1 Timothy1

1Pol, mơnuĩh gơnuar pơđar Yàc Dõc Pơ-tlah Je-su tui gơnuar pơđar Yàc Pô Lơngĩq hũ, Yàc Dõc pơnõq drơi, sì Yàc pơnõq drơi, la Yàc Dõc Pơ-tlah Je-su hũ, kaya chơkhãq chàc pơnõq drơi hũ,2pơyua ga Ti-mô-the, anàq viãq kơu hũ dơlãp voh tui: Lakơu anàq hũ kaya anĩt, kaya anĩt duman, kaya dadu lơngai mưng Yàc Pô Lơngĩq, la Ama sì Yàc Dõc Pơ-tlah Je-su, Yàc pơnõq drơi.
3Yơu tũq song nao jơlàt trôh Ma-se-đoan, kơu song pơđar anàq dòq wỡq pãq E-phe-sô pioh anàq pơlih pơto pa-sơdor ga dơgrữq mơnuĩh dih juơi pơto akhàt pơnuaĩq jơlàt duh talơvãt tơmo,4kung juơi chẽq hatai trôh dơgrữq pơnuaĩq tơkal đơp pơđĩc ling lang sigỡuq sì dơgrữq vlah sơrãq mơta ung kõq ôh luôĩq, la dơgrữq kaya va trôh kaya mơvlah gơrlah, rlao di vruãq apãt akõq sàc Yàc Pô-lơngĩq, la vruãq ngãq mưng voh tui.5Nữn sa kanõh vruãq gơnuar pơđar nĩ hũ la kaya khiãng duman tơviãq mưng hatai sơđah sơchih sì tũc hatai siàp sigỡuq sì voh tui tơpãq viãq,6nữn hũ tơkìq mơnuĩh, kơyua ngãq suẽl kaya kanõh nữn, song tlàq luơi pioh pơweh trôh vruãq vơyai gơla pơtòq sì lơhiãq soh,7ưng ngãq mơnuĩh pồ pơto voh-va, nữn vloh ôh thơu pãc ôh iỡuq mĩn dơgrữq pơnuaĩq drơi đơp nữn dòq mưng dơgrữq kaya drơi ngãq gơnĩt.
8Bôh làiq, pơnõq drơi thơu làiq voh-va la siàp mơyah làiq anàq mơnuĩh angui nhũ savĩq iỡuq viãq,9kơyua thơu kaya nĩ, nữn la voh-va ôh hũ pồq padỡc tơviãq ga mơnuĩh tơpãq dãng, nữn vrơi ga mơnuĩh ôh hũ voh-va sì ôh kơmlah tlàq, mơnuĩh ôh duh huaĩq sì dlàiq dơnũh, mơnuĩh ôh pãc-tui jơlàt duh talơvãt sì mơnuĩh tlao siẽq siẽl, mơnuĩh pa-mơtai ama sì pa-mơtai ami, mơnuĩh pa-mơtai mơnuĩh,10mơnuĩh arĩh athãm, mơnuĩh ngãq drì drõc lakơi dơdlãq sì lakơi, mơnuĩh duah mãq mơnuĩh sì pa-vlơi mơnuĩh, mơnuĩh đơp lor, mơnuĩh ngãq chưng vlữq lor, sì avih dơgrữq mơnuĩh halơi tơmo sòq jơdrãq sì kaya pơto pơđar tơpãq siàp11iỡuq tui yơu Pơnuaĩq Siàp gơhluh Yàc Pô Lơngĩq dadu lơngai hũ, la kaya nữn kơu song hũ pơjao vrơi.
12Kơu ỡn ngai Pitao vrơi gơnuar prãn ga kơu, nữn la Yàc Dõc Pơ-tlah Je-su, Yàc pơnõq drơi, kơyua Pitrai song iãq pơwih kơu la đang mang sì chãc gơnang, tũq padỡc kơu tơma dơlãp kaya duh vruãq,13bôh làiq halơu thrơi kơu la mơnuĩh gãm đơp savĩl, mơnuĩh mãq pakỡuq sì brưh mơsãc, nữn kơu ròq hũ kaya anĩt duman kơyua ãn dơlãp tũq ôh thơu pãc, kơu song ngãq tơviãq dơlãp kaya ôh pãc-tui.14Nữn, kaya anĩt Yàc pơnõq drơi hũ viãq la vãq sơrè sigỡuq sì voh tui sì kaya khiãng duman dơlãp Yàc Dõc Pơ-tlah Je-su.
15Pơnuaĩq Yàc nĩ la gơnĩt viãq sì đang mang sì pãc-tui sì tồq mãq mãq wil tãl, nữn la, “Yàc Dõc Pơ-tlah Je-su song trôh dơlãp dun kơyua pioh dõc suãq mơnuĩh dlàiq,” — sì dơlãp đỡn kơu la mơnuĩh dlàiq tơrãq rlao avih.16Bôh làiq, kơu hũ khiãng anĩt kơyua kanõh nĩ, nữn la pioh Yàc Dõc Pơ-tlah Je-su pơlih ràc tơviãq avih dơgrữq hatai ãt-ỡl dơlãp kơu, la mơnuĩh dlàiq dơnũh hlơu vih, yơu kaya pa-mơyơu ga dơgrữq mơnuĩh ròq pãc-tui di Pitrai pioh hũ kaya hadiuq dòq gãm gãm.17Lakơu kaya sơ-uỗt mơyòp sì kaya gơhluh pơweh sì Pitao dơgrữq rài hũ, la Yàc Pô Lơngĩq ôh tũq halơi lơhiãq thĩt, ôh bôh rùp jỡc, tãl trôh gãm gãm ôh luôĩq. A-men.
18Ti-mô-the, anàq kơu, kơu pơjao gơnuar pơđar nĩ ga anàq, tui yơu dơgrữq pơnuaĩq gơnuar hwơr hlơu thrơi mưng anàq, pioh gơnang mưng đỡn, anàq pơlih gơluh mơsôh dơlãp kaya mơsôh atòc prõng màc,19tũq apãt rơmiãq voh tui sì tũc hatai siàp, sì hũ sa sĩt mơnuĩh, kơyua kơmlah luơi, song ngãq krãp nhĩp voh tui drơi,20dơlãp katih nữn la Hy-me-ne sì A-lec-san-đơ, la dơgrữq mơnuĩh sì kơu song pơjao pơnõq nhũ ga Sa-tan pioh ga pơnõq nhũ pơlih hũ mơgrũ thơu ôh đơp savĩl tơra.

FAR EAST BROADCASTING COMPANY

https://app.library.bible/content/d703d3283f8af40e