Mark4
1Sa bãc tơra, Pitrai pơdòq kaya pơto akhàt pãq anĩh gah tơsìq, Hũ sa tơpuôl vual vơla lũ viãq pơtõm tòp dar Pitrai. Kơyua yơu nữn, Pitrai ròq yàp tơma ahòq dòq dơlãp tơsìq nữn dòq guh pãq đỡn, gãm avih tơpuôl vual vơla nữn dòq pãq anĩh gah tơsìq.2Pitrai pơto pơđar pơnõq nhũ lũ kaya mưng pơnuaĩq pa-mơyơu, sì dơlãp kaya pơto pơđar, Pitrai đơp sì pơnõq nhũ:3“Hmỡq vẽq nĩ! Dĩh, hũ sa aràc mơnuĩh ngãq hama tơviãq nao dràq pơjẽh.4Dơlãp tũq nhũ dràq, hũ gar pơjẽh hõq pãq gah jơlàt, sì chĩp trôh chõh bõc avih.5Dơgrữq gar tơmo nữn hõq pãq dlòc patơu rơđeh, anĩh ôh hũ lũ hlùq siàp, nữn gar tơmuh tơgùq mư, kơyua akhà ôh chõc tơma dơlãp hlùq.6Nữn tũq ia harơi tơgùq, kayơu rỡq ãt khiãq kreo, sì kơyua mưng nhũ ôh hũ akhà nữn jỡc thô kreo.7Gar pơjẽh tơmo hõq tơma dơlãp khrãh dơgrữq bôr druơi, kayơu druơi tơmuh tơgùq ngãq ga nhũ gãl, nữn nhũ ôh hũ voh chơtai.8Gar tơmo wỡq hõq pãq dlòc hlùq siàp, nữn tơviãq voh chơtai, tũq prong tơgùq sì pơtãl rlao, hũ bluãq pơtãl rlao tơra sì tơviãq tlơu plôh tơviãq wỡq, nãm plôh, hẽla tãl sa rơtôh bãc rlao.”9Vloh Pitrai đơp: “Mơnuĩh halơi hũ tanĩa pioh hmỡq, nữn hmỡq vẽq!”10Tũq Yàc Je-su dòq krơi sa aràc, dơgrữq mơnuĩh dòq jẽq phia Pitrai sigỡuq sì sa plôh dua aràc mơnuĩh gơnuar pơđar tơnĩa Pitrai mưng dơgrữq pơnuaĩq pa-mơyơu nữn.11Pitrai đơp sì pơnõq nhũ: “Kaya dơlãp dơđỡuq mưng lơgar Yàc Pô Lơngĩq song vrơi ga adơi sơai, nữn gam sì mơnuĩh gah lơniãu, dơgrữq kaya la angui mưng pơnuaĩq pa-mơyơu,12pioh tũq pơnõq nhũ iãq, nữn kung pơlih iãq mĩn, sì ôh bôh jỡc,tũq pơnõq nhũ pa-hmỡq, hũ hmỡq mĩn, nữn ôh pãc jỡc,huaĩq pơnõq nhũ gơlàiq mai wỡq sì hũ tơleh dlàiq.”13Nữn Pitrai tơnĩa pơnõq nhũ: “Adơi sơai ôh thơu pãc pơnuaĩq pa-mơyơu nữn yơh? Yơu nữn, ngãq yơu hayơu adơi sơai thơu pãc jỡc avih dơgrữq pơnuaĩq pa-mơyơu?14Mơnuĩh dràq pơjẽh nữn la dràq pơnuaĩq Yàc.15Dòq nĩ la dơgrữq mơnuĩh pãq gah jơlàt anĩh pơnuaĩq Yàc hũ dràq tơviãq, nữn tũq pơnõq nhũ hmỡq pơnuaĩq Yàc, tũq nữn mư kamlai Satan nao trôh sơwah mãq pơnuaĩq Yàc song hũ dràq dơlãp hatai pơnõq nhũ.16Kung yơu nữn, nĩ la dơgrữq mơnuĩh hũ tồq mãq gar pơjẽh dràq pãq anĩh patơu rơđeh, la dơgrữq mơnuĩh tũq hmỡq pơnuaĩq Yàc nữn tồq mãq pơnuaĩq Yàc mưng hatai uỗt sơh,17nữn pơnuaĩq Yàc ôh hũ akhà dơlãp hatai pơnõq nhũ, mĩn dòq padơh sa asĩt soh. Vloh tũq pãp kaya rũc rài hẽla mãq pakỡuq kơyua mưng pơnuaĩq Yàc, nữn pơnõq nhũ sơnẽq sỗq mư.18Dơgrữq mơnuĩh tơmo tồq mãq gar pơjẽh hũ dràq pãq khrãh bôr druơi. Nĩ pơnõq nhũ la mơnuĩh hmỡq pơnuaĩq Yàc,19nữn dơgrữq kaya sơnơng rơchãc mưng rài nĩ, kaya pa-gơla mưng kaya mơda gơnãp, hũ sigỡuq sì hatai ham ưng dơgrữq kaya tơmo pa-tơma, ngãq gar pơnuaĩq Yàc sì ôh tơviãq jỡc voh chơtai.20Nữn nĩ la dơgrữq mơnuĩh tồq gar pơjẽh hũ dràq pãq hlùq siàp, la mơnuĩh hmỡq pơnuaĩq Yàc sì tồq mãq pơnuaĩq Yàc, vloh tơviãq vơngà chơtai, voh — gar tơviãq tlơu plôh, gar tơviãq nãm plôh, sì tơviãq sa rơtôh.”21Yàc Je-su kung đơp sì pơnõq nhũ: “Tuỗiq đeng ôh iỡuq chẽq pãq ala thũng hẽla chẽq pãq ala chơnang yơh? Ôh iỡuq va apôi đeng chẽq nhũ pãq dlòc tơkai đeng ôh yơh?22Kơyua ôh hũ kaya hagĩq kađòc padỡuq dơđỡuq mơyah làiq ôh iỡuq la luơi hũ akhàt tơviãq, kung ôh hũ vruãq halơi ngãq tơviãq sa vĩq dơđỡuq mơyah làiq ôh iỡuq la luơi ràc pa-tơviãq kaya sơdah.23Mơyah làiq asơi hũ tanĩa pa-hmỡq, iỡuq hmỡq vẽq!”24Vloh Pitrai đơp sì pơnõq nhũ: “Iỡuq gơrhia vẽq dơgrữq pơnuaĩq adơi sơai hmỡq. Adơi sơai sơkãq dũq kor halơi, nữn ròq tồq mãq kor nữn wỡq ga adơi sơai ròq vrơi pơtãl wỡq.25Kơyua mưng mơnuĩh halơi hũ mơnuĩh nữn ròq hũ vrơi pơtãl wỡq, dòq mơnuĩh nữn ôh hũ nữn kaya mơnuĩh nữn hũ kung ròq ãt suãq wỡq kaya nhũ ròq hũ.”26Pitrai kung đơp: “Lơgar Yàc Pô Lơngĩq kung yơu sa aràc mơnuĩh dih dràq pơjẽh trỗt ala hlùq.27Nhũ pìq hẽla dòq mơdưh, tũq mơlãp hẽla tũq harơi, gar pơjẽh tơmeh tơ-o sì prong tơgùq yơu halơi — bôh làiq mơnuĩh nữn kung ôh thơu yơu hayơu.28Mưng hlùq nữn pajỡc voh chơtai: Halơu viãq la hlàq, hadơi nữn la vơngà, sì vơngà tơviãq jỡc asar.29Vloh tũq vlàt vơdai tơsãq, nhũ pagor sơgãm bẽq wãc pioh tãl vlàt yuãq song trôh.”30Pitrai đơp wỡq: “Pơnõq drơi pơlih mãq pơnuaĩq pa-mơyơu sì lơgar Yàc Pô Lơngĩq yơu halơi, hẽla pơnõq drơi pơlih hũ ràc pơnuaĩq gơtha lơgar nữn mưng pơnuaĩq pa-mơyơu?31Drưh yơu sa asar savơi tũq hũ dràq tơma hlùq, nhũ tìt rlao avih dơlãp dơgrữq asar pơjẽh tơmo pãq hlùq nĩ.32Nữn tũq song hũ dràq nữn nhũ tơmuh tơgùq sì tơviãq jỡc prõc prong rlao avih dơgrữq kayơu dơlãp vỡn, nhũ tơmuh tơviãq dơgrữq thàt prong, tơviãq jỡc chĩp lơngĩq pơlih ngãq srỗh dòq pãq hlôi thàt nữn.”33Yơu nữn, sigỡuq sì lũ pơnuaĩq pa-mơyơu savĩq yơu nữn Pitrai pơto pơnuaĩq siàp ga pơnõq nhũ, tui kaya jãc rgơi pơnõq nhũ pơlih pa-hmỡq jỡc,34Pitrai ôh pơto hagĩq ga pơnõq nhũ sì angui pơnuaĩq pa-mơyơu, bôh làiq dơlãp tũq Pitrai dòq krơi, Pitrai ràc pơnuaĩq gơtha avih dơgrữq kaya ga mơnuĩh mơgrũ.35Dơlãp harơi nữn, tũq jơ sồp tlãp trôh, Pitrai đơp sì pơnõq nhũ: “Pơnõq drơi iỡuq nao gãt vẽq gah dih.”36Yơu nũn, pơnõq nhũ tlàq luơi chơlah vual vơla, va Yàc Je-su nao sigỡuq sì drơi, kơyua Pitrai song dòq dơlãp ahòq. Kung hũ dơgrữq ahòq tơmo nao tui Pitrai.37Tũq nữn, hũ sa yua rơvùq prong khãc rơyàq sỡm nãi ia tơgùq tơma ahòq jẽq sì vãq ia.38Nữn Yàc Je-su dòq pãq hadơi ahòq, guãl akõq sì pìq. Nữn mơnuĩh mơgrũ pa-mơdưh Pitrai tơgùq sì đơp làiq: “Ơ Pôgrũ, pô ôh mơ-ôh ga pơnõq drơi jẽq sì mơtai ôh yơh?”39Hadơi nữn Pitrai phuah tơgùq, gơloh angĩn nữn đơp sì ia tơsìq, làiq: “Iỡuq kađỡc vẽq! Dòq suà lìt vẽq!” Yơu nữn angĩn kađỡc mư, sì hũ dòq kađỡc rĩc.40Vloh Pitrai tơnĩa mơnuĩh mơgrũ: “Hayơu adơi sơai huaĩq? Adơi sơai ka-ôh hũ voh-tui yơh?”41Dơgrữq mơnuĩh mơgrũ tơtơh huaĩq viãq, nữn pơnõq nhũ đơp sì gỡuq: “Mơnuĩh nĩ la asơi, nữn angĩn sì ia tơsìq kung pãc sãp nhũ?”
FAR EAST BROADCASTING COMPANY