Acts2

1Tũq harơi Adãt Lơmã Plôh song trôh vloh, avih dơgrữq tãl aràc pơnõq nhũ pơtõm gỡuq wỡq dòq sa anĩh.2Vloh dơvruh dơvrah, mưng lơngĩq tơviãq sa sãp dơnai drưh yơu angĩn vluh khãc tơmã, sì tơmã vãq avih dơgrữq sàc anĩh pơnõq nhũ ãn dòq guh.3Sì dơgrữq dơlah drưh yơu apôi pabôh tơviãq sì pơnõq nhũ, tũq song ràc tơviãq dơgrữq tãl voh, nữn nhũ đãp pãq dlòc tãl avih dơgrữq aràc dơlãp pơnõq nhũ.4Avih dơgrữq pơnõq nhũ hũ vãq sơrè Yàc Vơngãq Sơđah sì pơdòq đơp mưng dơgrữq pơnuaĩq đơp krơi gỡuq, tui yơu Yàc Vơngãq Sơđah vrơi ga pơnõq nhũ đơp.
5Tũq nữn hũ dơgrữq mơnuĩh Ju-đa ãn dòq padưh pãq Je-ru-sa-lem, la dơgrữq mơnuĩh tui tơpãq mưng dơgrữq lơgar dơgrữq vual vơla dòq gah ala lơngĩq.6Tũq sãp nữn đơp tơviãq, vual vơla pơtõm gỡuq wỡq sì huaĩq tơtơh kơyua dơgrữq tãl aràc hũ hmỡq dơgrữq mơnuĩh mơgrũ đơp mưng dơgrữq pơnuaĩq đơp drơi hũ.7Avih dơgrữq pơnõq nhũ nữn kơtuãq huaĩq sì mãq ngãq krơi, pơnõq nhũ đơp làiq: “Iãq dih, ôh iỡuq dơgrữq mơnuĩh ãn đơp nữn la vual vơla Ga-li-le yơh?8Yơu nữn, ngãq hayơu vloh pơnõq drơi hmỡq pơnõq nhũ đơp mưng dơgrữq voh ơkhar krơi drơi hũ dơlãp lơgar nữn pơnõq nhũ hũ pajỡc tơviãq?9Hũ mơnuĩh la mơnuĩh Bat-the, mơnuĩh Me-đi, mơnuĩh E-la-mit, dơgrữq mơnuĩh hadiuq pãq Me-sô-bô-ta-mi, Ju-đe, Kap-ba-đôc, Bông, A-si,10Phi-ri-gi, Bam-phi-ly, E-jip-tơ, sì dơlãp dơgrữq phũm pơweh sì Li-bi jẽq Si-ren, sigỡuq sì dơgrữq mơnuĩh thuãi nao jơlàt mưng Rô-ma trôh,11gãm mơnuĩh Ju-đa sigỡuq sì mơnuĩh tui jơlàt duh talơvãt Ju-đa, mơnuĩh Gơ-rec sì mơnuĩh A-rãp, yơu nữn pơnõq drơi vloh hmỡq pơnõq nhũ đơp mưng dơgrữq vruãq prõng prõc Yàc Pô Lơngĩq hũ mưng pơnuaĩq đơp drơi hũ.”12Kơyua nữn, avih tãl aràc pơnõq nhũ kung huaĩq tơtơh viãq nữn kãl sì pãc, mơnuĩh nĩ đơp sì mơnuĩh dih: “Vruãq nĩ hũ gơtha la yơu hayơu?”13Nữn dơgrữq mơnuĩh tơmo tlao siẽq siẽl song đơp làiq: “Tơpuôl nĩ la ãn kađòc mơvũq alãc vơhrơu mĩn nữn!”
14Nữn hadơi sì tũq tơgùq dỡc, Pier gãm sì sa plôh sa aràc mơnuĩh gơnuar pơđar tơmo song pơh sãp đơp sì pơnõq nhũ:
“Pa-thơu dơgrữq mơnuĩh lơgar Ju-đa sì avih dơgrữq asơi ãn dòq padưh pãq Je-ru-sa-lem, vruãq nĩ iỡuq ròq tơviãq jỡc yơu la kaya rơđãp pơweh sì pơnõq adơi sơai, sì lakơu adơi sơai iỡuq thơu pơnuaĩq nĩ sì hmỡq gơnĩt pơnuaĩq hlãq đơp nĩ.
15Kơyua dơgrữq mơnuĩh nĩ ôh kađòc mơvũq yơu adơi sơai sơnơng ôh, kơyua ãn la tũq jơ bãc tlơu dơlãp harơi.16Bôh làiq yơu nữn, nĩ la kaya song hũ akhàt vrơi pa-thơu mưng mơnuĩh gơnuar hwơr Jô-en:17‘“Vruãq ròq tơviãq trôh dơlãp dơgrữq harơi luôĩq hadơi”, Yàc Pô Lơngĩq đơp:“Kơu ròq tôh Vơngãq Sơđah Kơu pãq dlòc avih dơgrữq rơlo rùp,Anàq lakơi sì anàq kamơi hã ròq đơp hwơr,dơgrữq tơpuôl dãm hã hũ ròq bôh kaya dơlãp dơđỡuq,sì dơgrữq mơnuĩh tơha hã hũ ròq lapơi bôh kaya pa-lapơi.18Dơlãp dơgrữq harơi nữn, vloh gãm dơgrữq halỗt lakơi halỗt kamơi Kơu hũ,Kơu ròq tôh Vơngãq Sơđah Kơu hũ, sì pơnõq nhũ ròq đơp hwơr.19Kơu ròq ràc tơviãq dơgrữq kaya krơi tơmo pãq dlòc lơngĩq dloòng,sì dơgrữq nỡm krơi gah ala hlùq viar,dơrãh sì apôi sigỡuq sì yuà asãq.20Ia harơi ròq tơviãq jỡc kơnãm,ia vlàt tơviãq jỡc dơrãh,hlơu sì tũq trôh harơi prõng sì prõng màc Yàc hũ.21Sì dơgrữq mơnuĩh iơu lakơu angãn Yàc ròq hũ dõc pơ-tlah.”’
22Pa-thơu dơgrữq mơnuĩh Is-ra-el, lakơu iỡuq hmỡq dơgrữq pơnuaĩq nĩ: Yàc Je-su mơnuĩh Na-sa-ret, la mơnuĩh Yàc Pô Lơngĩq hũ ngãq chưng gơnĩt ga adơi sơai mưng dơgrữq vruãq gơnuar chơnuãq, kaya krơi tơmo sì nỡm krơi nữn mưng Pitrai, Yàc Pô Lơngĩq song ngãq di khrãh pơnõq adơi sơai, yơu rùp phuỗt pơnõq adơi sơai song thơu.23Pitao nữn kađòc ãt pơjao, tui yơu dãq lơnãq song ngãq gơnĩt sì kaya thơu hlơu Yàc Pô Lơngĩq hũ, nữn adơi sơai song kơyua mưng tơngãn dơgrữq mơnuĩh ôh hũ voh-va pa-mơtai Pitrai mưng pơnẽq pỡc đĩn pãq dlòc kayơu pỡc,24Pitrai la Pitao nữn Yàc Pô Lơngĩq song ngãq ga hadiuq wỡq, hadơi sì tũq dõc suãq Pitrai tlah mưng kaya pađìq pơđua kaya mơtai hũ, kơyua kaya mơtai ôh hũ gơnuar apãt mãq Pitrai gah ala gơnuar nhũ.25Kơyua pitao Đa-vit đơp mưng Pitrai làiq:‘Hlãq gãm bôh Yàc dòq di anãq hlãqkơyua Pitrai dòq gah hơnuãq hlãq, yơu nữn hlãq ôh kađòc sơđô mơgơi.26Kơyua yơu nữn, hatai hlãq sơh sơr sì dơlah hlãq uỗt sơh.Viãq, dòq rơlao nữn wỡq, rùp phàp hlãq ròq hadiuq dơlãp kaya chơkhãq chàc gơnĩt viãq.27Kơyua Pitrai ròq ôh tlàq luơi vơngãq yuà hlãq dơlãp anĩh tơnãh ala,kung ròq ôh pioh ga Pitao Sơđah Blãc Pitrai iãq bôh kaya vrũq lơmuĩq.28Pitrai song akhàt tơviãq ga hlãq jơlàt kaya hadiuq;Pitrai ròq ngãq ga hlãq vãq sơrè hatai sơh sơr dơlãp kaya bôh di anãq Pitrai hũ.’
29Pa-thơu adơi sơai, hlãq khĩn đơp savĩq gơjãp kađỡc sì adơi sơai mưng ung kõq Đa-vit, làiq ung song mơtai sì hũ dor, vơnẽq ung hũ dòq di khrãh pơnõq drơi tãl trôh harơi nĩ.30Sì nữn, kơyua pitao la gơnuar hwơr sì thơu làiq Yàc Pô Lơngĩq song padỡc pơnuaĩq hẽ grữh sì drơi ròq mãq sa aràc mơnuĩh dơlãp pơjẽh pơtiàt drơi chẽq pãq dlòc sơvan drơi,31yơu nữn hadơi sì tũq bôh halơu vruãq nĩ, pitao song đơp mưng kaya hadiuq wỡq Yàc Dõc Pơ-tlah, làiq Pitrai ôh kađòc tlàq luơi dơlãp anĩh tơnãh ala, rùp phàp Pitrai kung ôh bôh kaya vrũq lơmuĩq.
32Yàc Pô Lơngĩq song ngãq ga Yàc Je-su nĩ hadiuq wỡq, avih dơgrữq tãl aràc pơnõq hlãq la mơnuĩh ngãq chưng ga vruãq nữn.33Kơyua yơu nữn, hadơi sì tũq song hũ va tơgùq dòq gah hơnuãq Yàc Pô Lơngĩq sì tồq mãq pơnuaĩq hẽ grưh mưng Vơngãq Sơđah mưng Ama, nữn Pitrai song vrơi Yàc Vơngãq Sơđah trỗt yơu vruãq nữn pơnõq adơi sơai ãn bôh sì hmỡq.
34Kơyua Đa-vit song ôh đìq tơgùq lơngĩq, nữn mĩn ung đơp wỡq làiq:‘Yàc đơp sì Yàc hlãq: “Iỡuq dòq guh gah hơnuãq Kơu,35tãl trôh tũq Kơu ngãq ga mơnuĩh jơdrãq sì Anàq hũ tơviãq jỡc kơđuãl chẽq tơkai Anàq.”’
36Kơyua yơu nữn, avih sàc Is-ra-el iỡuq thơu savĩq gơjãp gơnĩt làiq Yàc Pô Lơngĩq song padỡc Pitrai, nữn la Je-su nĩ sì adơi sơai song pỡc đĩn, ngãq Yàc sì Pitao Dõc Pơ-tlah.”
37Tũq hmỡq dơgrữq pơnuaĩq nĩ, pơnõq nhũ lơhẽ lơhuãi dơlãp hatai, nữn tơnĩa Pier sì dơgrữq mơnuĩh gơnuar pơđar dih, làiq: “Ơ pơnõq adơi sơai, pơnõq hlãq iỡuq ngãq hagĩq nĩ?”38Pier drơ sì pơnõq nhũ: “Dơgrữq tãl aràc dơlãp adơi sơai iỡuq mơvai tlàq dlàiq sì ãt adãt bãp-tem mãq Angãn Yàc Dõc Pơ-tlah Je-su pioh hũ tơleh dlàiq drơi, vloh adơi sơai ròq tồq mãq kaya vrơi soh la Yàc Vơngãq Sơđah.39Kơyua pơnuaĩq hẽ grữh nữn la pioh ga adơi sơai, ga anàq tơcho adơi sơai sì ga avih dơgrữq mơnuĩh dòq atah, nữn la dơgrữq aràc asơi nữn Yàc la Yàc Pô Lơngĩq pơnõq drơi ròq iơu duỡt.”40Ung angui lũ pơnuaĩq tơmo wỡq, ung song ngãq chưng sì paluơ padờp pơnõq nhũ, làiq: “Iỡuq dõc drơi tlah mưng rài hadiuq iãh mơsãc nĩ.”41Yơu nữn, hadơi sì tũq pơnõq nhũ song tồq mãq pơnuaĩq ung, pơnõq nhũ ãt ngãq bãp-tem, hũ pơgãp tlơu rơvơu vơngãq yuà hũ pơtãl tơmã Sàc Pơjũm dơlãp harơi nữn.42Vloh tũq nữn, pơnõq nhũ miẽt patui wỡq dơlãp pơnuaĩq pơto dơgrữq mơnuĩh gơnuar pơđar hũ sì dơlãp kaya salơnuãq sigỡuq, dơlãp kaya pẽq bẽn sì dơlãp pơnuaĩq iơu lakơu.
43Dơgrữq tãl aràc song huaĩq tơtơh, hũ lũ kaya krơi tơmo sì nỡm krơi tơviãq jỡc mưng dơgrữq mơnuĩh gơnuar pơđar.44Avih dơgrữq tãl aràc mơnuĩh song pãc-tui nữn song pơjũm pơtõm dơlãp sa anĩh sì hũ tồq sigỡuq dơgrữq kaya,45pơnõq nhũ pa-vlơi avih apôh hamã sì kaya mơnã drơi, vloh pa-phanh pa-mơpha kaya nữn ga dơgrữq mơnuĩh, tui yơu dơgrữq tãl aràc hũ kaya angui yơu halơi,46Dơgrữq harơi pơnõq nhũ miẽt sa hatai dòq dơlãp sàc talơvãt, nữn vloh kung pẽq bẽn pãq sàc, angui war kaya bõc sigỡuq mưng hatai uỗt sơh sì hatai gơnĩt viãq,47sơ-uỗt mơyòp Yàc Pô Lơngĩq sì hũ siàp hatai avih dơgrữq vual vơla, dòq Yàc mĩn ãn pơtãl katih dơgrữq mơnuĩh hũ dõc pơ-tlah tơmã sàc pơjũm pơnõq nhũ dơgrữq harơi.

FAR EAST BROADCASTING COMPANY

https://app.library.bible/content/d703d3283f8af40e