Luke17
1Vloh Pitrai đơp sì dơgrữq mơnuĩh mơgrũ nhũ: “Kaya ôh tũq halơi ôh hũ pleh tlah la dơgrữq pơnẽq ngãq ga sơnẽq sỗq, nữn dleh dlàr ga mơnuĩh halơi sì gãt tơpa nhũ ngãq sơnẽq sỗq kaya nữn!2Viãq siàp vrơi ga mơnuĩh nữn mơyah làiq yơu sa voh lơsũc patơu hũ akãq tòp dar tơkuai nhũ, sì nhũ ãt prah tơmã tơsìq siàp rlao la luơi ga nhũ ngãq ga sơnẽq sỗq ga sa aràc mơnuĩh nĩ dơlãp dơgrữq mơnuĩh tìt nĩ.3Iỡuq rơmiãq jàc rùp drơi! Mơyah làiq sa aràc pơnõq adơi sơai drơi sỗq dlàiq, iỡuq gơloh pơkhè mơnuĩh nữn; sì mơyah làiq mơnuĩh nữn mơvai tlàq dlàiq, iỡuq tơleh dlàiq ga nhũ.4Bôh làiq mơnuĩh nữn sỗq dlàiq sì pơnõq adơi sơai tãl tơjuh bãc dơlãp sa harơi, sì tơjuh bãc gơlàiq mai wỡq đơp sì adơi sơai: ‘Hlãq mơvai tlàq dlàiq,’ nữn pơnõq adơi sơai kung ròq tơleh dlàiq ga nhũ!”5Dơgrữq mơnuĩh gơnuar pơđar drơ sì Yàc: “Lakơu pơtãl voh-tui ga pơnõq hlãq.”6Vloh nữn, Yàc hẽ: “Mơyah làiq pơnõq adơi sơai hũ voh-tui drưh yơu sa asar savơi, nữn yơu tũq pơnõq adơi sơai đơp sì kayơu yãu nĩ làiq: ‘Hã iỡuq ãt vuĩq vẽq sì hũ pơla pãq ala tơsìq,’ sì nhũ nữn la iỡuq hmỡq sì tui pơnõq adơi sơai.7Nữn asơi dơlãp pơnõq adơi sơai hũ mơnuĩh halỗt mãq nao lơ-oa hamã hẽla dlãc avo mưng blàc hamã mai wỡq nữn vloh pơđar nhũ: ‘Trôh dòq pãq ban sì bõc mư?’8Pa-vlữq wỡq, ôh iỡuq mơnuĩh pô ròq đơp sì nhũ: ‘Iỡuq pồq kaya ga kơu bõc, sì akãq kơ-iãng drơi duh vruãq kơu dơlãp tũq kơu bõc mơnhũm, vloh hadơi dơgrữq vruãq nữn, sơai hũ bõc mơnhũm’ yơh?9Mơnuĩh pô nữn ôh mãq hatai ỡn ngai hagĩq sì mơnuĩh halỗt mơnãq kơyua nhũ song ngãq dơgrữq vruãq hũ hakơi pơđar, iỡuq lơĩh?10Pơnõq adơi sơai kung yơu nữn, tũq halơi pơnõq adơí sơai iỡuq ngãq wil tãl dơgrữq vruãq ròq akhàt vrơi ga drơi, iỡuq đơp làiq: ‘Pơnõq hlãq la halỗt mơnãq ôh đang mang. Pơnõq hlãq ròq ngãq avih vruãq vloh kaya drơi iỡuq ngãq.’”11Vruãq tơviãq ròq trôh dơlãp tũq ãn nao jơlàt trôh pãq palơi Je-ru-sa-lem, nữn Pitrai nao gãt rơnuãi phũm pãq khrãh Sa-ma-ri sì Ga-li-le.12Tũq Pitrai tơmã dơlãp sa palơi dih, hũ sa plôh aràc mơnuĩh ruãq aphũng trôh tồq ròq Pitrai, sì pơnõq nhũ dòq dữc pãq ơtah,13sì pơnõq nhũ mãq pơnuaĩq đơp làiq: “Talơvãt pôgrũ Je-su, lakơu anĩt anar pơnõq hlãq.”14Tũq iãq bôh pơnõq nhũ, Pitrai đơp sì pơnõq nhũ: “Iỡuq nao vẽq pa-tơviãq rùp drơi pãq anãq dơgrữq mơnuĩh gơnuar pioh kaya duh talơvãt.” Sì vruãq ròq tơviãq jỡc dơlãp tũq pơnõq nhũ nao, nữn pơnõq nhũ hũ sơchih avih.15Vloh hũ sa aràc mơnuĩh dơlãp tơpuôl pơnõq nhũ, tũq bôh làiq drơi ròq hũ pakhơĩh, sơai mai wỡq, mãq sãp prõc sơuỗt mơyòp Yàc Pô Lơngĩq.16Sơai pơviar rùp trỗt pãq tơkai Pitrai, ỡn ngai Pitrai. Sơai nữn la sa aràc mơnuĩh Sa-ma-ri.17Nữn la, tũq hẽ wỡq, Yàc Je-su đơp: “Ôh iỡuq la avih sa plôh aràc mơnuĩh hũ sơchih yơh? Dòq salơpãn aràc mơnuĩh dih pãq halơi?18Hayơu ôh bôh asơi mai wỡq lơvãt sơuỗt mơyòp Yàc Pô Lơngĩq lơniãu di mơnuĩh gah palơi lơniãu nĩ?”19Vloh Pitrai đơp sì sơai nữn: “Iỡuq tơgùq dữc, sì nao vẽq. Voh-tui sơai hũ ròq pakhơĩh ga sơai.”20Tũq hũ dơgrữq mơnuĩh Pha-ri-si tơnĩa tũq halơi lơgar Yàc Pô Lơngĩq ròq trôh, Pitrai hẽ sì pơnõq nhũ, sì đơp: “Lơgar Yàc Pô Lơngĩq ôh trôh tui kaya pơlih ôh hũ thơu gơnĩt jỡc.21Mơnuĩh aràc kung ròq ôh đơp: ‘Iãq nĩ, dòq pãq đĩ!’ hẽla ‘Nữn dih!’ Kơyua, iỡuq iãq vẽq, lơgar Yàc Pô Lơngĩq dòq pãq dơlãp pơnõq ung.”22Vloh Pitrai đơp sì dơgrữq mơnuĩh mơgrũ: “Ròq hũ dơgrữq harơi tũq sì pơnõq adơi sơai chơkhãq khiãng iãq bôh hũ sa dơlãp dơgrữq harơi Anàq Mơnuĩh hũ, nữn adơi sơai ròq ôh tũq halơi bôh jỡc.23Nữn anàq mơnuĩh ròq đơp sì pơnõq adơi sơai: ‘Dih, dòq pãq dih!’ hẽla: ‘Nĩ, dòq pãq đĩ!’ Juơi nao trôh, kung juơi pagui tui pơnõq nhũ,24kơyua yơu gơlia liãq gơchràq sơdah mưng rơnuãi phũm lơngĩq nĩ gơlia liãq trôh gah phũm lơngĩq dih, nữn Anàq Mơnuĩh kung ròq yơu nữn.25Nữn kaya iỡuq chàc hlơu avih ga Pitrai la ãt lũ kaya pơđìq pơđua sì kađòc kơmlah tlàq mưng rài nĩ.26Yơu vruãq ròq tơviãq jỡc yơu halơi dơlãp rài Nô-e, nữn nhũ kung ròq yơu nữn dơlãp rài Anàq Mơnuĩh hũ.27Anàq mơnuĩh gãm dòq bõc, mơnhũm, pơhuãq, pa-khiãng, tãl trôh harơi Nô-e tơmã dơlãp ahòq, vloh ia blũc trôh sì pa-lơhiãq avih.28Drưh, yơu vruãq ròq tơviãq jỡc dơlãp rài Lot hũ, anàq mơnuĩh gãm dòq bõc, mơnhũm, vlơi, pa-vlơi, dràq, pơla, vữq padỡc,29nữn dơlãp harơi Lot tơviãq tlah mưng palơi Sô-đôm, nữn hajàt apôi sì kadir mưng lơngĩq trỗt, vloh pa-lơhiãq avih dơgrữq kaya.30Vruãq tơviãq trôh tui pơnẽq yơu nữn dơlãp harơi Anàq Mơnuĩh pabôh tơviãq.31Dơlãp harơi nữn, asơi dòq pãq dlòc pơvũc sàc sì kaya mơnã drơi dòq dơlãp sàc, nữn juơi trỗt mãq nhũ; sì drưh yơu nữn, asơi dòq pãq blàc hama nữn juơi mai mãq sigỡuq sì dơgrữq kaya ròq dòq wỡq.32Iỡuq sadơr sơdiuq Lot hũ.33Mơyah làiq mơnuĩh halơi duah pơnẽq rơmiãq kaya hadiuq drơi nữn ròq lơhiãq nhũ, nữn mơyah làiq asơi prah luơi nữn ròq dõc jỡc nhũ.34Pôgrũ đơp sì pơnõq adơi sơai, dơlãp mơlãp nữn, ròq hũ dua aràc mơnuĩh đĩh sigỡuq sa voh chơnang. Sa aràc ròq va nao, dòq mơnuĩh dih hũ luơi wỡq.35Ròq hũ dua aràc mơnuĩh kamơi dòq tỡuq sòq sigỡuq dơlãp sa voh lơsũc. Sa aràc ròq va nao, dòq mơnuĩh dih ròq hũ luơi wỡq.”36[Dua aràc mơnuĩh dòq pãq blàc hama, sì sa aràc ròq va nao, mơnuĩh dih ròq hũ pioh luơi wỡq.]37Sì tũq tồq pơnuaĩq, pơnõq nhũ đơp sì Pitrai: “Ơ Yàc, dòq pãq hlơi yơh?” Vloh nữn Pitrai pơđar pơnõq nhũ: “Rùp atơu mơtai pãq halơi, chĩp klàc kung ròq pơtõm pãq anĩh nữn.”
FAR EAST BROADCASTING COMPANY