1 Corinthians2
1Pa-thơu pơnõq adơi sơai, tũq hlãq nao trôh chuãq rơwãc pơnõq adơi sơai, hlãq kung trôh song ôh angui pơnuaĩq đơp dloòng viãq hẽla kaya jãc rgơi, pioh akhàt vrơi pa-thơu ga pơnõq adơi sơai kaya dơlãp dơđỡuq Yàc Pô Lơngĩq hũ.2Kơyua di khrãh pơnõq adơi sơai, hlãq song ngãq gơnĩt ga drơi la ôh thơu hagĩq lơniãu Yàc Dõc Pơ-tlah Je-su sì vruãq Pitrai song kađòc pỡc đĩn pãq dlòc kayơu pỡc.3Hlãq kung song dòq sigỡuq sì pơnõq adơi sơai dơlãp kaya lơduh lơmuỡn, dơlãp kaya tơtơh huaĩq sì tơtơh drơi viãq.4Pơnuaĩq đơp hlãq hũ sì kaya pơto akhàt hlãq hũ ôh pa-sơmũ yơu dơgrữq pơnuaĩq pơto akhàt dui-va viãq mưng dlò sơnơng khưh rgơi, nữn la mưng kaya ràc pa-tơviãq Vơngãq Sơđah sì gơnuar chơnuãq hũ,5pioh voh-tui pơnõq adơi sơai ôh gơnang mưng kaya jãc rgơi anàq mơnuĩh hũ, nữn la gơnang mưng gơnuar chơnuãq Yàc Pô Lơngĩq hũ.6Nữn di khrãh dơgrữq mơnuĩh prãn khãc dơlãp voh-tui, pơnõq hlãq pơto akhàt kaya jãc rgơi, nữn ôh iỡuq kaya jãc rgơi rài nĩ hũ, kung ôh iỡuq dơgrữq gơnuar apãt akõq rài nĩ, la dơgrữq mơnuĩh kađòc lơhiãq thĩt.7Pa-vlữq wỡq, pơnõq hlãq pơto akhàt kaya jãc rgơi Yàc Pô Lơngĩq hũ dơlãp kaya dơlãp dơđỡuq, la kaya gãm hũ padỡuq dơđỡuq nữn Yàc Pô Lơngĩq song rơchãc gơnĩt mưng hlơu dơgrữq rài pioh ga kaya gơhluh pơnõq drơi hũ,8la kaya nữn ôh hũ sa aràc asơi dơlãp dơgrữq mơnuĩh apãt akõq rài nĩ pãc jỡc, kơyua mơyah làiq pơnõq nhũ pãc jỡc, nữn viãq làiq pơnõq nhũ song ôh pỡc đĩn Yàc gơhluh pãq dlòc kayơu pỡc.9Bôh làiq yơu nữn, yơu hũ pơnuaĩq wãq:“Kaya mơta ôh ka bôh,tanĩa ôh ka hmỡq,sì dơlãp hatai anàq mơnuĩh ôh ka sơnơng bôh,la dơgrữq kaya nữn Yàc Pô Lơngĩq song rơchãc lơĩh ga dơgrữq asơi khiãng anĩt Pitrai.”10Kơyua Yàc Pô Lơngĩq song pabôh tơviãq ga pơnõq hlãq mưng Vơngãq Sơđah. Kơyua Vơngãq Sơđah chahrơna dơgrữq kaya, gãm sì avih dơgrữq kaya dơlãp dơđỡuq Yàc Pô Lơngĩq hũ.11Kơyua asơi di khrãh anàq mơnuĩh thơu jỡc dơgrữq kaya dơlãp sa aràc mơnuĩh, mơyah làiq ôh iỡuq la vơngãq yuà mơnuĩh nữn hũ dòq gah dơlãp rùp phuỗt mơnuĩh nữn? Kung yơu nữn, ôh asơi kơnãl thơu dơgrữq kaya pơweh sì Yàc Pô Lơngĩq, lơniãu Vơngãq Sơđah Yàc Pô Lơngĩq hũ.12Nữn pơnõq hlãq song ôh tồq mãq vơngãq dun kơyua nĩ hũ, nữn la Vơngãq Sơđah trôh mưng Yàc Pô Lơngĩq, tồq ga pơnõq hlãq pơlih thơu jỡc dơgrữq kaya alĩn mưng Yàc Pô Lơngĩq vrơi soh ga pơnõq drơi,13kung la dơgrữq kaya nữn pơnõq hlãq pơto akhàt, ôh iỡuq mưng kaya pơto pơđar kơyua mưng dơgrữq pơnuaĩq đơp jãc rgơi anàq mơnuĩh hũ, nữn la mưng kaya pơto pơđar Vơngãq Sơđah hũ, dơlãp tũq ràc pa-tơviãq dơgrữq kaya gah suàt vơngãq kơyua mưng dơgrữq pơnuaĩq gah suàt vơngãq.14Nữn mơnuĩh tui gah vơnah rơlo rùp nĩ nữn ôh tồq mãq dơgrữq kaya pơweh mưng Vơngãq Sơđah Yàc Pô Lơngĩq hũ, kơyua nhũ la kaya gơla pơtòq pơweh sì mơnuĩh nữn, sì mơnuĩh nữn ôh tũq halơi rgơi thơu pioh thơu pãc kơyua pơnõq nhũ iỡuq iãq pơwih pơyòp tui yơu gah suàt vơngãq.15Dòq mơnuĩh gah suàt vơngãq iãq pơwih pơyòp dơgrữq vruãq, nữn rùp phuỗt drơi vloh ôh kađòc mơnuĩh halơi rgơi iãq pơwih pơyòp.16“Kơyua mơnuĩh halơi thơu jỡc dlò sơnơng Yàc hũ — mơnuĩh halơi ròq pơto pơđar Pitrai?”Dòq pơnõq drơi nữn hũ dlò sơnơng Yàc Dõc Pơ-tlah hũ.
FAR EAST BROADCASTING COMPANY