JHN1rhg_sco

Kalam manušor ruf loiye

1Šurut Kalam aššil, Kalam Allar fũwati aššil edde Kalam nize Allah aššil.2Hiba šurut Allar fũwati aššil.3Hár kissu hibar duwara oiye, ar zin oiye, hinor ekkano hibare sara no o.4Hibattu zibon aššil, edde he zibon aššilde manušor nur.5Ar he nur andarot zoler, edde andare nurore loi ziti no fare.6Heṛe ekzon manuš hazir oil, hibare Allar torfottu defeṛa oil, hibar nam oilde Yahya.7Hibaye goba dito aiššil, zene hibaye Nuror babute goba de, toi zene hibar duwara beggune biššaš gore.8Hiba nize he nur nu aššil, kintu hibaye šude he nuror babute goba dito aiššil.9Hiba oilde asol nur, ze fotti manušore nur dan gore, hiba duniyait aišše.10Ei duniyait hiba aššil, edde duniyai hibar duwara oiye, to duniyair mainše hibare no sine.11Hiba nizor dešor aiššil, kintu hibar nizor mainše hibare no gose.12Tarfore o zeto zone hibare goisse, zara hibar namore biššaš goijje, hitara fottikiyore hibaye Allar fuwain oibar odihar diye.13Hitara louwottu no, gustottu no, manušor issaye o no o, kintu Allattu oiye.14He Kalam manušor ruf loiye edde ãrar fũwati bošobaš goijje. Bafor hãsottu aiššede šude lehar ek Fut, hibar ze mohima, he mohima ãra dekki, hiba doya edde soyiye furaiya.15(Yahyaye hibar babute goba diye, ar guzori hodde, "Iba hiba zar babute ãi hoilam, 'Hiba ze ãi bade aiyer hiba ãttuwaro mohan, kiyollahoile hiba ãr age loti ase.'")16Hibar he furaiyattu ãra beggune doyar uwore doya faiyi.17Kiyollahoile Musar duwara ain diya oil; Isa Mosir duwara doya edde soiyi aišše.18Allare honokiye hono din no deke, kintu lehar he Fut, ze nize Allah, edde ze bafor beša beši hãse ase, hibaye hibare forhaš goijje.

Yahyaye Messiyah no de hiyan šikar gorer

19Ar iyan oilde Yahyar goba, zẽtte Ihudi neta okkole Zeruzalemottu hoekzon imam edde levire Yahyar hãse hiba honnuwa fusar goitto defeṛail.20Ar hibaye šikar goijje, ošikar no gore, bolke šikar goijje, "Ãi Messiyah no."21Hitara hibare fusar goijje, "Toile tũi honnuwa? Tũi ki Eliyas?" Hibaye hodde, "Ãi no." "Toile tũi ki he Nobi?" Hibaye zuwabe hodde, "No."22Hetunot hitara hibare hodde, "Toile tũi honnuwa? Ãrare ho, zara ãrare defeṛaiye, hitarare zene ãra zuwab di fari. Tũi tũwar nizor babute ki ho?"23Hibaye hodde, "Ãi, bošoti sara elehat ek abaze guzori zanai der, 'Mabudolla fõt ṭik goro.'" zendilla Esaiyah nobiye hoiye.24Toi defeṛa oiyede Foroši okkole,25hitara hibattu fusar goijje, "Tũi zodi Messiyah o no oile, Eliyas o no oile, otóba he Nobi o no oile, toile kiyolla tũi torikotor gusol dor?"26Yahyaye zuwabe hodde, "Ãi fani loi torikotor gusol dir, kintu tũwarar butore ekzon tiyai roiye, zare tũwara no sino.27Iba hiba ze ãi bade aiyer, hibar ṭengor zutar fita kuli dibar laikka o ãi no."28Zordanor oinno faror Betaniyat, zeṛe Yahya torikotor gusol dil, heṛe in okkol goiṭṭe.

Yahyaye Isar babute goba der

29Tarfordin Yahyaye Isare hibar mikka aiyedde dekiyore hodde, "So, Allar berasoolor so, ze duniyair guna boi loizargoi!30Iba oilde hiba zar babute ãi hoilam, 'Ãi bade en ekzon manuš aiyer ze ãttuwaro mohan, kiyollahoile hiba ãr age loti ase.'31Ãi nize hibare no sinitam, kintu hiba zene Israili okkolor hãse forhaš o, hiyanolla ãi aiyore fanit torikotor gusol dir."32Ar Yahyaye endilla goba diye, hodde: "Ãi dekki Ruh hoitoror ḍoilla oi asmanottu lami aiyedde, ar hiba hibar uwore roiye.33Ãi nize hibare no sinitam, kintu ze ãre fanit torikotor gusol dito defeṛaiye hibaye ãre hoiye, 'Zar uwore Pak Ruh lami aiyer edde hibar uwore roiyede dekibi, iba oilde hiba ze Pak Ruh loi torikotor gusol dibo.'34Ãi hen dekki edde goba dir ze, hiba oilde Allar Fut."

Isa Mosir foila sahabi okkol

35Tarfordin, abar Yahyaye hibar duizon šagiritore fũwati loi heṛe tiyai aššil.36Ar Isa aṛi zadde dekiyore hibaye hodde, "So, Allar berasoolor so!"37Ei hota hodde šagirit dunizone funiyore hitara Isar fise fise za šuru goijje.38Isaye fissa fijje edde dekedde hitara hibar fise fise aiyer. Toi fusar goredde, "Tũwara kiyor talaš gorodde?"Hitara hodde: "Rabbi! (zar mani ustad) Õne hoṛe tako?"39Isa hitarare hodde, "Aiyo edde sogai."Toi hitara giye edde hiba hoṛe take he zaga hiyan saiye. Ar he dingan hitara hibar fũwati haṛaiye. Hẽtte dinor sairguwa baijje.40Yahyar hota funi ze duizon Isar fise fise gil, hitara ekzonor nam aššil Andreas, hite Simon Fitoror bái.41Andreas foila hitar bái Simonore tuwai loiye edde hitare hodde, "Ãra Messiyar deha faiyi" (Messiyah zar mani he basona goijjawa).42Toi hite Simonore Isar hãse ainne. Isaye Simonor mikka saiyore hodde, "Tui Yohannar fut Simon, kintu tore Koifa hoi ḍaka oibo"(Koifa oilde Fitor zar mani fattor).

Isaye Filipore edde Natanaelore ḍaikke

43Tarfordin Isaye Galilot zaibo issa goijje. Ar hibaye Filipore faiyore hitare hodde, "Ãr fisa lo."44Filip o Andreas edde Fitoror ḍoil Betsaida ṭonor aššil.45Filipe Natanaelore lot faiye edde hitare hodde, "Musa nobiye zar babute Torah kitabot leikke edde zar babute nobi okkole o leikke, ãra hibar deha faiyi: Hiba oilde Nasarator Isa, Yusufor fut."46Toi Natanaelye hitare hodde, "Nasaratottu ki bala hono kissu ai faribo?" Filipe hitare hodde, "Ai edde sagai."47Isaye dekedde Natanael hibar mikka aiyer, toi hibaye hitar babute hodde, "Oto so, ekzon soiyi Israili, zar butore hono dúhabazi nai."48Natanaelye hibare hodde, "Õne ãre kengori sino?" Isaye zuwab diye edde hitare hodde, "Filipe tore ḍakibar age zẽtte tui ḍũir gasor tolat aššili, hẽtte ãi tore dekkilam."49Natanaelye zuwab diye edde hibare hodde, "Rabbi, õne Allar Fut, Israilor badša."50Isaye hodde, "Ãi tore ḍũir gasor tolat dekki boli hoiyi hetolla ki tui ãre biššaš goror? Tui hiyanottuwaro aro ḍõr kissu dekibi."51Bade Isaye aro hodde, "Soiyi, soiyi, ãi tũwarare hoir, tũwara dekiba, 'behosto kula, ar Allar firista okkol uṛa lama gorer' Adomor Futor uwore."
expand_more
Search