Acts7

1Tũq nữn, mơnuĩh gơnuar pioh kaya duh talơvãt prõng tơnĩa: “Dơgrữq pơnuaĩq nữn hũ iỡuq yơu nữn lơĩh?”2Sì E-tien drơ làiq:
“Pa-thơu dơgrữq adơi sơai sì dơgrữq tơpuôl miẽq wà, lakơu iỡuq hmỡq hlãq: Yàc Pô Lơngĩq gơhluh sơđah song pabôh tơviãq sì ung kõq la A-bra-ham pơnõq drơi hũ tũq ung dòq pãq Me-sô-bô-ta-mi, hlơu sì tũq ung mai dòq pãq Cha-ran;
3Pitrai đơp sì nhũ làiq: ‘Iỡuq tlàq luơi palơi phuỗt anàq hũ, sigỡuq sì gỡuq gãt apõc pơtiàt drơi, pioh nao trôh palơi Kơu ròq pơto vrơi ga anàq.’4Yơu nữn, hadơi sì tũq tơviãq nao mưng lơgar vual vơla Kãnh-đe, ung trôh dòq pãq Cha-ran. Vloh mưng nữn, hadơi sì tũq ama ung tlàq rài, Yàc Pô Lơngĩq song va ung tơmã dơlãp lơgar nĩ, dơlãp anĩh nữn adơi sơai tũq nĩ ãn dòq hadiuq.5Nữn Pitrai ôh vrơi ga nhũ apôh hamã dơlãp lơgar — vloh sa jơgàp hlùq tơnãh kung ôh hũ. Nữn Pitrai hũ hẽ vrơi lơgar ga nhũ, sì vrơi ga pơjẽh pơtiàt nhũ, ngãq apôh hamã — bôh làiq nhũ ka-ôh hũ anàq.6Yàc Pô Lơngĩq đơp sì nhũ làiq, pơjẽh pơtiàt nhũ ròq la vual dòq padơh pãq sa lơgar lơniãu, vloh vual vơla dòq pãq đỡn ròq mãq pơnõq nhũ ngãq halỗt sì juãq jơlìq dơlãp pàq rơtôh thũt.7Nữn, Yàc Pô Lơngĩq đơp: ‘Kơu ròq ngãq dlàiq vual vơla nữn pơnõq nhũ iỡuq ngãq halỗt, sì hadơi nữn, pơnõq nhũ ròq tơviãq nao sì duh talơvãt kơu pãq anĩh nĩ.’8Vloh Yàc Pô Lơngĩq vrơi ga A-bra-ham kaya hẽ grưh adãt sìq kalìq, yơu nữn, tũq A-bra-ham pajỡc Y-sac nữn ngãq adãt sìq kalìq ga anàq drơi dơlãp harơi talơpãn; vloh Y-sac pajỡc Ja-kôp, sì Ja-kôp pajỡc sa plôh dua aràc mơnuĩh apãt akõq pơjẽh pơtiàt.9Kơyua dơgrữq mơnuĩh apãt akõq pơjẽh pơtiàt lơmùq mơvai sì Jô-sep, pơnõq nữn pa-vlơi nhũ pãq lơgar E-jip-tơ. Nữn Yàc Pô Lơngĩq dòq sigỡuq sì nhũ10sì dõc suãq nhũ tlah mưng dơgrữq kaya dleh dlàr. Pitrai vrơi kaya anĩt sì kaya jãc rgơi ga nhũ pãq anãq Pha-ra-ôn, pitao E-jip-tơ, sì pitao nữn song padỡc nhũ tơgùq ngãq pô apãt akõq lơgar E-jip-tơ sigỡuq sì sàc drơi.11Tũq nữn, hũ kaya ờq lơ-pa tơviãq trôh vãq avih dơgrữq lơgar E-jip-tơ sì lơgar Ka-na-an, sa kaya rũc rài prõng viãq, sì ung kõq pơnõq drơi ôh duah hũ kaya bõc.12Tũq Ja-kôp hmỡq đơp dòq pãq E-jip-tơ hũ vơdai mi, nhũ pơđar ung kõq pơnõq drơi nao trôh pãq đỡn bãc sa.13Trôh bãc dua nữn Jô-sep vrơi pa-thơu rùp phuỗt drơi ga pơnõq sơai, sì sàc anĩh Jô-sep hũ kung akhàt pa-tơviãq ga Pha-ra-ôn.14Jô-sep pơđar pơnõq sơai nao wỡq ròq Ja-kôp, ama drơi, sigỡuq sì avih dơgrữq mơnuĩh dơlãp sàc nhũ, avih tãl la tơjuh plôh lơmã aràc.15Yơu nữn, Ja-kôp trỗt nao pãq E-jip-tơ, vloh nhũ sì dơgrữq ung kõq pơnõq drơi hũ tlàq rài.16Pơnõq nhũ va nao trôh Si-chem, dor dơlãp vơnẽq nữn A-bra-ham song vlơi sì jĩn priãq mưng dơgrữq anàq lakơi He-mô hũ pãq Si-chem.17Trôh tũq lơwah pơnuaĩq hẽ grưh hũ, nữn la pơnuaĩq Yàc Pô Lơngĩq song hẽ grưh sì A-bra-ham, trôh jẽq, nữn katih vual vơla bluãq pơtãl tơgùq sì tơviãq jỡc lũ viãq pãq E-jip-tơ,18tãl trôh tũq hũ sa pitao tơmo dỡc tơgùq apãt akõq E-jip-tơ, ung ôh thơu Jô-sep.19Pitao nĩ pa-gơla vual vơla drơi sì mãq pakỡuq ngãq mơsãc sì ung kõq pơnõq drơi, pagùq pơ-èp ga ung kõq pơnõq drơi iỡuq tlàq luơi anàq tơcho vơhrơu đeh drơi hũ, ôh luơi ga nhũ hadiuq.20Dơlãp tũq nữn, Môi-se đeh tơviãq; nhũ siàp mơkrơ pãq anãq Yàc Pô Lơngĩq, sì hũ va ròc dơlãp tlơu vlàt dơlãp sàc ama drơi.21Tũq nhũ kađòc va nao pãq lơniãu, mơnuĩh anàq kamơi Pha-ra-ôn song va mai mơnuĩh sì ròc iãq nhũ yơu anàq drơi.22Môi-se hũ mơgrũ dơgrữq kaya jãc rgơi mơnuĩh E-jip-tơ hũ, nhũ hũ kaya jãc khưh dơlãp pơnuaĩq đơp sì vruãq ngãq.23Nữn tũq nhũ hũ pàq plôh thũt, pabôh dơlãp kaya sơnơng ưng nao rơwãc adơi sơai drơi, nữn la anàq tơcho Is-ra-el.24Iãq bôh sa ràc kađòc juãq jơlì, Môi-se dõc jơga mơnuĩh nữn sì ngãq tơviãq kaya jơdrãq ga mơnuĩh kađòc juãq jơlì nĩ mưng pơnẽq poh pa-mơtai mơnuĩh E-jip-tơ dih,25kơyua nhũ sơnơng adơi sơai ròq thơu làiq Yàc Pô Lơngĩq kơyua mưng tơngãn drơi va trôh kaya dõc tlah ga pơnõq nhũ, nữn pơnõq nhũ ôh pãc.26Harơi hadơi, nhũ nao trôh sì tơpuôl mơnuĩh Is-ra-el ãn gơrlah pơnuaĩq, sì đơp ga pơnõq nhũ salơnuãq sigỡuq, làiq: ‘Nĩ, pơnõq sơai kung la adơi sơai mĩn. Hayơu vloh ngãq iãh ga gỡuq?’27Nữn mơnuĩh song ngãq iãh ga mơnuĩh jẽq phia drơi song sũl Môi-se tơviãq, tơnĩa: ‘Asơi padỡc sơai ngãq mơnuĩh apãt akõq sì pô chahrơna pơnõq hlãq?28Sơai ôh ưng pa-mơtai hlãq yơu kaya song pa-mơtai mơnuĩh E-jip-tơ harơi ka-vruơi nữn yơh?’29Tũq hmỡq dơgrữq pơnuaĩq yơu nữn, Môi-se đuaĩq dỡuq sì tơviãq jỡc mơnuĩh thuãi dòq padơh dơlãp lơgar Ma-đi-an, anĩh nữn nhũ pajỡc hũ dua aràc anàq lakơi.30Dơlãp pàq plôh thũt hadơi, sa aràc mơnuĩh gơnrơh pabôh tơviãq sì nhũ pãq blàc choah pơweh sì phũm chỡq Si-nai, dơlãp sa dơlah apôi khũ anĩh bôr druơi.31Tũq bôh apôi pioh iãq Môi-se, mãq ngãq krơi mưng kaya pabôh tơviãq nữn; nhũ trôh jẽq, nữn hũ sãp Yàc đơp làiq:32‘Kơu la Yàc Pô Lơngĩq ung kõq anàq hũ, Yàc Pô Lơngĩq A-bra-ham hũ, Y-sac sì Ja-kôp hũ.’ Môi-se kơyua huaĩq tơtơh sì ôh khĩn iãq.33Vloh Yàc đơp sì nhũ: ‘Iỡuq wàq chơkhõq tơviãq mưng tơkai anàq kơyua anĩh anàq ãn dòq dỡc la tơnãh sơđah.34Kơu song lơnhẽ iãq sì iãq bôh kaya dleh dlàr vual vơla Kơu hũ pãq E-jip-tơ, Kơu song hmỡq sãp suãq yuà pơnõq nhũ hũ, sì Kơu trỗt pioh dõc suãq pơnõq nhũ; tũq nĩ, iỡuq trôh, vloh Kơu ròq pơđar anàq nao pãq E-jip-tơ.’35Môi-se nĩ, mơnuĩh pơnõq nhũ kơmlah tlàq, làiq: ‘Asơi song padỡc sơai ngãq mơnuĩh apãt akõq hẽla pô chahrơna?’ — Yàc Pô Lơngĩq pơđar ngãq mơnuĩh pô apãt akõq sì dõc suãq, kơyua mưng tơngãn mơnuĩh gơnrơh song pabôh tơviãq ga nhũ anĩh bôr druơi.36Rùp phuỗt Môi-se nĩ song va pơnõq nhũ tơviãq, ngãq dơgrữq kaya krơi tơmo sì nỡm krơi pãq lơgar E-jip-tơ sì pãq Tơsìq Mơriãh, kung yơu dơlãp blàc choah miẽt pàq plôh thũt.37Kung rùp phuỗt Môi-se nĩ song đơp sì anàq tơcho Is-ra-el làiq: ‘Yàc Pô Lơngĩq ròq padỡc tơgùq sa aràc mơnuĩh gơnuar hwơr ga adơi sơai drưh yơu hlãq nĩ, mưng dơlãp tơpuôl adơi sơai.’38Nĩ la mơnuĩh dòq dơlãp tơpuôl pãq anĩh blàc choah sì mơnuĩh gơnrơh, Pitao song đơp sì drơi pãq dlòc chỡq Si-nai, sì dòq sì ung kõq pơnõq drơi, ung la mơnuĩh song tồq mãq pơnuaĩq hadiuq pioh vrơi ga pơnõq drơi.39Nĩ la mơnuĩh nữn ung kõq pơnõq drơi ôh ưng pãc sãp, yơu nữn song tlàq luơi sì ta-vlữq hatai drơi pơweh mưng E-jip-tơ.40Pơnõq nhũ song đơp sì A-rôn: ‘Iỡuq ngãq ga pơnõq hlãq dơgrữq yàc ròq dui-va pơnõq hlãq. Gah vơnah Môi-se nĩ, nhũ song va pơnõq drơi tơviãq tlah mưng lơgar E-jip-tơ, pơnõq hlãq ôh thơu vruãq hagĩq song tơviãq trôh ga ung nữn.’41Yơu nữn, dơlãp dơgrữq harơi nữn, pơnõq nhũ ngãq sa rùp sẽq-lơmo anàq sì padỡc kaya duh talơvãt ga rùp rãp nữn, vloh uỗt sơh mưng vruãq ngãq tơngãn drơi hũ.42Nữn Yàc Pô Lơngĩq song tlàq luơi sì luơi ga pơnõq nhũ duh talơvãt dơgrữq ia pitỗq pãq dlòc lơngĩq, yơu pơnuaĩq wãq dơlãp sơrãq dơgrữq mơnuĩh gơnuar hwơr hũ, làiq:‘Ơ vual vơla Is-ra-el, pơnõq hã ôh padỡc ga kơu anàq asỡq kađòc pa-mơtai sì kaya padỡcdơlãp pàq plôh thũt pãq blàc choah, iỡuq mĩn?43Pơnõq hã chakồc va tui sàc tlam kakôh talơvãt Mo-lõc hũ,pitỗq yàc Rom-phan hũ,sigỡuq sì dơgrữq rùp ràc nữn hã song ngãq pioh kakôh talơvãt pơnõq nhũ,sì Kơu ròq va pơnõq hã nao pãq gah dih Ba-by-lôn.’
44Tlam krung pahanh gãm dòq sigỡuq sì ung kõq pơnõq drơi dơlãp blàc choah, drưh yơu Pitao song đơp sì Môi-se akhàt pơđar, làiq iỡuq ngãq tlam nữn tui yơu tlam nữn ung song iãq bôh.45Nĩ la tlam padơh nữn ung kõq pơnõq drơi, nao tui mơnuĩh apãt akõq Jô-sue hũ, kung song tồq mãq sì va tui tũq pơnõq nhũ mơsôh mơvlah mãq lơgar dơgrữq vual vơla hũ nữn Yàc Pô Lơngĩq song pơtiãuq pơnõq nhũ tơviãq pãq anãq ung kõq pơnõq drơi tãl trôh rài Đa-vit,46nhũ hũ kaya anĩt di anãq Yàc Pô Lơngĩq, sì song iơu lakơu pioh ung pơlih duah sa anĩh dòq ga Yàc Pô Lơngĩq Ja-kôp hũ.47Bôh làiq yơu nữn, Sa-lô-môn song vỡq padỡc sàc ga Yàc Pô Lơngĩq.48Nữn Pitao Dloòng Dlòc ôh dòq dơlãp sàc mưng tơngãn anàq mơnuĩh vỡq padỡc, yơu mơnuĩh gơnuar hwơr song đơp:49‘Yàc đơp, Lơngĩq la sơvan Kơu, sì hlùq la kơđuãl chẽq tơkai Kơu.Hũ sàc halơi pơnõq hã pơlih padỡc ga Kơu?Hẽla halơi la anĩh Kơu padơi dleh?50Ôh iỡuq lơĩh tơngãn Kơu chrơng pajỡc avih dơgrữq kaya nĩ yơh?’
51Pơnõq adơi sơai viãq khãc akõq, hatai sì tanĩa ôh ãt sìq kalìq! Pơnõq adơi sơai miẽt jơdrãq sì Yàc Vơngãq Sơđah. Ung kõq adơi sơai yơu halơi — adơi sơai kung yơu nữn.52Hũ mơnuĩh gơnuar hwơr halơi nữn ung kõq pơnõq pơnõq adơi sơai ôh juãq jơlì? Pơnõq nhũ pa-mơtai dơgrữq mơnuĩh gơnuar hwơr akhàt vrơi thơu hlơu mưng kaya pabôh tơviãq Pitao Tơpãq Rĩng hũ, dòq pơnõq adơi sơai vloh tũq nĩ tơviãq jỡc mơnuĩh jơdrãq sì pa-mơtai Pitrai,53la dơgrữq mơnuĩh song tồq mãq voh-va akhàt mưng dơgrữq mơnuĩh gơnrơh, nữn vloh ôh rơmiãq pioh.”
54Tũq hmỡq dơgrữq pơnuaĩq nữn, dơgrữq mơnuĩh dòq dơlãp tơpuôl pô chahrơna nong mơvai dơlãp hatai, sì pơnõq nhũ kẽq tagơi sì E-tien.55Nữn ung hũ vãq sơrè Yàc Vơngãq Sơđah, iãq mững gơnĩt pãq dlòc lơngĩq sì bôh kaya gơhluh sơdah Yàc Pô Lơngĩq hũ, Yàc Je-su ãn dòq dỡc gah hơnuãq Pitrai.56E-tien đơp: “Dih mững vẽq, hlãq bôh dơgrữq tãl lơngĩq pơh tơviãq, sì Anàq Mơnuĩh ãn dòq dỡc gah hơnuãq Yàc Pô Lơngĩq.”57Yơu nữn, dơgrữq mơnuĩh dơlãp tơpuôl chahrơna priãu papơ prõng sãp, kapỡq tanĩa wỡq, sa hatai sigỡuq gơluh tơmã mãq E-tien.58Vloh katũc ung tơviãq lơniãu palơi, pơnõq nhũ prah patơu ung. Dơgrữq mơnuĩh ngãq chưng mãq ao lơniãu nhũ hũ chẽq anĩh tơkai sa aràc mơnuĩh dãm angãn la Sau-lơ.59Tũq pơnõq nhũ ãn prah patơu E-tien, ung iơu lakơu prõng sãp, làiq: “Ơ Yàc Je-su, lakơu tồq mãq vơngãq yuà anàq.”60Vloh nhũ tơdrũt dua gah ta-ồq trỗt, ung iơu prõng sãp: “Ơ Yàc, lakơu juơi tôh dlàiq nĩ ga pơnõq nhũ.” Tũq song đơp pơnuaĩq nữn vloh, nữn ung pìq.

FAR EAST BROADCASTING COMPANY

https://app.library.bible/content/d703d3283f8af40e