Read 2-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢 5

2-𐴑𐴡𐴥𐴌𐴞𐴕𐴃𐴞𐴀𐴡𐴥𐴓𐴢5

¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴃𐴡 𐴎𐴝𐴕𐴞, 𐴎𐴡𐴊𐴞 𐴀𐴝𐴣𐴀𐴌𐴝 𐴃𐴝𐴥𐴑𐴞 𐴊𐴠 𐴀𐴠 𐴊𐴟𐴕𐴞𐴘𐴝𐴘𐴁𐴞 𐴄𐴝𐴔𐴁𐴟, 𐴘𐴝𐴥𐴕𐴞 𐴇𐴝𐴘𐴧𐴝 𐴊𐴡𐴥𐴚𐴐𐴡 𐴀𐴡𐴥𐴘𐴎𐴝𐴒𐴡𐴘, 𐴀𐴝𐴣𐴀𐴌𐴝𐴃𐴧𐴟 𐴀𐴝𐴏𐴔𐴝𐴕𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴠𐴑𐴧𐴝𐴥𐴕 𐴁𐴞𐴓𐴧𐴞𐴥𐴚 𐴒𐴡𐴥𐴌 𐴀𐴝𐴏𐴠𐴤 𐴎𐴞𐴘𐴝𐴥𐴕 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟, 𐴇𐴞𐴥𐴘𐴝𐴕 𐴀𐴝𐴥𐴃𐴡𐴌 𐴁𐴝𐴕𐴝𐴘𐴧𐴝 𐴕𐴡 𐴁𐴡𐴥𐴓𐴑𐴠 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴞.²𐴁𐴠𐴐𐴡𐴥𐴑, 𐴀𐴠 𐴄𐴝𐴔𐴁𐴟𐴃𐴢 𐴃𐴝𐴥𐴑𐴞 𐴀𐴝𐴣𐴀𐴌𐴝 𐴋𐴡𐴣𐴀𐴌 𐴕𐴞𐴘𐴝𐴥𐴐𐴢 𐴉𐴠𐴥𐴓𐴝𐴘-𐴉𐴠𐴥𐴓𐴝𐴘 𐴀𐴝𐴏𐴔𐴝𐴕𐴞 𐴒𐴡𐴥𐴌 𐴇𐴞𐴥𐴘𐴝𐴕𐴡𐴌𐴠 𐴇𐴡𐴦𐴌 𐴉𐴞𐴣𐴊𐴠𐴤 𐴉𐴝𐴥𐴚𐴒𐴡𐴌𐴞 𐴉𐴞𐴣𐴊𐴞𐴥 𐴁𐴡𐴓𐴧𐴝 𐴁𐴞𐴐𐴞𐴤 𐴀𐴝𐴎𐴧𐴟 𐴒𐴡𐴌𐴞𐴥𐴌,³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴣𐴃𐴧𐴠𐴥 𐴀𐴝𐴣𐴀𐴌𐴝 𐴇𐴞𐴥𐴘𐴝𐴕𐴡𐴌𐴠 𐴉𐴞𐴣𐴊𐴞𐴥𐴉𐴠𐴓𐴝𐴘𐴧𐴟𐴔, 𐴀𐴝𐴣𐴀𐴌𐴝𐴌𐴠 𐴁𐴞𐴘𐴡𐴏𐴧𐴡𐴌 𐴉𐴝𐴦 𐴕𐴡 𐴎𐴝𐴘𐴁𐴡.⁴𐴁𐴠𐴐𐴡𐴥𐴑, 𐴀𐴝𐴣𐴀𐴌𐴝 𐴎𐴠𐴃𐴝𐴌𐴝𐴤 𐴀𐴠 𐴄𐴝𐴔𐴁𐴟𐴃𐴢 𐴀𐴝𐴏𐴞𐴤, 𐴀𐴝𐴣𐴀𐴌𐴝 𐴉𐴟𐴣𐴎𐴝𐴤𐴌 𐴁𐴡𐴥𐴌𐴠 𐴋𐴡𐴣𐴀𐴌-𐴋𐴡𐴣𐴀𐴌 𐴕𐴞𐴘𐴝𐴥𐴐𐴢 𐴉𐴠𐴥𐴓𐴝𐴙𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝𐴃𐴧𐴟 𐴀𐴝𐴉𐴞𐴕𐴊𐴝𐴤 𐴕𐴡 𐴁𐴡𐴥𐴓𐴑𐴠 𐴉𐴞𐴕𐴊𐴝𐴤 𐴀𐴡𐴥𐴘𐴃𐴡 𐴔𐴡𐴕𐴠𐴈𐴡𐴀𐴌, 𐴎𐴠𐴀𐴕𐴠 𐴉𐴝𐴥𐴕𐴝 𐴀𐴡𐴥 𐴊𐴠 𐴇𐴞𐴥𐴘𐴝𐴕𐴡𐴌𐴠 𐴎𐴞𐴕𐴊𐴞𐴒𐴞𐴘𐴠 𐴒𐴞𐴓𐴞𐴉𐴠𐴥𐴓𐴠.⁵𐴀𐴝𐴣𐴀𐴌𐴝𐴌𐴠 𐴇𐴠𐴥 𐴔𐴡𐴑𐴏𐴡𐴥𐴃𐴡𐴓𐴧𐴝 𐴃𐴡𐴘𐴧𐴝𐴌 𐴀𐴝𐴓𐴧𐴝𐴘𐴠 𐴒𐴡𐴙𐴅𐴧𐴠𐴥 𐴊𐴠, 𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴝𐴌𐴠 𐴁𐴡𐴦𐴕𐴝 𐴀𐴞𐴥𐴏𐴝𐴉𐴠 𐴌𐴟𐴀 𐴊𐴞𐴦𐴘𐴠𐴥.

⁶𐴇𐴠𐴥𐴃𐴡𐴓𐴧𐴝 𐴀𐴝𐴣𐴀𐴌𐴝 𐴇𐴝𐴥𐴔𐴞𐴐𐴝 𐴇𐴞𐴥𐴔𐴧𐴡𐴃𐴢 𐴌𐴝𐴑𐴞𐴥 𐴀𐴝𐴦𐴌 𐴎𐴝𐴕𐴞 𐴊𐴠, 𐴎𐴠𐴃𐴡𐴥𐴑𐴧𐴝𐴓𐴢 𐴀𐴝𐴣𐴀𐴌𐴝 𐴀𐴠 𐴀𐴞𐴕𐴏𐴝𐴥𐴕𐴞 𐴇𐴝𐴘𐴧𐴝 𐴓𐴡𐴘 𐴀𐴝𐴏𐴞𐴤, 𐴀𐴝𐴣𐴀𐴌𐴝 𐴔𐴝𐴓𐴞𐴑𐴡𐴌 𐴇𐴠𐴥𐴍𐴠 𐴇𐴝𐴥𐴎𐴞𐴌 𐴕𐴝𐴥𐴘;⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴃𐴡 𐴏𐴡𐴓𐴝𐴉𐴞𐴥𐴌𐴝 𐴀𐴞𐴔𐴝𐴕𐴡𐴌 𐴏𐴝𐴥𐴀𐴣𐴃𐴠 𐴒𐴡𐴌𐴞𐴥 𐴊𐴠, 𐴏𐴟𐴑𐴠𐴤 𐴊𐴠𐴑𐴞𐴥 𐴕𐴡.⁸𐴀𐴡𐴥𐴘, 𐴀𐴝𐴣𐴀𐴌𐴝𐴃𐴧𐴟 𐴇𐴞𐴥𐴔𐴧𐴡𐴃𐴢 𐴀𐴝𐴏𐴠𐴤, 𐴀𐴝𐴦𐴌 𐴀𐴝𐴣𐴀𐴌𐴝 𐴀𐴠 𐴇𐴝𐴘𐴧𐴝𐴃𐴧𐴟 𐴀𐴝𐴓𐴡𐴑 𐴀𐴡𐴥𐴘 𐴔𐴝𐴓𐴞𐴑𐴡𐴌 𐴉𐴟𐴥𐴖𐴝𐴣𐴃𐴞 𐴒𐴡𐴥𐴌𐴡𐴃𐴢 𐴀𐴡𐴥𐴖𐴝 𐴀𐴝𐴌𐴡𐴤 𐴉𐴡𐴏𐴡𐴥𐴕 𐴒𐴡𐴌𐴞𐴥.⁹𐴇𐴠𐴥𐴃𐴡𐴓𐴧𐴝 𐴀𐴝𐴣𐴀𐴌𐴝 𐴀𐴠 𐴇𐴝𐴘𐴧𐴝𐴌 𐴒𐴡𐴥𐴌𐴡𐴃𐴢 𐴀𐴝𐴏𐴞𐴤 𐴘𐴝𐴥 𐴕𐴝𐴥𐴘, 𐴀𐴝𐴣𐴀𐴌𐴝𐴌 𐴔𐴡𐴕𐴎𐴞𐴓𐴢-𐴔𐴡𐴑𐴏𐴡𐴥𐴃𐴢 𐴀𐴡𐴥𐴙𐴓𐴊𐴠 𐴀𐴞𐴥𐴁𐴝𐴌𐴠 𐴑𐴟𐴥𐴐𐴞 𐴒𐴡𐴌𐴡𐴤𐴕.¹⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕𐴡𐴃𐴧𐴟 𐴃𐴡 𐴔𐴡𐴀𐴏𐴞𐴤𐴌 𐴀𐴝𐴊𐴝𐴓𐴡𐴃𐴞 𐴃𐴡𐴑𐴃𐴡𐴥𐴌 𐴔𐴟𐴀𐴕𐴃𐴟 𐴈𐴝𐴥𐴔𐴝𐴈𐴝 𐴇𐴝𐴥𐴎𐴞𐴌 𐴀𐴡𐴥𐴖𐴝 𐴉𐴡𐴌𐴞𐴥𐴁𐴡, 𐴎𐴠𐴀𐴕𐴠 𐴇𐴝𐴘𐴧𐴝 𐴓𐴡𐴘 𐴃𐴝𐴥𐴑𐴞𐴃𐴠 𐴎𐴠𐴦 𐴎𐴠𐴕𐴊𐴞𐴓𐴧𐴝 𐴈𐴝𐴔 𐴒𐴡𐴙𐴅𐴧𐴞𐴥 𐴇𐴠𐴥 𐴔𐴡𐴎𐴞𐴕 𐴉𐴡𐴃𐴧𐴞𐴥𐴑𐴞𐴘𐴠 𐴁𐴡𐴊𐴡𐴓𐴝 𐴉𐴝𐴘, 𐴈𐴝𐴔 𐴇𐴞𐴥𐴀𐴕 𐴒𐴡𐴔 𐴀𐴡𐴥𐴑 𐴘𐴝𐴥 𐴈𐴡𐴥𐴌𐴝𐴉𐴢.

𐴁𐴡𐴕𐴡𐴃𐴡𐴌 𐴈𐴝𐴔

¹¹𐴇𐴠𐴥𐴃𐴡𐴓𐴧𐴝, 𐴔𐴝𐴓𐴞𐴑𐴡𐴌 𐴋𐴡𐴦𐴌 𐴑𐴞𐴦 𐴊𐴠 𐴇𐴞𐴥𐴘𐴝𐴕 𐴎𐴝𐴕𐴞 𐴀𐴝𐴣𐴀𐴌𐴝 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴁𐴡𐴍𐴝𐴘 𐴀𐴝𐴕𐴞𐴤𐴁𐴝𐴌 𐴑𐴟𐴐𐴞𐴥𐴐𐴢 𐴒𐴡𐴌𐴞𐴥. 𐴀𐴝𐴓𐴧𐴝𐴘𐴠 𐴃𐴡 𐴀𐴝𐴣𐴀𐴌𐴝𐴌𐴠 𐴏𐴞𐴕𐴠𐴥; 𐴀𐴝𐴀𐴛 𐴀𐴝𐴐𐴝𐴤 𐴒𐴡𐴌𐴞𐴥, 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴓𐴡𐴔𐴠 𐴘𐴡𐴥 𐴀𐴝𐴣𐴀𐴌𐴝𐴌𐴠 𐴏𐴞𐴕𐴠𐴥.¹²𐴀𐴝𐴣𐴀𐴌𐴝 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴝𐴁𐴝𐴌 𐴀𐴝𐴣𐴀𐴌𐴝𐴌 𐴕𐴝𐴔 𐴒𐴡𐴌𐴞𐴥𐴌 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴝𐴣𐴀𐴌𐴝𐴌𐴠 𐴓𐴡𐴥𐴘 𐴁𐴡𐴌𐴝𐴥𐴘 𐴒𐴡𐴌𐴞𐴥 𐴁𐴡𐴓𐴧𐴝 𐴃𐴟𐴣𐴀𐴝𐴥𐴌𐴝𐴌𐴠 𐴀𐴠𐴑𐴧𐴝𐴥𐴕 𐴔𐴡𐴦𐴗𐴑𐴝 𐴊𐴞𐴦𐴌 𐴊𐴠, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴃𐴧𐴟 𐴀𐴟𐴘𐴃𐴝𐴌𐴝𐴤 𐴓𐴧𐴝 𐴎𐴟𐴖𐴝𐴁𐴢 𐴃𐴝𐴥𐴑𐴠 𐴎𐴠𐴃𐴝𐴌𐴝𐴤 𐴊𐴞𐴓𐴡𐴌 𐴒𐴟𐴥𐴕 𐴓𐴡𐴥𐴘 𐴕𐴡 𐴁𐴡𐴥𐴓𐴑𐴠 𐴊𐴠𐴑𐴞𐴥 𐴉𐴝𐴌𐴝 𐴎𐴝 𐴊𐴠 𐴇𐴞𐴥𐴀𐴕 𐴓𐴡𐴥𐴘 𐴁𐴡𐴌𐴝𐴥𐴘 𐴒𐴡𐴌𐴠𐴥.¹³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴡𐴊𐴞 𐴀𐴝𐴣𐴀𐴌𐴝 𐴁𐴠𐴑𐴟𐴉𐴢 𐴊𐴠 𐴀𐴡𐴥𐴘𐴓𐴠, 𐴇𐴞𐴥𐴘𐴝𐴕 𐴃𐴡 𐴀𐴝𐴓𐴧𐴝𐴌 𐴖𐴝𐴏𐴃𐴠𐴥 𐴀𐴠𐴥𐴕𐴝; 𐴀𐴝𐴦𐴌 𐴎𐴡𐴊𐴞 𐴀𐴝𐴣𐴀𐴌𐴝𐴌 𐴊𐴠𐴔𐴝𐴑 𐴄𐴞𐴥𐴑 𐴊𐴠 𐴀𐴡𐴥𐴘𐴓𐴠, 𐴇𐴞𐴥𐴘𐴝𐴕 𐴃𐴡 𐴃𐴟𐴣𐴀𐴝𐴥𐴌𐴝𐴌 𐴖𐴝𐴏𐴃𐴠𐴥 𐴀𐴠𐴥𐴕𐴝.¹⁴𐴈𐴡𐴃𐴝𐴤 𐴀𐴡𐴥𐴙𐴓𐴊𐴠, 𐴀𐴝𐴣𐴀𐴌𐴝𐴌𐴠 𐴔𐴡𐴀𐴏𐴞𐴤𐴌 𐴔𐴟𐴇𐴝𐴥𐴁𐴧𐴡𐴃𐴠 𐴔𐴡𐴅𐴁𐴟𐴌 𐴒𐴡𐴌𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴁𐴟𐴙𐴅𐴧𐴞𐴥 𐴊𐴠, 𐴀𐴠𐴑𐴎𐴡𐴕 𐴁𐴠𐴒𐴧𐴟𐴥𐴕𐴡𐴓𐴧𐴝 𐴔𐴡𐴙𐴅𐴧𐴠𐴥 𐴌𐴝𐴥𐴌 𐴁𐴠𐴒𐴧𐴟𐴥𐴕 𐴔𐴡𐴌𐴞𐴒𐴞𐴘𐴡𐴥𐴘.¹⁵𐴀𐴞𐴥𐴁𐴝 𐴁𐴠𐴒𐴧𐴟𐴥𐴕𐴡𐴓𐴧𐴝 𐴀𐴠𐴃𐴡𐴓𐴧𐴝𐴤 𐴔𐴡𐴙𐴅𐴧𐴞𐴥𐴓𐴢, 𐴎𐴠𐴀𐴕𐴠 𐴎𐴠𐴃𐴝𐴌𐴝𐴤 𐴁𐴝𐴏𐴞 𐴀𐴝𐴏𐴠𐴤 𐴀𐴞𐴥𐴃𐴝𐴌𐴝 𐴀𐴝𐴌 𐴕𐴞𐴎𐴡𐴌 𐴓𐴧𐴝 𐴁𐴝𐴏𐴞 𐴕𐴡 𐴃𐴝𐴥𐴑𐴠, 𐴁𐴡𐴥𐴓𐴑𐴠 𐴀𐴟𐴁𐴝𐴤 𐴓𐴧𐴝 𐴃𐴝𐴥𐴑𐴠 𐴎𐴞𐴁𐴝𐴤 𐴀𐴞𐴥𐴃𐴝𐴌𐴝𐴌 𐴁𐴡𐴊𐴡𐴓𐴢 𐴔𐴡𐴙𐴅𐴧𐴞𐴥𐴓𐴢 𐴀𐴝𐴦𐴌 𐴀𐴝𐴁𐴝𐴌 𐴎𐴞𐴕𐴊𐴝 𐴀𐴡𐴥𐴘𐴧𐴠.

¹⁶𐴇𐴠𐴥𐴃𐴡𐴓𐴧𐴝, 𐴀𐴠𐴇𐴡𐴥𐴕𐴡𐴃𐴧𐴟 𐴓𐴡𐴥𐴃𐴞 𐴀𐴝𐴣𐴀𐴌𐴝 𐴇𐴡𐴕𐴡𐴤𐴑𐴞𐴘𐴡𐴌𐴠 𐴀𐴞𐴕𐴏𐴝𐴥𐴕𐴞 𐴁𐴟𐴎𐴝𐴥 𐴓𐴡𐴥𐴘 𐴕𐴡 𐴁𐴟𐴙𐴅𐴧𐴟𐴥𐴔. 𐴀𐴝𐴣𐴀𐴌𐴝 𐴔𐴡𐴀𐴏𐴞𐴤𐴌𐴠 𐴀𐴞𐴕𐴏𐴝𐴥𐴕𐴞 𐴁𐴟𐴎𐴝𐴥 𐴓𐴡𐴥𐴘 𐴁𐴟𐴎𐴞𐴥𐴃𐴝𐴔 𐴊𐴠 𐴀𐴡𐴥𐴘𐴓𐴠 𐴘𐴡, 𐴘𐴝𐴓𐴝 𐴀𐴝𐴣𐴀𐴌𐴝 𐴀𐴞𐴥𐴁𐴝𐴌𐴠 𐴀𐴝𐴌 𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴕𐴡 𐴁𐴟𐴎𐴞𐴥.¹⁷𐴇𐴠𐴥 𐴀𐴞𐴥𐴏𐴝𐴉𐴠, 𐴎𐴠𐴦𐴕𐴞𐴑𐴞 𐴔𐴡𐴀𐴏𐴞𐴤𐴌 𐴁𐴟𐴥𐴃𐴡𐴌𐴠 𐴀𐴝𐴏𐴠𐴤, 𐴀𐴞𐴥𐴃𐴠 𐴀𐴠𐴥𐴎𐴧𐴡𐴕 𐴕𐴡𐴘𐴝 𐴔𐴡𐴇𐴡𐴥𐴓𐴟𐴑 𐴀𐴡𐴥𐴘𐴒𐴞𐴘𐴡𐴘; 𐴉𐴟𐴌𐴝𐴕𐴝 𐴒𐴟𐴥𐴕 𐴎𐴝𐴘𐴒𐴡𐴥𐴘 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴕𐴡𐴘𐴝 𐴀𐴡𐴥𐴘𐴀𐴝𐴙𐴐𐴧𐴠.¹⁸𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴁𐴠 𐴀𐴡𐴥, 𐴎𐴞𐴁𐴝𐴤𐴘𐴠 𐴔𐴡𐴀𐴏𐴞𐴤𐴌 𐴊𐴟𐴖𐴝𐴌𐴝 𐴀𐴝𐴣𐴀𐴌𐴝𐴌𐴠 𐴕𐴞𐴎𐴡𐴌 𐴓𐴡𐴘 𐴁𐴡𐴕𐴡𐴃𐴢 𐴒𐴡𐴌𐴞𐴥𐴉𐴠𐴓𐴝𐴘𐴧𐴠, 𐴀𐴝𐴦𐴌 𐴀𐴝𐴣𐴀𐴌𐴝𐴌𐴠 𐴇𐴠𐴥 𐴁𐴡𐴕𐴡𐴃𐴡𐴌 𐴇𐴠𐴥𐴊𐴔𐴡𐴃𐴊𐴝𐴌𐴞 𐴊𐴞𐴦𐴘𐴠𐴥.¹⁹𐴈𐴡𐴘𐴃𐴡𐴤 𐴏𐴝𐴘𐴓𐴠𐴥, 𐴀𐴝𐴓𐴧𐴝 𐴔𐴡𐴀𐴏𐴞𐴤𐴌 𐴁𐴟𐴥𐴃𐴡𐴌𐴠 𐴀𐴡𐴥𐴘 𐴊𐴟𐴕𐴞𐴘𐴝𐴙𐴌 𐴔𐴝𐴙𐴕𐴐𐴡𐴥𐴌𐴠 𐴕𐴞𐴎𐴡𐴌 𐴓𐴡𐴘 𐴁𐴡𐴕𐴡𐴃𐴢 𐴒𐴡𐴌𐴞𐴥𐴉𐴠𐴓𐴝𐴘𐴧𐴠; 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌 𐴒𐴟𐴕𐴝𐴤-𐴇𐴝𐴥𐴃𐴝 𐴀𐴞𐴥𐴃𐴝𐴌𐴝𐴌 𐴀𐴟𐴓𐴋𐴝 𐴕𐴡𐴥 𐴊𐴡𐴥𐴌𐴠. 𐴀𐴝𐴦𐴌 𐴀𐴞𐴥𐴁𐴝𐴘𐴠 𐴇𐴠𐴥 𐴁𐴡𐴕𐴡𐴃𐴡𐴌 𐴈𐴡𐴥𐴁𐴡𐴌 𐴎𐴝𐴕𐴝𐴘𐴁𐴝𐴥𐴌 𐴎𐴞𐴔𐴧𐴝𐴊𐴝𐴌𐴞 𐴀𐴝𐴣𐴀𐴌𐴝𐴌𐴠 𐴒𐴡𐴏𐴝𐴥𐴘𐴊𐴞𐴘𐴠.²⁰𐴇𐴠𐴥𐴃𐴡𐴓𐴧𐴝 𐴀𐴝𐴣𐴀𐴌𐴝 𐴀𐴡𐴥𐴘𐴓𐴝𐴔 𐴊𐴠 𐴔𐴡𐴀𐴏𐴞𐴤𐴌 𐴕𐴡𐴔𐴝𐴙𐴕𐴊𐴝 𐴀𐴡𐴥𐴑𐴧𐴡𐴓𐴢, 𐴎𐴠𐴀𐴕 𐴕𐴞𐴥𐴑𐴞 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴝𐴌 𐴊𐴟𐴖𐴝𐴌𐴝 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴁𐴠𐴐𐴝𐴤𐴁𐴞𐴐𐴞𐴤 𐴀𐴝𐴌𐴡𐴏𐴢 𐴒𐴡𐴌𐴠𐴥𐴌. 𐴀𐴝𐴣𐴀𐴌𐴝 𐴔𐴡𐴀𐴏𐴞𐴤𐴌 𐴃𐴡𐴌𐴉𐴡𐴥𐴃𐴧𐴟 𐴀𐴡𐴥𐴘𐴧𐴡𐴌𐴠 𐴃𐴟𐴣𐴀𐴝𐴥𐴌𐴝𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴞𐴥 𐴊𐴠, 𐴀𐴝𐴓𐴧𐴝 𐴓𐴧𐴡𐴘 𐴁𐴡𐴕𐴞𐴎𐴡𐴒𐴡𐴥𐴘.²¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴃𐴡 𐴀𐴝𐴣𐴀𐴌𐴝𐴌 𐴁𐴡𐴊𐴡𐴓𐴢 𐴀𐴟𐴁𐴝𐴤𐴌𐴠 𐴒𐴟𐴕𐴝𐴤𐴌 𐴎𐴝𐴒𐴝𐴃𐴢 𐴃𐴞𐴥𐴘𐴝𐴒𐴝𐴌𐴝𐴘𐴧𐴠 𐴎𐴞𐴁𐴝𐴤 𐴁𐴠𐴒𐴟𐴕𐴝𐴤 𐴀𐴝𐴐𐴧𐴞𐴥𐴓𐴢, 𐴎𐴠𐴀𐴕𐴠 𐴀𐴝𐴣𐴀𐴌𐴝 𐴀𐴞𐴥𐴁𐴝𐴌 𐴁𐴟𐴥𐴃𐴡𐴌𐴠 𐴀𐴡𐴥𐴘 𐴀𐴝𐴓𐴧𐴝𐴌 𐴉𐴡𐴌𐴇𐴠𐴥𐴏𐴒𐴝𐴌𐴞𐴌 𐴁𐴝𐴥𐴒𐴞 𐴀𐴡𐴥𐴘𐴎𐴝𐴘𐴒𐴡𐴘.

The Word for the World International

https://app.library.bible/content/87faca8b51c22590