Matthew22
1Yàc Je-su đơp wỡq sì angui pơnuaĩq pa-mơyơu đơp sì pơnõq nhũ, làiq:2“Lơgar lơngĩq drưh yơu sa aràc mơnuĩh pitao dih rơchãc ngãq kaya bõc pơhuãq ga anàq lakơi nhũ.3Pitao pơđar dơgrữq mơnuĩh halỗt mơnãq nao iơu jàq dơgrữq mơnuĩh song hũ jàq mai bõc mơnhũm kaya bõc pơhuãq, nữn pơnõq nhũ ôh ưng mai.4Pitao pơđar wỡq dơgrữq mơnuĩh halỗt mơnãq tơmo, làiq: ‘Iỡuq đơp sì dơgrữq mơnuĩh song hũ jàq: “Iãq nĩ, kơu pồq kaya bõc vloh. Lơmo prong sì lơmo anàq lơmãq ngãq wil tãl vloh, sì avih dơgrữq kaya song rơchãc avih vloh. Trôh vẽq sì bõc mơnhũm kaya pơhuãq.”’5Nữn pơnõq nhũ iãq ôh srãp sì prah luơi, hũ mơnuĩh nĩ nao pãq hama, mơnuĩh dih nao duah ngãq bõc kãq pa-vlơi drơi hũ.6Dơgrữq mơnuĩh tơmo nữn mãq dơgrữq mơnuĩh halỗt mơnãq Pitao, ngãq siẽq siẽl pơnõq nhũ, vloh pa-mơtai.7Pitao nong, nữn jỡc pơđar tơpuôl lĩng nao, pa-mơtai mơnuĩh pa-mơtai mơnuĩh nữn sì chôh palơi pơnõq nhũ hũ.8Vloh nữn, pitao đơp sì dơgrữq mơnuĩh halỗt mơnãq drơi hũ: ‘Kaya mơnhũm bõc pơhuãq ngãq song vloh, nữn dơgrữq mơnuĩh hũ jàq nữn ôh asơi la đang mang.9Yơu nữn, iỡuq tơviãq nao avih dơgrữq jơlàt prõc, sì mơyah làiq pãp asơi nữn, iỡuq jàq mai avih mơnhũm bõc pơhuãq.’10Sì dơgrữq mơnuĩh halỗt mơnãq nữn, tơviãq nao dơgrữq jơlàt prõc, sì pơtõm avih dơgrữq mơnuĩh nữn pơnõq nhũ pãp, mơnuĩh iãh sigỡuq sì mơnuĩh siàp, yơu nữn la dơlãp anĩh bõc pơhuãq vãq dơgrữq mơnuĩh thuãi.11Nữn tũq pitao tơma pioh iãq dơgrữq mơnuĩh thuãi hũ jàq bõc pơhuãq, pitao bôh sa aràc mơnuĩh dih ôh chồq ao kaya bõc adãt pơhuãq.12Pitao tơnĩa mơnuĩh nữn: ‘Ơ sơai, ngãq hayơu sơai tơma pãq đĩ vloh ôh chồq ao kaya bõc pơhuãq yơh?’ Nữn mơnuĩh nữn ôh đơp hagĩq.13Nữn la pitao pơđar dơgrữq mơnuĩh halỗt mơnãq: ‘Iỡuq chãq tơngãn tơkai mơnuĩh nĩ vloh prah nhũ tơma anĩh sồp kơnãm lơniãu dih, anĩh ròq hũ sia chõq sì kẽq tagơi.’14Kơyua lũ mơnuĩh hũ iơu, nữn tơkìq mơnuĩh hũ duỡt ruãh.”15Tũq nữn, dơgrữq mơnuĩh Pha-ri-si prah nao sì vơyai sigỡuq duah pơnẽq halơi pioh pơlih hũ vơnrẽq mãq Yàc Je-su dơlãp pơnuaĩq đơp Pitrai.16Pơnõq nhũ pơđar dơgrữq mơnuĩh mơgrũ nhũ, sigỡuq sì dơgrữq mơnuĩh pơweh sì gah He-rôt, trôh pãp Pitrai, tơpuôl nĩ đơp: “Ơ pôgrũ, pơnõq hlãq thơu làiq pôgrũ la mơnuĩh viãq tơpãq sì pôgrũ pơto pơđar jơlàt bàq Yàc Pô Lơngĩq hũ mưng pơnuaĩq tơpãq viãq, Pôgrũ ôh luơi ga pơnuaĩq đơp asơi đơp trôh drơi, kơyua pôgrũ ôh iãq tui gah lơniãu anàq mơnuĩh hũ.17Kơyua yơu nữn, lakơu vrơi ga pơnõq hlãq thơu pôgrũ sơnơng yơu hayơu? Hũ iỡuq sơkãq jia ga Se-sa hẽla ôh?”18Nữn Yàc Je-su thơu hatai iãh mơsãc pơnõq nhũ, nữn Pitrai đơp: “Ơ dơgrữq mơnuĩh vlữq lor, kơyua hayơu pơnõq hã lòc kơu yơh?19Iỡuq vrơi ga kơu iãq jĩn sơkãq jia.” Pơnõq nhũ va vrơi ga Pitrai sa đơ-ni-e.20Yàc Je-su tơnĩa pơnõq nhũ: “Rùp sì angãn nĩ la kaya asơi?”21Pơnõq nhũ drơ: “La Se-sa.” Nữn la Yàc Je-su đơp sì pơnõq nhũ: “Yơu nữn, iỡuq vơyar ga Se-sa dơgrữq kaya hagĩq Se-sa hũ, sì vơyar ga Yàc Pô Lơngĩq dơgrữq kaya hagĩq Yàc Pô Lơngĩq hũ.”22Tũq hmỡq yơu nữn, pơnõq nhũ mãq ngãq krơi viãq. Vloh pơnõq nhũ tlàq luơi Pitrai sì tơviãq nao.23Dơlãp harơi nữn, hũ dơgrữq mơnuĩh Sa-đu-se, rơđãp đơp làiq ôh hũ kaya hadiuq wỡq, trôh pãp Pitrai. Nữn pơnõq nhũ tơnĩa Yàc Je-su,24Làiq: “Ơ pôgrũ, Môi-se pơto làiq: ‘Mơyah làiq sa aràc mơnuĩh lakơi mơtai sì ôh hũ anàq, nữn adơi lakơi mơnuĩh nữn iỡuq khiãng sơdiuq sơai tũq hũ pioh pajỡc anàq ga sơai drơi hũ.’25Nữn pãq khrãh pơnõq hlãq hũ tơjuh aràc adơi sơai. Mơnuĩh sơai kơchoa khiãng kamơi vloh mơtai nữn ôh hũ anàq, nữn luơi sơdiuq nhũ wỡq ga adơi lakơi nhũ.26Mơnuĩh bãc dua kung yơu nữn, vloh trôh mơnuĩh bãc tlơu, tãl trôh mơnuĩh bãc tơjuh.27Luôĩq hadơi, mơnuĩh kamơi nữn kung mơtai.28Yơu nữn, tũq hadiuq wỡq, kamơi nữn ròq la ngãq sơdiuq asơi dơlãp tơjuh aràc adơi sơai nữn? Kơyua avih tãl aràc song khiãng nhũ ngãq sơdiuq.”29Yàc Je-su hẽ wỡq sì pơnõq nhũ, làiq: “Pơnõq ung sỗq vloh, kơyua pơnõq ung ôh thơu Sơrãq Sơđah, kung ôh thơu pãc gơnuar chơnuãq Yàc Pô Lơngĩq hũ.30Kơyua mưng tũq dòq hadiuq wỡq, anàq mơnuĩh ôh khiãng kamơi lakơi hagĩq wỡq tơra. Yơu nữn pơnõq nhũ ròq drưh yơu mơnuĩh gơnrơh dòq pãq dlòc lơngĩq.31Mưng kaya hadiuq wỡq mơnuĩh mơtai hũ, pơnõq ung ka-ôh pơpoh pơnuaĩq Yàc Pô Lơngĩq hũ đơp sì drơi làiq:32‘Kơu la Yàc Pô Lơngĩq A-bra-ham, Yàc Pô Lơngĩq Y-sac, sì Yàc Pô Lơngĩq Ja-kôp yơh?’ Yàc Pô Lơngĩq ôh iỡuq la Yàc mơnuĩh mơtai hũ, nữn la Yàc mơnuĩh hadiuq hũ.”33Vual vơla hmỡq yơu nữn, sì mãq ngãq krơi mưng pơnuaĩq pơto Pitrai hũ.34Nữn dơgrữq mơnuĩh Pha-ri-si, hadơi sì hmỡq làiq Yàc Je-su song ngãq ga dơgrữq mơnuĩh Sa-đu-se gãl đơp ôh jỡc, nữn pơnõq nhũ pơtõm gỡuq wỡq.35Hũ sa aràc dơlãp tơpuôl nhũ, la mơnuĩh gơnuar pơto voh-va, ròq tơnĩa Pitrai sa pơnuaĩq, pioh lòc Pitrai —36“Ơ pôgrũ, kaya pơđar-va halơi la prong rlao avih dơlãp kaya voh-va?”37Yàc Je-su hẽ sì hã: “‘Iỡuq khiãng duman Yàc, la Yàc Pô Lơngĩq anàq hũ, mưng avih tũc hatai, avih vơngãq yuà sì avih dlò jãc drơi hũ.’38Nữn la kaya pơđar-va chơmrờp viãq sì prong rlao avih.39Dòq kaya pơđar-va bãc dua kung drưh yơu nữn — ‘Hã iỡuq khiãng duman mơnuĩh gỡuq jẽq phia drơi yơu rùp phuỗt drơi.’40Avih dơgrữq voh-va sì dơgrữq mơnuĩh gơnuar hwơr song gơnang mưng dua kaya pơđar-va nĩ.”41Tũq nữn, dơlãp tũq dơgrữq mơnuĩh Pha-ri-si gãm dòq vơyai gỡuq, nữn Yàc Je-su tơnĩa pơnõq nhũ sa pơnuaĩq.42Pitrai tơnĩa: “Pơnõq ung sơnơng yơu halơi mưng Yàc Dõc Pơ-tlah? Pitrai la anàq asơi?” Pơnõq nhũ drơ sì Pitrai làiq: “Anàq pitao Da-vĩt.”43Yàc Je-su đơp wỡq sì pơnõq nhũ: “Yơu nữn hagĩq Da-vĩt hũ Yàc Vơngãq pasũl sì angãn Pitrai la Yàc, tũq đơp làiq:44‘Yàc đơp sì Yàc hlãq:“Dòq guh vẽq gah hơnuãq Kơu,tãl trôh tũq Kơu chẽq dơgrữq mơnuĩh jơdrãq anàq hũ pãq ala plàq tơkai anàq”’?45Yơu nữn mơyah làiq Da-vĩt angãn Yàc Dõc Pơ-tlah la ‘Yàc,’ nữn hayơu Pitrai vloh la anàq pitao Da-vĩt jỡc?”46Ôh asơi drơ wỡq sì Pitrai jỡc sa pơnuaĩq halơi, sì mưng harơi nữn, ôh asơi khĩn tơnĩa Pitrai wỡq tơra.
FAR EAST BROADCASTING COMPANY