Read 1 𐴃𐴞𐴏𐴡𐴥𐴓𐴡𐴕𐴞𐴀𐴡𐴥𐴓𐴢 2

1 𐴃𐴞𐴏𐴡𐴥𐴓𐴡𐴕𐴞𐴀𐴡𐴥𐴓𐴢2

𐴃𐴞𐴏𐴡𐴥𐴓𐴡𐴕𐴞𐴑𐴝𐴃𐴢 𐴂𐴝𐴥𐴀𐴟𐴓𐴡𐴌 𐴃𐴡𐴁𐴡𐴓𐴞𐴑𐴞 𐴈𐴝𐴔

¹𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴃𐴡 𐴎𐴝𐴕𐴡, 𐴀𐴝𐴣𐴀𐴌𐴝 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴀𐴝𐴙𐴐𐴧𐴞𐴤𐴓𐴝𐴔 𐴊𐴠 𐴇𐴞𐴥𐴘𐴝𐴕 𐴁𐴠𐴇𐴝𐴌 𐴕𐴡𐴥 𐴀𐴡𐴥𐴘𐴧𐴡.²𐴃𐴟𐴣𐴀𐴝𐴥𐴌𐴝 𐴘𐴝𐴀𐴕 𐴀𐴡𐴥 𐴎𐴝𐴕𐴡 𐴊𐴠 𐴑𐴞, 𐴘𐴝𐴦𐴌 𐴀𐴝𐴒𐴠 𐴀𐴝𐴣𐴀𐴌𐴝 𐴉𐴞𐴓𐴞𐴤𐴂𐴧𐴞 𐴐𐴡𐴥𐴀𐴌𐴡𐴃𐴢 𐴊𐴟𐴑 𐴉𐴝𐴀𐴘𐴓𐴝𐴔 𐴀𐴠𐴊𐴧𐴠 𐴁𐴠𐴀𐴞𐴎𐴧𐴡𐴃𐴞 𐴀𐴡𐴥𐴘𐴓𐴝𐴔. 𐴔𐴡𐴕𐴃𐴡𐴌 𐴁𐴞𐴐𐴞𐴤 𐴁𐴝𐴎𐴝𐴥 𐴀𐴡𐴥𐴑𐴧𐴡𐴓𐴢 𐴃𐴝𐴥𐴑𐴞𐴓𐴠 𐴘𐴡, 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴇𐴞𐴥𐴔𐴧𐴡𐴃𐴢 𐴉𐴝𐴘𐴧𐴡𐴌𐴠 𐴀𐴝𐴣𐴀𐴌𐴝 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴝𐴓𐴧𐴝𐴌 𐴑𐴟𐴥𐴐𐴈𐴡𐴥𐴁𐴡𐴌 𐴁𐴡𐴘𐴧𐴝𐴕 𐴒𐴡𐴙𐴅𐴧𐴞𐴥.³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴒𐴡𐴌𐴞𐴥 𐴊𐴠 𐴕𐴡𐴏𐴞𐴥𐴘𐴡𐴃𐴢 𐴃𐴡 𐴇𐴡𐴕𐴡𐴤 𐴒𐴡𐴓𐴧𐴡𐴃𐴢 𐴃𐴝𐴦𐴓𐴞𐴔𐴡𐴃𐴧𐴟 𐴕𐴡, 𐴇𐴡𐴕𐴡𐴤 𐴕𐴝𐴉𐴝𐴑 𐴘𐴝𐴥 𐴉𐴠𐴥𐴌𐴡𐴑𐴁𐴝𐴎𐴞𐴌 𐴕𐴞𐴘𐴡𐴃𐴠 𐴘𐴡𐴥 𐴕𐴡.⁴𐴁𐴡𐴥𐴓𐴑𐴠 𐴀𐴝𐴓𐴧𐴝𐴘𐴠 𐴎𐴠𐴕𐴊𐴞𐴓𐴧𐴝 𐴀𐴝𐴣𐴀𐴌𐴝𐴌𐴠 𐴓𐴝𐴦𐴘𐴠𐴑 𐴁𐴝𐴥𐴉𐴞 𐴑𐴟𐴥𐴐𐴈𐴡𐴥𐴁𐴡𐴌𐴡𐴌 𐴎𐴞𐴔𐴧𐴝 𐴊𐴞𐴦𐴘𐴠𐴥, 𐴀𐴝𐴣𐴀𐴌𐴝 𐴏𐴞𐴌𐴞𐴥𐴉𐴢 𐴇𐴠𐴥 𐴔𐴡𐴎𐴞𐴕 𐴁𐴠 𐴁𐴡𐴘𐴧𐴝𐴕 𐴒𐴡𐴌𐴞𐴥. 𐴀𐴞𐴕𐴏𐴝𐴥𐴕𐴡𐴌𐴠 𐴑𐴟𐴥𐴐𐴞 𐴒𐴡𐴌𐴞𐴥𐴁𐴝𐴌 𐴕𐴞𐴘𐴡𐴃𐴠 𐴕𐴡, 𐴁𐴡𐴥𐴓𐴑𐴠 𐴀𐴝𐴣𐴀𐴌𐴝𐴌 𐴊𐴞𐴓𐴢 𐴎𐴝𐴏𐴝𐴘 𐴒𐴡𐴌𐴠𐴥 𐴊𐴠 𐴇𐴠𐴥 𐴀𐴝𐴓𐴧𐴝𐴌𐴠 𐴑𐴟𐴥𐴐𐴞 𐴒𐴡𐴌𐴞𐴥𐴁𐴝𐴌 𐴕𐴞𐴘𐴡𐴃𐴠.⁵𐴃𐴟𐴣𐴀𐴝𐴥𐴌𐴝 𐴃𐴡 𐴎𐴝𐴕𐴡, 𐴀𐴝𐴣𐴀𐴌𐴝 𐴇𐴡𐴕𐴡𐴤𐴊𐴞𐴕 𐴇𐴡𐴕𐴡𐴤𐴑𐴞𐴘𐴡𐴌 𐴇𐴝𐴣𐴏𐴠 𐴃𐴟𐴓𐴝𐴤𐴊𐴞𐴘𐴝 𐴈𐴡𐴃𐴝𐴤 𐴈𐴡𐴘𐴧𐴞𐴥 𐴊𐴠 𐴕𐴝𐴥𐴘, 𐴀𐴝𐴦𐴌 𐴓𐴝𐴓𐴡𐴥𐴏𐴡𐴌 𐴕𐴞𐴘𐴡𐴃𐴠 𐴇𐴡𐴕𐴡𐴤 𐴁𐴝𐴇𐴝𐴤𐴕𐴝 𐴊𐴞𐴘𐴞𐴥 𐴊𐴠 𐴘𐴡𐴥 𐴕𐴝𐴥𐴘. 𐴀𐴝𐴓𐴧𐴝 𐴒𐴡𐴁𐴝𐴤 𐴀𐴝𐴏𐴠𐴤.⁶𐴀𐴝𐴣𐴀𐴌𐴝 𐴇𐴡𐴕𐴡𐴤 𐴀𐴞𐴕𐴏𐴝𐴥𐴕𐴡𐴃𐴧𐴟 𐴀𐴞𐴎𐴧𐴡𐴃𐴢 𐴉𐴝𐴘𐴃𐴡 𐴘𐴡𐴥 𐴏𐴝𐴘𐴧𐴞𐴥 𐴊𐴠 𐴕𐴝𐴥𐴘, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴘𐴡𐴥 𐴕𐴡𐴥 𐴏𐴝𐴀𐴘𐴢 𐴀𐴝𐴦𐴌 𐴀𐴡𐴙𐴕𐴧𐴡 𐴑𐴞𐴘𐴡𐴥𐴃𐴧𐴟 𐴘𐴡𐴥 𐴕𐴡𐴥 𐴏𐴝𐴀𐴘𐴢. 𐴇𐴝𐴥𐴓𐴠𐴑𐴠 𐴔𐴡𐴀𐴏𐴞𐴤𐴌 𐴏𐴝𐴥𐴇𐴝𐴁𐴞 𐴀𐴞𐴥𐴏𐴝𐴉𐴠 𐴀𐴝𐴣𐴀𐴌𐴝 𐴏𐴝𐴘𐴃𐴝𐴥𐴔 𐴁𐴡𐴥𐴓𐴞 𐴃𐴟𐴣𐴀𐴝𐴥𐴌𐴝𐴃𐴧𐴟 𐴊𐴝𐴁𐴞 𐴒𐴡𐴌𐴞𐴥 𐴉𐴝𐴙𐴃𐴧𐴝𐴔.⁷𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝𐴌 𐴊𐴡𐴌𐴔𐴞𐴘𐴝𐴕𐴡𐴃𐴢 𐴀𐴝𐴣𐴀𐴌𐴝 𐴀𐴠𐴕𐴊𐴞𐴓𐴧𐴝 𐴐𐴞𐴥𐴊𐴝 𐴀𐴡𐴥𐴘 𐴃𐴝𐴥𐴙𐴑𐴧𐴞𐴓𐴝𐴔, 𐴎𐴠𐴕𐴊𐴞𐴓𐴧𐴝 𐴒𐴡𐴌𐴞 𐴔𐴝𐴦𐴘𐴠 𐴕𐴞𐴎𐴡𐴌 𐴉𐴟𐴀𐴝𐴙𐴕 𐴊𐴡𐴌𐴠 𐴉𐴝𐴓𐴠.⁸𐴀𐴝𐴣𐴀𐴌𐴝 𐴃𐴟𐴣𐴀𐴝𐴥𐴌𐴝𐴌𐴠 𐴁𐴞𐴐𐴞𐴤 𐴀𐴝𐴊𐴡𐴌 𐴒𐴡𐴌𐴞𐴥 𐴊𐴠 𐴇𐴠𐴥𐴃𐴡𐴓𐴧𐴝 𐴀𐴝𐴣𐴀𐴌𐴝 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴐𐴟𐴥𐴊𐴟 𐴀𐴝𐴓𐴧𐴝𐴌 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴙𐴃𐴧𐴡𐴥 𐴑𐴟𐴥𐴐𐴞 𐴀𐴝𐴐𐴧𐴞𐴥𐴓𐴝𐴔 𐴊𐴠 𐴕𐴡, 𐴁𐴡𐴥𐴓𐴑𐴠 𐴕𐴞𐴎𐴡𐴌 𐴎𐴝𐴕 𐴊𐴞𐴃𐴡 𐴘𐴡𐴥 𐴑𐴟𐴥𐴐𐴞 𐴀𐴝𐴐𐴧𐴞𐴥𐴓𐴝𐴔, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴀𐴝𐴣𐴀𐴌𐴝𐴌 𐴑𐴟𐴥𐴁𐴢 𐴀𐴝𐴊𐴡𐴙𐴅𐴧𐴝 𐴀𐴡𐴥𐴘𐴒𐴞𐴘𐴡𐴒𐴡𐴘.

⁹𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴃𐴡 𐴀𐴝𐴣𐴀𐴌𐴝𐴌 𐴊𐴟𐴑 𐴀𐴠𐴊𐴧𐴠 𐴔𐴠𐴀𐴕𐴧𐴡𐴃𐴢 𐴀𐴡𐴥𐴑𐴧𐴡𐴓𐴢 𐴘𐴝𐴦𐴊𐴢 𐴀𐴝𐴏𐴠𐴤, 𐴑𐴞 𐴈𐴡𐴘𐴓𐴠𐴥, 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴓𐴧𐴝𐴌 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴀𐴝𐴣𐴀𐴌𐴝 𐴊𐴞𐴕𐴠 𐴌𐴝𐴘𐴃𐴠 𐴈𐴝𐴔 𐴀𐴡𐴥 𐴒𐴡𐴙𐴅𐴧𐴞𐴥, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝 𐴇𐴡𐴕𐴡𐴤𐴑𐴞𐴘𐴡𐴌 𐴇𐴝𐴣𐴏𐴠 𐴀𐴝𐴣𐴀𐴌𐴝 𐴎𐴟𐴓𐴝𐴂𐴢 𐴀𐴡𐴥𐴘 𐴕𐴡 𐴎𐴝𐴘𐴒𐴡𐴥𐴘.

¹⁰𐴃𐴟𐴣𐴀𐴝𐴥𐴌𐴝 𐴘𐴡𐴥 𐴒𐴡𐴁𐴝𐴤 𐴀𐴝𐴏𐴡𐴤 𐴀𐴝𐴦𐴌 𐴀𐴝𐴓𐴧𐴝 𐴘𐴡𐴥 𐴒𐴡𐴁𐴝𐴤 𐴀𐴝𐴏𐴠𐴤 𐴊𐴠 𐴑𐴞, 𐴃𐴟𐴣𐴀𐴝𐴥𐴌𐴝 𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴀𐴝𐴣𐴀𐴌𐴝𐴌 𐴏𐴡𐴓𐴝𐴏𐴡𐴓𐴢 𐴇𐴡𐴃𐴡𐴥 𐴂𐴝𐴑, 𐴏𐴡𐴥𐴘𐴧𐴞, 𐴀𐴠𐴊𐴧𐴠 𐴁𐴠𐴈𐴡𐴏𐴟𐴥𐴌 𐴀𐴝𐴐𐴧𐴞𐴥𐴓𐴢.¹¹𐴃𐴟𐴣𐴀𐴝𐴥𐴌𐴝 𐴃𐴡 𐴎𐴝𐴕𐴡, 𐴁𐴝𐴉𐴠 𐴕𐴞𐴎𐴡𐴌 𐴉𐴟𐴀𐴝𐴙𐴕 𐴊𐴡𐴌𐴠 𐴒𐴡𐴌𐴠𐴥 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴃𐴟𐴣𐴀𐴝𐴥𐴌𐴝 𐴉𐴡𐴃𐴧𐴞𐴥𐴑𐴞𐴘𐴡𐴌𐴠 𐴀𐴝𐴣𐴀𐴌𐴝 𐴕𐴡𐴏𐴞𐴥𐴘𐴡𐴃𐴢 𐴒𐴡𐴙𐴅𐴧𐴞𐴥𐴓𐴝𐴔, 𐴃𐴡𐴏𐴡𐴥𐴓𐴧𐴞 𐴊𐴞𐴥𐴓𐴝𐴔 𐴀𐴠𐴊𐴧𐴠 𐴁𐴟𐴎𐴢 𐴊𐴞𐴓𐴝𐴤𐴔 𐴊𐴠 𐴑𐴞,¹²𐴃𐴟𐴣𐴀𐴝𐴥𐴌𐴝 𐴀𐴝𐴓𐴧𐴝 𐴑𐴟𐴥𐴐𐴞 𐴀𐴡𐴥 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴏𐴡𐴓𐴡, 𐴎𐴞𐴁𐴝𐴤𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴕𐴞𐴎𐴡𐴌 𐴌𐴝𐴙𐴅𐴧𐴡𐴌 𐴀𐴠𐴊𐴧𐴠 𐴔𐴡𐴈𐴞𐴥𐴔𐴝𐴌 𐴁𐴝𐴥𐴒𐴞 𐴀𐴡𐴥𐴘 𐴁𐴡𐴓𐴧𐴝 𐴋𐴝𐴑𐴠𐴌.

¹³𐴀𐴝𐴣𐴀𐴌𐴝 𐴀𐴠𐴃𐴡𐴓𐴧𐴝𐴤 𐴘𐴡𐴥 𐴓𐴝𐴒𐴝𐴃𐴝𐴌 𐴀𐴝𐴓𐴧𐴝𐴌 𐴐𐴟𐴥𐴑𐴟𐴌 𐴒𐴡𐴌𐴞𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴝𐴌 𐴁𐴡𐴘𐴧𐴝𐴕 𐴉𐴟𐴥𐴕𐴞 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴑𐴡𐴁𐴟𐴓𐴢 𐴒𐴡𐴙𐴅𐴧𐴡𐴥, 𐴇𐴠𐴥𐴣𐴃𐴧𐴠 𐴃𐴟𐴣𐴀𐴝𐴥𐴌𐴝 𐴇𐴞𐴥𐴀𐴕 𐴀𐴞𐴕𐴏𐴝𐴥𐴕𐴡𐴌 𐴕𐴡 𐴁𐴡𐴥𐴓𐴑𐴠 𐴀𐴝𐴏𐴡𐴥𐴓𐴠 𐴎𐴠𐴕𐴊𐴞𐴓𐴧𐴝 𐴇𐴠𐴥𐴕𐴊𐴞𐴓𐴧𐴝 𐴀𐴞𐴥𐴏𐴝𐴉𐴠 𐴑𐴡𐴁𐴟𐴓𐴢 𐴒𐴡𐴙𐴅𐴧𐴡𐴥, 𐴘𐴝𐴥𐴕𐴞 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴀𐴞𐴥𐴏𐴝𐴉𐴠. 𐴇𐴞𐴥𐴀𐴕𐴠 𐴃𐴟𐴣𐴀𐴝𐴥𐴌𐴝 𐴀𐴞𐴔𐴝𐴕𐴊𐴝𐴥𐴌 𐴀𐴡𐴥𐴑𐴧𐴡𐴓𐴡𐴌 𐴁𐴟𐴥𐴃𐴡𐴌𐴠 𐴈𐴝𐴔 𐴒𐴡𐴌𐴝𐴥𐴃𐴢 𐴀𐴝𐴏𐴠𐴤.¹⁴𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝𐴌 𐴇𐴝𐴥𐴓𐴡𐴃𐴢 𐴃𐴡 𐴀𐴝𐴓𐴧𐴝𐴌 𐴎𐴡𐴔𐴝𐴥𐴃𐴢 𐴀𐴟𐴀𐴙𐴕𐴡𐴌 𐴋𐴡𐴥𐴙𐴓𐴧𐴝 𐴎𐴞𐴀𐴕 𐴘𐴡𐴇𐴟𐴥𐴊𐴞𐴘𐴝 𐴀𐴠𐴓𐴝𐴑𐴝𐴃𐴢 𐴔𐴡𐴀𐴏𐴞𐴤 𐴀𐴞𐴏𐴝𐴤𐴌 𐴁𐴟𐴥𐴃𐴡𐴌𐴠 𐴀𐴝𐴏𐴠𐴤. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴘𐴡𐴥 𐴊𐴠 𐴕𐴞𐴎𐴡𐴌 𐴑𐴡𐴗𐴔𐴡𐴃𐴧𐴟 𐴀𐴟𐴕𐴊𐴞𐴓𐴧𐴝 𐴎𐴟𐴓𐴟𐴥𐴔 𐴉𐴝𐴘𐴧𐴡𐴥 𐴎𐴠𐴕𐴊𐴞𐴓𐴧𐴝 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌 𐴑𐴡𐴗𐴔 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴉𐴝𐴀𐴙𐴓𐴢,¹⁵𐴎𐴠𐴃𐴝𐴌𐴝𐴤 𐴔𐴝𐴓𐴞𐴑 𐴀𐴞𐴏𐴝𐴤𐴌𐴠 𐴘𐴡𐴥 𐴔𐴝𐴌𐴞𐴉𐴠𐴥𐴓𐴝𐴙𐴓𐴢, 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌𐴠 𐴘𐴡𐴥 𐴔𐴝𐴌𐴞𐴉𐴠𐴥𐴓𐴝𐴙𐴓𐴢, 𐴀𐴝𐴦𐴌 𐴀𐴝𐴣𐴀𐴌𐴝𐴌 𐴖𐴡𐴌𐴠 𐴘𐴡𐴥 𐴎𐴟𐴓𐴟𐴥𐴔 𐴒𐴡𐴙𐴅𐴧𐴠𐴥. 𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴝𐴌𐴝𐴌𐴠 𐴀𐴝𐴓𐴧𐴝𐴘𐴠 𐴉𐴡𐴏𐴡𐴥𐴕 𐴕𐴡 𐴒𐴡𐴌𐴠𐴥; 𐴀𐴞𐴥𐴃𐴝𐴌𐴝 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌𐴠 𐴊𐴟𐴐𐴧𐴡𐴕𐴞 𐴒𐴡𐴌𐴠𐴥.¹⁶𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴕𐴠𐴅𐴝𐴃𐴢 𐴉𐴝𐴘𐴁𐴡 𐴁𐴡𐴓𐴞 𐴀𐴞𐴥𐴃𐴝𐴌𐴝 𐴀𐴝𐴣𐴀𐴌𐴝𐴌𐴠 𐴃𐴝𐴌𐴝𐴥𐴌 𐴇𐴝𐴣𐴏𐴠 𐴃𐴡𐴁𐴡𐴓𐴞𐴑 𐴕𐴡 𐴒𐴡𐴙𐴃𐴧𐴡𐴥 𐴔𐴝𐴕𐴝𐴥 𐴒𐴡𐴌𐴠𐴥. 𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴀𐴞𐴥𐴃𐴝𐴌𐴝 𐴇𐴝𐴥𐴔𐴞𐴐𐴝 𐴕𐴞𐴎𐴡𐴌 𐴒𐴟𐴕𐴝𐴤 𐴓𐴡𐴥𐴘 𐴒𐴟𐴕𐴝𐴤𐴌 𐴐𐴞𐴥𐴔𐴝 𐴉𐴡𐴙𐴅𐴧𐴡𐴕𐴃𐴡 𐴉𐴡𐴀𐴣𐴏𐴠𐴒𐴝𐴘. 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴒𐴡𐴎𐴧𐴡𐴁𐴢 𐴉𐴟𐴌𐴝𐴉𐴟𐴌𐴞 𐴀𐴝𐴀𐴘𐴒𐴞𐴘𐴡𐴘.

𐴃𐴞𐴏𐴡𐴥𐴓𐴡𐴕𐴞𐴀𐴡𐴥𐴓𐴡𐴌 𐴇𐴝𐴣𐴏𐴠 𐴎𐴝𐴘𐴁𐴝𐴌 𐴂𐴝𐴥𐴀𐴟𐴓𐴡𐴌 𐴀𐴝𐴎𐴧𐴟

¹⁷𐴔𐴡𐴕𐴃𐴡𐴌, 𐴀𐴡𐴥 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴝𐴣𐴀𐴌𐴝𐴌𐴠 𐴎𐴠𐴇𐴡𐴥𐴕 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴡𐴥𐴃𐴧𐴟 𐴑𐴠𐴏𐴧𐴟𐴥 𐴄𐴝𐴙𐴔𐴡𐴓𐴧𐴝 𐴀𐴝𐴓𐴡𐴑 𐴒𐴡𐴌𐴞𐴥𐴉𐴠𐴓𐴝 𐴒𐴞𐴥𐴘𐴠, 𐴇𐴝𐴥𐴓𐴠𐴑𐴠 𐴅𐴞𐴏𐴞𐴥𐴔 𐴊𐴟𐴌𐴠𐴥 𐴀𐴡𐴥𐴘𐴓𐴠 𐴘𐴡 𐴀𐴝𐴣𐴀𐴌𐴝𐴌 𐴊𐴞𐴓𐴢 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴏𐴠𐴤, 𐴀𐴝𐴣𐴀𐴌𐴝 𐴃𐴟𐴣𐴀𐴝𐴥𐴌𐴝𐴌 𐴔𐴟𐴑 𐴊𐴠𐴑𐴞𐴥 𐴁𐴡𐴓𐴧𐴝 𐴋𐴡𐴣𐴀𐴌 𐴀𐴝𐴎𐴧𐴟𐴌 𐴏𐴝𐴥𐴀𐴣𐴃𐴠 𐴁𐴞𐴐𐴞𐴤 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴞𐴥.¹⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝𐴃𐴧𐴟 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴀𐴝𐴘𐴃𐴡𐴤 𐴔𐴡𐴕𐴠𐴈𐴡𐴘𐴧𐴠𐴥. 𐴈𐴝𐴥𐴀𐴏𐴒𐴡𐴌𐴞 𐴀𐴝𐴀𐴛 𐴂𐴝𐴥𐴀𐴟𐴓𐴠 𐴁𐴝𐴌𐴁𐴝𐴥𐴌 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴞𐴥𐴓𐴝𐴔, 𐴔𐴡𐴕𐴃𐴡𐴌 𐴐𐴡𐴥𐴘𐴃𐴝𐴕𐴠 𐴀𐴝𐴣𐴀𐴌𐴝𐴌𐴠 𐴁𐴝𐴎𐴝𐴥 𐴊𐴞𐴥𐴘𐴠.¹⁹𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴎𐴠𐴣𐴃𐴧𐴠𐴥 𐴀𐴝𐴘𐴁𐴡𐴤 𐴇𐴠𐴥𐴣𐴃𐴧𐴠 𐴀𐴞𐴥𐴁𐴝𐴌 𐴔𐴟𐴀𐴕𐴃𐴟 𐴀𐴝𐴣𐴀𐴌𐴝𐴌 𐴀𐴝𐴐𐴝𐴤, 𐴑𐴟𐴥𐴐𐴞 𐴀𐴠𐴊𐴧𐴠 𐴉𐴡𐴇𐴡𐴥𐴌𐴝𐴙𐴌 𐴃𐴝𐴏𐴢 𐴇𐴡𐴕𐴃𐴝𐴌𐴝𐴤؟ 𐴇𐴞𐴥𐴀𐴕 𐴃𐴟𐴣𐴀𐴝𐴥𐴌𐴝 𐴕𐴡 𐴕𐴠𐴥؟²⁰𐴁𐴠𐴐𐴡𐴥𐴑, 𐴃𐴟𐴣𐴀𐴝𐴥𐴌𐴝 𐴀𐴡𐴥𐴘𐴓𐴝𐴊𐴠 𐴀𐴝𐴣𐴀𐴌𐴝𐴌 𐴉𐴡𐴇𐴡𐴥𐴌𐴝𐴘, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴀𐴡𐴥𐴘𐴓𐴝𐴊𐴠 𐴀𐴝𐴣𐴀𐴌𐴝𐴌 𐴑𐴟𐴥𐴐𐴞.

The Word for the World International

https://app.library.bible/content/87faca8b51c22590