Read 1 𐴃𐴞𐴔𐴡𐴥𐴃𐴞 2

1 𐴃𐴞𐴔𐴡𐴥𐴃𐴞2

𐴊𐴟𐴖𐴝𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴧𐴝

¹𐴀𐴝𐴣𐴀𐴌 𐴀𐴠𐴁𐴧𐴠 𐴀𐴝𐴒𐴡𐴌 𐴀𐴝𐴌𐴡𐴏𐴢 𐴀𐴡𐴥𐴘𐴧𐴠 𐴊𐴠, 𐴃𐴟𐴣𐴀𐴝𐴥𐴌𐴝 𐴃𐴝𐴔𐴝𐴥𐴔 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴓𐴧𐴝 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴀𐴝𐴌𐴡𐴏𐴢, 𐴊𐴟𐴖𐴝, 𐴐𐴟𐴥𐴖𐴝𐴌𐴞𐴐𐴢, 𐴀𐴠𐴊𐴧𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴌𐴡𐴤.²𐴇𐴠𐴥𐴕𐴊𐴞𐴓𐴧𐴝, 𐴁𐴝𐴀𐴣𐴐𐴧𐴝 𐴀𐴡𐴥𐴑𐴧𐴡𐴓𐴡𐴓𐴧𐴝 𐴀𐴠𐴊𐴧𐴠 𐴃𐴝𐴔𐴝𐴥𐴔 𐴀𐴝𐴊𐴞𐴑𐴝𐴌𐴞 𐴀𐴡𐴥𐴑𐴧𐴡𐴓𐴡𐴓𐴧𐴝 𐴘𐴡𐴥 𐴒𐴡𐴌𐴡𐴤, 𐴎𐴠𐴀𐴕𐴠 𐴀𐴝𐴣𐴀𐴌𐴝 𐴊𐴞𐴕𐴊𐴝𐴥𐴌𐴞 𐴀𐴠𐴊𐴧𐴠 𐴀𐴞𐴎𐴧𐴡𐴙𐴃𐴧𐴝 𐴏𐴡𐴓𐴝𐴏𐴡𐴓𐴢 𐴓𐴡𐴘 𐴕𐴞𐴌𐴡𐴓𐴡𐴌 𐴏𐴝𐴥𐴀𐴣𐴃𐴠 𐴐𐴝𐴥𐴕𐴃𐴞𐴌 𐴎𐴞𐴕𐴊𐴞𐴒𐴞 𐴈𐴝𐴍𐴝𐴘 𐴉𐴝𐴌𐴞.³𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴡𐴤𐴕 𐴕𐴝𐴥𐴕 𐴀𐴝𐴣𐴀𐴌𐴝𐴌 𐴕𐴠𐴅𐴝𐴃𐴊𐴡𐴘𐴝 𐴀𐴝𐴓𐴧𐴝𐴌 𐴕𐴡𐴎𐴡𐴌𐴡𐴃𐴢 𐴁𐴝𐴥𐴓𐴝; 𐴇𐴞𐴥𐴘𐴝𐴕𐴠 𐴀𐴞𐴥𐴁𐴝 𐴑𐴟𐴥𐴐𐴞 𐴀𐴡𐴥.⁴𐴀𐴞𐴥𐴁𐴝𐴘𐴠 𐴏𐴝𐴀 𐴊𐴠, 𐴀𐴞𐴕𐴏𐴝𐴥𐴕 𐴁𐴠𐴒𐴧𐴟𐴥𐴕𐴠 𐴕𐴠𐴅𐴝𐴃𐴢 𐴉𐴡𐴗𐴑 𐴀𐴝𐴦𐴌 𐴏𐴡𐴥𐴘𐴧𐴞𐴌𐴠 𐴁𐴟𐴎𐴞𐴥 𐴉𐴝𐴌𐴡𐴗𐴑,⁵𐴑𐴞 𐴈𐴡𐴘𐴓𐴠𐴥, 𐴀𐴝𐴓𐴧𐴝 𐴀𐴝𐴏𐴠𐴤 𐴊𐴠 𐴀𐴠𐴑𐴒𐴗𐴝𐴥, 𐴀𐴝𐴦𐴌 𐴀𐴝𐴓𐴧𐴝𐴌 𐴀𐴠𐴊𐴧𐴠 𐴀𐴞𐴕𐴏𐴝𐴥𐴕𐴡𐴌 𐴔𐴝𐴎𐴠𐴥 𐴀𐴟𐴏𐴞𐴥𐴓𐴝 𐴀𐴝𐴏𐴠𐴤 𐴊𐴠 𐴘𐴡𐴥 𐴀𐴠𐴑𐴒𐴗𐴝𐴥, 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴔𐴝𐴕𐴟𐴥𐴙𐴐𐴢 𐴔𐴡𐴀𐴏𐴞𐴤 𐴀𐴞𐴏𐴝𐴤,⁶𐴎𐴞𐴁𐴝𐴤𐴘𐴠 𐴕𐴞𐴥𐴑𐴞 𐴀𐴞𐴕𐴏𐴝𐴥𐴕 𐴁𐴠𐴒𐴧𐴟𐴥𐴕𐴡𐴌 𐴎𐴝𐴕𐴡𐴌 𐴁𐴡𐴊𐴡𐴓𐴢 𐴕𐴞𐴎𐴡𐴌 𐴎𐴝𐴕 𐴊𐴞𐴘𐴠𐴥, 𐴎𐴞𐴘𐴝𐴥𐴕 𐴀𐴡𐴥𐴙𐴓𐴊𐴠 𐴁𐴡𐴌𐴝𐴁𐴡𐴌 𐴀𐴡𐴑𐴃𐴡𐴥𐴃𐴢 𐴇𐴞𐴥𐴘𐴝𐴕𐴡𐴌 𐴒𐴡𐴁𐴝𐴤 𐴊𐴞𐴥𐴘𐴠 𐴊𐴠.⁷𐴇𐴠𐴥𐴃𐴡𐴓𐴧𐴝 𐴁𐴠 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴠𐴥 𐴃𐴡𐴁𐴡𐴓𐴞𐴑-𐴒𐴡𐴌𐴡𐴤𐴘𐴝 𐴀𐴠𐴊𐴧𐴠 𐴏𐴝𐴥𐴇𐴝𐴁𐴞 𐴁𐴝𐴕𐴝𐴘𐴧𐴠𐴥, 𐴎𐴠𐴀𐴕𐴠 𐴀𐴝𐴀𐴛 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴀𐴞𐴔𐴝𐴕𐴡𐴌 𐴀𐴠𐴊𐴧𐴠 𐴏𐴡𐴥𐴘𐴧𐴞𐴌 𐴀𐴟𐴏𐴃𐴝𐴃𐴢 𐴀𐴡𐴥𐴘 𐴉𐴝𐴌𐴞. 𐴀𐴝𐴀𐴛 𐴇𐴝𐴥𐴣𐴏𐴝 𐴈𐴡𐴃𐴝𐴤 𐴈𐴡𐴀𐴙𐴌 𐴊𐴠, 𐴔𐴞𐴏𐴝𐴥 𐴈𐴡𐴃𐴝𐴤 𐴕𐴡.

⁸𐴇𐴠𐴥𐴃𐴡𐴓𐴧𐴝, 𐴀𐴝𐴀𐴛 𐴏𐴝𐴀𐴘𐴢 𐴊𐴠, 𐴇𐴝𐴥𐴀𐴌 𐴎𐴝𐴒𐴝𐴃𐴢 𐴔𐴡𐴌𐴡𐴃𐴉𐴟𐴀𐴝𐴙𐴕 𐴊𐴠 𐴇𐴡𐴕𐴡𐴤 𐴒𐴟𐴐𐴧𐴝𐴤 𐴏𐴝𐴥𐴌𐴝 𐴀𐴠𐴊𐴧𐴠 𐴃𐴡𐴌𐴑𐴝𐴃𐴡𐴌𐴑𐴞 𐴏𐴝𐴥𐴌𐴝, 𐴕𐴞𐴎𐴡𐴌 𐴂𐴝𐴑 𐴀𐴝𐴥𐴃𐴢 𐴀𐴡𐴥𐴑𐴧𐴡𐴓𐴢 𐴃𐴟𐴓𐴞𐴤 𐴊𐴟𐴖𐴝 𐴒𐴡𐴌𐴡𐴥𐴗𐴑.⁹𐴇𐴠𐴥𐴕𐴊𐴞𐴓𐴧𐴝 𐴀𐴝𐴀𐴛 𐴘𐴝𐴀𐴕 𐴀𐴡𐴥 𐴏𐴝𐴀𐴘𐴢 𐴊𐴠 𐴑𐴞, 𐴔𐴝𐴘𐴝𐴉𐴟𐴀𐴝𐴙𐴕 𐴊𐴠 𐴕𐴞𐴎𐴡𐴌𐴠𐴥 𐴀𐴞𐴎𐴧𐴡𐴃𐴢-𐴐𐴡𐴥𐴌𐴡𐴔𐴠 𐴀𐴠𐴊𐴧𐴠 𐴉𐴡𐴌𐴇𐴠𐴥𐴏𐴡𐴌 𐴏𐴝𐴥𐴀𐴣𐴃𐴠 𐴀𐴞𐴎𐴧𐴡𐴙𐴃𐴧𐴝 𐴒𐴡𐴌𐴞 𐴇𐴡𐴦𐴌𐴏𐴟𐴖𐴡𐴌 𐴓𐴡𐴘 𐴇𐴝𐴥𐴣𐴎𐴡𐴗𐴑, 𐴏𐴟𐴓𐴡𐴌 𐴁𐴞𐴕𐴞𐴏𐴢, 𐴐𐴟𐴥𐴕𐴝, 𐴔𐴟𐴑𐴃𐴝, 𐴘𐴝𐴥 𐴊𐴝𐴔𐴞 𐴇𐴡𐴦𐴌𐴏𐴟𐴖𐴡𐴌 𐴓𐴡𐴘 𐴕𐴡,¹⁰𐴁𐴡𐴥𐴓𐴑𐴠 𐴀𐴞𐴥𐴃𐴝𐴌𐴝 𐴀𐴠𐴕𐴊𐴞𐴓𐴧𐴝 𐴒𐴡𐴌𐴞 𐴎𐴞𐴕𐴊𐴞𐴒𐴞 𐴈𐴝𐴍𐴡𐴗𐴑, 𐴎𐴠𐴕𐴊𐴞𐴓𐴧𐴝 𐴊𐴞𐴕𐴊𐴝𐴥𐴌 𐴔𐴝𐴘𐴝𐴉𐴟𐴀𐴝𐴙𐴕 𐴊𐴡𐴃𐴧𐴟 𐴒𐴡𐴔 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴒𐴡𐴌𐴞𐴥 𐴎𐴞𐴕𐴊𐴞𐴒𐴞 𐴈𐴝𐴍𐴝𐴌 𐴎𐴡𐴌𐴟𐴌.

¹¹𐴔𐴝𐴘𐴧𐴝 𐴉𐴟𐴀𐴝𐴙𐴕 𐴊𐴠 𐴕𐴞𐴎𐴝𐴥𐴔𐴠 𐴀𐴠𐴊𐴧𐴠 𐴉𐴟𐴌𐴝𐴉𐴟𐴌𐴞 𐴉𐴡𐴥𐴌𐴔𐴝𐴊𐴝𐴌𐴞𐴌 𐴏𐴝𐴥𐴀𐴣𐴃𐴠 𐴐𐴞𐴥𐴑𐴧𐴝 𐴇𐴝𐴥𐴏𐴞𐴓𐴢 𐴒𐴡𐴌𐴡𐴥𐴗𐴑.¹²𐴃𐴝𐴦𐴓𐴞𐴔 𐴊𐴞 𐴁𐴡𐴓𐴧𐴝 𐴘𐴝𐴥𐴃𐴡 𐴔𐴡𐴌𐴡𐴃𐴉𐴟𐴖𐴝𐴌 𐴖𐴡𐴌𐴠 𐴇𐴡𐴥𐴑𐴟𐴔𐴡𐴃𐴢 𐴏𐴡𐴓𐴝𐴘 𐴁𐴡𐴓𐴧𐴝 𐴀𐴝𐴀𐴛 𐴇𐴡𐴕𐴡𐴤 𐴔𐴝𐴘𐴝𐴉𐴟𐴖𐴝𐴌𐴠 𐴀𐴠𐴎𐴝𐴎𐴡𐴃𐴢 𐴕𐴡 𐴊𐴞. 𐴀𐴞𐴥𐴃𐴝𐴌𐴝𐴃𐴧𐴟 𐴕𐴞𐴎𐴝𐴥𐴔 𐴀𐴡𐴥𐴘 𐴃𐴝𐴥𐴑𐴡𐴕 𐴎𐴡𐴌𐴟𐴌.¹³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴒𐴠 𐴃𐴡 𐴀𐴝𐴊𐴡𐴔𐴡𐴌𐴠 𐴀𐴠𐴥𐴕𐴝 𐴁𐴝𐴕𐴝 𐴒𐴞𐴀𐴓𐴢, 𐴘𐴝𐴥𐴌𐴁𐴝𐴦𐴊𐴠 𐴇𐴝𐴥𐴖𐴝 𐴌𐴠.¹⁴𐴊𐴟𐴥𐴑𐴝𐴃𐴢 𐴃𐴡 𐴀𐴝𐴊𐴡𐴔 𐴉𐴡𐴙𐴅𐴧𐴞𐴥𐴓𐴢 𐴊𐴠 𐴕𐴡, 𐴁𐴡𐴥𐴓𐴑𐴠 𐴇𐴝𐴥𐴖𐴝𐴘𐴠 𐴀𐴠𐴥𐴕𐴝 𐴉𐴡𐴌𐴞 𐴀𐴝𐴓𐴧𐴝𐴌 𐴇𐴡𐴥𐴑𐴟𐴔 𐴁𐴝𐴥𐴙𐴚𐴒𐴞𐴓𐴢.¹⁵𐴃𐴡𐴀 𐴇𐴞𐴥𐴁𐴝𐴘𐴠 𐴉𐴟𐴀𐴝𐴙𐴕 𐴁𐴞𐴘𐴝𐴌 𐴎𐴡𐴌𐴞𐴘𐴝 𐴕𐴠𐴅𐴝𐴃𐴢 𐴉𐴝𐴘𐴁𐴡, 𐴎𐴡𐴊𐴞 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌𐴠𐴥 𐴉𐴡𐴌𐴇𐴠𐴥𐴏𐴢 𐴌𐴝𐴑𐴞𐴥 𐴀𐴞𐴔𐴝𐴕𐴠 𐴀𐴠𐴊𐴧𐴠 𐴔𐴟𐴇𐴝𐴥𐴁𐴧𐴡𐴃𐴠 𐴂𐴝𐴑 𐴎𐴞𐴕𐴊𐴞𐴒𐴞 𐴈𐴝𐴍𐴝.

The Word for the World International

https://app.library.bible/content/87faca8b51c22590