1 Corinthians12
1Dòq pơweh sì dơgrữq kaya anĩt gah vơngãq, pa-thơu pơnõq adơi sơai, hlãq ôh ưng pơnõq adơi sơai vloh ôh thơu hagĩq.2Pơnõq adơi sơai thơu làiq tũq drơi dòq la mơnuĩh gah lơniãu, pơnõq adơi sơai ròq kađòc dui-va tui yơu pơnẽq halơi nữn, tũq kađòc pa-gơla pơweh pa dơgrữq rùp rãp kamlo.3Kơyua yơu nữn, hlãq akhàt ga pơnõq adơi sơai thơu làiq ôh hũ mơnuĩh halơi hũ pơnuaĩq đơp mưng Vơngãq Sơđah Yàc Pô Lơngĩq hũ nữn vloh đơp: “Je-su la mơnuĩh đang mang sơtãp lơmah!”, sì mơyah làiq ôh kơyua mưng Yàc Vơngãq Sơđah, ôh asơi pơlih hũ tồq angãn “Yàc Je-su la Yàc.”4Vơnah tơmo, hũ lũ kaya krơi di gỡuq mưng dơgrữq kaya anĩt, nữn kung mĩn hũ sa Yàc Vơngãq Sơđah sigỡuq.5Hũ lũ kaya krơi dì gỡuq mưng dơgrữq gơnuar vruãq ngãq, nữn mĩn hũ sa Yàc sigỡuq.6Hũ lũ kaya krơi di gỡuq mưng dơgrữq vruãq, nữn mĩn hũ sa Yàc Pô Lơngĩq sigỡuq, la Pitao ngãq dơgrữq vruãq dơlãp avih tãl aràc.7Nữn kaya ràc tơviãq Yàc Vơngãq Sơđah hũ vrơi ga avih tãl aràc pioh va wỡq kaya kuơ màc sigỡuq.8Kơyua gơnang di Yàc Vơngãq Sơđah, pơnuaĩq jãc rgơi hũ alĩn vrơi ga mơnuĩh nĩ, dòq pơnuaĩq jãc hũ alĩn vrơi ga mơnuĩh tơmo kung mĩn hũ sa Yàc vơngãq sơđah nữn;9Kơyua kung sa Yàc Vơngãq Sơđah sigỡuq voh-tui hũ alĩn vrơi mơnuĩh nĩ, dòq kaya anĩt pakhơĩh ruãq hũ vrơi alĩn ga mơnuĩh tơmo kơyua mưng sa Yàc Vơngãq Sơđah nữn,10vloh vrơi ga mơnuĩh nĩ, dơgrữq vruãq gơnuar chơnuãq; ga mơnuĩh dih, pơnuaĩq đơp hwơr; vrơi ga mơnuĩh nữn, hũ rgơi thơu pa-chơlah dơgrữq rùp rãp; vrơi ga mơnuĩh tơmo, dơgrữq pơnuaĩq đơp krơi gỡuq; nữn vrơi ga mơnuĩh tơmo wỡq, kaya thơu akhàt pa-tơviãq dơgrữq sãp đơp.11Nữn mĩn Yàc Vơngãq Sơđah sì mĩn hũ sa Yàc Vơngãq Sơđah ngãq tơviãq jỡc dơgrữq vruãq nữn, dơlãp tũq pa mơpha nhũ sa vĩq krơi di gỡuq ga avih dơgrữq tãl aràc tui yơu hatai ưng Pitrai.12Kơyua drưh yơu rùp phàp la sa nữn hũ lũ vơnah, dòq avih dơgrữq vơnah rùp phàp hũ, bôh làiq hũ lũ, kung mĩn la sa rùp phàp; Yàc Dõc Pơ-tlah kung yơu nữn.13Kơyua viãq mưng sa Yàc Vơngãq Sơđah, avih tãl aràc pơnõq drơi hũ ngãq adãt bãp-tem tơma sigỡuq dơlãp sa rùp phàp, bôh làiq la mơnuĩh Ju-đa hẽla mơnuĩh Gơ-rec, bôh làiq mơnuĩh halỗt mơnãq hẽla lơnang lơnai, nữn avih tãl aràc kung hũ mơnhũm sigỡuq sa Yàc Vơngãq Sơđah.14Kơyua rùp phàp ôh iỡuq la sa vơnah rùp phàp, nữn la hũ lũ vơnah.15Mơyah làiq tơkai đơp: “Kơyua hlãq ôh iỡuq la tơngãn, nữn hlãq ôh iỡuq la vơnah dơlãp rùp phàp,” nữn ôh tũq halơi kơyua mưng yơu nữn vloh nhũ ôh pơweh gah vơnah rùp phàp.16Sì mơyah làiq tanĩa đơp: “Kơyua hlãq ôh iỡuq la mơta, nữn hlãq ôh iỡuq vơnah dơlãp rùp phàp,” nữn ôh tũq halơi kơyua mưng yơu nữn vloh nhũ ôh pơweh gah vơnah rùp phàp.17Mơyah làiq vãq avih rùp phàp la anàq mơta, nữn mãq kaya hagĩq vloh hmỡq? Mơyah làiq vãq avih rùp phàp la lơvàc tanĩa, nữn thơu bơu yơu halơi lơĩh?18Yơu nữn, pa-vlữq wỡq, Yàc Pô Lơngĩq song rơchãc dơgrữq vơnah dơlãp rùp phàp, dơgrữq vơnah ròq ngãq sa vruãq dơlãp nhũ, tui yơu hatai Pitrai ưng.19Mơyah làiq avih dơgrữq kaya mĩn la sa vơnah rùp phàp, nữn rùp phàp dòq pãq halơi?20Kơyua yơu nữn, bôh làiq hũ lũ vơnah rùp phàp, nữn mĩn hũ sa rùp phàp.21Vơnah tơmo, mơta ôh tũq halơi đơp sì tơngãn làiq: “Hlãq ôh chàc trôh tãl sơai ôh,” hẽla akõq kung yơu nữn đơp sì tơkai làiq: “Hlãq ôh chàc trôh tãl sơai.”22Pa-vlữq wỡq, vơnah halơi dơlãp rùp phàp hũ ngãq yơu la lơduh lơmuỡn uãn rơlao nữn la kaya ãn chàc brõq rơlao nữn;23vơnah halơi dơlãp rùp phàp nữn pơnõq drơi iãq ngãq yơu la ôh đang mang nữn pơnõq drơi iỡuq pioh ga nhũ kaya ki ngãm prõng rlao; sì dơgrữq vơnah rùp phàp ôh siàp pơnõq drơi hũ nữn iỡuq pơkhrà siàp lũ rlao wỡq,24dòq dơgrữq vơnah rùp phàp siàp mơkrờ pơnõq drơi hũ vloh nữn ôh chàc yơu nữn tơra. Bôh làiq yơu nữn, Yàc Pô Lơngĩq song mãq pa-tlãp dơgrữq vơnah dơlãp rùp phàp sigỡuq, vrơi pơtãl kaya ki ngãm ga kaya halơi hũ tơkìq ki ngãm,25tồq ôh hũ kaya pa-chơlah krơi dơlãp rùp phàp, nữn vloh dơgrữq vơnah rùp phàp iỡuq sơdor trôh tãl gỡuq.26Tũq sa vơnah ãt pơđìq pơđua, nữn avih tãl vơnah kung ãt pơđìq sigỡuq; sì mơyah làiq sa vơnah rùp phàp hũ sơ-uỗt mơyòp, nữn avih dơgrữq vơnah dih kung uỗt sơh sigỡuq.27Vơnah tơmo, pơnõq adơi sơai la rùp phàp Yàc Dõc Pơ-tlah hũ, sì la sa vơnah dơlãp dơgrữq vơnah rùp phàp hũ krơi di gỡuq.28Yàc Pô Lơngĩq song ngãq gơnĩt padỡc tơgùq tơkìq mơnuĩh dơlãp Sàc Pơjũm Sơđah, hlơu viãq la mơnuĩh gơnuar pơđar, patui nữn la dơgrữq mơnuĩh gơnuar hwơr, bãc tlơu la dơgrữq mơnuĩh pôgrũ, vloh trôh mơnuĩh ngãq kaya chrih krơi, hadơi nữn la hũ kaya anĩt pakhơĩh ruãq, dõc ngãq, apãt akõq, sì đơp jỡc lũ sãp đơp.29Ôh iỡuq la avih tãl aràc kung la mơnuĩh gơnuar pơđar? Ôh iỡuq la avih dơgrữq aràc la mơnuĩh gơnuar hwơr? Ôh iỡuq la avih tãl aràc kung la mơnuĩh pôgrũ yơh? Ôh iỡuq la mơnuĩh halơi kung ngãq kaya krơi tơmo?30Ôh iỡuq la mơnuĩh halơi kung hũ gơnuar pakhơĩh kaya ruãq sơkìq yơh? Ôh iỡuq la avih dơgrữq aràc đơp lũ sãp đơp? Ôh iỡuq la mơnuĩh halơi kung akhàt pa-tơviãq sãp đơp krơi jỡc?31Nữn iỡuq avih hatai chơkhãq khiãng dơgrữq kaya anĩt prong rlao tơra. Dòq mư tũq nĩ, hlãq ròq pơto ga pơnõq adơi sơai hũ sa jơlàt siàp rlao tơra.
FAR EAST BROADCASTING COMPANY