LUK 14 ਪੜ੍ਹੋ

LUK14

¹Den pǝt shukutǝn gon kan Yesu ri bom dǝ bari gon kǝ mǝn Parisa kǝ dǝ tǝ ci fingalo, arni mbarǝm ne ti gere.²Cina da ti eso mbarǝm gon ra mǝn kǝmi asǝm na ame.³Kan Yesu ba tambe mǝn kulci doka na mǝn Parisa tǝ wul wur'e, <<Doka gǝmi wule dǝ warke mbarǝm gas shukutǝna, ko ar wulra da'a?>>⁴Wu wule argon da'a. Yesu ngapo kan tǝ ne am den ba mǝri, tǝ ɗǝli ti kumi dli gǝs ka, tǝ wul ti'e, <<Ndara ndaratin gi.>>⁵Kan tǝ wul wur'e, <<Woni gip kǝn na nya ko tla kan ba nda shuka den pǝt shukutǝni, kan ba ɗǝli ti torka bǝle-bǝle da gwawu?>>⁶Wi ngapo wu zam argon kǝ yari da'a.

Pali gam gi argonni da’a

⁷Nan Yesu shin munju kan yari wur ɗirtǝn kǝ ci fingali den zhotǝn kǝ nǝmi kiri ba dǝmiwo, arni tǝ yari wur shirǝm tǝ wule,⁸<<Murgon ni lakǝn bi kǝ gudlumiwo, ba kǝ nǝmi ni gam gin ba dǝmi kǝ kiri da'a, kǝ mom da'a ko mǝn gudlumiyi yari muntu kan nar man ki gwa.⁹Kǝ shino, ba mǝn gudlumi ba wul ki'e, <Tlǝka dǝ mǝnkǝn dǝm kǝba dǝmi gi tu.> Na shamni ki tli kǝ pal kǝ ba heli ba dǝmi.¹⁰Ra untuwo, dǝmni kǝba heli badǝmi, muntu kan dom kǝnni shin kiwo, ti wul ki'e, <Berǝm, ɗir ɗe,> ti bi'i ho ba dǝmi. Ar ba kem kǝ cir cina dǝ munju kan tǝ laa kǝn bi nan wur gwa.¹¹Muntu kup ɗǝɗa gam gǝso, ba pali tǝ den ti argonni da'a, kup muntu pali gam gǝs tǝ argonni dawo, ba ɗǝɗa ti.>>

¹²Yesu wul babom tu kan la tǝ bi gwa'e, <<Kini ki la bi murgon kǝ ci fingal, kan kǝ la bi jen kǝ biki gwa, ba kǝ la bi berǝm, ko ya'ǝn, ko mǝn gi, ko berǝm dǝmi gi mǝn bar kǝ am katl da'a. Munjuwo, gas jeno wi la ki bi pa. Bar tuwo wi ɓatl ki argon tu kǝ pi wur gwa ituwi.¹³Kin ki la bi mǝn ci fingal gwa, yari munju am ri wur kar da gwa, na kurki, na muju itǝr tle wur am ko asǝmka gwa na tabi.¹⁴Na untun ki zam Albarka, kǝ mom'e munjuwo wi mbu ɓatli gi da'a. Yamni ba ɓatl ki gas tu kan mǝn zo mbatl kan mǝshka ba tlyam gwa.>>

Yesu shirǝm nan wur den bar biki

¹⁵Nan wu kum untuwo, gon gip mǝn ju kan den ci fingal na Yesu ba wule, <<Mǝn albarkani'e muntu zam tǝ ci fingal gip mulki kǝ Yam gwa.>>¹⁶Yesu nǝmi ti tǝ wule, <<Mbarǝm gon ra kan ne pǝt bar biki gǝsi, arni tǝ yari mbarǝm na womti.¹⁷Nan an mbi kǝ ci bikiyiwo, tǝ kar zher gǝs gon tǝ ri la bi munju tǝ yari wur gwa den'e ko unu piwi, ar mbi'e wu ɗir wi.¹⁸Ama kup na bi nǝm wu nǝm la'i asǝm gipi ka, nǝm wule, <A wur pel kǝn kan nǝmǝn te yarka a ri kǝ zhuwi gwa, pi hakkuri ka.>¹⁹Gon ba wule, <A'i wur tla gi kǝn gudǝli kutl, a ri kǝ ɓomi gǝzǝn den kǝn ituwi, pi hakkuri ka.>²⁰Untu esi gon ba wule, <I gudlumin ni, a zam ritǝn da'a.>

²¹Zheri pal ɗir tǝ bali babom gǝs bar ju wu yari kup gwa. Kan lo ba ci babomi, kan tǝ wul zher gǝsi es'e, <Zho'i kǝ kop guntǝp kǝ gip bǝn kup, kǝ ɗirim munju kan ra na bar kǝ am da gwa, na kurki, na tabi, na munju itǝr tle wur amka ko asǝmka gwa.>²²Zheri pal ɗir tǝ wul babom gǝsi'e, <Argon tu kǝ yarimo a piwi, artu nami las i.>²³Babomi ba wul zher tu es'e, <Pal rǝn den guntǝp kǝ gip bǝn na kǝ bi lǝpka kǝ la bi mbarǝm ɗiri, dǝ ba dǝmi ju la'i.>²⁴Na yari ine, mbarǝm nǝm ra gip munju kan yari wur biki kǝn kan ba la lǝka den fingal gǝn gwa da'a.> >>

Kopi Yesu banyi

²⁵Bar womti mbarǝm den ritǝn na Yesu, kan tǝ bal ti den wur tǝ wule,²⁶<< Murgon tu ba kopǝn kup, tin tǝ ndu'ǝm nar man bas ko nas ko gǝr gǝs, na mimir gǝsi, na mǝn gǝs mǝtli na moni, har ma tǝ nge gam gǝs dawo, ti mani dǝmi mǝn kopi gǝn da'a.²⁷Muntu kup pǝn gicciye gǝs tǝ kopǝn dawo, ti mani dǝmi mǝn kopi gǝn da'a.²⁸Dǝ wule gon gip kǝnni ba ndu tu'i tlyari bino, ti dǝm tǝ shin mǝnen ti jili den tu'i bini kakani, ti shin ko tǝra na wurpi tu ba tu'i ti gwa diya.²⁹Tin tǝ la gǝs tu'i kan tǝ mani pa'i tu'i dawo, mbarǝm ba gyatli ti.³⁰Wi wule, <Mbarǝm kǝn la gǝs tu'i bine, artu tǝ mbu pa'i da'a.>

³¹<<Ko dǝ wule, gun ni ba ɗǝl kǝ dlan na esi gunye, ai ti dǝm ti shin kakani mǝn bi utu gǝs dubu kutl ba mani dlan na kǝ esi gun kan ra na dubu hauya nǝma?³²Tin tǝ shin ti mani dawo, ti kar mir mǝn kartǝn gǝs wu ri ngen dǝmi zhilǝlǝ tun mǝnja ira na dliyami.³³Untuwo, muntu kup za argon tu tǝra narika tǝ kopǝn dawo, ti mani dǝmi mǝn kopi gǝn da'a.

Misali ki masi

³⁴Maso ho barni, ama tǝmtǝn gǝsni ɗǝlkawo, ba'i mani pali gǝs masa?³⁵Ar ba'i pi argon gip kǝn da'a, ba'i dǝm ghop da'a, sai dǝ shotika katl. Muntu na kǝm kumi gwa naa tǝ kumi.>>