Read 1 𐴘𐴡𐴇𐴝𐴥𐴕𐴧𐴝 3

1 𐴘𐴡𐴇𐴝𐴥𐴕𐴧𐴝3

¹𐴏𐴡𐴀, 𐴁𐴝𐴉𐴠 𐴀𐴝𐴣𐴀𐴌𐴝𐴌𐴠 𐴇𐴡𐴃𐴡𐴥 𐴋𐴡𐴣𐴀𐴌 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴅𐴧𐴠𐴥, 𐴎𐴠𐴀𐴕 𐴕𐴞𐴥𐴑𐴞 𐴀𐴝𐴣𐴀𐴌𐴝𐴌𐴠 𐴀𐴝𐴓𐴧𐴝𐴌 𐴉𐴟𐴀𐴝𐴙𐴕 𐴈𐴡𐴖𐴝𐴤 𐴎𐴝; 𐴀𐴠𐴀𐴕𐴠 𐴃𐴡 𐴇𐴞𐴥𐴘𐴝𐴕 𐴏𐴡𐴥𐴘𐴧𐴞. 𐴊𐴟𐴕𐴞𐴘𐴝𐴙𐴌 𐴔𐴝𐴙𐴕𐴐𐴠𐴥 𐴀𐴝𐴣𐴀𐴌𐴝𐴌𐴠 𐴀𐴠𐴃𐴡𐴓𐴧𐴝𐴤 𐴕𐴡 𐴏𐴞𐴕𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴕𐴡 𐴏𐴞𐴕𐴠𐴥.²𐴀𐴡𐴥 𐴀𐴝𐴊𐴡𐴙𐴅𐴧𐴝 𐴀𐴡𐴥𐴑𐴧𐴡𐴓𐴢, 𐴘𐴝𐴓𐴝 𐴃𐴡 𐴀𐴝𐴣𐴀𐴌𐴝 𐴀𐴝𐴓𐴧𐴝𐴌 𐴉𐴟𐴀𐴝𐴙𐴕, 𐴔𐴡𐴕𐴃𐴡𐴌 𐴔𐴟𐴀𐴕𐴃𐴟 𐴎𐴝𐴘 𐴀𐴝𐴣𐴀𐴌𐴝 𐴑𐴞𐴦 𐴀𐴡𐴥𐴘𐴧𐴟𐴔 𐴊𐴠 𐴇𐴞𐴥𐴘𐴝𐴕 𐴀𐴝𐴙𐴅𐴧𐴡𐴤 𐴎𐴝𐴇𐴠𐴥𐴌 𐴕𐴡𐴥 𐴀𐴡𐴥𐴘𐴧𐴡. 𐴀𐴝𐴣𐴀𐴌𐴝 𐴀𐴠𐴊𐴧𐴟𐴥𐴌 𐴎𐴝𐴕𐴞 𐴊𐴠 𐴑𐴞, 𐴔𐴡𐴀𐴏𐴞𐴤 𐴎𐴠𐴣𐴃𐴧𐴠𐴥 𐴎𐴝𐴇𐴠𐴥𐴌 𐴀𐴡𐴥𐴘𐴁𐴡 𐴇𐴠𐴥𐴣𐴃𐴧𐴠 𐴀𐴝𐴣𐴀𐴌𐴝 𐴀𐴞𐴥𐴁𐴝𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘𐴧𐴟𐴔, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝 𐴀𐴝𐴏𐴡𐴥𐴓𐴠 𐴎𐴠𐴕𐴊𐴞𐴓𐴧𐴝 𐴀𐴝𐴣𐴀𐴌𐴝 𐴀𐴞𐴥𐴁𐴝𐴌𐴠 𐴇𐴠𐴥𐴕𐴊𐴞𐴓𐴧𐴝 𐴊𐴠𐴑𐴞𐴥𐴘𐴟𐴔.³𐴎𐴠𐴃𐴡𐴥 𐴎𐴡𐴕𐴠 𐴔𐴡𐴀𐴏𐴞𐴤𐴌 𐴖𐴡𐴌𐴠 𐴇𐴠𐴥 𐴀𐴝𐴐𐴝𐴤 𐴌𐴝𐴙𐴑𐴧𐴠𐴥, 𐴀𐴞𐴥𐴃𐴝𐴌𐴝 𐴕𐴞𐴎𐴡𐴌𐴠𐴥 𐴂𐴝𐴑-𐴏𐴝𐴥𐴉𐴢 𐴌𐴝𐴑𐴠𐴥, 𐴎𐴠𐴕𐴊𐴞𐴓𐴧𐴝 𐴀𐴞𐴥𐴁𐴝 𐴂𐴝𐴑-𐴏𐴝𐴥𐴉𐴢.

⁴𐴎𐴠𐴦𐴕𐴞𐴑𐴞 𐴒𐴟𐴕𐴝𐴤 𐴒𐴡𐴌𐴠𐴥 𐴀𐴞𐴥𐴃𐴠 𐴐𐴡𐴥𐴌𐴞𐴘𐴡𐴃𐴢 𐴁𐴝𐴥𐴚𐴒𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴒𐴟𐴕𐴝𐴤 𐴒𐴡𐴌𐴡𐴤𐴕 𐴀𐴡𐴥𐴙𐴓𐴊𐴠 𐴐𐴡𐴥𐴌𐴞𐴘𐴡𐴃𐴢 𐴁𐴝𐴥𐴚𐴒𐴡𐴕.⁵𐴃𐴟𐴣𐴀𐴝𐴥𐴌𐴝 𐴃𐴡 𐴎𐴝𐴕𐴡, 𐴀𐴝𐴣𐴀𐴌𐴝𐴌 𐴒𐴟𐴕𐴝𐴤 𐴀𐴡𐴥𐴑𐴧𐴡𐴓𐴢 𐴊𐴟𐴌 𐴒𐴡𐴌𐴞𐴥 𐴁𐴡𐴓𐴧𐴝 𐴔𐴡𐴀𐴏𐴞𐴤 𐴎𐴝𐴇𐴠𐴥𐴌 𐴀𐴡𐴥𐴀𐴙𐴓𐴢; 𐴀𐴞𐴥𐴁𐴝𐴃𐴧𐴟 𐴇𐴡𐴕𐴡𐴤 𐴒𐴟𐴕𐴝𐴤 𐴕𐴝𐴥𐴘.⁶𐴇𐴠𐴥𐴃𐴡𐴓𐴧𐴝 𐴎𐴠𐴦𐴕𐴞𐴑𐴞 𐴀𐴞𐴥𐴁𐴝𐴌 𐴁𐴟𐴥𐴃𐴡𐴌𐴠 𐴃𐴝𐴥𐴑𐴠 𐴀𐴞𐴥𐴃𐴠 𐴒𐴟𐴕𐴝𐴤𐴃𐴢 𐴉𐴡𐴌𐴞 𐴕𐴡 𐴃𐴝𐴥𐴑𐴠; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴒𐴟𐴕𐴝𐴤𐴃𐴢 𐴉𐴡𐴌𐴞 𐴃𐴝𐴥𐴑𐴠 𐴀𐴞𐴥𐴃𐴠 𐴀𐴞𐴥𐴁𐴝𐴌𐴠 𐴕𐴡 𐴊𐴠𐴙𐴑𐴧𐴠𐴥 𐴀𐴝𐴦𐴌 𐴕𐴡 𐴏𐴞𐴕𐴠𐴥.

⁷𐴀𐴡𐴥 𐴀𐴝𐴊𐴡𐴙𐴅𐴧𐴝 𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴢, 𐴏𐴝𐴘𐴧𐴡𐴥, 𐴃𐴟𐴣𐴀𐴝𐴥𐴌𐴝𐴌𐴠 𐴇𐴡𐴕𐴡𐴤𐴑𐴞𐴘𐴠 𐴒𐴡𐴓𐴧𐴡𐴃𐴡𐴃𐴢 𐴕𐴡 𐴓𐴡𐴘𐴎𐴝 𐴉𐴝𐴥𐴕. 𐴎𐴠𐴦𐴕𐴞𐴑𐴞 𐴉𐴡𐴌𐴇𐴠𐴥𐴏𐴒𐴝𐴌𐴞 𐴎𐴞𐴕𐴊𐴞𐴒𐴞 𐴈𐴝𐴍𐴝 𐴀𐴞𐴥𐴃𐴠 𐴀𐴡𐴥𐴙𐴓𐴊𐴠 𐴉𐴡𐴌𐴇𐴠𐴥𐴏𐴒𐴝𐴌, 𐴎𐴠𐴕𐴊𐴞𐴓𐴧𐴝 𐴀𐴞𐴥𐴁𐴝 𐴉𐴡𐴌𐴇𐴠𐴥𐴏𐴒𐴝𐴌.⁸𐴀𐴝𐴦𐴌 𐴎𐴠𐴦𐴕𐴞𐴑𐴞 𐴒𐴟𐴕𐴝𐴤𐴃𐴢 𐴉𐴡𐴌𐴞 𐴃𐴝𐴥𐴑𐴠 𐴀𐴞𐴥𐴃𐴠 𐴀𐴡𐴥𐴙𐴓𐴊𐴠 𐴀𐴞𐴁𐴞𐴓𐴞𐴥𐴐𐴢 𐴀𐴡𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴁𐴞𐴓𐴞𐴥𐴐𐴠 𐴃𐴡 𐴉𐴡𐴀𐴘𐴓𐴝 𐴐𐴟𐴥𐴌𐴟𐴃𐴧𐴟 𐴓𐴡𐴥𐴃𐴞 𐴒𐴟𐴕𐴝𐴤 𐴒𐴡𐴌𐴝𐴥𐴃𐴢 𐴀𐴝𐴏𐴠𐴤. 𐴀𐴝𐴓𐴧𐴝𐴌 𐴉𐴟𐴖𐴝 𐴀𐴠𐴃𐴡𐴓𐴧𐴝𐴤 𐴎𐴝𐴇𐴠𐴥𐴌 𐴀𐴡𐴥𐴀𐴙𐴓𐴢, 𐴎𐴠𐴀𐴕𐴠 𐴀𐴞𐴥𐴁𐴝𐴘𐴠 𐴀𐴞𐴁𐴞𐴓𐴞𐴥𐴐𐴡𐴌 𐴈𐴝𐴔 𐴀𐴡𐴥𐴑𐴧𐴡𐴓𐴡𐴌𐴠 𐴊𐴡𐴥𐴚𐴐𐴡 𐴒𐴡𐴌𐴞𐴥𐴉𐴠𐴓𐴝.⁹𐴎𐴠𐴦𐴕𐴞𐴑𐴞 𐴀𐴝𐴓𐴧𐴝𐴃𐴧𐴟 𐴎𐴡𐴌𐴔𐴡 𐴀𐴡𐴥𐴘𐴒𐴞𐴘𐴡𐴘 𐴀𐴞𐴥𐴃𐴠 𐴒𐴟𐴕𐴝𐴤𐴃𐴢 𐴉𐴡𐴌𐴞 𐴕𐴡 𐴃𐴝𐴥𐴑𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌 𐴁𐴟𐴥𐴃𐴡𐴌𐴠 𐴀𐴝𐴓𐴧𐴝𐴌 𐴁𐴞𐴏𐴢 𐴀𐴝𐴏𐴠𐴤; 𐴀𐴝𐴦𐴌 𐴀𐴞𐴥𐴃𐴠 𐴀𐴝𐴓𐴧𐴝𐴃𐴧𐴟 𐴎𐴡𐴌𐴔𐴡 𐴀𐴡𐴥𐴘𐴒𐴞𐴘𐴡𐴘 𐴊𐴠 𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴠 𐴒𐴟𐴕𐴝𐴤𐴃𐴢 𐴉𐴡𐴌𐴞 𐴃𐴝𐴥𐴑𐴞 𐴕𐴡 𐴉𐴝𐴌𐴠.¹⁰𐴀𐴝𐴓𐴧𐴝𐴌 𐴉𐴟𐴀𐴝𐴙𐴕 𐴇𐴡𐴕𐴃𐴝𐴌𐴝𐴤 𐴀𐴝𐴦𐴌 𐴀𐴞𐴁𐴞𐴓𐴞𐴥𐴐𐴡𐴌 𐴉𐴟𐴀𐴝𐴙𐴕 𐴇𐴡𐴕𐴃𐴝𐴌𐴝𐴤 𐴇𐴞𐴥𐴘𐴝𐴕 𐴀𐴠𐴕𐴊𐴞𐴓𐴧𐴝 𐴒𐴡𐴌𐴞 𐴏𐴞𐴕𐴝𐴥 𐴎𐴝: 𐴎𐴠𐴦𐴕𐴞𐴑𐴞 𐴉𐴡𐴌𐴇𐴠𐴥𐴏𐴒𐴝𐴌𐴞 𐴎𐴞𐴕𐴊𐴞𐴒𐴞 𐴕𐴡 𐴈𐴝𐴍𐴝 𐴀𐴞𐴥𐴃𐴠 𐴀𐴝𐴓𐴧𐴝𐴌 𐴕𐴡, 𐴇𐴠𐴥𐴕𐴊𐴞𐴓𐴧𐴝 𐴀𐴟𐴘𐴃𐴠 𐴘𐴡𐴥 𐴀𐴝𐴓𐴧𐴝𐴌 𐴕𐴡 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴁𐴝𐴥𐴘𐴡𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴕𐴡 𐴒𐴡𐴌𐴠𐴥.

𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴡𐴤

¹¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴉𐴡𐴀𐴘𐴓𐴝 𐴐𐴟𐴥𐴌𐴟𐴃𐴧𐴟 𐴓𐴡𐴥𐴃𐴞 𐴎𐴞𐴘𐴝𐴥𐴕 𐴉𐴟𐴥𐴕𐴞-𐴉𐴟𐴥𐴕𐴞 𐴀𐴝𐴘𐴧𐴡𐴤𐴌 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠, 𐴀𐴝𐴣𐴀𐴌𐴝𐴃𐴧𐴟 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴝𐴥𐴌 𐴎𐴡𐴌𐴟𐴌.¹²𐴑𐴠𐴀𐴙𐴕𐴡𐴌 𐴋𐴡𐴥𐴙𐴓𐴧𐴝 𐴕𐴡 𐴀𐴡𐴥𐴘𐴧𐴡, 𐴎𐴠𐴦𐴕𐴞𐴑𐴞 𐴀𐴞𐴁𐴞𐴓𐴞𐴥𐴐𐴡𐴌 𐴀𐴝𐴐𐴧𐴞𐴥𐴓𐴢 𐴀𐴝𐴦𐴌 𐴕𐴞𐴎𐴡𐴌 𐴁𐴝𐴥𐴘𐴡𐴌𐴠 𐴑𐴟𐴥𐴕 𐴒𐴡𐴙𐴅𐴧𐴞𐴥𐴓𐴢. 𐴀𐴞𐴥𐴃𐴠 𐴕𐴞𐴎𐴡𐴌 𐴁𐴝𐴥𐴘𐴡𐴌𐴠 𐴑𐴞𐴘𐴝𐴥 𐴑𐴟𐴥𐴕 𐴒𐴡𐴌𐴞𐴥𐴉𐴠𐴓𐴝𐴙𐴓؟ 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴁𐴟𐴌𐴝 𐴀𐴝𐴐𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴁𐴝𐴥𐴘𐴡𐴌 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴒𐴡𐴔 𐴀𐴝𐴐𐴧𐴞𐴥𐴓𐴢.¹³𐴀𐴡𐴥 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴢, 𐴊𐴟𐴕𐴞𐴘𐴝𐴙𐴌 𐴔𐴝𐴙𐴕𐴐𐴠𐴥 𐴃𐴟𐴣𐴀𐴝𐴥𐴌𐴝𐴌𐴠 𐴕𐴝𐴉𐴡𐴥𐴌𐴡𐴃𐴢 𐴒𐴡𐴙𐴓𐴧𐴠𐴥 𐴃𐴝𐴦𐴅𐴟𐴂𐴢 𐴕𐴡 𐴀𐴡𐴥𐴘𐴧𐴡.¹⁴𐴀𐴝𐴣𐴀𐴌𐴝 𐴃𐴡 𐴎𐴝𐴕𐴞, 𐴀𐴝𐴣𐴀𐴌𐴝 𐴔𐴡𐴦𐴃𐴡𐴃𐴧𐴟 𐴎𐴞𐴕𐴊𐴞𐴒𐴞𐴃𐴢 𐴉𐴝𐴌𐴝𐴤𐴘𐴞𐴒𐴝𐴘; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴊𐴠 𐴁𐴝𐴥𐴘𐴧𐴝𐴙𐴕 𐴊𐴡𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥. 𐴎𐴠𐴦𐴕𐴞𐴑𐴞 𐴔𐴟𐴇𐴝𐴥𐴁𐴧𐴡𐴃𐴢 𐴕𐴡 𐴒𐴡𐴌𐴠𐴥 𐴀𐴞𐴥𐴃𐴠 𐴀𐴝𐴙𐴅𐴧𐴡𐴤 𐴔𐴡𐴦𐴃𐴡𐴌 𐴇𐴡𐴥𐴑𐴟𐴔𐴡𐴃𐴡𐴌 𐴃𐴡𐴓𐴠 𐴀𐴝𐴏𐴠𐴤.¹⁵𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴁𐴝𐴥𐴘𐴡𐴌𐴠 𐴕𐴝𐴉𐴡𐴥𐴌𐴡𐴃𐴢 𐴒𐴡𐴌𐴠𐴥 𐴀𐴞𐴥𐴃𐴠 𐴑𐴟𐴥𐴕𐴞, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴃𐴡 𐴎𐴝𐴕𐴡, 𐴇𐴡𐴕𐴡𐴤 𐴑𐴟𐴥𐴕𐴞𐴌 𐴁𐴟𐴥𐴃𐴡𐴌𐴠 𐴀𐴡𐴉𐴟𐴥𐴌𐴝𐴕𐴞 𐴎𐴞𐴕𐴊𐴞𐴒𐴞 𐴕𐴝𐴥𐴘.

¹⁶𐴀𐴝𐴣𐴀𐴌𐴝 𐴃𐴡 𐴔𐴡𐴀𐴏𐴞𐴤𐴘𐴠 𐴀𐴝𐴣𐴀𐴌𐴝𐴓𐴧𐴝 𐴕𐴞𐴎𐴡𐴌 𐴎𐴝𐴕 𐴊𐴞𐴀𐴓𐴢 𐴊𐴠 𐴇𐴞𐴥𐴘𐴝𐴕𐴡𐴃𐴧𐴟 𐴔𐴟𐴇𐴝𐴥𐴁𐴧𐴡𐴃𐴢 𐴑𐴞𐴘𐴡𐴥𐴌𐴠 𐴈𐴡𐴀 𐴊𐴠 𐴎𐴝𐴕𐴞 𐴉𐴝𐴙𐴅𐴧𐴞𐴥. 𐴇𐴠𐴥𐴃𐴡𐴓𐴧𐴝, 𐴀𐴝𐴣𐴀𐴌𐴝𐴃𐴧𐴟 𐴘𐴡𐴥 𐴕𐴞𐴎𐴡𐴌 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴀𐴡𐴥𐴑𐴧𐴡𐴓𐴡𐴓𐴧𐴝 𐴕𐴞𐴎𐴡𐴌 𐴎𐴝𐴕 𐴊𐴞𐴘𐴝𐴌 𐴉𐴡𐴥𐴌𐴡𐴏𐴢.¹⁷𐴊𐴟𐴕𐴞𐴘𐴝𐴘𐴁𐴞 𐴐𐴡𐴥𐴔𐴁𐴡𐴃𐴧𐴞 𐴀𐴝𐴏𐴠𐴤 𐴊𐴠 𐴔𐴝𐴕𐴟𐴥𐴙𐴐𐴠 𐴎𐴡𐴊𐴞 𐴕𐴞𐴎𐴡𐴌 𐴁𐴝𐴥𐴘 𐴎𐴡𐴌𐴟𐴌𐴡𐴃𐴡𐴃𐴢 𐴉𐴡𐴙𐴅𐴧𐴠𐴥 𐴊𐴠 𐴊𐴠𐴑𐴞𐴥 𐴁𐴝𐴦𐴊𐴠 𐴘𐴡 𐴕𐴞𐴎𐴡𐴌 𐴏𐴟𐴑 𐴁𐴡𐴕 𐴒𐴡𐴌𐴞𐴥 𐴌𐴝𐴑𐴠𐴥, 𐴀𐴞𐴥𐴃𐴝𐴌 𐴁𐴟𐴥𐴃𐴡𐴌𐴠 𐴀𐴝𐴓𐴧𐴝𐴌 𐴔𐴟𐴇𐴝𐴥𐴁𐴧𐴡𐴃𐴢 𐴑𐴠𐴀𐴕𐴒𐴡𐴌𐴞 𐴎𐴝𐴌𐴞 𐴃𐴝𐴥𐴑𐴞𐴁𐴡؟¹⁸𐴀𐴡𐴥 𐴀𐴝𐴊𐴡𐴙𐴅𐴧𐴝 𐴉𐴟𐴀𐴝𐴙𐴕 𐴀𐴡𐴥𐴑𐴧𐴡𐴓𐴢, 𐴀𐴝𐴘𐴧𐴡𐴤, 𐴀𐴝𐴣𐴀𐴌𐴝 𐴏𐴞𐴌𐴞𐴥𐴉𐴢 𐴈𐴡𐴃𐴝𐴤𐴘𐴠 𐴀𐴠𐴊𐴧𐴠 𐴎𐴡𐴁𐴝𐴕𐴠 𐴕𐴡, 𐴁𐴡𐴥𐴓𐴑𐴠 𐴈𐴝𐴔𐴠 𐴀𐴠𐴊𐴧𐴠 𐴏𐴡𐴥𐴘𐴧𐴞𐴘𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥.

𐴀𐴝𐴓𐴧𐴝𐴌 𐴔𐴟𐴀𐴕𐴃𐴟 𐴇𐴞𐴥𐴔𐴧𐴡𐴃𐴢

¹⁹𐴃𐴡𐴥𐴘 𐴀𐴝𐴣𐴀𐴌𐴝 𐴎𐴝𐴕𐴞 𐴉𐴝𐴙𐴅𐴧𐴟𐴔 𐴊𐴠 𐴑𐴞, 𐴀𐴝𐴣𐴀𐴌𐴝 𐴏𐴡𐴥𐴘𐴧𐴞𐴌, 𐴀𐴝𐴦𐴌 𐴀𐴝𐴓𐴧𐴝𐴌 𐴔𐴟𐴀𐴕𐴃𐴟 𐴀𐴝𐴣𐴀𐴌𐴝𐴌 𐴊𐴞𐴓𐴠 𐴃𐴡𐴏𐴡𐴥𐴓𐴧𐴞 𐴉𐴝𐴘𐴁𐴡.²⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝𐴌 𐴊𐴞𐴓𐴠 𐴎𐴡𐴊𐴞 𐴀𐴝𐴣𐴀𐴌𐴝𐴌𐴠 𐴈𐴡𐴏𐴟𐴥𐴌𐴁𐴡𐴕 𐴄𐴡𐴥𐴀𐴌𐴝, 𐴀𐴝𐴣𐴀𐴌𐴝 𐴃𐴡 𐴎𐴝𐴕𐴞, 𐴀𐴝𐴓𐴧𐴝 𐴀𐴝𐴣𐴀𐴌𐴝𐴌 𐴊𐴞𐴓𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌, 𐴀𐴞𐴥𐴁𐴝𐴘𐴠 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴎𐴝𐴕𐴠.²¹𐴇𐴠𐴥𐴃𐴡𐴓𐴧𐴝, 𐴀𐴡𐴥 𐴀𐴝𐴊𐴡𐴙𐴅𐴧𐴝 𐴀𐴡𐴥𐴑𐴧𐴡𐴓𐴢, 𐴀𐴝𐴣𐴀𐴌𐴝𐴌 𐴊𐴞𐴓𐴠 𐴎𐴡𐴊𐴞 𐴀𐴝𐴣𐴀𐴌𐴝𐴌𐴠 𐴈𐴡𐴏𐴟𐴥𐴌𐴁𐴡𐴕 𐴕𐴡 𐴄𐴡𐴥𐴀𐴌𐴝, 𐴃𐴡𐴥𐴀𐴘𐴓𐴠 𐴃𐴡 𐴀𐴝𐴣𐴀𐴌𐴝𐴃𐴧𐴟 𐴀𐴝𐴓𐴧𐴝𐴌 𐴔𐴟𐴀𐴕𐴃𐴟 𐴇𐴞𐴥𐴔𐴧𐴡𐴃𐴢 𐴃𐴝𐴥𐴑𐴞𐴁𐴡,²²𐴀𐴝𐴦𐴌 𐴀𐴝𐴣𐴀𐴌𐴝 𐴀𐴞𐴥𐴁𐴝𐴃𐴧𐴟 𐴎𐴞𐴀𐴕 𐴔𐴝𐴒𐴞 𐴇𐴞𐴥𐴀𐴕 𐴉𐴝𐴘𐴧𐴟𐴔, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴊𐴠 𐴀𐴞𐴥𐴁𐴝𐴌 𐴇𐴡𐴥𐴑𐴟𐴔 𐴀𐴡𐴥𐴑𐴧𐴡𐴓𐴢 𐴀𐴝𐴔𐴡𐴥𐴓𐴢 𐴒𐴡𐴌𐴞𐴥, 𐴀𐴝𐴦𐴌 𐴀𐴞𐴥𐴁𐴝𐴌 𐴕𐴡𐴎𐴡𐴌𐴡𐴃𐴢 𐴎𐴞𐴀𐴕 𐴉𐴡𐴏𐴡𐴥𐴕𐴊𐴝𐴌 𐴇𐴞𐴥𐴀𐴕 𐴒𐴡𐴌𐴞𐴥.²³𐴀𐴞𐴥𐴁𐴝𐴌 𐴇𐴡𐴥𐴑𐴟𐴔 𐴀𐴡𐴥𐴙𐴓𐴊𐴠, 𐴀𐴝𐴣𐴀𐴌𐴝 𐴀𐴞𐴥𐴁𐴝𐴌 𐴉𐴟𐴖𐴝 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴡𐴤𐴕 𐴀𐴝𐴦𐴌 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴡𐴤𐴕, 𐴎𐴠𐴕𐴊𐴞𐴓𐴧𐴝 𐴔𐴡𐴀𐴏𐴞𐴤𐴘𐴠 𐴀𐴝𐴣𐴀𐴌𐴝𐴌𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠.²⁴𐴎𐴠𐴦𐴕𐴞𐴑𐴞 𐴀𐴝𐴓𐴧𐴝𐴌 𐴇𐴡𐴥𐴑𐴟𐴔 𐴀𐴡𐴥𐴑𐴧𐴡𐴓𐴢 𐴀𐴝𐴔𐴡𐴥𐴓𐴢 𐴒𐴡𐴌𐴠𐴥 𐴀𐴞𐴥𐴃𐴠 𐴀𐴝𐴓𐴧𐴝𐴌 𐴁𐴟𐴥𐴃𐴡𐴌𐴠 𐴎𐴝𐴌𐴞 𐴀𐴝𐴏𐴠𐴤, 𐴀𐴝𐴦𐴌 𐴀𐴝𐴓𐴧𐴝 𐴀𐴞𐴥𐴃𐴝𐴌 𐴁𐴟𐴥𐴃𐴡𐴌𐴠 𐴎𐴝𐴌𐴞 𐴀𐴝𐴏𐴠𐴤. 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴝𐴌𐴠 𐴂𐴝𐴑-𐴌𐴟𐴀 𐴊𐴞𐴦𐴘𐴠𐴥 𐴊𐴠 𐴇𐴞𐴥𐴘𐴝𐴕𐴠 𐴀𐴝𐴣𐴀𐴌𐴝 𐴎𐴝𐴕𐴞 𐴊𐴠 𐴑𐴞, 𐴀𐴞𐴥𐴁𐴝 𐴀𐴝𐴣𐴀𐴌𐴝𐴌 𐴁𐴟𐴥𐴃𐴡𐴌𐴠 𐴎𐴝𐴌𐴞 𐴀𐴝𐴏𐴠𐴤.

The Word for the World International

https://app.library.bible/content/87faca8b51c22590