Read 1 𐴃𐴞𐴏𐴡𐴥𐴓𐴡𐴕𐴞𐴀𐴡𐴥𐴓𐴢 5

1 𐴃𐴞𐴏𐴡𐴥𐴓𐴡𐴕𐴞𐴀𐴡𐴥𐴓𐴢5

𐴔𐴝𐴓𐴞𐴑 𐴀𐴝𐴘𐴁𐴝𐴤𐴌 𐴊𐴞𐴕

¹𐴀𐴡𐴥 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴇𐴞𐴥𐴀𐴕 𐴇𐴡𐴕 𐴎𐴡𐴁𐴝𐴕𐴝𐴃𐴢 𐴀𐴡𐴥𐴘𐴁𐴡 𐴀𐴝𐴦𐴌 𐴇𐴡𐴕 𐴀𐴡𐴑𐴃𐴡𐴥𐴃𐴢 𐴀𐴡𐴥𐴘𐴁𐴡, 𐴇𐴞𐴥𐴀𐴕 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴓𐴠𐴑𐴞𐴥𐴁𐴝𐴌 𐴎𐴡𐴌𐴟𐴌 𐴕𐴝𐴥𐴘.²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴕𐴞𐴎𐴠 𐴃𐴡 𐴁𐴝𐴥𐴓𐴝𐴒𐴡𐴌𐴞 𐴎𐴝𐴕𐴡, 𐴑𐴞 𐴈𐴡𐴘𐴓𐴠𐴥, 𐴔𐴝𐴓𐴞𐴑 𐴀𐴝𐴘𐴁𐴝𐴤𐴌 𐴊𐴞𐴕 𐴘𐴞𐴥𐴁𐴝 𐴌𐴝𐴙𐴃𐴧𐴝 𐴏𐴟𐴌 𐴀𐴝𐴘𐴧𐴠𐴤 𐴉𐴝𐴥𐴚𐴒𐴡𐴌𐴞 𐴀𐴝𐴘𐴁𐴡𐴤.³𐴎𐴠𐴣𐴃𐴧𐴠𐴥 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴈𐴡𐴘𐴁𐴡𐴤 𐴊𐴠, ”𐴁𐴠𐴒𐴧𐴟𐴥𐴕 𐴐𐴝𐴥𐴕𐴃𐴞 𐴀𐴡𐴥𐴘𐴒𐴞𐴘𐴡𐴘, 𐴋𐴡𐴦𐴌𐴝𐴘𐴁𐴝𐴥𐴌 𐴑𐴠𐴏𐴧𐴟𐴥 𐴕𐴝𐴥𐴘,“ 𐴇𐴠𐴥𐴣𐴃𐴧𐴠 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴀𐴠𐴕𐴊𐴞𐴓𐴧𐴝 𐴀𐴝𐴏𐴞𐴔𐴁𐴞𐴃𐴢 𐴋𐴡𐴣𐴀𐴌 𐴊𐴡𐴐𐴝𐴤 𐴀𐴝𐴀𐴘𐴎𐴝𐴥𐴘𐴁𐴡𐴘, 𐴎𐴠𐴕𐴊𐴞𐴓𐴧𐴝 𐴇𐴝𐴥𐴔𐴞𐴓𐴢 𐴔𐴝𐴘𐴝𐴉𐴟𐴖𐴝𐴌 𐴖𐴡𐴌𐴠 𐴇𐴡𐴦𐴣𐴌𐴞 𐴊𐴡𐴥𐴌𐴝𐴕𐴞 𐴀𐴝𐴀𐴘𐴎𐴝𐴥𐴒𐴡𐴘. 𐴀𐴞𐴥𐴃𐴝𐴌𐴝 𐴁𐴞𐴓𐴑𐴟𐴥𐴓𐴢 𐴇𐴝𐴥𐴌𐴞 𐴕𐴡 𐴉𐴝𐴌𐴞𐴁𐴡𐴥.

⁴𐴓𐴠𐴑𐴞𐴕، 𐴀𐴡𐴥 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴃𐴡 𐴀𐴝𐴕𐴊𐴝𐴤𐴌𐴡𐴃𐴢 𐴕𐴡, 𐴎𐴠𐴀𐴕 𐴕𐴞𐴥𐴑𐴞 𐴇𐴠𐴥 𐴊𐴞𐴕 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴏𐴟𐴌 𐴀𐴝𐴘𐴧𐴠𐴤 𐴉𐴝𐴥𐴚𐴒𐴡𐴌𐴞 𐴀𐴝𐴘𐴃𐴡𐴤;⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕 𐴃𐴡 𐴕𐴟𐴌𐴡𐴌 𐴀𐴠𐴊𐴧𐴠 𐴊𐴞𐴕𐴡𐴌 𐴉𐴡𐴀𐴌𐴡𐴌 𐴉𐴟𐴀𐴝𐴙𐴕. 𐴀𐴝𐴣𐴀𐴌𐴝 𐴌𐴝𐴙𐴃𐴡𐴌 𐴀𐴡𐴥 𐴕𐴡 𐴀𐴝𐴦𐴌 𐴀𐴝𐴕𐴊𐴝𐴤𐴌𐴡𐴌 𐴀𐴡𐴥 𐴕𐴡.⁶𐴇𐴠𐴥𐴃𐴡𐴓𐴧𐴝, 𐴀𐴝𐴘𐴧𐴡𐴤, 𐴀𐴝𐴣𐴀𐴌𐴝 𐴀𐴡𐴙𐴕𐴧𐴡 𐴔𐴝𐴕𐴟𐴥𐴙𐴐𐴡𐴌 𐴋𐴡𐴥𐴙𐴓𐴧𐴝 𐴒𐴟𐴥𐴔 𐴕𐴡 𐴎𐴝𐴘, 𐴁𐴡𐴥𐴓𐴑𐴠 𐴏𐴠𐴃𐴡𐴕 𐴃𐴝𐴥𐴑𐴞 𐴀𐴝𐴦𐴌 𐴀𐴟𐴥𐴣𐴐𐴡𐴃𐴢 𐴃𐴝𐴥𐴑𐴞.⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴃𐴝𐴌𐴝𐴤 𐴒𐴟𐴥𐴔 𐴎𐴝 𐴀𐴞𐴥𐴃𐴝𐴌𐴝 𐴌𐴝𐴙𐴃𐴧𐴝 𐴀𐴠𐴥𐴕𐴝 𐴒𐴟𐴥𐴔 𐴎𐴝, 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴕𐴞𐴐𐴝𐴥 𐴈𐴝𐴥𐴀 𐴀𐴞𐴥𐴃𐴝𐴌𐴝 𐴌𐴝𐴙𐴃𐴧𐴝 𐴀𐴠𐴥𐴕𐴝 𐴕𐴞𐴐𐴝𐴥 𐴇𐴝𐴥𐴘 𐴄𐴟𐴀𐴓𐴢 𐴀𐴡𐴥.⁸𐴔𐴡𐴕𐴃𐴡𐴌 𐴀𐴝𐴣𐴀𐴌𐴝 𐴎𐴠𐴃𐴧𐴡𐴥𐴃𐴢 𐴊𐴞𐴕𐴡𐴌 𐴉𐴡𐴀𐴌 𐴀𐴡𐴌, 𐴇𐴠𐴥𐴃𐴡𐴓𐴧𐴝 𐴀𐴝𐴘𐴧𐴡𐴤, 𐴀𐴝𐴣𐴀𐴌𐴝 𐴀𐴟𐴥𐴣𐴐𐴡𐴃𐴢 𐴃𐴝𐴥𐴑𐴞. 𐴁𐴟𐴑𐴡𐴌 𐴈𐴠𐴥𐴉𐴝𐴎𐴡𐴃𐴡𐴓𐴧𐴝 𐴀𐴞𐴔𐴝𐴕 𐴀𐴠𐴊𐴧𐴠 𐴔𐴟𐴇𐴝𐴥𐴁𐴧𐴡𐴃𐴡𐴌𐴠 𐴓𐴝𐴌𐴝𐴥𐴙𐴌 𐴎𐴝𐴔𐴝 𐴀𐴞𐴥𐴏𐴝𐴉𐴠 𐴉𐴞𐴣𐴊𐴞𐴥, 𐴀𐴝𐴦𐴌 𐴔𐴝𐴃𐴝𐴥𐴌 𐴈𐴠𐴥𐴉𐴝𐴎𐴡𐴃𐴡𐴓𐴧𐴝 𐴕𐴠𐴅𐴝𐴃𐴡𐴌 𐴀𐴝𐴐𐴝𐴤𐴌𐴠 𐴄𐴟𐴉𐴞 𐴀𐴞𐴥𐴏𐴝𐴉𐴠 𐴉𐴞𐴣𐴊𐴞𐴥.⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴘𐴠 𐴃𐴡 𐴀𐴝𐴣𐴀𐴌𐴝𐴌𐴠 𐴒𐴡𐴎𐴧𐴡𐴁𐴡𐴓𐴧𐴝 𐴄𐴞𐴥𐴑 𐴒𐴡𐴌𐴞𐴥 𐴌𐴝𐴙𐴑𐴧𐴠𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴀𐴟𐴏𐴞𐴥𐴓𐴝𐴘𐴠 𐴕𐴠𐴅𐴝𐴃𐴢 𐴉𐴝𐴘 𐴁𐴡𐴓𐴧𐴝.¹⁰𐴀𐴞𐴥𐴁𐴝 𐴀𐴝𐴣𐴀𐴌𐴝𐴌 𐴖𐴝𐴏𐴃𐴠𐴥 𐴔𐴡𐴙𐴅𐴧𐴞𐴥𐴓𐴢 𐴊𐴠 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥, 𐴀𐴝𐴣𐴀𐴌𐴝 𐴏𐴠𐴃𐴡𐴕 𐴃𐴝𐴥𐴑𐴞 𐴘𐴝𐴥 𐴔𐴡𐴦𐴃𐴡𐴌 𐴒𐴟𐴥𐴔𐴡𐴃𐴢 𐴉𐴡𐴌𐴞, 𐴀𐴝𐴣𐴀𐴌𐴝 𐴎𐴠𐴀𐴕𐴠 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴁𐴝𐴏𐴞 𐴃𐴝𐴥𐴑𐴞.¹¹𐴇𐴠𐴥𐴃𐴡𐴓𐴧𐴝, 𐴇𐴝𐴥𐴔𐴞𐴐𐴝 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴃𐴡𐴏𐴡𐴥𐴓𐴧𐴞 𐴊𐴡𐴥; 𐴀𐴝𐴦𐴌 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴃𐴡𐴌𐴑𐴞 𐴒𐴡𐴌𐴡𐴤, 𐴎𐴠𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴘𐴝𐴓𐴝 𐴘𐴡𐴥 𐴒𐴡𐴌𐴡𐴤𐴌.

𐴀𐴝𐴇𐴠𐴥𐴌𐴞 𐴕𐴡𐴏𐴞𐴥𐴘𐴡𐴃𐴢 𐴀𐴠𐴊𐴧𐴠 𐴏𐴡𐴥𐴓𐴝𐴔

¹²𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴝𐴣𐴀𐴌𐴝 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴌𐴡𐴏𐴢 𐴒𐴡𐴌𐴞𐴥𐴌, 𐴎𐴠𐴃𐴝𐴌𐴝𐴤 𐴃𐴟𐴣𐴀𐴝𐴥𐴌𐴝𐴓𐴧𐴝 𐴔𐴠𐴀𐴕𐴧𐴡𐴃𐴢 𐴒𐴡𐴌𐴠𐴥, 𐴎𐴠𐴃𐴝𐴌𐴝𐴤 𐴔𐴝𐴓𐴞𐴑𐴡𐴌 𐴀𐴟𐴔𐴧𐴡𐴃𐴢 𐴀𐴞𐴥𐴏𐴝𐴉𐴠 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴏𐴡𐴥𐴊𐴧𐴝𐴌𐴞 𐴒𐴡𐴌𐴠𐴥, 𐴀𐴠𐴊𐴧𐴠 𐴎𐴠𐴃𐴝𐴌𐴝𐴤 𐴃𐴟𐴣𐴀𐴝𐴥𐴌𐴝𐴌𐴠 𐴕𐴡𐴏𐴞𐴥𐴘𐴡𐴃𐴢 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴝𐴌𐴠 𐴑𐴡𐴊𐴡𐴌 𐴒𐴡𐴙𐴅𐴧𐴡𐴥.¹³𐴀𐴞𐴥𐴃𐴝𐴌𐴝𐴌 𐴈𐴝𐴔𐴡𐴌 𐴖𐴝𐴏𐴃𐴠𐴥 𐴀𐴞𐴥𐴃𐴝𐴌𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴡𐴌 𐴏𐴝𐴥𐴀𐴣𐴃𐴠 𐴁𐴞𐴐𐴞𐴤 𐴀𐴞𐴎𐴧𐴡𐴃𐴢 𐴊𐴞𐴘𐴡. 𐴀𐴠𐴎𐴧𐴡𐴕 𐴓𐴡𐴘 𐴀𐴠𐴎𐴧𐴡𐴕𐴠 𐴐𐴝𐴥𐴕𐴃𐴞𐴃𐴢 𐴃𐴝𐴥𐴙𐴑𐴧𐴡.¹⁴𐴀𐴡𐴥 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴝𐴣𐴀𐴌𐴝 𐴃𐴟𐴣𐴀𐴝𐴥𐴌𐴝𐴌𐴠 𐴕𐴡𐴏𐴞𐴥𐴘𐴡𐴃𐴢 𐴒𐴡𐴌𐴞𐴥𐴌, 𐴀𐴡𐴐𐴡𐴥𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴃𐴡𐴌𐴁𐴞𐴘𐴡𐴃𐴢 𐴒𐴡𐴙𐴅𐴧𐴡𐴥, 𐴇𐴞𐴥𐴔𐴧𐴡𐴃𐴢 𐴏𐴝𐴥𐴌𐴝𐴌𐴠 𐴇𐴞𐴥𐴔𐴧𐴡𐴃𐴢 𐴊𐴞𐴥𐴘𐴡, 𐴑𐴡𐴔𐴎𐴟𐴌𐴡𐴌𐴠 𐴔𐴡𐴊𐴡𐴃𐴢 𐴒𐴡𐴙𐴅𐴧𐴡𐴥, 𐴏𐴡𐴁𐴡𐴥𐴌𐴡𐴌 𐴏𐴝𐴥𐴀𐴣𐴃𐴠 𐴉𐴡𐴃𐴧𐴞𐴥𐴑𐴞𐴘𐴡𐴌𐴠 𐴁𐴡𐴌𐴊𐴝𐴐𐴢 𐴒𐴡𐴙𐴅𐴧𐴡𐴥.¹⁵𐴏𐴝𐴘𐴧𐴡𐴥, 𐴇𐴡𐴕𐴡𐴤𐴑𐴞𐴘𐴠 𐴁𐴟𐴌𐴝𐴙𐴌 𐴁𐴡𐴊𐴡𐴓𐴢 𐴁𐴟𐴌𐴝𐴘 𐴕𐴡 𐴒𐴡𐴙𐴅𐴧𐴡𐴥, 𐴁𐴡𐴥𐴓𐴑𐴠 𐴇𐴝𐴥𐴔𐴞𐴐𐴝 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴀𐴠𐴊𐴧𐴠 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌𐴠 𐴁𐴝𐴥𐴓𐴝𐴘 𐴒𐴡𐴙𐴃𐴧𐴡𐴥 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴡𐴥.

¹⁶𐴇𐴝𐴥𐴔𐴞𐴐𐴝 𐴑𐴟𐴥𐴐𐴞 𐴃𐴝𐴥𐴙𐴑𐴧𐴡,¹⁷𐴕𐴞𐴃𐴧𐴞 𐴊𐴟𐴖𐴝 𐴒𐴡𐴙𐴅𐴧𐴡𐴥,¹⁸𐴇𐴝𐴥𐴀𐴌 𐴇𐴝𐴥𐴓𐴡𐴃𐴡𐴃𐴢 𐴀𐴝𐴓𐴧𐴝𐴌𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴙𐴅𐴧𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴁𐴟𐴥𐴃𐴡𐴌𐴠 𐴃𐴟𐴣𐴀𐴝𐴥𐴌𐴝𐴓𐴧𐴝 𐴀𐴝𐴓𐴧𐴝𐴌 𐴔𐴡𐴕𐴐𐴝𐴥 𐴀𐴡𐴥𐴙𐴓𐴊𐴠 𐴇𐴞𐴥𐴘𐴝𐴕.

¹⁹𐴂𐴝𐴑-𐴌𐴟𐴀𐴌𐴠 𐴕𐴞𐴉𐴝𐴥𐴘 𐴕𐴡 𐴉𐴠𐴥𐴓𐴝𐴘𐴧𐴡.²⁰𐴀𐴝𐴦𐴌 𐴕𐴡𐴁𐴞 𐴀𐴞𐴥𐴏𐴝𐴉𐴠 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴌𐴠𐴥 𐴊𐴠 𐴇𐴞𐴥𐴀𐴕 𐴇𐴠𐴥𐴑𐴝𐴌𐴡𐴃𐴢 𐴕𐴡 𐴒𐴡𐴙𐴅𐴧𐴡𐴥,²¹𐴁𐴡𐴥𐴓𐴑𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴃𐴝𐴇𐴝𐴥𐴑𐴞𐴃𐴢 𐴒𐴡𐴙𐴅𐴧𐴡𐴥; 𐴎𐴞𐴘𐴝𐴥𐴕 𐴒𐴡𐴔 𐴇𐴞𐴥𐴘𐴝𐴕 𐴊𐴡𐴥𐴌𐴞 𐴃𐴝𐴥𐴙𐴑𐴧𐴡;²²𐴀𐴝𐴦𐴌 𐴇𐴝𐴥𐴀𐴌 𐴋𐴡𐴥𐴙𐴓𐴧𐴝 𐴁𐴟𐴌𐴝𐴙𐴃𐴧𐴟 𐴊𐴟𐴌𐴠𐴥 𐴃𐴝𐴥𐴙𐴑𐴧𐴡.

²³𐴐𐴝𐴥𐴕𐴃𐴞 𐴊𐴡𐴦𐴘𐴝 𐴀𐴝𐴓𐴧𐴝 𐴕𐴞𐴎𐴠 𐴃𐴟𐴣𐴀𐴝𐴥𐴌𐴝𐴌𐴠 𐴉𐴟𐴌𐴝𐴉𐴟𐴌𐴞 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴡𐴥𐴗𐴑, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝𐴌 𐴒𐴝𐴦 𐴌𐴠, 𐴌𐴟𐴀 𐴌𐴠, 𐴀𐴠𐴊𐴧𐴠 𐴎𐴝𐴕𐴡𐴌𐴠 𐴀𐴡𐴃𐴡𐴥𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴉𐴟𐴌𐴝𐴉𐴟𐴌𐴞 𐴁𐴠𐴈𐴡𐴏𐴟𐴥𐴌 𐴌𐴝𐴑𐴡𐴥𐴗𐴑, 𐴎𐴠𐴃𐴡𐴥𐴊𐴞𐴕 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤 𐴕𐴟𐴥 𐴀𐴝𐴘𐴧𐴠𐴤.²⁴𐴎𐴞𐴁𐴝𐴤𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴋𐴝𐴙𐴑𐴧𐴠𐴥, 𐴀𐴞𐴥𐴁𐴝 𐴃𐴡 𐴁𐴞𐴐𐴧𐴝𐴥𐴐𐴊𐴝𐴌; 𐴀𐴞𐴥𐴁𐴝𐴘𐴠 𐴇𐴠𐴥𐴕𐴊𐴞𐴓𐴧𐴝 𐴈𐴝𐴥𐴔𐴝𐴈𐴝 𐴒𐴡𐴌𐴞𐴥𐴁𐴡.

²⁵𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴝𐴣𐴀𐴌𐴝𐴓𐴧𐴝 𐴊𐴟𐴖𐴝 𐴒𐴡𐴙𐴅𐴧𐴡𐴥.

²⁶𐴃𐴝𐴔𐴝𐴥𐴔 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌𐴠 𐴂𐴝𐴑 𐴊𐴞𐴓𐴠 𐴀𐴝𐴂𐴧𐴝𐴤 𐴊𐴞𐴥 𐴏𐴡𐴥𐴓𐴝𐴔 𐴎𐴝𐴕𐴝𐴘𐴧𐴡𐴥.²⁷𐴔𐴝𐴓𐴞𐴑𐴡𐴌 𐴕𐴝𐴔𐴠 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴇𐴡𐴥𐴑𐴟𐴔 𐴒𐴡𐴌𐴞𐴥𐴌, 𐴀𐴠 𐴐𐴠𐴣𐴍𐴞𐴥 𐴒𐴝𐴥𐴕 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴁𐴠𐴒𐴧𐴟𐴥𐴕𐴡𐴌 𐴔𐴟𐴀𐴕𐴃𐴟 𐴉𐴡𐴌𐴞𐴥𐴘𐴡.

²⁸𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴌𐴝𐴇𐴝𐴥𐴔𐴡𐴃𐴢 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴎𐴝𐴌𐴞 𐴃𐴝𐴥𐴑𐴡𐴗𐴑.

The Word for the World International

https://app.library.bible/content/87faca8b51c22590