Mark12
1Tũq nữn, Yàc Je-su pơdòq đơp sì pơnõq nhũ mưng pơnuaĩq pa-mơyơu: “Hũ sa aràc mơnuĩh dih pơla sa vỡn nho, ngãq pơga tòp dar, sì kalơi sa voh lơvàc rơyiãq alãc. Ung kung vỡq padỡc sa voh vơ-mũng iãq gar sì vloh vrơi ga dơgrữq mơnuĩh pơla nho ơpah dòq pãq vỡn, hadơi nữn ung tơgùq nao anĩh atah.2Trôh vlàt pẽq, ung pơđar sa aràc halỗt mơnãq trôh sigỡuq sì tơpuôl pơla nho pioh mãq sa vơnah kaya hajũc hlàq vỡn nho mưng tơngãn pơnõq nhũ.3Sì hadơi nữn pơnõq nhũ mãq mơnuĩh halỗt mơnãq nữn, poh pờc, vloh pơtiãuq wỡq tơngãn soh.4Ung pơđar wỡq sa aràc halỗt mơnãq tơmo trôh sì pơnõq nhũ, nữn pơnõq nhũ poh mơnuĩh nữn halôh dơgrẽh akõq sì siẽq siẽl.5Ung pơđar wỡq sa aràc mơnuĩh halỗt mơnãq tơmo tơra, sì mơnuĩh halỗt mơnãq nữn, tơpuôl mơnuĩh nĩ kađòc pa-mơtai, sì lũ mơnuĩh tơmo wỡq — mơnuĩh nữn kađòc pơnõq nhũ poh pờc mơnuĩh nữn, hũ mơnuĩh kađòc pơnõq nhũ pa-mơtai.6Ung hũ sa aràc tơra, nữn la anàq lakơi anĩt anar, ung pơđar nhũ nữn, nao bãc luôĩq hadơi, trôh sì pơnõq nhũ, sơnơng làiq: ‘Pơnõq nhũ ròq ki ngãm anàq drơi.’7Nữn tơpuôl pơla vỡn nho nữn vơyai sì gỡuq làiq: ‘Nĩ la sa aràc anàq patui. Hẽq, iỡuq pa-mơtai nhũ vẽq, vloh apôh hama sì kaya mơnã nhũ ròq pơweh gah pơnõq drơi.’8Yơu nữn pơnõq nhũ mãq anàq lakơi, nữn pa-mơtai, vloh prah nhũ tơviãq pãq gah lơniãu vỡn nho.9Yơu nữn, pô vỡn nho ròq ngãq hagĩq nĩ? Ung ròq trôh pa-mơtai avih tơpuôl pơla nho sì pơjao wỡq vỡn nho ga mơnuĩh tơmo.10Pơnõq ung ka-ôh pơ-poh pơnuaĩq nĩ dơlãp Sơrãq Sơđah yơh?‘Voh patơu kađòc mơnuĩh rgơi padỡc sàc tlàq luơi,song tơviãq jỡc patơu akiãc sàc.11Kaya nĩ trôh mưng Yàc,sì nữn la vruãq krơi tơmo pãq anãq mơta pơnõq drơi.’”12Yơu nữn, pơnõq nhũ duah pơnẽq mãq Yàc Je-su, sì pơnõq nhũ huaĩq vual vơla, pơnõq nhũ thơu làiq Pitrai đơp pơnuaĩq pa-mơyơu nữn pioh jơdrãq sì pơnõq nhũ. Kơyua yơu nữn, pơnõq nhũ tlàq luơi Pitrai sì nao.13Hadơi nữn, pơnõq nhũ pơđar hadùp aràc mơnuĩh Pha-ri-si sì mơnuĩh pơweh sì gah He-rôt pioh baĩq vơnrẽq Pitrai dơlãp pơnuaĩq đơp.14Tũq pơtui wỡq, pơnõq nhũ đơp sì Pitrai: “Ơ pôgrũ, pơnõq hlãq thơu làiq pôgrũ la mơnuĩh tơpãq rĩng, sì ôh ngãq tui dơgrữq aràc halơi, kơyua pôgrũ ôh iãq gah lơniãu anàq mơnuĩh hũ. Pa-vlữq wỡq, pôgrũ pơto jơlàt athua Yàc Pô Lơngĩq hũ tui pơnuaĩq tơpãq. Yơu nữn, vruãq sơkãq jia ga Se-sa iỡuq kaya voh-va hẽla ôh? Pơnõq drơi iỡuq sơkãq jia hẽla ôh sơkãq jia?”15Nữn Yàc Je-su thơu kaya vlữq lor pơnõq nhũ, nữn Pitrai đơp sì pơnõq nhũ: “Hayơu pơnõq ung lòc kơu? Iỡuq va ga kơu mững sa đơ-ni-e.”16Yơu nữn pơnõq nhũ va jĩn trôh ga Yàc. Sì tơnĩa pơnõq nhũ: “Rùp sì angãn nĩ la kaya asơi?” Pơnõq nhũ drơ sì Pitrai: “La Se-sa hũ.”17Tũq nữn, Yàc Je-su đơp sì pơnõq nhũ: “Iỡuq vơyar ga Se-sa dơgrữq kaya hagĩq Se-sa hũ, sì vơyar vẽq ga Yàc Pô Lơngĩq dơgrữq kaya hagĩq Yàc Pô Lơngĩq hũ.” Pơnõq nhũ mãq ngãq krơi viãq mưng Pitrai.18Patui nữn hũ tơpuôl mơnuĩh Sa-đu-se, la dơgrữq mơnuĩh đơp làiq ôh hũ kaya hadiuq wỡq, trôh pãp Pitrai sì tơnĩa Pitrai, làiq:19“Ơ pôgrũ, Môi-se song wãq ga pơnõq drơi làiq: ‘Mơyah làiq sơai hũ sa aràc mơnuĩh asơi nữn tlàq rài luơi wỡq sơdiuq nữn ka-ôh hũ anàq, nữn adơi sơai mơnuĩh nữn iỡuq mãq sơdiuq nữn pioh patui pơjẽh pơtiàt ga sơai drơi.’20Hũ tơjuh aràc adơi sơai dih, sơai kơchoa khiãng kamơi vloh mơtai, ôh hũ anàq.21Mơnuĩh bãc dua khiãng wỡq sơdiuq mơnuĩh sơai, vloh mơtai, kung ôh hũ anàq, sì mơnuĩh bãc tlơu kung yơu nữn,22Avih tơjuh aràc nữn ôh asơi hũ anàq. Luôĩq hadơi, mơnuĩh kamơi kung mơtai.23Trôh tũq hadiuq wỡq, nữn pơnõq nhũ ròq hadiuq wỡq, nữn mơnuĩh kamơi nữn la sơdiuq asơi? Kơyua avih tơjuh aràc adơi sơai song mãq nai nữn ngãq sơdiuq.”24Yàc Je-su đơp wỡq sì pơnõq nhũ: “Ôh iỡuq kanõh gơtha ngãq pơnõq ung sỗq la kơyua mưng pơnõq ung ôh thơu pãc Sơrãq sơđah, kung yơu gơnuar chơnuãq Yàc Pô Lơngĩq yơh?25Kơyua mưng tũq mơnuĩh mơtai hadiuq wỡq, nữn pơnõq nhũ kung ôh ưng kamơi hẽla mãq pa-khiãng tơra, nữn pơnõq nhũ drưh yơu mơnuĩh gơnrơh pãq dlòc lơngĩq.26Dòq mưng vruãq mơnuĩh mơtai hũ hadiuq wỡq, hayơu lơĩh pơnõq ung ka-ôh pơpoh dơlãp sơrãq Môi-se hũ, dơlãp vơnah wãq akhàt mưng bôr druơi, mưng yơu halơi Yàc Pô Lơngĩq đơp sì ung làiq: ‘Kơu la Yàc Pô Lơngĩq A-bra-ham, Yàc Pô Lơngĩq Y-sac, sì Yàc Pô Lơngĩq Ja-kôp hũ’?27Pitrai ôh iỡuq la Yàc Pô Lơngĩq mơnuĩh mơtai ôh, nữn la ga mơnuĩh hadiuq. Pơnõq ung kung sỗq suẽl prong viãq.”28Hũ sa aràc dơlãp dơgrữq mơnuĩh gơnuar pơto voh-va trôh sì hmỡq pơnõq nhũ vơyai sì gơrlah gỡuq, nữn bôh Yàc Je-su hẽ ga dơgrữq mơnuĩh dih savĩq khưh rgơi, nữn ung tơnĩa Pitrai: “Kaya pơđar-va halơi la prong màc rlao avih dơlãp dơgrữq kaya pơđar-va?”29Yàc Je-su hẽ: “Kaya Pơđar-va prong màc rlao avih la: ‘Ơ Is-ra-el, iỡuq hmỡq nĩ, Yàc, la Yàc Pô Lơngĩq pơnõq drơi, la mĩn Yàc prong rlao avih.30Hã iỡuq avih hatai, avih vơngãq yuà, avih dlò jãc, sì avih prãn anĩt duman Yàc la Yàc Pô Lơngĩq hã hũ.’31Nĩ la kaya pơđar-va dua: ‘Hã iỡuq khiãng duman mơnuĩh jẽq phia yơu rùp phàp drơi.’ Ôh hũ kaya pơđar-va tơmo prong rlao dua kaya pơđar-va nĩ.”32Mơnuĩh gơnuar pơto voh-va đơp sì Pitrai: “Iỡuq viãq, Ơ pôgrũ! Pôgrũ đơp iỡuq viãq làiq, mĩn Yàc Pô Lơngĩq prong rlao avih, lơniãu Pitrai ôh hũ Yàc halơi tơmo tơra.33Anĩt anar Pitrai avih mưng dơlãp tũc hatai, avih mưng dlo jãc sơnơng thơu pãc, mưng avih yuà prãn khãc, sì khiãng duman dơgrữq mơnuĩh gỡuq drơi yơu rùp phàp drơi, nữn la siàp rlao sì avih dơgrữq kaya chôh pơhual sì dơgrữq kaya pioh duh talơvãt.”34Tũq Yàc Je-su bôh ung drơ wỡq savĩq jãc rgơi yơu nữn, Pitrai đơp sì ung: “Ung ôh dòq atah lơgar Yàc Pô Lơngĩq ôh.” Hadơi nữn, ôh asơi khĩn tơnĩa Yàc Je-su kaya hagĩq tơra.35Dơlãp tũq Yàc Je-su ãn pơto akhàt dơlãp anĩh làt sàc talơvãt, Pitrai tơnĩa: “Ngãq yơu halơi dơgrữq mơnuĩh gơnuar pơto voh-va đơp làiq Yàc Dõc Pơ-tlah la anàq pitao Da-vĩt?36Mĩn pitao Đa-vit hũ dơlãp Yàc Vơngãq Sơđah, song đơp:‘Yàc đơp sì Yàc kơu, làiq:“Iỡuq dòq guh gah hơnuãq kơu nĩ,tãl trôh tũq halơi kơu pơđar dơgrữq mơnuĩh jơdrãq sì anàq ngãq jỡc kaya kơđuãl tơkai ga anàq.”’37Mĩn Da-vĩt song pa-angãn Pitrai la ‘Yàc’, nữn ngãq hayơu Pitrai pơlih la anàq Da-vĩt jỡc?” Tơpuôl Vual vơla lũ pơtĩc tơnĩa hmỡq Pitrai pơto akhàt savĩq sơh sơr.38Dơlãp tũq pơto akhàt, Yàc Je-su đơp: “Iỡuq iãq gơrhia vẽq sì dơgrữq mơnuĩh gơnuar pơto voh-va, dơgrữq mơnuĩh ưng chồq ao ơtah nao mơ-ĩn, sì hũ dơgrữq pơnuaĩq chuãq rơwãc dơlãp khrãh anĩh dràq,39dòq guh pãq anĩh mơ-àc mơyàc dơlãp sàc pơtõm kung yơu pãq anĩh dlòc rlao avih dơlãp kaya bõc mơnhũm.40Pơnõq nhũ nữn bõc luỗt dơgrữq mơnuĩh sàc kamơi vlơu hũ, pơnõq nhũ iơu lakơu ơtah dơdiãng pioh vrơi ga aràc bôh. Dơgrữq mơnuĩh nữn ròq tồq mãq kaya ngãq dlàiq tơrãq rlao wỡq.”41Vloh Yàc Je-su dòq guh pa-sơmu anĩh chẽq kadũc pioh jĩn vuh ga sàc talơvãt; Pitrai iãq pơweh mưng vual vơla vuh jĩn tơma kadũc yơu halơi. Lũ mơnuĩh mơda vuh tơma dơgrữq vơnah jĩn prong.42Vloh hũ sa aràc mơnuĩh kamơi vlơu rơbah trôh vuh tơma dua tleh jĩn tìt pơgãp yơu la sa đồng kãc.43Pitrai iơu dơgrữq mơnuĩh mơgrũ trôh jẽq sì đơp ga pơnõq nhũ: “Iỡuq viãq, pôgrũ đơp sì adơi sơai, mơnuĩh kamơi vlơu rơbah nĩ vuh lũ rlao avih dơgrữq mơnuĩh song vuh jĩn tơma kadũc dih.44Kơyua avih dơgrữq pơnõq nhũ vuh mưng kaya dơlah dơlai drơi hũ. Yơu nữn kamơi vlơu nĩ, mưng kaya rơbah la-ơi, song pioh avih dơgrữq kaya nhũ hũ, la avih kaya nhũ hũ pioh ròc rài hadiuq drơi.”
FAR EAST BROADCASTING COMPANY