Matthew6

1Iỡuq iãq mững pioh adơi sơai ôh ngãq vruãq tơpãq dãng drơi pãq anãq anàq mơnuĩh pioh pơnõq nhũ bôh, huaĩq adơi sơai ôh tồq mãq hũ kaya ban ama drơi hũ dòq pãq dlòc lơngĩq.2Yơu nữn, tũq adơi sơai vrơi soh, juơi ayùq gơdèt pãq anãq mơnuĩh yơu dơgrữq mơnuĩh vlữq lor rơđãp ngãq dơlãp sàc pơtõm sì pãq gah jơlàt, pioh hũ mơnuĩh tơmo mơyòp. Pôgrũ đơp viãq sì adơi sơai, pơnõq nhũ song tồq mãq hũ kaya ban nhũ vloh hũ.3Nữn tũq adơi sơai vrơi soh, juơi vrơi tơngãn iãu pơnõq adơi sơai thơu vruãq tơngãn hơnuãq drơi ãn dòq ngãq,4pioh ga kaya vrơi soh adơi sơai hũ dơlãp dơđỡuq, sì Ama adơi sơai hũ, Pitao iãq bôh dơlãp anĩh dơlãp dơđỡuq, ròq vrơi phãn ban ga adơi sơai.
5Tũq adơi sơai iơu lakơu, juơi ngãq yơu mơnuĩh vlữq lor, kơyua pơnõq nhũ sơh dòq dỡc iơu lakơu dơlãp sàc pơtõm sì pãq gah akiãc jơlàt, pioh ga aràc iãq bôh. Iỡuq viãq, pôgrũ đơp sì adơi sơai, pơnõq nhũ hũ tồq mãq kaya ban drơi hũ.6Dòq pơweh sì vơnah adơi sơai, tũq iơu lakơu, iỡuq tơma dơlãp adũq krơi adơi sơai hũ, sì krỡq bãc wỡq nữn iơu lakơu sì Ama pơnõq drơi hũ dòq dơlãp anĩh dơlãp dơđỡuq nữn, sì Ama adơi sơai hũ, Pitao iãq bôh dơlãp anĩh dơlãp dơđỡuq, ròq vrơi ban ga adơi sơai.7Dơlãp tũq adơi sơai iơu lakơu, juơi đơp nao đơp mai dơgrữq pơnuaĩq ôh kuơ, yơu Vual Vơla gah lơniãu, kơyua pơnõq nhũ sơnơng làiq gơnang pơnuaĩq đơp lũ drơi hũ, nữn pơnõq nhũ ròq hũ hmỡq.8Kơyua yơu nữn, adơi sơai ôh drưh yơu pơnõq nhũ, Kơyua Ama adơi sơai thơu kaya adơi sơai ưng angui hlơu sì tũq adơi sơai iơu lakơu sì Pitrai.9Yơu nữn, adơi sơai iỡuq iơu lakơu yơu nĩ:‘Talơvãt Ama pơnõq anàq dòq pãq dlòc lơngĩq,lakơu angãn Pitrai hũ sơđah.10Lakơu lơgar Pitrai iỡuq trôh.Lakơu hatai khiãng Pitrai hũ ngãq dơlãp hlùq kung yơu pãq dlòc lơngĩq.11Lakơu vrơi ga pơnõq anàq harơi nĩ kaya bõc tãl harơi.12Lakơu tơleh dlàiq dơnũh ga pơnõq anàq,yơu pơnõq anàq kung song tơleh dlàiq dơgrữq mơnuĩh sỗq dlàiq sì pơnõq anàq;13Lakơu juơi va pơnõq anàq tơma dơlãp kaya ơniãi,nữn lakơu dõc suãq pơnõq anàq tlah mưng kaya mơsãc.’
14Kơyua mơyah làiq adơi sơai tơleh ga aràc dơgrữq kaya sỗq pơnõq nhũ hũ, nữn Ama pãq dlòc lơngĩq adơi sơai hũ kung ròq tơleh ga adơi sơai.15Nữn mơyah làiq adơi sơai ôh tơleh kaya sỗq pơnõq nhũ hũ, nữn Ama adơi sơai kung ròq ôh tơleh dơgrữq kaya sỗq adơi sơai hũ.
16Tũq adơi sơai ãt bõc, juơi ngãq bòq ka-ồq ka-ãn yơu mơnuĩh vlữq lor rơđãp ngãq, kơyua pơnõq nhũ ngãq karơjuh bòq mơta pioh ga aràc bôh drơi ãn dòq ãt bõc. Iỡuq viãq, pôgrũ đơp sì adơi sơai, pơnõq nhũ song tồq hũ kaya ban drơi hũ vloh.17Dòq pơweh sì vơnah adơi sơai, tũq ãt bõc, iỡuq pavuh mơnhàq pãq dlòc akõq sì paĩq bòq,18pioh ôh vrơi ga mơnuĩh tơmo thơu drơi dòq ãt bõc, nữn mĩn vrơi ga Ama la pitao drơi dòq dơlãp anĩh dơlãp dơđỡuq ròq thơu; sì Ama adơi sơai, Pitao iãq bôh dơlãp anĩh dơlãp dơđỡuq, ròq vrơi kaya ban ga adơi sơai.
19Juơi pioh luơi ga drơi kaya màc pãq hlùq, anĩh hũ anàq halãq moã roh bõc tẽq tơyah, kung la anĩh sì hũ mơnuĩh tơma sì tlẽq sơwah.20Nữn iỡuq pioh luơi ga drơi kaya màc pãq dlòc lơngĩq, la anĩh ôh hũ anàq hlãq hẽla moã roh bõc tơyah, sì la anĩh mơnuĩh tlẽq ôh tũq halơi tlẽq tơma hẽla sơwah mãq.21Kơyua kaya mơnã adơi sơai dòq pãq halơi, nữn hatai adơi sơai kung ròq dòq pãq đỡn.22Mơta la đeng rùp phàp hũ. Kơyua yơu nữn, mơyah làiq mơta adơi sơai la siàp, nữn avih rùp phàp adơi sơai ròq vãq srẽ kaya sơdah.23Nữn mơyah làiq mơta adơi sơai la iãh, nữn avih rùp phàp adơi sơai vãq srẽ kaya sồp kơnãm. Yơu nữn, mơyah làiq kaya sơdah dơlãp adơi sơai mĩn la kaya sồp kơnãm, nữn kaya sồp kơnãm prõc ôh thơu hadùp.24Ôh asơi pơlih hũ duh vruãq dua aràc pô, kơyua mơnuĩh nữn hẽla ròq mơvai pô nĩ sì anĩt pô dih, hẽla ròq ki ngãm sì pô nĩ sì iãq ôh srãp pô dih. Adơi sơai ôh tũq halơi duh vruãq Yàc Pô Lơngĩq sigỡuq sì kaya mơnã jỡc.25Kơyua mưng kaya nĩ, pôgrũ đơp sì adơi sơai làiq, Juơi rơchãc sơnơng mưng kaya hadiuq adơi sơai hũ, mưng kaya hagĩq drơi bõc hẽla kaya hagĩq drơi ròq mơnhũm, hẽla pơweh sì rùp phàp drơi, mưng drơi ròq chồq gĩq. Ôh iỡuq kaya hadiuq rlao kaya bõc yơh, sì rùp phàp rlao kaya chồq yơh?26Iỡuq iãq vẽq chĩp por pãq dlòc lơngĩq. Pơnõq nhũ ôh dràq hẽla plà, kung ôh yuãq tơma adũq pioh, nữn Ama pãq dlòc lơngĩq adơi sơai hũ ròc pơnõq nhũ. Adơi sơai ôh iỡuq kuơ màc rlao pơnõq nhũ yơh?27Vơnãh tơmo, hũ mơnuĩh halơi pãq khrãh adơi sơai sơnơng rơchãc nữn pơlih ngãq ga rài hadiuq drơi pơtãl sa asit tơra lơĩh?28Hayơu adơi sơai sơnơng rơchãc mưng ao charơpha? Iỡuq sơnơng pơweh trôh dơgrữq vơngà phũng lơniãu blàc, iãq pơnõq nhũ tơmuh tơgùq yơu halơi. Pơnõq nhũ ôh ngãq vruãq, sì kung ôh katũc mơrai.29Nữn pôgrũ đơp sì adơi sơai thơu, mĩn pitao Sa-lô-môn sigỡuq sì avih dơgrữq kaya mơ-àc mơyàc ung hũ, kung ôh chồq ao yơu sa vơngà halơi dơlãp pơjẽh nữn.30Dơgrữq mơnuĩh sì tơkìq voh-tui dih, mơyah làiq Yàc Pô Lơngĩq pa-chồq ga rỡq lơniãu blàc, la kaya harơi nĩ dòq, pơgi kađòc prah tơma agòq apôi yơu nữn, nữn Pitrai vloh ôh pa-chồq ga adơi sơai kaya siàp rlao yơh?31Kơyua yơu nữn, adơi sơai juơi sơnơng rơchãc sì đơp làiq: ‘Pơnõq drơi ròq bõc gĩq?’ ‘Pơnõq drơi ròq mơnhũm gĩq nĩ?’ hẽla ‘Pơnõq drơi ròq chồq gĩq nĩ?’32Kơyua vual vơla lơniãu gãm duah dơgrữq kaya nĩ; nữn kơyua Ama pãq dlòc lơngĩq adơi sơai hũ thơu adơi sơai iỡuq chàc hũ avih dơgrữq kaya nữn.33Nữn hlơu avih iỡuq duah lơgar Pitrai sì kaya tơpãq dãng Pitrai hũ nữn avih dơgrữq kaya nữn ròq hũ vrơi ga adơi sơai.34Kơyua yơu nữn, adơi sơai juơi sơnơng rơchãc mưng harơi pơgi, kơyua harơi pơgi ròq rơchãc ga harơi pơgi. Kaya dleh dlàr harơi hlơi tãl harơi nữn vloh.

FAR EAST BROADCASTING COMPANY

https://app.library.bible/content/d703d3283f8af40e