2 𐴃𐴞𐴏𐴡đ´Ĩ𐴓𐴡𐴕𐴞𐴀𐴡đ´Ĩ𐴓đ´ĸ2

𐴕𐴝𐴉𐴡đ´Ĩ𐴌𐴔𐴝𐴙𐴕𐴧𐴝

1𐴁𐴝đ´Ĩ𐴘𐴁𐴡𐴘𐴕𐴝đ´Ĩ𐴙𐴕 𐴀𐴡đ´Ĩ𐴑𐴧𐴡𐴓đ´ĸ, 𐴀𐴝đ´Ŗ𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤 𐴀𐴝𐴘𐴁𐴝𐴤𐴌 𐴀𐴠𐴊𐴧𐴠 𐴀𐴝đ´Ŗ𐴀𐴌𐴝𐴌𐴠 𐴀𐴞đ´Ĩ𐴁𐴝𐴌 𐴇𐴝đ´Ŗ𐴏𐴠 𐴎𐴡𐴔𐴝 𐴒𐴡𐴌𐴝đ´Ĩ 𐴎𐴝𐴘𐴁𐴝𐴌 𐴁𐴝đ´Ļ𐴁𐴟𐴃𐴠 𐴈𐴥𐴘𐴃𐴥𐴤 𐴏𐴝𐴘𐴓𐴠đ´Ĩ: 𐴀𐴝đ´Ŗ𐴀𐴌𐴝 𐴃𐴟đ´Ŗ𐴀𐴝đ´Ĩ𐴌𐴝𐴌𐴠 𐴘𐴝𐴀𐴕 𐴀𐴝𐴌𐴡𐴏đ´ĸ 𐴒𐴡𐴌𐴞đ´Ĩ𐴌,2𐴔𐴝𐴙𐴕𐴐𐴠đ´Ĩ 𐴔𐴝𐴓𐴞𐴑 𐴀𐴝𐴘𐴁𐴝𐴤𐴌 𐴊𐴞𐴕 𐴀𐴝𐴀𐴘𐴒𐴞𐴘𐴡𐴘 𐴈𐴡𐴘𐴓𐴠đ´Ĩ 𐴁𐴝đ´Ĩ𐴚𐴒𐴡𐴌𐴞 𐴁𐴟𐴊𐴧𐴞đ´Ĩ 𐴇𐴝đ´Ĩ𐴌𐴝𐴘𐴧𐴝 𐴘𐴝đ´Ĩ 𐴉𐴠𐴌𐴠𐴐𐴝𐴕 𐴀𐴡đ´Ĩ𐴘 𐴕𐴡 𐴎𐴝𐴘𐴡𐴒𐴡đ´Ĩ𐴘. 𐴀𐴞đ´Ĩ𐴃𐴝𐴌𐴝 𐴇𐴡𐴕𐴡𐴤 𐴊𐴡𐴌𐴐𐴡đ´Ĩ𐴕 𐴊𐴠𐴙𐴑𐴧𐴠đ´Ĩ, 𐴘𐴝đ´Ĩ 𐴖𐴝𐴈𐴞𐴤 𐴕𐴝𐴎𐴞𐴓đ´ĸ 𐴀𐴡đ´Ĩ𐴘𐴧𐴠, 𐴘𐴝đ´Ĩ 𐴀𐴝đ´Ŗ𐴀𐴌𐴝𐴌 𐴃𐴡𐴌𐴉𐴡đ´Ĩ𐴃𐴧𐴟 𐴐𐴠đ´Ŗ𐴍𐴞đ´Ĩ 𐴉𐴝𐴘𐴧𐴠đ´Ĩ 𐴈𐴡𐴘𐴓𐴠đ´Ĩ 𐴀𐴟đ´Ĩ𐴊𐴧𐴗𐴝 𐴁𐴞𐴐𐴧𐴝đ´Ĩ𐴐đ´ĸ 𐴕𐴡 𐴒𐴡𐴙𐴅𐴧𐴡đ´Ĩ.3𐴇𐴡𐴕𐴡𐴤𐴑𐴞𐴘𐴠 𐴃𐴟đ´Ŗ𐴀𐴝đ´Ĩ𐴌𐴝𐴌𐴠 𐴇𐴡𐴕𐴡𐴤 𐴔𐴞𐴑𐴧𐴝đ´Ĩ𐴃𐴧𐴟 𐴊𐴟đ´Ĩ𐴑𐴝 𐴕𐴡 𐴊𐴡𐴑. 𐴑𐴞𐴘𐴡đ´Ĩ𐴓𐴧𐴝-𐴈𐴡𐴘𐴓𐴠đ´Ĩ 𐴊𐴞𐴕 𐴘𐴞đ´Ĩ𐴁𐴝 𐴃𐴥 𐴀𐴡𐴃𐴡đ´Ĩ𐴊𐴞𐴕 𐴕𐴟 𐴀𐴝𐴘𐴁𐴡𐴤 𐴎𐴠𐴃𐴡đ´Ĩ𐴊𐴞𐴕 𐴁𐴠đ´Ļ𐴐𐴁𐴝đ´Ĩ𐴑 𐴔𐴝𐴕𐴟đ´Ĩ𐴙𐴐đ´ĸ 𐴀𐴝𐴓𐴧𐴝𐴌 𐴀𐴟𐴓𐴋𐴝 𐴀𐴡đ´Ĩ𐴘 𐴕𐴡đ´Ĩ 𐴎𐴝𐴒𐴡𐴘, 𐴀𐴝đ´Ļ𐴌 𐴕𐴝𐴉𐴡đ´Ĩ𐴌𐴔𐴝𐴙𐴕𐴧𐴝 𐴀𐴟𐴘𐴃𐴠, 𐴘𐴝đ´Ĩ𐴕𐴞 𐴁𐴡𐴌𐴁𐴝𐴊𐴞𐴌 𐴉𐴟𐴖𐴝 𐴎𐴝𐴇𐴠đ´Ĩ𐴌 𐴕𐴡đ´Ĩ.4𐴀𐴞đ´Ĩ𐴃𐴠 𐴔𐴝𐴙𐴕𐴐𐴠đ´Ĩ 𐴎𐴞𐴀𐴕𐴡𐴌𐴠 𐴑𐴟đ´Ĩ𐴊𐴝 𐴁𐴥đ´Ĩ𐴓𐴞 𐴈𐴡𐴀 𐴀𐴠𐴊𐴧𐴠 𐴎𐴞𐴀𐴕𐴡𐴌𐴠 𐴉𐴟đ´Ŗ𐴎𐴝 𐴒𐴡𐴌𐴠đ´Ĩ, 𐴇𐴞đ´Ĩ𐴀𐴕 𐴁𐴠𐴒𐴧𐴟đ´Ĩ𐴕𐴡𐴌 𐴀𐴟𐴓𐴋𐴝 𐴒𐴡𐴌𐴞đ´Ĩ𐴁𐴥 𐴀𐴠𐴊𐴧𐴠 𐴕𐴞𐴎𐴡𐴌𐴠đ´Ĩ 𐴕𐴞𐴎𐴠 𐴇𐴞đ´Ĩ𐴀𐴕𐴡𐴌 𐴋𐴡đ´Ŗ𐴀𐴌 𐴑𐴟đ´Ĩ𐴖𐴝𐴓𐴝𐴘𐴁𐴡. 𐴀𐴞đ´Ĩ𐴃𐴠 𐴀𐴠𐴕𐴊𐴞𐴓𐴧𐴝 𐴀𐴟đ´Ĩ𐴊𐴧𐴗𐴝 𐴒𐴡𐴌𐴞đ´Ĩ𐴁𐴥, 𐴀𐴝𐴓𐴧𐴝𐴌 𐴒𐴡đ´Ĩ𐴌𐴡𐴌 𐴁𐴟đ´Ĩ𐴃𐴡𐴌𐴠 𐴒𐴡đ´Ĩ𐴓𐴞 𐴁𐴡𐴀𐴘𐴧𐴡𐴌𐴠 𐴀𐴝𐴓𐴧𐴝 𐴁𐴡𐴓𐴞 𐴊𐴝𐴁𐴞 𐴒𐴡𐴌𐴞đ´Ĩ𐴁𐴥.
5𐴃𐴟đ´Ŗ𐴀𐴝đ´Ĩ𐴌𐴝𐴃𐴧𐴟 𐴘𐴝đ´Ļ𐴊đ´ĸ 𐴕𐴝đ´Ĩ𐴘 𐴕𐴠đ´Ĩ, 𐴀𐴝𐴀𐴛 𐴃𐴟đ´Ŗ𐴀𐴝đ´Ĩ𐴌𐴝𐴌 𐴉𐴟đ´Ĩ𐴖𐴝đ´Ŗ𐴃𐴞 𐴃𐴝đ´Ĩ𐴑𐴞𐴃𐴠 𐴇𐴞đ´Ĩ𐴀𐴕 𐴁𐴠𐴒𐴧𐴟đ´Ĩ𐴕 𐴃𐴟đ´Ŗ𐴀𐴝đ´Ĩ𐴌𐴝𐴌𐴠 𐴈𐴡𐴀𐴘𐴓𐴝𐴔 𐴊𐴠đ´Ĩ؟6𐴃𐴟đ´Ŗ𐴀𐴝đ´Ĩ𐴌𐴝 𐴃𐴥 𐴎𐴝𐴕𐴡, 𐴘𐴝𐴓𐴝 𐴀𐴞đ´Ĩ𐴃𐴝𐴌𐴠 𐴑𐴞𐴘𐴠đ´Ĩ 𐴀𐴡𐴀đ´Ŗ𐴓𐴞 𐴌𐴝𐴙𐴑𐴧𐴠đ´Ĩ, 𐴎𐴠𐴀𐴕𐴠 𐴀𐴞đ´Ĩ𐴃𐴠 𐴕𐴞𐴎𐴡𐴌 𐴀𐴡𐴑𐴃𐴡đ´Ĩ 𐴀𐴝𐴘𐴓𐴠𐴤 𐴎𐴝𐴇𐴠đ´Ĩ𐴌 𐴀𐴡đ´Ĩ.7𐴑𐴞𐴘𐴡đ´Ĩ𐴓𐴧𐴝-𐴈𐴡𐴘𐴓𐴠đ´Ĩ 𐴁𐴠𐴊𐴞𐴕𐴞𐴌 𐴒𐴟𐴉𐴡𐴕 𐴈𐴝𐴔 𐴃𐴥 𐴀𐴝𐴙𐴅𐴧𐴡𐴤 𐴏𐴡𐴓𐴝𐴃đ´ĸ 𐴀𐴝𐴏𐴠𐴤. 𐴔𐴡𐴕𐴃𐴡𐴌 𐴎𐴞𐴁𐴝𐴤𐴘𐴠 𐴀𐴝𐴙𐴅𐴧𐴡𐴤 𐴀𐴡𐴀đ´Ŗ𐴓𐴝𐴃đ´ĸ 𐴀𐴝𐴏𐴠𐴤 𐴀𐴞đ´Ĩ𐴁𐴝𐴘𐴠 𐴀𐴡𐴃𐴡đ´Ĩ𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴇𐴠đ´Ĩ𐴕𐴊𐴞𐴓𐴧𐴝 𐴒𐴡𐴌𐴝đ´Ĩ𐴃đ´ĸ 𐴃𐴝đ´Ĩ𐴑𐴞𐴁𐴡 𐴎𐴠𐴃𐴡đ´Ĩ𐴊𐴞𐴕 𐴀𐴞đ´Ĩ𐴁𐴝𐴌𐴠 𐴓𐴝𐴌𐴞𐴉𐴠đ´Ĩ𐴓𐴝 𐴕𐴡đ´Ĩ 𐴎𐴝.8𐴘𐴝đ´Ĩ𐴌𐴁𐴝đ´Ļ𐴊𐴠 𐴇𐴠đ´Ĩ 𐴕𐴝𐴉𐴡đ´Ĩ𐴌𐴔𐴝𐴙𐴕𐴧𐴝 𐴎𐴝𐴇𐴠đ´Ĩ𐴌 𐴀𐴡đ´Ĩ𐴘𐴁𐴥, 𐴎𐴝𐴌𐴠đ´Ĩ 𐴔𐴝𐴓𐴞𐴑𐴠 𐴕𐴞𐴎𐴡𐴌 𐴒𐴝𐴓𐴡𐴌 𐴕𐴞𐴘𐴝đ´Ĩ𐴐𐴠 𐴔𐴝𐴌𐴞𐴉𐴠đ´Ĩ𐴓𐴝𐴘𐴁𐴡 𐴀𐴝đ´Ļ𐴌 𐴕𐴞𐴎𐴡𐴌 𐴀𐴝𐴀𐴌 𐴃𐴡𐴎𐴡𐴓𐴧𐴞 𐴓𐴡𐴘 𐴇𐴡đ´Ĩ𐴃𐴡𐴔 𐴒𐴡𐴌𐴞đ´Ĩ𐴉𐴠𐴓𐴝𐴘𐴁𐴡.9𐴇𐴠đ´Ĩ 𐴕𐴝𐴉𐴡đ´Ĩ𐴌𐴔𐴝𐴙𐴕𐴧𐴝 𐴀𐴞đ´Ĩ𐴃𐴠 𐴐𐴥đ´Ĩ𐴘𐴃𐴝𐴕𐴡𐴌 𐴑𐴠đ´Ĩ𐴔𐴡𐴃𐴝𐴘𐴠 𐴀𐴝𐴀𐴘đ´ĸ 𐴇𐴝đ´Ĩ𐴀𐴌 𐴑𐴞𐴏𐴞đ´Ĩ𐴔𐴡𐴌 𐴔𐴞𐴏𐴝đ´Ĩ 𐴑𐴠𐴌𐴝𐴔𐴡𐴃𐴞 𐴀𐴡đ´Ĩ𐴑𐴧𐴡𐴓đ´ĸ, 𐴀𐴠𐴊𐴧𐴠 𐴃𐴝đ´Ļ𐴅𐴟𐴙𐴂𐴧𐴝 𐴈𐴝𐴔 𐴀𐴡đ´Ĩ𐴑𐴧𐴡𐴓đ´ĸ 𐴒𐴡𐴌𐴞đ´Ĩ 𐴊𐴝𐴈𐴝𐴤𐴘𐴁𐴡,10𐴀𐴝đ´Ļ𐴌 𐴁𐴡𐴌𐴁𐴝𐴊𐴞 𐴀𐴡đ´Ĩ𐴑𐴧𐴡𐴓𐴡𐴌𐴠 𐴇𐴝đ´Ĩ𐴀𐴌 𐴋𐴡đ´Ĩ𐴙𐴓𐴧𐴝 𐴁𐴠𐴘𐴔𐴝𐴕𐴞 𐴓𐴡𐴘 𐴊𐴟đ´Ĩ𐴑𐴝 𐴊𐴞đ´Ĩ𐴁𐴥. 𐴔𐴝𐴕𐴟đ´Ĩ𐴙𐴐đ´ĸ 𐴀𐴞đ´Ĩ𐴃𐴝𐴌𐴝 𐴀𐴠𐴃𐴡𐴓𐴧𐴝𐴤 𐴁𐴡𐴌𐴁𐴝𐴊đ´ĸ 𐴀𐴡đ´Ĩ𐴘𐴁𐴥, 𐴑𐴞𐴘𐴡đ´Ĩ𐴓𐴧𐴝-𐴈𐴡𐴘𐴓𐴠đ´Ĩ 𐴕𐴠𐴅𐴝𐴃đ´ĸ 𐴉𐴝𐴘 𐴁𐴡𐴓𐴧𐴝 𐴀𐴞đ´Ĩ𐴃𐴝𐴌𐴝 𐴏𐴡đ´Ĩ𐴘𐴧𐴞𐴌 𐴔𐴟𐴇𐴝đ´Ĩ𐴁𐴧𐴡𐴃𐴡𐴌𐴠 𐴑𐴡𐴁𐴟𐴓đ´ĸ 𐴕𐴡đ´Ĩ 𐴒𐴡𐴌𐴠đ´Ĩ.11𐴇𐴠đ´Ĩ𐴃𐴡𐴓𐴧𐴝 𐴁𐴥đ´Ĩ𐴓𐴞 𐴀𐴝𐴓𐴧𐴝𐴘𐴠 𐴀𐴞đ´Ĩ𐴃𐴝𐴌𐴝𐴌 𐴇𐴝đ´Ŗ𐴏𐴠 𐴒𐴟𐴔𐴌𐴝𐴤𐴌 𐴀𐴝𐴏𐴡đ´Ĩ𐴌 𐴊𐴞𐴉𐴠𐴍𐴝đ´Ĩ𐴘𐴁𐴥, 𐴎𐴠𐴀𐴕𐴠 𐴀𐴞đ´Ĩ𐴃𐴝𐴌𐴝 𐴔𐴞𐴏𐴝đ´Ĩ 𐴒𐴟đ´Ĩ𐴕𐴡𐴌𐴠 𐴏𐴡đ´Ĩ𐴘𐴧𐴞 𐴁𐴥đ´Ĩ𐴓𐴞 𐴁𐴞𐴐𐴧𐴝đ´Ĩ𐴐đ´ĸ 𐴒𐴡𐴌𐴠đ´Ĩ.12𐴀𐴝đ´Ļ𐴌 𐴕𐴡𐴃𐴞𐴎𐴝 𐴀𐴡đ´Ĩ𐴘𐴁𐴥 𐴊𐴠, 𐴀𐴞đ´Ĩ𐴃𐴝𐴌𐴝 𐴎𐴞𐴀𐴕𐴠 𐴏𐴡đ´Ĩ𐴘𐴧𐴞𐴌 𐴖𐴡𐴌𐴠 𐴀𐴞𐴔𐴝𐴕 𐴕𐴟 𐴀𐴝𐴕𐴞𐴤 𐴁𐴟𐴌𐴝𐴙𐴃đ´ĸ 𐴀𐴝𐴘𐴝𐴐𐴞 𐴒𐴡𐴙𐴅𐴧𐴠đ´Ĩ, 𐴀𐴞đ´Ĩ𐴃𐴝𐴌𐴝 𐴁𐴠𐴒𐴧𐴟đ´Ĩ𐴕𐴠 𐴀𐴝𐴓𐴧𐴝𐴌 𐴃𐴡𐴌𐴉𐴡đ´Ĩ𐴃𐴧𐴟 𐴏𐴝đ´Ĩđ´Ŗ𐴎𐴝 𐴉𐴝𐴘𐴁𐴡.

𐴕𐴠𐴅𐴝𐴃đ´ĸ 𐴉𐴝𐴘 𐴁𐴡𐴓𐴧𐴝 𐴁𐴝𐴏𐴞đ´Ĩ𐴓𐴡𐴖𐴝 𐴒𐴞đ´Ĩ𐴘𐴠

13đ´“đ´ đ´‘đ´žđ´•ØŒ 𐴀𐴡đ´Ĩ 𐴁𐴝đ´Ĩ𐴘𐴁𐴡𐴘𐴕𐴝đ´Ĩ𐴙𐴕 𐴀𐴡đ´Ĩ𐴑𐴧𐴡𐴓đ´ĸ, 𐴃𐴟đ´Ŗ𐴀𐴝đ´Ĩ𐴌𐴝 𐴔𐴝𐴓𐴞𐴑𐴡𐴌 𐴀𐴝𐴊𐴡𐴌𐴁𐴡𐴕 𐴀𐴡đ´Ĩ𐴑𐴧𐴡𐴓𐴡𐴓𐴧𐴝 𐴀𐴝đ´Ŗ𐴀𐴌𐴝𐴃𐴧𐴟 𐴀𐴝𐴓𐴧𐴝𐴌𐴠 𐴇𐴝đ´Ĩ𐴔𐴞𐴐𐴝 𐴐𐴟đ´Ĩ𐴑𐴟𐴌𐴞𐴘𐴝 𐴒𐴡𐴌𐴝đ´Ĩ𐴌 𐴎𐴡𐴌𐴟𐴌, 𐴑𐴞𐴘𐴡đ´Ĩ𐴓𐴧𐴝-𐴈𐴡𐴘𐴓𐴠đ´Ĩ 𐴀𐴝𐴓𐴧𐴝𐴘𐴠 𐴃𐴥 𐴃𐴟đ´Ŗ𐴀𐴝đ´Ĩ𐴌𐴝𐴌𐴠 𐴉𐴡𐴀𐴘𐴓𐴝 𐴐𐴟đ´Ĩ𐴌𐴟𐴃đ´ĸ 𐴓𐴡đ´Ĩ𐴃𐴞 𐴀𐴠𐴃𐴡𐴓𐴧𐴝𐴤 𐴁𐴝𐴏𐴞đ´Ĩ𐴓𐴡𐴘𐴧𐴠, 𐴎𐴠𐴀𐴕𐴠 𐴃𐴟đ´Ŗ𐴀𐴝đ´Ĩ𐴌𐴝 𐴂𐴝𐴑-𐴌𐴟𐴀𐴌 𐴊𐴟𐴖𐴝𐴌𐴝 𐴂𐴝𐴑-𐴏𐴝đ´Ĩ𐴉đ´ĸ 𐴀𐴡đ´Ĩ𐴘 𐴀𐴠𐴊𐴧𐴠 𐴏𐴡đ´Ĩ𐴘𐴧𐴞𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴞𐴤 𐴕𐴠𐴅𐴝𐴃đ´ĸ 𐴉𐴡.14𐴀𐴞đ´Ĩ𐴁𐴝𐴘𐴠 𐴃𐴟đ´Ŗ𐴀𐴝đ´Ĩ𐴌𐴝𐴌𐴠 𐴀𐴝đ´Ŗ𐴀𐴌𐴝 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴞đ´Ĩ 𐴊𐴠 𐴑𐴟đ´Ĩ𐴐𐴈𐴥đ´Ĩ𐴁𐴡𐴌𐴡𐴌 𐴊𐴟𐴖𐴝𐴌𐴝 𐴀𐴠𐴃𐴡𐴓𐴧𐴝𐴤 𐴋𐴝𐴙𐴑𐴧𐴠đ´Ĩ, 𐴎𐴠𐴀𐴕𐴠 𐴃𐴟đ´Ŗ𐴀𐴝đ´Ĩ𐴌𐴝 𐴀𐴝đ´Ŗ𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴔𐴡𐴈𐴞đ´Ĩ𐴔𐴝𐴃đ´ĸ 𐴐𐴥đ´Ĩ𐴌𐴞𐴑 𐴀𐴡đ´Ĩ𐴘 𐴉𐴝𐴌𐴡.
15𐴇𐴠đ´Ĩ𐴃𐴡𐴓𐴧𐴝 𐴈𐴡𐴀𐴙𐴌, 𐴀𐴡đ´Ĩ 𐴁𐴝đ´Ĩ𐴘𐴁𐴡𐴘𐴕𐴝đ´Ĩ𐴙𐴕 𐴀𐴡đ´Ĩ𐴑𐴧𐴡𐴓đ´ĸ, 𐴀𐴝đ´Ŗ𐴀𐴌𐴝 𐴃𐴟đ´Ŗ𐴀𐴝đ´Ĩ𐴌𐴝𐴌 𐴇𐴝đ´Ŗ𐴏𐴠 𐴔𐴟𐴑𐴠đ´Ĩ 𐴘𐴝đ´Ĩ 𐴐𐴠đ´Ŗ𐴍𐴞đ´Ĩ𐴌 𐴏𐴝đ´Ĩ𐴀đ´Ŗ𐴃𐴠 𐴎𐴠 𐴃𐴝đ´Ļ𐴓𐴞𐴔 𐴊𐴞𐴘𐴞đ´Ĩ 𐴇𐴞đ´Ĩ𐴀𐴕𐴡𐴃đ´ĸ 𐴔𐴡𐴎𐴁𐴟𐴃đ´ĸ 𐴒𐴡𐴌𐴞 𐴃𐴞đ´Ĩ𐴘𐴝𐴘 𐴃𐴝đ´Ĩ𐴑𐴡, 𐴀𐴝đ´Ļ𐴌 𐴇𐴞đ´Ĩ𐴀𐴕𐴡𐴌𐴠 𐴊𐴡đ´Ĩ𐴌𐴞 𐴌𐴝𐴑𐴡đ´Ĩ.
16𐴀𐴝đ´Ŗ𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤 𐴕𐴞𐴎𐴠, 𐴀𐴠𐴊𐴧𐴠 𐴀𐴝đ´Ŗ𐴀𐴌𐴝𐴌𐴠 𐴔𐴟𐴇𐴝đ´Ĩ𐴁𐴧𐴥𐴃đ´ĸ 𐴒𐴡𐴌𐴞đ´Ĩ 𐴌𐴝𐴇𐴝đ´Ĩ𐴔𐴡𐴃𐴠 𐴀𐴡𐴉𐴟đ´Ĩ𐴌𐴝𐴕𐴞 𐴃𐴡𐴏𐴡đ´Ĩ𐴓𐴧𐴞 𐴀𐴠𐴊𐴧𐴠 𐴁𐴝đ´Ĩ𐴓𐴝 𐴀𐴝𐴐𐴝𐴤 𐴊𐴞đ´Ļ𐴘𐴠đ´Ĩ 𐴊𐴠 𐴀𐴝đ´Ŗ𐴀𐴌𐴝𐴌 𐴁𐴝𐴉đ´ĸ 𐴀𐴝𐴓𐴧𐴝 𐴘𐴠,17𐴃𐴟đ´Ŗ𐴀𐴝đ´Ĩ𐴌𐴝𐴌𐴠 𐴊𐴞𐴓𐴡𐴃đ´ĸ 𐴃𐴡𐴏𐴡đ´Ĩ𐴓𐴧𐴞 𐴊𐴡𐴑, 𐴀𐴝đ´Ļ𐴌 𐴎𐴞𐴀𐴕 𐴒𐴡𐴔 𐴇𐴞đ´Ĩ𐴀𐴕 𐴀𐴝𐴔𐴡đ´Ĩ𐴓đ´ĸ 𐴒𐴡𐴌𐴞đ´Ĩ 𐴁𐴡𐴓𐴧𐴝 𐴀𐴠𐴊𐴧𐴠 𐴇𐴡𐴘 𐴁𐴡𐴓𐴧𐴝 𐴃𐴟đ´Ŗ𐴀𐴝đ´Ĩ𐴌𐴝𐴌𐴠 𐴔𐴡𐴎𐴁𐴟𐴃đ´ĸ 𐴒𐴡𐴌𐴡đ´Ĩ𐴗𐴑.

The Word for the World International

https://app.library.bible/content/87faca8b51c22590

expand_more
chevron_rightPrevious Chapter
chevron_leftNext Chapter