Read 2 𐴉𐴞𐴃𐴡𐴌 3

2 𐴉𐴞𐴃𐴡𐴌3

𐴔𐴝𐴓𐴞𐴑 𐴀𐴝𐴘𐴁𐴝𐴤𐴌 𐴖𐴝𐴦𐴊𐴝

¹𐴀𐴡𐴥 𐴀𐴝𐴊𐴡𐴙𐴅𐴧𐴝 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴓𐴠𐴑𐴞𐴥𐴌 𐴊𐴠 𐴘𐴝𐴀𐴕 𐴀𐴡𐴥𐴙𐴓𐴊𐴠 𐴀𐴝𐴣𐴀𐴌 𐴊𐴟𐴏𐴝𐴥𐴌𐴝 𐴐𐴠𐴣𐴍𐴞𐴥. 𐴘𐴝𐴦𐴊𐴢 𐴒𐴡𐴌𐴞𐴥𐴊𐴞𐴘𐴝𐴌 𐴔𐴞𐴑𐴧𐴝𐴥𐴃𐴧𐴟 𐴀𐴝𐴀𐴛 𐴊𐴟𐴕𐴞𐴥 𐴐𐴠𐴣𐴍𐴞𐴥𐴃𐴢 𐴃𐴟𐴣𐴀𐴝𐴥𐴌𐴝𐴌 𐴏𐴝𐴥𐴉𐴢 𐴊𐴞𐴓𐴡𐴌𐴠 𐴓𐴝𐴌𐴞𐴊𐴞𐴘𐴞𐴥,²𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴂𐴝𐴑 𐴕𐴡𐴁𐴞 𐴀𐴡𐴥𐴑𐴧𐴡𐴓𐴠 𐴎𐴠 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴀𐴝𐴒𐴠 𐴓𐴡𐴥𐴃𐴞 𐴈𐴡𐴀𐴘𐴒𐴞𐴘𐴠 𐴀𐴝𐴦𐴌 𐴔𐴝𐴓𐴞𐴑 𐴀𐴠𐴊𐴧𐴠 𐴕𐴠𐴅𐴝𐴃𐴊𐴡𐴘𐴝𐴌 𐴎𐴠 𐴇𐴡𐴥𐴑𐴟𐴔 𐴃𐴟𐴣𐴀𐴝𐴥𐴌𐴝𐴌 𐴏𐴝𐴥𐴇𐴝𐴁𐴞𐴌 𐴊𐴟𐴖𐴝𐴌𐴝 𐴀𐴝𐴙𐴐𐴧𐴠𐴥 𐴇𐴞𐴥𐴀𐴕 𐴘𐴝𐴦𐴊𐴢 𐴌𐴝𐴑𐴡𐴥.

³𐴀𐴠𐴁𐴧𐴠 𐴀𐴝𐴒𐴠 𐴘𐴝𐴀𐴕 𐴎𐴝𐴕𐴞𐴓𐴡 𐴊𐴠 𐴑𐴞, 𐴀𐴝𐴇𐴠𐴥𐴌𐴞 𐴎𐴡𐴁𐴝𐴕𐴝𐴃𐴢 𐴄𐴝𐴥𐴃𐴄𐴝𐴘𐴁𐴝𐴎𐴞-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴢 𐴄𐴝𐴥𐴃𐴄𐴝𐴘𐴁𐴝𐴎𐴞 𐴒𐴡𐴌𐴞𐴥-𐴒𐴡𐴌𐴞𐴥 𐴀𐴝𐴘𐴁𐴡𐴤, 𐴀𐴝𐴦𐴌 𐴕𐴞𐴎𐴡𐴌 𐴈𐴡𐴥𐴌𐴝𐴉𐴢 𐴀𐴝𐴎𐴧𐴟𐴘𐴠 𐴏𐴡𐴓𐴞𐴁𐴡𐴥.⁴𐴀𐴞𐴥𐴃𐴝𐴌𐴝 𐴈𐴡𐴘𐴁𐴡𐴤 𐴊𐴠, ”𐴀𐴞𐴥𐴁𐴝 𐴀𐴝𐴘𐴁𐴝𐴤𐴌 𐴖𐴝𐴦𐴊𐴝 𐴇𐴡𐴍𐴠𐴥 𐴒𐴞𐴦𐴘𐴡𐴥𐴘؟ 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴃𐴡 𐴀𐴝𐴣𐴀𐴌𐴝𐴌 𐴊𐴝𐴊𐴝-𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴢 𐴔𐴡𐴦𐴃𐴡𐴌 𐴒𐴟𐴥𐴔𐴡𐴃𐴢 𐴉𐴡𐴌𐴞 𐴁𐴝𐴦𐴊𐴠 𐴘𐴡 𐴀𐴝𐴙𐴅𐴧𐴡𐴤 𐴀𐴟𐴕𐴊𐴞𐴓𐴧𐴝 𐴏𐴡𐴓𐴝𐴃𐴢 𐴀𐴝𐴏𐴠𐴤 𐴎𐴠𐴕𐴊𐴞𐴓𐴧𐴝 𐴇𐴞𐴥𐴀𐴕 𐴊𐴟𐴕𐴞𐴘𐴝𐴙𐴌 𐴉𐴡𐴘𐴊𐴝𐴘𐴠𐴐𐴞𐴌 𐴇𐴠𐴥𐴣𐴃𐴧𐴠 𐴓𐴡𐴥𐴃𐴞 𐴀𐴝𐴐𐴧𐴞𐴥𐴓𐴢.“⁵𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝 𐴁𐴟𐴎𐴞𐴥𐴏𐴞𐴕𐴃𐴞 𐴉𐴡𐴀𐴌𐴝𐴘𐴉𐴠𐴓𐴠 𐴊𐴠 𐴑𐴞, 𐴁𐴡𐴀𐴗𐴃𐴢 𐴀𐴝𐴒𐴠 𐴀𐴝𐴓𐴧𐴝𐴌 𐴑𐴝𐴓𐴝𐴔𐴠 𐴀𐴝𐴏𐴔𐴝𐴕 𐴉𐴡𐴘𐴊𐴝 𐴀𐴡𐴥𐴘𐴧𐴠, 𐴀𐴝𐴦𐴌 𐴎𐴡𐴁𐴞𐴕𐴡𐴌𐴠 𐴉𐴝𐴕𐴞𐴥𐴃𐴧𐴟 𐴁𐴝𐴕𐴝𐴘 𐴉𐴝𐴕𐴞𐴥𐴃𐴢 𐴑𐴝𐴦𐴘𐴠𐴔 𐴒𐴡𐴙𐴅𐴧𐴠𐴥,⁶𐴎𐴠 𐴉𐴝𐴕𐴞𐴥𐴌 𐴊𐴟𐴖𐴝𐴌𐴝 𐴇𐴠𐴥 𐴎𐴡𐴁𐴝𐴕𐴝𐴌 𐴊𐴟𐴕𐴞𐴘𐴝𐴘𐴌𐴠 𐴃𐴟𐴖𐴝𐴥𐴕 𐴀𐴝𐴕𐴞𐴤 𐴊𐴡𐴥𐴚𐴐𐴡 𐴒𐴡𐴌𐴞𐴥𐴉𐴠𐴓𐴝 𐴒𐴞𐴥𐴀𐴓𐴢.⁷𐴇𐴠𐴥 𐴀𐴠𐴑𐴞𐴤 𐴑𐴝𐴓𐴝𐴔𐴠 𐴁𐴠 𐴘𐴝𐴓𐴝𐴌 𐴀𐴝𐴏𐴔𐴝𐴕 𐴀𐴠𐴊𐴧𐴠 𐴎𐴡𐴁𐴞𐴕𐴡𐴌𐴠 𐴀𐴡𐴦𐴙𐴕 𐴓𐴡𐴘 𐴎𐴡𐴓𐴝𐴘 𐴊𐴞𐴉𐴠𐴥𐴓𐴝𐴘 𐴁𐴡𐴓𐴧𐴝 𐴌𐴝𐴑𐴝𐴤 𐴒𐴞𐴥𐴘𐴠. 𐴇𐴞𐴥𐴀𐴕𐴡𐴌𐴠 𐴈𐴠𐴥𐴉𐴝𐴎𐴡𐴃𐴢 𐴌𐴝𐴑𐴝𐴤 𐴎𐴝𐴘𐴁𐴡 𐴊𐴠, 𐴁𐴠𐴊𐴞𐴕𐴞 𐴀𐴡𐴥𐴑𐴧𐴡𐴓𐴡𐴌 𐴁𐴞𐴏𐴝𐴌 𐴀𐴠𐴊𐴧𐴠 𐴁𐴡𐴌𐴁𐴝𐴊𐴞𐴌 𐴊𐴞𐴕 𐴉𐴡𐴙𐴅𐴧𐴡𐴕𐴃𐴡.

⁸𐴔𐴡𐴕𐴃𐴡𐴌 𐴀𐴝𐴊𐴡𐴙𐴅𐴧𐴝 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴀𐴠 𐴈𐴡𐴃𐴝𐴤 𐴉𐴡𐴀𐴌𐴝𐴘 𐴕𐴡 𐴉𐴠𐴓𐴝𐴘𐴧𐴡 𐴊𐴠 𐴑𐴞, 𐴔𐴝𐴓𐴞𐴑𐴡𐴌 𐴕𐴡𐴎𐴡𐴌𐴡𐴃𐴢 𐴀𐴠𐴑 𐴊𐴞𐴕 𐴀𐴠𐴑 𐴀𐴝𐴥𐴎𐴝𐴌 𐴁𐴡𐴏𐴡𐴥𐴌𐴡𐴌 𐴉𐴟𐴥𐴖𐴝𐴕 𐴀𐴝𐴦𐴌 𐴀𐴠𐴑 𐴀𐴝𐴥𐴎𐴝𐴌 𐴁𐴡𐴏𐴡𐴥𐴌 𐴀𐴠𐴑 𐴊𐴞𐴕𐴡𐴌 𐴉𐴟𐴥𐴖𐴝𐴕.⁹𐴔𐴝𐴓𐴞𐴑𐴠 𐴀𐴞𐴥𐴁𐴝𐴌 𐴖𐴝𐴦𐴊𐴝 𐴉𐴟𐴌𐴝 𐴒𐴡𐴙𐴃𐴧𐴠𐴤 𐴊𐴠𐴌𐴞 𐴒𐴡𐴌𐴠𐴥 𐴊𐴠 𐴕𐴡, 𐴎𐴠𐴕𐴊𐴞𐴓𐴧𐴝 𐴑𐴞𐴘𐴠𐴥-𐴑𐴞𐴘𐴠𐴥 𐴊𐴠𐴌𐴞 𐴒𐴡𐴌𐴠𐴥 𐴁𐴡𐴓𐴞 𐴁𐴝𐴥𐴉𐴠; 𐴁𐴡𐴥𐴓𐴑𐴠 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴁𐴡𐴥𐴌 𐴒𐴡𐴌𐴞𐴥 𐴃𐴝𐴥𐴙𐴑𐴧𐴠 𐴊𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴡𐴕𐴡𐴤 𐴀𐴠𐴎𐴧𐴡𐴕 𐴊𐴡𐴥𐴚𐴐𐴡 𐴀𐴡𐴥𐴘𐴎𐴝𐴒𐴡𐴘 𐴊𐴠 𐴇𐴞𐴥𐴘𐴝𐴕 𐴀𐴞𐴥𐴁𐴝𐴘𐴠 𐴕𐴡 𐴏𐴝𐴀, 𐴁𐴡𐴥𐴓𐴑𐴠 𐴏𐴝𐴀 𐴊𐴠, 𐴁𐴠𐴒𐴧𐴟𐴥𐴕𐴠 𐴎𐴠𐴕 𐴃𐴡𐴖𐴝𐴥 𐴒𐴡𐴌𐴞𐴥𐴉𐴠𐴓𐴠.

¹⁰𐴓𐴠𐴑𐴞𐴕 𐴔𐴝𐴓𐴞𐴑𐴡𐴌 𐴊𐴞𐴕 𐴏𐴟𐴌 𐴀𐴝𐴘𐴧𐴠𐴤 𐴉𐴝𐴥𐴚𐴒𐴡𐴌𐴞 𐴁𐴠 𐴀𐴝𐴘𐴁𐴡𐴤. 𐴇𐴠𐴥 𐴊𐴞𐴕 𐴀𐴝𐴏𐴔𐴝𐴕 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴀𐴟𐴎𐴡𐴌𐴠 𐴀𐴡𐴉𐴝𐴥𐴃𐴢 𐴀𐴡𐴥𐴘𐴎𐴝𐴘𐴁𐴡𐴘, 𐴀𐴝𐴦𐴌 𐴏𐴝𐴕, 𐴁𐴠𐴙𐴓𐴢, 𐴀𐴠𐴊𐴧𐴠 𐴃𐴝𐴌𐴝 𐴀𐴡𐴥𐴑𐴧𐴡𐴓𐴢 𐴃𐴠𐴎𐴢 𐴀𐴡𐴦𐴘𐴕𐴠 𐴔𐴞𐴓𐴝𐴘 𐴎𐴝𐴘𐴁𐴡𐴘; 𐴊𐴟𐴕𐴞𐴘𐴝𐴘 𐴀𐴠𐴊𐴧𐴠 𐴇𐴞𐴥𐴘𐴝𐴕𐴡𐴌 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴎𐴡𐴓𐴞𐴎𐴝𐴘𐴁𐴡𐴥𐴘.

¹¹𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴎𐴠𐴃𐴧𐴡𐴥𐴃𐴢 𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴕𐴝𐴐𐴢 𐴀𐴡𐴥𐴘𐴎𐴝𐴘𐴁𐴡𐴘, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴇𐴡𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴢 𐴀𐴡𐴥𐴕 𐴏𐴝𐴥؟ 𐴃𐴟𐴣𐴀𐴝𐴥𐴌𐴝𐴃𐴧𐴟 𐴂𐴝𐴑 𐴀𐴠𐴊𐴧𐴠 𐴊𐴞𐴕𐴊𐴝𐴥𐴌𐴞 𐴒𐴡𐴥𐴌𐴞 𐴏𐴡𐴓𐴞,¹²𐴀𐴝𐴓𐴧𐴝𐴌 𐴊𐴞𐴕 𐴀𐴝𐴘𐴁𐴝𐴤𐴌 𐴀𐴠𐴕𐴃𐴠𐴎𐴝𐴌𐴡𐴃𐴢 𐴀𐴠𐴊𐴧𐴠 𐴘𐴞𐴥𐴁𐴝 𐴇𐴝𐴥𐴌𐴝 𐴀𐴝𐴕𐴝𐴤𐴘𐴁𐴝𐴌 𐴑𐴟𐴐𐴞𐴥𐴐𐴡𐴃𐴢 𐴀𐴡𐴥𐴕 𐴏𐴝𐴥. 𐴇𐴠𐴥 𐴊𐴞𐴕 𐴃𐴡 𐴀𐴝𐴏𐴔𐴝𐴕 𐴉𐴟𐴌𐴞 𐴊𐴡𐴥𐴚𐴐𐴡 𐴀𐴡𐴥𐴘𐴎𐴝𐴘𐴁𐴡𐴘, 𐴀𐴝𐴦𐴌 𐴏𐴝𐴕, 𐴁𐴠𐴙𐴓𐴢, 𐴀𐴠𐴊𐴧𐴠 𐴃𐴝𐴌𐴝 𐴀𐴡𐴥𐴑𐴧𐴡𐴓𐴢 𐴃𐴠𐴎𐴢 𐴀𐴡𐴦𐴘𐴕𐴠 𐴔𐴞𐴓𐴝𐴘 𐴎𐴝𐴘𐴁𐴡𐴘.¹³𐴓𐴠𐴑𐴞𐴕 𐴀𐴞𐴥𐴁𐴝𐴌 𐴖𐴝𐴦𐴊𐴝 𐴔𐴡𐴎𐴞𐴕 𐴀𐴝𐴣𐴀𐴌𐴝 𐴕𐴡𐴘𐴝 𐴀𐴝𐴏𐴔𐴝𐴕 𐴀𐴠𐴊𐴧𐴠 𐴕𐴡𐴘𐴝 𐴎𐴡𐴁𐴞𐴕𐴡𐴌 𐴀𐴠𐴕𐴃𐴠𐴎𐴝𐴌𐴡𐴃𐴢 𐴀𐴝𐴏𐴞𐴤, 𐴎𐴠𐴍𐴠𐴥 𐴉𐴡𐴌𐴇𐴠𐴥𐴏𐴒𐴝𐴌𐴞 𐴃𐴝𐴥𐴑𐴠.

¹⁴𐴇𐴠𐴥𐴃𐴡𐴓𐴧𐴝, 𐴀𐴝𐴊𐴡𐴙𐴅𐴧𐴝 𐴀𐴡𐴥𐴑𐴧𐴡𐴓𐴢, 𐴎𐴠𐴃𐴧𐴡𐴥𐴃𐴢 𐴃𐴟𐴣𐴀𐴝𐴥𐴌𐴝 𐴇𐴞𐴥𐴀𐴕𐴡𐴌 𐴀𐴠𐴕𐴃𐴠𐴎𐴝𐴌𐴡𐴃𐴢 𐴀𐴝𐴏𐴡𐴤, 𐴑𐴟𐴐𐴞𐴥𐴐𐴢 𐴒𐴡𐴌𐴡𐴤 𐴊𐴠 𐴑𐴞, 𐴀𐴝𐴓𐴧𐴝𐴘𐴠 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴌𐴠 𐴐𐴝𐴥𐴕𐴃𐴞𐴌 𐴇𐴝𐴥𐴓𐴡𐴃𐴡𐴃𐴢 𐴊𐴝𐴑 𐴏𐴝𐴥𐴌𐴝 𐴀𐴠𐴊𐴧𐴠 𐴁𐴠𐴈𐴡𐴏𐴟𐴥𐴌 𐴓𐴡𐴦𐴃𐴉𐴝.¹⁵𐴄𐴝𐴥𐴀𐴌𐴞𐴁𐴝 𐴊𐴠, 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑𐴡𐴌 𐴏𐴡𐴁𐴡𐴥𐴌 𐴀𐴡𐴥𐴙𐴓𐴊𐴠 𐴕𐴠𐴅𐴝𐴃𐴡𐴌 𐴔𐴡𐴑𐴝; 𐴎𐴠 𐴈𐴡𐴃𐴝𐴤 𐴀𐴝𐴣𐴀𐴌𐴝𐴌 𐴀𐴝𐴊𐴡𐴙𐴅𐴧𐴝 𐴁𐴝𐴥𐴘 𐴂𐴝𐴥𐴀𐴟𐴓𐴠 𐴘𐴡𐴥 𐴀𐴝𐴓𐴧𐴝𐴌 𐴊𐴞𐴦𐴘𐴝 𐴒𐴞𐴘𐴝𐴕 𐴔𐴡𐴎𐴞𐴕 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴓𐴠𐴙𐴑𐴧𐴠𐴥.¹⁶𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌 𐴐𐴠𐴣𐴍𐴞𐴥 𐴁𐴠𐴒𐴧𐴟𐴥𐴕𐴡𐴃𐴢 𐴀𐴡𐴥 𐴀𐴞𐴀𐴕 𐴀𐴡𐴥𐴑𐴧𐴡𐴓𐴢 𐴓𐴠𐴙𐴑𐴧𐴠𐴥, 𐴎𐴞𐴀𐴕𐴡𐴃𐴢 𐴀𐴠𐴕𐴊𐴞𐴓𐴧𐴝 𐴇𐴡𐴊𐴟𐴥𐴕 𐴈𐴡𐴃𐴝𐴤 𐴀𐴝𐴏𐴠𐴤 𐴎𐴞𐴀𐴕 𐴁𐴟𐴎𐴞𐴥𐴃𐴠 𐴔𐴡𐴐𐴑𐴞𐴓𐴢. 𐴃𐴝𐴦𐴓𐴞𐴔 𐴏𐴝𐴥𐴌𐴝 𐴀𐴠𐴊𐴧𐴠 𐴑𐴡𐴔𐴎𐴟𐴌 𐴀𐴡𐴥𐴑𐴧𐴡𐴓𐴠 𐴀𐴞𐴥𐴃𐴝𐴌𐴝 𐴁𐴝𐴑𐴞 𐴂𐴝𐴑-𐴑𐴝𐴓𐴝𐴔 𐴁𐴡𐴊𐴡𐴓𐴠 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴇𐴞𐴥𐴀𐴕𐴡𐴌𐴠 𐴘𐴡𐴥 𐴁𐴡𐴊𐴡𐴓𐴞𐴉𐴠𐴥𐴓𐴝𐴘, 𐴕𐴞𐴎𐴡𐴌 𐴓𐴧𐴝 𐴁𐴡𐴌𐴁𐴝𐴊𐴞 𐴉𐴡𐴘𐴊𐴝 𐴒𐴡𐴌𐴠𐴥.

¹⁷𐴇𐴠𐴥𐴃𐴡𐴓𐴧𐴝 𐴈𐴡𐴀𐴙𐴌, 𐴀𐴡𐴥 𐴀𐴝𐴊𐴡𐴙𐴅𐴧𐴝 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴇𐴞𐴥𐴘𐴝𐴕 𐴀𐴝𐴒𐴠 𐴓𐴡𐴥𐴃𐴞 𐴎𐴝𐴕𐴡 𐴀𐴞𐴥𐴏𐴝𐴉𐴠, 𐴀𐴟𐴥𐴣𐴐𐴞𐴘𐴝𐴌 𐴃𐴝𐴥𐴑𐴡, 𐴎𐴠𐴀𐴕𐴠 𐴇𐴠𐴥 𐴁𐴠𐴊𐴞𐴕𐴞 𐴀𐴡𐴥𐴑𐴧𐴡𐴓𐴡𐴌 𐴒𐴡𐴓𐴧𐴡𐴃𐴠 𐴃𐴟𐴣𐴀𐴝𐴥𐴌𐴝𐴌𐴠 𐴒𐴡𐴓𐴧𐴡𐴃𐴢 𐴌𐴝𐴏𐴃𐴝𐴃𐴢 𐴕𐴡 𐴓𐴡𐴘𐴎𐴝𐴒𐴡𐴥𐴘, 𐴀𐴝𐴦𐴌 𐴕𐴞𐴎𐴡𐴌 𐴔𐴡𐴎𐴁𐴟𐴃𐴢 𐴎𐴝𐴒𐴝𐴃𐴧𐴟 𐴓𐴡𐴌𐴞 𐴕𐴡 𐴎𐴡𐴒𐴡𐴥𐴘;¹⁸𐴁𐴡𐴥𐴓𐴑𐴠 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴠𐴊𐴧𐴠 𐴕𐴠𐴅𐴝𐴃𐴊𐴡𐴘𐴝 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴌𐴝𐴇𐴝𐴥𐴔𐴡𐴃𐴡𐴃𐴢 𐴀𐴠𐴊𐴧𐴠 𐴀𐴞𐴥𐴁𐴝𐴌𐴠 𐴏𐴞𐴕𐴝𐴥𐴃𐴢 𐴎𐴠𐴃𐴡𐴥 𐴀𐴠𐴥𐴃𐴡 𐴁𐴝𐴌𐴡𐴥. 𐴘𐴝𐴓𐴝 𐴀𐴠𐴊𐴧𐴠 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴉𐴡𐴙𐴅𐴧𐴡𐴕𐴃𐴡 𐴀𐴞𐴥𐴁𐴝𐴌 𐴃𐴝𐴦𐴌𐴞𐴉𐴢 𐴀𐴡𐴥𐴖𐴝𐴃𐴢 𐴃𐴝𐴥𐴑𐴡𐴗𐴑. 𐴀𐴝𐴦𐴔𐴞𐴕.

The Word for the World International

https://app.library.bible/content/87faca8b51c22590