Hebrews3
1Kơyua yơu nữn, ơ adơi sơai sơđah sơchih, la dơgrữq mơnuĩh hũ vơnah dơlãp kaya iơu jàq mưng dlòc lơngĩq, iỡuq iãq trôh di Mơnuĩh ãt pơđar sì Mơnuĩh gơnuar pioh kaya duh talơvãt prõng mưng kaya pơnõq drơi hũ tồq mãq, nữn la Yàc Je-su,2tũq tui tơpãq sì Pitao song chẽq Pitrai dơlãp gơnuar vruãq, kung drưh yơu Môi-se tui tơpãq dơlãp sàc Yàc Pô Lơngĩq.3Kơyua Pitao nĩ hũ iãq la đang mang tồq kaya gơhluh prõng màc rlao Môi-se, kung yơu mơnuĩh vỡq padỡc sàc hũ ki ngãm lũ rlao pơweh sì dơgrữq voh sàc.4Kơyua dơgrữq voh sàc kung hũ mơnuĩh vỡq padỡc, nữn Yàc Pô Lơngĩq la Pitao chrơng pajỡc avih dơgrữq kaya.5Môi-se nữn tui tơpãq yơu sa aràc mơnuĩh halỗt dơlãp avih dơgrữq sàc Yàc Pô Lơngĩq hũ, pioh yơu pơnuaĩq ngãq chưng mưng dơgrữq vruãq ròq hũ đơp trôh dơlãp rài hadơi;6Nữn Yàc Dõc Pơ-tlah, tui tơpãq yơu sa aràc Anàq apãt akõq sàc Yàc Pô Lơngĩq hũ (pơnõq drơi la sàc Pitrai hũ mơyah làiq pơnõq drơi rơmiãq gơjãp hatai chàc gơnang gơnĩt sì hũ pa-prõc rùp mưng kaya chơkhãq chàc drơi hũ).7Kơyua yơu nữn, vruãq iỡuq yơu pơnuaĩq Yàc Vơngãq Sơđah đơp:“Harơi nĩ, mơyah làiq pơnõq hã hmỡq sãp Pitrai,8nữn juơi khãc hatai pơnõq anàqyơu dơlãp tũq tơgùq ngãq jơdrãq,trôh tũq pơnõq hã lòc Kơu dơlãp blàc choah9la anĩh ung kõq pơnõq hã tơgùq ngãq jơdrãq song lòc Kơu mưng kaya iãq pơwih,vloh pơnõq nhũ song iãq bôh dơgrữq vruãq Kơu ngãq10dơlãp pàq plôh thũt. Kơyua yơu nữn, Kơu ơnõc mơvai sì ôh siàp hatai mưng pơjẽh pơtiàt rài nữn.Kơu đơp: ‘Hatai pơnõq nhũ miẽt nao sỗq gãm,nữn pơnõq nhũ song ôh kơnãl thơu dơgrữq jơlàt ơthua Kơu hũ.’11Vruãq drưh yơu Kơu song sơtãp rùp dơlãp kaya anõc mơvai prõng:‘… Pơnõq nhũ ròq ôh tũq halơi hũ tơmã dơlãp kaya padơi dleh Kơu hũ!’”12Ơ pơnõq adơi sơai, iỡuq gơrhia iãq, huaĩq lơ-ô hatai pãc-tui kaya iãh mơsãc ròq pabôh tơviãq dơlãp sa aràc halơi nữn dơlãp pơnõq adơi sơai, nữn la anĩh mơnuĩh dòq atah di Yàc Pô Lơngĩq gãm hadiuq.13Bôh làiq yơu nữn, iỡuq pơto pa-sơdor gỡuq dơgrữq tãl harơi, tãl trôh tũq gãm dòq angãn la “harơi nĩ,” pioh ôh mơnuĩh halơi dơlãp adơi sơai kađòc ngãq khãc hatai kơyua mưng dlàiq dơnũh pa-gơla.14Kơyua pơnõq drơi song tơviãq jỡc mơnuĩh duh vruãq Yàc Dõc Pơ-tlah, mĩn la pơnõq drơi rơmiãq gơjãp hatai pãc-tui ngãq gơnĩt drơi hũ mững tũq chơmrờp tãl trôh luôĩq hadơi,15Mưng kaya nĩ, hũ pơnuaĩq dòq đơp làiq:“Harơi nĩ, mơyah làiq pơnõq hã hmỡq pơnuaĩq Pitrai,nữn juơi ngãq khãc hatai,yơu tũq tơgùq ngãq jơdrãq.”16Kơyua dơgrữq mơnuĩh halơi ròq hmỡq vloh tơgùq ngãq jơdrãq sì Pitrai? Ôh iỡuq la avih dơgrữq mơnuĩh gơnang di Môi-se song va tơviãq tlah mưng lơgar E-jip-tơ yơh?17Vloh Pitrai song nõng mơvai viãq sì dơgrữq mơnuĩh halơi dơlãp pàq plôh thũt? Ôh iỡuq la avih dơgrữq mơnuĩh sỗq dlàiq, vloh rùp atơu pơnõq nhũ song lơvuh mơtai dơlãp blàc choah yơh?18Nữn Yàc Pô lơngĩq song sơtãp rùp sì mơnuĩh halơi vloh ròq ôh hũ tơma dơlãp kaya padơi dleh Pitrai hũ, mơyah làiq ôh iỡuq la dơgrữq mơnuĩh ôh pãc-tui nữn yơh?19Pơnõq drơi iãq bôh làiq pơnõq nhũ ôh tũq halơi rgơi tơma jỡc kơyua mưng hatai ôh pãc tui.
FAR EAST BROADCASTING COMPANY