Matthew24
1Hadơi nữn Yàc Je-su mưng dơlãp sàc duh talơvãt tơviãq sì ãn tũq nao jơlàt. Vloh dơgrữq mơnuĩh mơgrũ Pitrai trôh jẽq pơto ga Pitrai iãq dơgrữq vruãq ngãq sàc duh talơvãt hũ.2Nữn Pitrai đơp sì pơnõq nhũ: “Adơi sơai ôh iãq bôh avih dơgrữq kaya nữn yơh? Iỡuq viãq, Pôgrũ đơp sì adơi sơai, ngãq gơnĩt anĩh nĩ ròq ôh hũ sa voh patơu halơi dãq pãq dlòc voh patơu tơmo nữn ôh kađòc jơlưh trỗt.”3Tũq nữn, Pitrai ãn dòq guh pãq chỡq Ô-li-ve, dơgrữq mơnuĩh mơgrũ trôh pãp krơi Pitrai, sì drơ: “Lakơu vrơi ga pơnõq hlãq thơu tũq halơi dơgrữq vruãq nữn ròq tơviãq jỡc, sì nỡm krơi ròq trôh pôgrũ hũ sì kaya luôĩq hadơi ròq la yơu hayơu?”4Yàc Je-su hẽ sì pơnõq nhũ: “Gơrhia vẽq pioh ôh asơi pơlih pa-gơla sì dui va adơi sơai nao sỗq suẽl.5Kơyua lũ mơnuĩh ròq mãq angãn pôgrũ sì trôh. Pơnõq nhũ ròq angãn: ‘Kơu la Yàc Dõc Pơ-tlah,’ sì ròq dui va lũ mơnuĩh nao sỗq suẽl.6Vơnah tơmo, adơi sơai ròq hmỡq đơp mưng kalìt atòc sì pơnuaĩq akhàt wỡq mưng kalìt mơsôh mơtãq, adơi sơai iỡuq rơmiãq jàc vẽq, juơi sơnơng huaĩq, mưng dơgrữq vruãq nữn iỡuq ròq trôh, nữn vloh ôh iỡuq la luôĩq hadơi.7Kơyua vual vơla nĩ ròq tơgùq jơdrãq sì vual vơla dih, lơgar nĩ ròq tơgùq jơdrãq sì lơgar dih, ròq hũ kaya ờq lơ-pa sì sađồq tơnãh pãq lũ anĩh.8Nữn avih dơgrữq vruãq nữn mĩn la pơdòq chơmrờp mưng dơgrữq kaya pơđìq pơđua dleh dlàr.9Tũq nữn anàq mơnuĩh ròq pơjao adơi sơai dơlãp kaya rũc rài sì pa-mơtai adơi sơai, sì adơi sơai ròq kađòc dơgrữq vual vơla mơvai lơmùq kơyua mưng angãn pôgrũ.10Vloh lũ mơnuĩh ròq sơnẽq sỗq, jơdrãq sì gỡuq, sì lơmùq mơvai gỡuq.11Lũ mơnuĩh gơnuar hwơr vlữq lor ròq tơgùq dỡc sì dui va lũ mơnuĩh nao sỗq suẽl.12Kơyua kaya dlàiq mơsãc ròq pơtãl lũ wỡq tơra, hatai khiãng anĩt dơgrữq mơnuĩh ròq lơ-ãt mơrìt.13Nữn asơi gơjãp hatai tãl trôh luôĩq hadơi, nữn mơnuĩh nữn ròq hũ dõc pơ-tlah.14Pơnuaĩq siàp nĩ mưng lơgar lơngĩq ròq hũ pơto akhàt vãq avih dun kơyua pioh ngãq chưng ga avih vual vơla sì. Vloh kaya luôĩq hadơi kung ròq trôh.15Kơyua yơu nữn, tũq adơi sơai iãq bôh kaya mơvai lơmùq sì kaya gơprah gơprĩc, la kaya song hũ mơnuĩh gơnuar hwơr Đa-ni-el song đơp, dòq dỡc dơlãp anĩh sơchih,” (asơi pơpoh nữn thơu pãc vẽq),16“nữn asơi dòq dơlãp phũm Ju-đe đuaĩq dỡuq vẽq pãq dlòc chỡq,17asơi dòq pãq pơvũc sàc nữn juơi trỗt mãq kaya mơnã dòq dơlãp sàc drơi,18sì asơi dòq pãq blàc hama nữn juơi mai wỡq sàc mãq ao lơniãu drơi.19Nữn dơlãp dơgrữq harơi nữn, dleh dlàr viãq ga kamơi tũc mơtiàt sì kamơi dòq vrơi ga anàq mõm!20Iỡuq iơu lakơu pioh ga kaya đuaĩq dỡuq dì adơi sơai hũ ôh iỡuq dơlãp vlàt mơrìt, hẽla dơlãp harơi Sa-bat.21Kơyua tũq nữn ròq hũ kaya dleh dlàr prong, ka ôh tũq halơi yơu nĩ mưng tũq chrơng pajỡc lơngĩq tơnãh tãl trôh tũq nĩ, sì viãq hadơi nĩ ròq ôh tũq halơi hũ wỡq tơra.22Mơyah làiq dơgrữq harơi nữn ôh hũ palơh katũt, nữn ôh hũ sa aràc mơnuĩh halơi hũ dõc pơ-tlah. Nữn kơyua mưng dơgrữq mơnuĩh hũ ruah, nữn dơgrữq harơi nữn ròq hũ palơh.23Tũq nữn, mơyah làiq hũ asơi đơp sì adơi sơai: ‘Iỡuq iãq vẽq, nĩ la Yàc Dõc Pơ-tlah!’ hẽla ‘Pitrai dòq pãq dih!’ nữn adơi sơai juơi pãc.24Kơyua dơgrữq yàc dõc vlữq lor sigỡuq sì dơgrữq mơnuĩh gơnuar hwơr vlữq lor ròq trôh sì ràc tơviãq dơgrữq nỡm sì krung krơi prõc tơviãq jỡc ngãq ga sỗq suẽl, mơyah làiq pơlih, nữn kung pa-gơla dơgrữq mơnuĩh hũ duỡt ruah.25Nĩ, pôgrũ song akhàt hlơu ga adơi sơai vloh.26Yơu nữn, mơyah làiq aràc đơp sì adơi sơai: ‘Dih, Pitrai ãn dòq pãq blàc choah,’ nữn juơi nao trôh pãq đỡn. Hẽla ‘Iãq nĩ, anĩh dơgrữq adũq dơlãp sàc,’ nữn adơi sơai juơi pãc.27Kơyua yơu gơlia liãq tơviãq mưng gah ia harơi tơgùq vloh chràq trôh pãq gah ia harơi tơmã yơu hayơu, nữn kaya ròq trôh wỡq Anàq Mơnuĩh kung yơu nữn mĩn.28Anĩh halơi hũ rùp atơu mơtai, anĩh nữn hũ dơgrữq chĩp klàc pơtõm pãq nữn.29Nữn mư hadơi sì kaya rũc rài dơlãp dơgrữq harơi nữn, ia harơi ròq sồp kơnãm, ia vlàt ròq ôh gơchràq sơđah nhũ hũ, dơgrữq pitỗq ròq mưng dlòc lơngĩq lẽq trỗt, sì dơgrữq gơnuar tãl dlòc lơngĩq ròq sơđô mơgơi.30Tũq nữn, nỡm krơi mưng Anàq Mơnuĩh ròq pa-tơviãq pãq dlòc lơngĩq, sì dơgrữq pơjẽh pơtiàt pãq hlùq ròq sia chõq. Pơnõq nhũ ròq bôh Anàq Mơnuĩh trôh pãq dlòc dơgrữq sa-pỗc huãl pãq dlòc lơngĩq mưng gơnuar chơnuãq sì kaya gơhluh prong.31Pitrai ròq pơđar mơnuĩh gơnrơh Pitrai angui sãp gơdèt prõc, sì pơnõq nhũ ròq pơjũm pơtõm wỡq dơgrữq mơnuĩh song hũ duỡt ruah mưng avih pàq gah akiãc, mưng luôĩq lơngĩq nĩ tãl trôh luôĩq lơngĩq dih.32Vơnah tơmo, iỡuq mơgrũ thơu pơnuaĩq pa-mơyơu nĩ mưng kayơu vãl. Dơlãp tũq thàt kayơu nữn tơviãq jỡc lơmuỡn sì tơviãq halàq nữn adơi sơai thơu làiq vlàt tluỡiq jẽq trôh.33Kung yơu nữn, tũq adơi sơai bôh dơgrữq kaya nữn, adơi sơai iỡuq thơu làiq Pitrai ãn dòq jẽq, pãq anãq bãc.34Pôgrũ Iỡuq viãq đơp sì adơi sơai, pơjẽh pơtiàt nĩ gơnĩt viãq ròq ôh nao gãt tãl trôh tũq avih dơgrữq kaya nữn tơviãq trôh.35Lơngĩq sì tơnãh ròq nao gãt tơpa, nữn pơnuaĩq pôgrũ đơp ròq ôh tũq halơi nao gãt tơpa.36Nữn mưng harơi sì tũq nữn ôh asơi thơu, siỡuq sì dơgrữq mơnuĩh gơnrơh pãq dlòc lơngĩq hẽla Anàq kung ôh thơu, mĩn Ama thơu.37Yơu dơlãp rài Nô-e yơu halơi, nữn kaya trôh Anàq Mơnuĩh hũ kung ròq yơu nữn.38Kơyua yơu dơlãp dơgrữq harơi hlơu ia blũc kua, anàq mơnuĩh bõc mơnhũm, pa-khiãng kamơi lakơi tãl trôh harơi Nô-e tơmã dơlãp ahòq,39sì pơnõq nhũ ôh thơu kaya hagĩq tãl trôh tũq ia blũc mai trôh sỡq avih pơnõq nhũ — nữn kaya trôh Anàq Mơnuĩh hũ kung ròq yơu nữn.40Tũq nữn, hũ dua aràc mơnuĩh lakơi dòq pãq blàc hama — sa aràc hũ va nao, dòq sa aràc tơra ròq kađòc tlàq luơi.41Hũ dua aràc mơnuĩh kamơi sòq lơsũc — sa aràc mơnuĩh ròq hũ va nao, dòq sa aràc tơra ròq kađòc luơi.42Kơyua yơu nữn, iỡuq mơ-uãh chơkhãq kơyua adơi sơai ôh thơu tũq jơ halơi Yàc drơi ròq trôh.43Nữn iỡuq thơu kaya nĩ, nữn la mơyah làiq pô sàc thơu hlơu tũq jơ halơi mơnuĩh tlẽq trôh, nữn mơnuĩh pô ròq mơ-uãh chơkhãq sì ôh luơi sàc drơi kađòc mơnuĩh tơma tlẽq.44Kơyua yơu nữn, adơi sơai kung iỡuq rơchãc lơĩh, kơyua Anàq Mơnuĩh ròq trôh dơlãp tũq jơ adơi sơai ôh thơu.45Asơi la mơnuĩh halỗt mơnãq jãc rgơi sì ngãq tơpãq dãng, hũ pô pơjao gơnuar apãt akõq sàc mơnuĩh pô pioh vrơi kaya bõc ga avih dơgrữq aràc iỡuq tũq jơ?46Lơngai ga mơnuĩh halỗt mơnãq nữn tũq pô trôh bôh dòq ngãq yơu nữn.47Iỡuq viãq Pôgrũ đơp sì adơi sơai, pô ròq vrơi mơnuĩh nữn iãq jàc avih dơgrữq kaya mơnã pô hũ.48Nữn mơyah làiq mơnuĩh halỗt mơnãq iãh mơsãc nữn sơnơng dơlãp hatai làiq: ‘Pô kơu ròq suơi mai,’49vloh nữn poh atòc dơgrữq mơnuĩh ngãq vruãq sigỡuq sì nhũ, sì bõc mơnhũm sì dơgrữq mơnuĩh mơvũq mơvẽl,50nữn pô mơnuĩh halỗt mơnãq nữn hũ ròq trôh dơlãp harơi sì nhũ ôh chàc chơkhãq sì dơlãp tũq jơ nữn nhũ ôh thơu.51Mơnuĩh pô ròq poh sì ngãq dlàiq tơrãq ga nhũ viãq sì pa-tơmã nhũ sigỡuq sì tơpuôl mơnuĩh vlữq lor, pãq anĩh nữn ròq hũ kaya sia chõq sì kẽq tagơi.
FAR EAST BROADCASTING COMPANY