Hebrews7
1Kơyua Men-chi-se-đet nĩ, Pitao lơgar Sa-lem, pô gơnuar pioh kaya duh talơvãt Yàc Pô Lơngĩq Dlòc Dloòng Rlao Avih, la mơnuĩh song pãp A-bra-ham pãq jơlàt mai wỡq mưng anĩh mơsôh atòc poh pa-mơtai dơgrữq Pitao, sì song vrơi lơngai ga ung,2nữn A-bra-ham kung pioh ga pitao sa vơnah sa plôh mưng dơgrữq kaya mơnã mơsôh mãq hũ; hlơu avih, Men-chi-se-đet hũ pa-tơviãq gơtha la “pitao tơpãq dãng,” nữn kung la pơnuaĩq gơtha la pitao lơgar Sa-lem hũ, gơtha la “pitao dadu lơngai,”3Pitao ôh hũ ama, ôh hũ ami, ôh hũ pơjẽh pơtiàt, ôh hũ harơi đeh, kung ôh hũ harơi mơtai, nữn yơu Anàq Yàc Pô lơngĩq, Pitao miẽt gãm ngãq la pô gơnuar pioh kaya duh talơvãt tãl trôh gãm gãm.4Iỡuq iãq mưng gơnĩt pitao nữn mơ-àc mơyàc yơu halơi, nữn ung kõq A-bra-ham song padỡc vơnah sa plôh mưng kaya mơnã dơlãp dơgrữq kaya mơsôh mãq rlao avih.5Dòq dơgrữq mơnuĩh mưng pơjẽh pơtiàt Le-vi, dơlãp tũq apãt gơnuar vruãq pioh kaya duh talơvãt, nữn hũ gơnuar pơđar pioh mãq kaya vơnah sa plôh mưng vual vơla tui yơu voh-va, gơtha la mưng pơnõq adơi sơai drơi, bôh làiq kung song tơviãq mưng pơjẽh A-bra-ham.6Bôh làiq yơu nữn, dơlãp tũq ôh hũ angãn dơlãp apõc pơtiàt tơviãq mưng pơnõq nhũ, pitao nĩ song tồq mãq vơnah sa plôh mưng A-bra-ham, sì song vrơi lơngai ga nhũ hũ dơgrữq pơnuaĩq hẽ grưh.7Vơnah tơmo, ôh hũ dơgrữq kaya gơrlah pơnuaĩq halơi tũq mơnuĩh hũ gơnuar prõng nữn vrơi lơngai ga mơnuĩh gah ala gơnuar drơi.8Sì dơlãp vơnah vruãq yơu nĩ, dơgrữq mơnuĩh ãn jẽq mơtai tồq mãq vơnah sa plôh, dòq dơlãp vơnah vruãq yơu dih, pitao nữn hũ ngãq chưng la mĩn ãn dòq hadiuq.9Pơlih đơp sa pơnuaĩq yơu nĩ làiq, Le-vi, mơnuĩh tồq mãq dơgrữq vơnah sa plôh, kung song hũ tồq mãq vơnah sa plôh mưng A-bra-ham,10kơyua mơnuĩh Le-vi miẽt dòq dơlãp hatai ung kõq drơi tũq Men-chi-se-đet pãp A-bra-ham.11Yơu nữn, mơyah làiq gơnang di gơnuar pioh kaya duh talơvãt mơnuĩh Le-vi (Kơyua vual vơla tồq mãq voh-va dòq gah ala gơnuar nữn), sì hũ wil tãl, nữn chàc hagĩq pơtãl wỡq sa aràc mơnuĩh gơnuar pioh kaya duh talơvãt tơmo tui pơjẽh pơtiàt Men-chi-se-đet nữn ôh hũ angãn tui pơjẽh pơtiàt A-rôn lơĩh?12Kơyua dơlãp tũq gơnuar pioh kaya duh talơvãt kađòc pa-sơdua, nữn voh-va kung hũ pa-sơdua yơu nữn.13Kơyua Pitrai, Pitao nữn dơgrữq kaya nĩ kung ãn đơp trôh, pơweh sì sa pơjẽh pơtiàt tơmo, nữn mưng dơlãp apõc pơtiàt nữn ka-ôh hũ mơnuĩh halơi duh vruãq pãq anĩh ban duh talơvãt.14Kơyua nĩq nũn viãq làiq Yàc pơnõq drơi pajỡc tơviãq mưng pơjẽh pơtiàt Ju-đa, nữn pơweh sì apõc pơtiàt nữn, Môi-se song ôh đơp hagĩq trôh gơnuar vruãq mơnuĩh pioh kaya duh talơvãt.15Sì kaya nĩ vloh tơviãq jỡc brõq nĩq nũn rơlao wỡq mơyah làiq sa aràc mơnuĩh gơnuar pioh kaya duh talơvãt tơmo padỡc tơgùq drưh yơu Men-chi-se-đet,16la Pitao nữn tơviãq jỡc pô gơnuar pioh kaya duh talơvãt ôh tui mưng voh-va gah rơlo rùp nĩ hũ, nữn la tui mưng gơnuar chơnuãq kaya hadiuq ôh luôĩq.17Kơyua Srãq Sơđah ngãq chưng mưng Pitrai làiq:“Anàq la Pô gơnuar pioh kaya duh talơvãt gãm gãm tui pơjẽh pơtiàt Men-chi-se-đet.”18Kơyua hũ sa vơnah, hlơu thrơi vruãq prah luơi pơnuaĩq pơđar-va kung tơviãq trôh kơyua nhũ ôh dòq gơnuar sì ôh kuơ tơra19(nữn kơyua voh-va ôh ngãq jỡc kaya hagĩq wil tãl), sì vơnah tơmo la sa vruãq va wỡq kaya chàc gơnang siàp rlao hũ ròq vrơi, nữn gơnang mưng nữn pơnõq drơi hũ trôh jẽq sì Yàc Pô Lơngĩq.20Sì ôh iỡuq hũ avih dơgrữq kaya nữn vloh ôh hũ pơnuaĩq sơtãp rùp, — kơyua bôh làiq dơgrữq mơnuĩh dih ôh hũ pơnuaĩq sơtãp rùp song tơviãq jỡc dơgrữq pô gơnuar pioh kaya duh talơvãt,21nữn Pitrai song hũ padỡc tơgùq mưng pơnuaĩq sơtãp rùp, gơnang di Pitao đơp sì Pitrai:“Yàc song grưh sì Pitrai ròq ôh pa-sơdua:‘Anàq la Pô gơnuar pioh kaya duh talơvãt tãl trôh gãm gãm.’” —22nữn tui yơu pơnuaĩq sơtãp rùp tơpa rlao nữn, Yàc Je-su song tơviãq jỡc Pitao ngãq gơnĩt ga sa kaya hẽ grưh siàp rlao.23Sì bôh làiq hlơu thrơi pô gơnuar pioh kaya duh talơvãt la hũ lũ rlao, kơyua mưng kađòc kaya mơtai mãq pakỡuq pơnõq nhũ dơlãp kaya duh vruãq,24yơu nữn, Pitrai mĩn dòq ngãq pô gơnuar pioh kaya duh talơvãt ôh tũq halơi pa-sơdua, kơyua Pitrai gãm dòq tãl trôh gãm gãm,25vloh kơyua mưng nữn, Pitrai kung hũ gơnuar chơnuãq dõc suãq avih dơgrữq mơnuĩh trôh jẽq di Yàc Pô Lơngĩq mưng Pitrai, la Pitao gãm hadiuq pioh iơu lakơu ala ga pơnõq nhũ.26Kơyua sa aràc pô pioh kaya duh talơvãt prõng yơu nữn iỡuq viãq la pioh ga pơnõq drơi: Pitao sơdah blãc, ôh hũ dlàiq, sơđah sơchih, song hũ pa-chơlah krơi mưng dơgrữq mơnuĩh dlàiq dơnũh, sì tơviãq jỡc mơ-àc mơyàc rlao di dơgrữq tãl lơngĩq;27la Pitao ôh chàc hũ dơgrữq kaya angui dơgrữq harơi ngãq yơu dơgrữq pô pioh kaya duh talơvãt tơmo, nữn la padỡc dơgrữq kaya pioh padỡc, hlơu avih la ala ga dlàiq drơi hũ, hadơi nữn la dlàiq vual vơla, kơyua Pitrai song ngãq vloh dơgrữq vruãq nữn hadơi sì tũq tlàq rùp drơi ngãq kaya padỡc sa bãc la tãl vloh.28Kơyua voh-va pồq padỡc dơgrữq anàq mơnuĩh lơduh lơmuỡn ngãq pô gơnuar pioh kaya duh talơvãt, nữn pơnuaĩq sơtãp rùp, la kaya trôh hadơi voh-va, nữn pơto gơnĩt Anàq, la Pitao song hũ ngãq jỡc wil tãl tãl trôh gãm gãm.
FAR EAST BROADCASTING COMPANY