3 John1

1Mơnuĩh pô tơha pơyua ga Gai-ut anĩt duman, la mơnuĩh nữn hlãq khiãng duman dơlãp pơnuaĩq tơpãq.
2Ơ mơnuĩh adơi sơai anĩt duman, dơlãp dơgrữq kaya, hlãq lakơu ga sơai hũ kaya pơtuah pơtuai, vloh hũ gãm vơnah rơlo rùp prãn khãc drưh yơu vơnah gah suàt vơngãq sơai ãn hũ pơtuah pơtuai.3Kơyua hlãq uỗt sơh viãq dơlãp tũq pơnõq adơi sơai trôh sì ngãq chưng kaya tơpãq viãq mưng sơai, tui yơu kaya sơai mĩn ãn yàp nao dơlãp pơnuaĩq tơpãq.4Hlãq ôh hũ kaya uỗt sơh halơi prõng rlao dơgrữq kaya nĩ, nữn la hlãq pơlih hmỡq làiq anàq tơcho drơi hũ ãn yàp nao dơlãp pơnuaĩq tơpãq.
5Ơ mơnuĩh adơi sơai anĩt duman, sơai ãn dòq ngãq nao savĩq tui tơpãq dơlãp voh-tui avih dơgrữq kaya hagĩq nữn sơai pơlih ngãq ga adơi sơai, vloh kung ngãq kaya nữn ga dơgrữq mơnuĩh thuãi chrih mĩn,6la dơgrữq mơnuĩh song ngãq chưng mưng kaya khiãng duman sơai hũ di anãq sàc Pơjũm Sơđah. Sơai ròq ngãq savĩq wil tãl tũq va pa-lơnguãq pơnõq nhũ nao jơlàt savĩq đang mang di anãq Yàc Pô Lơngĩq,7kơyua pơnõq nhũ song tơviãq nao kơyua mưng Angãn nữn, tũq ôh tồq mãq kaya hagĩq mưng dơgrữq vual vơla lơniãu.8Yơu nữn pơnõq drơi iỡuq tồq ròq dơgrữq mơnuĩh yơu nữn, pioh ga pơnõq drơi tơviãq jỡc dơgrữq mơnuĩh ngãq vruãq sigỡuq ga pơnuaĩq tơpãq.
9Hlãq song wãq hadùp pơnuaĩq ga sàc pơjũm sơđah, nữn Đi-ô-trep, la mơnuĩh ưng apãt akõq dơgrữq aràc, ôh ưng tồq ròq pơnõq hlãq.10Kơyua mưng kanõh gơtha nĩ, mơyah làiq hlãq trôh, hlãq ròq iãq mưng dơgrữq vruãq ngãq ung nữn hũ sì ung nữn ãn ngãq tũq đơp pơdah pơnõq hlãq mưng dơgrữq pơnuaĩq đơp iãh mơsãc. Sì tũq nữn mĩn ka-ôh siàp hatai sì dơgrữq vruãq nữn, ung nữn ôh ưng tồq ròq pơnõq adơi sơai, vloh ung nữn kung mãq pakỡuq dơgrữq mơnuĩh hlơi hũ hatai tồq ròq sì pơtiãuq prôh pơnõq nhũ tơviãq tlah mưng sàc pơjũm sơđah.
11Ơ mơnuĩh adơi sơai anĩt duman, juơi mơgrũ đõm ngãq kaya mơsãc, nữn iỡuq mơgrũ đõm ngãq kaya siàp. Mơnuĩh halơi ngãq siàp nữn pơweh pa Yàc Pô Lơngĩq, dòq mơnuĩh halơi ngãq kaya mơsãc nữn ôh-ka bôh Yàc Pô Lơngĩq.
12De-ma-tri-us hũ pơnuaĩq ngãq chưng siàp mưng dơgrữq mơnuĩh sì mưng pơnuaĩq tơpãq. Vơnãh tơmo, pơnõq hlãq kung ngãq chưng wỡq, sì sơai thơu làiq pơnuaĩq ngãq chưng pơnõq hlãq hũ la kaya tơpãq viãq.
13Hlãq hũ lũ kaya ưng wãq ga sơai, nữn hlãq ôh ưng angui ia nhõm sì gai wãq pioh wãq pơyua ga sơai.14Nữn hlãq chơkhãq khiãng sơmar trôh pãp sơai, sì pơnõq drơi ròq đơp dlài mơta pa-sơmũ mơta.15Lakơu kaya dadu lơngai dòq sigỡuq sì sơai. Dơgrữq ban mơyơu pãq đĩ hũ pơnuaĩq chuãq rơwãc sơai. Lakơu pơyua pơnuaĩq chuãq rơwãc dơgrữq ban mơyơu pãq đỡn tui mưng angãn dơgrữq tãl aràc.

FAR EAST BROADCASTING COMPANY

https://app.library.bible/content/d703d3283f8af40e