Acts10

1Pãq palơi Se-sa-re hũ sa aràc mơnuĩh angãn la Kot-nai, la mơnuĩh apãt akõq lĩng dơlãp tơpuôl lĩng la angãn tơpuôl lĩng Y-ta-li,2ung la mơnuĩh tluỡiq gơhuar sì duh huaĩq Yàc Pô Lơngĩq, sigỡuq sì avih sàc anĩh drơi; ung pa-mơpha lơnang lơnai ga mơnuĩh siỡuq sier sì gãm iơu lakơu sì Yàc Pô Lơngĩq.3Pơgãp tũq jơ bãc salơpãn dơlãp harơi, dơlãp sa kaya pabôh, ung iãq bôh nĩq nũn hũ sa aràc mơnuĩh gơnrơh Yàc Pô Lơngĩq hũ pabôh tơviãq sì drơi, iơu: “Sơai Kot-nai!”4Kot-nai iãq mơnuĩh gơnrơh gơnĩt viãq sì tơviãq jỡc huaĩq tơtơh, đơp: “Talơvãt Pitrai, hũ vruãq hagĩq?” Mơnuĩh gơnrơh đơp sì nhũ: “Pơnuaĩq iơu lakơu sì kaya pa-mơpha dõc mơnuĩh rơbah ung hũ song tơgùq trôh pãq anãq Yàc Pô Lơngĩq yơu sa kaya padỡc hũ Pitrai wãq pioh sơdor.5Yơu nữn, tũq nĩ, iỡuq pơđar mơnuĩh trôh Jôp-be, sì jàq mai sa aràc mơnuĩh hũ angãn Si-môn, iơu la Pier.6Ung nữn ãn dòq sigỡuq sì mơnuĩh Jãc khưh rgơi ngãq kalìq angãn si-môn, hũ sàc, dòq jẽq gah tơsìq.”7Tũq mơnuĩh gơnrơh đơp sì ung song nao vloh, Kot-nai iơu dua aràc halỗt mơnãq dơlãp sàc sigỡuq sì sa aràc mơnuĩh lĩng hũ hatai duh huaĩq dơlãp katih dơgrữq mơnuĩh duh vruãq drơi,8hadơi sì tũq akhàt wỡq ga pơnõq nhũ dơgrữq kaya song tơviãq jỡc, ung pơđar pơnõq nhũ trôh Jôp-be.
9Harơi hadơi, pơgãp jơ bãc nãm, tũq pơnõq nhũ ãn nao jơlàt jẽq trôh palơi Jôp-be nữn Pier đìq tơgùq dlòc làt sàc pioh iơu lakơu;10Vloh ung iãq lơ-pa sì mơhao bõc, nữn dơlãp tũq aràc ãn pồq pơyãq kaya bõc, hũ sa kaya pabôh trôh pãq ung,11Ung bôh pãq lơngĩq pơh tơviãq, sì hũ sa kaya hagĩq nữn drưh yơu sa vlah charơnãq prõc akãq pàq gah akiãc mưng dlòc lơngĩq trỗt pãq hlùq.12Dơlãp nữn la dơgrữq pơjẽh anàq asỡq pàq bẽq tơkai, anàq ruơi pãq ala hlùq sì dơgrữq chĩp lơngĩq,13Vloh hũ sãp đơp sì ung: Ơ Pier, iỡuq tơgùq dỡc, ngãq rơlo sì bõc vẽq.14Nữn Pier đơp: Ơ Yàc, ôh yơu nữn; kơyua anàq ka ôh bõc bôh làiq dơgrữq kaya hagĩq tasỡuq nrãc sì ôh Jỡc sơchih.15Nữn sãp nữn đơp sì ung bãc dua làiq: dơgrữq kaya hagĩq Yàc Pô Lơngĩq song ngãq sơchih, nữn anàq juơi iãq la tasỡuq nrãc.16Vruãq nĩ tơviãq trôh tlơu bãc, sì tũq nữn mư kaya nữn hũ va tơgùq pãq dlòc lơngĩq.
17Dơlãp tũq Pier viãq dỡq dỡng dơlãp hatai ôh thơu kaya pabôh ung ãn bôh hũ gơtha gĩq, nữn dĩh, dơgrữq mơnuĩh hũ Kot-nai pơđar nao dòq dỡc pãq anãq bãc, hlơu sì tũq tơnĩa hũ jơlàt nao trôh sàc Si-môn.18Pơnõq nhũ iơu prõng sì tơnĩa, iỡuq lơĩq Si-môn, hũ angãn la Pier, ãn dòq pãq nĩ.19Dơlãp tũq Pier gam dòq ãn sơnơng mưng kaya pabôh dĩh, nữn Vơngãq sơđah đơp sì ung: “Dih, hũ tlơu aràc ãn duah anàq.20Iỡuq tơgùq dỡc trỗt pãq ala, vloh nao sì pơnõq nhũ, juơi dỡq dỡng hagĩq, kơyua Kơu song pơđar pơnõq nhũ nữn.”21Nữn Pier trỗt nao pãp dơgrữq mơnuĩh nữn, đơp: “Hlãq la mơnuĩh pơnõq ung, ãn dòq duah. Pơnõq ung trôh pãq nĩ hũ vruãq hagĩq nữn?”22Pơnõq nhũ drơ: Pô apãt tơpuôl lĩng Kot-nai sa aràc mơnuĩh tơpãq dãng, sì duh huaĩq Yàc Pô Lơngĩq, kung hũ avih vual vơla Ju-đa sơ-uỗt mơyòp, song hũ pơto akhàt sa aràc mơnuĩh gơnrơh sơchih iỡuq jàq ung trôh sàc pioh pa-hmỡq pơnuaĩq pơto pơđar mưng ung.23Nữn Pier jàq pơnõq nhũ tơmã sàc dòq wỡq sì drơi.
Vloh sơdah harơi pơgi, ung tơgùq dỡc nao sì pơnõq nhũ, hũ hadùp aràc adơi sơai mưng Jôp-be nao sigỡuq sì ung.
24Harơi hadơi, pơnõq nhũ trôh pãq Se-sa-re. Kot-nai ãn chàc pơnõq nhũ; ung song iơu gỡuq palơi sì ban mơyơu pơjũm pơtõm wỡq.25Tũq Pier yàp tơmã, Kot-nai tồq ròq ung sì, pơviar rồp anĩh ala tơkai ung sì talơvãt.26Nữn Pier wơh tơgùq ung, đơp: Lakơu iỡuq tơgùq dỡc, mĩn hlãq nữn kung la mơnuĩh yơu gỡuq.27Dơlãp tũq đơp dlai sì Kot-nai, ung yàp tơmã sì, bôh hũ lũ mơnuĩh song pơtõm wỡq.28Ung đơp sì pơnõq nhũ: pơnõq ung thơu làiq voh-va ôh vrơi gơnuar sa aràc mơnuĩh Ju-đa ngãq mơyơu hẽla trôh rơwãc sa aràc mơnuĩh pơweh vual vơla tơmo, nữn hlãq Yàc Pô Lơngĩq song vrơi bôh làiq hlãq iơu ôh Jỡc bôh làiq mơnuĩh halơi la tasỡuq nrãc hẽla ôh Jỡc sơchih.29Nữn la kơyua hagĩq yơu nữn tũq hũ jàq hlãq trôh sì, ôh kơmlah ngãq jơdrãq gĩq. Yơu nữn, hlãq ưng tơnĩa, kơyua kanõh gơtha hagĩq nữn pơnõq ung vrơi mơnuĩh jàq hlãq?30Kot-nai drơ: “Pàq harơi hlơu, kung mĩn jơ nĩ ãn tũq hlãq iơu lakơu dơlãp sàc drơi dơlãp tũq jơ bãc salơpãn, nữn dĩh, hũ sa aràc mơnuĩh chồq ao sơdah gơchràq dòq dỡc di anãq hlãq,31Mơnuĩh nữn đơp: ‘Kot-nai, pơnuaĩq iơu lakơu sơai song hũ hmỡq sì dơgrữq kaya mơnã ung hũ dõc vrơi ga mơnuĩh rơbah song hũ sơdor trôh di anãq Yàc Pô Lơngĩq.32Yơu nữn, iỡuq pơđar mơnuĩh trôh pãq Jôp-be sì jàq sa aràc mơnuĩh angãn Si-môn iơu la Pier: mơnuĩh ãn dòq pãq sàc hũ Si-môn, sa aràc mơnuĩh khưh rgơi ngãq kalìq, jẽq gah tơsìq.’33Vloh tũq nữn mữ hlãq pơđar mơnuĩh nao Jàq ung trôh ung la iỡuq viãq. Nữn, tũq nĩ, avih dơgrữq pơnõq hlãq kaya song dòq nĩ pãq anãq Yàc Pô Lơngĩq, pioh hmỡq dơgrữq pơnuaĩq song hũ Yàc pơto pơđar ga ung iỡuq đơp.”34Vloh Pier pơh sãp, đơp: “Viãq, hlãq thơu làiq Yàc Pô Lơngĩq ôh iỡuq Pitao iãq ôh srãp mơnuĩh halơi ôh.35Pa-vlữq wỡq, nữn dơlãp dơgrữq vual vơla, mơnuĩh halơi duh huaĩq pitrai sì ngãq kaya tơpãq dãng, nữn hũ pitrai tồq mãq.36Pơnuaĩq nữn Pitrai song pơyua ga anàq tơcho Is-ra-el, tũq akhàt tơviãq pơnuaĩq siàp mưng kaya dadu lơngai kơyua mưng Yàc Dõc Pơ-tlah Je-su — Pitrai la Yàc avih dơgrữq vual vơla —37pơnõq ung kung thơu pơnuaĩq hũ akhàt vrơi ràc pa-tơviãq dơgrữq phũm Ju-đe, pơdòq pãq Ga-li-le hadơi sì adãt bãp-tem nữn Jãng song pơto akhàt làiq,38Je-su mơnuĩh Na-sa-ret, song hũ Yàc pô lơngĩq pa-vuh mơnhàq mưng Yàc vơngãq sơđah sì gơnuar chơnuãq, vloh Pitrai nao anĩh nĩ anĩh dih ngãq vruãq lơngai sì pasồq pakhơĩh avih dơgrữq mơnuĩh kađòc kamlai ãp tơma; kơyua Yàc pô lơngĩq dòq sì Pitrai.39Pơnõq hlãq la mơnuĩh ngãq chưng mưng avih kaya dơgrữq vruãq nữn Pitrai song ngãq dơlãp lơgar mơnuĩh Ju-đa hũ sì kung yơu pãq Je-ru-sa-lem. Pơnõq nhũ song pa-mơtai Pitrai mưng pơnẽq ơteh Pitrai pãq dlòc kayơu pỡc.40Yơu nữn Yàc Pô Lơngĩq song ngãq Pitrai hadiuq wỡq dơlãp harơi bãc tlơu, sì vrơi ga Pitrai pabôh tơviãq savĩq nĩq nũn,41ôh iỡuq vrơi ga avih dơgrữq mơnuĩh, nữn mĩn vrơi ga dơgrữq mơnuĩh ngãq chưng Yàc Pô Lơngĩq song hũ duỡt ruãh mưng halơu, nữn pơnõq hlãq nĩ, la dơgrữq mơnuĩh song bõc sì mơnhũm sigỡuq sì Pitrai, hadơi sì tũq Pitrai mưng kaya mơtai hadiuq wỡq.42Pitrai vrơi ga pơnõq hlãq iỡuq pơto akhàt ga vual vơla, sì ngãq chưng sa vĩq nĩq nũn làiq Je-su la Pitao nữn Yàc Pô Lơngĩq song duỡt ruãh pioh ngãq Pitao chahrơna mơnuĩh hadiuq gãm sì mơnuĩh mơtai.43Avih dơgrữq mơnuĩh gơnuar hwơr hũ ngãq chưng mưng Pitrai làiq, aràc asơi pãc tui Pitrai ròq tồq mãq hũ kaya wàq tơleh dlàiq dơnũh gơnang di angãn Pitrai.”
44Dơlãp tũq Pier gam dòq ãn đơp, dơgrữq pơnuaĩq nĩ nữn Yàc Vơngãq Sơđah trỗt pãq dlòc dơgrữq mơnuĩh ãn hmỡq pơnuaĩq mưng ung.45Dơgrữq mơnuĩh tui song ãt adãt sìq kalìq — la avih dơgrữq mơnuĩh nao sigỡuq sì Pier — hũ mãq ngãq krơi, kơyua kaya vrơi Yàc Vơngãq Sơđah kung hũ tôh tơviãq pãq dlòc vual vơla lơniãu.46Kơyua pơnõq nhũ hmỡq dơgrữq mơnuĩh lơgar lơniãu nĩ đơp mưng dơgrữq sãp krơi sì sơuỗt mơyòp Yàc Pô Lơngĩq vloh Pier tơnĩa:47“Hũ asơi pơlih khĩn mãq pakỡuq dơgrữq mơnuĩh nĩ pioh ôh ngãq bãp-tem mưng ia, nữn la dơgrữq mơnuĩh song tồq mãq Yàc Vơngãq Sơđah kung yơu pơnõq drơi?”48Vloh Pier pơđar ga pơnõq nhũ ãt ngãq Bãp-tem dơlãp angãn Yàc Dõc Pơ-tlah Je-su. Hadơi nữn, pơnõq nhũ jàq ung dòq wỡq hadùp harơi tơra.

FAR EAST BROADCASTING COMPANY

https://app.library.bible/content/d703d3283f8af40e