Read LUK 1

LUK1

¹Mbarǝm na womti rǝsh den bar ju kan pi gip dlom gǝmi gwa.²Wu rǝsh bar ju mǝ kum gwa, bi dǝ munju shin bar ju na ger gǝzǝn terka kan den ritǝn gip dlom gǝmi kan wu yari jen shirǝm kǝ Yam gwa, wi ni wu bi mi.³Den untuwo, ar ni na gam gǝni a zhit bar kup na ne gǝs kǝ pitǝn gǝzǝn, ar ni a shin ar ndari'e a rǝshi'i bar kup ndekes, mǝn nartǝn Tiyopilus,⁴kǝ dǝ kǝ mom ge shirǝm kǝ bar ju kan kulci'i kup gwa.

Yari gǝri kǝ Yohana mǝn pi Batisma

⁵Gip muri ju kan Hiridus ra den dandi kǝ Yahudiyawo, mǝn keri bar ju ɗiri Yam gon ra muntu na sun'e Zakariya gwa, ti ni gip mǝn keri bar ju ɗiri Yam kan gǝs dǝ Abaya gwa, nagǝr gǝs Alisabatu pawo gǝs gal kǝ Haruna ni. ⁶Kup gǝzǝn mǝn bǝrti Yam kan pi mbuni dǝmi cina dǝ Yam gwani, wu kop doka kǝ Yam kup asǝm na gǝse.⁷Ama wira na mimir da'a domici Alisabatuwo njikǝn ni, win ju ngap wu korsi wi.

⁸Gasi gon, nan Zakariya ra den pi mbap gǝs kǝ mǝn keri bar ju ɗiri Yam den am kǝ mbarǝm cina dǝ Yami, nan an ɗir den kungiya gǝzǝn gwa,⁹den bi al'ada kandatu ne kǝ dǝ mǝn keri bar ju ɗiri Yam den am kǝ mbarǝm wu kop gwa, ba zǝzar ti kǝ tǝ te gip Bom kǝ Yam dǝ tǝ la kunu mǝn tǝmi kasǝri.¹⁰Mbarǝm na womti eso wu ra kari, wu den shirǝm na Yam, nan den la'i kunu mǝn tǝmi kasǝri gwa.

¹¹Kan mǝn kartǝn kǝ Yam ba ɗǝl kar Zakariya, dlor den am shimli kǝ ba la'i kunu mǝn tǝmi kasǝri.¹²Nan Zakariya shin tǝwo, ar ni mbatl tari ti kan bǝrti ba nǝm ti.¹³Ama mǝn kartǝn kǝ Yami wul ti'e, <<Ba kǝ kum bǝrti da'a, Zakariya, Yam kum lirtǝn gi wi. Nagǝr gi Alisabatu ba gǝri'i nya, ki ne ti sun'e Yohana.¹⁴Ti dǝmi'i bar kǝ ghol mbatl na kumi tǝmi, mbarǝm na womti ba pi ghol mbatl na gǝri gǝsi,¹⁵ti dǝm mǝn nartǝn cina dǝ Babom Yami. Ti tla ɗu da'a na bar mǝn hutǝn kup, bar mǝn kemi gheri gami. Yam ba la'i ti na Ruhu gǝsi tun te tu dǝ naska.¹⁶Ti pali mbarǝm kǝ Isra'ila na womti ɗir kar Babom Yam gǝzǝni.¹⁷Ti ri cina dǝ Babom gip Ruhu na iko kǝ mǝn yari shirǝm kǝ Yam Iliya, ti pali mbatl kǝ mǝn gǝri kar mimir gǝzǝni, kan mǝn nge kopi shirǝm es den ho tǝp kǝ mǝn bǝrti Yami, ti kǝrkǝm mbarǝm kǝ dǝ wu dǝm mǝn bǝrti Babomi.>>

¹⁸Zakariya wul mǝn kartǝn kǝ Yami'e, <<Imni a mani momi argon tu kǝ yari ba pi rawu? Ami korsi ni nagǝr gǝn ngapo sheti ghon gǝs womti wi.>>

¹⁹Mǝn kartǝn kǝ Yami nǝmi ti, tǝ wule, <<Ami ni'e Jibra'ilu, a dlǝr cina dǝ Yami, arni kan ba karǝm dǝ a shirǝm nan ki, a yari'i zo shirǝm kǝni.²⁰Kǝkǝno ki sa shot, ki'i mani shirǝm da'a, se gas tu kan bar tu ni piwi gwa, den kǝ la shirǝm gǝn mbatl da'a, muntu ba dǝm hoyi den kanda tu a yari gwa.>>

²¹Mbarǝm ba dlǝr wu den ɓuti dǝ Zakariya ɗǝl teri, wu den damtǝn den ununu kem tǝ ɗǝl ter gip Bom kǝ Yam bǝle da'a.²²Nan tǝ ɗǝl tero, tǝ'i mani shirǝm nan wur da'a. Wu mom'e tǝ shin ni ruya gip Bom kǝ Yami kan tǝ nǝm shirǝm nan wur na ame, ama tǝ'i mani shirǝm da'a.

²³Nan pǝt mbap gǝs pawo, ar ni tǝ pal rǝn bomka.

²⁴Den kar kǝ untuwo, kan nagǝr gǝs Alisabatu ba zam tu'e, ar ni tǝ ghundǝr gam gǝska kǝ kyar nantam gip bomi.²⁵Alisabatu wule,<<Yam ni pim untu, Gip muri jino Babom Yam shin guna gǝni, tǝ ɗǝlim shamka gip mbarǝme.>>

Yari gǝri kǝ Yesu

²⁶Gip kyar kǝ mukka na zami tu kǝ Alisabatuwo, Yam kar mǝn kartǝn gǝs Jibra'ilu su gip bǝn Nazarat kan ra gip atl kǝ Galili gwa,²⁷kar nye gǝr kan mom moni wi da'a, muntu Isubu gǝs gal kǝ Dauda ri o da ti gwa, tǝ pǝn gip mbatl gǝs tǝ gudlǝmi nan ti gwa, sun kǝ nye gǝri'e Maryamu.²⁸Mǝn kartǝn kǝ Yami ri kar ti tǝ wul ti'e, <<Dǝ shirmi ika! Babom Yam ba kum tǝmi gi, Babom Yam ra nan ki.>>

²⁹Nan Maryamu kum shirmitǝn tuwo ar dlǝkǝn ti hoyi, tǝ den damtǝn den'e unu shirmitǝn utu untu.³⁰Ama mǝn kartǝn kǝ Yami wul ti'e, <<Ba dǝ bǝrti ci'i da'a Maryamu, kǝ zam cirtǝn cina dǝ Yam wi.³¹Ki zam tu'e, ki gǝr nya, ki ne ti sun'e Yesu.³²Ti dǝm bar mbarǝme, ba wul ti’e nya bar gun kǝ to yamka, Babom Yam ba bi ti dandi kǝ bas Dauda.³³Ti pi mulki gam bom kǝ Yakubu bat na patǝni, mulki gǝs ba pa da'a!>>³⁴Maryamu wul mǝn kartǝn kǝ Yami'e, <<Imnu untu ba pi rawu, ami kan a mom momi wi da gwawu?>>

³⁵Mǝn kartǝn kǝ Yami nǝmi ti, tǝ wule, <<Ruhu kǝ Yam ba sur den ki, iko kǝ Bar Gun kǝ to Yamka baa ghum kika. Ra untuwo, nya tu ki gǝriwo ti nǝra na wani pitǝn da'a, ba wul ti'e Nya Yami.³⁶Ar tu erǝm gi Alisabatu nan ba wule ti njikǝn ni ma na korsitǝn gǝsi, kǝkǝn untu tǝra na tu kyar mukka.³⁷Argon ra da'a kan Yam ba mbu pi da gwa.>>

³⁸Maryamu nǝmi ti tǝ wule, <<Ami zher kǝ Yam ni, naa ar dǝmim untu den yari gi.>> Ar ni mǝn kartǝn kǝ Yami ndara.

Maryamu ri kar Alisabatu

³⁹Murka njemo, ar ni Maryamu tli na zhotǝne tǝ ri gip bǝn gon gip atl tlǝndǝr kǝ mǝn Yahuda,⁴⁰las tu Zakariya ra gwa, tǝ te gip bomi, tǝ shirmi Alisabatu.⁴¹Nan Alisabatu kum shirmitǝn kǝ Maryamuwo, ar ni nya kǝ te tu gǝska jiti ti, kan ba la'i Alisabatu na Ruhu kǝ Yami.⁴²Tǝ shirǝm na bar yar tǝ wule, <<Ki mǝn albarka ni gip mǝtli, nya tu ki gǝriwo mǝn albarkani!⁴³Unun kem zo bar kǝn zamǝn untu, nan nasi Babom gǝn ba ɗir ra karǝm gwa wu?⁴⁴Nan shirmitǝn gi su kǝm damo, arni nya kǝ te tu gǝnka jiti ti na ghol mbatli.⁴⁵Mǝn albarka ni'e muntu nǝm'e shirǝm tu Yam yari tiwo, ar ba pi untu gwa.>>

Maryamu wuli kon ɗǝɗa Yami

⁴⁶Arni Maryamu wule,<<Mbatl gǝn ba ɗǝɗa Babom Yami.⁴⁷Ruhu gǝn ba pi pighol mbatl gip Yam mǝn ɗǝli gǝni.⁴⁸Don tǝ mom namǝni,ami zher gǝs gǝr mǝtli ni kan ami argon ni da gwa.Cina ɗewo mbarǝm kup ba wulǝm'e, <ki mǝn albarkani,>⁴⁹den bar ju kan Yam mǝn nartǝn pim gwa,sun gǝso dlǝran ni ar ra.⁵⁰Guna gǝs ba ri den mǝn ju ba bi ti nartǝn gwa,zhan ar kop zhan.⁵¹Ya pi kiri mbap na am gǝs mǝn ndǝrtǝn,tǝ gǝzan mǝn dlari gamka na kup arjen ju ba se wur gip mbatl gǝzǝn gwa.⁵²Ya shu gunka den dandi gǝzǝni,kan tǝ ɗǝɗa mun ju kan mom nan wur dagwa.⁵³Tǝ la'i tu kǝ mǝn kumi guzum na mbuni bari,kan ti za mǝn bar kǝ am am koni.⁵⁴Tǝ ne am zher gǝs Isra'ila ra,tǝ tune na gudlǝm shirǝm gǝs kǝ kumi guna'i⁵⁵den tǝ pi ga gigi gǝmiIbǝrahim na mimir gǝs kǝ kumi guna gǝzǝn an ri patǝn bari.>>

⁵⁶Maryamu dǝm na Alisabatu wule kǝ kyar myakan kan tǝ pal rǝn bomka.

Gǝri kǝ Yohana mǝn Batisma

⁵⁷Nan pǝt mbi rawi kan Alisabatu ba gǝr nya gǝso, ar ni tǝ gǝr nye moni⁵⁸Berǝm dǝmi na mǝn gǝs nan wu kum zo bar tu Yam pi tǝwo, ar ni wu pi ghol mbatl nan ti.

⁵⁹Nan muri wuzupse la'i wo, ar ni wu ɗir kǝ dǝ wu sǝr nyayi. Wu ndu far'e wu ne ti sun kǝ bas Zakariya,⁶⁰ama nas nge gǝs tǝ wule, <<O'o, dǝ la ti bi'e Yohana.>>

⁶¹Wu wul ti'e, <<Murgon ra gip mǝn gi na sun tu daa.>>⁶²Ar ni wu pi bas ame, kǝ dǝ wu mom unu sun ni tǝ ndu'e dǝ ne nyayi.⁶³Tǝ liri ba rǝshi, ar ni tǝ rǝshi, <<Sun gǝs'e Yohana.>> Bar tu dlǝkǝn mbarǝm ju ra lasi gwa.⁶⁴Bartu, ar ni bi kǝ Zakariya ɓuli, tǝ shirǝme, kan tǝ nǝm ɗǝɗa Yami.⁶⁵Kan bǝrti ba nǝm berǝm dǝmi gǝzǝn kup, mbarǝm ba nǝm yari shirǝm den bar tu nan pi untu gwa, kup gip atl mǝn tlǝndǝr kǝ mǝn Yahuda.⁶⁶Kup muntu kum shirǝm tuwo, tǝ wul tor gip mbatl gǝs'e, <<Imni nya tu bari kǝ dǝmiwe?>> Den wu momi am kǝ Yam ra nan ti.

Zakariya wuli kon ɗǝɗa Yami

⁶⁷Bas Zakariya laa na Ruhu kǝ Yami, ar ni tǝ yari shirǝm kǝ Yam tǝ wule,⁶⁸<<Mǝ ɗǝɗani Babom Yam kǝ Isra'iladen tǝ ɗir kar mbarǝm gǝs tǝ ɗǝli wuri.⁶⁹Tǝ bi mi mǝn ɗǝli gǝmi mǝn ikogip bom kǝ zher gǝs Dauda.⁷⁰Kanda tu tǝ yari terka bi dǝ mǝn yari shirǝm kǝ Yam mǝn tsarki.⁷¹Den mii zam ɗǝltǝn wi am dǝ mǝn nge gǝmi,na mǝn ju ba ndu mi da gwa.⁷²Yam gode kori gǝmi guna gere,kan tǝ tune na gudlum shirǝm gǝs kǝ far mǝn tsarki nan tǝ pi wur gwa.⁷³Gudlum shirǝm tu nan tǝ yari kori gǝmi kǝ far Ibǝrahim.⁷⁴Tǝ ɗǝli mi am dǝ mǝn nge gǝmi,kǝ dǝ mǝ bote ti bat na bǝrti.⁷⁵Mǝ dǝm ni dlǝran na pitǝn dlat cina dǝ Yam gip muri gǝmi kup.

⁷⁶Ki nya gǝn eso, ba la kibi'e mǝn yari shirǝm kǝ bar Gun kǝ to yamka.Ki ri cina dǝ Babomi, kǝ kǝrkǝmi ti guntǝpe.⁷⁷Ki yari mbarǝm gǝs kandatu wi zam tǝp ɗǝltǝn gip dun mbatltǝp kǝ ba ho’i warwat pitǝn gǝzǝnka gwa.⁷⁸Gip womti shini guna kǝ Yam gǝmi,cirtǝn kǝ pǝt kan ba ɗǝl tor gǝsi ba ɗǝl sur yam an cir den mi, ⁷⁹ar ba cir den mǝn dǝmi gip dǝmǝni,na gip gos kǝ mǝshtǝni,ar baa kop nan mi den tǝp kǝ dǝmi zhilili.>>

⁸⁰Yohana nyayi nari, tǝ dǝm na ndǝrtǝn gip ruhu, tǝ dǝm gǝs rǝn gip lǝpka se gastu kan tǝ ɗǝl ɗir gip mbarǝm kǝ pi mbarǝm kǝ Isra'ila wazu gwa.