Acts21
1Tũq song pa-lơnguãq pơnõq nhũ sì đìq ahòq tơviãq nao, pơnõq hlãq nao tơpãq trôh palơi Kôt, tơpa harơi hadơi nữn trôh palơi Rô-đơ, vloh mưng nữn nao trôh palơi Ba-ta-ra.2Duah hũ ahòq nao gãt Phe-ni-si, pơnõq hlãq đìq ahòq ia sì tơviãq nao.3Hadơi sì tũq iãq bôh pỗc pơlao Chip-rơ, pơnõq hlãq pleh gah hơnuãq pỗc pơlao sì tui jơlàt nao trôh pãq Si-ri, vloh trỗt pãq anĩh ahòq ia dơh pãq Ty-rơ, kơyua ahòq iỡuq pioh pa-trỗt mơnã kaya dòq pãq đỡn.4Vloh hadơi sì tũq duah bôh dơgrữq mơnuĩh mơgrũ, pơnõq hlãq dòq wỡq pãq đỡn tơjuh harơi. Kơyua mưng Yàc Vơngãq Sơđah, pơnõq nhũ miẽt òt Pol juơi nao pãq Je-ru-sa-lem.5Nữn hadơi hadùp harơi nữn, pơnõq hlãq vloh tơviãq nao sì patui pơdòq nao wỡq. Avih tãl aràc pơnõq nhũ, sigỡuq sì anàq sơdiuq, kung tui va pa-lơnguãq pơnõq hlãq tơviãq trôh gah lơniãu palơi. Vloh pơnõq hlãq aguãl tơ-ồq pãq gah ia tơsìq iơu lakơu,6sì đơp pơnuaĩq pa-lơnguãq gỡuq. Pơnõq hlãq đìq ahòq, dòq pơnõq nhũ nữn nao wỡq sàc.7Tũq song wil tãl dơlãp jơlàt nao mưng Ty-rơ, pơnõq hlãq nao trôh Be-tô-le-mai, chuãq rơwãc pơnõq adơi sơai sì dòq wỡq sì pơnõq nhũ sa harơi.8Harơi hadơi, pơnõq hlãq tơviãq nao sì trôh Se-sa-re. Pơnõq hlãq tơmã sàc Phi-lip, la sàc mơnuĩh pơto akhàt Pơnuaĩq Siàp, sa aràc dơlãp tơjuh aràc mơnuĩh dõc gar, nữn dòq wỡq sì ung.9Ung hũ pàq aràc anàq kamơi dơra đơp hwơr.10Dơlãp lũ harơi pơnõq hlãq dòq wỡq pãq đỡn, hũ sa aràc mơnuĩh gơnuar hwơr angãn la A-ga-but mưng Ju-đe mai.11Ung trôh pãp pơnõq hlãq sì mãq talơi akãq kơ-iãng Pol hũ akãq krơi tơngãn tơkai nhũ làiq, vloh đơp: “Yàc Vơngãq Sơđah đơp yơu nĩ: ‘Mơnuĩh Ju-đa pãq Je-ru-sa-lem ròq akãq pô talơi kơ-iãng nĩ hũ yơu nữn, sì pơnõq nhũ ròq pơjao dơlãp tơngãn vual vơla lơniãu.’”12Tũq hmỡq dơgrữq pơnuaĩq nữn, avih tãl aràc pơnõq hlãq sì dơgrữq mơnuĩh hadiuq dòq pãq đỡn òt Pol juơi tơgùq nao pãq Je-ru-sa-lem.13Nữn Pol hẽ: “Adơi sơai ngãq hagĩq yơu nữn? Sia chõq sì ngãq ga hlãq pơđìq hatai wỡq? Kơyua hlãq song rơchãc lơĩh, ôh mĩn pioh kađòc chãq, nữn dòq ãt mơtai kơyua angãn Yàc Je-su pãq Je-ru-sa-lem wỡq dih.”14Kơyua Pol ôh ưng hmỡq, yơu nữn pơnõq hlãq miẽt dòq suà, vloh đơp: “Lakơu tui yơu hatai Yàc tơviãq jỡc yơu nữn.”15Hadơi dơgrữq harơi nữn, pơnõq hlãq pơkhrà lơĩh kaya angui sì tơgùq nao pãq Je-ru-sa-lem.16Nao sigỡuq sì pơnõq hlãq kung hũ tơkìq mơnuĩh mơgrũ mưng Se-sa-re. Pơnõq nhũ va pơnõq hlãq trôh pãq sa aràc mơnuĩh dih angãn Ma-na-sôn, sa aràc mơnuĩh mơgrũ mưng tũq hlơu palơi dòq pãq Chip-rơ, la mơnuĩh nữn pơnõq hlãq ròq dòq sigỡuq.17Tũq pơnõq hlãq trôh pãq Je-ru-sa-lem, pơnõq adơi sơai uỗt sơh tồq ròq pơnõq hlãq.18Harơi hadơi, Pol nao sigỡuq sì pơnõq hlãq trôh pãp Ja-kơ, sì avih dơgrữq pô tơha kung bôh mơta.19Chuãq rơwãc pơnõq nhũ vloh, ung akhàt wỡq dơgrữq vruãq Yàc Pô Lơngĩq song ngãq di khrãh dơgrữq vual vơla lơniãu mưng kaya duh vruãq drơi hũ.20Tũq hmỡq yơu nữn, pơnõq nhũ sơ-uỗt mơyòp Yàc Pô Lơngĩq, vloh pơnõq nhũ đơp sì ung: “Ơ adơi sơai, sơai bôh nữn, lũ rơvơu mơnuĩh Ju-đa song pãc-tui. Pơnõq nhũ kung tluỡiq gơhuar pơweh sì voh-va.21Pơnõq nhũ song hmỡq đơp mưng sơai, làiq sơai pơto dơgrữq mơnuĩh Ju-đa hadiuq pãq khrãh vual vơla lơniãu tlàq luơi voh-va Môi-se, sì sơai dòq pơto ga pơnõq nhũ juơi sìq kalìq ga anàq tơcho drơi, sì kung juơi tui dơgrữq kaya adãt adia.22Pơnõq hlãq iỡuq ngãq hagĩq nĩ? Viãq làiq pơnõq nhũ ròq hmỡq thơu sơai song trôh.23Yơu nữn, iỡuq ngãq yơu pơnõq hlãq đơp nĩ. Pơnõq hlãq hũ pàq aràc song wãq pơnuaĩq hẽ pa-guỡt.24Iỡuq va dơgrữq mơnuĩh nĩ nao sì ngãq ga sơai sơđah sơchih rùp phuỗt sơai sigỡuq sì pơnõq nhũ, vloh vơyar jĩn ga pơnõq nhũ, pioh pơnõq nhũ kuah akõq nhũ. Yơu nữn, dơgrữq mơnuĩh ròq thơu làiq dơgrữq kaya pơnõq nhũ hmỡq đơp mưng sơai la ôh iỡuq, sì làiq sơai kung bõc dòq tui sì rơmiãq pioh voh-va.25Dòq gah dơgrữq mơnuĩh lơniãu song pãc-tui Yàc, pơnõq hlãq hũ wãq sì wãq tơviãq dơgrữq kaya pơto pơđar pơnõq nhũ iỡuq rơmiãq rùp phàp drơi tlah mưng kaya kakôh rùp rãp, dơrãh, anàq asỡq mơtai sangỡq yuà sì kaya drì drõc.”26Yơu nữn Pol va dơgrữq mơnuĩh nữn nao; harơi hadơi, ngãq sơđah sơchih rùp phuỗt drơi sigỡuq sì pơnõq nhũ, ung tơmã sàc talơvãt pioh akhàt vrơi pa-thơu katih harơi ngãq sơđah sơchih hũ, karhia tãl trôh tũq padỡc kaya duh talơvãt ga dơgrữq tãl aràc.27Nữn tũq tơjuh harơi jẽq avih, hũ tơkìq mơnuĩh Ju-đa trôh mưng A-si, bôh Pol dơlãp sàc talơvãt, nữn ngãq sơrôh srãh pachôh gãm avih tơpuôl lũ sì pơjao tơngãn mãq ung.28Pơnõq nhũ driãu tơgùq: “Nĩ, ơ mơnuĩh Is-ra-el, lakơu dõc pơnõq hlãq. Nĩ la mơnuĩh pơto dơgrữq mơnuĩh dòq vãq dơgrữq anĩh ngãq jơdrãq wỡq sì vual vơla, voh-va, sì anĩh nĩ. Lơniãu nữn, nhũ dòq va mơnuĩh Gơ-rec tơmã dơlãp sàc talơvãt sì ngãq tasỡuq nrãc anĩh sơchih.”29Kơyua hlơu nữn, pơnõq nhũ song bôh Trô-phim, mơnuĩh E-phe-sô, dơlãp palơi sigỡuq sì ung, yơu nữn pơnõq nhũ sơnơng Pol song va mơnuĩh nĩ tơmã sàc talơvãt.30Avih palơi hũ kađòc sơrôh srãh, vual vơla mơrũp gỡuq mai mãq Pol. Pơnõq hlãq va ung tơviãq tlah mưng sàc duh talơvãt, vloh krỡq mơvah bãc mư tũq nữn.31Tũq pơnõq nhũ ãn duah pơnẽq pa-mơtai ung, nữn pô apãt akõq tơpuôl lĩng hmỡq pơnuaĩq vãq avih palơi Je-ru-sa-lem ãn ngãq sơrôh srãh.32Mư tũq nữn, ung va tui tơpuôl lĩng sigỡuq sì dơgrữq mơnuĩh apãt akõq lĩng đuaĩq nao pãq anĩh tơpuôl lũ. Tũq vual vơla iãq bôh mơnuĩh apãt akõq mơnuĩh lĩng sì tơpuôl lĩng, nữn pơnõq nhũ padưh poh atòc Pol.33Vloh mơnuĩh apãt kõq tơpuôl lĩng gơluh mai trôh mãq Pol sì vrơi gơnuar pơđar akãq ung mưng dua dãc talơi sơrẽng. Vloh ung tơnĩa Pol la asơi sì song ngãq hagĩq.34Dơlãp tơpuôl vual vơla, mơnuĩh nữn driãu yơu nĩ, hũ mơnuĩh nữn driãu yơu dih. Kơyua mơnuĩh apãt akõq mơnuĩh lĩng ôh duah hũ kaya hagĩq gơnĩt viãq kơyua tơsrãh uãn, yơu nữn ung vrơi gơnuar pơđar-va Pol nao pãq anĩh mơnuĩh lĩng dòq.35Tũq trôh yàp tơgùq talơkhõt lơnhàt, tơpuôl lĩng iỡuq chakồc ung, kơyua vual vơla ngãq brưh mơsãc uãn.36Tơpuôl nhũ miẽt tui hadơi sì đơp driãu tơgùq: “Pa-mơtai vẽq nhũ!”37Tũq jẽq kađòc va tơmã anĩh tơbòc tơpuôl lĩng dòq, ung đơp sì mơnuĩh apãt tơpuôl lĩng: “Lakơu vrơi hlãq đơp tơkìq pơnuaĩq sì ung.” Mơnuĩh apãt tơpuôl lĩng tơnĩa: “Ung đơp sãp mơnuĩh Gơ-rec?38Yơu nữn ung ôh iỡuq la mơnuĩh E-jip-tơ hlơu thrơi song pơdòq ngãq sa kaya srôh srãh sì dui va pàq rơvơu la mơnuĩh pa-mơtai mơnuĩh tơmã pãq blàc choah yơh?”39Pol drơ: “Hlãq la mơnuĩh Ju-đa, palơi dòq Tat-sơ, lơgar Si-li-si, la sa aràc mơnuĩh vual vơla dơlãp palơi prõng hũ tiẽng dơnãi nữn. Yơu nữn lakơu ung vrơi gơnuar ga hlãq đơp sì vual vơla.”40Tũq mơnuĩh apãt akõq tơpuôl lĩng vrơi gơnuar, Pol dòq dữc pãq dlòc talơkhõt lơnhàt sì angui tơngãn yơr tơviãq ngãq nỡm ga vual vơla. Tũq avih tãl aràc dòq suà lìt, ung pơdòq, đơp sì pơnõq nhũ mưng sãp He-bơ-rơ, làiq:
FAR EAST BROADCASTING COMPANY