Read 2 𐴉𐴞𐴃𐴡𐴌 1

2 𐴉𐴞𐴃𐴡𐴌1

𐴏𐴡𐴥𐴓𐴝𐴔

¹𐴀𐴝𐴀𐴛 𐴏𐴝𐴥𐴘𐴔𐴡𐴕 𐴉𐴞𐴃𐴡𐴌, 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴀𐴠𐴥𐴒𐴧𐴗𐴝 𐴒𐴟𐴓𐴝𐴔 𐴀𐴠𐴊𐴧𐴠 𐴏𐴝𐴥𐴇𐴝𐴁𐴞.
𐴀𐴟𐴘𐴃𐴝𐴌𐴝𐴤𐴌 𐴇𐴝𐴣𐴏𐴠 𐴓𐴠𐴑𐴞𐴥𐴌 𐴎𐴠𐴃𐴝𐴌𐴝𐴤 𐴀𐴝𐴣𐴀𐴌𐴝𐴌 𐴀𐴝𐴓𐴧𐴝 𐴀𐴠𐴊𐴧𐴠 𐴕𐴠𐴅𐴝𐴃𐴊𐴡𐴘𐴝 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴀𐴟𐴏𐴞𐴥𐴓𐴝𐴘𐴠 𐴀𐴝𐴣𐴀𐴌𐴝𐴌 𐴒𐴝𐴥𐴕𐴡𐴌 𐴋𐴡𐴥𐴙𐴓𐴧𐴝 𐴀𐴠𐴑𐴧𐴝𐴥𐴕 𐴑𐴞𐴔𐴡𐴃𐴞 𐴀𐴞𐴔𐴝𐴕 𐴉𐴝𐴘𐴧𐴠𐴥:

²𐴀𐴝𐴓𐴧𐴝𐴌𐴠 𐴀𐴠𐴊𐴧𐴠 𐴀𐴞𐴏𐴝𐴤 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑𐴡𐴌𐴠 𐴏𐴞𐴕𐴡𐴥𐴕𐴠 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴌𐴝𐴇𐴝𐴥𐴔𐴡𐴃𐴢 𐴀𐴠𐴊𐴧𐴠 𐴐𐴝𐴥𐴕𐴃𐴞 𐴁𐴞𐴐𐴞𐴤𐴒𐴡𐴌𐴞 𐴕𐴝𐴎𐴞𐴓𐴢 𐴀𐴡𐴥𐴑.

𐴀𐴞𐴔𐴝𐴕𐴊𐴝𐴥𐴌𐴡𐴌𐴠 𐴀𐴝𐴓𐴧𐴝𐴌 𐴋𐴝𐴑 𐴀𐴠𐴊𐴧𐴠 𐴁𐴝𐴏𐴞𐴥𐴓𐴡𐴖𐴝

³𐴀𐴟𐴁𐴝𐴤𐴌 𐴀𐴞𐴓𐴧𐴝𐴘𐴞 𐴑𐴟𐴊𐴟𐴌𐴟𐴃𐴠 𐴃𐴡 𐴀𐴝𐴣𐴀𐴌𐴝𐴌𐴠 𐴎𐴞𐴕𐴊𐴞𐴒𐴞 𐴀𐴠𐴊𐴧𐴠 𐴊𐴞𐴕𐴊𐴝𐴥𐴌𐴞 𐴓𐴡𐴥𐴘 𐴃𐴝𐴦𐴓𐴟𐴑𐴝𐴃𐴢 𐴒𐴡𐴌𐴠𐴥 𐴊𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴊𐴝𐴕 𐴒𐴡𐴙𐴅𐴧𐴠𐴥, 𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴝𐴌𐴠 𐴕𐴞𐴎𐴡𐴌 𐴔𐴡𐴈𐴞𐴥𐴔𐴝𐴘𐴠 𐴀𐴠𐴊𐴧𐴠 𐴁𐴝𐴥𐴓𐴝𐴘𐴧𐴠 𐴋𐴝𐴙𐴑𐴧𐴠𐴥 𐴀𐴞𐴥𐴁𐴝𐴌𐴠 𐴏𐴞𐴕𐴝𐴥𐴌 𐴎𐴡𐴌𐴞𐴘𐴝.⁴𐴇𐴞𐴥𐴀𐴕𐴡𐴌 𐴊𐴟𐴖𐴝𐴌𐴝 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴝𐴌𐴠 𐴕𐴞𐴎𐴡𐴌 𐴑𐴞𐴔𐴡𐴃𐴞 𐴀𐴠𐴊𐴧𐴠 𐴋𐴡𐴣𐴀𐴌 𐴖𐴝𐴦𐴊𐴝 𐴀𐴡𐴥𐴑𐴧𐴡𐴓𐴢 𐴊𐴞𐴘𐴠𐴥 𐴊𐴠 𐴀𐴝𐴏𐴠𐴤, 𐴎𐴠𐴀𐴕𐴠 𐴇𐴞𐴥𐴀𐴕𐴡𐴌 𐴀𐴟𐴏𐴞𐴥𐴓𐴝𐴘𐴠 𐴃𐴟𐴣𐴀𐴝𐴥𐴌𐴝 𐴀𐴞𐴓𐴧𐴝𐴘𐴞 𐴉𐴞𐴥𐴃𐴡𐴌𐴡𐴃𐴡𐴌 𐴁𐴝𐴥𐴒𐴞 𐴀𐴡𐴥𐴘𐴎𐴡𐴒𐴡𐴘, 𐴀𐴡𐴕𐴃𐴟𐴥 𐴇𐴝𐴥𐴌𐴞 𐴎𐴠 𐴁𐴡𐴌𐴁𐴝𐴊𐴞 𐴕𐴞𐴑𐴞 𐴊𐴟𐴕𐴞𐴘𐴝𐴙𐴃𐴢 𐴈𐴡𐴥𐴌𐴝𐴉𐴢 𐴀𐴝𐴎𐴧𐴟 𐴀𐴡𐴥𐴑𐴧𐴡𐴓𐴠 𐴉𐴡𐴘𐴊𐴝 𐴒𐴡𐴙𐴅𐴧𐴠𐴥.

⁵𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴌𐴝 𐴉𐴟𐴌𐴝𐴉𐴟𐴌𐴞 𐴑𐴟𐴐𐴞𐴥𐴐𐴠, 𐴕𐴞𐴎𐴡𐴌 𐴀𐴞𐴔𐴝𐴕𐴡𐴃𐴢 𐴁𐴝𐴥𐴓𐴝𐴘, 𐴁𐴝𐴥𐴓𐴝𐴙𐴃𐴢 𐴒𐴞𐴘𐴝𐴕,⁶𐴒𐴞𐴘𐴝𐴕𐴡𐴃𐴢 𐴉𐴡𐴌𐴇𐴠𐴥𐴏𐴢, 𐴉𐴡𐴌𐴇𐴠𐴥𐴏𐴡𐴃𐴢 𐴏𐴡𐴁𐴡𐴥𐴌, 𐴏𐴡𐴁𐴡𐴥𐴌𐴡𐴃𐴢 𐴊𐴞𐴕𐴊𐴝𐴥𐴌𐴞,⁷𐴊𐴞𐴕𐴊𐴝𐴥𐴌𐴞𐴃𐴢 𐴁𐴝𐴥𐴘𐴧𐴝𐴓𐴞 𐴔𐴠𐴀𐴌𐴁𐴝𐴕𐴞, 𐴀𐴠𐴊𐴧𐴠 𐴁𐴝𐴥𐴘𐴧𐴝𐴓𐴞 𐴔𐴠𐴀𐴌𐴁𐴝𐴕𐴞𐴃𐴢 𐴔𐴟𐴇𐴝𐴥𐴁𐴧𐴡𐴃𐴢 𐴁𐴝𐴌𐴡𐴥.⁸𐴎𐴡𐴊𐴞 𐴃𐴟𐴣𐴀𐴝𐴥𐴌𐴝𐴃𐴧𐴟 𐴇𐴞𐴥𐴀𐴕 𐴃𐴝𐴥𐴑𐴠 𐴀𐴠𐴊𐴧𐴠 𐴁𐴝𐴌𐴠𐴥𐴌 𐴊𐴠 𐴀𐴡𐴥𐴘𐴓𐴠, 𐴇𐴞𐴥𐴀𐴕𐴠 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌𐴠 𐴏𐴞𐴕𐴝𐴥𐴃𐴢 𐴁𐴠𐴇𐴝𐴌 𐴀𐴠𐴊𐴧𐴠 𐴁𐴠𐴉𐴡𐴥𐴎𐴟𐴓𐴢 𐴀𐴡𐴥𐴘𐴃𐴡 𐴕𐴡 𐴊𐴞𐴁𐴡.⁹𐴔𐴡𐴕𐴃𐴡𐴌 𐴎𐴝𐴃𐴧𐴟 𐴇𐴞𐴥𐴀𐴕 𐴕𐴝𐴥𐴘 𐴘𐴡𐴥𐴒𐴧𐴗𐴝𐴘𐴠 𐴊𐴟𐴌𐴠𐴥 𐴕𐴡 𐴊𐴠𐴑𐴠𐴥, 𐴈𐴡𐴘𐴃𐴡𐴤 𐴏𐴝𐴘𐴓𐴠𐴥 𐴀𐴝𐴣𐴊𐴝𐴤, 𐴀𐴝𐴦𐴌 𐴕𐴞𐴎𐴡𐴌𐴠𐴥 𐴕𐴞𐴎𐴡𐴌 𐴀𐴝𐴒𐴡𐴌 𐴒𐴟𐴕𐴝𐴤 𐴀𐴡𐴥𐴑𐴧𐴡𐴓𐴡𐴃𐴧𐴟 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴞𐴥𐴉𐴠𐴓𐴝 𐴒𐴞𐴥𐴘𐴠 𐴊𐴠 𐴇𐴞𐴥𐴘𐴝𐴕 𐴉𐴡𐴀𐴌𐴝𐴘𐴉𐴠𐴓𐴝𐴘𐴧𐴠.

¹⁰𐴇𐴠𐴥𐴃𐴡𐴓𐴧𐴝, 𐴀𐴡𐴥 𐴁𐴝𐴥𐴘𐴁𐴡𐴘𐴕𐴝𐴥𐴙𐴕, 𐴀𐴝𐴓𐴧𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴋𐴝𐴙𐴑𐴧𐴠𐴥 𐴊𐴠 𐴀𐴠𐴊𐴧𐴠 𐴁𐴝𐴏𐴞𐴥𐴓𐴡𐴘𐴧𐴠 𐴊𐴠 𐴇𐴞𐴥𐴘𐴝𐴕 𐴉𐴝𐴑𐴧𐴝𐴒𐴡𐴌𐴞 𐴁𐴡𐴓𐴧𐴝 𐴀𐴝𐴌𐴡𐴤 𐴁𐴠𐴐𐴝𐴤𐴁𐴞𐴐𐴞𐴤 𐴑𐴟𐴐𐴞𐴥𐴐𐴢 𐴒𐴡𐴌𐴡𐴤. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴃𐴡𐴥𐴑𐴧𐴝𐴓𐴢 𐴃𐴟𐴣𐴀𐴝𐴥𐴌𐴝 𐴇𐴞𐴥𐴀𐴕 𐴒𐴡𐴌𐴝𐴥𐴃𐴢 𐴃𐴝𐴥𐴑𐴡, 𐴃𐴟𐴣𐴀𐴝𐴥𐴌𐴝 𐴁𐴞𐴓𐴑𐴟𐴥𐴓𐴢 𐴀𐴟𐴅𐴝𐴥𐴄𐴢 𐴕𐴡 𐴈𐴝𐴥𐴘𐴁𐴝,¹¹𐴁𐴡𐴥𐴓𐴑𐴠 𐴇𐴠𐴥𐴕𐴊𐴞𐴓𐴧𐴝 𐴀𐴡𐴥𐴘𐴓𐴠 𐴃𐴡 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴠𐴊𐴧𐴠 𐴕𐴠𐴅𐴝𐴃𐴊𐴡𐴘𐴝 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴀𐴡𐴉𐴟𐴥𐴌𐴝𐴕𐴞 𐴌𐴝𐴙𐴅𐴧𐴡𐴃𐴢 𐴁𐴠𐴐𐴝𐴤𐴁𐴞𐴐𐴞𐴤 𐴀𐴞𐴎𐴧𐴡𐴃𐴠 𐴒𐴡𐴥𐴓𐴝 𐴎𐴝𐴘𐴁𐴡.

¹²𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴇𐴞𐴥𐴀𐴕 𐴇𐴝𐴥𐴔𐴞𐴐𐴝 𐴘𐴝𐴦𐴊𐴢 𐴒𐴡𐴌𐴝𐴥𐴘𐴊𐴞𐴘𐴝𐴃𐴢 𐴃𐴝𐴥𐴑𐴞𐴘𐴟𐴔, 𐴃𐴟𐴣𐴀𐴝𐴥𐴌𐴝 𐴇𐴞𐴥𐴀𐴕 𐴎𐴝𐴙𐴕𐴧𐴝 𐴊𐴠 𐴀𐴠𐴊𐴧𐴠 𐴕𐴞𐴎𐴠 𐴉𐴝𐴘𐴧𐴡𐴥 𐴊𐴠 𐴏𐴡𐴥𐴘𐴧𐴞𐴃𐴢 𐴔𐴝𐴥𐴎𐴠 𐴄𐴞𐴑𐴞 𐴀𐴝𐴏𐴡𐴤 𐴊𐴠 𐴀𐴡𐴥𐴘𐴓𐴠 𐴘𐴡.¹³𐴀𐴝𐴀𐴛 𐴘𐴝𐴀𐴕 𐴄𐴞𐴥𐴑 𐴁𐴡𐴥𐴓𐴞 𐴁𐴝𐴥𐴉𐴞 𐴊𐴠 𐴑𐴞, 𐴎𐴠𐴃𐴡𐴥𐴑𐴧𐴝𐴓𐴢 𐴀𐴝𐴀𐴛 𐴀𐴠 𐴄𐴝𐴔𐴁𐴟𐴌 𐴋𐴡𐴥𐴙𐴓𐴧𐴝 𐴇𐴝𐴘𐴧𐴝𐴘𐴠 𐴀𐴝𐴏𐴞𐴤, 𐴃𐴟𐴣𐴀𐴝𐴥𐴌𐴝𐴌𐴠 𐴇𐴞𐴥𐴀𐴕 𐴘𐴝𐴦𐴊𐴢 𐴒𐴡𐴌𐴝𐴥𐴘𐴊𐴞 𐴉𐴡𐴄𐴉𐴡𐴙𐴄𐴧𐴝 𐴒𐴡𐴌𐴡𐴤𐴕,¹⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴎𐴝𐴕𐴞, 𐴇𐴝𐴥𐴌𐴝 𐴀𐴝𐴣𐴀𐴃𐴧𐴟 𐴀𐴝𐴣𐴀𐴌 𐴀𐴠 𐴄𐴝𐴔𐴁𐴟 𐴀𐴠𐴌𐴞 𐴎𐴝𐴦𐴒𐴡𐴥𐴘 𐴉𐴡𐴌𐴞𐴁𐴡𐴥, 𐴎𐴠𐴕𐴊𐴞𐴓𐴧𐴝 𐴀𐴝𐴣𐴀𐴌𐴠𐴥 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴘𐴠 𐴘𐴡𐴥 𐴏𐴝𐴥𐴉𐴢-𐴏𐴝𐴥𐴉𐴢 𐴒𐴡𐴥𐴌𐴞 𐴎𐴝𐴕𐴝𐴘𐴊𐴞𐴘𐴠𐴥.¹⁵𐴀𐴝𐴀𐴛 𐴉𐴟𐴌𐴝𐴉𐴟𐴌𐴞 𐴑𐴟𐴐𐴞𐴥𐴐𐴢 𐴒𐴡𐴌𐴞𐴥𐴘𐴟𐴔 𐴊𐴠 𐴑𐴞, 𐴃𐴟𐴣𐴀𐴝𐴥𐴌𐴝 𐴎𐴠𐴕 𐴀𐴝𐴣𐴀𐴌 𐴀𐴠𐴕𐴃𐴠𐴇𐴝𐴓𐴡𐴌 𐴁𐴝𐴦𐴊𐴠 𐴘𐴡𐴥 𐴇𐴞𐴥𐴀𐴕 𐴇𐴝𐴥𐴔𐴞𐴐𐴝 𐴘𐴝𐴦𐴊𐴢 𐴌𐴝𐴑𐴞𐴥 𐴉𐴝𐴌𐴡.

𐴔𐴡𐴀𐴏𐴞𐴤𐴌 𐴐𐴝𐴥𐴀𐴕𐴡𐴌 𐴏𐴟𐴑𐴊𐴝𐴈𐴝𐴤 𐴒𐴡𐴁𐴝𐴤

¹⁶𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴃𐴡 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴃𐴝𐴦𐴑𐴡𐴃𐴡𐴌 𐴀𐴠𐴊𐴧𐴠 𐴀𐴞𐴥𐴁𐴝 𐴀𐴝𐴘𐴁𐴝𐴤𐴌 𐴁𐴝𐴦𐴁𐴟𐴃𐴠 𐴎𐴝𐴕𐴝𐴘𐴊𐴞𐴘𐴞𐴥 𐴊𐴠 𐴇𐴞𐴥𐴀𐴕 𐴏𐴝𐴓𐴝𐴥𐴑𐴞 𐴒𐴡𐴌𐴞 𐴁𐴝𐴕𐴝𐴘𐴧𐴝 𐴑𐴝𐴇𐴝𐴥𐴕𐴞 𐴕𐴡, 𐴁𐴡𐴥𐴓𐴑𐴠 𐴀𐴝𐴣𐴀𐴌𐴝 𐴀𐴡𐴥𐴘𐴓𐴝𐴔 𐴊𐴠 𐴀𐴞𐴥𐴁𐴝𐴌 𐴐𐴝𐴥𐴀𐴕𐴡𐴌 𐴏𐴟𐴑𐴊𐴝𐴈𐴝𐴤 𐴒𐴡𐴁𐴝𐴤.¹⁷𐴀𐴞𐴥𐴁𐴝𐴘𐴠 𐴀𐴝𐴓𐴧𐴝 𐴁𐴝𐴉𐴡𐴃𐴧𐴟 𐴀𐴡𐴣𐴃𐴧𐴠𐴤 𐴀𐴞𐴎𐴧𐴡𐴃𐴢 𐴀𐴠𐴊𐴧𐴠 𐴔𐴡𐴈𐴞𐴥𐴔𐴝 𐴉𐴝𐴘𐴧𐴠𐴥 𐴎𐴠𐴣𐴃𐴧𐴠𐴥 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴇𐴠𐴥 𐴋𐴡𐴣𐴀𐴌 𐴔𐴡𐴈𐴞𐴥𐴔𐴝-𐴖𐴝𐴓𐴝𐴃𐴧𐴟 𐴀𐴠 𐴀𐴝𐴁𐴝𐴏𐴢 𐴏𐴗𐴝𐴥 𐴀𐴝𐴙𐴐𐴧𐴠𐴥, ”𐴀𐴞𐴁𐴝𐴤 𐴀𐴡𐴥𐴙𐴓𐴊𐴠 𐴀𐴝𐴣𐴀𐴌 𐴀𐴝𐴊𐴡𐴙𐴅𐴧𐴝 𐴉𐴟𐴖𐴝, 𐴎𐴞𐴁𐴝𐴤𐴌𐴠 𐴓𐴡𐴥𐴘 𐴀𐴝𐴀𐴛 𐴁𐴞𐴐𐴞𐴤 𐴑𐴟𐴥𐴐𐴞.“¹⁸𐴀𐴝𐴏𐴔𐴝𐴕𐴡𐴃𐴧𐴟 𐴀𐴝𐴙𐴐𐴧𐴞𐴤𐴓𐴢 𐴊𐴠 𐴇𐴠𐴥 𐴀𐴝𐴁𐴝𐴏𐴢 𐴘𐴞𐴥𐴁𐴝 𐴀𐴝𐴣𐴀𐴌𐴝 𐴕𐴞𐴎𐴠𐴁𐴝𐴎𐴠 𐴉𐴟𐴥𐴙𐴕𐴧𐴞, 𐴇𐴞𐴥𐴘𐴝𐴓𐴝 𐴀𐴝𐴣𐴀𐴌𐴝 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴂𐴝𐴑 𐴉𐴝𐴀𐴌𐴡𐴌 𐴖𐴡𐴌𐴠.

¹⁹𐴀𐴝𐴦𐴌 𐴀𐴝𐴣𐴀𐴌𐴝𐴌 𐴇𐴝𐴣𐴏𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴠 𐴈𐴡𐴀𐴘𐴢 𐴒𐴞𐴥𐴘𐴠 𐴊𐴠 𐴈𐴡𐴃𐴝𐴤 𐴘𐴡𐴥 𐴀𐴝𐴏𐴠𐴤 𐴎𐴞𐴀𐴕𐴠 𐴀𐴝𐴌𐴡𐴤 𐴉𐴝𐴑𐴧𐴝 𐴒𐴡𐴌𐴠𐴥. 𐴀𐴝𐴕𐴊𐴝𐴤𐴌 𐴎𐴝𐴒𐴝𐴃𐴢 𐴏𐴟𐴑 𐴎𐴠𐴕𐴊𐴞𐴓𐴧𐴝 𐴏𐴠𐴌𐴝𐴑𐴡𐴌 𐴉𐴡𐴀𐴌𐴡𐴌 𐴀𐴟𐴎𐴟 𐴃𐴝𐴥𐴑𐴠, 𐴁𐴡𐴌𐴝𐴁𐴡𐴌 𐴇𐴠𐴥𐴕𐴊𐴞𐴓𐴧𐴝 𐴎𐴠𐴃𐴟𐴥𐴕 𐴉𐴡𐴥𐴎𐴡𐴌 𐴕𐴡𐴥 𐴉𐴝𐴥𐴍𐴠 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴡𐴃𐴢 𐴏𐴟𐴥𐴃𐴢-𐴃𐴝𐴌𐴝 𐴕𐴡𐴥 𐴀𐴟𐴓𐴠𐴥, 𐴃𐴟𐴣𐴀𐴝𐴥𐴌𐴝 𐴇𐴞𐴥𐴀𐴕𐴡𐴌 𐴀𐴟𐴎𐴟 𐴑𐴞𐴥𐴘𐴝𐴓𐴢 𐴊𐴞𐴓𐴠𐴥 𐴃𐴟𐴣𐴀𐴝𐴥𐴌𐴝 𐴁𐴝𐴥𐴓𐴝 𐴒𐴡𐴌𐴞𐴥𐴁𐴝.²⁰𐴔𐴡𐴕𐴃𐴡𐴌 𐴀𐴝𐴒𐴠 𐴘𐴝𐴀𐴕 𐴎𐴝𐴕𐴞𐴓𐴡 𐴊𐴠 𐴑𐴞, 𐴂𐴝𐴑-𐴑𐴝𐴓𐴝𐴔𐴡𐴌 𐴇𐴡𐴕𐴡𐴤 𐴂𐴡𐴘𐴒𐴝𐴔 𐴀𐴞𐴕𐴏𐴝𐴥𐴕𐴡𐴌 𐴁𐴟𐴎𐴝𐴥𐴃𐴧𐴟 𐴀𐴝𐴙𐴐𐴧𐴠𐴥 𐴊𐴠 𐴕𐴡.²¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴡𐴕𐴡𐴤 𐴂𐴡𐴘𐴒𐴝𐴔 𐴀𐴞𐴕𐴏𐴝𐴥𐴕𐴡𐴌 𐴔𐴡𐴕𐴐𐴝𐴥𐴃𐴧𐴟 𐴀𐴝𐴙𐴐𐴧𐴠𐴥 𐴊𐴠 𐴕𐴝𐴥𐴘, 𐴁𐴡𐴥𐴓𐴑𐴠 𐴀𐴞𐴕𐴏𐴝𐴥𐴕𐴠 𐴂𐴝𐴑-𐴌𐴟𐴀𐴘𐴠 𐴏𐴡𐴓𐴝𐴘𐴧𐴠𐴥 𐴊𐴠 𐴔𐴡𐴎𐴞𐴕 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴈𐴡𐴘𐴧𐴠𐴥 𐴊𐴠.

The Word for the World International

https://app.library.bible/content/87faca8b51c22590