1 Thessalonians2
1Pa-thơu pơnõq adơi sơai, rùp phuỗt pơnõq adơi sơai thơu làiq vruãq pơnõq hlãq nao trôh sì pơnõq adơi sơai la hũ kuơ ga adơi sơai.2Nữn hadơi sì tũq ãt dleh dlàr sì kađòc siẽq siẽl pãq palơi Phi-lip tui yơu pơnõq adơi sơai song thơu, pơnõq hlãq hũ chãc khĩn dơlãp Yàc Pô Lơngĩq pơnõq hlãq hũ pioh pơto akhàt ga pơnõq adơi sơai Pơnuaĩq Siàp Yàc Pô Lơngĩq hũ di khrãh lũ kaya mơvlah mơsôh.3Kơyua vruãq pơto pơđar pơnõq hlãq hũ ôh iỡuq tơviãq mưng kaya sỗq suẽl, kung ôh trôh mưng hatai tasỡuq nrãc, hẽla kơyua mưng kaya sơnơng vlữq lor,4nữn pơnõq hlãq song hũ Yàc Pô Lơngĩq lòc pioh pơjao vrơi Pơnuaĩq Siàp yơu halơi, nữn pơnõq hlãq kung đơp tơviãq yơu nữn, ôh iỡuq pioh ngãq siàp hatai anàq mơnuĩh, nữn pioh ngãq siàp hatai Yàc Pô Lơngĩq, Pitrai la Pitao iãq pơwih hatai pơnõq hlãq.5Yơu pơnõq adơi sơai song thơu, tũq nữn pơnõq hlãq ôh trôh đơp mưng dơgrữq pơnuaĩq đơp lavơr, hẽla kơyua mưng pơnẽq vơvãc hatai ham guãm — hũ Yàc Pô Lơngĩq ngãq chưng ga pơnõq hlãq —6kung ôh duah iãq kaya gơhluh mưng pơjẽh anàq mơnuĩh, ôh iỡuq mưng pơnõq adơi sơai hẽla mưng mơnuĩh tơmo,7bôh làiq pơlih hũ ki ngãm tồq ròq kơyua la mơnuĩh gơnuar pơđar Yàc Dõc Pơ-tlah hũ, nữn dòq di khrãh pơnõq adơi sơai, pơnõq hlãq ngãq yơu dơgrữq anàq tìt vơhrơu đeh, yơu mơnuĩh ami iỡuq ròc chiẽp siàp anàq drơi.8Kơyua pơnõq hlãq khiãng duman pơnõq adơi sơai yơu nữn, nữn pơnõq hlãq siàp hatai pa-mơpha sì pơnõq adơi sơai ôh mĩn Pơnuaĩq Siàp Yàc Pô Lơngĩq hũ, nữn gãm kaya hadiuq pơnõq hlãq hũ wỡq. Nữn la kơyua mưng pơnõq adơi sơai song tơviãq jỡc dơgrữq mơnuĩh anĩt anar viãq pơweh sì pơnõq hlãq.9Pa-thơu pơnõq adơi sơai, viãq la pơnõq adơi sơai dòq sơdor lơĩh kaya vruãq ngãq sì dleh dlàr pơnõq hlãq hũ, pơnõq hlãq song ràc tơviãq Pơnuaĩq Siàp Yàc Pô Lơngĩq hũ ga pơnõq adơi sơai dơlãp tũq gãm dòq ngãq vruãq mơlãp harơi pioh ôh ngãq dleh trôh ga avih dơgrữq asơi dơlãp pơnõq adơi sơai.10Pơnõq adơi sơai la mơnuĩh ngãq chưng, sì Yàc Pô Lơngĩq kung ngãq chưng, làiq pơweh sì pơnõq adơi sơai, la dơgrữq mơnuĩh hũ hatai pãc-tui, pơnõq hlãq song hadiuq sơđah sơchih, tơpãq dãng, sì ôh hũ kaya halơi pioh gơrloh pơkhè yơu hayơu,11kung yơu pơnõq adơi sơai song thơu, yơu halơi pơnõq hlãq pơweh sì sa aràc mơnuĩh dơlãp pơnõq adơi sơai, yơu mơnuĩh ama pơweh sì anàq tơcho drơi,12pơto sơdor pơnõq adơi sơai, sì paluơ padờp sì pachôh pasũl pơnõq adơi sơai pioh bõc dòq savĩq đang mang salơvãq sì Yàc Pô Lơngĩq, Pitao iơu pơnõq adơi sơai tơma dơlãp palơi lơgar sì kaya gơhluh Pitrai hũ.13Kơyua mưng kaya nữn, pơnõq hlãq kung ôh padưh kaya ỡn ngai Yàc Pô Lơngĩq, kơyua tũq tồq mãq pơnuaĩq Yàc Pô Lơngĩq mưng vruãq pa-hmỡq mưng pơnõq hlãq akhàt, pơnõq adơi sơai song tồq mãq nhũ ôh iỡuq yơu pơnuaĩq anàq mơnuĩh hũ, nữn tui yơu iỡuq sì kaya tơpãq viãq nữn la pơnuaĩq Yàc Pô Lơngĩq hũ, kung la kaya ãn ngãq vruãq dơlãp pơnõq adơi sơai, nữn la dơlãp dơgrữq mơnuĩh hũ hatai pãc-tui.14Pa-thơu pơnõq adơi sơai, pơnõq adơi sơai song tơviãq jỡc dơgrữq mơnuĩh đõm tui dơgrữq sàc pơjũm sơđah Yàc Pô Lơngĩq hũ, la dơgrữq sàc pơjũm sơđah dơlãp Yàc Dõc Pơ-tlah Je-su dòq pãq phũm Ju-đe, kơyua pơnõq adơi sơai song ãt sigỡuq dơgrữq kaya dleh dlàr kơyua mưng vual vơla drơi, drưh yơu dơgrữq sàc pơjũm sơđah nữn kung song ãt mưng mơnuĩh Ju-đa,15la dơgrữq mơnuĩh song vơhrơu pa-mơtai Yàc, la Yàc Je-su, gãm sì dơgrữq mơnuĩh gơnuar hwơr, kung mãq pakỡuq pơnõq hlãq, sì kung la dơgrữq mơnuĩh ôh ngãq siàp hatai Yàc Pô Lơngĩq, vloh dòq ngãq jơdrãq sì dơgrữq aràc,16tũq mãq pakỡuq pơnõq hlãq pơto akhàt ga vual vơla lơniãu pioh lũ mơnuĩh pơlih hũ dõc pơ-tlah, yơu nữn pơnõq nhũ ngãq ga dlàiq dơnũh pơnõq nhũ pơtãl rlao wỡq. Nữn trôh luôĩq hadơi, kaya ơnõc mơvai prõng viãq ròq pa-trỗt pãq dlòc pơnõq nhũ.17Pa-thơu pơnõq adơi sơai, bôh làiq pơnõq hlãq kađòc dòq atah sì pơnõq adơi sơai dơlãp sa tũq lơwah, bôh làiq atah bòq mơta nữn ôh atah la-ô hatai, hatai pơnõq hlãq mơ-ôh sơkuãq viãq dơlãp kaya ưng nao pioh pãp bòq mơta pơnõq adơi sơai.18Yơu nữn, pơnõq hlãq ưng nao trôh rơwãc pơnõq adơi sơai — viãq, rùp phuỗt hlãq, Pol, hadùp bãc sơga nao — nữn Sa-tan song chơkhãq pakỡuq pơnõq hlãq.19Kơyua kaya chơkhãq chàc, hẽla kaya uỗt sơh, hẽla chrang mữh ngãq ga pơnõq hlãq hũ pa-prõc rùp la hagĩq? Ôh iỡuq nữn la pơnõq adơi sơai dòq di anãq Yàc pơnõq drơi, la Yàc Je-su, dơlãp kaya pabôh Pitrai hũ yơh?20Viãq, rùp phuỗt pơnõq adơi sơai la kaya gơhluh sì kaya uỗt sơh pơnõq hlãq hũ yơu nữn.
FAR EAST BROADCASTING COMPANY