Romans3
1Yơu nữn mơnuĩh Ju-đa hũ kuơ hagĩq? Sì halơi la kaya kuơ màc mưng vruãq adãt sìq kalìq?2Hũ kuơ màc lũ vơnah! Kơyua hlơu avih, nữn la pơnõq nhũ hũ tồq mãq gơnuar ràc pa-tơviãq pơnuaĩq Yàc Pô Lơngĩq hũ.3Nữn ngãq hayơu, mơyah làiq hũ tơkìq mơnuĩh Ju-đa ôh hũ voh tui? Huaĩq làiq hatai ôh pãc-tui pơnõq nhũ hũ ngãq ga kaya tui tơpãq Yàc Pô Lơngĩq hũ tơviãq jỡc ôh hũ kuơ màc lơĩh?4Vruãq nữn ôh tũq halơi ròq tơviãq jỡc. Pa-vlữq wỡq, iỡuq angãn Yàc Pô Lơngĩq la tơpãq viãq, dòq anàq mơnuĩh la mơnuĩh vlữq lor. Yơu song hũ wãq làiq:“Tồq bôh làiq yơu halơi nữn Pitrai song hũ ràc pa-tơviãq la tơpãq rĩng dơlãp dơgrữq pơnuaĩq Pitrai đơp,sì Pitrai hũ pha rlao tũq Pitrai ãt chahrơna.”5Nữn mơyah làiq kaya ôh tơpãq dãng pơnõq drơi vloh ràc pa-tơviãq kaya tơpãq dãng Yàc Pô Lơngĩq hũ, nữn pơnõq drơi ròq đơp hagĩq? Vloh làiq Yàc Pô Lơngĩq ôh tơpãq dãng tũq Pitrai pa-trỗt kaya anõc mơvai prõng Pitrai hũ yơh? (Hlãq ãn đơp tui yơu pơnuaĩq đơp anàq mơnuĩh.)6Ôh tũq halơi hũ vruãq nữn! Kơyua mơyah làiq yơu nữn vloh yơu hayơu Yàc Pô Lơngĩq ròq chahrơna dun kơyua?7Dòq mơyah làiq kaya tơpãq dãng Yàc Pô Lơngĩq hũ kơyua mưng pơnuaĩq đơp vlữq lor hlãq hũ song ngãq ga kaya gơhluh Pitrai brõq pơtãl rơlao, nữn hayơu vloh hlãq dòq kađòc chahrơna yơu sa aràc mơnuĩh dlàiq?8Sì yơu nữn, hayơu vloh pơnõq drơi ôh “ngãq kaya mơsãc, pioh tồq mãq kaya siàp” yơh? — Yơu hũ tơkìq mơnuĩh song yãq pơnõq hlãq đơp yơu nữn — Kaya chahrơna pơnõq nhũ la đang mang viãq.9Yơu nữn gơtha la hayơu? Pơnõq drơi hũ kaya hagĩq siàp rlao lơĩh? Viãq la ôh hũ. Kơyua pơnõq hlãq song yãq làiq avih mơnuĩh Ju-đa gãm sì mơnuĩh Gơ-rec — avih dơgrữq aràc song dòq gah ala gơnuar dlàiq dơnũh hũ.10Yơu song hũ wãq làiq:“Ôh hũ mơnuĩh halơi tơpãq dãng, vloh sa aràc kung ôh hũ.11Ôh hũ asơi thơu pãc.Ôh hũ mơnuĩh halơi duah iãq Yàc Pô Lơngĩq.12Avih dơgrữq tãl aràc pơnõq nhũ song nao suẽl jơlàt. Avih tãl aràc tơviãq jỡc ôh kuơ.Ôh hũ sa aràc mơnuĩh halơi ngãq kaya siàp, bôh làiq sa aràc kung ôh hũ.”13“Atõq pơnõq nhũ la vơnẽq atơu pơh tơviãq.Dơlah pơnõq nhũ, miẽt đơp tơviãq pơnuaĩq pa-gơla aràc.Dơlãp chơbuai pơnõq nhũ la vĩh ala mơsãc,”14“mơvah pơnõq nhũ vãq kaya sơtãp ơluah sì phìq ka-àc.”15“Plàq tơkai pơnõq nhũ nao iờp pioh ngãq hõq dơrãh.16Pãq jơlàt pơnõq nhũ nao gãt la kaya pa-lơhiãq sì kaya pađìq pơđua.17Sì pơnõq nhũ ôh thơu jơlàt ơthua kaya dadu lơngai.”18“Pãq anãq pơnõq nhũ ôh hũ kaya duh huaĩq di Yàc Pô Lơngĩq.”19Vơnah tơmo, pơnõq drơi thơu mơyah làiq dơgrữq kaya hagĩq nữn voh-va pơto pơđar nữn la pơto pơđar ga dơgrữq mơnuĩh dòq pãq ala gơnuar voh-va, pioh ga dơgrữq mơvah chơbuai aràc asơi kung kađòc suà lìt, sì vãq avih dun kơyua kung iỡuq ãt ngãq dlàiq di anãq kaya chahrơna mưng Yàc Pô Lơngĩq,20nữn kơyua, di anãq Yàc Pô Lơngĩq, ôh hũ anàq mơnuĩh rơlo rùp halơi hũ angãn tơpãq rĩng mưng dơgrữq vruãq ngãq tui voh-va; kơyua kaya kơnãl thơu dlàiq dơnũh la gơnang di voh-va.21Nữn tũq nĩ, kaya tơpãq dãng Yàc Pô Lơngĩq song hũ akhàt pa-tơviãq lơniãu voh-va, dơlãp tũq song ngãq chưng kơyua mưng voh-va sì dơgrữq mơnuĩh gơnuar hwơr,22nữn kaya tơpãq dãng Yàc Pô Lơngĩq hũ sì dơgrữq mơnuĩh hũ voh tui dơlãp Yàc Dõc Pơ-tlah Je-su, nữn la pioh ga dơgrữq mơnuĩh pãc-tui, kơyua ôh hũ kaya pa-chơlah halơi.23Kơyua avih tãl aràc song sỗq dlàiq sì kađòc lơhiãq thĩt kaya gơhluh Yàc Pô Lơngĩq hũ,24nữn ôh chàc kaya poh pơyòp halơi tũq hũ angãn la tơpãq dãng kơyua mưng kaya anĩt Pitrai gơnang mưng kaya dơvuh sơlih dơlãp Yàc Dõc Pơ-tlah Je-su,25Pitao nữn Yàc Pô Lơngĩq song ngãq gơnĩt hlơu yơu sa kaya padỡc sơdua dlàiq gơnang di voh tui dơlãp dơrãh Pitao nữn, pioh ngãq chưng tang mưng kaya tơpãq dãng Pitrai hũ, kơyua mưng kaya tlàq luơi dơgrữq dlàiq dơnũh gãm hũ mưng hlơu thrơi,26kơyua mưng hatai ãt ỡl Yàc Pô Lơngĩq hũ ngãq dơgrữq vruãq, nữn la pioh akhàt tơviãq kaya tơpãq dãng Pitrai hũ dơlãp rài nĩ, pioh ga Pitrai la tơpãq dãng sì angãn tơpãq dãng ga mơnuĩh halơi hũ voh tui dơlãp Yàc Je-su.27Yơu nữn, kaya pa-prõc rùp dòq pãq halơi? Nhũ song kađòc pa-trơh luơi. Kơyua mưng gơnãq halơi? Gơnãq mưng vruãq ngãq yơh? Ôh iỡuq! Nữn la kơyua mưng gơnãq voh tui hũ.28Kơyua pơnõq drơi iãq pơwih làiq sa aràc mơnuĩh hũ angãn la tơpãq dãng kơyua mưng voh tui, nữn ôh chàc trôh vruãq ngãq tui voh-va.29Hẽla Yàc Pô Lơngĩq mĩn la Yàc Pô Lơngĩq vual vơla mơnuĩh Ju-đa soh? Ôh iỡuq Pitrai kung la Yàc Pô Lơngĩq vual vơla lơniãu ôh yơh? Viãq, Pitrai kung la Yàc Pô Lơngĩq gãm vual vơla lơniãu wỡq,30kơyua viãq làiq mĩn hũ sa Yàc Pô Lơngĩq, la Pitao ròq hũ angãn tơpãq dãng ga mơnuĩh ãt sìq kalìq kơyua mưng voh tui, sì gãm mơnuĩh ôh ãt sìq kalìq kung gơnang mưng voh tui nữn.31Yơu nữn, iỡuq mĩn pơnõq drơi kơyua mưng voh tui sì tlàq luơi voh-va? Ôh tũq halơi hũ vruãq nữn. Pa-vlữq wỡq, pơnõq drơi ngãq gơjãp kađữc voh-va.
FAR EAST BROADCASTING COMPANY