞𐴉𐴡𐴌 𐴑𐴝𐴖𐴝𐴓𐴞, 𐴏𐴠𐴀𐴌, 𐴀𐴠𐴊𐴧𐴠 𐴌𐴟𐴀𐴈𐴝𐴥𐴕𐴞𐴌 𐴒𐴡𐴎𐴡𐴥𐴓𐴢 𐴀𐴡𐴥𐴑𐴧𐴡𐴓𐴢 𐴒𐴝𐴀𐴘𐴧𐴡𐴌𐴠.¹⁷𐴃𐴟𐴣𐴀𐴝𐴥𐴌𐴝 𐴎𐴞𐴀𐴕 𐴈𐴡𐴘𐴁𐴝𐴤 𐴈𐴡𐴀 𐴀𐴝𐴦𐴌 𐴎𐴞𐴀𐴕 𐴒𐴡𐴌𐴞𐴥𐴁𐴝 𐴒𐴡𐴌𐴡𐴤, 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴔𐴝𐴓𐴞𐴑 𐴀𐴞𐴏𐴝𐴤𐴌 𐴕𐴝𐴔𐴠 𐴁𐴠 𐴒𐴡𐴙𐴅𐴧𐴡𐴥, 𐴀𐴝𐴦𐴌 𐴇𐴠𐴥𐴣𐴃𐴧𐴠 𐴀𐴞𐴥𐴁𐴝𐴌 𐴀𐴟𐴏𐴞𐴥𐴓𐴝𐴘𐴠 𐴁𐴝𐴉𐴢 𐴀𐴝𐴓𐴧𐴝𐴌 𐴐𐴟𐴥𐴑𐴟𐴌 𐴀𐴡𐴥 𐴒𐴡𐴙𐴅𐴧𐴡𐴥.

𐴀𐴞𐴏𐴝𐴤𐴘𐴞 𐴀𐴡𐴥𐴑𐴧𐴡𐴓𐴡𐴌 𐴉𐴡𐴥𐴌𐴡𐴏𐴢

¹⁸𐴁𐴡𐴖𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴕𐴞𐴎𐴡𐴌𐴠𐴥 𐴕𐴞𐴎𐴡𐴌-𐴕𐴞𐴎𐴡𐴌 𐴇𐴡𐴥𐴐𐴡𐴔𐴡𐴌 𐴇𐴝𐴣𐴏𐴠 𐴒𐴡𐴏𐴝𐴥𐴘𐴊𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴓𐴞𐴑𐴡𐴌 𐴁𐴟𐴥𐴃𐴡𐴌𐴠 𐴇𐴞𐴥𐴘𐴝𐴕 𐴄𐴞𐴥𐴑 𐴈𐴝𐴔.

¹⁹𐴇𐴡𐴥𐴐𐴡𐴔 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴕𐴞𐴎𐴡𐴌-𐴕𐴞𐴎𐴡𐴌 𐴁𐴡𐴖𐴢 𐴖𐴡𐴥𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴡𐴤; 𐴀𐴞𐴥𐴃𐴝𐴌𐴝𐴓𐴧𐴝 𐴃𐴞𐴃𐴝 𐴕𐴡 𐴀𐴡𐴥𐴘𐴧𐴡.

²⁰𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴢, 𐴇𐴝𐴥𐴀𐴌 𐴑𐴠𐴏𐴧𐴟𐴥𐴃𐴢 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴔𐴝𐴦𐴌 𐴈𐴡𐴃𐴝𐴤𐴁𐴝𐴃𐴧𐴝𐴌𐴝 𐴔𐴝𐴕𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴘𐴝𐴕𐴠 𐴔𐴝𐴓𐴞𐴑 𐴑𐴟𐴥𐴐𐴞 𐴀𐴡𐴥.

²¹𐴁𐴝𐴉𐴝𐴥𐴙𐴕, 𐴕𐴞𐴎𐴡𐴌 𐴉𐴟𐴀𐴝𐴙𐴕 𐴊𐴡𐴌𐴠 𐴕𐴡 𐴎𐴝𐴓𐴝𐴘𐴧𐴡𐴥, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝𐴌 𐴊𐴞𐴓𐴢 𐴕𐴡 𐴁𐴝𐴥𐴚𐴒𐴠.

²²𐴒𐴟𐴓𐴝𐴔 𐴀𐴡𐴥𐴑𐴧𐴡𐴓𐴢, 𐴇𐴝𐴥𐴀𐴌 𐴑𐴠𐴏𐴧𐴟𐴥𐴃𐴢 𐴃𐴟𐴣𐴀𐴝𐴥𐴌𐴝𐴌 𐴊𐴟𐴕𐴞𐴘𐴝𐴘𐴁𐴞 𐴒𐴞𐴌𐴡𐴥𐴏𐴢 𐴀𐴡𐴥𐴑𐴧𐴡𐴓𐴡𐴌 𐴈𐴡𐴃𐴝𐴤𐴁𐴝𐴃𐴧𐴝𐴌𐴝 𐴔𐴝𐴕𐴡, 𐴔𐴝𐴙𐴕𐴐𐴡𐴥𐴌𐴠 𐴑𐴟𐴥𐴐𐴞 𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴡𐴌 𐴋𐴡𐴥𐴙𐴓𐴧𐴝 𐴊𐴝𐴈𐴝𐴤𐴘 𐴁𐴡𐴓𐴧𐴝 𐴕𐴡, 𐴁𐴡𐴥𐴓𐴑𐴠 𐴔𐴝𐴓𐴞𐴑𐴡𐴌 𐴋𐴡𐴦𐴌 𐴌𐴝𐴑𐴞𐴥 𐴊𐴞𐴓𐴡𐴌 𐴀𐴠𐴈𐴠𐴥𐴓𐴝𐴏𐴞𐴌 𐴏𐴝𐴥𐴀𐴣𐴃𐴠 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴡𐴤.²³𐴃𐴟𐴣𐴀𐴝𐴥𐴌𐴝 𐴎𐴞𐴀𐴕 𐴒𐴡𐴌𐴡𐴤 𐴇𐴞𐴥𐴀𐴕 𐴀𐴠𐴕𐴊𐴞𐴓𐴧𐴝 𐴉𐴟𐴌𐴝 𐴊𐴞𐴓𐴔𐴡𐴕 𐴊𐴞 𐴒𐴡𐴌𐴡𐴤, 𐴎𐴠𐴀𐴕 𐴕𐴞𐴥𐴑𐴞 𐴔𐴝𐴓𐴞𐴑𐴡𐴓𐴧𐴝 𐴁𐴠 𐴒𐴡𐴌𐴡𐴤𐴌, 𐴀𐴞𐴕𐴏𐴝𐴥𐴕𐴡𐴓𐴧𐴝 𐴕𐴡.²⁴𐴃𐴟𐴣𐴀𐴝𐴥𐴌𐴝 𐴃𐴡 𐴎𐴝𐴕𐴡, 𐴃𐴟𐴣𐴀𐴝𐴥𐴌𐴝 𐴔𐴝𐴓𐴞𐴑𐴡𐴌 𐴃𐴡𐴌𐴉𐴡𐴥𐴃𐴧𐴟 𐴔𐴞𐴌𐴝𐴏𐴢 𐴁𐴡𐴐𐴧𐴞𐴥𐴐𐴢 𐴉𐴝𐴘𐴁𐴝. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴔𐴝𐴓𐴞𐴑 𐴔𐴡𐴀𐴏𐴞𐴤𐴌 𐴀𐴠𐴥𐴕𐴝 𐴇𐴠𐴥𐴊𐴔𐴡𐴃𐴢 𐴒𐴡𐴌𐴡𐴤𐴌.²⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴦𐴕𐴞𐴑𐴞 𐴁𐴟𐴌𐴝 𐴈𐴝𐴔 𐴒𐴡𐴌𐴠𐴥 𐴀𐴞𐴥𐴃𐴠 𐴕𐴞𐴎𐴠 𐴒𐴡𐴙𐴅𐴧𐴠𐴥 𐴊𐴠 𐴇𐴠𐴥 𐴁𐴟𐴌𐴝 𐴈𐴝𐴔𐴡𐴌 𐴕𐴡𐴃𐴞𐴎𐴝 𐴉𐴝𐴘𐴁𐴡, 𐴇𐴠𐴥𐴍𐴠 𐴇𐴡𐴕𐴡𐴤 𐴀𐴠𐴑𐴃𐴡𐴌𐴉𐴞𐴥𐴘𐴝 𐴕𐴝𐴥𐴘.

The Word for the World International

https://app.library.bible/content/87faca8b51c22590