Ephesians5
1Yơu nữn, iỡuq tơviãq jỡc dơgrữq mơnuĩh mơgrũ đõm tui Yàc Pô Lơngĩq, yơu anàq tơcho hũ anĩt anar viãq Pitrai hũ,2sì iỡuq hadiuq dơlãp kaya khiãng duman, kung yơu Yàc Dõc Pơ-tlah song anĩt pơnõq drơi sì ãt tlàq rùp phuỗt Pitrai kơyua pơnõq drơi yơu sa kaya padỡc sì kaya adãt padỡc gãm bơu vơlhũ siàp padỡc tơgùq ga Yàc Pô Lơngĩq.3Dòq kaya drì drõc, sigỡuq sì dơgrữq kaya ôh sơchih hẽla ham guãm nữn vloh juơi sơdor trôh di khrãh pơnõq adơi sơai, tui yơu kaya nữn la đang mang ga dơgrữq mơnuĩh gơnuar pơđar sơđah,4kung juơi đơp pơnuaĩq iãh savĩl, pơnuaĩq gơla pơtòq, hẽla pơnuaĩq đơp gơ-gãq iãh tasỡuq — la dơgrữq kaya ôh iỡuq — nữn pa-vlữq wỡq nữn la đơp mưng pơnuaĩq ỡn ngai.5Viãq yơu nữn, iỡuq thơu kaya nĩ ngãq gơnĩt làiq dơgrữq mơnuĩh arĩh athãm, mơnuĩh ôh sơchih, hẽla ham guãm — nữn la mơnuĩh duh lơvãt rùp rãp — nữn kung ôh hũ tồq mãq apôh hama dơlãp palơi lơgar Yàc Dõc Pơ-tlah sì Yàc Pô Lơngĩq hũ.6Juơi luơi ga asơi pa-gơla pơnõq adơi sơai mưng dơgrữq pơnuaĩq đơp ôh kuơ, kơyua mưng dơgrữq pơnuaĩq nữn, ngãq ga kaya ơnõc mơvai prõng Yàc Pô Lơngĩq hũ pa-trỗt pãq dlòc dơgrữq anàq tơcho ôh ngãq tui.7Yơu nữn, pơnõq adơi sơai juơi tơviãq jỡc yơu dơgrữq mơnuĩh hũ vơnah sigỡuq sì vruãq pơnõq nhũ hũ,8kơyua halơu dih pơnõq adơi sơai dòq dơlãp sồp kơnãm, nữn nĩ la kaya sơdah dơlãp Yàc. Iỡuq bõc dòq yơu anàq tơcho kaya sơdah hũ9(kơyua voh chơtai kaya sơdah hũ dòq di khrãh dơgrữq kaya siàp, tơpãq dãng, sì tui tơpãq),10tũq gơrhia iãq pơwih kaya halơi la kaya siàp hatai Yàc.11Juơi dòq tơma dơlãp dơgrữq vruãq ôh kuơ kaya sồp kơnãm hũ, nữn siàp rlao la ràc tơviãq vruãq pơnõq nhũ,12kơyua viãq la mơlơu ơlah tũq mĩn sơdor trôh dơgrữq vruãq ngãq pơnõq nhũ hũ ngãq savĩq dơlãp dơđỡuq.13Nữn dơgrữq kaya hũ bôh gơnĩt dơlãp tũq ràc tơviãq kơyua mưng kaya sơdah, kơyua dơgrữq kaya ròq bôh gơnĩt kung la mưng kaya sơdah.14Kơyua yơu nữn, hũ pơnuaĩq đơp làiq:“Iỡuq mơdưh tơgùq, ơ mơnuĩh ãn pìq,iỡuq tơgùq vẽq mưng dơlãp tơpuôl mơnuĩh mơtai,Yàc Dõc Pơ-tlah ròq pơsàc sơdah hã.”15Yơu nữn, iỡuq iãq gơrhia mưng vruãq bõc dòq pơnõq adơi sơai hũ — juơi yơu mơnuĩh gơla pơtòq nữn iỡuq ngãq yơu mơnuĩh jãc rgơi,16iỡuq thơu angui tũq jơ, kơyua dơgrữq harơi la iãh.17Kơyua yơu nữn, juơi tơviãq jỡc yơu mơnuĩh gơla pơtòq, nữn iỡuq thơu pãc halơi la hatai ưng Yàc hũ.18Juơi mơvũq alãc, kơyua kaya nữn pasũl ngãq ling lang. Pa-vlữq wỡq, iỡuq vãq sơrè Yàc Vơngãq Sơđah,19đơp hẽ sigỡuq mưng sơrãq đơp chrih, sơrãq đơp adoh sì diãng pơnuaĩq đơp adoh sơđah, sì mưng hatai drơi đơp adoh sì sơ-uỗt mơyòp Yàc,20padỡc pơnuaĩq ỡn ngai Yàc Pô Lơngĩq, la Ama, dơlãp dơgrữq tũq dơgrữq kaya mãq angãn Yàc Dõc Pơ-tlah Je-su, Yàc pơnõq drơi,21sì iỡuq duh huaĩq di gỡuq dơlãp kaya duh huaĩq Yàc Dõc Pơ-tlah —22mơnuĩh ngãq sơdiuq, iỡuq duh huaĩq vơsàc drơi yơu duh huaĩq di Yàc.23Kơyua vơsàc la akõq sơdiuq, kung yơu Yàc Dõc Pơ-tlah la akõq sàc pơjũm sơđah — rùp phuỗt Pitrai la Yàc Dõc gah rùp phàp.24Bôh làiq yơu nữn, sàc pơjũm sơđah duh huaĩq Yàc Dõc Pơ-tlah Je-su yơu halơi nữn mơnuĩh sơdiuq kung iỡuq duh huaĩq vơsàc drơi dơlãp dơgrữq vruãq yơu nữn.25Mơnuĩh ngãq vơsàc, iỡuq anĩt duman sơdiuq drơi, kung yơu Yàc Dõc Pơ-tlah Je-su song anĩt duman sàc pơjũm sơđah sì tlàq rùp phàp drơi kơyua sàc pơjũm sơđah,26pioh Pitrai pơlih pa-sơdua Sàc pơjũm nữn tơviãq jỡc sơđah, hadơi sì tũq ngãq sơchih mưng kaya uãq rao mưng ia sigỡuq sì Pơnuaĩq yàc,27tồq ga Pitrai va pabôh tơviãq ga rùp phuỗt drơi sa voh Sàc Pơjũm Sơđah gơhluh, ôh hũ nỡm halôh dơgrẽh hẽla hũ nỡm gơrjuh, hẽla avih dơgrữq kaya halơi yơu nữn, nữn pioh ga Sàc pơjũm hũ sơđah sơchih sì ôh sỗq suẽl kaya halơi.28Tui pơnẽq yơu nữn, vơsàc kung iỡuq anĩt duman sơdiuq drơi yơu rùp phuỗt drơi. Mơnuĩh vơsàc anĩt duman sơdiuq drơi hũ nữn la anĩt duman rùp phuỗt drơi.29Kơyua ôh hũ asơi vloh mơvai rùp phuỗt drơi ôh, nữn ròc chiẽp sì iãq chơ nhũ, kung yơu pơnẽq Yàc Dõc Pơ-tlah pơweh sì Sàc Pơjũm Sơđah,30kơyua pơnõq drơi la dơgrữq vơnah dơlãp rùp phàp Pitrai.31“Kơyua kanõh nữn, mơnuĩh lakơi ròq pơtloh ơtah di ami ama sì ròq pãq mơtlìq sì sơdiuq drơi, avih dua aràc tơviãq jỡc sa rơlo rùp.”32Kaya dơlãp dơđỡuq nĩ viãq prõng màc rlao — nữn hlãq ãn đơp mưng Yàc Dõc Pơ-tlah sì ãn đơp mưng Sàc Pơjũm Sơđah.33Yơu nữn, pơnõq adơi sơai kung tui yơu pơnẽq nữn — avih tãl dơgrữq aràc — dơgrữq tãl aràc mơnuĩh vơsàc iỡuq anĩt duman sơdiuq drơi yơu rùp phuỗt drơi, dòq mơnuĩh sơdiuq nữn iỡuq ki ngãm vơsàc drơi.
FAR EAST BROADCASTING COMPANY