Read 2 𐴃𐴞𐴔𐴡𐴥𐴃𐴞 2

2 𐴃𐴞𐴔𐴡𐴥𐴃𐴞2

𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴁𐴝𐴥𐴓𐴝 𐴉𐴡𐴥𐴗𐴏𐴢

¹𐴇𐴠𐴥𐴃𐴡𐴓𐴧𐴝, 𐴀𐴡𐴥 𐴀𐴝𐴣𐴀𐴌 𐴉𐴟𐴖𐴝, 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴝𐴏𐴠𐴤 𐴊𐴠 𐴌𐴝𐴇𐴝𐴥𐴔𐴡𐴃𐴠 𐴔𐴡𐴎𐴁𐴟𐴃𐴢 𐴀𐴡𐴥𐴘𐴎𐴝𐴒𐴡𐴘.²𐴀𐴝𐴦𐴌 𐴁𐴞𐴐𐴞𐴤 𐴒𐴡𐴁𐴝𐴤 𐴀𐴡𐴥𐴑𐴧𐴡𐴓𐴡𐴌 𐴐𐴝𐴥𐴙𐴑𐴧𐴝𐴃𐴢 𐴀𐴝𐴣𐴀𐴌 𐴔𐴟𐴑𐴡𐴃𐴧𐴟 𐴎𐴠 𐴃𐴝𐴦𐴓𐴞𐴔 𐴃𐴟𐴘 𐴉𐴟𐴥𐴙𐴕𐴧𐴞𐴓𐴞, 𐴇𐴠𐴥 𐴃𐴝𐴦𐴓𐴞𐴔𐴡𐴌𐴠 𐴀𐴠𐴀𐴕 𐴁𐴞𐴐𐴧𐴝𐴥𐴐𐴊𐴝𐴌 𐴔𐴝𐴕𐴟𐴥𐴙𐴐𐴡𐴌 𐴀𐴝𐴥𐴃𐴡𐴃𐴢 𐴊𐴠𐴦 𐴎𐴠𐴃𐴝𐴌𐴝𐴤𐴃𐴧𐴟 𐴀𐴡𐴙𐴕𐴧𐴡 𐴎𐴡𐴕𐴡𐴌𐴠 𐴘𐴡𐴥 𐴃𐴝𐴦𐴓𐴞𐴔 𐴊𐴞𐴁𐴝𐴌 𐴑𐴝𐴦𐴁𐴠𐴓𐴞𐴘𐴡𐴃𐴞 𐴀𐴝𐴏𐴠𐴤.³𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴀𐴠𐴑 𐴁𐴝𐴥𐴓𐴝 𐴉𐴡𐴥𐴗𐴏𐴡𐴌 𐴋𐴡𐴥𐴙𐴓𐴧𐴝 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴊𐴟𐴑 𐴉𐴝𐴦.⁴𐴇𐴡𐴕𐴡𐴤 𐴉𐴡𐴥𐴗𐴏𐴠 𐴃𐴡 𐴓𐴝𐴌𐴝𐴥𐴘 𐴒𐴡𐴙𐴃𐴧𐴡𐴥 𐴎𐴝𐴘𐴓𐴠𐴥 𐴀𐴝𐴖𐴝𐴔 𐴀𐴡𐴥𐴑𐴧𐴡𐴓𐴡𐴌 𐴔𐴝𐴦𐴔𐴠𐴓𐴝𐴃𐴢 𐴁𐴝𐴎𐴞𐴥 𐴕𐴡 𐴃𐴝𐴥𐴑𐴠, 𐴎𐴠𐴀𐴕𐴠 𐴀𐴞𐴥𐴃𐴠 𐴀𐴞𐴥𐴃𐴝𐴌 𐴎𐴡𐴕𐴧𐴝𐴓𐴡𐴌𐴠 𐴑𐴟𐴥𐴐𐴞 𐴒𐴡𐴌𐴞𐴥 𐴉𐴝𐴌𐴠.⁵𐴇𐴠𐴥𐴕𐴊𐴞𐴓𐴧𐴝, 𐴑𐴠𐴥𐴓𐴝𐴃𐴢 𐴓𐴝𐴔𐴞 𐴎𐴠𐴦𐴕𐴞𐴑𐴞 𐴑𐴠𐴥𐴓𐴝𐴌 𐴕𐴞𐴘𐴡𐴔 𐴔𐴡𐴎𐴞𐴕 𐴕𐴡 𐴑𐴠𐴥𐴓𐴝, 𐴀𐴞𐴥𐴃𐴠 𐴎𐴞𐴃𐴝𐴌 𐴁𐴡𐴐𐴧𐴞𐴥𐴐𐴢 𐴕𐴡 𐴉𐴝𐴦.⁶𐴎𐴠 𐴐𐴝𐴐𐴝𐴤𐴘𐴠 𐴔𐴠𐴀𐴕𐴧𐴡𐴃𐴢 𐴒𐴡𐴌𐴠𐴥, 𐴕𐴞𐴘𐴡𐴔 𐴔𐴡𐴎𐴞𐴕 𐴉𐴡𐴥𐴏𐴡𐴓𐴡𐴌 𐴁𐴝𐴥𐴑 𐴀𐴠𐴁𐴧𐴠 𐴀𐴝𐴒𐴠 𐴀𐴞𐴥𐴃𐴠 𐴀𐴠𐴥𐴕𐴝 𐴉𐴝𐴦.⁷𐴀𐴝𐴀𐴛 𐴎𐴞𐴀𐴕 𐴈𐴡𐴀𐴙𐴌 𐴇𐴞𐴥𐴀𐴕 𐴁𐴝𐴥𐴉𐴞 𐴏𐴝𐴀, 𐴔𐴝𐴓𐴞𐴑𐴠 𐴃𐴡𐴌𐴠𐴥 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴁𐴟𐴎𐴞𐴥𐴁𐴝𐴌 𐴃𐴡𐴖𐴉𐴞𐴥𐴑 𐴊𐴞𐴦𐴁𐴡.

⁸𐴊𐴝𐴖𐴟𐴊𐴡𐴌 𐴕𐴡𐴏𐴡𐴥𐴓𐴡𐴌 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴌𐴝𐴥 𐴒𐴞𐴥𐴘𐴠 𐴊𐴠 𐴇𐴞𐴥𐴘𐴝𐴕 𐴘𐴝𐴦𐴊𐴢 𐴌𐴝𐴑𐴞𐴥𐴐𐴢. 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴀𐴝𐴀𐴛 𐴃𐴡𐴁𐴡𐴓𐴞𐴑 𐴒𐴡𐴌𐴞𐴥 𐴊𐴠 𐴑𐴟𐴥𐴐𐴈𐴡𐴥𐴁𐴡𐴌,⁹𐴎𐴞𐴘𐴝𐴥𐴕𐴡𐴓𐴧𐴝 𐴀𐴝𐴀𐴛 𐴀𐴝𐴐𐴝𐴥𐴔𐴞𐴌 𐴋𐴡𐴥𐴙𐴓𐴧𐴝 𐴊𐴟𐴑 𐴉𐴝𐴙𐴌, 𐴎𐴠𐴀𐴕 𐴕𐴞𐴥𐴑𐴞 𐴀𐴝𐴀𐴛 𐴁𐴡𐴕 𐴀𐴝𐴏𐴞𐴤; 𐴓𐴠𐴑𐴞𐴕 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴃𐴡 𐴁𐴡𐴕 𐴕𐴡.¹⁰𐴇𐴠𐴥𐴃𐴡𐴓𐴧𐴝 𐴀𐴝𐴓𐴧𐴝𐴌 𐴁𐴝𐴏𐴞𐴥𐴓𐴡𐴘𐴧𐴝 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴌 𐴖𐴝𐴏𐴃𐴠𐴥 𐴀𐴝𐴀𐴛 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴁𐴡𐴌𐴊𐴝𐴐𐴢 𐴒𐴡𐴌𐴞𐴥, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴘𐴡𐴥 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴝𐴏𐴠𐴤 𐴊𐴠 𐴕𐴠𐴅𐴝𐴃𐴢 𐴇𐴝𐴥𐴏𐴞𐴓𐴢 𐴒𐴡𐴌𐴠𐴥, 𐴀𐴝𐴦𐴌 𐴀𐴡𐴉𐴟𐴥𐴌𐴝𐴕𐴞 𐴔𐴡𐴈𐴞𐴥𐴔𐴝 𐴔𐴞𐴌𐴝𐴏𐴢 𐴉𐴝𐴦.

¹¹𐴘𐴝𐴀𐴕 𐴇𐴡𐴥𐴑 𐴈𐴡𐴃𐴝𐴤 𐴊𐴠 𐴑𐴞,”𐴀𐴝𐴣𐴀𐴌𐴝 𐴎𐴠𐴃𐴧𐴡𐴥𐴃𐴢 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴔𐴡𐴙𐴅𐴧𐴞𐴥,𐴀𐴝𐴣𐴀𐴌𐴝 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴁𐴝𐴏𐴞 𐴃𐴝𐴥𐴑𐴞𐴘𐴟𐴔 𐴀𐴡𐴥.¹²𐴎𐴡𐴊𐴞 𐴀𐴝𐴣𐴀𐴌𐴝 𐴊𐴟𐴑 𐴁𐴡𐴌𐴊𐴝𐴐𐴢 𐴒𐴡𐴌𐴞𐴥,𐴀𐴝𐴣𐴀𐴌𐴝 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴇𐴡𐴥𐴑𐴟𐴔𐴡𐴃𐴢 𐴒𐴡𐴌𐴞𐴥𐴘𐴟𐴔 𐴀𐴡𐴥.𐴎𐴡𐴊𐴞 𐴀𐴝𐴣𐴀𐴌𐴝 𐴀𐴞𐴥𐴁𐴝𐴌𐴠 𐴀𐴞𐴕𐴑𐴝𐴌 𐴒𐴡𐴌𐴞𐴥,𐴀𐴞𐴥𐴁𐴝𐴘𐴠 𐴘𐴡𐴥 𐴀𐴝𐴣𐴀𐴌𐴝𐴌𐴠 𐴀𐴞𐴕𐴑𐴝𐴌 𐴒𐴡𐴌𐴞𐴥𐴁𐴡.¹³𐴀𐴝𐴣𐴀𐴌𐴝 𐴁𐴠𐴘𐴔𐴝𐴕 𐴀𐴡𐴥𐴘𐴎𐴝𐴘𐴓𐴠 𐴘𐴡,𐴀𐴞𐴥𐴁𐴝 𐴁𐴞𐴓𐴑𐴟𐴥𐴓𐴢 𐴁𐴠𐴘𐴔𐴝𐴕 𐴀𐴡𐴥 𐴊𐴠 𐴕𐴝𐴥𐴘,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴃𐴡 𐴕𐴞𐴎𐴡𐴌𐴠𐴥 𐴔𐴞𐴏𐴝𐴥 𐴄𐴡𐴥𐴀𐴌𐴝𐴘 𐴕𐴡 𐴉𐴝𐴌𐴠.“

𐴁𐴠𐴇𐴝𐴎𐴡𐴌 𐴈𐴡𐴃𐴝𐴤𐴁𐴝𐴃𐴧𐴝𐴌𐴝𐴌 𐴁𐴝𐴦𐴁𐴟𐴃𐴠 𐴀𐴟𐴥𐴣𐴐𐴞𐴘𐴝𐴌𐴞

¹⁴𐴀𐴝𐴓𐴧𐴝𐴌 𐴂𐴝𐴑 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴌𐴠 𐴃𐴟𐴘 𐴈𐴡𐴃𐴝𐴤 𐴇𐴞𐴥𐴀𐴕 𐴔𐴡𐴕𐴡𐴃𐴢 𐴒𐴡𐴌𐴝𐴥𐴘𐴊𐴠, 𐴀𐴝𐴦𐴌 𐴀𐴝𐴓𐴧𐴝𐴌𐴠 𐴐𐴝𐴥𐴙𐴑𐴧𐴝𐴃𐴢 𐴒𐴡𐴌𐴞𐴥 𐴀𐴞𐴥𐴃𐴝𐴌𐴝𐴌𐴠 𐴕𐴡𐴏𐴞𐴥𐴘𐴡𐴃𐴢 𐴒𐴡𐴌𐴞𐴥𐴁𐴞 𐴊𐴠, 𐴀𐴞𐴥𐴃𐴝𐴌𐴝 𐴎𐴠𐴕 𐴓𐴡𐴉𐴎𐴡𐴥 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴃𐴡𐴌𐴑𐴝𐴃𐴡𐴌𐴑𐴞 𐴕𐴡 𐴊𐴠. 𐴇𐴞𐴥𐴀𐴕𐴠 𐴃𐴡 𐴇𐴡𐴕𐴡𐴤 𐴉𐴝𐴥𐴘𐴊𐴝𐴘 𐴕𐴡 𐴒𐴡𐴌𐴠𐴥, 𐴁𐴡𐴥𐴓𐴑𐴠 𐴉𐴟𐴥𐴕𐴡𐴘𐴝 𐴀𐴡𐴥𐴑𐴧𐴡𐴓𐴡𐴌𐴠 𐴁𐴡𐴌𐴁𐴝𐴊𐴢 𐴒𐴡𐴌𐴠𐴥 𐴊𐴠.¹⁵𐴃𐴟𐴘 𐴕𐴞𐴎𐴡𐴌𐴠𐴥 𐴀𐴝𐴓𐴧𐴝𐴌 𐴔𐴟𐴀𐴕𐴃𐴟 𐴀𐴠𐴕𐴊𐴞𐴓𐴧𐴝 𐴈𐴝𐴔-𐴒𐴡𐴌𐴡𐴤𐴘𐴝 𐴀𐴞𐴥𐴏𐴝𐴉𐴠 𐴇𐴝𐴥𐴎𐴞𐴌 𐴒𐴡𐴌𐴞𐴥 𐴁𐴡𐴓𐴧𐴝 𐴉𐴟𐴌𐴝𐴉𐴟𐴌𐴞 𐴑𐴟𐴐𐴞𐴥𐴐𐴢 𐴒𐴡𐴥𐴌 𐴎𐴞𐴁𐴝𐴤𐴌𐴠 𐴓𐴡𐴥𐴘 𐴀𐴝𐴓𐴧𐴝 𐴑𐴟𐴥𐴐𐴞, 𐴘𐴝𐴥𐴕𐴞 𐴎𐴞𐴁𐴝𐴤𐴃𐴧𐴟 𐴐𐴡𐴥𐴌𐴔𐴞𐴕𐴊𐴝 𐴀𐴡𐴥𐴘𐴁𐴝𐴌 𐴕𐴝𐴥𐴘 𐴀𐴠𐴊𐴧𐴠 𐴎𐴞𐴁𐴝𐴤𐴘𐴠 𐴏𐴡𐴥𐴘𐴧𐴞 𐴃𐴡𐴌𐴞𐴑𐴝 𐴔𐴡𐴎𐴞𐴕 𐴏𐴡𐴥𐴘𐴧𐴞 𐴑𐴝𐴓𐴝𐴔𐴡𐴌 𐴃𐴝𐴦𐴓𐴞𐴔 𐴊𐴠.¹⁶𐴓𐴠𐴑𐴞𐴕 𐴊𐴟𐴕𐴞𐴘𐴝𐴘𐴁𐴞 𐴁𐴠𐴇𐴝𐴎𐴡𐴌 𐴈𐴡𐴃𐴝𐴤𐴁𐴝𐴃𐴧𐴝𐴌𐴝𐴃𐴧𐴟 𐴊𐴟𐴌𐴠𐴥 𐴃𐴝𐴥𐴑𐴞𐴐𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴀𐴕𐴠 𐴔𐴝𐴕𐴟𐴥𐴙𐴐𐴡𐴌𐴠 𐴎𐴠𐴃𐴡𐴥 𐴀𐴠𐴥𐴃𐴡 𐴁𐴠𐴊𐴞𐴕𐴞 𐴁𐴝𐴕𐴝𐴘𐴉𐴠𐴥𐴓𐴝𐴘𐴁𐴡,¹⁷𐴀𐴝𐴦𐴌 𐴇𐴞𐴥𐴀𐴕 𐴀𐴡𐴥𐴙𐴓𐴊𐴠 𐴀𐴠𐴕𐴊𐴞𐴓𐴧𐴝 𐴃𐴝𐴦𐴓𐴞𐴔 𐴎𐴞𐴀𐴕 𐴑𐴠𐴕𐴏𐴝𐴌𐴡𐴌 𐴋𐴡𐴥𐴙𐴓𐴧𐴝 𐴉𐴡𐴥𐴓𐴞𐴎𐴝𐴘𐴁𐴡𐴘. 𐴇𐴠𐴥𐴕𐴊𐴞𐴓𐴧𐴝 𐴃𐴝𐴦𐴓𐴞𐴔-𐴊𐴡𐴘𐴝𐴌 𐴁𐴟𐴥𐴃𐴡𐴌𐴠 𐴇𐴟𐴔𐴞𐴕𐴝𐴘𐴟𐴏𐴢 𐴀𐴠𐴊𐴧𐴠 𐴉𐴞𐴓𐴠𐴃𐴟𐴏𐴢 𐴀𐴡𐴥 𐴐𐴝𐴥𐴔𐴞𐴓𐴢 𐴀𐴝𐴏𐴠𐴤,¹⁸𐴎𐴠𐴃𐴝𐴌𐴝𐴤 𐴏𐴡𐴥𐴘𐴧𐴞𐴌 𐴌𐴝𐴏𐴃𐴝 𐴀𐴠𐴌𐴞𐴊𐴞𐴉𐴠𐴥𐴓𐴝𐴘𐴧𐴠; 𐴀𐴞𐴥𐴃𐴝𐴌𐴝 𐴈𐴡𐴀 𐴊𐴠, 𐴇𐴝𐴥𐴣𐴐𐴡𐴌 𐴁𐴞𐴃𐴞𐴒𐴞𐴘𐴡𐴥𐴘; 𐴇𐴠𐴥𐴕𐴊𐴞𐴓𐴧𐴝 𐴈𐴡𐴀𐴘𐴢 𐴀𐴞𐴥𐴃𐴝𐴌𐴝 𐴇𐴡𐴊𐴟𐴥𐴕𐴡𐴌 𐴀𐴞𐴔𐴝𐴕 𐴕𐴝𐴐𐴢 𐴒𐴡𐴌𐴞𐴥𐴉𐴠𐴓𐴝𐴌.¹⁹𐴔𐴡𐴕𐴃𐴡𐴌 𐴃𐴡𐴀 𐴀𐴝𐴓𐴧𐴝𐴌 𐴁𐴟𐴖𐴝𐴥𐴘𐴧𐴝 𐴔𐴡𐴎𐴁𐴟𐴃𐴢 𐴁𐴟𐴕𐴞𐴘𐴝𐴊𐴞 𐴃𐴡 𐴄𐴞𐴑𐴞 𐴃𐴝𐴥𐴑𐴠, 𐴀𐴝𐴦𐴌 𐴇𐴞𐴥𐴘𐴝𐴕𐴡𐴃𐴢 𐴀𐴠 𐴈𐴡𐴃𐴝𐴤 𐴔𐴡𐴀𐴌 𐴔𐴝𐴙𐴅𐴧𐴝 𐴀𐴝𐴏𐴠𐴤 𐴊𐴠 𐴑𐴞, ”𐴔𐴝𐴓𐴞𐴑𐴠 𐴎𐴝𐴕𐴠 𐴇𐴡𐴕𐴃𐴝𐴌𐴝𐴤 𐴀𐴞𐴥𐴁𐴝𐴌,“ 𐴀𐴝𐴦𐴌, ”𐴎𐴠𐴃𐴝𐴌𐴝𐴤 𐴔𐴝𐴓𐴞𐴑𐴡𐴌 𐴕𐴝𐴔 𐴓𐴡 𐴀𐴞𐴥𐴃𐴝𐴌𐴝 𐴑𐴟𐴈𐴝𐴔𐴡𐴃𐴧𐴟 𐴊𐴟𐴌𐴠𐴥 𐴃𐴝𐴥𐴑𐴡𐴗𐴑.“

²⁰𐴁𐴡𐴌 𐴒𐴡𐴥𐴌𐴡𐴃𐴢 𐴃𐴡 𐴁𐴝𐴕𐴝𐴤 𐴐𐴟𐴥𐴕𐴝𐴌 𐴀𐴠𐴊𐴧𐴠 𐴏𐴝𐴣𐴊𐴞𐴌 𐴏𐴡𐴥𐴕𐴇𐴡𐴊𐴧𐴝𐴤 𐴀𐴡𐴥𐴑𐴧𐴡𐴓𐴢 𐴃𐴝𐴥𐴑𐴠 𐴊𐴠 𐴕𐴡, 𐴁𐴡𐴥𐴓𐴑𐴠 𐴒𐴝𐴏𐴡𐴌 𐴀𐴠𐴊𐴧𐴠 𐴔𐴠𐴍𐴞𐴌 𐴀𐴡𐴥 𐴃𐴝𐴥𐴑𐴠; 𐴇𐴡𐴊𐴟𐴥𐴕 𐴈𐴝𐴥𐴀𐴏𐴢 𐴈𐴝𐴔 𐴀𐴡𐴓𐴧𐴝, 𐴀𐴝𐴦𐴌 𐴇𐴡𐴊𐴟𐴥𐴕 𐴀𐴠𐴣𐴀𐴃𐴠 𐴈𐴝𐴔 𐴀𐴡𐴓𐴧𐴝.²¹𐴇𐴠𐴥𐴃𐴡𐴓𐴧𐴝 𐴎𐴠𐴦𐴕𐴞𐴑𐴞 𐴀𐴠 𐴁𐴟𐴌𐴝 𐴈𐴝𐴔 𐴀𐴞𐴀𐴕𐴡𐴃𐴧𐴟 𐴂𐴝𐴑-𐴏𐴝𐴥𐴉𐴢 𐴃𐴝𐴥𐴑𐴠, 𐴀𐴞𐴥𐴃𐴠 𐴈𐴝𐴥𐴀𐴏𐴢 𐴈𐴝𐴔𐴡𐴌 𐴏𐴡𐴥𐴕𐴇𐴡𐴊𐴧𐴝𐴤 𐴀𐴡𐴥𐴘𐴁𐴡. 𐴀𐴞𐴥𐴃𐴝𐴌𐴠 𐴂𐴝𐴑 𐴌𐴝𐴑𐴝𐴤 𐴎𐴝𐴘𐴁𐴡. 𐴀𐴞𐴥𐴃𐴠 𐴔𐴝𐴓𐴞𐴑𐴡𐴌 𐴈𐴝𐴔𐴡𐴃𐴢 𐴀𐴝𐴘𐴁𐴡𐴤, 𐴀𐴝𐴦𐴌 𐴎𐴠 𐴇𐴡𐴕𐴡𐴤 𐴒𐴡𐴔 𐴈𐴝𐴔𐴡𐴓𐴧𐴝 𐴃𐴡𐴘𐴧𐴝𐴌 𐴀𐴡𐴥𐴘𐴁𐴡.

²²𐴅𐴟𐴖𐴝𐴕 𐴇𐴝𐴓𐴡𐴌 𐴈𐴡𐴥𐴌𐴝𐴉𐴢 𐴔𐴡𐴕𐴡𐴃𐴧𐴟 𐴊𐴝𐴥𐴘𐴎𐴝𐴒𐴡𐴘, 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴂𐴝𐴑 𐴊𐴞𐴓𐴠 𐴔𐴝𐴓𐴞𐴑𐴡𐴌𐴠 𐴔𐴝𐴃𐴝 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴉𐴡𐴌𐴇𐴠𐴥𐴏𐴒𐴝𐴌𐴞𐴌, 𐴀𐴞𐴔𐴝𐴕 𐴀𐴡𐴌, 𐴔𐴟𐴇𐴝𐴥𐴁𐴧𐴡𐴃𐴢 𐴀𐴡𐴌, 𐴀𐴠𐴊𐴧𐴠 𐴐𐴝𐴥𐴕𐴃𐴞𐴌 𐴉𐴞𐴏𐴠𐴤 𐴓𐴝𐴒𐴞 𐴃𐴝𐴥𐴑.²³𐴓𐴠𐴑𐴞𐴕 𐴁𐴠𐴇𐴝𐴎𐴡𐴌 𐴀𐴠𐴊𐴧𐴠 𐴁𐴠𐴑𐴟𐴙𐴂𐴧𐴝 𐴃𐴡𐴌𐴑𐴝𐴃𐴡𐴌𐴑𐴞 𐴀𐴡𐴥𐴑𐴧𐴡𐴓𐴢 𐴁𐴝𐴊𐴢 𐴊𐴞𐴐𐴢; 𐴃𐴟𐴘 𐴃𐴡 𐴎𐴝𐴕𐴡𐴏𐴢, 𐴇𐴞𐴥𐴀𐴕𐴠 𐴏𐴞𐴌𐴞𐴥𐴉𐴢 𐴇𐴡𐴙𐴅𐴧𐴝-𐴉𐴡𐴥𐴎𐴧𐴝𐴃𐴢 𐴁𐴠 𐴉𐴡𐴘𐴊𐴝 𐴒𐴡𐴌𐴠𐴥.²⁴𐴔𐴝𐴓𐴞𐴑𐴡𐴌 𐴒𐴟𐴓𐴝𐴔𐴡𐴃𐴧𐴟 𐴇𐴡𐴙𐴅𐴧𐴝-𐴉𐴡𐴥𐴎𐴧𐴝𐴃𐴢 𐴒𐴡𐴌𐴡𐴤𐴘𐴝 𐴕𐴡 𐴀𐴡𐴥𐴖𐴝 𐴉𐴡𐴌𐴞𐴁𐴡𐴥, 𐴁𐴡𐴥𐴓𐴑𐴠 𐴁𐴠𐴒𐴧𐴟𐴥𐴕𐴡𐴌 𐴇𐴝𐴣𐴏𐴠 𐴔𐴠𐴀𐴌𐴁𐴝𐴕 𐴀𐴡𐴥𐴖𐴝 𐴉𐴡𐴌𐴞𐴁𐴡𐴥, 𐴃𐴝𐴦𐴓𐴞𐴔 𐴊𐴞𐴁𐴝𐴌 𐴓𐴝𐴦𐴘𐴠𐴑 𐴀𐴡𐴥𐴖𐴝 𐴉𐴡𐴌𐴞𐴁𐴡𐴥, 𐴀𐴝𐴦𐴌 𐴁𐴡𐴌𐴊𐴝𐴐𐴢-𐴒𐴡𐴌𐴡𐴤𐴘𐴝 𐴀𐴡𐴥𐴖𐴝 𐴉𐴡𐴌𐴞𐴁𐴡𐴥,²⁵𐴀𐴝𐴦𐴌 𐴔𐴟𐴈𐴝𐴥𐴓𐴠𐴉𐴢 𐴀𐴡𐴥𐴑𐴧𐴡𐴓𐴡𐴌𐴠 𐴐𐴞𐴥𐴊𐴝 𐴒𐴡𐴥𐴌𐴞 𐴕𐴡𐴏𐴞𐴥𐴘𐴡𐴃𐴢-𐴒𐴡𐴌𐴡𐴤𐴘𐴝 𐴀𐴡𐴥𐴖𐴝 𐴉𐴡𐴌𐴞𐴁𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴡𐴥𐴘𐴃𐴡𐴉𐴝𐴌𐴠 𐴀𐴝𐴓𐴧𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴃𐴡𐴖𐴝𐴥 𐴒𐴡𐴌𐴞𐴥𐴁𐴝𐴌 𐴃𐴡𐴖𐴉𐴞𐴥𐴑 𐴊𐴞𐴦𐴁𐴡, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴀𐴝𐴓𐴧𐴝𐴌 𐴏𐴡𐴥𐴘𐴧𐴞𐴌𐴠 𐴎𐴝𐴕𐴞 𐴉𐴝𐴌𐴠,²⁶𐴀𐴝𐴦𐴌 𐴁𐴟𐴎𐴡𐴥𐴕𐴡𐴃𐴢 𐴀𐴝𐴀𐴘𐴢 𐴀𐴞𐴁𐴞𐴓𐴞𐴥𐴐𐴡𐴌 𐴉𐴝𐴥𐴕𐴡𐴃𐴧𐴟 𐴁𐴝𐴏𐴞𐴎𐴝𐴒𐴡𐴥𐴘, 𐴎𐴠 𐴀𐴞𐴁𐴞𐴓𐴞𐴥𐴐𐴠 𐴀𐴞𐴥𐴃𐴝𐴌𐴝𐴌𐴠 𐴀𐴞𐴥𐴃𐴝𐴌 𐴔𐴡𐴕 𐴔𐴡𐴎𐴞𐴕 𐴏𐴡𐴓𐴞 𐴁𐴡𐴓𐴧𐴝 𐴁𐴡𐴕𐴊𐴞 𐴁𐴝𐴕𐴝𐴘 𐴌𐴝𐴙𐴑𐴧𐴠𐴥.

The Word for the World International

https://app.library.bible/content/87faca8b51c22590