2 Corinthians4
1Kơyua mưng kaya nữn, tũq tồq mãq hũ gơnuar vruãq nĩ, kung drưh yơu pơnõq hlãq song tồq mãq hũ kaya khiãng duman mưng Yàc, yơu nữn pơnõq halãq ôh dơvlữq hatai.2Pa-vlữq wỡq, pơnõq hlãq song kơmlah luơi dơgrữq vruãq ngãq padỡuq dơđỡuq đang mang mơlơu ơlah, pơnõq hlãq ôh bõc dòq dơlãp kaya vlữq lor, kung ôh akhàt suẽl Pơnuaĩq Yàc Pô Lơngĩq, nữn la ngãq mưng vruãq ràc pa-tơviãq pơnuaĩq tơpãq, pơnõq hlãq ngãq ga tũc hatai dơgrữq mơnuĩh ngãq chưng ga pơnõq hlãq di anãq Yàc Pô Lơngĩq.3Nữn vloh mơyah làiq Pơnuaĩq Siàp pơnõq drơi hũ kađòc vơvãc dơđỡuq, sì nữn la song kađòc vơvãc dơđỡuq di khrãh dơgrữq mơnuĩh lơhiãq thĩt,4nữn di khrãh tơpuôl nhũ, yàc rài nĩ song ngãq vùp dlò sơnơng dơgrữq mơnuĩh ôh pãc-tui nữn hũ, tơviãq jỡc kaya sơdah Pơnuaĩq Siàp gơhluh Yàc Dõc Pơ-tlah hũ, Pitao la sẽq vơlai Yàc Pô Lơngĩq hũ, ôh pơsàc sơdah dơlãp pơnõq nhũ.5Kơyua pơnõq hlãq ôh ràc akhàt mưng rùp phuỗt drơi, nữn mưng Yàc Dõc Pơ-tlah Je-su, la Yàc, dòq rùp phuỗt pơnõq hlãq kơyua mưng Yàc Je-su nữn duh vruãq pơnõq adơi sơai.6Kơyua viãq mĩn Yàc Pô Lơngĩq, Pitao song đơp: “Kaya sơđah ròq pơsàc dơlãp kaya sồp kơnãm,” la Pitao song pơsàc dơlãp hatai pơnõq hlãq, pioh vrơi kaya sơdah mưng kaya pãc thơu kaya gơhluh Yàc Pô Lơngĩq dòq di anãq Yàc Dõc Pơ-tlah Je-su.7Nữn pơnõq hlãq pioh kaya màc nĩ dơlãp dơgrữq kadoh ngãq mưng hlùq tliãq, pioh gơnuar chơnuãq nữn prõng rlao avih la mưng Yàc Pô Lơngĩq, mĩn ôh iỡuq la mưng pơnõq hlãq ôh;8pơnõq hlãq la dơgrữq mơnuĩh ãt dleh dlàr tãl dơgrữq kaya, nữn ôh kađòc juãq jơlì; pơnõq hlãq ka-ồq huaĩq, nữn ôh dơvlữq hatai;9pơnõq hlãq kađòc mãq pakỡuq, nữn ôh kađòc tlàq luơi; ãt pa-lơvuh trỗt, nữn ôh kađòc pa-lơhiãq;10pơnõq hlãq gãm va dơlãp rùp phàp drơi kaya mơtai Yàc Je-su hũ nao vãq avih anĩh, pioh kaya hadiuq Yàc Je-su kung pơlih hũ ràc tơviãq dơlãp rùp phàp pơnõq hlãq;11kơyua bôh làiq pơnõq hlãq dòq hadiuq, nữn pơnõq hlãq gãm kađòc pơjao ga kaya mơtai kơyua mưng Yàc Je-su, tồq kaya hadiuq Yàc Je-su kung hũ ràc tơviãq dơlãp rơlo rùp vrũq lơmuĩq pơnõq hlãq hũ.12Yơu nữn, kaya mơtai ngãq vruãq dơlãp pơnõq hlãq, dòq kaya hadiuq ngãq vruãq dơlãp pơnõq adơi sơai.13Nữn pơnõq hlãq hũ sa hatai sigỡuq dơlãp voh tui yơu pơnuaĩq song wãq: “Hlãq pãc-tui, nữn hlãq đơp.” Pơnõq hlãq kung pãc-tui, kơyua nữn pơnõq hlãq kung đơp.14Kơyua thơu làiq Pitao song ngãq ga Yàc Je-su hadiuq wỡq kung ròq ngãq ga pơnõq hlãq hadiuq wỡq sì Yàc Je-su, sì ràc tơviãq pơnõq hlãq sigỡuq sì pơnõq adơi sơai.15Viãq, dơgrữq vruãq nữn kung kơyua mưng pơnõq adơi sơai, pioh ga kaya anĩt brõq miẽt pơtãl dơlah dơlai ga lũ mơnuĩh rlao, pơlih ngãq ga kaya ỡn ngai pơtãl dơlah dơlai pioh ga kaya gơhluh Yàc Pô Lơngĩq hũ.16Yơu nữn, pơnõq hlãq ôh dơvlữq hatai. Bôh làiq yơu nữn, vloh mơyah làiq mơnuĩh gah lơniãu pơnõq hlãq kađòc vrũq lơmuĩq, nữn mơnuĩh gah dơlãp pơnõq hlãq hũ vơhrơu miẽt brõq harơi.17Kơyua mưng kaya rũc rài sa-iỡl sì padơh ãn pajỡc tơviãq dơlãp pơnõq hlãq sa kaya gơhluh dòq gãm gãm tơpa rlao ôh luôĩq,18tũq pơnõq hlãq ôh pơwih iãq dơgrữq kaya bôh jỡc, nữn la iãq dơgrữq kaya ôh bôh jỡc. Kơyua dơgrữq kaya bôh jỡc mĩn la padơh soh, dòq dơgrữq kaya ôh bôh jỡc la dòq tãl gãm gãm.
FAR EAST BROADCASTING COMPANY