Read 𐴈𐴝𐴔𐴡𐴥𐴓𐴢 13

𐴈𐴝𐴔𐴡𐴥𐴓𐴢13

𐴁𐴝𐴥𐴌𐴕𐴝𐴁𐴝𐴏𐴢 𐴀𐴠𐴊𐴧𐴠 𐴏𐴝𐴥𐴀𐴟𐴓𐴡𐴌𐴠 𐴁𐴝𐴏𐴞𐴥𐴓𐴡𐴘 𐴊𐴞𐴉𐴠𐴍𐴝𐴥𐴘𐴧𐴠

¹𐴀𐴠𐴕𐴄𐴞𐴘𐴡𐴑𐴡𐴌 𐴎𐴡𐴔𐴝𐴥𐴃𐴡𐴃𐴢 𐴇𐴡𐴦𐴎𐴧𐴡𐴕 𐴕𐴡𐴁𐴞 𐴀𐴠𐴊𐴧𐴠 𐴀𐴟𐴏𐴃𐴝𐴃𐴢 𐴀𐴝𐴐𐴧𐴞𐴥𐴓𐴢. 𐴀𐴞𐴥𐴃𐴝𐴌𐴝 𐴀𐴡𐴥𐴙𐴓𐴊𐴠 𐴁𐴝𐴥𐴌𐴕𐴝𐴁𐴝𐴏𐴢, 𐴏𐴞𐴥𐴔𐴞𐴘𐴡𐴕 𐴎𐴞𐴁𐴝𐴤𐴌𐴠 𐴇𐴝𐴓𐴝𐴘𐴧𐴝 𐴋𐴝𐴑𐴠, 𐴑𐴟𐴌𐴠𐴕𐴞 𐴐𐴡𐴥𐴀𐴌𐴡𐴌 𐴓𐴟𐴑𐴞𐴘𐴟𐴏𐴢, 𐴇𐴡𐴥𐴑𐴟𐴔𐴡𐴃𐴢-𐴒𐴡𐴌𐴡𐴤𐴘𐴝 𐴈𐴠𐴥𐴌𐴟𐴊𐴡𐴌 𐴉𐴝𐴓𐴡𐴑 𐴁𐴝𐴥𐴘 𐴔𐴝𐴕𐴝𐴙𐴕, 𐴀𐴠𐴊𐴧𐴠 𐴏𐴝𐴥𐴀𐴟𐴓𐴢.²𐴀𐴞𐴥𐴃𐴝𐴌𐴝 𐴎𐴠𐴣𐴃𐴧𐴠𐴥 𐴌𐴟𐴎𐴝 𐴌𐴝𐴑𐴞𐴥 𐴔𐴝𐴓𐴞𐴑𐴡𐴌 𐴀𐴠𐴁𐴝𐴦𐴊𐴡𐴃𐴢 𐴒𐴡𐴌𐴠𐴥𐴌, 𐴂𐴝𐴑-𐴌𐴟𐴀𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴁𐴝𐴥𐴌𐴕𐴝𐴁𐴝𐴏𐴢 𐴀𐴠𐴊𐴧𐴠 𐴏𐴝𐴥𐴀𐴟𐴓𐴡𐴌𐴠 𐴀𐴡 𐴈𐴝𐴔𐴡𐴓𐴧𐴝 𐴈𐴝𐴥𐴀𐴏𐴢 𐴒𐴡𐴌𐴞𐴥 𐴌𐴝𐴑𐴡𐴥, 𐴎𐴠 𐴈𐴝𐴔𐴡𐴓𐴧𐴝 𐴀𐴝𐴀𐴛 𐴀𐴞𐴥𐴃𐴝𐴌𐴝𐴌𐴠 𐴋𐴝𐴈𐴝𐴘𐴧𐴞𐴥.“³𐴃𐴡𐴥𐴘 𐴀𐴞𐴥𐴃𐴝𐴌𐴝 𐴌𐴟𐴎𐴝 𐴌𐴝𐴑𐴞𐴥 𐴀𐴠𐴊𐴧𐴠 𐴊𐴟𐴖𐴝 𐴒𐴡𐴌𐴞𐴥 𐴁𐴝𐴦𐴊𐴠, 𐴇𐴠𐴥 𐴊𐴟𐴕𐴞𐴥 𐴎𐴡𐴕𐴡𐴌 𐴖𐴡𐴌𐴠 𐴀𐴝𐴥𐴃𐴢 𐴊𐴞𐴥 𐴀𐴞𐴥𐴃𐴝𐴌𐴝𐴌𐴠 𐴁𐴞𐴊𐴝𐴘 𐴒𐴡𐴌𐴞𐴥𐴊𐴞𐴘𐴠.

𐴏𐴝𐴥𐴘𐴉𐴌𐴟𐴏𐴡𐴃𐴢 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌 𐴃𐴡𐴁𐴡𐴓𐴞𐴑

⁴𐴃𐴡𐴥𐴘 𐴁𐴝𐴥𐴌𐴕𐴝𐴁𐴝𐴏𐴢 𐴀𐴠𐴊𐴧𐴠 𐴏𐴝𐴥𐴀𐴟𐴓𐴡𐴌𐴠 𐴂𐴝𐴑-𐴌𐴟𐴀𐴌 𐴃𐴡𐴌𐴉𐴡𐴥𐴃𐴧𐴟 𐴊𐴞𐴉𐴠𐴍𐴝𐴥 𐴒𐴞𐴥𐴘𐴠. 𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴏𐴠𐴓𐴟𐴑𐴞𐴥𐴘𐴝𐴃𐴢 𐴒𐴞𐴦𐴘𐴠𐴥, 𐴀𐴝𐴦𐴌 𐴈𐴠𐴥𐴕𐴃𐴟 𐴎𐴝𐴀𐴣𐴏𐴡𐴃𐴢 𐴒𐴡𐴥𐴌𐴞 𐴏𐴝𐴥𐴘𐴉𐴌𐴟𐴏𐴡𐴃𐴢 𐴒𐴞𐴦𐴘𐴠𐴥.⁵𐴀𐴞𐴥𐴃𐴝𐴌𐴝 𐴏𐴝𐴓𐴝𐴔𐴞𐴏𐴢 𐴐𐴡𐴥𐴀𐴌𐴡𐴃𐴢 𐴉𐴡𐴀𐴣𐴏𐴞 𐴔𐴡𐴃𐴧𐴡𐴌 𐴘𐴡𐴇𐴟𐴥𐴊𐴞𐴌 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴡𐴃𐴢 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠. 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴔𐴡𐴊𐴡𐴃𐴒𐴝𐴥𐴌 𐴀𐴞𐴥𐴏𐴝𐴉𐴠 𐴘𐴡𐴇𐴝𐴥𐴕𐴧𐴝 𐴀𐴝𐴐𐴧𐴞𐴥𐴓𐴢.

⁶𐴒𐴟𐴣𐴍𐴝 𐴋𐴞𐴘𐴝 𐴁𐴝𐴥𐴘 𐴎𐴝𐴘 𐴀𐴞𐴥𐴃𐴝𐴌𐴝 𐴂𐴝𐴉𐴡𐴥𐴏𐴢 𐴐𐴡𐴥𐴀𐴌 𐴉𐴡𐴙𐴅𐴧𐴡𐴕𐴃𐴡 𐴒𐴞𐴦𐴘𐴠𐴥. 𐴇𐴠𐴥𐴍𐴠 𐴀𐴞𐴥𐴃𐴝𐴌𐴝 𐴀𐴠𐴒𐴧𐴗𐴝𐴤 𐴘𐴡𐴇𐴟𐴥𐴊𐴞 𐴅𐴝𐴊𐴟𐴒𐴡𐴌 𐴀𐴠𐴊𐴧𐴠 𐴔𐴞𐴏𐴝𐴥 𐴕𐴡𐴁𐴞 𐴓𐴡𐴦𐴃𐴢 𐴉𐴝𐴀𐴙𐴓𐴢 𐴎𐴞𐴁𐴝𐴤𐴌 𐴕𐴝𐴔 𐴁𐴝𐴌-𐴀𐴞𐴏𐴝𐴤.⁷𐴀𐴞𐴥𐴃𐴠 𐴀𐴝𐴐𐴧𐴞𐴥𐴓𐴢 𐴇𐴡𐴥𐴑𐴟𐴔𐴡𐴃𐴢-𐴒𐴡𐴌𐴡𐴤𐴘𐴝 𐴏𐴠𐴌𐴒𐴞𐴘𐴟𐴏𐴢 𐴂𐴝𐴥𐴀𐴟𐴓𐴡𐴌 𐴊𐴟𐴏𐴃𐴡𐴥. 𐴏𐴠𐴌𐴒𐴞𐴘𐴟𐴏𐴢 𐴀𐴠𐴎𐴧𐴡𐴕 𐴁𐴟𐴊𐴧𐴞𐴥𐴔𐴝𐴕 𐴔𐴝𐴕𐴟𐴥𐴙𐴐𐴢 𐴀𐴝𐴐𐴧𐴞𐴥𐴓𐴢, 𐴎𐴞𐴁𐴝𐴤𐴘𐴠 𐴁𐴝𐴥𐴌𐴕𐴝𐴁𐴝𐴏𐴢 𐴀𐴠𐴊𐴧𐴠 𐴏𐴝𐴥𐴀𐴟𐴓𐴡𐴌𐴠 𐴔𐴝𐴃𐴝𐴘𐴃𐴡𐴥 𐴊𐴞𐴉𐴠𐴍𐴝𐴥𐴙𐴓𐴢, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴃𐴧𐴟 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴉𐴟𐴥𐴙𐴕𐴃𐴡 𐴏𐴝𐴀𐴙𐴓𐴢.⁸𐴔𐴡𐴕𐴃𐴡𐴌 𐴅𐴝𐴊𐴟𐴒𐴡𐴌 𐴀𐴠𐴓𐴟𐴔𐴝𐴏𐴠 (𐴘𐴝𐴀𐴕 𐴀𐴡𐴥𐴙𐴓𐴊𐴠 𐴒𐴞𐴌𐴞𐴥𐴑 𐴎𐴟𐴁𐴝𐴕𐴡𐴃𐴢 𐴁𐴝𐴌-𐴀𐴞𐴏𐴝𐴤𐴌 𐴊𐴟𐴏𐴝𐴥𐴌𐴝 𐴕𐴝𐴔) 𐴀𐴞𐴥𐴃𐴝𐴌𐴝𐴌 𐴔𐴟𐴈𐴝𐴥𐴓𐴠𐴉𐴢 𐴒𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴇𐴡𐴥𐴑𐴟𐴔𐴡𐴃𐴢-𐴒𐴡𐴌𐴡𐴤𐴘𐴝𐴌𐴠 𐴀𐴞𐴔𐴝𐴕𐴡𐴃𐴧𐴟 𐴓𐴝𐴌𐴞𐴉𐴠𐴓𐴝𐴘𐴃𐴡 𐴏𐴝𐴀𐴙𐴓𐴢.⁹𐴔𐴡𐴕𐴃𐴡𐴌 𐴏𐴝𐴥𐴀𐴟𐴓𐴢 𐴎𐴞𐴁𐴝𐴤𐴌𐴠 𐴂𐴝𐴥𐴀𐴟𐴓𐴢 𐴀𐴡𐴥 𐴋𐴝𐴑𐴠, 𐴀𐴞𐴥𐴁𐴝 𐴂𐴝𐴑-𐴌𐴟𐴀 𐴓𐴡𐴥𐴘 𐴉𐴟𐴌𐴝𐴘𐴧𐴝 𐴀𐴡𐴥𐴘 𐴀𐴞𐴥𐴃𐴝𐴌 𐴀𐴟𐴎𐴟 𐴏𐴟𐴑 𐴓𐴝𐴒𐴝𐴘𐴊𐴞 𐴏𐴝𐴀𐴘𐴢 𐴈𐴡𐴀𐴌 𐴊𐴠,¹⁰”𐴃𐴟𐴘 𐴀𐴞𐴁𐴞𐴓𐴞𐴥𐴐𐴡𐴌 𐴉𐴟𐴖𐴝, 𐴃𐴟𐴘 𐴇𐴝𐴥𐴀𐴌 𐴑𐴞𐴏𐴞𐴥𐴔𐴡𐴌 𐴊𐴟𐴥𐴑𐴝 𐴀𐴠𐴊𐴧𐴠 𐴉𐴠𐴥𐴌𐴡𐴑𐴁𐴝𐴎𐴞 𐴓𐴡𐴥𐴘 𐴉𐴟𐴌𐴝𐴘𐴧𐴝, 𐴀𐴝𐴦𐴌 𐴇𐴝𐴥𐴀𐴌 𐴒𐴡𐴔 𐴈𐴝𐴔𐴡𐴌 𐴊𐴟𐴐𐴧𐴡𐴕. 𐴃𐴟𐴘 𐴔𐴝𐴓𐴞𐴑𐴡𐴌 𐴀𐴟𐴎𐴟 𐴌𐴝𐴏𐴃𐴝𐴌𐴠 𐴁𐴠𐴈𐴝𐴣 𐴒𐴡𐴌𐴝𐴥 𐴁𐴞𐴓𐴑𐴟𐴥𐴓𐴢 𐴁𐴡𐴕 𐴕𐴡 𐴒𐴡𐴌𐴞𐴥𐴁𐴞 𐴕𐴞𐴥𐴑𐴞؟¹¹𐴏𐴝𐴀, 𐴔𐴝𐴓𐴞𐴑 𐴃𐴡𐴌 𐴀𐴟𐴓𐴋𐴝 𐴃𐴞𐴥𐴘𐴝𐴘𐴧𐴠. 𐴃𐴟𐴘 𐴀𐴝𐴣𐴊𐴝𐴤 𐴀𐴡𐴥𐴘 𐴇𐴡𐴦𐴊𐴧𐴞𐴕 𐴉𐴝𐴥𐴕 𐴁𐴠𐴙𐴓𐴡𐴌 𐴉𐴡𐴀𐴌 𐴀𐴟𐴥𐴊𐴧𐴗𐴝 𐴕𐴡 𐴊𐴠𐴑𐴞𐴥𐴁𐴞.“ 𐴀𐴠𐴁𐴧𐴠 𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌 𐴖𐴡𐴌𐴠 𐴑𐴟𐴥𐴖𐴝 𐴀𐴠𐴊𐴧𐴠 𐴀𐴝𐴕𐴊𐴝𐴤𐴌 𐴀𐴝𐴀𐴘𐴢 𐴉𐴡𐴙𐴅𐴧𐴠𐴥; 𐴀𐴝𐴦𐴌 𐴀𐴞𐴥𐴃𐴝𐴌𐴠 𐴀𐴝𐴥𐴃𐴡𐴃𐴢 𐴊𐴡𐴥𐴌𐴞 𐴓𐴡𐴘𐴎𐴝𐴘 𐴉𐴝𐴌𐴠 𐴉𐴝𐴥𐴕 𐴀𐴞𐴥𐴃𐴠 𐴔𐴝𐴕𐴟𐴥𐴙𐴐𐴢 𐴀𐴝𐴥𐴃𐴝𐴃𐴢 𐴊𐴡𐴙𐴅𐴧𐴠.¹²𐴎𐴞𐴀𐴕 𐴀𐴡𐴥𐴘𐴧𐴠 𐴇𐴞𐴥𐴀𐴕 𐴊𐴠𐴑𐴞𐴥 𐴇𐴡𐴥𐴑𐴟𐴔𐴡𐴃𐴢-𐴒𐴡𐴌𐴡𐴤𐴘𐴝 𐴖𐴝𐴘𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴘𐴠 𐴔𐴝𐴓𐴞𐴑𐴡𐴌 𐴁𐴝𐴦𐴁𐴟𐴃𐴠 𐴎𐴠 𐴃𐴝𐴦𐴓𐴞𐴔 𐴉𐴝𐴘𐴧𐴠𐴥 𐴇𐴞𐴥𐴀𐴕 𐴓𐴡𐴥𐴘 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴓𐴒𐴡𐴘.

𐴂𐴞𐴏𐴞𐴥𐴊𐴞𐴘𐴝𐴌 𐴀𐴠𐴕𐴄𐴞𐴘𐴡𐴑𐴡𐴃𐴢 𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴁𐴝𐴥𐴌𐴕𐴝𐴁𐴝𐴏𐴢

¹³𐴁𐴝𐴦𐴊𐴠 𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴢, 𐴂𐴝𐴉𐴡𐴥𐴏𐴡𐴃𐴧𐴟 𐴎𐴝𐴀𐴣𐴏𐴡𐴃𐴢 𐴒𐴡𐴥𐴌𐴞 𐴂𐴝𐴔𐴂𐴟𐴥𐴓𐴞𐴘𐴝𐴃𐴢 𐴀𐴝𐴏𐴠𐴤 𐴊𐴠 𐴂𐴠𐴌𐴒𐴝 𐴐𐴡𐴥𐴀𐴌𐴡𐴃𐴢 𐴀𐴝𐴙𐴐𐴧𐴠𐴥, 𐴔𐴡𐴕𐴃𐴡𐴌 𐴘𐴡𐴇𐴝𐴥𐴕𐴧𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠𐴌𐴞 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴖𐴝𐴦𐴉𐴠𐴏𐴢 𐴒𐴞𐴦𐴘𐴠𐴥𐴒𐴡𐴘.

¹⁴𐴓𐴠𐴑𐴞𐴕 𐴀𐴞𐴥𐴃𐴝𐴌𐴝 𐴂𐴠𐴌𐴒𐴝𐴃𐴧𐴟 𐴎𐴝𐴘 𐴂𐴞𐴏𐴞𐴥𐴊𐴞𐴘𐴝𐴃𐴢 𐴀𐴝𐴏𐴠𐴤 𐴊𐴠 𐴀𐴠𐴕𐴄𐴞𐴘𐴡𐴑𐴡𐴃𐴢 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴎𐴝𐴘 𐴁𐴡𐴙𐴐𐴧𐴠𐴥𐴒𐴡𐴘.¹⁵𐴃𐴡𐴌𐴝𐴃𐴢 𐴀𐴠𐴊𐴧𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴑𐴞𐴃𐴝𐴁𐴡𐴃𐴧𐴟 𐴃𐴠𐴓𐴝𐴖𐴡𐴃𐴢 𐴒𐴡𐴙𐴅𐴧𐴝𐴥 𐴀𐴡𐴥𐴘 𐴁𐴝𐴦𐴊𐴠, 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴌 𐴏𐴡𐴥𐴊𐴧𐴝𐴌 𐴀𐴡𐴥𐴑𐴧𐴡𐴓𐴠 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴈𐴡𐴃𐴝𐴤 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠 𐴑𐴞, ”𐴁𐴝𐴥𐴘𐴧𐴝𐴙𐴕, 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝𐴃𐴧𐴟 𐴇𐴡𐴕𐴡𐴤 𐴕𐴡𐴏𐴞𐴥𐴘𐴡𐴃𐴞 𐴈𐴡𐴃𐴝𐴤 𐴃𐴝𐴥𐴑𐴠, 𐴃𐴡𐴥𐴀𐴘𐴓𐴠 𐴁𐴡𐴘𐴧𐴝𐴕 𐴒𐴡𐴌𐴡𐴤.“

¹⁶𐴇𐴠𐴥𐴃𐴟𐴕𐴡𐴃𐴢 𐴂𐴝𐴥𐴀𐴟𐴓𐴠 𐴃𐴞𐴥𐴘𐴝𐴘, 𐴀𐴝𐴥𐴃𐴠 𐴀𐴞𐴐𐴝𐴥𐴌𐴝 𐴒𐴡𐴌𐴞𐴥 𐴈𐴡𐴀𐴌 𐴊𐴠, ”𐴀𐴡𐴥 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴎𐴠𐴃𐴝𐴌𐴝𐴤 𐴀𐴝𐴓𐴧𐴝𐴌𐴠 𐴋𐴡𐴦𐴌𐴡, 𐴀𐴝𐴣𐴀𐴌 𐴈𐴡𐴃𐴝𐴤 𐴉𐴟𐴥𐴕𐴡:¹⁷𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴡𐴌 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴒𐴟𐴥𐴕𐴡𐴌𐴠 𐴁𐴝𐴏𐴞𐴥𐴓𐴡𐴙𐴓𐴢, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴀𐴞𐴅𐴞𐴤𐴂𐴢 𐴊𐴠𐴐𐴡𐴃𐴢 𐴃𐴝𐴥𐴘𐴃𐴠 𐴋𐴡𐴣𐴀𐴌 𐴑𐴡𐴗𐴔 𐴁𐴝𐴕𐴝𐴘𐴊𐴞𐴀𐴓𐴢, 𐴀𐴝𐴦𐴌 𐴀𐴞𐴥𐴁𐴝𐴌 𐴑𐴟𐴊𐴟𐴌𐴟𐴃𐴞𐴌 𐴀𐴝𐴥𐴃𐴠 𐴀𐴞𐴥𐴃𐴝𐴌𐴝𐴌𐴠 𐴈𐴠𐴥𐴕𐴃𐴟 𐴕𐴠𐴦𐴓𐴝𐴘 𐴀𐴝𐴙𐴕𐴧𐴞𐴤𐴓𐴢.¹⁸𐴏𐴝𐴓𐴞𐴐𐴢 𐴁𐴡𐴏𐴡𐴥𐴌 𐴉𐴡𐴙𐴅𐴧𐴡𐴕𐴃𐴡 𐴀𐴞𐴥𐴁𐴝𐴘𐴠 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴀𐴞𐴥𐴃𐴝𐴌𐴝𐴌 𐴀𐴝𐴊𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴁𐴡𐴌𐴊𐴝𐴐𐴢 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.¹⁹𐴘𐴝𐴥𐴌𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴑𐴝𐴥𐴕𐴝𐴕 𐴔𐴟𐴓𐴧𐴟𐴑𐴡𐴌 𐴇𐴝𐴥𐴣𐴃𐴧𐴗𐴝 𐴎𐴝𐴃𐴞𐴌𐴠 𐴊𐴡𐴥𐴚𐴐𐴡 𐴒𐴡𐴌𐴞𐴥𐴉𐴠𐴓𐴝𐴘 𐴕𐴞𐴎𐴡𐴌 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴌𐴠 𐴀𐴞𐴥𐴃𐴝𐴌𐴝𐴌 𐴔𐴟𐴓𐴧𐴟𐴑 𐴇𐴞𐴥𐴘𐴝𐴕 𐴔𐴞𐴌𐴝𐴏𐴢 𐴊𐴞𐴦𐴘𐴠𐴥.²⁰𐴀𐴞𐴀𐴕 𐴁𐴠𐴒𐴧𐴟𐴥𐴕 𐴀𐴡𐴥𐴘𐴃𐴠 𐴃𐴡𐴑𐴡𐴌𐴞𐴁𐴝𐴕 𐴏𐴝𐴙𐴌-𐴐𐴡𐴥 𐴉𐴡𐴕𐴎𐴝𐴙𐴐𐴢 𐴁𐴡𐴏𐴡𐴥𐴌 𐴓𐴝𐴙𐴒𐴧𐴠𐴥.
”𐴘𐴝𐴥𐴌𐴁𐴝𐴦𐴊𐴠 𐴕𐴡𐴁𐴞 𐴏𐴠𐴥𐴔𐴟𐴀𐴠𐴓𐴡𐴌 𐴀𐴡𐴑𐴃𐴡𐴥 𐴉𐴡𐴙𐴅𐴧𐴡𐴕𐴃𐴡 𐴀𐴝𐴓𐴧𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴁𐴞𐴏𐴝𐴌𐴇𐴝𐴌 𐴀𐴡𐴥𐴑𐴧𐴡𐴓𐴢 𐴊𐴞𐴦𐴘𐴠𐴥.²¹𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴀𐴠𐴒𐴧𐴗𐴝𐴤 𐴁𐴝𐴀𐴣𐴐𐴧𐴝 𐴔𐴝𐴙𐴒𐴧𐴠𐴥 𐴌𐴝𐴥𐴌, 𐴀𐴝𐴓𐴧𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴁𐴞𐴕𐴘𐴝𐴔𐴞𐴕𐴡𐴌 𐴈𐴝𐴥𐴀𐴕𐴊𐴝𐴕𐴡𐴃𐴧𐴟 𐴑𐴞𐴐𐴡𐴌 𐴉𐴟𐴖𐴝 𐴏𐴝𐴥𐴀𐴟𐴓𐴡𐴌𐴠 𐴊𐴞𐴀𐴓𐴢, 𐴎𐴞𐴁𐴝𐴤𐴘𐴠 𐴏𐴝𐴓𐴞𐴐𐴢 𐴁𐴡𐴏𐴡𐴥𐴌 𐴉𐴡𐴙𐴅𐴧𐴡𐴕𐴃𐴡 𐴇𐴡𐴥𐴑𐴟𐴔𐴡𐴃𐴢 𐴒𐴡𐴙𐴅𐴧𐴞𐴥𐴓𐴢.²²𐴀𐴝𐴓𐴧𐴝𐴘𐴠 𐴏𐴝𐴥𐴀𐴟𐴓𐴡𐴌𐴠 𐴁𐴝𐴀𐴣𐴐𐴧𐴝𐴒𐴞𐴌𐴞𐴃𐴧𐴟 𐴉𐴠𐴥𐴓𐴝𐴘𐴊𐴞 𐴁𐴝𐴦𐴊𐴠 𐴊𐴝𐴖𐴟𐴊𐴡𐴌𐴠 𐴀𐴞𐴥𐴃𐴝𐴌𐴝𐴌 𐴁𐴝𐴀𐴣𐴐𐴧𐴝 𐴁𐴝𐴕𐴝𐴀𐴙𐴓𐴢, 𐴎𐴞𐴁𐴝𐴤𐴌 𐴁𐴝𐴦𐴁𐴟𐴃𐴠 𐴀𐴞𐴥𐴁𐴝𐴘𐴠 𐴘𐴡𐴥 𐴒𐴡𐴁𐴝𐴤 𐴊𐴞𐴥𐴘𐴠 𐴊𐴠 𐴑𐴞, ’𐴀𐴝𐴀𐴛 𐴀𐴝𐴣𐴀𐴌 𐴔𐴡𐴕𐴡𐴌 𐴔𐴝𐴕𐴟𐴥𐴙𐴐𐴢 𐴀𐴞𐴥𐴏𐴝𐴉𐴠 𐴅𐴠𐴏𐴞𐴌 𐴉𐴟𐴖𐴝 𐴊𐴝𐴖𐴟𐴊𐴡𐴌𐴠 𐴉𐴝𐴘𐴧𐴞𐴥, 𐴎𐴞𐴁𐴝𐴤𐴘𐴠 𐴀𐴝𐴣𐴀𐴌 𐴔𐴡𐴕𐴐𐴝𐴥 𐴁𐴠𐴒𐴧𐴟𐴥𐴕 𐴉𐴟𐴌𐴝 𐴒𐴡𐴌𐴞𐴥𐴁𐴡.‘

²³”𐴇𐴠𐴥 𐴔𐴝𐴕𐴟𐴥𐴙𐴐𐴧𐴗𐴝𐴌 𐴕𐴡𐴏𐴡𐴥𐴓𐴡𐴃𐴧𐴟 𐴀𐴝𐴓𐴧𐴝𐴘𐴠 𐴕𐴞𐴎𐴡𐴌 𐴖𐴝𐴦𐴊𐴝 𐴔𐴡𐴎𐴞𐴕 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴡𐴓𐴧𐴝 𐴀𐴠𐴒𐴧𐴗𐴝𐴤 𐴕𐴠𐴅𐴝𐴃𐴊𐴡𐴘𐴝 𐴊𐴞𐴉𐴠𐴍𐴝𐴥𐴘𐴧𐴠, 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴀𐴞𐴏𐴝𐴤.²⁴𐴀𐴞𐴥𐴁𐴝 𐴀𐴝𐴘𐴁𐴝𐴤𐴌 𐴀𐴝𐴒𐴠 𐴘𐴝𐴇𐴝𐴥𐴘𐴝𐴘𐴠 𐴃𐴝𐴔𐴝𐴥𐴔 𐴁𐴡𐴕𐴞 𐴀𐴞𐴏𐴌𐴝𐴥𐴙𐴓𐴢 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴃𐴡𐴖𐴝𐴥𐴌 𐴁𐴝𐴥𐴂𐴄𐴞𐴏𐴔𐴝𐴌 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴞𐴥𐴓𐴢.²⁵𐴘𐴝𐴇𐴝𐴥𐴘𐴝𐴘𐴠 𐴀𐴞𐴥𐴁𐴝𐴌 𐴃𐴡𐴁𐴡𐴓𐴞𐴑𐴡𐴌 𐴈𐴝𐴔 𐴉𐴟𐴌𐴟𐴏𐴧𐴝𐴃𐴢 𐴒𐴡𐴙𐴅𐴧𐴝𐴥 𐴀𐴡𐴥𐴘𐴁𐴝𐴐𐴧𐴡𐴃𐴢 𐴈𐴡𐴀𐴙𐴓𐴢 𐴊𐴠, ’𐴃𐴟𐴣𐴀𐴝𐴥𐴌𐴝 𐴀𐴝𐴀𐴛 𐴇𐴡𐴕 𐴁𐴡𐴥𐴓𐴞 𐴄𐴝𐴥𐴀𐴌𐴡؟ 𐴃𐴟𐴣𐴀𐴝𐴥𐴌𐴝 𐴎𐴞𐴁𐴝𐴤𐴌 𐴃𐴝𐴓𐴝𐴐𐴢 𐴒𐴡𐴌𐴡𐴤𐴌 𐴀𐴞𐴥𐴁𐴝 𐴀𐴝𐴀𐴛 𐴕𐴡. 𐴔𐴡𐴕𐴃𐴡𐴌 𐴏𐴡𐴀, 𐴀𐴝𐴀𐴛 𐴁𐴝𐴦𐴊𐴠 𐴀𐴠𐴀𐴕 𐴀𐴠𐴑𐴎𐴡𐴕 𐴀𐴝𐴘𐴧𐴠𐴤𐴌 𐴎𐴞𐴁𐴝𐴤𐴌 𐴄𐴠𐴥𐴚𐴡𐴌 𐴐𐴠𐴕𐴄𐴝𐴥𐴌𐴡𐴌 𐴉𐴞𐴥𐴃𐴝 𐴑𐴟𐴥𐴓𐴞 𐴁𐴡𐴓𐴧𐴝 𐴀𐴟𐴥𐴊𐴧𐴗𐴝 𐴀𐴝𐴀𐴛 𐴓𐴝𐴦𐴘𐴠𐴑 𐴕𐴡.‘

²⁶”𐴀𐴡𐴥 𐴁𐴝𐴥𐴘𐴧𐴝𐴙𐴕, 𐴀𐴞𐴁𐴌𐴝𐴇𐴞𐴥𐴔𐴡𐴌 𐴉𐴟𐴀𐴝𐴙𐴕 𐴀𐴠𐴊𐴧𐴠 𐴀𐴝𐴓𐴧𐴝𐴌𐴠 𐴋𐴡𐴦𐴌𐴡𐴘𐴝 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢, 𐴕𐴠𐴅𐴝𐴃𐴡𐴌 𐴀𐴠 𐴈𐴡𐴥𐴁𐴡𐴌 𐴀𐴝𐴣𐴀𐴌𐴝𐴌 𐴇𐴝𐴣𐴏𐴠 𐴉𐴡𐴀𐴣𐴏𐴝 𐴒𐴞𐴥𐴘𐴠.²⁷𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴁𐴝𐴥𐴐𐴞𐴕𐴊𐴝 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴀𐴞𐴥𐴃𐴝𐴌𐴝𐴌 𐴏𐴡𐴥𐴊𐴧𐴝𐴌 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴌𐴠 𐴕𐴡𐴥 𐴏𐴞𐴕𐴠𐴥, 𐴀𐴝𐴦𐴌 𐴇𐴝𐴥𐴀𐴌 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴎𐴠 𐴁𐴡𐴘𐴧𐴝𐴕 𐴀𐴡𐴥𐴑𐴧𐴡𐴓𐴢 𐴃𐴠𐴓𐴝𐴖𐴡𐴃𐴢 𐴒𐴡𐴌𐴝𐴥 𐴎𐴝, 𐴇𐴞𐴥𐴀𐴕 𐴀𐴡𐴥 𐴕𐴡𐴥 𐴁𐴟𐴎𐴠𐴥, 𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴉𐴡𐴥𐴃𐴟𐴖𐴝 𐴊𐴞𐴥 𐴇𐴞𐴥𐴀𐴕 𐴉𐴟𐴌𐴝 𐴒𐴡𐴙𐴅𐴧𐴠𐴥 𐴊𐴠.²⁸𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴔𐴝𐴌𐴞𐴉𐴠𐴥𐴓𐴝 𐴉𐴡𐴌𐴠 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴇𐴡𐴕𐴡𐴤 𐴈𐴡𐴏𐴟𐴥𐴌𐴞 𐴕𐴡 𐴉𐴝𐴘𐴓𐴠 𐴘𐴡, 𐴃𐴡𐴀 𐴀𐴞𐴥𐴁𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴃𐴡 𐴉𐴞𐴓𐴝𐴃𐴡𐴌𐴠 𐴀𐴝𐴌𐴡𐴏𐴢 𐴒𐴡𐴙𐴅𐴧𐴞𐴥𐴓𐴢.²⁹𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝𐴃𐴧𐴟 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴎𐴞𐴀𐴕 𐴀𐴝𐴏𐴠𐴤 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴉𐴟𐴌𐴝 𐴒𐴡𐴙𐴅𐴧𐴝𐴥 𐴀𐴡𐴥𐴘𐴧𐴠, 𐴀𐴞𐴥𐴁𐴝𐴌𐴠 𐴑𐴟𐴥𐴌𐴟𐴐𐴡𐴃𐴧𐴟 𐴓𐴝𐴔𐴝𐴘 𐴀𐴠𐴒𐴧𐴗𐴝𐴤 𐴈𐴡𐴁𐴡𐴌𐴡𐴃𐴢 𐴌𐴝𐴙𐴑𐴧𐴞𐴥𐴓𐴢.³⁰𐴔𐴡𐴕𐴃𐴡𐴌 𐴀𐴝𐴓𐴧𐴝𐴘𐴠 𐴀𐴞𐴥𐴁𐴝𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴙𐴅𐴧𐴠𐴥.³¹𐴀𐴝𐴦𐴌 𐴀𐴞𐴥𐴁𐴝 𐴁𐴡𐴀𐴗𐴃𐴢 𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴀𐴟𐴘𐴃𐴝𐴌𐴝𐴤𐴌 𐴇𐴝𐴣𐴏𐴠 𐴊𐴝𐴈𐴝𐴤𐴊𐴞𐴘𐴠, 𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴒𐴝𐴓𐴞𐴓𐴡𐴃𐴧𐴟 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴀𐴝𐴙𐴐𐴧𐴞𐴤𐴓𐴢. 𐴀𐴞𐴥𐴃𐴝𐴌𐴝 𐴘𐴝𐴓𐴝 𐴀𐴝𐴣𐴀𐴌𐴝𐴌 𐴑𐴡𐴗𐴔𐴡𐴌 𐴇𐴝𐴣𐴏𐴠 𐴀𐴞𐴥𐴁𐴝𐴌 𐴒𐴡𐴁𐴝𐴤 𐴀𐴡𐴥𐴘𐴧𐴠.

³²”𐴀𐴝𐴣𐴀𐴌𐴝 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴠 𐴑𐴟𐴥𐴐𐴞𐴌 𐴈𐴡𐴥𐴁𐴡𐴌 𐴒𐴝𐴥𐴕 𐴁𐴡𐴘𐴧𐴝𐴕 𐴒𐴡𐴌𐴞𐴥𐴌, 𐴑𐴞 𐴈𐴡𐴘𐴓𐴠𐴥, 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴎𐴠 𐴖𐴝𐴦𐴊𐴝 𐴒𐴡𐴙𐴅𐴧𐴞𐴥𐴓𐴢,³³𐴇𐴞𐴥𐴘𐴝𐴕 𐴀𐴞𐴥𐴁𐴝𐴘𐴠 𐴀𐴞𐴏𐴝𐴤𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴌𐴞𐴥 𐴀𐴞𐴥𐴃𐴝𐴌𐴝𐴌 𐴉𐴟𐴀𐴝𐴙𐴕 𐴊𐴡𐴌 𐴇𐴝𐴣𐴏𐴠, 𐴘𐴝𐴥𐴕𐴞 𐴀𐴝𐴣𐴀𐴌𐴝𐴌 𐴇𐴝𐴣𐴏𐴠 𐴉𐴟𐴌𐴝 𐴒𐴡𐴙𐴅𐴧𐴠𐴥. 𐴎𐴡𐴁𐴟𐴌 𐴐𐴡𐴥𐴌𐴞𐴉𐴡𐴌 𐴊𐴟𐴘 𐴕𐴡𐴔𐴁𐴡𐴥𐴌 𐴌𐴟𐴑𐴟𐴥𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤,’𐴃𐴟𐴀𐴛 𐴀𐴡𐴥𐴘𐴓𐴝𐴊𐴠 𐴀𐴝𐴣𐴀𐴌 𐴉𐴟𐴖𐴝,𐴀𐴝𐴙𐴅𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌 𐴁𐴝𐴉𐴢 𐴀𐴡𐴥𐴘𐴧𐴞.‘

³⁴𐴀𐴝𐴓𐴧𐴝𐴘𐴠 𐴀𐴞𐴥𐴁𐴝𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴙𐴅𐴧𐴠𐴥, 𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝𐴌 𐴇𐴝𐴘𐴧𐴝 𐴇𐴡𐴕𐴡𐴤𐴊𐴞𐴕 𐴕𐴡 𐴉𐴡𐴣𐴏𐴞𐴁𐴡𐴥. 𐴀𐴝𐴓𐴧𐴝𐴘𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥,’𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴂𐴝𐴑 𐴀𐴠𐴊𐴧𐴠 𐴏𐴡𐴥𐴘𐴧𐴞 𐴕𐴞𐴘𐴝𐴔𐴡𐴃𐴢 𐴊𐴞𐴦𐴘𐴟𐴔, 𐴎𐴞𐴀𐴕 𐴀𐴝𐴀𐴛 𐴊𐴝𐴖𐴟𐴊𐴡𐴌𐴠 𐴖𐴝𐴦𐴊𐴝 𐴒𐴡𐴙𐴅𐴧𐴞𐴥𐴓𐴝𐴔.‘

³⁵𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝𐴘𐴠 𐴎𐴡𐴁𐴟𐴌 𐴐𐴡𐴥𐴌𐴞𐴉𐴡𐴌 𐴀𐴝𐴌𐴀𐴠𐴑 𐴎𐴝𐴒𐴝𐴃𐴢 𐴀𐴡𐴥 𐴈𐴡𐴘𐴧𐴠𐴥 𐴊𐴠,’𐴃𐴟𐴀𐴛 𐴃𐴟𐴣𐴀𐴝𐴥𐴣𐴌 𐴂𐴝𐴑𐴎𐴡𐴕𐴡𐴌 𐴒𐴝𐴦𐴌 𐴇𐴝𐴘𐴧𐴝𐴌𐴠 𐴉𐴡𐴣𐴏𐴞𐴃𐴡𐴥 𐴕𐴡 𐴊𐴞𐴁𐴝.‘

³⁶”𐴊𐴝𐴖𐴟𐴊𐴢 𐴃𐴡 𐴀𐴞𐴥𐴁𐴝𐴌 𐴎𐴡𐴁𐴝𐴕𐴝𐴃𐴢 𐴀𐴝𐴓𐴧𐴝𐴌 𐴔𐴡𐴑𐴏𐴡𐴥𐴃𐴡𐴌 𐴇𐴠𐴥𐴊𐴔𐴡𐴃𐴢 𐴒𐴡𐴌𐴞𐴥 𐴁𐴝𐴦𐴊𐴠 𐴔𐴡𐴦𐴃𐴡𐴌 𐴒𐴟𐴥𐴔𐴡𐴃𐴢 𐴉𐴡𐴌𐴞𐴒𐴞𐴘𐴡𐴥𐴘. 𐴀𐴞𐴥𐴁𐴝𐴌𐴠 𐴕𐴞𐴎𐴡𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴡𐴌 𐴉𐴟𐴥𐴖𐴝𐴣𐴃𐴞 𐴊𐴡𐴇𐴡𐴥𐴕 𐴒𐴡𐴌𐴝𐴥 𐴒𐴞𐴥𐴀𐴓𐴢, 𐴀𐴝𐴦𐴌 𐴀𐴞𐴥𐴁𐴝𐴌 𐴇𐴝𐴘𐴧𐴝 𐴉𐴡𐴣𐴏𐴞𐴒𐴞𐴥𐴓𐴒𐴡𐴘.³⁷𐴔𐴡𐴕𐴃𐴡𐴌 𐴀𐴝𐴓𐴧𐴝𐴘𐴠 𐴎𐴞𐴁𐴝𐴤𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴙𐴅𐴧𐴠𐴥 𐴀𐴞𐴥𐴁𐴝𐴌 𐴇𐴝𐴘𐴧𐴝 𐴃𐴡 𐴕𐴡𐴥 𐴉𐴡𐴣𐴏𐴠.

³⁸”𐴇𐴠𐴥𐴃𐴡𐴓𐴧𐴝, 𐴀𐴡𐴥 𐴁𐴝𐴥𐴘𐴧𐴝𐴙𐴕, 𐴀𐴝𐴣𐴀𐴃𐴧𐴟 𐴃𐴟𐴣𐴀𐴝𐴥𐴌𐴝𐴌𐴠 𐴘𐴝𐴀𐴕 𐴎𐴝𐴕𐴝𐴘𐴊𐴞𐴃𐴡 𐴔𐴡𐴕𐴠𐴈𐴡𐴀𐴌, 𐴑𐴞 𐴈𐴡𐴘𐴓𐴠𐴥, 𐴀𐴞𐴏𐴝𐴤𐴌 𐴊𐴟𐴖𐴝𐴌𐴝 𐴒𐴟𐴕𐴝𐴤 𐴔𐴝𐴉𐴢 𐴉𐴝𐴘𐴁𐴝𐴌 𐴈𐴡𐴃𐴝𐴤 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥 𐴎𐴝𐴌.³⁹𐴃𐴟𐴣𐴀𐴝𐴥𐴌𐴝 𐴔𐴟𐴀𐴏𐴝𐴌 𐴐𐴡𐴥𐴌𐴞𐴘𐴡𐴃𐴡𐴌 𐴊𐴟𐴖𐴝𐴌𐴝 𐴎𐴠 𐴒𐴟𐴕𐴝𐴤𐴃𐴧𐴟 𐴀𐴝𐴎𐴝𐴊𐴢 𐴕𐴡𐴥 𐴉𐴡𐴦, 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴃𐴧𐴟 𐴀𐴟𐴘𐴃𐴠 𐴀𐴝𐴎𐴝𐴊𐴢 𐴉𐴝𐴦 𐴎𐴠𐴦𐴕𐴞𐴑𐴞 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤.⁴⁰𐴇𐴠𐴥𐴃𐴡𐴓𐴧𐴝 𐴀𐴟𐴥𐴣𐴐𐴞𐴘𐴝𐴌 𐴃𐴝𐴥𐴙𐴑𐴧𐴡, 𐴎𐴠𐴀𐴕𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴠 𐴁𐴡𐴘𐴧𐴝𐴕 𐴒𐴡𐴙𐴅𐴧𐴠𐴥 𐴊𐴠 𐴇𐴞𐴥𐴀𐴕 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴕𐴡, 𐴑𐴞 𐴈𐴡𐴘𐴓𐴠𐴥,⁴¹’𐴀𐴡𐴥 𐴃𐴡𐴦𐴣𐴐𐴝𐴤𐴁𐴝𐴎𐴞-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴢, 𐴏𐴡𐴀,𐴃𐴝𐴦𐴅𐴟𐴂𐴢 𐴀𐴡𐴥 𐴀𐴝𐴦𐴌 𐴊𐴡𐴥𐴚𐴐𐴡 𐴀𐴡𐴥𐴘𐴎𐴡𐴒𐴡𐴘,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴊𐴞𐴕𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴠𐴑𐴧𐴝𐴥𐴕 𐴈𐴝𐴔 𐴒𐴡𐴌𐴞𐴥𐴌,𐴎𐴞𐴘𐴝𐴥𐴕 𐴃𐴟𐴣𐴀𐴝𐴥𐴌𐴝𐴌𐴠 𐴇𐴡𐴕𐴡𐴤𐴑𐴞𐴘𐴠 𐴁𐴟𐴎𐴝𐴥𐴘𐴊𐴞𐴓𐴠 𐴘𐴡𐴀𐴠𐴑𐴞𐴕 𐴒𐴡𐴙𐴃𐴧𐴝𐴥 𐴕𐴡.‘ “

⁴²𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴁𐴝𐴥𐴌𐴕𐴝𐴁𐴝𐴏𐴢 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴧𐴟 𐴕𐴠𐴦𐴓𐴞 𐴎𐴝𐴦𐴌𐴒𐴡𐴥𐴘 𐴊𐴠 𐴀𐴡𐴑𐴃𐴡𐴥𐴃𐴢, 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴀𐴝𐴌𐴡𐴏𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠 𐴊𐴠, 𐴀𐴞𐴥𐴃𐴝𐴌𐴝𐴌𐴠 𐴀𐴠 𐴈𐴡𐴃𐴝𐴤 𐴀𐴞𐴀𐴕 𐴀𐴝𐴘𐴁𐴡𐴤 𐴊𐴠 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴀𐴝𐴌𐴡𐴤 𐴁𐴡𐴘𐴧𐴝𐴕 𐴒𐴡𐴙𐴃𐴧𐴡𐴥.⁴³𐴔𐴟𐴅𐴞𐴓𐴞𐴥𐴐𐴢 𐴉𐴟𐴥𐴌𐴝𐴘 𐴁𐴝𐴦𐴊𐴠 𐴁𐴡𐴀𐴗𐴃𐴢 𐴎𐴡𐴕 𐴘𐴡𐴇𐴟𐴥𐴊𐴞 𐴀𐴠𐴊𐴧𐴠 𐴘𐴡𐴇𐴟𐴥𐴊𐴞𐴌 𐴊𐴡𐴥𐴌𐴔𐴡𐴃𐴢 𐴉𐴝𐴌𐴝𐴤𐴘𐴧𐴠 𐴊𐴠 𐴁𐴡𐴀𐴗𐴃𐴢 𐴎𐴡𐴕 𐴁𐴠𐴘𐴡𐴇𐴟𐴥𐴊𐴞, 𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴁𐴝𐴥𐴌𐴕𐴝𐴁𐴝𐴏𐴡𐴌 𐴉𐴞𐴏𐴝𐴥 𐴊𐴡𐴙𐴅𐴧𐴠. 𐴃𐴝𐴌𐴝𐴥 𐴊𐴟𐴕𐴞𐴥 𐴎𐴡𐴕𐴠 𐴀𐴞𐴥𐴃𐴝𐴌𐴝 𐴓𐴧𐴡𐴥𐴘 𐴈𐴡𐴃𐴝𐴤𐴁𐴝𐴃𐴧𐴝𐴌𐴝 𐴈𐴡𐴘𐴧𐴠𐴥, 𐴀𐴝𐴦𐴌 𐴀𐴝𐴓𐴧𐴝𐴌 𐴌𐴝𐴇𐴝𐴥𐴔𐴡𐴃𐴡𐴃𐴢 𐴓𐴝𐴒𐴞 𐴃𐴝𐴥𐴑𐴞 𐴁𐴡𐴓𐴧𐴝 𐴀𐴞𐴥𐴃𐴝𐴌𐴝𐴌𐴠 𐴃𐴟𐴀𐴝𐴙𐴅𐴧𐴡 𐴊𐴞𐴘𐴠𐴥.

⁴⁴𐴃𐴝𐴌𐴉𐴡 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴐𐴡𐴥𐴀𐴌𐴡𐴌 𐴁𐴠𐴦𐴐𐴁𐴝𐴥𐴑 𐴔𐴝𐴕𐴟𐴥𐴙𐴐𐴢, 𐴔𐴝𐴓𐴞𐴑𐴡𐴌 𐴑𐴝𐴓𐴝𐴔 𐴉𐴟𐴥𐴕𐴞 𐴁𐴡𐴓𐴧𐴝 𐴎𐴡𐴔𐴝 𐴀𐴡𐴥𐴘𐴧𐴠.⁴⁵𐴔𐴡𐴕𐴃𐴡𐴌 𐴔𐴝𐴕𐴟𐴥𐴙𐴐𐴡𐴌 𐴊𐴡𐴓𐴢 𐴊𐴠𐴑𐴞𐴥 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴇𐴝𐴥𐴏𐴡𐴌𐴡𐴃𐴠 𐴉𐴟𐴌𐴝𐴘𐴒𐴞𐴘𐴡𐴥𐴘, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴂𐴝𐴥𐴀𐴟𐴓𐴠 𐴈𐴡𐴀𐴌 𐴊𐴠 𐴈𐴡𐴃𐴝𐴤𐴌 𐴀𐴟𐴓𐴋𐴝 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴈𐴡𐴀𐴘𐴧𐴡𐴌𐴠 𐴀𐴞𐴥𐴁𐴝𐴌𐴠 𐴁𐴠𐴀𐴞𐴎𐴧𐴡𐴃𐴞 𐴒𐴡𐴙𐴅𐴧𐴞𐴥𐴓𐴢.

⁴⁶𐴇𐴠𐴥𐴃𐴟𐴕𐴡𐴃𐴢 𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴁𐴝𐴥𐴌𐴕𐴝𐴁𐴝𐴏𐴠 𐴇𐴞𐴥𐴔𐴧𐴡𐴃𐴡𐴌 𐴏𐴝𐴥𐴀𐴣𐴃𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝𐴃𐴧𐴟 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴀𐴠𐴁𐴧𐴠 𐴀𐴝𐴒𐴠 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴌 𐴎𐴡𐴌𐴟𐴌 𐴀𐴝𐴐𐴧𐴞𐴥𐴓𐴢. 𐴃𐴟𐴣𐴀𐴝𐴥𐴌𐴝 𐴎𐴠𐴃𐴧𐴡𐴥𐴃𐴢 𐴇𐴞𐴥𐴀𐴕 𐴀𐴞𐴕𐴑𐴝𐴌 𐴒𐴡𐴙𐴅𐴧𐴡𐴥 𐴀𐴝𐴦𐴌 𐴕𐴞𐴎𐴡𐴌𐴠𐴥 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞𐴌 𐴓𐴝𐴦𐴘𐴠𐴑 𐴕𐴡 𐴁𐴡𐴥𐴓𐴞 𐴄𐴝𐴥𐴀𐴙𐴅𐴧𐴡, 𐴘𐴝𐴓𐴝 𐴀𐴝𐴣𐴀𐴌𐴝 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴇𐴞𐴥𐴑𐴧𐴝 𐴉𐴞𐴥𐴌𐴞𐴌.⁴⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴓𐴞𐴑𐴠 𐴀𐴝𐴣𐴀𐴌𐴝𐴌𐴠 𐴀𐴠𐴕𐴊𐴞𐴓𐴧𐴝 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠 𐴑𐴞,’𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴓𐴧𐴝 𐴕𐴟𐴌 𐴁𐴝𐴕𐴝𐴘𐴧𐴞𐴥,𐴎𐴠𐴀𐴕𐴠 𐴊𐴟𐴕𐴞𐴘𐴝𐴙𐴌 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴠 𐴕𐴠𐴅𐴝𐴃𐴢 𐴉𐴝.‘ “

⁴⁸𐴇𐴞𐴥𐴘𐴝𐴕 𐴉𐴟𐴥𐴕𐴞 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴁𐴞𐴐𐴞𐴤 𐴑𐴟𐴥𐴐𐴞 𐴀𐴡𐴥𐴘𐴧𐴠 𐴀𐴝𐴦𐴌 𐴔𐴝𐴓𐴞𐴑𐴡𐴌 𐴑𐴝𐴓𐴝𐴔𐴡𐴌 𐴃𐴝𐴦𐴌𐴞𐴉𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠; 𐴀𐴝𐴦𐴌 𐴎𐴠𐴃𐴝𐴌𐴝𐴤𐴌𐴠 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞𐴓𐴧𐴝 𐴁𐴝𐴏𐴞𐴥𐴓𐴡𐴖𐴝 𐴒𐴞𐴥𐴀𐴓𐴢 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤.

⁴⁹𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴔𐴝𐴓𐴞𐴑𐴡𐴌 𐴑𐴝𐴓𐴝𐴔 𐴇𐴠𐴥 𐴀𐴠𐴓𐴝𐴑𐴝𐴌 𐴀𐴝𐴒𐴝𐴒𐴟𐴌𐴝𐴃𐴢 𐴉𐴡𐴥𐴓𐴞𐴒𐴞𐴘𐴡𐴘.⁵⁰𐴔𐴡𐴕𐴃𐴡𐴌 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴠𐴁𐴝𐴦𐴊𐴡𐴃𐴒𐴝𐴥𐴌 𐴔𐴡𐴐𐴟𐴥𐴌 𐴔𐴝𐴘𐴝𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴡𐴌𐴠 𐴀𐴠𐴊𐴧𐴠 𐴐𐴡𐴥𐴀𐴌𐴡𐴌 𐴏𐴡𐴥𐴊𐴧𐴝𐴌 𐴀𐴡𐴥𐴑𐴧𐴡𐴓𐴡𐴌𐴠 𐴀𐴟𐴏𐴑𐴝𐴘𐴊𐴞𐴘𐴠𐴥. 𐴇𐴠𐴥𐴀𐴕𐴒𐴡𐴌𐴞 𐴀𐴞𐴥𐴃𐴝𐴌𐴝 𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴁𐴝𐴥𐴌𐴕𐴝𐴁𐴝𐴏𐴡𐴌 𐴖𐴡𐴌𐴠 𐴎𐴟𐴓𐴟𐴥𐴔 𐴐𐴟𐴥𐴌𐴟 𐴒𐴡𐴌𐴝𐴥 𐴁𐴝𐴘 𐴊𐴟𐴕𐴞𐴥 𐴎𐴡𐴕𐴡𐴌𐴠 𐴇𐴠𐴥 𐴀𐴠𐴓𐴝𐴑𐴝𐴃𐴧𐴟 𐴕𐴠𐴦𐴓𐴝𐴘𐴊𐴞𐴘𐴠𐴥.⁵¹𐴃𐴡𐴥𐴘 𐴃𐴝𐴌𐴝𐴥 𐴊𐴟𐴕𐴞𐴥 𐴎𐴡𐴕𐴠 𐴀𐴞𐴥𐴃𐴝𐴌𐴝𐴌 𐴀𐴟𐴓𐴋𐴝 𐴄𐴠𐴥𐴚𐴡𐴌 𐴃𐴡𐴓𐴧𐴝𐴌 𐴊𐴟𐴥𐴙𐴓𐴢 𐴎𐴝𐴥𐴌𐴞𐴉𐴠𐴓𐴝𐴘 𐴀𐴞𐴑𐴡𐴥𐴕𐴞𐴘𐴝 𐴐𐴡𐴥𐴀𐴌𐴡𐴃𐴢 𐴒𐴞𐴦𐴘𐴠𐴥𐴒𐴡𐴘.⁵²𐴇𐴠𐴥𐴍𐴞𐴘𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴢 𐴑𐴟𐴥𐴐𐴞𐴘𐴠 𐴀𐴠𐴊𐴧𐴠 𐴂𐴝𐴑-𐴌𐴟𐴀 𐴓𐴡𐴥𐴘 𐴉𐴟𐴌𐴝𐴘𐴧𐴝 𐴀𐴡𐴥𐴖𐴝𐴃𐴢 𐴀𐴝𐴐𐴧𐴞𐴥𐴓𐴢.

The Word for the World International

https://app.library.bible/content/87faca8b51c22590